ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܒ: ܝܛ ـ ܟܒ܇ ܓ: ܐ ـ ܝܒ Ephesians 2:19-22, 3:1-12

ܡܽܐܘܥܕܳܐ ܘܰܐܙܳܠܳܐ، ܠܰܬܬܰܐܬܽܘ ܠܳܐ ܢܽܘܟ̥ܪ̈ܳܝܶܐ ܘܠܳܐ ܕ̥ܰܝ̈ܦܶܐ. ܐܶܠܳܐ ܡܰܪܥܺܝܬ̣ܳܐ ܥܰܡܰܐ ܩܰܕ̈ܺܝ̣ܫܶܐ، ܘܰܐܒ̈ܢܶܐ ܕܽܐܘ ܒܰܝܬܳܐ ܕܰܐܠܳܗܳܐ. ܥܰܡܺܝܪ̈ܶܐ ܥܰܠܽܐܘ ܐܰܣܰܣ ܕܰܫ̈ܠܺܝ̣ܚܶܐ ܘܕܰܢ̈ܒܺܝܶܐ ܘܕܝܶܫܽܘܥ ܡܫܺܝ̣ܚܳܐ، ܕܟܶܬܝܳܐ ܐܺܝ̣ ܟܶܐܦܳܐ ܕܪܺܝܫܰܐ ܕܺܐܝ ܩܽܘܪܢܺܝܬ̥ܳܐ. ܟܽܠ ܥܡܰܪܰܐ ܕܟܶܬܝܳܐ ܐܶܒܶܗ̱ ܒܢܺܝ̣ܬ̥ܳܐ، ܓܝܶܪܘܳܐ ܗܰܝܟܠܐܳ ܩܰܕܺܝܫܳܐ ܒܰܐܠܳܗܳܐ. ܗܰܬܽܘ ܣܬܶܐ ܐܶܒܶܗ̱ ܥܰܡ ܚܕ̥ܳܕ̥̈ܶܐ، ܥܰܡܺܝܪ̈ܶܐ ܗܰܬܽܘ ܥܡܰܪܰܐ ܠܰܐܠܳܗܳܐ ܒܺܐܝ ܪܽܘܚܳܐ. ܥܰܠܗܰܬ̥ܶܐ، ܐܳܢܳܐ ܦܰܘܠܽܘܣ ܡܰܨܪܳܐ ܕܝܶܫܽܘܥ ܡܫܺܝܚܳܐ ܥܰܠ ܦܳܬ̣ܰܝܟ̣ܽܘ ܝܰܐ ܥܰܡ̈ܶܐ. ܫܰܡܺܝܥܺܝܬܽܘ̣ ܐܺܝ ܡܕܰܒܪܳܢܘ̣ܬܳܐ ܕܺܐܝ̣ ܛܰܝܒܽܘ̣ܬ̥ܳܐ ܕܰܐܠܳܗܳܐ ܕܗܺܝܘܳܐ ܐܶܠܺܝ ܠܰܫܰܢܰܝܟ̥ܽܘ. ܒܽܐܘ ܓܶܠܝܳܢܳܐ ܡܰܘܕ̥ܰܥܠܶܗ ܠܺܝ ܐܽܘ̣ ܐ̱ܪܳܙܳܐ. ܟ̣ܶܕ ܟܬ̣ܽܘܠܺܝ ܐܰܠܟ̣ܽܘ ܒܟܰܪܝܳܐ. ܚܰܬܬܰܐ ܐܺܝ ܢܰܩܩܰܐ ܕܩܳܪܽܘܬܽܘ، ܕܩܳܕܪܺܝܬܽܘ ܦܶܗܡܽܘܬܽܘ ܐܽܘܡܰܕ̥ܥܰܝܕ̥ܺܝ ܕܒܽܐܘ ܐ̱ܪܳܙܳܐ ܕܶܡܫܺܝ̣ܚܳܐ. ܗܰܘܳܐ ܕܒܰܕܕܳܪ̈ܶܐ ܐ̱ܚܪ̈ܶܢܶܐ ܠܳܐ ܝ̣ܺܕ̥ܺܝ̣ܥ ܠܰܐܢ̈ܢܳܫܶܐ܆ ܟ̣ܶܕ ܐܽܘܥܕܳܐ ܓܠܶܐ ܠܰܫܠܺܝ̣ܚܰܝ̈ܕ̥ܶܗ ܐܰ ܩܰܕܺܝ̣̈ܫܶܐ، ܘܠܰܢܒܺܝܰܝ̈ܕ̥ܶܗ ܒܺܐܝ ܪܽܘܚܳܐ. ܠܰܫܰܢ ܕܗܳܘܶܢ ܐܰܥܥܰܡ̈ܶܐ، ܫܳܪ̈ܺܝܟܶܐ ܒܺܐܝ ܘܰܪܰܬ̣ܰܐ، ܘܒܽܐܘ ܦܰܓܪܰܝܕܶܗ، ܘܒܽܐܘ ܫܩܳܠܐ ܕܽܐܘ ܘܰܥܕܰܝܕܶܗ، ܒܺܐܝ ܘܰܨܺܝܛܰܐ ܕܽܐܘ ܡܓܰܠܝܶܢ. ܗܰܘܳܐ ܕܗܰܘܺܝܢܳܐ ܠܶܗ ܟ̣ܰܕܳܡܳܐ، ܟ̣ܕܺܝ ܡܰܘܗܰܒܬܳܐ ܕܺܐܝ ܛܰܝܒܽܘܬ̣ܳܐ ܕܰܐܠܳܗܳܐ ܕܗܺܝܘܳܐ ܐܶܠܺܝ ܡܽܘ ܥܰܡܰܠ ܕܽܐܘ̣ ܚܰܝܠܰܝܕ̥ܶܗ. ܐܳܢܳܐ ܕܟܶܬܢܳܐ ܐܽܘ ܢܰܥܺܝܡܳܐ ܕܟܽܠܠܶܗ ܐܰ ܩܰܕ̈ܝܫܶܐ، ܠܰܫܰܢ ܕܶܡܒܰܫܰܪ ܐ̱ܢܳܐ ܒܰܝܢܰܐ ܥܰܡ̈ܶܐ ܐܽܘ ܡܰܐܠ ܕܶܡܫܺܝ̣ܚܳܐ ܕܠܳܐ ܓܡܺܝܥܰܩܶܒ، ܗܺܝܘܳܐ ܐܺܝ ܛܰܝܒܽܘܬ̣ܰܬ̣ܶܗ. ܘܕܡܳܕ̥ܰܥ ܐ̱ܢܳܐ ܠܟܽܠ ܐ̱ܢܳܫܳܐ، ܡܶܢܝܳܐ ܐܺܝ ܡܕܰܒܪܳܢܽܘܬ̥ܐ ܕܽܐܘ ܐ̱ܪܳܙܳܐ ܡܟܰܣܝܳܐ ܕܡܰܕܕܳܪ̈ܶܐ ܒܰܐܠܳܗܳܐ ܐܽܘ ܒܳܪܽܘܝܳܐ ܕܟܽܠ؟ ܚܰܬܬܰܐ ܕܥܰܠ ܐܺܝܕ̥ܰܐ ܕܺܐܝ ܥܺܕܬܳܐ، ܕܡܺܝܕ̥ܳܥܳܐ ܐܺܝ̣ ܚܶܟܡܶܐ ܕܰܐܠܳܗܳܐ ܐܺܝ ܡܫܰܟܰܠܬܳܐ ܠܰܪ̈ܺܝܫܳܢܶܐ، ܘܠܰܫܽܘ̈ܠܛܳܢܶܐ، ܕܒܺܐܝ ܫܡܰܝܳܐ. ܗܰܝܳܐ ܕܶܡܚܰܕ̥ܪܳܐ ܗ̱ܘܰܝܠܶܗ ܡܰܐ ܕܳܪ̈ܶܐ، ܘܣܺܝܡܳܐ ܠܶܗ ܒܝܶܫܽܘܥ ܡܫܺܝܚܳܐ ܡܳܪܰܢ. ܗܰܘܳܐ ܕܶܐܒܶܗ̱ ܟܶܬܠܰܢ ܦܳܬ̣ܳܐ ܓܠܺܝܬ̥ܳܐ، ܘܩܰܪܺܝܘܽܘܬ̣ܳܐ ܒܽܘ ܬܽܘܟ̣ܠܳܢܳܐ ܕܺܐܝ̣ ܗܰܝܡܳܢܽܘܬ̥ܳܐ ܕܶܐܒܶܗ. ܒܰܪܶܟ̥ܡܳܪܝ̱ ܀