ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܐ: ܐ ـ ܝܚ Galatians 1:1-18

ܦܰܘܠܳܘܣ ܐܽܘ ܫܠܺܝ̣ܚܳܐ ܠܳܐ ܡܰܢ̈ܢܳܫܶܐ܆ ܘܠܳܐ ܥܰܠ ܐܺܝܕ̥ܶܗ̱ ܕܐ̱ܢܳܫܳܐ. ܐܶܠܳܐ ܥܰܠ ܐܝ̣ܕܶܗ ܕܝܶܫܽܘܥ ܡܫܝ̣ܚܳܐ، ܘܰܐܠܳܗܳܐ ܐܽܘ ܐܰܒܳܐ ܕܡܰܩܶܡܠܶܗ ܡܒܰܝܢܰܐ ܡܺܝ̣̈ܬ̥ܶܐ܆ ܘܟܽܠܠܶܗ ܐܰܢܢܰܚܽܘ̈ܢܳܢܶܐ ܕܰܐܥܡܺܝ܆ ܘܰܐ ܥܺܕ̈ܳܬ̣ܳܐ ܕܶܒܓܰܠܰܛܝܰܐ܆ ܛܰܝܒܽܘܬ̣ܳܐ ܐܠܰܟ̣ܽܘ ܘܫܠܳܡܳܐ ܡܰܐܠܳܗܳܐ ܐܽܘ ܐܰܒܳܐ܆ ܘܡܶܐ ܡܳܪܰܢ ܝܶܫܽܘܥ ܡܫܺܝܚܳܐ. ܗܰܘܳܐ ܕܗܽܘܠܶܗ ܪܽܘܚܶܗ ܡܶܚܠܰܦ ܐܰ ܚܛܳܗܰܝ̈ـܕܰܢ، ܠܰܫܰܢ ܕܡܰܟ̣ܠܰܨ ܠܰܢ ܡܽܐܘ ܥܳܠܡܰܐܢܳܐ ܐܽܘ ܒܺܝ̣ܫܳܐ܆ ܟ̣ܕܽܘ ܨܶܒܝܳܢܳܐ ܕܰܐܠܳܗܳܐ ܐܽܘ ܐܰܒܰܝܕ̥ܰܢ ܕܐܶܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ. ܓܡܺܝܕܰܘܡܰܪ ܐ̱ܢܳܐ ܐܰܒܟ̥ܽܘ، ܐܰܝܕܰܪܒܳܐ ܗܰܘܟ̥ܰܐ ܟ̥ܰܐܝܺܦܳܐ ܓܕܳܥܪܽܘܬܽܘ ܡܶܐ ܡܫܺܝܚܳܐ܆ ܗܰܘܳܐ ܕܶܩܪܶܠܰܠܟ̣ܽܘ ܒܺܐܝ ܛܰܝܒܽܘܬ̣ܰܝܕ̥ܶܗ، ܠܶܡܓܰܠܝܶܢ (ܟ̥ܶܒܰܐܪ) ܐ̱ܚܪܶܢܳܐ! ܗܰܘܳܐ ܕܠܰܝܬ. ܐܶܠܳܐ ܟܺܝܬ ܐ̱ܢܳܫ̈ܳܐ ܕܟܳܫܽܘܓ̣ܫܶܢܟ̣ܽܘ܆ ܘܟܶܐܒܥܺܝ ܕܶܡܚܰܠܦܺܝ ܐܽܘ ܡܓܰܠܝܶܢ ܕܶܡܫܺܝ̣ܚܳܐ. ܐܺܝܕ̥ܰܐ ܐܰܚܢܰܐ܆ ܘܺܐܝܕܰܐ ܡܰܠܰܐܟܳܐ ܡܺܐܝ ܫܡܰܝܳܐ܆ ܕܟܳܪܶܙ ܐܰܥܠܰܝܟ̣ܽܘ ܓ̥ܰܝܪ ܡܽܘ ܡܶܕܶܐ ܕܶܟܪܶܙ ܠܰܢ ܐܰܥܠܰܝܟ̣ܽܘ܆ ܗܳܘܶܐ ܡܰܚܪܡܳܐ. ܟ̣ܶܕ ܡܶܐ ܡܶܐܩܶܡ ܐ̱ܡܶܪܠܺܝ܆ ܘܽܐܘܥܕܳܐ ܢܰܩܩܰܐ ܚܪܶܬܳܐ ܟܳܐܡܰـܪ ܐ̱ܢܳـܐ܆ ܐܺܝܕ̥ܰܐ ܐ̱ܢܳܫܳـܐ ܕܟܳـܪܶܙ ܐܰܥܠܰܝܟ̣ܽܘ ܓ̥ܰܝܪ ܡܽܐܘ ܡܶܕܶܐ ܕܡܰܩܒܰܠܟ̣ܽܘ܆ ܗܳܘܶܐ ܡܰܚܪܡܳـܐ. ܩܰـܝ ܐܽܘܥـܕܳܐ ܐܳܢܳܐ܆ ܟ̥ܶܕ ܟܶܐܒܥܺܝ ܐܰ ܐ̱ܢܳܫ̈ܶܐ ܣܳܝܰܡ ܐ̱ܢܳܐ܆ ܝܰـܐ ܐܰܠܳܗܳܐ؟ ܝܰܐ ܡܒܰܣܰܡ ܐܢܳـܐ ܥܰܡܰـܐ ܐ̱ܢܳܫ̈ܶܐ؟ ܐܺܝܕ̥ܰܐ ܗܽܘܠ ܠܐܽܘܥܕܳܐ ܕܣܳܝܰܡ ܗ̱ܘܰܝܢܳـܐ ܐ̱ܢܳـܐ ܟ̥ܶـܕ ܟܶܐܒܥܺܝ ܐܰܢܢܳܫ̈ܶܐ܆ ܓܪܶܥܳܐ ܠܶܡܫܺܝ̣ܚܳــܐ ܠܳܐܗ̱ܘܶܐ ܗ̱ܘܰܝܢܳـܐ. ܟܳܡܳـܕܰܥ ܐ̱ܢܳـܐ ܐܠܰܟ̣ܽܘ ܐܰܚ̈ܶܐ: ܐܽܘ ܡܓܰܠܝܶـܢ ܕܶܟܪܺܝـܙ ܡܶܢܺـܝ، ܠܳܐ ܡܶܐ ܐ̱ܢܳܫܳܐ ܡܶܕܠܺܝ܆ ܘܠܳܐ ܡܶܐ ܐ̱ܢܳܫܳܐ ܡܰܩܒܶܠܺܝ ܘܝܰܠܶܦܢܶܐ. ܐܶܠܐܳ ܒܽܐܘ ܓܶܠܝܳܢܳܐ ܕܝܶܫܽܘܥ ܡܫܺܝܚܳܐ. ܒܰܪܶܟ̥ܡܳܪܝ̱ ܀