ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܐ: ܐ ـ ܝܕ܇ ܒ: ܐ ـ ܕ Hebrews 1:1-14, 2:1-4

ܥܰܠ ܠܺܝ̣̈ܫܳܢܶܐ ܕܰܢ̈ܒܺܝܶܐ ܡܶܐ ܡܶܩܶܡ، ܒܫܶܟܶܠ ܟ̥ܶܨܽܘܨܺܝ، ܘܒܕܰܪ̈ܒܳܢܶܐ ܦܪ̈ܺܝ̣ܫܶܐ، ܔܓ̥ܺܝܠ ܐܰܠܳܗܳܐ ܥܡܰܐ ܒܰܐܒܳܢܰܝ̈ܕܰܢ. ܘܒܰܝܰܘ̈ܡܳܬܰܢܺܝ ܐܰ ܐ̱ܚܰܪ̈ܳܝܶܐ، ܔܓ̥ܺܝܠ ܐܰܥܡܰܢ ܒܽܐܘ ܐܰܒܪܰܝܕ̥ܶܗ ܕܣܶܡܠܶܗ ܝܳܪܽܘܬ̣ܳܐ (ܘܶܐܪܶܣ) ܠܟܽܠ ܡܶܕܶܐ. ܘܶܐܒܶܗ ܟ̣ܠܶܩ ܠܶܗ ܐܰ ܥܳܠܡ̈ܶܐ. ܘܗܺܝ̣ܝܶܐܝܳܐ ܐܽܘ ܒܰܗܪܳܐ ܕܽܐܘ ܫܽܘܒܚܰܝܕ̥ܶܗ̱ ܘܺܐܝ ܨܽܘܪܬܳܐ ܕܽܐܘ ܔܰܘܗܰܪܰܝܕ̥ܶܗ̱. ܘܟܳܛܳܥܶܢ ܟܽܠ ܡܶܕܶܐ ܒܽܐܘ ܚܰܝܠܳܐ ܕܺܐܝ ܡܶܠܬ̣ܰܝܕܶܗ̱. ܘܒܶܬ̥ܬ̥ܶܪ ܡܶܕ ܣܶܡܠܶܗ ܒܪܽܘܚܶܗ ܡܣܰܡܰܚܰܐ ܠܰܚ̈ܛܳܗܰܝܕ̥ܰܢ، ܝܰܐܬܽܘ ܥܰܠܽܐܘ ܝܰܡܺܝܢܳܐ ܕܺܐܝ ܪܰܒܽܘܬ̣ܳܐ ܒܰܥܽܘ̈ܠܝܶܐ. ܘܝܰܐܪܽܘ ܙܶܬ ܡܰܡ̈ܠܰܐܟ̥ܶܐ، ܘܡܶܕ ܠܶܗ ܐܶܫܡܳܐ ܛܰܘ ܡܰܢܕܶܬ̣ܬ̣ܶܗ̱. ܠܐܰܝܢܰܐ ܡܰܐ ܡܰܠܰܐܟܶـ̈ܐ ܩܰܛܥܺܝܰܢ ܐ̱ܡܶܪܠܶܗ ܐܰܠܳܗܳܐ، ܐܽܘ ܐܰܒܪܰܝܕ̥ܺܝ ܗܰܬ، ܘܳܐܢܳܐ ܐܰܕܝܰܘܡܰܐ ܡܰܘܠܰܕܠܺܝ ܠܳܟ؟ ܘܐ̱ܡܶܪ ܠܶܗ: ܐܳܢܳܐ ܓܬܳܗ̱ܘܶܐ ܐ̱ܢܳܐ ܠܶܗ ܒܰܐܒܳܐ، ܘܗܺܝܝܶܗ̱ ܓܬܳܗ̱ܘܶܐ ܠܺܝ ܐܰܒܪܳܐ. ܘܗܰܡ ܐܺܝ ܢܰܩܩܰܐ ܕܡܰܥܒܰܪ ܠܶܗ ܐܽܘ ܒܶܟܶܪ ܠܽܐܘ ܥܳܠܡܳܐ ܣܬܶܐ ܐ̱ܡܶܪ ܠܶܗ܆ ܓܣܽܘܓ̣ܕܺܝ ܠܶܗ ܟܽܠܠܶܗ ܐܰ ܡܰܠܐܰܟ̥̈ܶܐ ܕܰܐܠܳܗܳܐ. ܘܥܰܠܰܐ ܡܰܠܰܐܟ̈ܶܐ ܐ̱ܡܶܪ̱ܠܶܗ: ܣܶܡܠܶܗ ܐܰ ܡܰܠܰܐܟ̥ܰܝ̈ܕܶܗ ܪ̈ܽܘܚܶܐ، ܘܰܡܫܰܡܫܳܢܰܝ̈ܕܶܗ (ܟ̥ܰܕ̈ܳܡܰܝܕ̥ܶܗ̱) ܢܽܘܪܳܐ ܕܟܳܕܶܠܩܳܐ. ܥܰܠܽܘ ܒܪܳܐ ܐ̱ܡܶܪ ܠܶܗ: ܐܽܘ ܟܽܘܪܣܺܝܰܝܕܳܟ̣ ܝܰܐ ܐܰܠܳܗܳܐ ܠܥܳܠܰܡ ܥܳܠܡܺܝܢ ܝܳܐ. ܘܺܐܝ ܚܰܛܪܳܐ ܕܺܐܝ ܡܰܠܟܽܘܬܰܝܕܳܟ ܚܰܛܪܳܐ ܕܺܐܝ ܫܰܪܺܝܪܽܘܬ̣ܳܝܳܐ (ܥܰܕܰܠܰܝܳܐ). ܪܚܶܡ ܠܳܟ̣ ܐܺܝ ܙܰܕܺܝܩܽܘܬ̣ܳܐ، ܘܡܥܰܢܰܬܠܳܟ ܡܺܐܝ ܒܺܝܫܬܳܐ (ܚܰܪܒܳܐ). ܥܰܠܰܗ̱ܬ̣ܶܐ ܠܰܐܠܳܗܳܐ ܐܽܘ ܐܰܠܳܗܰܝܕܳܟ ܡܫܶܚܠܶܗ ܠܳܟ ܒܽܐܘ ܡܶܫܚܳܐ ܕܺܐܝ ܦܨܺܝ̣ܚܽܘܬܳܐ ܙܶܬ ܡܰܐ ܚܰܘܪ̈ܳܢܰܝܕܳܟ. ܗܰܬ ܝܰܐ ܡܳܪܝܳܐ ܡܽܐܘ ܪܺܝܫܳܐ ܡܰܚܰܬ ܠܳܟ ܐܰ ܐܰܣ̈ܰܐܣ̈ܶܐ ܕܺܐܝ ܐܰܪܥܳܐ. ܘܰܫܡ̈ܰܝܶܐ ܐܽܘ ܫܽܘܓ̥ܠܳܐ ܕܺܐܝܕܳܟ̥ ܢܶܐ. ܗܶܢܢܶܗ̱ ܓܬܰܝܡܺܝ، ܘܗܰܬ ܓܦܰܝܫܰܬ. ܘܟܽܠܠܶܗ̱ ܟ̣ܕܽܐܘ ܬ̣ܰܘܒܳܐ (ܔܽܘܠܳܐ) ܓܒܰܝܩܺܝ، ܘܓܛܳܘܰܬܬܶܐ ܟ̣ܕܽܘ ܠܒܽܘܫܳܐ. ܗܶܢܢܶܗ̱ ܓܡܺܝܚܰܠܦܺܝ. ܘܗܰܬ ܟ̣ܶܕ ܟܶܬܰܬ ܗܰܬ ܘܰܐܢܢܶܫ̈ܢܰܝܕܳܟ ܠܳܐ ܓܬܰܝܡܺܝ. ܠܡܰܢ ܡܰܐ ܡܰܠܰܐܟ̥̈ܶܐ ܩܰܛܥܺܝܰܢ ܐ̱ܡܶܪܠܶܗ: ܬܰܘ ܡܽܐܘ ܝܰܡܺܝܢܰܝܕ̥ܺܝ܆ ܗܽܘܠ ܕܡܰܚܰܬܐ̱ܢܳܐ ܐܰ ܡܥܰܢܬܳܢܰܝ̈ܕܳܟ ܕܝܰܫܬܳܐ ܬܰܚܬܶܐ ܪ̈ܰܓ̥ܠܳܬܳܟ؟ ܩܰܝ ܠܰܬܢܶܐ ܟܽܠܠܶܗ ܪܽܘܚܶܐ ܕܺܐܝ ܬܶܫܡܶܫܬܳܐ (ܟ̥ܶܕܡܰܐ) ܕܟܳܡܺܝܫܰܕܪܺܝ ܒܺܝ ܬܶܫܡܶܫܬܳܐ ܠܰܫܰܢ ܗܰܢܶܟ ܕܓܶܝܶܪܬ̣ܺܝ ܐܰ ܚܰܝ̈ܶܐ؟ ܥܰܠܰܗ̱ܬ̣ܶܐ ܓܡܰܘܔܶܒ ܙܶܕ ܕܗܳܘܺܝܢܰܐ ܒܗܰܘܢܰܝܢܰܐ ܥܰܠܽܐܘ ܡܶܕܶܐ ܕܫܰܡܺܝ̣ܥܺܝܢܰܐ ܕܠܳܐ ܡܺܝܣܰܐܟܶܪ ܡܰܐܥܠܰܢ. ܐܺܝܕ̥ܰܐ ܐܺܝ ܡܶܠܬ̣ܳܐ ܕܶܔܓ̣ܺܝܠܳܐ ܥܰܠ ܐܺܝ̈ܕܶܐ ܕܰܡܡܰܠܰܐܟ̥̈ܶܐ ܡܬ̣ܰܒܬܳܐ، ܘܟܽܠ ܕܫܰܡܶܥܠܰܗ̱̇ ܘܥܰܒܶܪ ܐܰܥܠܰܗ̇ ܚܟܺܝܡ ܒܥܰܕܰܐܠܰܐ، ܐܰܝܕܰܪܒܳܐ ܐܰܚܢܰܐ ܓܡܰܗܶܙܡܺܝ̣ܢܰܐ ܐܶܢ ܠܽܘܠܰܢ ܐܰܕ̥ܢܳܐ ܠܰܗ̱ܢܺܝ ܕܗܶܢܢܶܐ ܢܶܗ ܐܰ ܚܰܝܰܝ̈ܕܰܢ؟ ܡܺܝ ܒܰܕܰܐܝܶܐ ܡܳܕ̥ܰܥ ܠܶܗ ܡܳܪܰܢ ܝܶܫܽܘܥ ܡܫܺܝ̣ܚܳܐ ܐܽܘ ܟ̥ܰܠܰܨܰܐܢܳܐ. ܘܗܰܢܺܝ ܕܫܰܡܺܝܥܺܝ̣ ܠܶܗ ܣܬܺܝ، ܡܳܕ̥ܰܥܥܶܗ̱ ܐܶܠܰܢ. ܘܟܣܳܗܶܕ ܐܰܠܳܗܳܐ ܐܰܥܠܰܝܝܶܗ ܒܰܥ̈ܡܰܠܰܬ ܘܒܰܬܶܕܡܪ̈ܳܬ̣ܳܐ ܘܒܰܚܰܝ̈ܠܶܐ ܡܫܰܟܠܶܐ، ܘܒܰܡܰܘ̈ܗܒܳܬܳܐ ܕܺܐܝ ܪܽܘܚܳܐ ܩܰܕܺܝ̣ܫܳܐ ܟ̣ܕܽܘ ܨܶܒܝܳܢܰܝܕܶܗ. ܒܰܪܶܟ̥ܡܳܪܝ̱ ܀