ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝ: ܝܕ ـ ܠܓ 1Corinthians 10:14-33

ܕܨܦܪܐ

ܡܰܗ̱ܘܟ̣ܰܐ ܝܰܐ ܐܰ ܚܰܒܺܝ̣̈ܒܰܝܕܺܝ، ܥܪܰܩܽܘ ܡܽܐܘ ܣܓܳܕܳܐ ܕܰܨܰܠܡ̈ܶܐ. ܟܳܐܡܰܪ ܐ̱ܢܳܐ ܟ̣ܶܕ ܠܰܚܰܟܺܝ̣̈ܡܶܐ ܕܽܘܢܽܘ ܗܰܬܽܘ ܐܽܘ ܡܶܕܶܐ ܕܳܐܡܰܪ ܐ̱ܢܳܐ. ܐܽܘ ܟܳܣܳܐ ܕܺܐܝ ܒܽܘܪܟܬ̣ܳܐ ܕܟܳܡܒܰܪܟ̣ܺܝܢܰܐ، ܩܰܝ ܠܰܬܝܳܐ ܫܰܪܰܟܰܐ ܕܽܐܘ ܐܰܕܡܳܐ ܕܶܡܫܺܝ̣ܚܳܐ؟ ܘܽܐܘ ܠܰܚܡܳܐ ܕܟܳܬܰܘܪܺܝܢܰܐ، ܩܰܝ ܠܰܬܝܳܐ ܫܰܪܰܟܰܐ ܕܽܐܘ ܦܰܓܪܳܐ ܕܶܡܫܺܝ̣ܚܳܐ؟ ܟ̣ܶܕ ܐܰܝܕܰܪܒܳܐ ܕܚܰܕ̱ܝܳܐ ܐܽܘ ܠܰܚܡܳܐ، ܗܰܘܟ̣ܰܐ ܣܬܶܐ ܟܽܠܰܢ ܚܰܕ̱ ܔܰܣܰܕܢܰܐ. ܡܺܝܕ̥ܶܐ ܕܟܽܠܰܢ ܚܰܕ̱ ܠܰܚܡܳܐ ܓܡܰܝܕܺܝܢܰܐ. ܟ̣ܕܽܘ ܔܰܣܰܕ ܚܽܘܪܽܘ ܒܺܝܣܪܳܐܶܝܠ. ܩܰܝ ܠܰܬܢܶܐ ܐܰܝܢܰܐ ܕܟܳܟ̣ܠܺܝ ܐܰ ܕܶܒ̈ܚܶܐ ܫܳܪ̈ܺܝܟܶܐ ܠܽܐܘ ܡܰܕܒܚܳܐ؟ ܡܶܢ ܐܳܡܰܪ ܐ̱ܢܳܐ. ܩܰܝ ܐܽܘ ܨܰܠܡܳܐ ܡܶܕܶܝܳܐ؟ ܐܰܘ ܐܽܘ ܕܶܒܚܳܐ ܕܽܐܘ ܨܰܠܡܳܐ ܡܶܕܶܝܳܐ؟ ܠܳܐ. ܐܶܠܳܐ ܐܽܘ ܡܶܕܶܐ ܕܟܳܕܶܒܚܺܝ ܐܰ ܚܰܢ̈ܦܶܐ، ܠܰܫܺـ̈ܐܕܶܐ ܓܕܶܒܚܺܝ̣ ܠܶܗ، ܘܠܳܐ ܠܰܐܠܳܗܳܐ. ܠܳܐ ܓܒܰܥ ܐ̱ܢܳܐ ܕܗܳܘܶܝܬܽܘ ܫܳܪ̈ܺܝ̣ܟܶܐ ܠܰܫܺܐܕ̈ܶܐ. ܠܳܐ ܓܩܽܘܕܪܺܝܬܽܘ ܕܫܳܬܶܝܬܽܘ ܐܽܘ ܟܳܣܳܐ ܕܡܳܪܰܢ، ܘܽܐܘ ܟܳܣܳܐ ܕܰܫܺـ̈ܐܕܶܐ. ܘܠܳܐ ܓܩܽܘܕܪܺܝܬܽܘ ܕܡܺܝܫܰܪܟܺܝܬܽܘ ܒܽܐܘ ܦܳܬ̣ܽܘܪܳܐ ܕܡܳܪܰܢ، ܘܒܽܐܘ ܦܳܬ̣ܽܘܪܳܐ ܕܰܫܺـ̈ܐܕܶܐ. ܩܰܝ ܓܣܰܝܡܺܝܢܰܐ ܓ̣ܺܝܪܰܐܢܺܝ ܠܡܳܪܰܢ؟ ܩܰܝ ܩܘܶܐ ܡܶܢܶܗ ܢܰܐ؟ ܟܽܠ ܡܶܕܶܐ ܡܪܰܟ̣ܣܳܝܳܐ ܐܶܠܺܝ. ܐܶܠܳܐ ܠܰܬܝܳܐ ܟܽܠ ܡܶܕܶܐ ܡܘܰܦܩܳܐ. ܟܽܠ ܡܶܕܶܐ ܡܪܰܟ̣ܣܳܝܳܐ، ܐܶܠܳܐ ܠܳܐ ܟܽܠ ܡܶܕܶܐ ܓܡܰܥܡܶܪ. ܠܳܐ ܛܳܠܶܒ ܐ̱ܢܳܫܳܐ ܠܪܽܘܚܶܗ، ܐܶܠܳܐ ܠܽܘ ܚܰܘܪܰܝܕܶܗ ܣܬܶܐ. ܟܽܠ ܡܶܕܶܐ ܕܡܺܝܙܰܒܶܢ ܒܽܘ ܫܽܘܩܳܐ، ܐܺܝ ܢܺܝܰܐܬ̥ܟ̥ܽܘ (ܐܳܘܔ̰ܕܰܢ) ܬܽܘܝܳܐ ܪܰܐܚܰܐ، ܐܰܟ̣ܽܘܠܽܘ ܕܠܳܐ ܥܶܩܳܒܳܐ. ܥܰܠ ܕܟܶܬܝܳܐ ܐܺܝ ܐܰܪܥܳܐ ܟܽܠܰܗ̇ ܕܰܐܠܳܗܳܐ. ܐܶܢ ܐ̱ܢܳܫܳܐ ܡܰܐ ܚܰܢ̈ܦܶܐ ܕܩܳܪܰܠܟ̣ܽܘ، ܘܟܶܒܥܺܝܬܽܘ ܕܶܐܙܙܳܟ̣ܽܘ، ܟܽܠ ܡܶܕܶܐ ܕܡܺܝܬܰܚܶܬ ܩܽܘܡܰܝܟ̣ܽܘ، ܐܰܟ̣ܽܘܠܽܘ ܕܠܳܐ ܥܶܩܳܒܳܐ. ܠܰܫܰܢ ܐܺܝ ܢܺܐܝܰܐ. ܐܺܝܕܰܐ ܐ̱ܢܳܫܳܐ ܕܳܐܡܰܪܟ̣ܽܘ ܗܰܢܳܐ ܕܒܺܝ̣ܚܳܐܝܳܐ ܠܽܐܘ ܨܰܠܡܳܐ، ܠܽܘܟ̣ܠܺܝܬܽܘ. ܠܰܫܰܢ ܗܰܘܳܐ ܕܐ̱ܡܶܪ ܠܶܗ ܐܰܠܟ̣ܽܘ، ܘܠܰܫܰܢ ܐܺܝ ܢܺܐܝܰܐ. ܐܺܝ ܢܺܐܝܰܐ ܟܳܐܡܰܪ ܐ̱ܢܳܐ ܠܳܐ ܕܶܐܬ̣ܟ̣ܽܘ. ܐܶܠܳܐ ܕܰܗ̱ܘܳܐ ܕܟܳܐܡܶܪ. ܥܰܠܡܶܢ ܐܺܝ ܚܶܪܪܺܝܰܝܕ̥ܺܝ ܓܡܺܝܕܳܢܳܐ ܡܺܐܝ ܢܺܐܝܰܐ ܕܰܐ̱ܚܪ̈ܶܢܶܐ؟ ܐܶܢ ܐܳܢܳܐ ܓܡܳܝܰܕ ܐ̱ܢܳܐ ܒܛܰܝܒܽܘܬ̣ܳܐ، ܩܰܝ ܓܡܺܝܓܰܐܕܶܦ ܐܰܥܠܺܝ܆ ܥܰܠܽܘ ܡܶܕܶܐ ܕܳܐܢܳܐ ܓܡܰܘܕܶܐ ܐ̱ܢܳܐ؟ ܐܶܢ ܕܽܐܟ̣ܠܺܝܬܽܘ ܘܶܐܢ ܕܫܳܬܶܝܬܽܘ ܘܶܐܢ ܕܣܰܝܡܺܝܬܽܘ ܡܶܕܶܐ، ܟܽܠ ܡܶܕܶܐ ܠܽܐܘ ܫܽܘܒܚܳܐ ܕܰܐܠܳܗܳܐ ܣܽܘܡܽܘ. ܠܳܐܗ̱ܘܶܬܽܘ ܬܶܪܒܰܠܬܳܐ ܠܰܝܽܘ̈ܕܳܝܶܐ، ܘܠܰܝܰܘ̈ܢܳܝܶܐ، ܘܠܺܐܝ ܥܺܕ̱ܬܳܐ ܕܰܐܠܳܗܳܐ. ܟ̣ܶܕ ܐܳܢܳܐ ܟܫܳܦܰܪ ܐ̱ܢܳܐ ܠܟܽܠ ܐ̱ܢܳܫܳܐ ܒܟܽܠ ܡܶܕܶܐ، ܘܠܳܐ ܟܳܒܰܥ ܐ̱ܢܳܐ ܐܽܘ ܡܶܕܶܐ ܕܶܐܠܺܝ ܓܡܰܢܦܶܥ. ܐܶܠܳܐ ܐܽܘ ܡܶܕܶܐ ܕܶܠܓܰܠܰܒ̈ܶܐ ܓܡܰܢܦܶܥ. ܠܰܫܰܢ ܕܟ̣ܳܠܨܺܝ. ܒܰܪܶܟ̥ܡܳܪܝ܀