ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܓ: ܐ ـ ܝܓ 1Corinthians 3:1-13

ܐܳܢܳܐ ܠܳܐ ܩܰܕܶܪ ܐ̱ܢܳܐ ܕܡܶܔܓ̥ܰܠ ܐܢܳܐ ܐܰܥܡܰܝܟ̣ܽܘ ܟܶܕ ܥܰܡܰܐ ܪ̈ܽܘܚܰܢܺܝ، ܐܶܠܳܐ ܟ̣ܶܕ ܥܰܡܰܐ ܔܶܣ̈ܕܰܐܢܺܝ. ܟ̣ܶܐ ܢܰܥܺܝ̣̈ܡܶܐ ܕܒܶܡܫܺܝ̣ܚܳܐ، ܚܰܠܘܳܐ ܡܰܫܬܶܠܶܠܟ̣ܽܘ. ܘܠܽܐܗ̱ܘܠܺܝ ܠܟ̣ܽܘ ܡܽܘܟܠܳܐ. ܥܰܠ ܕܠܳܐ ܩܳܕܪܺܝܬܽܘ ܗ̱ܘܰܐ. ܘܠܳܐ ܐܽܘܥܕܳܐ ܣܬܶܐ ܓܩܳܕܪܺܝܬܽܘ. ܡܺܝܕ̥ܶܐ ܕܗܶܫ ܔܶܣ̈ܕܰܐܢܺܝ ܗܰܐܬܽܘ. ܒܶܬ̣ܶܪ ܡܶܕ ܟܺܝܬ ܐܰܒܟ̣ܽܘ ܚܣܳܡܳܐ ܘܥܰܟܣܺܝܶܐ ܘܦܠܺܝܓ̣ܽܘܬ̣ܳܐ، ܩܰܝ ܠܳܐ ܟܰܠܶܐ ܔܶܣ̈ܕܰܐܢܺܝ ܗܰܐܬܽܘ؟ ܘܟ̥ܕܽܘ ܔܰܣܰܕ ܟܳܡܗܰܠܟ̣ܺܝܬܽܘ. ܐܺܝ ܢܰܩܩܰܐ ܕܚܰܕ̱ ܡܶܢܟܽܘ ܕܳܐܡܶܪ: ܐܳܢܳܐ ܕܦܰܘܠܽܘܣ ܐ̱ܢܳܐ. ܘܽܐ̱ܚܪܶܢܳܐ ܕܳܐܡܶܪ: ܐܳܢܳܐ ܕܰܐܦܳܠܽܘ ܐ̱ܢܳܐ. ܩܰܝ ܠܳܐ ܟܰܠܶܐ ܔܶܣ̈ܕܰܐܢܺܝ ܗܰܐܬܽܘ؟ ܡܰܢܝܳܐ ܦܰܘܠܽܘܣ ܐܰܘ ܡܰܢܝܳܐ ܐܰܦܳܠܽܘ؟ ܐܶܠܳܐ ܡܫܰܡ̈ܫܢܶܐ (ܟ̥ܰܕ̈ܳܡܶܐ) ܕܥܰܠ ܐܺܝ̣ܕܰܝ̈ܝܶܐ ܡܗܰܝܡܰܢܟ̣ܽܘ. ܟܽܠ ܚܰܕ̱ ܟ̣ܶܕ ܗܽܘܠܶܗ ܠܶܗ ܠܰܐܠܳܗܳܐ. ܐܳܢܳܐ ܙܪܶܥܠܺܝ، ܘܰܐܦܳܠܽܘ ܡܰܫܬܶܠܶܐ. ܐܶܠܳܐ ܐܰܠܳܗܳܐ ܡܪܰܒܶܠܶܐ. ܗܰܬ̥ܶܐ ܓܡܰܘܚܽܘܝܳܐ، ܠܳܐ ܗܰܘܳܐ ܕܟܳܙܳܪܶܥ ܡܶܕܶܐܝܳܐ، ܘܠܳܐ ܗܰܘܳܐ ܕܟܳܡܰܫܬܶܐ. ܐܶܠܳܐ ܐܰܠܳܗܳܐ ܕܟܳܡܪܰܒܶܐ. ܐܽܘ ܙܰܪܳܥܳܐ ܘܽܐܘ ܡܰܫܬܝܳܢܳܐ ܚܰܕ̱ܢܶܐ. ܟܽܠ ܚܰܕ̱ ܟ̣ܕܽܘ ܬܰܥܒܰܝܕܶܗ ܓܡܳܝܶܕ ܐܽܘ ܐܰܓ̥ܪܰܝܕܶܗ. ܡܺܝܕ̥ܶܐ ܕܰܐܚܢܰܐ ܥܰܡ ܐܰܠܳܗܳܐ ܓܥܰܘܕܺܝܢܰܐ. ܘܽܐܘ ܥܘܳܕܳܐ ܘܺܐܝ ܥܡܰܪܰܐ ܕܰܐܠܳܗܳܐ ܗܰܬܽܘܬܽܘ. ܟ̣ܕܺܝ ܛܰܝܒܽܘܬ̣ܳܐ ܕܰܐܠܳܗܳܐ ܕܗܺܝܘܳܐ ܐܶܠܺܝ، ܟ̣ܶܐ ܡܰܥܡܪܳܢܳܐ ܚܰܟܺܝ̣ܡܳܐ ܡܰܚܰܬܠܺܝ ܫܶܬܶܐܣܬܳܐ. ܘܐ̱ܚܪܶܢܳܐ ܓܒܳܢܶܐ ܐܰܥܠܰܗ̇. ܐܶܠܳܐ ܟܽܠ ܐ̱ܢܳܫܳܐ ܛܪܳܐ ܚܳܙܶܐ. ܐܰܝܕܰܪܒܳܐ ܓܡܰܥܡܶܪ ܐܰܥܠܰܗ̇. ܥܰܠ ܕܠܳܐ ܓܩܳܕܶܪ ܕܚܰܕ̱ ܡܰܚܶܬ ܫܶܬܶܐܣܬܳܐ ܐ̱ܚܪܶܬܳܐ ܓ̣ܰܝܪ ܡܰܗ̱ܝܳܐ ܕܡܰܚܬܳܐ ܕܟܶܬܝܳܐ ܝܶܫܽܘܥ ܡܫܺܝ̣ܚܳܐ. ܐܶܠܳܐ ܐܺܝܕܰܐ ܐ̱ܢܳܫܳܐ ܕܡܰܚܶܬ ܥܰܠܺܝ ܫܶܬܶܐܣܬܰܬ̣ܶܗ ܕܰܗܘܳܐ ܐܰܘ ܣܶܐܡܳܐ ܐܰܘ ܟܺܐܦ̈ܶܐ ܡܝܰܩܪ̈ܶܐ ܐܰܘ ܩܰܝ̈ܣܶܐ ܐܰܘ ܓܶܠܳܐ ܐܰܘ ܓܶܠܳܐ ܢܰܫܺܝ̣ܦܳܐ، ܐܽܘ ܫܽܘܓ̣ܠܳܐ ܕܟܽܠ ܐ̱ܢܳܫܳܐ ܓܡܶܓܠܶܐ. ܥܰܠ ܕܽܐܘ ܝܰܘܡܰܐ ܗ̱ܘܳܐ ܓܓܳܠܶܐ ܠܶܗ. ܡܺܝܕ̥ܶܐ ܕܒܺܐܝ ܢܽܘܪܳܐ ܓܡܶܓܠܶܐ. ܘܽܐܘ ܥܘܳܕܳܐ ܕܟܽܠ ܐ̱ܢܳܫܳܐ ܐܰܝܕܰܪܒܳܝܳܐ، ܐܺܝ ܢܽܘܪܳܐ ܓܦܶܪܫܳܐ (ܓܓܳܠܝܳܐ) ܠܶܗ. ܒܰܪܶܟ̥ܡܳܪܝ ܀