ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܗ: ܐ ـ ܝܐ Romans 5:1-11

ܥܰܠ ܕܶܡܒܰܪܺܝܢܰܐ ܒܺܐܝ ܗܰܝܡܽܢܳܘܬ̥ܳܐ، ܒܺܐܝ ܘܰܐܨܺܝܛܰܐ ܕܡܳܪܰܢ ܝܶܫܽܘܥ ܡܫܺܝܚܳܐ ܗܰܘܺܝ ܠܰܢ ܫܠܳܡܳܐ ܓܰܢ̱ܒ ܐܰܠܳܗܳܐ. ܘܶܐܒܶܗ ܣܬܶܐ ܗܰܘܺܝ ܠܰܢ ܥܒܰܪܬܳܐ ܠܺܐܝ ܗܰܝܡܳܢܽܘܬ̥ܳܐ ܘܠܺܐܝ ܛܰܝܒܽܘܬ̣ܰܬ̣ܶܗ ܕܶܐܒܰܗ̱̇ ܓܩܰܝܡܺܝܢܰܐ. ܘܓܡܺܝܫܰܒܗܪܺܝܢܰܐ ܒܽܐܘ ܣܰܒܪܳܐ ܕܽܐܘ ܫܽܘܒܚܳܐ ܕܰܐܠܳܗܳܐ. ܘܠܳܐ ܗܰܘܟ̣ܰܐ ܒܶܠܚܽܘܕ̥ܶܗ، ܐܶܠܳܐ ܒܰܥܳܩ̈ܳܬ̣ܰܝܕܰܢ ܣܬܶܐ. ܡܺܝܕ̥ܶܐ ܕܟܳܕ̥ܥܺܝܢܰܐ ܐܺܝ ܥܺܝܩܽܘܬ̣ܳܐ ܡܣܰܝܒܪܳܢܽܘܬ̣ܳܐ ܟܳܡܟܰܡܠܳܐ. ܘܺܐܝ ܡܣܰܝܒܪܳܢܽܘܬ̣ܳܐ، ܐܺܝܡܬܺܚܰܐܢ. ܘܐܽܘ ܐܺܝܡܬܺܚܰܐܢ، ܣܰܒܪܳܐ. ܘܽܐܘ ܣܰܒܪܳܐ، ܠܳܐ ܟܳܡܢܰܟܶܦ. ܥܰܠ ܕܺܐܝ ܚܽܘܒܳܐ ܕܰܐܠܳܗܳܐ، ܟܦܺܝܟ̥ܳܐ ܥܰܠ ܠܶܒܰܝ̈ܢܰܐ ܒܺܐܝ ܘܰܨܺܝܛܰܐ ܕܺܐܝ ܪܽܘܚܳܐ ܩܰܕܺܝ̣ܫܳܐ ܕܗܺܝܘܳܐ ܐܶܠܰܢ. ܐܺܝܕ̥ܰܐ ܡܫܺܝ̣ܚܳܐ ܥܰܡ ܕܟܶܬܗ̱ܘܰܝܢܰܐ ܡܚܺܝ̈ܠܶܐ ܡܰܝܶܬ̥ ܒܽܐܘ ܙܰܒܢܰܐܢܳܐ ܠܰܫܰܢ ܐܰ ܚܰܛܳܝ̈ܶܐ. ܘܨܰܥܒܳܝܳܐ ܕܚܰܕ̱ ܕܡܳܝܶܬ̥ ܡܶܚܠܰܦ ܐܰ ܚܰܛܳܝ̈ܶܐ. ܡܶܚܠܰܦ ܐܰ ܛܳܘ̈ܶܐ، ܒܰܠܟܺܝ ܚܰܕ̱ ܣܳܝܶܡ ܔܰܨܰܪܰܐ ܕܡܳܝܶܬ̥. ܗܰܪܟܶܐ ܟܳܡܰܚܘܶܐ ܐܰܠܳܗܳܐ ܐܺܝ ܚܽܘܒܰܝܕܶܗ ܕܶܠܓܰܒܰܝܢܰܐ. ܥܰܡ ܕܟܶܬܗ̱ܘܰܝܢܰܐ ܚܰܛܳܝ̈ܶܐ، ܡܫܺܝ̣ܚܳܐ ܡܰܝܶܬ̥ ܡܶܚܠܳܦܰܢ. ܡܶܩܩܰܐ ܒܶܠ ܐܰܙܝܰܐܕ ܐܽܘܥܕܳܐ ܕܶܡܒܰܪܺܝܢܰܐ ܒܺܐܝ ܘܰܐܨܺܝܛܰܐ ܕܽܘ ܐܰܕܡܰܝܕ̥ܶܗ ܟܚܳܝܶܢܰܐ ܡܽܐܘ ܪܽܘܓ̣ܙܳܐ. ܘܥܰܡܡܰܗ̱ܝܳܐ ܕܟܶܬܗ̱ܘܰܝܢܰܐ ܒܥܶܠܕܒ̈ܳܒܶܐ، ܣܶܡܠܶܗ ܫܰܝܢܳܐ ܐܰܥܡܰܢ ܠܰܐܠܳܗܳܐ ܒܽܐܘ ܡܰܘܬܳܐ ܕܽܐܘ ܐܰܒܪܰܝܕ̥ܶܗ. ܟܡܳܐ ܝܰܬܺܝܪܳܐܺܝܬ (ܡܶܩܩܰܐ ܒܶܠܐܰܙܝܰܕ) ܐܽܘܥܕܳܐ ܕܟܺܝܬ ܫܰܝܢܳܐ ܒܰܝܢܳܬ̣ܰܢ ܣܬܶܐ ܟܚܳܝܶܢܰܐ ܒܰܚܰܝܰܝ̈ܕܶܗ. ܘܠܳܐ ܗܰܘܟ̣ܰܐ ܒܶܠܚܽܘܕ̥ܶܗ܆ ܟܳܡܺܝܫܰܒܗܪܺܝܢܰܐ ܣܬܶܐ ܒܰܐܠܳܗܳܐ ܒܡܳܪܰܢ ܝܶܫܽܘܥ ܡܫܺܝ̣ܚܳܐ، ܡܺܝܕ̥ܶܐ ܕܶܐܒܶܗ ܡܶܕܠܰܢ ܐܽܘܥܕܳܐ ܐܽܘ ܫܰܝܢܰـܐܢܳــܐ. ܒܰܪܶܟ̥ܡܳܪܝ܀