ܕܩܘܪܒܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܟ ـ ܠܓ 1Corinthians 15:20-33

ܐܽܘܥܕܳܐ ܡܫܺܝ̣ܚܳܐ ܩܰܐܝܶܡ ܡܶܐ ܒܰܝܢܰܐ ܡܺܝ̣̈ܬ̣ܶܐ، ܘܗܰܘܺܝ ܐܽܘ ܒܶܟܶܪ (ܩܰܐܡܳܝܳܐ) ܕܰܐܕܰܡܺܝ̣̈ܟ̣ܶܐ. ܟ̥ܶܕ ܐܰܝܕܰܪܒܳܐ ܕܒܺܐܝ ܘܰܨܺܝ̣ܛܰܐ ܕܽܐܘ ܒܰܪܢܳܫܳܐ ܗܰܘܺܝ ܐܽܘ ܡܰܘܬܳܐ، ܗܰܘܟ̥ܰܐ ܣܬܶܐ ܒܺܝ ܘܰܨܺܝܛܰܐ ܕܽܘ ܒܰܪܢܳܫܳܐ ܓܬܽܘܝܳܐ ܐܺܝ̣ ܩܝܰܡܬܳܐ ܕܰܡܡܺܝ̣̈ܬ̣ܶܐ. ܘܟ̣ܶܕ ܐܰܝܕܰܪܒܳܐ ܕܒܳܐܕܳܡ ܟܽܠܠܶܗ ܐܰܢܢܳܫ̈ܶܐ ܓܡܰܝܬ̣ܺܝ، ܗܰܘܟ̣ܰܐ ܣܬܶܐ ܒܶܡܫܺܝ̣ܚܳܐ ܟܽܠܠܶܗ ܓܚܳܝܶܢ (ܓܥܰܝܫܺܝ). ܐܶܠܳܐ ܟܽܠ ܚܰܕ̱ ܒܽܐܘ ܕܰܪܓܰܝܕ̥ܶܗ̱. ܡܫܺܝ̣ܚܳܐ ܗܰܘܺܝ ܒܶܟܶܪ. ܘܒܶܬ̣ܪܶܗ ܐܰܝܢܰܐ ܕܟܶܬܢܶܐ ܕܶܡܫܺܝ̣ܚܳܐ ܒܺܐܝ ܡܶܐܬ̣ܰܝܬܰܝܕܶܗ. ܘܒܶܬ̥ܬ̥ܶܪ ܓܬܽܗ̱ܘܝܳܐ ܐܺܝ ܐ̱ܚܰܪܰܝܬܳܐ، ܡܶܕ ܡܰܣܠܰܡ ܠܶܗ ܐܺܝ ܡܰܠܟܽܘܬ̣ܳܐ ܠܰܐܠܳܗܳܐ ܐܽܘ ܐܰܒܳܐ. ܘܡܶܕ ܡܒܰܛܶܠܶܗ ܟܽܠ ܪܺܝܫܳܢܽܘܬ̣ܳܐ، ܘܟܽܠ ܫܽܘܠܛܳܢܳܐ ܘܟܽܠ ܚܰܝ̈ܠܶܐ. ܡܺܝܕ̥ܶܐ ܕܟܳܠܳܙܶܡ ܕܡܰܡܠܶܟ، ܗܽܘܠ ܕܡܰܚܶܬ ܟܽܠܠܶܗ ܐܰ ܡܥܰܢ̈ܬܳܢܰܝܕܶܗ ܬܰܚܬܶܐ ܪ̈ܰܓܠܳܬ̣ܶܗ. ܐܽܘ ܥܰܕܽܘ (ܕܶܔ̱ܡܶܢ) ܐ̱ܚܰܪܳܝܳܐ ܕܟܶܬܝܳܐ ܐܽܘ ܡܰܘܬܳܐ ܓܒܳܛܶܠ. ܥܰܠ ܕܡܰܚܰܬ ܠܶܗ ܟܽܠ ܡܶܕܶܐ ܬܰܚܬܶܐ ܪ̈ܰܓܠܳܬ̣ܶܗ. ܐܶܠܳܐ ܐܺܝ ܢܰܩܩܰܐ ܕܟܳܐܡܶܪ ܟܽܠ ܡܶܕܶܐ ܡܰܚܰܬ ܠܶܗ ܬܰܚܬܶܐ ܐܺܝܕܶܗ، ܝܺܕ̥ܶܥܬܳܝܳܐ ܕܓ̣ܰܝܪ ܡܰܐܗ̱ܘܳܐ ܕܡܰܚܰܬ ܠܶܗ ܟܽܠ ܡܶܕܶܐ ܬܰܚܬܶܐ ܐܺܝܕܶܗ. ܡܶܕ ܡܰܛܶܥܠܶܐ ܠܶܗ̱ ܟܽܠ ܡܶܕܶܐ، ܐܺܝ ܢܰܩܩܰܝܳܐ ܐܽܘ ܒܪܳܐ ܣܬܶܐ ܓܡܰܛܶܥ ܠܰܗ̱ܘܳܐ ܕܡܰܚܰܬ ܠܶܗ ܟܽܠ ܡܶܕܶܐ ܬܰܚܬܶܗ ܐܺܝܕ̥ܶܗ. ܠܰܫܰܢ ܕܗܳܘܶܐ ܐܰܠܳܗܳܐ ܟܽܠ ܘܒܟܽܠ. ܐܶܠܳܐ ܩܰܝ ܓܣܰܝܡܺܝ ܗܰܢܺܝ ܕܟܳܥܶܡܕܺܝ ܡܶܚܠܰܦ ܐܰ ܡܺܝ̈ܬ̣ܶܐ ܗܰܘܟ̥ܰܐ؟ ܐܺܝܕ̥ܰܐ ܐܰ ܡܡܺܝ̣̈ܬ̣ܶܐ ܠܳܐ ܓܩܰܝܡܺܝ، ܐܺܝ ܢܰܩܩܰܐܝܳܐ ܗܰܢܺܝ ܠܡܶܢ ܟܳܥܶܡܕܺܝ ܡܶܚܠܰܦ ܐܰ ܡܺܝ̣̈ܬ̣ܶܐ؟ ܘܩܰܝ ܐܰܚܢܰܐ ܐܺܝ ܢܰܩܩܰܝܳܐ ܒܟܽܠ ܫܳܥܬ̣ܳܐ ܒܺܐܝ ܥܺܝܩܽܘܬ̣ܳܐ ܓܢܶܦܠܺܝܢܰܐ؟ ܓܝܳܡܶܐ ܐ̱ܢܳܐ ܒܽܐܘ ܫܽܘܒܗܳܪܰܬ̣ܟ̣ܽܘ ܐܰܢܢܰܚܰܝ̈ܕܺܝ ܕܟܶܬܠܺܝ ܒܡܳܪܰܢ ܝܶܫܽܘܥ ܡܫܺܝ̣ܚܳܐ. ܓܡܳܝܰܬ̣ ܐ̱ܢܳܐ ܟܽܠ ܝܰܘܡܳܐ. ܐܶܢ ܟ̣ܶܐ ܒܰܪܢܳܫܳܐ ܡܚܰܪܰܒܠܺܝ ܥܰܡܰܐ ܚܰܝܶـ̈ܘܶܢ ܒܶܐܦܶܣܽܘܣ ܡܶܢ ܡܰܢܦܰܥܠܺܝ؟ ܐܶܢ ܐܰ ܡܡܺܝ̣̈ܬ̣ܶܐ ܠܳܐ ܓܩܰܝܡܺܝ، ܓܕܳܟ̣ܠܺܝܢܰܐ ܘܓܫܳܬܶܝܢܰܐ ܥܰܠ ܕܪܰܡܚܶܠ ܓܡܰܝܬ̣ܺܝܢܰܐ. ܠܳܐ ܛܳܥܶܝܬܽܘ، ܐܰ ܔܓ̥ܰܠܺܝ̈ܰܬ ܒܺܝ̈ܫܶܐ، ܓܡܰܚܪܘܺܝ ܐܰ ܟ̥ܠܰܩ̈ܰܬ ܒܰܣܺܝ̈ܡܶܐ. ܒܰܪܶܟ̥ܡܳܪܝ܀