ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܓ: ܐ ـ ܝܓ Hebrews 3:1-13

ܡܽܐܘܥܕܳܐ ܝܰܐ ܐܰܚ̈ܶܐ ܩܰܕܺܝ̣̈ܫܶܐ ܕܶܩܪܶܝܬܽܘ ܒܺܝ ܩܪܰܝܬܳܐ ܕܡܺܐܝ ܫܡܰܝܳܐ! ܚܙܰܐܝܽܘ ܠܽܐܘ ܫܠܺܝ̣ܚܰܐܢܳܐ ܐܽܘ ܪܰܒܳܐ ܕܰܟܽܘܡܪ̈ܶܐ ܕܺܐܝ ܬܰܘܕܺܝ̣ܬ̥ܰܝܕܰܢ ܝܶܫܽܘܥ ܡܫܺܝ̣ܚܳܐ، ܠܳܐ ܡܶܦܩܽܘܬܶܠܠܶܗ̱ ܡܶܗ ܗܰܘܢܰܝܟ̥ܽܘ. ܗܺܝܝܶܗ̱ ܫܰܪܺܝܪܳܐܝܳܐ (ܣܰܐܕܶܩܝܳܐ) ܠܰܗ̱ܘܰܐ ܕܡܰܩܶܡܠܶܗ. ܡܽܘܫܶܐ ܣܬܶܐ ܫܰܪܺܝ̣ܪܳܐ ܗ̱ܘܰܐ ܥܰܠܽܘ ܒܰܝܬܰܝܕ̥ܶܗ̱ ܟܽܠܶܗ. ܐܶܠܳܐ ܐܽܘ ܫܘܒܚܳܐ ܕܰܗ̱ܢܳܐ، ܛܰܘ ܡܰܢ ܕܡܽܘܫܶܐܝܳܐ. ܟ̣ܶܕ ܟܶܬܝܳܐ ܐܽܘ ܐܺܝ̣ܩܳܪܳܐ ܕܽܐܘ ܡܰܥܡܪܳܢܳܐ ܕܽܐܘ ܒܰܝܬܳܐ، ܛܰܘ ܡܺܐܝ ܥܡܰܐܪܰܝܕ̥ܶܗ. ܟܽܠ ܒܰܝܬܳܐ ܡܕܰܢܢܳܫ̈ܶܐ ܟܶܬܠܶܗ ܡܰܥܡܪܳܢܳܐ. ܐܶܠܳܐ ܗܰܘܳܐ ܕܟܳܡܰܥܡܶܪ ܟܽܠ، ܐܰܠܳܗܳܝܳܐ. ܡܽܘܫܶܐ ܟ̥ܶܐ ܓܪܶܥܳܐ ܡܗܰܝܡܢܳܐ ܗ̱ܘܰܐ ܥܰܠܽܘ ܒܰܝܬܰܝܕ̥ܶܗ. ܠܰܫܰܢ ܕܣܳܗܶܕ ܥܰܠܠܰܐܢܺܝ ܕܓܶܡܺܝܬܰܚܟܶܢ ܗܘܰܐ ܒܺܐܝ ܘܰܐܨܺܝܛܰܝܕ̥ܶܗ. ܐܶܠܳܐ ܡܫܺܝ̣ܚܳܐ، ܟ̣ܶܐ ܐܰܒܪܳܐ ܥܰܠܽܘ ܒܰܝܬܰܝܕ̥ܶܗ ܦܰܐܝܶܫ. ܐܺܝܕ̥ܰܐ ܕܨܰܝܕܺܝܢܰܐ ܗܽܘܠ ܠܺܐܝ ܐ̱ܚܰܪܰܝܬܳܐ ܐܽܘ ܬܽܘܟ̣ܠܳܢܳܐ ܘܽܐܘ ܫܽܘܒܗܳܪܳܐ ܕܽܐܘ ܣܰܒܪܰܝܕ̥ܶܗ، ܐܺܝ ܢܰܩܩܰܝܳܐ ܐܰܚܢܰܐܢܰܐ ܐܽܘ ܒܰܝܬܰܝܕ̥ܶܗ. ܘܡܰܘܟ̥ܰܐ ܐ̱ܡܶܪ ܠܰܗ̱̇ ܠܺܐܝ ܪܽܘܚܳܐ ܩܰܕܺܝ̣ܫܳܐ: «ܐܰܕܝܰܘܡܰܐ ܐܺܝܕ̥ܰܐ ܐܽܘ ܩܳܠܰܝܕ̥ܶܗ̱ ܕܫܰܡܺܝܥܽܘܬܽܘ܆ ܠܳܐ ܡܰܩܫܽܘܬܽܘ ܠܶܒܰܝܟ̣ܽܘ ܘܡܰܪܓ̣ܙܺܝܬܽܘ ܠܠܶܗ» ܟ̥ܕܽܘ ܝܰܘܡܳܐ ܕܽܐܘ ܢܶܣܝܽܘܢܳܐ ܕܒܺܐܝ ܒܰܪܺܝܶܐ، ܕܶܡܔܰܪܰܒܒܰܠܠܺܝ ܐܰ ܡܰܪܡܪ̈ܳܢܶܐ ܕܰܐܒܰܐܒ̈ܳܢܰܬ̣ܟ̣ܽܘ. ܐܰܪܒܥܺܝ ܐܶܫ̈ܢܶܐ ܚܙܰܠܠܶܗ ܐܰ ܥܡܰܠܰܝ̈ܕ̥ܺܝ ܘܡܔܰܪܰܒܒܰܠܠܺܝ. ܡܰܗ̱ܘܟ̣ܰܐ ܥܰܝܶܩܠܺܝ ܡܽܐܘ ܕܳܪܰܗ̱ܘܳܐ (ܔܺܝܠܰܘܳܐ) ܘܐ̱ܡܶܪ ܠܺܝ: ܥܰܡܳܐܝܳܐ ܕܠܶܒܰܝܝܶܗ ܟܳܛܳܥܶܐ، ܘܠܰܐܕ̥ܺܝܥܺܝ ܠܰܐܕܰܪ̈ܒܳܢܰܝܕ̥ܺܝ. ܗܽܘܠ ܕܺܝܡܶܠܺܝ ܒܽܐܘ ܪܽܘܓ̣ܙܰܝܕ̥ܺܝ ܕܠܳܐ ܓܥܶܒܪܺܝ ܠܺܐܝ ܬ̣ܢܰܚܬܰܝܕ̥ܺܝ. ܗܘܰܐܝܽܘ ܡܳܪܳܐ ܝܰܐ ܐܰܚ̈ܶܐ! ܕܠܐܶܙܙܶܗ ܗܳܘܶܐ ܒܚܰܕ̱ ܡܶܢܟ̣ܽܘ ܠܶܒܳܐ ܒܺܝܫܳܐ، ܕܠܳܐ ܟܳܡܗܰܝܡܶܢ، ܘܪܳܚܩܽܘܬܽܘ ܡܰܐܠܳܗܳܐ ܐܽܘ ܚܰܝܳܐ. ܐܶܠܳܐ ܟܪܰܐܙܽܘ ܥܰܠ ܪܽܘܚܰܝܟ̣ܽܘ ܟܽܠ ܝܰܘܡܳܐ، ܗܽܘܠ ܠܽܘ ܝܰܘܡܳܐ ܕܡܶܩܪܶܐ ܐܰܕܝܰܘܡܰܐ. ܠܰܫܰܢ ܕܠܳܐ ܐ̱ܢܳܫܳܐ ܡܶܢܟ̣ܽܘ، ܩܳܫܶܐ ܠܶܒܶܗ̱، ܒܺܐܝ ܛܳܥܝܽܘܬܳܐ ܕܺܐܝ ܚܛܺܝܬ̣ܳܐ. ܒܰܪܶܟ̥ܡܳܪܝ܀