ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܙ: ܕ ـ ܝܘ 2Corinthians 7:4-16

ܟܶܬܠܺܝ ܬܽܘܟ̣ܠܳܢܳܐ ܓ̥ܰܠܰܒܶܐ ܐܰܒܟ̣ܽܘ، ܘܟܶܬܠܺܝ ܓ̥ܰܠܰܒܶܐ ܫܽܘܒܗܳܪܳܐ ܐܰܒܟ̣ܽܘ، ܘܡܠܶܐ ܐ̱ܢܳܐ ܬܰܣܠܺܝܰܐ. ܘܰܠܰܘ ܐܰ ܥܳܩ̈ܳܬ̥ܰܝܕ̥ܺܝ ܐܰ ܓ̥ܰܠܰܒܶܐ، ܙܰܐܝܺܕܳܐ ܐܺܝ ܦܨܺܝܚܽܘܬ̣ܰܝܕ̥ܺܝ. ܘܡܺܐܝ ܢܰܩܩܰܐ ܕܰܐܬ̣ܺܝܢܰܐ ܠܡܰܩܶܕܽܘܢܝܰܐ، ܠܰܐܗ̱ܘܺܝ ܚܕ̥ܳܐ ܬ̣ܢܰܚܬܳܐ (ܪܰܐܚܰܐ) ܠܽܐܘ ܓܽܘܫܡܰܝܕ̥ܰܢ. ܐܶܠܳܐ ܒܟܽܠ ܡܶܕܶܐ ܡܰܥܺܝ̣ܩܺܝܢܰܐ. ܡܶܐ ܠܰܪܘܰܠ ܐܰ ܩܪ̈ܳܒܶܐ، ܘܡܶܐ ܠܰܘܓ̥ܶܠ ܐܺܝ ܙܽܘܥܬ̣ܳܐ. ܐܶܠܳܐ ܐܽܘ ܐܰܠܳܗܰܐ ܗ̱ܘܳܐ ܕܟܳܡܣܰܠܶܐ ܠܰܡܰܟܺܝ̣̈ܟ̣ܶܐ، ܡܣܰܠܶܐ ܠܶܗ ܠܰܢ ܒܽܐܘ ܡܰܐܬ̣ܝܳܐ ܕܛܺܝܛܳܘܣ. ܠܳܐ ܒܶܠܚܽܘܕ̥ܶܐ ܒܺܐܝ ܡܶܐܬ̣ܰܝܬܰܝܕ̥ܶܗ، ܐܶܠܳܐ ܒܺܐܝ ܬܰܣܠܺܝܰܐ ܕܶܡܣܰܠܐܶ ܡܶܢܟ̣ܽܘ، ܡܣܰܠܶܐܢܰܐ ܐܰܚܢܰܐ ܣܬܶܐ. ܘܶܐܠܶܗ ܡܳܕܰܥ ܠܶܗ ܠܰܢ ܐܺܝ ܚܽܘܒܰܬ̣ܟ̣ܽܘ، ܘܽܐܘ ܓ̣ܰܡܰܬ̣ܟ̣ܽܘ، ܘܺܐܝ ܓ̣ܺܝܪܰܬ̣ܟ̣ܽܘ ܕܠܰܫܰܢܺܝ. ܐܺܝ ܢܰܩܩܰܐ ܕܫܰܡܶܥ ܐ̱ܢܳܐ ܦܨܶܚ ܐ̱ܢܳܐ ܓ̥ܰܠܰܒܶܐ. ܡܺܝܕ̥ܶܐ ܕܘܰܠܰܘ ܡܰܚܙܰܢܠܺܝ ܠܟ̣ܽܘ ܒܺܐܝ ܐܶܓܰܪܬ̣ܳܐ، ܠܳܐ ܓܡܰܢܕܰܡ ܐ̱ܢܳܐ. ܥܰܡܰܗ̱ܝܳܐ ܕܡܰܢܕܰܡܠܺܝ. ܡܺܝܕ̥ܶܐ ܕܟܳܚܳܙܶܐ ܐ̱ܢܳܐ ܐܺܝ ܐܶܓܰܪܬ̣ܳܐ ܘܰܠܰܘ ܡܰܚܙܰܢ ܠܰܗ̇ ܠܟ̣ܽܘ ܫܳܥܬ̣ܳܐ ܕܙܰܒܢܳܐ، ܐܶܠܳܐ ܐܽܘܥܕܳܐ ܓܡܶܦܨܰܚ ܐܢܳܐ. ܠܳܐ ܡܺܝܕ̥ܶܐ ܕܶܚܙܺܝ̣ܢܺܝܬܽܘ. ܐܶܠܳܐ ܥܰܠ ܕܺܐܝ ܚܶܙܢܺܝܬܺܝܰܬ̣ܟ̣ܽܘ ܡܰܡܬܶܠܰܗ̇ ܠܟ̣ܽܘ ܠܺܐܝ ܬܝܳܒܽܘܬ̣ܳܐ (ܢܰܕܰܐܡܰܐ). ܡܺܐܝܕ̥ܶܐ ܕܶܚܙܺܝܢܺܝܬܽܘ ܟ̣ܕܽܘ ܨܶܒܝܳܢܳܐ ܕܰܐܠܳܗܳܐ. ܘܡܺܢܰܢ ܟ̥ܨܰܪܰܐ ܒܡܶܕܶܐ ܠܳܐ ܡܰܛܶܠܟ̥ܽܘ. ܡܺܝܕ̥ܶܐ ܕܽܐܘ ܚܶܙܶܢ ܕܟܶܬܝܳܐ ܟ̣ܕܽܘ ܨܶܒܝܳܢܳܐ ܕܰܐܠܳܗܳܐ، ܟܣܳܝܶܡ ܬܝܳܒܽܘܬ̣ܳܐ ܘܢܰܕܰܡܶܐ ܕܟܳܡܶܒܠܺܝ ܠܽܐܘ ܟ̣ܰܠܰܐܨ. ܐܶܠܳܐ ܐܺܝ ܚܶܙܢܺܝܬܺܝܶܐ ܕܽܐܘ ܥܳܠܡܳܐ، ܡܰܘܬܳܐ ܟܣܰܝܡܳܐ. ܚܙܰܝܽܘ! ܐܽܘ ܚܶܙܢܰܐܢܳܐ ܕܶܬ̣ܟ̣ܽܘ ܣܬܶܐ، ܥܰܠ ܕܟܶܬܗ̱ܘܰܐ ܟ̣ܕܽܘ ܨܶܒܝܳܢܳܐ ܕܰܐܠܳܗܳܐ، ܡܶܩܩܰܐ ܟ̥ܠܶܩ ܠܶܗ ܐܰܒܟ̣ܽܘ ܔܰܗܕ. ܡܽܐܘ ܥܬܶܪܰܐܕ̥، ܘܡܽܐܘ ܪܽܘܓ̥ܙܳܐ، ܘܡܺܐܝ ܙܽܘܥܬ̣ܳܐ، ܘܡܺܐܝ ܚܽܘܒܳܐ، ܘܡܺܐܝ ܓ̥ܺܝܪܰܐ، ܘܡܽܐܘ ܚܰܝܦ. ܒܟܽܠ ܡܶܕܶܐ ܡܰܚܘܰܠܟ̣ܽܘ ܪܽܘܚܰܝܟ̣ܽܘ ܙܰܕܺܝ̣̈ܩܶܐ ܒܽܐܘ ܡܶܕܰܢܳܐ. ܡܰܘܟ̥ܰܐ ܘܰܠܰܘ ܟܬ̣ܽܘܠܺܝ ܠܟ̣ܽܘ ܐܽܘ ܡܶܕܰܢܳܐ، ܐܶܠܳܐ ܠܳܐ ܠܰܫܰܢ ܟ̥ܶܕ ܠܚܰܕ̱ ܚܰܛܳܝܳܐ، ܘܠܳܐ ܠܰܫܰܢ ܕܚܰܕ̱ ܣܺܝ̣ܡ ܬܰܥܰܕܕܰܐ ܐܰܥܠܶܗ. ܐܶܠܳܐ ܕܓܰܒ ܐܰܠܳܗܳܐ ܡܶܚܙܶܐ ܐܰܠܟ̣ܽܘ ܐܽܘ ܔܰܗܕܰܝܕ̥ܰܢ ܕܠܰܫܰܢܰܝܟ̣ܽܘ. ܡܰܗ̱ܘܟ̣ܰܐ ܡܣܰܠܶܢܰܐ ܒܺܐܝ ܬܰܣܠܺܝܰܬ̣ܟ̣ܽܘ. ܘܦܨܺܝ̣ܚܺܝܢܰܐ ܓ̥ܰܠܰܒܶܐ ܙܳܝܽܘܕܳܐ ܥܰܠܺܝ ܐܺܝ ܦܨܺܝ̣ܚܽܘܬ̣ܳܐ ܕܛܺܝܛܽܘܣ. ܡܺܝܕ̥ܶܐ ܕܺܐܝ ܪܽܘܚܰܝܕܶܗ ܬ̣ܢܺܝܚܳܐ ܒܟܽܠܟ̣ܽܘ. ܘܺܐܝܕܰܐ ܒܡܶܕܶܐ ܡܫܰܒܗܰܪ ܐ̱ܢܳܐ ܥܰܠ ܦܳܬ̣ܰܝܟ̣ܽܘ، ܠܳܐ ܡܢܰܟܰܦ ܐ̱ܢܳܐ. ܐܶܠܳܐ ܟ̥ܶܕ ܒܟܽܠ ܡܶܕܶܐ ܐܽܘ ܫܪܳܪܳܐ ܔܓ̥ܺܠܺܝܢܰܐ ܐܰܠܟ̥ܽܘ. ܗܰܘܟ̣ܰܐ ܣܬܶܐ ܐܽܘ ܫܽܘܒܗܳܪܰܝܕܰܢ ܕܓܰܢ̱ܒ ܛܺܝܛܳܘܣ ܗܰܐܘܺܝ ܒܰܫܪܳܪܐ. ܘܰܪܪܰܚܡܰܝ̈ܕ̥ܶܗ ܣܬܶܐ ܓ̥ܰܠܰܒܶܐ ܙܰܐܺܝܕܺܝ̣ ܐܰܥܠܰܝܟܽܘ. ܓܡܰܬ̣ܟܶܪ ܐܺܝ ܡܶܫܬܰܡܥܳܢܽܘܬ̣ܳܐ ܕܟܽܠܟ̣ܽܘ. ܐܰܝܕܰܪܒܳܐ ܡܰܩܒܰܠܟ̣ܽܘ ܒܙܽܘܥܬ̣ܳܐ ܘܬܶܪܥܺܝܠܳܐ. ܓܡܶܦܨܰܚ ܐ̱ܢܳܐ ܕܟܶܬܠܺܝ ܬܽܘܟ̥ܠܳܢܳܐ ܐܰܒܟ̥ܽܘ ܒܟܽܠ ܡܶܕܶܐ. ܒܰܪܶܟ̥ܡܳܪܝ܀