ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܐ: ܝܐ ـ ܟܕ Galatians 1:11-24

ܓܡܳܕ̥ܰܥ ܐ̱ܢܳܐ ܠܟ̥ܽܘ ܐܰ ܐܰܚܽܘ̈ܢܳܢܰܝܕ̥ܺܝ܆ ܕܽܐܘ ܡܓܰܠܝܶܢ (ܒܶܫܪܰܐ) ܕܶܡܒܰܫܶܪ ܡܶܢܺܝ܆ ܠܰܬܝܳܐ ܡܶܐ ܐ̱ܢܳܫܳܐ. ܘܠܳܐ ܐܳܢܳܐ ܣܬܶܐ܆ ܡܶܐ ܐ̱ܢܳܫܳܐ ܡܶܕܠܺܝ ܘܝܰܠܶܦܢܶܗ. ܐܶܠܳܐ ܒܽܐܘ ܓܶܠܝܳܢܳܐ ܕܝܶܫܽܘܥ ܡܫܺܝܚܳܐ ܡܰܩܒܶܠܺܝ. ܐܰ ܥܡܰܠܰܝ̈ܕ̥ܺܝ ܕܒܺܐܝ ܝܽܘܕ̥ܳܝܽܘܬ̥ܳܐ ܕܡܶܐܩܶܡ܆ ܫܰܡܺܝܥܽܘܬܶܢܢܶܐ. ܓ̥ܰܠܰܒܶܐ ܡܰܚܪܰܘ ܗ̱ܘܰܝܢܳܐ ܘܛܳܪܰܕ̥ ܗ̱ܘܰܝܢܳܐ ܐܺܝ ܥܺܕܬܳܐ ܕܰܐܠܳܗܳܐ. ܘܡܺܝ̣ܝܰܩܰܪ ܗ̱ܘܰܝܢܳܐ ܒܺܐܝ ܝܽܘܕ̥ܳܝܽܘܬ̥ܳܐ، ܙܶܬ ܡܶܐ ܓ̥ܰܠܰܒܶܐ ܕܟܶܬܗ̱ܘܰܝܢܶܐ ܒܥܶܡܪܺܝ ܘܒܽܐܘ ܐܰܗܠܰܝܕ̥ܺܝ. ܘܒܽܐܘ ܝܽܘܠܦܳܢܳܐ ܕܰܒܰܐܒܳܢܰܝ̈ܕ̥ܺܝ ܓ̥ܰܠܰܒܶܐ ܓ̥ܺܝܪܰܐܢܺܝ ܗ̱ܘܰܝܢܳܐ. ܐܶܠܳܐ ܐܺܝ ܢܰܩܩܰܐ ܕܰܐܒܶܥ ܗܰܘܳܐ ܕܶܡܢܰܩܶܐ ܠܶܗ ܠܺܝ ܡܽܘ ܟܰܪܣܳܐ ܕܶܐܡܺܝ܆ ܠܰܫܰܢ ܕܶܡܒܰܫܰܪ ܐ̱ܢܳܐ ܠܶܗ ܒܰܝܢܰܐ ܥܰܡ̈ܡܶܐ، ܩܪܶܐ ܠܶܗ ܠܺܝ ܒܺܐܝ ܛܰܘܽܘܬ̥ܰܝܕ̥ܶܗ. ܘܳܐܢܳܐ ܣܬܶܐ ܠܳܐ ܓܠܶܐ ܠܺܝ ܠܐܢܳܫܳܐ. ܘܠܰܐܙܙܺܝ ܐ̱ܢܳܐ ܠܽܐܘܪܶܫܠܶܡ ܣܰܐ ܫܠܺܝ̈ܚܶܐ ܕܡܶܐܩܶܡ ܡܶܢܺܝ. ܐܶܠܳܐ ܐܰܙܙܺܝ ܐ̱ܢܳܐ، ܠܺܝ ܥܰܪܰܐܒܺܝܶܐ. ܘܒܶܬ̥ܬ̥ܶܪ ܢܰܩܩܰܐ ܐ̱ܚܪܶܬܳܐ ܕܰܥܶܪ ܐ̱ܢܳܐ ܠܽܘ ܫܰܐܡ. ܘܒܶܬ̥ܬ̥ܶܪ ܒܶܬܠܳܬ̥ ܐܶܫ̈ܢܶܐ، ܠܰܫܰܢ ܕܚܳܙܶܐ ܐ̱ܢܳܐ ܠܽܐܘ ܟܺܐܦܳܐ، ܐܰܙܙܺܝ ܐ̱ܢܳܐ ܠܽܘ ܠܽܐܘܪܶܫܠܶܡ. ܘܦܰܐܝܶܫ ܐ̱ܢܳܐ ܬܰܡܳܐ܆ ܚܰܡܫܰܥܣܰܪ ܝܰܘ̈ܡܶܐ. ܘܠܐܢܳܫܳܐ ܐ̱ܚܪܶܢܳܐ ܡܰܐ ܫܠܺܝ̈ܚܶܐ ܠܳܐ ܚܙܶܐ ܠܺܝ. ܐܶܠܳܐ ܒܶܠܚܽܘܕܶܗ ܠܝܰܥܩܽܘܒ ܐܽܘ ܐܰܚܽܘܢܳܐ ܕܡܳܪܰܢ ܚܙܶܐ ܠܺܝ. ܗܰܢܺܝ ܕܟܳܟܳܬ̥ܰܘ ܐ̱ܢܳܐ ܐܰܠܟ̥ܽܘ. ܘܰܐܠܳܗܳܐ ܟܣܳܗܶܕ ܠܳܐ ܟܳܡܕܰܓܰܠ ܐ̱ܢܳܐ. ܘܒܶܬ̥ܬ̥ܶܪ ܡܰܗ̱ܢܺܝ ܐܰܙܙܺܝܢܳܐ ܠܰܐ ܐܰܬ̥ܪ̈ܰܘܳܬ̥ܳܐ ܕܣܽܘܪܺܝܰܐ ܘܕܩܺܝܠܺܝܩܝܰܐ. ܘܰܐ ܥܺܕ̱̈ܬܳܬ̥ܳܐ ܕܶܡܫܺܝܚܳܐ ܕܟܶܬܘܰܝܢܶܐ ܒܺܝܗܽܘܕ̥܆ ܒܺܐܝ ܦܳܐܬ̥ܳܐ ܠܶܐܕ̥ܥܺܝ ܗ̱ܘܰܝܠܺܝ. ܐܶܠܳܐ ܒܶܠܚܽܘܕ̥ܶܗ ܗܰܬ̥ܶܐ ܫܶܡܥܺܝ ܗ̱ܘܰܐ: ܗܰܘܳܐ ܕܡܶܐܩܶܡ ܛܳܪܰܕ ܗ̱ܘܰܝܠܰܢ܆ ܟܰܠܶܐ ܐܽܘܥܕܳܐ ܟܳܡܒܰܫܶܪ ܐܺܝ ܗܰܝܡܳܢܽܘܬܳܐ ܕܡܶܐ ܡܶܩܶܡ ܡܰܚܪܰܘ ܗ̱ܘܰܐ. ܘܶܐܒܺܝ ܡܫܰܒܚܺܝ ܗ̱ܘܰܐ ܠܰܐܠܳܗܳܐ ܒܰܪܶܟ̥ܡܳܪܝ̱܀