ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܛ: ܘ ـ ܟܐ Romans 9:6-21

ܐܺܝ̣ ܡܶܠܬ̥ܳܐ ܕܰܐܠܳܗܳܐ ܠܰܬܝܳܐ ܟ̥ܠܺܝ̣ܬܳܐ ܘܠܶܓ ܢܶܦܠܳܐ. ܘܠܳܐ ܗܰܢܺܝ ܟܽܠܠܶܗ̱ ܕܟܶܬܢܶܐ ܡܶܐ ܝ̣ܺܣܪܳܐܶܝܠ، ܟܳܡܶܚܫܳܘܺܝ̣ ܝܺܣܰܪ̈ܠܳܝܶܐ. ܘܠܳܐ ܗܰܢܺܝ ܟܽܠܠܶܗ̱ ܕܟܶܬܢܶܐ ܡܽܘ ܙܰܪܥܳܐ ܕܰܐܒܪܳܗܳܡ، ܟܳܡܶܚܫܳܘܺܝ̣ ܐܰܢܢܰܒ̈ܢܶܐ ܕܰܐܒܪܳܗܳܡ. ܐ̱ܡܶܪܠܶܗ ܐܰܠܳܗܳܐ ܠܰܐܒܪܳܗܳܡ: «ܒܺܐܝܣܚܳܩ ܓܡܶܩܪܶܐ ܠܳܟ ܙܰܪܥܳܐ». ܝܰܐܢܺܝ، ܠܰܬܢܶܐ ܐܰܢܢܰܒ̈ܢܶܐ ܕܽܐܘ ܓܽܘܫܡܳܐ ܐܰܢܢܰܒ̈ܢܶܐ ܕܰܐܠܳܗܳܐ. ܐܶܠܳܐ ܐܰܢܢܰܒ̈ܢܶܐ ܕܽܐܘ ܘܰܥܕ ܓܡܶܚܫܳܘܺܝ ܙܰܪܥܳܐ. ܥܰܠ ܕܺܐܝ ܡܶܠܬܳܐ ܕܽܐܘ ܘܰܥܕ ܗܰܬ̣ܶܝܳܐ. ܟ̥ܕܽܘ ܙܰܒܢܰܢܳܐ ܓܕܳܐܬ̣ܶܢܳܐ، ܘܓܬܳܗ̱ܘܶܐ ܐܰܒܪܳܐ ܠܣܰܪܳܐ. ܘܠܳܐ ܗܰܬ̣ܶܐ ܒܶܠܚܽܘܕܶܗ، ܐܶܠܳܐ ܪܰܦܩܰܐ ܣܬܶܐ ܕܟܶܬܗ̱ܘܰܐ ܛܥܶܢܬܳܐ ܡܶܐ ܚܰܕ̱ ܕܟܶܬܗ̱ܘܰܐ ܒܰܐܒܰܢ ܐܝ̣ܣܚܳܩ، ܡܶܐܩܶܡ ܡܶܕ ܡܺܝܬܰܘܠܕܺܝ ܐܰܢܢܰܒܢܰܝ̈ܕ̥ܗ ܘܠܳܐ ܣܰܝܡܺܝ ܛܰܘܬܳܐ ܐܰܘ ܒܺܝܫܬܳܐ، ܠܰܫܰܢ ܕܬ̣ܳܒܶܬ ܐܽܘ ܢܺܝܫܳܐ ܕܰܐܠܳܗܳܐ ܟ̣ܕܽܐܘ ܢܶܩܳܝܳܐ. ܕܠܰܬܝܳܐ ܡܰܥ̈ܡܰܠܰܬ. ܐܶܠܳܐ ܡܰܗ̱ܘܳܐ ܕܟܳܩܳܪܶܐ. ܐ̱ܡܺܝܪ ܐܶܠܰܗ̇: ܐܽܘ ܪܰܒܳܐ ܓܬܳܗ̱ܘܶܐ ܓܪܶܥܳܐ ܠܽܐܘ ܙܥܽܘܪܳܐ. ܟ̣ܶܕ ܟܶܬܝܳܐ ܟܬܺܝ̣ܘܳܐ: «ܪܚܶܡܠܺܝ ܝܰܥܩܽܘܒ، ܘܠܳܐ ܪܚܶܡܠܺܝ ܥܺܝܣܽܘ». ܡܶܢ ܐܶܡܡܺܝܢܰܐ؟ ܩܰܝ ܟܺܝܬ ܡܰܝܠܺܝܶܐ ܓܰܒ ܐܰܠܳܗܳܐ؟ ܚܰܐܫܰܐ. ܡܺܝܕ̥ܶܐ ܕܶܠܡܽܘܫܶܐ ܣܬܶܐ ܐ̱ܡܶܪܠܶܗ: ܓܡܰܪܚܰܡ ܐ̱ܢܳܐ ܥܰܠ ܐܰܝܢܰܐ ܕܡܰܪܚܰܡ ܐ̱ܢܳܐ، ܘܓܡܰܚܶܢ ܐ̱ܢܳܐ ܥܰܠ ܐܰܝܢܰܐ ܕܡܰܚܶܢ ܐ̱ܢܳܐ. ܗܰܬ̥ܶܐ ܓܡܰܚܽܘܝܳܐ، ܕܠܰܬܝܳܐ ܒܺܐܝܕܶܗ ܬܰܗ̱ܘܳܐ ܕܟܳܒܶܥ، ܘܠܳܐ ܒܺܐܝ̣ܕܶܗ ܬܰܗ̱ܘܳܐ ܕܟܳܪܳܗܶܛ. ܐܶܠܳܐ ܒܺܐܝܕ̥ܶܗ ܕܰܐܠܳܗܳܐ ܐܽܘ ܡܪܰܚܡܳܢܳܐ. ܡܺܝܕ̥ܶܐ ܕܐ̱ܡܺܝܪ ܒܽܐܘ ܟܬ̣ܳܘܳܐ ܠܦܶܪܥܽܘܢ: ܕܠܰܗ̱ܬ̣ܶܐ ܡܰܩܶܡܠܺܝ ܠܳܟ. ܠܰܫܰܢ ܕܡܰܚܘܶܐ ܐ̱ܢܳܐ ܐܶܒܳܟ ܐܽܘ ܚܰܝܠܰܝܕ̥ܺܝ، ܘܕܡܶܟܪܶܙ ܐܶܫܡܺܝ ܒܺܐܝ ܐܰܪܥܳܐ ܟܽܠܰܗ̱̇. ܗܰܬ̥ܶܐ ܓܡܰܚܽܘܝܳܐ، ܕܟܳܡܰܪܚܶܡ ܥܰܠ ܡܰܢ ܕܟܳܐܒܶܥ. ܘܓܩܳܫܶܐ ܥܰܠܡܰܢ ܕܟܳܐܒܶܥ. ܒܰܠܟܺܝ ܕܶܐܡܡܰܬ: ܩܰܝ ܟܳܡܥܰܐܝܶܒ؟ ܡܰܢܝܳܐ ܕܩܳܝܶܡ ܡܩܰܒܶܠ ܕܽܐܘ ܨܶܒܝܳܢܰܝܕܶܗ؟ ܗܰܬ ܡܰܢ ܗܰܬ ܝܰܐ ܒܰܪܢܳܫܳܐ، ܕܳܐܒܰܬ ܔܰܘܰܐܒ ܠܰܐܠܳܗܳܐ؟ ܩܰܝ ܟܳܐܡܶܪ ܐܽܘ ܣܺܝ̣ܡܳܐ ܠܰܗ̱ܘܳܐ ܕܣܶܡܠܶܗ: ܩܰܝ ܗܰܘܟ̣ܰܐ ܣܶܡܠܽܘܟ̣ܠܺܝ؟ ܐܰܘ ܠܰܬܠܶܗ ܫܽܘܠܛܳܢܳܐ ܠܽܐܘ ܦܰܚܳܪܳܐ ܥܰܠܽܘ ܛܺܝܢܰܝܕ̥ܶܗ، ܕܡܶܐ ܚܰܕ ܛܺܝܢܳܐ ܣܳܝܶܡ، ܣܶܦܳܩܳܐ ܚܰܕ̱ ܠܽܐܘ ܐܺܝܩܳܪܳܐ، ܘܽܐܘ ܐ̱ܚܪܶܢܳܐ ܠܳܐ ܠܽܐܘ ܐܺܝ̣ܩܳܪܳܐ ؟ ܒܰܪܶܟ̥ܡܳܪܝ܀