ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܕ: ܘ ـ ܝܘ 1Corinthians 4:6-16

ܗܰܢܺܝ ܐܰ ܐܰܚܽܘ̈ܢܳܢܰܝܕܺܝ ܠܰܫܰܢܰܝܟ̣ܽܘ ܡܰܚܰܬܠܺܝ ܐܰܥܠܺܝ ܘܥܰܠ ܐܰܦܳܠܽܘ. ܠܰܫܢ ܕܐܶܒܰܢ ܝܶܠܦܽܘܬܽܘ. ܘܠܶܐܙܙܳܟ̥ܽܘ ܠܽܘܓܰܒ ܡܽܘ ܡܶܕܶܐ ܕܟܶܬܝܳܐ ܟܬ̣ܺܝܘܳܐ. ܠܰܫܰܢ ܐ̱ܢܳܫܳܐ، ܠܳܐ ܡܺܝܪܰܡܪܶܡ ܥܰܠܽܘ ܚܰܘܪܰܝܕܶܗ. ܡܶܢ ܟܶܬܠܳܟ ܕܟܶܬܝܳܐ ܦܪܺܝܫܳܐ؟ ܐܰܘ ܡܶܢܝܳܐ ܕܠܳܐ ܡܶܕܠܳܟ؟ ܘܺܐܝܕ̥ܰܐ ܡܶܕܠܳܟ، ܩܰܝ ܟ̣ܰܗ̱ܘܳܐ ܕܠܳܐ ܡܶܕܠܶܐ ܟܳܡܺܝܫܰܒܗܪܰܬ؟ ܡܶܐ ܙܰܘܢܳܐ ܣܰܘܺܝܥܺܝܬܽܘ. ܘܗܰܘܺܝܬܽܘ ܥܰܬܺܝܪ̈ܶܐ. ܘܕܠܳܐ ܡܶܢܰܢ ܡܰܡܠܰܟ̣ܟ̣ܽܘ. ܟܽܘܙܺܝ̣ ܕܡܰܡܠܶܟ̥ܺܝܬܽܘ ܗ̱ܘܰܐ܆ ܠܰܫܰܢ ܕܰܐܚܢܰܐ ܣܬܶܐ ܡܰܡܠܶܟ̥ܺܝܘܰܝܢܰܐ ܐܰܥܡܰܝܟ̣ܘ. ܡܺܝܕ̥ܶܐ ܕܟܳܚܳܙܶܐ ܐ̱ܢܳܐ ܕܰܐܠܳܗܳܐ ܡܰܚܰܬܠܶܗ ܠܰܢ ܐܰܚܢܰܐ ܐܰ ܫܠܺܝ̣̈ܚܶܐ، ܐ̱ܚܰܪ̈ܳܝܶܐ ܟ̣ܶܕ ܚܟܺܝ̣̈ܡܶܐ ܠܽܘ ܡܰܘܬܳܐ. ܡܺܝܕ̥ܶܐ ܕܗܰܘܺܝ̣ܢܰܐ ܚܙܰܝܬܳܐ (ܬܺܝܰܬܪܳܐ) ܠܽܐܘ ܥܳܠܡܳܐ ܘܠܰܡܰܠܰܐܟ̈ܶܐ ܘܠܰܐܢܳܫ̈ܶܐ. ܐܰܚܢܰܐ ܣܰܟ̣̈ܠܶܐ ܠܰܫܰܢ ܡܫܺܝ̣ܚܳܐ. ܐܶܠܳܐ ܗܰܬܽܘ ܚܰܟܺܝ̣̈ܡܶܐ ܒܶܡܫܺܝ̣ܚܳܐ. ܐܰܚܢܰܐ ܕ̥ܰܥܺܝܦ، ܘܗܰܬܽܘ ܩܰܘ̈ܝܶܐ. ܘܗܰܐܬܽܘ ܡܝܰܩܪ̈ܶܐ، ܘܰܐܚܢܰܐ ܡܨܰܥܪ̈ܶܐ. ܗܽܘܠ ܠܺܐܝ ܫܳܥܬ̣ܰܬ̣ܶܗ ܓܟܳܦܢܺܝܢܰܐ، ܘܓܨܳܗܶܝܢܰܐ، ܘܓܡܺܝܙܰܠܛܢܺܝܢܰܐ، ܘܓܡܺܝܚܰܩܪܺܝܢܰܐ، ܘܡܰܣܟܰܢ ܠܰܬܠܰܢ. ܒܺܐܝܕ̥ܰܢ ܓܫܽܘܓ̥ܠܺܝܢܰܐ ܘܓܬܽܘܥܒܺܝܢܰܐ. ܓܡܺܝܨܰܥܪܺܝܢܰܐ ܘܟܳܡܒܰܪܟ̣ܺܝܢܰܐ. ܓܡܶܛܪܳܕ̥ܺܝܢܰܐ ܘܟܳܡܣܰܝܒܪܺܝܢܰܐ. ܒܕܽܘ̈ܓܠܶܐ ܓܡܺܝܬܰܔܓ̥ܶܠ ܐܰܥܠܰܢ، ܟܳܕ̥ܥܺܝܢܰܐ ܠܶܢ. ܗܽܘܠ ܠܐܽܘܥܕܳܐ ܗܰܘܺܝܢܰܐ ܟ̣ܕܽܘ ܙܰܘܠܳܐ ܕܽܐܘ ܥܳܠܡܳܐ ܘܟ̣ܕܽܘ ܘܰܣܰܟ̥. ܠܳܐ ܠܰܫܰܢ ܕܶܡܢܰܟܰܦ ܐ̱ܢܳܐ ܐܰܠܟ̥ܽܘ (ܕܬܳܘܰܪܢܰܢܟ̥ܽܘ) ܓܟܳܬ̣ܰܘ ܐ̱ܢܳܐ ܗܰܢܺܝ. ܐܶܠܳܐ ܟ̣ܶܐ ܐܰܒܢ̈ܶܐ ܚܰܒܺܝ̈ܒܶܐ ܓܡܰܫܶܪ ܐ̱ܢܳܐ ܐܰܥܠܰܝܟ̣ܽܘ. ܡܺܝܕ̥ܶܐ ܕܶܐܢ ܕܗܳܘܰܠܟ̣ܽܘ ܪ̈ܶܒܘܳܬ̣ܳܐ (ܥܰܣܪܳܐ ܐܰܠܦܳܘ̈ܰܬ) ܕܡܰܫܺܝܪ̈ܳܢܶܐ ܒܶܡܫܺܝ̣ܚܳܐ، ܐܶܠܳܐ ܠܳܐ ܐܰܒܳܗ̈ܶܐ ܓ̥ܰܠܰܒܶܐ. ܡܺܝܕ̥ܶܐ ܕܳܐܢܳܐ ܡܰܘܠܰܕ ܠܺܝ ܠܟܽܘ ܒܝܶܫܽܘܥ ܡܫܺܝ̣ܚܳܐ ܒܺܐܝ ܣܒܰܪܬ̣ܳܐ. ܟܳܒܰܥ ܐܢܳܐ ܕܶܐܒܺܝ ܡܺܝܕܰܡܶܝܬܽܘ (ܫܶܒܗܽܘܬܽܘ) ܒܰܪܶܟ̥ܡܳܪܝ܀