ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܒ: ܕ ـ ܝܚ Ephesians 2:4-18

ܐܽܘ ܐܰܠܳܗܰܐ ܗ̱ܘܳܐ ܕܟܶܬܝܳܐ ܥܰܬܺܝܪܳܐ ܒܰܪ̈ܰܚܡܶܐ، ܡܺܐܝ ܚܽܘܒܰܝܕ̥ܶܗ ܐܺܝ ܓ̥ܰܠܰܒܶܐ ܕܶܪܚܶܡܠܶܗ ܠܰܢ ܐܷܒܰܗ̱̇، ܐܰܚܢܰܐ ܕܡܺܝ̣̈ܬ̣ܶܐ ܗ̱ܘܰܝܢܰܐ ܒܰܚܛܳܗ̈ܶܐ، ܡܰܚܝܶܐ (ܡܰܥܶܫ) ܠܶܗ ܠܰܢ ܥܰܡ ܡܫܺܝ̣ܚܳܐ. ܒܺܐܝ ܛܰܝܒܽܘܬ̥ܰܝܕ̥ܶܗ ܘܡܰܟ̣ܠܰܨܠܶܗ ܠܰܢ. ܘܡܰܩܶܡܠܶܗ ܠܰܢ ܐܰܥܡܶܗ، ܘܡܳܬܰܘܠܶܗ ܠܰܢ ܐܰܥܡܶܗ ܒܰܫ̈ܡܰܝܶܐ ܒܺܐܝ ܘܰܨܺܝܛܰܐ ܕܝܶܫܽܘܥ ܡܫܺܝ̣ܚܳܐ، ܠܰܫܰܢ ܕܡܰܚܘܶܐ ܠܰܥܳܠܡ̈ܶܐ ܕܓܶܕܐܳܬ̣ܶܢ، ܐܺܝ ܪܰܒܽܘܬ̣ܳܐ ܕܽܐܘ ܡܰܐܠ ܕܺܐܝ ܛܰܝܒܽܘܬ̣ܰܝܕ̥ܶܗ، ܘܕܺܐܝ ܒܰܣܺܝܡܽܘܬ̣ܰܝܕ̥ܶܗ ܕܰܐܥܠܰܢ ܒܝܶܫܽܘܥ ܡܫܺܝ̣ܚܳܐ. ܡܺܝܕ̥ܶܐ ܕܒܺܐܝ ܛܰܝܒܽܘܬ̥ܰܝܕ̥ܶܗ ܟ̣ܰܠܺܝܨܺܝܬܽܘ ܒܺܐܝ ܗܰܝܡܳܢܽܘܬ̣ܳܐ. ܘܗܰܬ̥ܶܐ ܠܳܐ ܡܶܢܟ̥ܽܘ ܗܰܘܝܳܐ. ܐܶܠܳܐ ܡܰܘܗܰܒܬ̥ܳܐ ܡܰܐܠܳܗܳܝܳܐ. ܘܠܳܐ ܡܰܐܥ̈ܡܰܠܰܬ. ܚܰܬܬܰܐ ܕܐ̱ܢܳܫܳܐ ܠܳܐ ܡܺܝܫܰܒܗܶܪ. ܡܺܝܕ̥ܶܐ ܕܺܐܝ ܟ̣ܰܠܺܝܩܰܝܕ̥ܶܗ̱ܢܰܐ، ܕܶܟ̣ܠܺܝܩܺܝܢܰܐ ܒܝܶܫܽܘܥ ܡܫܺܝ̣ܚܳܐ ܠܰܥ̈ܡܰܠܰܬ ܛܳـ̈ܘܶܐ. ܗܰܐܢܶܟ ܕܡܶܐ ܡܶܩܶܡ ܡܚܰܕ̥ܰܪ ܠܶܗ ܠܰܐܠܳܗܳܐ ܕܰܐܒܒܶܗ ܡܗܰܠܟ̣ܺܝܢܰܐ. ܡܰܗ̱ܘܟ̣ܰܐ ܡܰܡܬܶܘܽܘ ܠܒܳܠܰܝܟ̣ܽܘ ܗܰܐܬܽܘ ܥܰܡ̈ܶܐ. ܡܶܩܶܡ ܒܽܐܘ ܔܰܣܰܕ ܡܶܩܪܶܝܬܽܘ ܗ̱ܘܰܐ ܥܽܘܪܠܽܘܬ̣ܳܐ (ܠܳܐ ܡܛܰܗܪ̈ܶܐ). ܡܰܐܗ̱ܝܳܐ ܕܟܳܡܶܩܪܳܝܳܐ ܓܙܽܘܪܬܳܐ (ܡܛܰܗܪ̈ܶܐ) ܕܒܺܐܝ ܐܺܝܕ̥ܳܐ ܓܡܺܝ̣ܣܳܡܳܐ ܒܽܐܘ ܔܰܣܰܕ. ܘܒܽܐܘ ܙܰܒܢܰܐܗ̱ܘܳܐ ܕܠܳܐ ܡܫܺܝ̣ܚܳܐ ܗ̱ܘܰܝܬܽܘ، ܘܢܽܘܟ̣ܪ̈ܳܝܶܐ ܗ̱ܘܰܝܬܽܘ ܡܽܐܘ ܥܰܡܳܐ ܕܺܝܣܪܳܐܶܝܠ. ܘܢܽܘܟ̣ܪ̈ܳܝܶܐ ܗ̱ܘܰܝܬܽܘ ܡܽܐܘ ܘܰܥܕ (ܡܽܘܩܰܘܰܠܰܐ) ܕܽܐܘ ܡܽܘܠܟܳܢܳܐ. ܕܠܳܐ ܣܰܒܪܳܐ ܘܕܠܳܐ ܐܰܠܳܗܳܐ ܗ̱ܘܰܝܬܽܘ ܒܽܐܘ ܥܳܠܡܳܐ. ܐܶܠܳܐ ܐܽܘܥܕܳܐ ܒܝܶܫܽܘܥ ܡܫܺܝ̣ܚܳܐ. ܗܰܐܬܽܘ ܕܟܶܬܘܰܝܬܽܘ ܡܶܩܶܡ ܪ̈ܰܚܽܘܩܶܐ، ܗܰܘܺܝܬܽܘ ܩܰܪ̈ܺܝܘܶܐ ܒܽܐܘ ܐܰܕܡܳܐ ܕܶܡܫܺܝ̣ܚܳܐ. ܡܺܝܕ̥ܶܐ ܕܗܺܝܶܐܝܳܐ ܐܽܘ ܫܰܝܢܰܝܕ̥ܰܢ، ܕܣܶܡ ܠܶܗ̱ ܐܰ ܬܰܪܬܶܐ ܚܕ̥ܳܐ. ܬܠܶܐ ܠܶܗ ܐܺܝ ܥܰܕܰܐܘܶܐ ܘܽܐܘ ܫܽܘܪܳܐ ܕܩܳܝܰܡ ܗ̱ܘܰܐ ܒܽܐܘ ܦܰܠܓܳܐ. ܘܒܽܐܘ ܔܰܣܰܕܰܝܕܶܗ. ܘܡܒܰܛܶܐܠܶܗ ܐܽܘ ܢܳܡܽܘܣܳܐ ܕܰܦܽܘܩ̈ܕܳܢܶܐ، ܒܰܦܽܘܩܕܳܢܰܝ̈ܕܶܗ. ܠܰܫܰܢ ܕܠܰܬܪܶܐ ܟ̣ܳܠܶܩ ܒܪܽܘܚܶܗ ܚܰܕ̱ ܒܰܪܢܳܫܳܐ ܚܰܕ̱ܬ̣ܳܐ. ܘܣܶܡܠܶܗ ܫܠܳܡܳܐ، ܘܡܫܰܝܰܢ ܠܶܗ ܠܰܬܪܶܐ ܒܚܰܕ̱ ܔܰܣܰܕ ܥܰܡ ܐܰܠܳܗܳܐ. ܘܒܽܘ ܨܠܺܝܒܰܝܕ̥ܶܗ ܩܛܺܝܠܶܗ ܐܺܝ ܥܰܢܬܺܝܶܗ. ܘܰܐܬ̣ܺܝ ܟܪܶܙܠܶܗ ܫܠܳܡܳܐ ܐܰܠܟ̣ܽܘ ܠܰܪ̈ܰܚܽܘܩܶܐ ܘܠܰܩܰܪ̈ܺܝܘܶܐ. ܥܰܠ ܕܶܐܒܶܗ ܗܰܘܺܝܠܰܢ ܩܶܪܳܘܳܐ ܠܰܬܪܶܐ ܒܶܚܕܳܐ ܪܽܘܚܳܐ ܓܰܢ̱ܒܽܘ ܐܰܒܳܐ. ܒܰܪܶܟ̥ܡܳܪܝ܀