ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܽܘ̈ܠܳܣܳܝܶܐ
ܐ: ܟܐ ـ ܟܛ Colossians 1:21-29

ܗܰܢ̱ܬܽܘ ܕܡܶܐܡܶܩܶܡ ܢܽܘܟ̥ܪ̈ܳܝܶܐ ܗ̱ܘܰܝܬܽܘ، ܘܥܰܕܽܘ (ܕܶܔ̱ܡܶܢ) ܒܰܦܶܟܪ̈ܰܬ̣ܟ̣ܽܘ ܘܒܰܡܰܥ̈ܡܰܠܰܬ̣ܟ̣ܽܘ ܐܰ ܒܺܝ̣̈ܫܶܐ، ܡܫܰܝܰܢ ܠܶܗ ܐܰܠܟ̣ܽܘ ܐܽܘܥܕܳܐ ܒܽܐܘ ܦܰܓ̣ܪܳܐ (ܔܰܣܰܕ) ܕܺܐܝ ܐ̱ܢܳܫܽܘܬ̣ܰܝܕ̥ܶܗ ܘܒܽܐܘ ܡܰܘܬܰܝܕܶܗ. ܠܰܫܰܢ ܕܡܰܩܶܡܟ̣ܽܘ ܩܽܘܡܶܗ ܩܰܕ̈ܝ̣ܫܶܐ ܕܠܳܐ ܥܰܝܒܳܐ ܘܕܠܳܐ ܫܟܽܘܟ. ܐܺܝܕ̥ܰܐ ܕܦܰܝܫܺܝܬܽܘ ܒܺܐܝ ܗܰܝܡܳܢܽܘܬ̣ܳܐ ܡܐܰܣ̈ܣܶܐ، ܘܬ̥ܰܐܒܽܘ̈ܬܶܐ ܘܠܳܐ ܡܺܝܙܰܥܙܥܺܝܬܽܘ ܡܽܐܘ ܣܰܒܪܳܐ ܕܽܐܘ ܡܓܰܠܝܶܢ ܕܫܰܡܺܝܥܺܝܬܽܘܠܶܗ، ܗܰܘܳܐ ܕܶܟܪܺܝ̣ܙ ܒܶܒܪܺܝܬ̣ܳܐ ܟܽܠܰܗ̱̇ ܕܬܰܚܬܺܝ ܫܡܰܝܳܐ. ܗܰܘܳܐ ܕܳܐܢܳܐ ܦܰܘܠܽܘܣ ܗܰܘܺܝ ܐܢܳܐ ܐܽܘ ܟܰܪܳܙܰܝܕ̥ܶܗ. ܘܽܐܘܥܕܳܐ ܓܡܶܦܨܰܚ ܐ̱ܢܳܐ ܒܰܚܰܫ̈ܶܐ (ܓ̥ܰܐܡ̈ܶܐ) ܕܥܰܠ ܦܳܬ̥ܰܝܟ̣ܽܘ. ܘܟܳܡܟܰܡܰܠ ܐ̱ܢܳܐ ܐܺܝ̣ ܢܶܩܨܰܐܢܺܝܰܐ ܕܰܥܳܩ̈ܳܬ̣ܳܐ ܕܶܡܫܺܝܚܳܐ، ܒܽܐܘ ܔܰܣܰܕܰܝܕܺܝ. ܠܰܫܰܢ ܐܽܘ ܔܰܣܰܕܰܝܕܶܗ ܕܟܶܬܝܳܐ ܐܺܝ ܥܺܕ̱ܬܳܐ. ܗܰܝܳܐ ܕܳܐܢܳܐ ܗܰܘܺܝܢܳܐ ܠܰܗ̇ ܡܫܰܡܫܳܢܳܐ܆ ܟ̣ܕܺܝ̣ ܡܕܰܒܪܳܢܽܘܬ̣ܳܐ ܕܰܐܠܳܗܳܐ ܕܗܺܝܘܳܐ ܐܶܠܺܝ ܠܰܫܰܢܰܝܟ̣ܽܘ، ܕܶܡܟܰܡܰܢ ܐ̱ܢܳܐ ܐܺܝ ܡܶܠܬ̣ܳܐ ܕܰܐܠܳܗܳܐ، ܘܐܽܘ ܐ̱ܪܳܙܰܐ ܗ̱ܘܳܐ ܕܟܶܬܗ̱ܘܳܐ ܡܟܰܣܝܳܐ ܡܰܐ ܥܳܠ̈ܡܶܐ ܘܡܰܐ ܕܳܪ̈ܶܐ܆ ܘܽܐܘܥܕܳܐ ܓܠܶܐ ܠܰܩܰܕܺܝ̈ܫܰܝܕ̥ܶܗ. ܗܰܢܺܝ ܕܰܐܒܶܥ ܐܠܳܗܳܐ ܕܡܳܕ̥ܰܥܥܶܐ ܡܶܢܝܳܐ ܐܽܘ ܡܰܐܠ ܕܽܐܘ ܫܽܘܒܚܳܐ ܕܽܐܘ ܐ̱ܪܳܙܰܐܢܳܐ ܒܰܐܥܰܡ̈ܶܐ. ܗܰܘܳܐ ܕܟܶܬܝܳܐ ܡܫܺܝܚܳܐ، ܕܰܐܒܟ̣ܽܘܝܳܐ ܐܽܘ ܣܰܒܪܳܐ ܕܽܐܘ ܫܽܘܒܚܰܝܕ̥ܰܢ. ܗܰܘܳܐ ܕܰܐ̱ܚܢܰܐ ܟܳܟܽܘܪܙܺܝܢܰܐ، ܘܟܳܡܶܠܦܺܝܢܰܐ، ܘܟܳܡܰܦܶܗܡܺܝܢܰܐ ܟܽܠ ܐ̱ܢܳܫܳܐ، ܒܟܽܠ ܚܶܟܡܶܐ ܠܰܫܰܢ ܕܡܰܩܺܝܡܺܝܢܰܐ ܟܽܠ ܐ̱ܢܳܫܳܐ ܓܡܺܝܪܳܐ ܒܝܶܫܽܘܥ ܡܫܺܝ̣ܚܳܐ. ܐܽܘ ܫܽܘܓ̥ܠܰܐ ܗ̱ܘܳܐ ܕܠܰܫܰܢܶܗ ܓܬܳܥܰܒ ܐܢܳܐ ܘܟܳܫܳܓ̣ܰܢ ܐ̱ܢܳܐ ܒܺܐܝ ܡܥܰܘܰܢܰܐ ܕܽܐܘ ܚܰܝܠܳܐ ܕܟܳܡܺܝܬܰܗܘܶܐ ܐܶܠܺܝ. ܒܰܪܶܟ̥ܡܳܪܝ̱܀