ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܕ: ܐ ـ ܝܘ Ephesians 4:1-16

ܟܳܒܰܥ ܐ̱ܢܳܐ ܡܶܢܟ̣ܽܘ ܐܳܢܳܐ ܡܰܐܣܺܝܪܳܐ ܒܡܳܪܰܢ، ܕܶܡܗܰܠܟ̣ܺܝܬܽܘ ܟ̣ܶܕ ܟܳܡܰܐܠܶܩ ܠܺܐܝ ܩܪܰܝܬܳܐ ܕܶܩܪܽܘܬܽܘ ܐܶܒܰܗ̱̇. ܒܟܽܠܰܗ̇ ܐܺܝ ܡܰܟܺܝܟ̣ܽܘܬ̣ܳܐ ܘܺܐܝ ܒܰܣܺܝܡܽܘܬ̣ܳܐ ܘܺܐܝ ܡܣܰܝܒܪܳܢܽܘܬ̣ܳܐ. ܕܶܡܣܰܝܒܪܺܝܬܽܘ ܚܰܕ̱ ܠܽܐܘ ܚܰܕ̱ ܒܚܽܘܒܳܐ. ܡܔܰܗܶܕܽܘ ܕܢܶܛܪܺܝܬܽܘ ܐܺܝ ܚܕ̥ܳܝܽܘܬ̣ܳܐ ܕܺܐܝ ܪܽܘܚܳܐ ܒܽܐܘ ܬܶܣܺܝܪܳܐ ܕܽܐܘ ܫܠܳܡܳܐ. ܠܰܫܰܢ ܕܗܳܘܶܬܽܘ ܚܰܕ̱ ܦܰܓܪܳܐ ܘܚܕ̥ܳܐ ܪܽܘܚܳܐ ܟ̣ܶܕ ܩܪܽܘܬܽܘ ܒܚܰܕ̱ ܣܰܒܪܳܐ ܕܺܐܝ ܩܪܰܝܬܰܬ̣ܟ̣ܽܘ. ܚܰܕ̱ܝܳܐ ܐܽܘ ܡܳܪܝܳܐ. ܘܚܕ̥ܳܝܳܐ ܐܺܝ ܗܰܝܡܳܢܽܘܬ̣ܳܐ. ܘܚܕ̥ܳܝܳܐ ܐܺܝ ܡܰܥܡܽܘܕܺܝܬ̣ܳܐ. ܘܚܰܕ̱ܝܳܐ ܐܰܠܳܗܳܐ ܐܽܘ ܐܰܒܳܐ ܕܟܽܠ، ܘܥܰܠ ܟܽܠ، ܘܒܟܽܠ، ܘܒܟܽܠܰܢ. ܐܶܠܳܐ ܠܟܽܠ ܚܰܕ ܡܶܢܰܢ ܗܺܝܘܳܐ ܐܺܝ ܛܰܝܒܽܘܬ̣ܳܐ܆ ܘܟܽܠ ܚܰܕ̱ ܟ̣ܕܽܘ ܩܰܝܰܐܣ ܕܺܐܝ ܡܰܘܗܰܒܬ̣ܳܐ ܕܶܡܫܺܝ̣ܚܳܐ. ܡܰܘܟ̣ܰܐ ܐ̱ܡܺܝܪ: «ܣܰܠܶܩ ܠܰܥܽܘ̈ܠܝܶܐ، ܘܫܒܶܐܠܶܗ ܐܺܝ ܫܒܺܝܬ̣ܳܐ (ܬܰܐܠܰܢ)، ܘܗܽܘܠܶܗ ܡܰܘܗܰܒܬ̣ܳܐ ܠܰܐܢ̈ܢܳܫܶܐ». ܡܰܢܝܳܐ ܕܣܰܠܶܩ ܐܺܝ ܡܰܥܢܰܐ ܕܣܰܠܶܩ؟ ܘܗܰܬ̥ܶܐ: ܕܢܰܚܶܬ ܒܺܐܝ ܩܰܡܰܝܬܳܐ ܠܰܥܽܘ̈ܡܩܶܐ ܕܺܐܝ ܐܰܪܥܳܐ. ܗܰܘܳܐ ܕܢܰܚܶܬ، ܗܺܝܝܶܐܝܳܐ ܕܣܰܠܶܩ ܣܬܺܝ. ܠܰܠܥܶܠ ܡܶܐ ܟܽܠܠܶܗ ܐܰ ܫܡ̈ܰܝܶܐ ܕܶܡܟܰܡܶܠ ܟܽܠ. ܘܗܺܝܝܶܐܝܳܐ ܕܗܽܘܠܶܗ، ܠܗܶܢ ܕܗܳܘܶܢ ܫܠܺܝ̣̈ܚܶܐ، ܘܠܗܶܢ ܕܗܳܘܶܢ ܢܒܺܝ̈ܶܐ، ܘܠܗܶܢ ܕܗܳܘܶܢ ܡܣܰܒܪ̈ܳܢܶܐ، ܘܠܗܶܢ ܕܗܳܘܶܢ ܪ̈ܳܥܝܶܐ، ܘܠܗܶܢ ܕܗܳܘܶܢ ܡܰܠ̈ܦܳܢܶܐ. ܚܰܬܬܰܐ ܕܗܳܘܶܢ ܓܡܺܝܪ̈ܶܐ ܘܩܰܕ̈ܺܝܫܶܐ ܠܽܐܘ ܥܰܡܰܠ ܕܺܐܝ ܬܶܫܡܶܫܬܳܐ، ܠܽܐܘ ܒܶܢܝܳܢܳܐ (ܥܡܰܐܪܰܐ) ܕܽܐܘ ܦܰܓ̣ܪܳܐ ܕܶܡܫܺܝ̣ܚܳܐ. ܠܰܫܰܢ ܕܟܽܠܰܢ ܗܳܘܶܝܢܰܐ ܚܰܕ̱ ܒܺܐܝ ܗܰܝܡܳܢܽܘܬ̣ܳܐ، ܘܒܽܐܘ ܡܰܕ̥ܥܳܐ ܕܽܐܘ ܒܪܳܐ ܕܰܐܠܳܗܳܐ. ܒܰܪܢܳܫܳܐ ܓܡܺܝܪܳܐ (ܟܡܺܝܠܳܐ) ܒܽܐܘ ܩܰܝܰܐܣ ܕܺܐܝ̣ ܩܽܘܡܬ̣ܳܐ ܕܺܐܝ ܓܡܺܝܪܽܘܬ̣ܳܐ ܕܶܡܫܺܝ̣ܚܳܐ. ܡܽܐܘܥܕܳܐ ܘܰܐܙܳܠܳܐ، ܠܳܗ̱ܘܶܝܢܰܐ ܢܰܥܺܝ̣̈ܡܶܐ ܡܙܰܥ̈ܙܥܶܐ ܘܛܥܺܝ̣̈ܢܶܐ ܠܟܽܠ ܗܰܘܰܐ ܕܰܝܽܘ̈ܠܦܳܢܶܐ ܢܟ̥ܺܝ̈ܠܶܐ ܕܰܐ̱ܢܢܳܫ̈ܶܐ. ܗܰܐܢܺܝ ܕܒܺܐܝ ܨܢܺܝܥܽܘܬ̣ܰܬ̣ܬ̣ܶܗ (ܚܺܝܠܰܬ̥ܬ̥ܶܗ̱) ܟܶܐܒܥܺܝ ܕܡܰܛܥܶܢ. ܐܶܠܳܐ ܕܗܳܘܶܝܢܰܐ ܫܰܪܺܝܪ̈ܶܐ ܒܺܐܝ ܚܽܘܒܰܝܕ̥ܰܢ، ܠܰܫܰܢ ܕܟܽܠ ܡܶܕܶܐ ܡܰܢ ܕܺܝ̣ܕ̥ܰܢ ܝܳܪܽܘ ܒܶܡܫܺܝ̣ܚܳܐ، ܕܗܺܝܝܶܐܝܳܐ ܐܽܘ ܪܺܝ̣ܫܳܐ. ܗܰܘܳܐ ܕܡܶܢܶܗ ܐܽܘ ܔܰܣܰܕ ܟܽܠܶܗ ܓܡܺܝܬܰܪܟܽܘ ܘܡܺܝܥܰܕܶܠ ܒܰܘ̈ܰܨܰܠܰܬ ܟ̣ܕܺܝ ܡܰܘܗܰܒܬ̣ܳܐ ܕܟܳܡܺܝܬܰܗܘܝܳܐ ܒܩܰܝܰܐܣ ܠܟܽܠ ܗܰܕܳܡܳܐ ܠܽܘ̣ ܝܪܳܘܳܐ ܕܽܐܘ ܔܰܣܰܕ ܕܶܒܚܽܘܒܳܐ ܟܳܡܠܳܐ ܐܺܝ ܥܡܰܪܰܝܕ̥ܶܗ̱. ܒܰܪܶܟ̥ܡܳܪܝ̱܀