ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܓ: ܝܕ ـ ܝܛ܇ ܕ: ܐ ـ ܝܓ Hebrews 3:14-19, 4:1-13

ܡܺܝܕ̥ܶܐ ܕܗܰܘܺܝܢܰܐ ܫܳܪ̈ܝܟܶܐ ܠܶܡܫܺܝ̣ܚܳܐ، ܐܽܘ ܬܽܘܟ̣ܠܳܢܰܝܕ̥ܰܢ ܡܽܐܘ ܪܺܝܫܳܐ ܘܗܽܘܠ ܠܺܐܝ ܐ̱ܚܰܪܰܝܬܳܐ ܚܺܝ̣ܨܳܐ ܨܰܝܕܺܝܢܰܐ ܠܶܗ. ܟ̣ܶܕ ܐ̱ܡܺܝܪ: «ܐܺܝܕ̥ܰܐ ܐܰܕܝܰܘܡܰܐ ܐܽܘ ܩܳܠܰܝܕ̥ܶܗ ܕܫܶܡܥܽܘܬܽܘ، ܠܳܐ ܡܰܩܫܽܘܬܽܘ ܠܶܒܰܝܟ̣ܽܘ ܘܡܰܪܓ̣ܙܺܝܬܽܘ ܠܠܶܗ». ܡܰܢܢܶܐ ܗܰܢܺܝ ܕܫܰܡܺܝܥܺܝ ܘܡܰܪܓ̣ܰܙܙܶܗ؟ ܩܰܝ ܠܰܬܢܶܐ ܟܽܠܠܶܗ ܗܰܢܺܝ ܕܢܰܦܺܝܩܺܝ ܡܶܐ ܡܶܨܶܪ ܥܰܠ ܐܺܝܕ̥ܶܗ ܕܡܽܘܫܶܐ؟ ܡܶܐܡܰܢ ܥܰܐܝܶܩ ܠܶܗ ܐܰܪܒܥܺܝ ܐܶܫ̈ܢܶܐ؟ ܩܰܝ ܠܳܐ ܡܰܗ̱ܢܶܟ ܕܚܰܛܶܢ ܘܰܐ ܓܰܪ̈ܡܰܬ̣ܬ̣ܶܗ ܢܰܦܺܝܠܺܝ ܒܺܐܝ ܒܰܪܺܝܶܐ؟ ܘܥܰܠܡܰܢ ܐܺܝܡܶܠܶܗ ܕܠܳܐ ܓܥܶܒܪܺܝ ܠܺܐܝ ܬ̥ܢܰܚܬܰܝܕ̥ܶܗ؟ ܩܰܝ ܠܳܐ ܥܰܠܰܗ̱ܢܶܟ ܕܠܳܐ ܫܰܡܺܝܥܺܝ؟ ܟܳܚܳܙܶܝܢܰܐ ܥܰܠ ܕܠܳܐ ܡܗܰܝܡܰܢܢܶܐ ܠܳܐ ܩܰܕܺܝܪܺܝ ܕܥܶܒܪܺܝ. ܡܰܘܟ̥ܰܐ ܙܰܝܥܺܝܢܰܐ ܡܽܐܘ ܦܝܳܫܳܐ ܕܽܐܘ ܘܰܥܕ ܕܺܐܝ ܥܒܰܪܬܳܐ، ܕܠܶܐܙܙܶܐ ܐ̱ܢܳܫܳܐ ܡܶܢܟ̣ܽܘ ܡܶܚܙܶܐ ܕܠܳܐ ܥܳܒܶܪ. ܡܺܝܕ̥ܶܐ ܕܰܐܚܢܰܐ ܣܬܶܐ ܟܪܺܝܙ ܐܰܥܠܰܢ ܟ̣ܰܗ̱ܢܶܟ. ܐܶܠܳܐ ܠܳܐ ܡܰܢܦܰܥ ܠܰܗ̱̇ ܠܰܗ̱ܢܶܟ ܐܺܝ ܡܶܠܬ̣ܳܐ ܛܰܘܬܳܐ. ܥܰܠ ܕܠܰܬܗ̱ܘܰܐ ܡܙܶܓ̣ܬܳܐ ܒܺܐܝ ܗܰܝܡܳܢܽܘܬ̣ܳܐ ܠܰܐܗ̱ܢܶܟ ܕܫܰܡܺܝܥܺܝ ܠܰܗ̱̇. ܐܠܳܐ ܐܰܚܢܰܐ ܐܰ ܡܗܰܝ̈ܡܢܶܐ ܓܥܶܒܪܺܝܢܰܐ ܠܽܘ ܬ̣ܢܳܚܳܐ ܟ̣ܶܕ ܐ̱ܡܶܪ ܠܶܗ: «ܚܰܬܬܰܐ ܐܺܝܡܶܠܺܝ ܒܽܐܘ ܪܽܘܓ̣ܙܰܝܕ̥ܺܝ ܕܠܶܓܥܶܒܪܺܝ ܠܽܘ ܬ̥ܢܳܚܰܝܕ̥ܺܝ». ܥܰܡܰܗ̱ܝܳܐ ܕܰܐܫܽܘ̈ܓ̣ܠܳܢܶܐ ܕܰܐܠܳܗܳܐ ܡܶܐ ܪܺܝܫܶܐ ܕܽܐܘ ܥܳܠܡܳܐ ܗܰܘܶܢ. ܟ̣ܶܕ ܐ̱ܡܶܪ ܠܶܗ̱ ܥܰܠܺܝ ܫܰܒܬ̣ܳܐ: ܕܶܬ̣ܢܺܝܚ ܐܰܠܳܗܳܐ ܒܽܐܘ ܝܰܘܡܳܐ ܕܰܫܰܘܥܳܐ ܡܰܐ ܫܽܘ̈ܓ̥ܠܳܢܰܝܕܶܗ ܟܽܠܠܶܗ. ܘܗܰܪܟܶܐ ܢܰܩܩܰܐ ܐ̱ܚܪܶܬܳܐ ܐ̱ܡܶܪ ܠܶܗ: «ܠܳܐ ܓܥܶܒܪܺܝ ܠܽܘ ܬ̥ܢܳܚܰܝܕܺܝ». ܦܰܐܝܶܫ ܗ̱ܘܳܐ ܐ̱ܢܳܫܳܐ ܕܶܓܥܶܒܪܺܝ ܠܰܗ̱̇. ܘܗܰܢܶܟ ܕܶܟܪܺܝܙ ܐܰܥܠܰܝܝܶܗ ܒܺܐܝ ܩܰܡܰܝܬܳܐ ܠܳܐ ܥܰܒܺܝܪܺܝ ܥܰܠ ܕܠܳܐ ܫܰܡܺܝܥܺܝ. ܢܰܩܩܰܐ ܐ̱ܚܪܶܬܳܐ ܒܶܬ̥ܬ̥ܶܪ ܒܙܰܒܢܳܐ ܓ̥ܰܠܰܒܶܐ، ܓܦܳܪܶܫ ܝܰܘܡܳܐ. ܟ̥ܶܕ ܡܶܐ ܠܰܠܥܰܠ ܟܬ̥ܺܝܘ ܕܐ̱ܡܶܪ ܠܶܗ ܠܕܰܘܺܝܕ: «ܐܰܕܝܰܘܡܰܐ ܐܺܝܕ̥ܰܐ ܐܽܘ ܩܳܠܰܝܕ̥ܶܗ ܕܫܰܡܺܝܥܺܝܬܽܘ، ܠܳܐ ܡܰܩܫܶܝܬܽܘ ܠܶܒܰܝܟ̣ܽܘ». ܐܺܝܕ̥ܰܐ ܝܶܫܽܘܥ ܒܰܪܢܽܘܢ ܕܡܰܬ̣ܢܰܚ ܗ̱ܘܳܐ ܠܶܢ، ܠܳܐ ܟܳܐܡܰܪ ܗ̱ܘܳܐ ܒܶܬ̥ܬ̥ܶܪ ܥܰܠ ܝܰܘܡܳܐ ܐ̱ܚܪܶܢܳܐ. ܗܰܬ̥ܶܐ ܓܡܰܚܽܘܝܳܐ ܕܟܺܝܬ ܬ̥ܢܳܚܳܐ ܠܽܐܘ ܥܰܡܳܐ ܕܰܐܠܳܗܳܐ. ܡܺܝܕ̥ܶܐ ܕܰܐܝܢܰܐ ܕܥܰܒܶܪ ܠܽܘ ܬ̣ܢܳܚܰܝܕܶܗ، ܬ̣ܢܺܝܚ ܗܽܘܘܶܗ ܣܬܶܐ ܡܰܐ ܥܡܰܠܰܝ̈ܕ̥ܶܗ. ܟ̣ܶܕ ܐܰܠܳܗܳܐ ܡܰܐ ܥܡܰܠܰܝ̈ܕܶܗ. ܡܔܰܗܕܺܝܢܰܐ ܕܥܳܒܪܺܝܢܰܐ ܠܽܘ ܬ̥ܢܳܚܰܐ ܗ̱ܘܳܐ. ܕܠܶܐܙܙܶܐ ܢܶܦܠܺܝܢܰܐ ܒܽܐܘ ܕܽܘܡܝܳܐ ܕܰܗ̱ܢܶܟ ܕܠܳܐ ܫܰܡܺܝܥܺܝ. ܥܰܠ ܕܺܐܝ ܡܶܠܬ̣ܳܐ ܕܰܐܠܳܗܳܐ ܣܰܐܓ̣ܝܳܐ ܘܟܳܣܰܝܡܳܐ. ܘܚܰܪܶܦ ܡܽܐܘ ܣܰܝܦܳܐ ܕܰܬܪܶܐ ܦܶܡ̈ܶܐܝܳܐ. ܘܓܥܳܒܪܳܐ ܗܽܘܠ ܠܽܐܘ ܦܪܳܫܳܐ ܕܺܐܝ ܢܰܦܫܳܐ ܘܕܺܐܝ ܪܽܘܚܳܐ، ܘܕܰܘ̈ܰܨܰܠܰܬ ܘܕܽܐܘ ܡܽܘܚܳܐ ܘܕܰܓܰܪ̈ܡܶܐ. ܘܟܦܳܪܫܳܐ ܐܰ ܦܬܰܟܰܪ̈ܰܬ ܘܺܐܝ ܢܺܝܰܐ ܕܽܐܘ ܠܶܒܳܐ. ܘܠܰܝܬ ܟ̣ܰܠܺܝ̣ܩܰܐ ܬܠܺܝܬ̣ܳܐ ܡܶܐ ܩܽܘܡܶܗ. ܐܶܠܳܐ ܟܽܠ ܡܶܕܶܐ ܙܰܠܛܳܢܳܐ ܘܓܰܠܝܳܐܝܳܐ ܩܶܡ ܥܰܝܢܶܗ، ܘܶܐܠܶܗ ܓܕܳܐܒܺܝܢܰܐ ܚܽܘܫܒܳܢܳܐ (ܚܰܣܰܒ). ܒܰܪܶܟ̥ܡܳܪܝ̱܀