ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܛ: ܐ ـ ܝܒ 1Corinthians 9:1-12

ܩܰܝ ܠܰܬܢܳܐ ܫܠܺܝ̣ܚܳܐ؟ ܩܰܝ ܠܰܬܢܳܐ ܚܶܪ؟ ܐܰܘ ܠܝܶܫܽܘܥ ܡܫܺܝ̣ܚܳܐ ܡܳܪܰܢ ܠܳܐ ܚܙܶܐ ܠܺܝ؟ ܩܰܝ ܠܰܬܬܰܐܬܽܘ ܐܽܘ ܥܰܡܰܠܰܝܕ̥ܺܝ ܒܰܐܠܳܗܳܐ؟ ܐܺܝܕ̥ܰܐ ܠܰܐܚܪ̈ܶܢܶܐ ܠܰܬܢܳܐ ܫܠܺܝ̣ܚܳܐ، ܐܶܠܳܐ ܐܰܠܟ̣ܽܘ ܫܠܺܝ̣ܚܳܐܢܳܐ. ܡܺܐܝܕ̥ܶܐ ܕܗܰܐܬܽܘܬܽܘ ܐܽܘ ܡܽܘܗܶܪ ܕܺܐܝ ܫܠܺܝܚܽܘܬ̣ܰܝܕ̥ܺܝ ܒܽܐܘ ܡܳܪܝܳܐ. ܗܰܐܬ̣ܶܝܳܐ ܐܺܝ ܡܕܰܦܰܥܰܝܕ̥ܺܝ ܓܰܢ̱ܒܰܢܺܝ ܕܟܳܕܰܝܢܺܝ̣ܠܺܝ. ܩܰܝ ܠܰܬܠܰܢ ܫܽܘܠܛܳܢܳܐ ܕܳܐܟ̣ܠܺܝܢܰܐ ܘܫܳܬܶܝܢܰܐ؟ ܩܰܝ ܠܰܬܠܰܢ ܫܽܘܠܛܳܢܳܐ ܚܳܬ̣ܳܐ ܐܰܢ̱ܬ̣ܬܳܐ ܕܡܰܟܶܪܟ̣ܺܝܢܰܐ ܐܰܥܡܰܢ؟ ܟ̣ܰܐ ܫܠܺܝ̣̈ܚܶܐ ܟܽܠܠܶܗ، ܘܟ̣ܰܐ ܐܰܚ̈ܶܐ ܕܡܳܪܰܢ ܘܟ̣ܽܐܘ ܟܺܐܦܳܐ؟ ܐܰܘ ܐܳܢܳܐ ܒܶܠܚܽܘܕ̥ܺܝ ܘܒܰܪܢܰܒܰܐ ܠܰܬܠܰܢ ܫܽܘܠܛܳܢܳܐ ܕܠܳܐ ܫܳܓ̥ܠܺܝܢܰܐ؟ ܡܰܢ ܟ̣ܕܶܡܠܶܗ ܥܰܣܟܰܪܺܝܶܐ ܒܽܐܘ ܡܰܨܪܰܦ ܕܪܽܘܚܶܗ؟ ܐܰܘ ܡܰܢܝܳܐ ܕܟܳܡܰܚܶܬ ܟܰܪܡܳܐ، ܘܡܰܐ ܦܺܐܪ̈ܰܝܕܶܗ ܠܳܐ ܟܳܐܟ̣ܶܠ؟ ܐܰܘ ܡܰܢܝܳܐ ܕܟܳܡܰܪܥܶܐ ܩܰܛܥܳܐ، ܘܡܽܐܘ ܚܰܠܘܳܐ ܕܽܐܘ ܩܰܛܥܰܝܕ̥ܶܗ ܠܳܐ ܟܳܐܟ̣ܶܠ؟ ܩܰܝ ܗܰܢܺܝ ܟ̣ܶܐ ܐ̱ܢܳܫܳܐ ܟܳܐܡܰܪ̱ ܐ̱ܢܳܐ؟ ܩܰܝ ܐܽܘ ܢܳܡܽܘܣܳܐ ܣܬܶܐ ܠܳܐ ܗܰܘܟ̣ܰܐ ܟܳܐܡܶܪ؟ ܟܰܠܶܐ ܟܬ̣ܺܝܘܳܐ ܒܽܐܘ ܢܳܡܽܘܣܳܐ ܕܡܽܘܫܶܐ: «ܠܳܐ ܣܳܟ̣ܪܰܬ ܦܶܡܗ ܕܽܐܘ ܬܰܘܪܳܐ ܕܶܡܢܰܥܶܡ ܐܺܝ ܕܪܳܟ̣ܬܳܐ». ܩܰܝ ܐܽܘ ܡܰܐܡܪܳܐ ܕܰܐܠܳܗܳܐ ܥܠܰܐ ܬܰܘܪ̈ܶܐ ܝܳܐ؟ ܐܶܠܳܐ ܝܺـܕ̥ܶܥܬܳܝܳܐ ܕܠܰܫܰܢܰܢ ܐ̱ܡܶܪ ܠܶܗ، ܘܠܰܫܰܢܰܢ ܟܬ̣ܺܝܘܳܐ. ܡܺܝܕ̥ܶܐ ܕܟܳܡܰܘܔܶܒ ܠܽܘ ܕܰܘܳܪܳܐ، ܕܥܰܠ ܣܰܒܪܳܐ ܕܕܳܘܶܪ. ܘܠܰܢܕܟܳܡܢܰܥܶܡ ܐܺܝ ܕܪܳܟ̣ܬܳܐ، ܥܰܠ ܣܰܒܪܳܐ ܕܗܳܘܶܐ ܫܳܪܺܝ̣ܟܳܐ ܠܽܐܘ ܙܰܐܕ. ܐܺܝܕ̥ܰܐ ܐܰܚܢܰܐ ܙܪܶܥ ܠܰܢ ܐܰܒܟ̣ܽܘ ܐܰ ܪ̈ܽܘܚܳܢܝܳܬ̣ܳܐ܆ ܓ̥ܰܠܰܒܶܝܳܐ ܕܚܳܨܕܺܝܢܰܐ ܡܶܢܟ̣ܽܘ ܐܰ ܦܰܓ̣ܪ̈ܳܢܝܳܬ̣ܳܐ؟ ܐܺܝܕ̥ܰܐ ܐܰ ܐ̱ܚܪ̈ܶܢܶܐ ܟܶܬܬܶܐ ܫܽܘܠܛܳܢܳܐ ܐܰܥܠܰܝܟ̣ܽܘ܆ ܩܰܝ ܐܰܚܢܰܐ ܠܳܐ ܙܶܬ ܓܡܰܘܔܰܒ ܠܰܢ؟ ܐܶܠܳܐ ܠܳܐ ܡܶܣܬܰܥܡܶܠܰܢ ܒܽܐܘ ܫܽܘܠܛܳܢܰܢܳܐ. ܟܽܠ ܡܶܕܶܐ ܟܳܡܣܰܝܒܪܺܝܢܰܐ. ܠܰܫܰܢ ܕܶܒܡܶܕܶܐ ܠܳܐ ܡܥܰܘܩܺܝܢܰܐ ܐܺܝ ܣܒܰܪܬ̣ܳܐ ܕܶܡܫܺܝ̣ܚܳܐ. ܒܰܪܶܟ̥ܡܳܪܝ܀