ܕܰܐܪܒܥܳܐ ܒܫܰܒܳܐ

ܩܰܘܡܳܐ ܪܒܺܝܥܳܝܳܐ ܕܠܺܠܝܳܐ

ܩܳܠܳܐ ܒܩ̄: ܩܽܘܩܳܝܳܐ
ܐܰܒܽܘܢ ܕܒܰܫܡܰܝܳܐ ܥܢܺܝ ܠܰܢ

ܪܓܶܙ ܡܳܪܝܳܐ ܥܰܠ ܢܺܝܢ̈ܘܳܝܶܐ ܒܥܰܘܠܳܐ ܕܰܥܒܰܕܘ܆ ܫܰܕܰܪ ܠܰܢܒܺܝܳܐ ܝܰܘܢܳܢ܆ ܕܢܶܩܪܶܐ ܠܗܽܘܢ ܗܦܽܘܟܝܳܐ܆ ܐܰܪܒܥܺܝܢ ܝܰܘ̈ܡܺܝܢ܆ ܒܰܡܨܰܥܬܳܐ ܣܳܡ ܗ̱ܘܳܐ܆ ܩܳܡ ܗ̱ܘܳܐ ܡܰܠܟܳܐ܆ ܫܳܘܶܐ ܠܕܽܘܟܪܳܢܳܐ܆ ܘܰܥܒܰܕ ܒܳܥܽܘܬܳܐ ܪܰܒܬܳܐ ܘܶܐܬܪܰܥܺܝ ܡܳܪܝܳܐ܆ ܒܪ̈ܰܚܡܶܐ ܕܚܰܢܘ ܗ̱ܘܰܘ ܠܢܺܝܢ̈ܘܳܝܶܐ ܚܽܘܢ ܠܰܢ ܐܰܟܘܳܬܗܽܘܢ܆ ܗ̄ ܘܰܫܒܽܘܩ ܠܰܢ ܚܰܘ̈ܒܰܝܢ܀

ܫܽܘܒܚܳܐ

ܐܳܡܰܪ ܠܶܗ ܝܰܡܳܐ ܠܝܰܘܢܳܢ ܕܠܳܐ ܡܩܰܒܶܠ ܐ̱ܢܳܐ܆ ܥܰܒܕܳܐ ܕܰܥܪܰܩ ܡܶܢ ܡܳܪܶܗ ܘܨܶܒܝܳܢܶܗ ܠܳܐ ܥܒܰܕ܆ ܠܢܺܝܢܘܶܐ ܫܰܕܪܳܟ܆ ܕܬܺܐܙܰܠ ܬܰܟܪܶܙ ܒܳܗ̇܆ ܘܰܐܢ̱ܬ ܥܳܒܰܪ ܐܰܢ̱ܬ܆ ܕܬܺܐܙܰܠ ܠܳܟ ܠܬܰܪܫܺܝܫ܆ ܐܰܢ̱ܬ ܥܰܒܕܳܐ ܘܶܐܢܳܐ ܥܰܒܕܳܐ ܕܚܰܕ ܐܰܠܳܗܳܐ܆ ܒܶܝܬ ܓܰܠ̱̈ܠܰܝ ܚܳܒܶܫ ܐ̱ܢܳܐ ܠܳܟ ܥܕܰܡܳܐ ܕܡܳܪܝ ܢܦܰܩܕܰܢܝ ܗ̄ ܟܶܢ ܫܳܒܶܩ ܐ̱ܢܳܐ ܠܳܟ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܣܢܰܘ ܓܰܕܽܘ̈ܕܶܐ ܟܽܠܶܗ ܣܶܩܠܳܐ ܕܙܰܠܺܝܠܽܘܬܳܐ܆ ܘܰܐܝܟ ܒܶܝܬ ܒܳܟܶܐ ܕܺܝܚܺܝ̈ܕܳܝܶܐ ܐܶܣܬܰܡܥܰܠܘ ܗ̱ܘܰܘ܆ ܡܰܠܟܳܐ ܥܒܺܝܕ ܗ̱ܘܳܐ ܡܳܪܶܐ ܐܶܒܠܳܐ ܠܟܽܠܶܗ ܥܰܡܳܐ܆ ܘܟܽܠ ܡܰܢ ܕܳܐܬܶܐ ܒܶܗ ܚܳܐܰܪ ܗ̱ܘܳܐ ܘܒܳܟܶܐ ܥܰܡܶܗ܀

ܡܕܺܝܢ̱ܬܳܐ ܟܽܠܳܗ̇ ܒܣܰܩ̈ܶܐ ܢܶܦܩܰܬ ܨܶܝܕ ܒܳܥܽܘܬܳܐ܆ ܘܡܶܢ ܓܰܘ ܫܶܠܝܳܐ ܥܶܒܕܰܬ ܠܺܠܝܳܐ ܒܓܰܘ ܐܺܝܡܳܡܳܐ܆ ܠܒܶܫܘ ܐܽܘ̈ܟܳܡܶܐ ܒܥܺܝܪܳܐ ܘܐ̱ܢܳܫ̈ܳܐ ܘܰܥܡܰܛ ܐܰܬܪܳܐ܆ ܘܶܐܬܬܨܺܝܪ ܬܰܡܳܢ ܓܰܘܢܶܗ ܕܠܺܠܝܳܐ ܡܶܢ ܟܶܢ̈ܫܰܝܗܽܘܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܥܢܺܝܢ ܐܰܠܳܗܳܐ ܥܢܺܝܢ ܐܰܠܳܗܳܐ ܘܪܰܚܶܡܥܠܰܝܢ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀

ܬܶܫܒܽܘܚܬܳܐ ܕܡܰܠܰܐܟ̈ܶܐ

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ ܘܟܶܢ̈ܫܶܐ ܕܪ̈ܰܒܰܝ ܡܰܠܰܐܟ̈ܶܐ ܕܒܰܫܡܰܝܳܐ: ܘܰܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܡܳܟ̈ܶܐ ܘܥܰܦܪ̈ܳܢܶܐ ܐܰܟܘܳܬܗܽܘܢ ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ ܒܟܽܠܙܒܰܢ ܘܰܒܟܽܠܥܶܕܳܢ:

ܥܰܡܳܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܤܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀

ܡܫܰܒܚܺܝܢܰܢ ܠܳܟ܆ ܡܒܰܪܟܺܝܢܰܢ ܠܳܟ܆ ܤܳܓܕܺܝܢܰܢ ܠܳܟ܆ ܡܡܰܠܠܽܘܬ ܫܽܘܒܚܳܐ ܡܰܤܩܺܝܢܰܢ ܠܳܟ܀

ܡܰܘܕܶܝܢܰܢ ܠܳܟ܆ ܡܶܛܽܠ ܪܰܒܽܘܬܳܐ ܕܫܽܘܒܚܳܐ ܕܺܝܠܳܟ܆ ܡܳܪܝܳܐ ܥܳܒܽܘܕܳܐ܆ ܡܰܠܟܳܐ ܫܡܰܝܳܢܳܐ܆ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀

ܡܳܪܝܳܐ ܐܰܠܳܗܳܐ܆ ܒܪܳܐ ܝܺܚܺܝܕܳܝܳܐ܆ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀

ܡܳܪܝܳܐ ܐܰܠܳܗܳܐ܆ ܐܶܡܪܶܗ ܕܰܐܠܳܗܳܐ܆ ܒܪܳܐ ܘܡܶܠܬܶܗ ܕܰܐܒܳܐ܆ ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܐܶܬܪܰܚܰܡܥܠܰܝܢ܀

ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬܰܢ܆ ܗܰܘ ܕܝܳܬܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܤ ܘܶܐܬܪܰܚܰܡܥܠܰܝܢ܀

ܡܶܛܽܠ ܕܰܐܢ̱ܬ ܗ̱ܽܘ ܠܚܽܘܕܰܝܟ܆ ܩܰܕܺܝܫܰܬ ܗ̱ܽܘ ܠܚܽܘܕܰܝܟ܆ ܡܳܪܝܳܐ ܝܶܫܽܘܥ ܡܫܺܝܚܳܐ ܘܥܰܡ ܪܽܘܚܳܟ ܩܰܕܺܝܫܳܐ܀

ܫܽܘܒܚܶܗ ܕܰܐܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܐܶܒܰܪܟܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܆ ܡܒܰܪܟܳܐ ܠܥܳܠܰܡ ܗܰܘ ܕܺܐܝܬܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀

ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ܆ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒ̈ܚܳܬܳܟ ܠܥܳܠܰܡ ܥܳܠܡܺܝܢ܀

ܠܳܟ ܝܳܐܶܐ ܫܽܘܒܚܳܐ܆ ܠܳܟ ܦܰܐܝܳܐ ܬܶܫܒܽܘܚܬܳܐ܆ ܘܠܳܟ ܦܶܐܐ ܩܽܘܠܳܤܳܐ܆ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ

ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀

ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀