ܕܰܐܪܒܥܳܐ ܒܫܰܒܳܐ

ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܳܐ ܢܚܰܦܽܘܢ ܡܳܪܝ ܡܽܘ̈ܡܰܝ

ܠܳܐ ܡܬܽܘܡ ܗܘܳܬ ܠܳܗ̇ ܐܰܝܟ ܗܳܕܶܐ܆ ܬܝܳܒܽܘܬܳܐ ܕܩܰܪܒܰܬ ܢܺܝܢܘܶܐ܆ ܕܰܥܠܰܝ̈ܡܶܐ ܘܰܛܠܳܝ̈ܶܐ ܘܫܰܒܪ̈ܶܐ܆ ܘܣܳܒܷ̈ܐ ܘܟܽܠܗܶܝܢ ܚܰܝ̈ܘܳܬܳܐ܆ ܒܚܰܫܳܐ ܪܰܒܳܐ ܨܳܝܡܺܝܢ ܗ̱ܘܰܘ܆ ܘܒܰܨܠܽܘܬܳܐ ܐܰܡܺܝܢܺܝܢ ܗ̱ܘܰܘ܆ ܥܕܰܡܳܐ ܕܶܐܬܪܰܥܺܝ ܡܳܪܝܳܐ܆ ܘܰܐܥܒܰܪ ܡܶܢܗܽܘܢ ܓܙܳܪ ܕܺܝܢܳܐ܆ ܕܡܶܢ ܟܺܐܢܽܘܬܳܐ ܩܰܒܠܽܘܗ̱ܝ ܗ̱ܘܰܘ܀

ܫܽܘܒܚܳܐ

ܕܽܘܟܪܳܢܳܐ ܛܳܒܳܐ ܢܶܗܘܶܐ ܠܶܗ܆ ܠܗܰܘ ܡܰܠܟܳܐ ܢܰܟܦܳܐ ܕܢܺܝܢܘܶܐ܆ ܕܡܰܚܙܺܝܬܳܐ ܥܰܒܕܳܗ̇ ܒܰܒܪܺܝܬܳܐ܆ ܠܰܬܝܳܒܽܘܬܳܐ ܕܩܰܪܶܒ ܗ̱ܘܳܐ܆ ܕܰܫܕܳܐ ܠܬܳܓܳܐ ܡܶܢ ܪܺܝܫܶܗ܆ ܘܶܐܬܥܰܛܰܦ ܢܰܚ̈ܬܶܐ ܕܨܰܥܪܳܐ܆ ܘܰܐܟܪܶܙ ܘܶܐܡܰܪ ܒܶܝܬ ܫܽܘ̈ܩܶܐ܆ ܕܨܰܘܡܳܐ ܒܟܽܠܗܽܘܢ ܝܰܘ̈ܡܳܬܳܐ܆ ܥܕܰܡܳܐ ܕܢܶܫܬܪܶܐ ܓܙܳܪ ܕܺܝܢܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܒܳܥܝܳܐ ܐ̱ܢܳܐ ܡܳܪܝ ܫܪܺܝ ܓܙܳܪ ܕܺܝܢܳܐ ܕܰܡܛܰܝܰܒ ܠܺܝ܆ ܘܰܛܪܺܝ ܥܳܒܰܪ ܪܽܘܓܙܳܐ ܕܶܐܬܳܐ ܕܢܶܥܩܽܘܪ ܫܽܘܪ̈ܰܝ܆ ܒܳܥܝܳܐ ܐ̱ܢܳܐ ܡܳܪܝ ܐܰܗܦܶܟ ܣܰܝܦܳܐ ܕܰܫܡܺܝܛ ܥܠܰܝ܆ ܘܰܠܗܳܢ ܫܰܒܛܳܐ ܕܰܙܩܺܝܦ ܥܰܠ ܪܺܝܫܝ ܕܠܳܐ ܐܶܒܠܰܥ ܒܶܗ܀

ܒܳܥܶܐ ܡܶܢܳܟ ܬܳܓܶܗ ܕܡܰܠܟܳܐ ܕܰܫܕܶܐ ܡܶܢܶܗ܆ ܘܟܽܘܪܣܝܳܐ ܕܰܨܕܶܐ ܡܶܢ ܡܰܠܟܽܘܬܳܐ ܥܰܕ ܦܳܩܶܕ ܐܰܢ̱ܬ܆ ܡܦܺܝܣܺܝܢ ܠܳܟ ܡܳܪܝ ܣܳܒܷ̈ܐ ܕܰܟܦܶܝܢ ܥܰܠ ܐܰܦܰܝ̈ܗܽܘܢ܆ ܘܟܽܠܗܽܘܢ ܚܺܐܪ̈ܶܐ ܕܰܡܠܶܝܢ ܩܶܛܡܳܐ ܦܰܪ̈ܨܽܘܦܰܝܗܽܘܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܡܫܺܝܚܳܐ ܕܩܰܒܶܠ ܨܰܘܡܳܐ ܕܡܽܘܫܶܐ ܘܡܰܟܺܝܟܽܘܬܶܗ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀