ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ ܐܰܡܠܶܟ

ܝܰܠܽܘ̈ܕܶܐ ܟܰܕ ܡܶܬܢܰܟܣܺܝܢ ܚܙܳܐ ܐܶܪܰܡܝܳܐ܆ ܘܡܶܬܚܰܪܒܺܝܢ ܒܓܰܘ ܒܶܝܬ ܠܚܶܡ ܡܶܢ ܗܶܪܳܘܕܶܣ܆ ܘܰܫܡܰܥ ܩܳܠܳܐ ܕܽܐܘܠ̈ܝܳܬܳܐ ܕܝܰܠܳܕ̈ܳܬܳܐ܆ ܕܡܶܛܽܠ ܐܶܡܪܶܗ ܕܰܐܠܳܗܳܐ ܡܺܝܬܘ ܥܽܘ̈ܠܰܝܗܶܝܢ܀

ܫܽܘܒܚܳܐ

ܡܰܠܟܳܐ ܕܪܰܘܡܳܐ ܕܶܐܬܬܰܚܬܺܝ ܘܰܗܘܳܐ ܫܰܒܪܳܐ܆ ܘܰܚܠܳܦܰܘܗ̱ܝ ܡܺܝܬܘ ܝܰܠܽܘ̈ܕܶܐ ܒܓܰܘ ܒܶܝܬ ܠܚܶܡ܆ ܢܶܗܘܶܐ ܠܳܟ ܩܶܛܠܳܐ ܕܫܰܒܪ̈ܶܐ ܦܺܝܪܡܳܐ ܕܰܟܝܳܐ܆ ܘܒܶܗ ܬܶܬܢܺܝ݂ܚ ܐܰܠܳܗܽܘܬܳܟ ܘܰܬܚܰܣܶܐ ܠܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ܆ ܡܶܛܽܠ ܝܰܠܕܳܟ ܡܰܚܶܐ ܟܽܠ܆ ܟܰܕ ܥܰܩܶܒ ܗ̱ܘܳܐ ܥܰܘܳܠܳܐ܆ ܘܺܝܕܰܥ ܙܰܒܢܳܐ ܕܡܰܘܠܳܕܳܟ܆ ܡܳܐ ܚܢܺܝܓ ܗ̱ܘܳܐ ܐܶܒܠܳܐ ܕܰܗܘܳܐ: ܠܰܐܒ̈ܳܗܶܐ ܥܰܠ ܝܰܠ̈ܕܰܝܗܽܘܢ: ܕܰܚܙܰܘ ܕܫܶܠܛܰܬ ܒܗܽܘܢ ܚܰܪܒܳܐ: ܥܰܠ ܫܰܦܺܝܪ̈ܶܐ ܕܠܳܐ ܣܰܟܠܽܘ܀

ܫܰܒܪ̈ܶܐ ܕܩܰܛܶܠ ܗܶܪܳܘܕܶܣ܆ ܘܶܐܬܡܰܢܰܥܘ ܠܰܓܢܽܘܢ ܢܽܘܗܪܳܐ܆ ܘܥܰܠ ܦܳܬܽܘܪܳܐ ܡܶܬܒܰܣܡܺܝܢ܆ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܆ ܘܗܳܐ ܢܳܨܚܺܝ݂ܢ ܕܽܘܟܪ̈ܳܢܰܝܗܽܘܢ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܩܶܛܠܳܐ ܕܝܰܠܽܘ̈ܕܶܐ