ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡܝ

ܡܶܢ ܣܰܝܦܶܗ ܕܗܶܪܳܘܕܶܣ܆ ܘܡܶܢ ܢܶܟܠܶܗ ܕܳܐܟܶܠܩܰܪܨܳܐ܆ ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ ܒܓܰܘ ܒܶܝܬ ܠܚܶܡ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܪܳܚܶܝܠ ܒܳܟܝܳܐ ܥܰܠ ܒܢܶܝ̈ܗ̇܆ ܘܠܳܐ ܨܳܒܝܳܐ ܠܡܶܬܒܰܝܳܐܽܘ܆ ܒܰܝܳܐܗ̇ ܡܫܺܝܚܳܐ. ܒܡܰܠܟܽܘܬܳܐ ܫܡܰܝܳܢܺܝܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܥܰܝܢܳܐ ܕܰܢܒܺܝܽܘܬܳܐ܆ ܚܙܳܐ ܗ̱ܘܳܐ ܢܒܺܝܳܐ ܐܶܪܰܡܝܳܐ܆ ܩܶܛܠܳܐ ܕܫܰܒܪ̈ܶܐ܆ ܕܡܶܬܚܰܪܒܺܝܢ ܕܠܳܐ ܣܰܟܠܽܘܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܺܝܬ ܗ̱ܽܘ ܕܠܰܬܕܳܐ ܠܒܺܝܟ ܗ̱ܘܳܐ܆ ܘܡܶܢ ܫܶܠܝܳܐ ܨܳܕܶܗ ܣܰܝܦܳܐ܆ ܘܰܚܠܰܛ ܠܰܕܡܶܗ܆ ܘܚܰܠܒܳܐ ܘܕܶܡ̈ܥܶܐ ܕܝܳܠܶܕܬܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܢ̱ܬ ܕܰܠܫܰܒܪ̈ܶܐ ܫܦܰܝ̈ܳܐ: ܕܶܐܬܩܰܛܰܠܘ ܡܶܛܽܠܳܬܳܟ: ܐܰܘܪܶܬܬ ܐܶܢܽܘܢ: ܟܠܺܝܠܳܐ ܦܰܐܝܳܐ ܕܣܳܗܕܽܘܬܳܐ: ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܡܫܺܝܚܳܐ ܐܰܠܳܗܳܐ ܕܰܠܝܰܠܽܘ̈ܕܶܐ܆ ܕܶܐܬܩܰܛܰܠܘ ܡܶܛܽܠܳܬܳܟ܆ ܡܰܠܟܽܘܬܳܐ ܐܰܘܪܶܬܬ ܐܶܢܽܘܢ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܰܒܪ̈ܶܐ ܗܳܢܽܘܢ ܕܰܗܘܰܘ ܪܺܝܫܺܝܬܳܐ܆ ܠܡܰܘܠܳܕܳܟ ܒܰܪ ܐܰܠܳܗܳܐ܆ ܝܳܪ̈ܬܶܐ ܒܪܰܘܡܳܐ ܥܒܰܕܬ ܐܶܢܽܘܢ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܠܰܛܠܳܝ̈ܶܐ ܣܓܽܘ̈ܠܶܐ ܒܰܟܳܪ̈ܶܐ܆ ܕܩܰܛܶܠ ܐܶܢܽܘܢ ܗܶܪܳܘܕܶܣ܆ ܒܰܣܡܳܟܳܐ ܕܚܰܝ̈ܶܐ ܐܰܫܪܺܝܬ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܩܳܠܳܐ ܕܒܶܟܝܳܐ ܣܰܓܺܝܐܳܐ ܐܶܫܬܡܰܥ܆ ܪܳܚܶܝܠ ܕܒܳܟܝܳܐ ܥܰܠ ܝܰܠ̈ܕܶܝܗ̇܆ ܘܠܳܐ ܨܳܒܝܳܐ ܠܡܶܬܒܰܝܳܐܽܘ܆ ܐܰܢ̱ܬ ܡܳܪܝ ܒܰܝܰܐܶܝܗ̇ ܒܰܚܢܳܢܳܟ܀

ܗܰܘ ܓܶܝܪ ܕܠܰܕܡܳܐ: ܕܫܰܒܪ̈ܶܐ ܕܒܶܝܬ ܠܚܶܡ܆ ܕܶܐܬܩܰܛܰܠܘ ܡܶܛܽܠ ܚܽܘܒܳܟ܆ ܩܰܒܶܠܬ ܐܰܝܟ ܪܳܚܶܡ ܐ̱ܢܳܫܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܚܙܳܐ ܗܶܪܳܘܕܶܣ ܛܪܽܘܢܳܐ ܕܶܐܬܒܰܙܰܚ܆ ܡܶܢ ܪ̈ܰܚܺܝܩܶܐ ܒܢܰܝ̈ ܦܳܪܶܣ܆ ܕܶܐܬܥܰܬܰܕ ܒܰܢܟܺܝܠܽܘܬܶܗ܆ ܕܠܶܐܡܪ̈ܶܐ ܫܦܰܝ̈ܳܐ ܢܶܩܛܽܘܠ ܗ̱ܘܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܪܳܡܳܐ ܕܶܐܬܬܰܚܬܺܝ: ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ: ܘܰܛܠܳܝ̈ܶܐ ܐܶܬܩܰܪܰܒܘ ܗ̱ܘܰܘ: ܩܽܘܪܒܳܢܳܐ ܡܠܶܐ ܬܰܪܥܽܘܬܳܐ: ܬܰܘ ܟܽܠ ܥܰܡ̱̈ܡܺܝܢ: ܢܶܒܪܽܘܟ ܘܢܶܣܓܽܘܕ ܠܶܗ܀

ܚܙܳܐ ܗ̱ܘܳܐ ܗܶܪܳܘܕܶܣ: ܕܒܰܙܰܚܘ̱ ܒܶܗ ܡܓܽܘ̈ܫܶܐ ܕܦܳܪܶܣ: ܘܶܐܬܡܠܺܝ ܗ̱ܘܳܐ ܚܶܡܬܳܐ ܘܪܽܘܓܙܳܐ: ܘܩܰܛܶܠ ܫܰܒܪ̈ܶܐ ܕܒܶܝܬ ܠܚܶܡ: ܡܶܛܽܠ ܕܢܶܩܛܽܘܠ ܗ̱ܘܳܐ: ܠܡܰܠܟܳܐ ܡܳܪܝܳܐ ܕܶܐܬܺܝܠܶܕ܀

ܒܪܳܐ ܕܰܩܕܳܡ ܥܳܠ̈ܡܶܐ: ܕܠܳܐ ܫܽܘܪܳܝܳܐ ܐܶܬܺܝܠܶܕ: ܒܚܰܪܬܳܐ ܕܙܰܒ̈ܢܶܐ ܐܶܬܒܰܣܰܪ: ܘܫܰܒܪ̈ܶܐ ܚܠܳܦܰܘܗ̱ܝ ܐܶܬܩܰܛܰܠܘ: ܬܰܘ ܟܽܠ ܥܰܡ̱̈ܡܺܝܢ: ܢܶܒܪܽܘܟ ܘܢܶܣܓܽܘܕ ܠܶܗ܀

ܩܳܠܳܐ ܗܘܳܐ ܒܪܳܡܬܳܐ: ܕܒܶܟܝܳܐ ܘܶܐܠܝܳܐ ܣܰܓܺܝܳܐܐ: ܕܪܳܚܶܝܠ ܒܳܟܝܳܐ ܥܰܠ ܝܰܠ̈ܕܶܝܗ̇: ܘܠܳܐ ܨܳܒܝܳܐ ܠܡܶܬܒܰܝܳܐܽܘ: ܡܶܛܽܠ ܕܠܰܝܬ ܐܶܢܽܘܢ: ܒܰܝܰܐܶܝܗ̇ ܡܳܪܰܢ ܒܡܰܠܟܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܢܳܨܪܰܬ ܡܕܺܝܢ̱ܬܳܐ

ܩܰܕܡܰܬ ܒܰܟܪܰܬ܆ ܒܶܝܬ ܠܚܶܡ ܣܓܽܘ̈ܠܶܐ ܪ̈ܚܺܝܡܶܐ. ܘܚܰܒܺܝ̈ܒܶܐ ܠܒܰܪ ܩܰܕܺܝܫܳܐ܆ ܩܽܘܪ̈ܒܳܢܶܐ ܕܟܰܝ̈ܳܐ ܩܰܪܶܒ܆ ܡܰܠܟܳܐ ܛܪܽܘܢܳܐ ܟܰܕ ܠܳܐ ܝܳܕܰܥ܆ ܒܪܺܝܟ ܛܳܒܳܐ ܕܟܰܠܶܠ ܐܶܢܽܘܢ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܒܰܕܡܽܘܬ ܐܶܡܪ̈ܶܐ܆ ܒܰܟܳܪ̈ܶܐ ܐܶܬܩܰܛܰܠܘ ܗ̱ܘܰܘ܆ ܝܰܠܽܘ̈ܕܶܐ ܒܓܰܘ ܒܶܝܬ ܠܚܶܡ ܡܶܢ ܗܶܪܳܘܕܶܣ܆ ܘܗܳܐ ܢܛܺܝܪ ܠܶܗ ܕܺܝܢܳܐ ܕܚܺܝܠܳܐ܆ ܘܰܠܝܰܠܽܘ̈ܕܶܐ ܡܰܠܟܽܘܬ ܪܰܘܡܳܐ܆ ܒܕܺܝܢܳܐ ܟܺܐܢܳܐ ܘܰܬܪܺܝܨܳܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܚܙܳܐ ܐܶܪܰܡܝܳܐ܆ ܒܓܶܠܝܳܢܳܐ ܕܰܢܒܺܝܽܘܬܳܐ܆ ܠܝܰܠܽܘ̈ܕܶܐ ܟܰܕ ܡܶܬܩܰܛܠܺܝܢ܆ ܡܶܛܽܠ ܐܶܡܪܶܗ ܕܰܐܠܳܗܳܐ܆ ܕܰܗܘܳܐ ܫܰܒܪܳܐ ܒܶܝܬ ܫܽܘ̈ܩܰܝܗܽܘܢ܆ ܕܢܶܦܪܽܘܩ ܠܰܢ ܡܶܢ ܛܳܥܝܽܘܬܳܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܒܟܰܝ̈ ܚܰܩ̈ܠܳܬܳܐ܆ ܕܒܶܝܬ ܐܰܒܪܳܗܳܡ ܒܶܟܝܳܐ ܚܢܺܝܓܳܐ ܘܡܰܪܺܝܪܳܐ܆ ܟܰܕ ܡܶܬܐܰܒ̈ܠܳܢ ܕܰܚ̈ܙܰܝ ܗ̱ܘܰܝ̈ ܠܰܫ̈ܢܳܢܰܝܗܶܝܢ܆ ܟܰܕ ܡܶܬܚ̈ܰܨܕܳܢ ܡܶܢ ܥܰܘܳܠܳܐ܆ ܥܳܒܶܕ ܕܺܝܢܳܐ ܠܰܛܠܺܝ̈ܡܶܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܫܽܘܒܚܳܐ ܚܰܕ̱ܬܳܐ܆ ܥܰܡ ܩܽܘܪ̈ܒܳܢܶܐ ܪ̈ܺܝܫܰܝ ܦܳܪܶܣ ܩܰܪܶܒܘ ܠܰܒܪܳܐ܆ ܘܰܫܡܰܥ ܡܰܠܟܳܐ ܗܶܪܳܘܕܶܣ. ܕܟܰܕ ܠܳܐ ܚܰܘܝܽܘܗ̱ܝ ܗܦܰܟܘ ܒܰܫܠܳܡܳܐ܆ ܘܰܒܪܽܘܓܙܳܐ ܩܰܛܶܠ ܫܰܒܪ̈ܶܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܒܪܽܘܚܳܐ ܕܩܽܘܕܫܳܐ܆ ܚܙܳܐ ܐܶܪܰܡܝܳܐ ܢܒܺܝܳܐ ܓܰܒܝܳܐ܆ ܠܰܛܠܳܝ̈ܶܐ ܟܰܕ ܡܶܬܚܰܪܒܺܝܢ܆ ܘܰܫܡܰܥ ܩܳܠܳܐ. ܕܒܶܟܝܳܐ ܚܢܺܝܓܳܐ ܕܝܰܠܳܕ̈ܳܬܳܐ܆ ܟܰܕ ܐܳܠ̈ܝܳܢ ܥܰܠ ܝܰܠ̈ܕܰܝܗܶܝܢ܀

ܪܳܚܶܝܠ ܒܳܟܝܳܐ܆ ܡܶܛܽܠ ܝܰܠ̈ܕܶܝܗ̇ ܕܩܰܛܶܠ ܐܶܢܽܘܢ܆ ܗܶܪܳܘܕܶܣ ܣܰܟܠܳܐ ܘܚܰܢܦܳܐ܆ ܠܳܐ ܬܶܬܰܒܠܺܝܢ܆ ܐܺܝܬܽ ܗ̱ܘ ܡܳܪܝܳܐ ܕܰܡܒܰܝܰܐ ܠܶܟܝ܆ ܘܒܰܕܡܶܗ ܦܳܪܶܩ ܒܶܪ̈ܝܳܬܳܐ܀

ܢܒܺܝܳܐ ܕܪܽܘܚܳܐ܆ ܩܰܕܶܡ ܒܰܕܶܩ ܥܰܠ ܟܰܣ̈ܝܳܬܳܐ܆ ܡܶܛܽܠ ܩܶܛܠܳܐ ܕܝܰܠܽܘ̈ܕܶܐ܆ ܕܰܫܡܰܥ ܩܳܠܳܐ܆ ܕܒܶܟܝܳܐ ܘܶܐܠܝܳܐ ܒܓܰܘ ܒܶܝܬ ܠܚܶܡ܆ ܒܡܰܘܬܳܐ ܚܢܺܝܓܳܐ ܕܝܰܠܽܘ̈ܕܶܐ܀

ܡܰܪܳܚܽܘܬܳܐ܆ ܘܥܳܠܽܘܒܽܘܬܳܐ ܘܰܛܪܽܘܢܽܘܬܳܐ܆ ܣܥܰܪ ܗ̱ܘܳܐ ܡܰܠܟܳܐ ܗܶܪܳܘܕܶܣ܆ ܕܫܰܒܪ̈ܶܐ ܩܰܛܶܠ܆ ܕܠܳܐ ܒܽܘܝܳܢܳܐ ܘܪܽܘܓܙܳܐ ܩܰܒܶܠ܆ ܡܶܢ ܐܰܠܳܗܳܐ ܚܠܳܦ ܪܽܘܫܥܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܘܡܳܢܳܐ

ܝܰܠܽܘ̈ܕܶܐ: ܕܶܐܬܩܰܛܰܠܘ ܗ̱ܘܰܘ ܒܒܶܝܬ ܠܚܶܡ ܡܶܢ ܝܰܕ ܥܰܘܳܠܳܐ: ܗܳܐ ܡܶܙܕܰܝܰܚ ܝܽܘܡ ܕܽܘܟܪܳܢܗܽܘܢ ܒܰܐܪܒܰܥ ܦܶܢ̈ܝܳܢ: ܘܰܢܛܺܝܪ ܕܺܝܢܳܐ ܠܪ̈ܰܫܺܝܥܶܐ: ܒܝܰܘܡܳܐ ܕܢܽܘܚܳܡܳܐ܀

ܝܰܘܡܳܢܳܐ: ܗܳܐ ܡܶܬܪܰܡܪܰܡ ܘܡܶܙܕܰܝܰܚ ܕܽܘܟܪܳܢ ܝܰܠܽܘ̈ܕܶܐ: ܒܥܺܕܰܬ ܩܽܘܕܫܳܐ ܡܟܺܝܪܬܶܗ ܕܰܒܪܳܐ ܟܰܠܰܬ ܢܽܘܗܪܳܐ: ܘܙܳܡܪܳܐ ܫܽܘܒܚܳܐ ܠܰܐܠܳܗܳܐ: ܕܰܐܘܪܶܒ ܕܽܘܟܪܳܢܗܽܘܢ܀

ܛܽܘܒܰܝܟܽܘܢ: ܝܰܠܽܘ̈ܕܶܐ ܕܰܒܢܶܟܠܳܐ: ܩܛܰܠܟܽܘܢ ܗܶܪܳܘܕܶܣ: ܘܰܣܠܶܩ ܕܶܡܟܽܘܢ ܐܰܝܟ ܩܽܘܪܒܳܢܳܐ ܠܘܳܬ ܐܰܠܳܗܳܐ: ܘܗܳܐ ܡܶܬܢܰܨܰܚ ܕܽܘܟܪܳܢܟܽܘܢ: ܒܰܫܡܰܝܳܐ ܘܒܰܐܪܥܳܐ܀

ܝܰܠܽܘ̈ܕܶܐ: ܕܒܰܚܣܳܡܳܐ ܐܶܬܩܰܛܰܠܘ ܒܣܰܝܦܶܗ ܕܗܶܪܳܘܕܶܣ: ܘܦܳܚ ܗ̱ܘܳܐ ܪܺܝܚܗܽܘܢ ܒܓܰܘ ܥܺܕ̈ܳܬܳܐ ܐܰܝܟ ܗܶܪ̈ܽܘܡܶܐ: ܘܝܽܘܡ ܕܽܘܟܪܳܢܗܽܘܢ ܗܳܐ ܢܳܨܰܚ: ܒܰܐܪܒܰܥ ܦܶܢ̈ܝܳܬܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܡܳܐ ܚܢܺܝܓ ܗ̱ܘܳܐ ܐܶܒܠܳܐ ܕܰܗܘܳܐ܆ ܠܰܐܒ̈ܳܗܶܐ ܥܰܠ ܝܰܠ̈ܕܰܝܗܽܘܢ܆ ܕܰܚܙܰܘ ܕܫܶܠܛܰܬ ܗ̱ܘܳܬ ܚܰܪܒܳܐ܆ ܥܰܠ ܫܰܦܺܝܪ̈ܶܐ ܕܠܳܐ ܣܰܟܠܽܘ܀

ܠܟܽܘܢ ܛܽܘܒܰܝܟܽܘܢ ܝܰܠܽܘ̈ܕܶܐ܆ ܕܰܗܘܳܐ ܕܶܡܟܽܘܢ ܩܽܘܪܒܳܢܳܐ܆ ܘܶܐܬܩܰܪܰܒ ܠܰܡܠܶܟ ܡܰܠ̈ܟܶܐ܆ ܒܰܕܡܽܘܬ ܥܶܛܪܳܐ ܕܗܶܪ̈ܽܘܡܶܐ܀

ܡܶܛܽܠܳܬܳܟ ܡܰܚܶܐ ܟܽܠ܆ ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ܆ ܗܳܐ ܢܳܨܚܺܝܢ ܕܽܘܟܪ̈ܳܢܰܝܗܽܘܢ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܀

ܚܙܳܐ ܐܶܪܰܡܝܳܐ ܒܓܶܠܝܳܢܳܐ܆ ܝܰܠܽܘ̈ܕܶܐ ܟܰܕ ܡܶܬܢܰܟܣܺܝܢ܆ ܡܶܛܽܠ ܐܶܡܪܶܗ ܕܰܐܠܳܗܳܐ܆ ܕܶܐܬܬܰܚܬܺܝ ܘܰܗܘܳܐ ܥܽܘܠܳܐ܀

ܒܪܳܐ ܕܰܗܘܳܐ ܫܰܒܪܳܐ ܚܠܳܦܰܝܢ܆ ܘܫܰܒܪ̈ܶܐ ܡܺܝܬܘ ܡܶܛܽܠܳܬܶܗ܆ ܚܰܣܳܐ ܠܥܺܕܬܳܟ ܘܰܠܝܰܠ̈ܕܶܝܗ̇܆ ܕܰܢܫܰܒܚܽܘܢܳܟ ܒܥܺܐܕܰܝ̈ܗܽܘܢ܀

ܗܶܪܳܘܕܶܣ ܟܰܕ ܡܶܫܬܰܢܶܐ܆ ܘܶܐܫܰܕ ܠܰܕܡܳܐ ܙܰܟܳܝܳܐ܆ ܘܰܡܫܺܝܚܳܐ ܐܶܫܰܕ ܠܰܕܡܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܒܪܺܝܟ ܕܰܐܘܪܶܒ ܕܽܘܟܪ̈ܳܢܰܝܗܽܘܢ܆ ܕܫܰܒܪ̈ܶܐ ܕܰܗܘܰܘ ܪܺܝܫܺܝܬܳܐ܆ ܕܩܰܛܶܠ ܣܰܟܠܳܐ ܗܶܪܳܘܕܶܣ܆ ܒܝܰܕ ܡܶܠܟܶܗ ܕܳܐܟܶܠܩܰܪܨܳܐ܀

ܝܰܘܡܳܢܳܐ ܩܛܰܦ ܥܰܘܳܠܳܐ܆ ܣܓܽܘ̈ܠܶܐ ܪ̈ܚܺܝܡܶܐ ܘܚܰܒܺܝ̈ܒܶܐ܆ ܘܕܳܫ ܐܶܢܽܘܢ ܒܰܕܡܽܘܬ ܥܶܢ̈ܒܶܐ܆ ܘܪܰܥܺܝ ܕܶܡܗܽܘܢ ܠܰܐܠܳܗܳܐ܀

ܛܽܘܒܰܝܟܽܘܢ ܕܶܐܬܩܰܛܰܠܬܽܘܢ܆ ܛܽܘܒܰܝܟܽܘܢ ܕܶܐܬܢܰܨܰܚܬܽܘܢ ܛܽܘܒܰܝܟܽܘܢ ܡܳܐ ܕܩܳܪܶܐ ܠܟܽܘܢ܆ ܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ܆ ܝܽܘܡ ܕܽܘܟܪܳܢܗܽܘܢ ܕܫܰܒܪ̈ܶܐ ܪ̈ܚܺܝܡܶܐ܆ ܒܰܟܳܪ̈ܶܐ ܗܳܢܽܘܢ ܕܶܐܬܩܰܛܰܠܘ ܡܶܛܽܠ ܐܶܡܪܶܗ܆ ܕܒܰܪ ܐܰܠܳܗܳܐ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܡܳܐ ܚܢܺܝܓܳܐ ܗ̱ܘܳܬ ܫܳܥܬܳܐ܆ ܕܰܦܩܰܕ ܡܰܠܟܳܐ ܗܰܘ ܥܰܘܳܠܳܐ܆ ܕܒܳܗ̇ ܢܶܬܩܰܛܠܽܘܢ ܝܰܠܽܘ̈ܕܶܐ ܒܢܰܝ̈ ܒܶܝܬ ܠܚܶܡ܆ ܘܰܢܦܰܩܘ ܚܰܢ̈ܦܶܐ܆ ܘܰܕܠܳܐ ܪ̈ܰܚܡܶܐ ܚܪܰܒܘ ܐܶܢܽܘܢ܀

ܫܽܘܒܚܳܐ

ܡܳܐ ܡܰܪܺܝܪ ܗ̱ܘܳܐ ܘܰܚܢܺܝܓ܆ ܩܳܠܳܐ ܕܶܐܫܬܡܰܥ ܒܛܽܘܪܳܐ ܕܺܝܗܽܘܕ܆ ܒܓܶܠܝܳܢܳܐ ܕܰܢܒܺܝܽܘܬܳܐ ܨܳܬ ܐܶܪܰܡܝܳܐ܆ ܩܳܠ ܐܽܘܠ̈ܝܳܬܳܐ܆ ܕܝܰܠܽܘ̈ܕܶܐ ܟܰܕ ܡܶܬܩܰܛܠܺܝܢ

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܒܗܳܢܳܐ ܝܰܘܡܳܐ: ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ: ܘܰܐܝܟ ܩܽܘܪ̈ܒܳܢܶܐ ܐܶܬܩܰܪܰܒ: ܕܶܡܗܽܘܢ ܒܒܶܝܬ ܠܚܶܡ: ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܪܳܚܺܝܠ ܒܳܟܝܳܐ: ܘܠܳܐ ܨܳܒܝܳܐ ܠܡܶܬܒܰܝܳܐܽܘ: ܕܰܪ̈ܚܽܘܡܶܝܗ̇ ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܝܗ̇ ܐܶܬܢܟܶܣܘ: ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܩܥܳܐ ܗܶܪܳܘܕܶܣ܆ ܘܰܠܩܶܣܛܽܘܢܳܪ̈ܶܐ ܐܶܡܰܪ܆ ܕܙܶܠܘ ܩܰܛܶܠܘ ܛܠܳܝ̈ܶܐ ܟܽܠܗܽܘܢ ܕܒܶܝܬ ܠܚܶܡ܆ ܡܶܢ ܒܰܪ ܬܰܪܬܶܝܢ ܫܢܺܝ̈ܢ ܘܰܠܬܰܚܬ܆ ܘܠܳܐ ܬܚܽܘܣܽܘܢ ܥܰܠ ܫܰܦܺܝܪ̈ܶܐ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ

ܡܶܛܽܠܳܬܳܟ ܝܺܚܺܝܕܳܝܳܐ ܐܰܠܳܗܳܐ܆ ܝܰܠܽܘ̈ܕܶܐ ܐܶܬܩܰܛܰܠܘ ܗ̱ܘܰܘ ܒܓܰܘ ܒܶܝܬ ܠܚܶܡ܆ ܘܗܳܐ ܢܛܺܝܪܳܐ ܠܗܽܘܢ ܡܰܠܟܽܘܬܳܐ܆ ܘܰܠܥܰܘܳܠܳܐ ܓܺܗܰܢܳܐ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ (ܣܳܠܶܩ: ܒܶܐܢܳܐ ܐ̱ܢܳܐ ܢܘܽܗܪܳܐ ܫܰܪܝܪܳܐ)

ܐܶܡܰܪ ܩܽܘܫܬܳܐ ܕܰܒܕܶܢܚܶܗ܆ ܐܶܡܪ̈ܶܐ ܒܪܺܝܪ̈ܶܐ ܚܠܳܦܰܘܗ̱ܝ ܐܶܬܢܟܶܣܘ܆ ܘܰܗܘܳܐ ܕܶܡܗܽܘܢ ܩܽܘܪܒܳܢܳܐ܆ ܘܦܺܝܪܡܳܐ ܕܰܡܠܶܐ ܬܰܪܥܽܘܬܳܐ܆ ܒܩܶܛܠܳܟ ܡܳܪܝ ܘܰܒܡܰܘ̈ܬܰܝܗܽܘܢ܆ ܐܰܫܪܳܐ ܫܰܝܢܳܟ ܒܰܒܪܺܝܬܳܐ܆ ܘܰܐܪܥܳܐ ܬܶܬܢܰܛܰܪ܆ ܘܢܰܘܕܽܘܢ ܠܰܫܡܳܟ ܥܳܡܽܘܪ̈ܶܝܗ̇܀

ܫܽܘܒܚܳܐ

ܩܕܳܡ ܕܳܪ̈ܶܐ ܚܙܳܗ̇ ܗ̱ܘܳܐ ܢܒܺܝܳܐ܆ ܠܪܳܚܶܝܠ ܟܰܕ ܒܳܟܝܳܐ ܘܠܳܐ ܫܳܠܝܳܐ܆ ܘܠܳܐ ܨܳܒܝܳܐ ܠܳܗ̇ ܕܬܶܬܒܰܝܰܐ܆ ܥܰܠ ܝܰܠ̈ܕܶܝܗ̇ ܕܶܐܬܩܰܛܰܠܘ ܗ̱ܘܰܘ܆ ܘܰܩܥܳܐ ܢܒܺܝܳܐ ܕܠܳܐ ܬܶܒܟܺܝܢ܆ ܪܳܚܶܝܠ ܡܶܛܽܠ ܚܰܒܺܝ̈ܒܰܝܟܝ܆ ܕܰܐܝܟ ܕܶܒ̈ܚܶܐ ܕܟܰܝ̈ܳܐ܆ ܩܕܳܡ ܐܰܠܳܗܳܐ ܐܶܬܩܰܒܰܠܘ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ܆ ܘܒܰܕܡܳܟ ܚܰܝܳܐ ܬܽܘܒ ܐܶܬܚܰܣܺܝܘ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ܆ ܒܽܐܘܪܺܫܠܶܝܡ ܗܳܝ ܕܒܰܫܡܰܝܳܐ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡܶܢ ܒܺܝ̈ܫܶܐ. ܒܰܐܦ̈ܶܐ ܓܰܠ̈ܝܳܬܳܐ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܐܺܝܠ ܓܰܢ̱ܒܳܪܳܐ܆ ܕܩܳܡ ܥܰܠ ܪܰܘܡܳܗ̇

ܡܳܪܝܳܐ ܡܳܪܰܢ܆ ܝܰܠܽܘ̈ܕܶܐ ܟܰܕ ܡܶܬܢܰܟܣܺܝܢ܆ ܚܙܳܐ ܐܶܪܰܡܝܳܐ ܢܒܺܝܳܐ ܒܒܶܝܬ ܠܚܶܡ܆ ܘܰܫܡܰܥ ܩܳܠܳܐ܆ ܕܽܐܘܠ̈ܝܳܬܳܐ ܕܝܰܠܴ̈ܕܳܬܳܐ܆ ܟܰܕ ܒܳܟ̈ܝܳܢ ܗ̱ܘܰܝ̈ ܡܶܛܽܠ ܝܰܠ̈ܕܰܝܗܶܝܢ܆ ܨܠܽܘܬܗܽܘܢ ܬܰܦܺܝܣ܆ ܠܰܐܠܳܗܳܐ ܕܢܰܫܪܶܐ ܫܰܝܢܶܗ܆ ܒܥܺܕܬܶܗ ܘܥܰܡܶܗ ܘܒܰܐܪܒܰܥ ܦܶܢ̈ܝܳܬܳܐ܀

ܫܽܘܒܚܳܐ

ܡܳܪܝܳܐ ܡܳܪܰܢ܆ ܛܠܳܝ̈ܶܐ ܕܒܶܝܬ ܠܚܶܡ ܕܺܝܗܽܘܕܳܐ܆ ܡܶܢ ܗܶܪܳܘܕܶܣ ܡܰܠܟܳܐ ܐܶܬܢܟܶܣܘ܆ ܘܰܐܝܟ ܪܺܝܫܺܝܬܳܐ܆ ܘܩܽܘܪ̈ܒܳܢܶܐ ܕܟܰܝ̈ܳܐ ܫܦܰܝ̈ܳܐ܆ ܐܶܬܩܰܪܰܒܘ ܗ̱ܘܰܘ ܠܡܰܠܟܳܐ ܫܡܰܝܳܢܳܐ܆ ܥܒܶܕ ܕܽܘܟܪܳܢܗܽܘܢ܆ ܒܥܺܕܬܳܐ ܦܪܺܝܩܰܬ ܒܰܨܠܺܝܒܳܟ܆ ܘܪܰܡܪܶܡ ܩܰܪܢܳܗ̇ ܕܙܰܝܚܰܬ ܥܺܐܕܰܝ̈ܗܽܘܢ܀

ܡܶܢ ܥܳܠܰܡ

ܐܺܝܠ ܓܰܢ̱ܒܳܪܳܐ܆ ܕܩ̣ܳܡ ܥܰܠ ܪܰܘܡܳܗ̇ ܕܓܳܓܽܘܠܬܳܐ: ܘܰܩܥ̣ܳܐ ܒܩܳܠܶܗ: ܘܫܽܘ̈ܥܶܐ ܐܶܨܛܰܪܺܝ̣ܘ. ܐܰܫܡܰܥ ܩܳܠܳܟ. ܒܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ܆ ܘܢܰܚܶܡ ܐܶܢܽܘܢ: ܠܰܫܟܺܝ̈ܒܰܝ ܥܰܦܪܳܐ ܗ̄ ܕܢܰܘܕܽܘܢ ܠܳܟ ܥܰܠ ܛܰܝܒܽܘܬܳܟ. ܕܰܐܢ̱ܬ ܗ̣ܽܘ ܐܺܝܬܰܝܟ: ܡܢܰܚܡܳܢܳܐ ܕܡܺܝ̈ܬܶܐ܀

ܦܶܬܓܳܡܳܐ: ܡܶܛܽܠ ܕܶܐܬܕܟܰܪ ܠܡܶܬܒܰܥ ܕܶܡܗܽܘܢ: ܘܠܳܐ ܛܳܥܶܐ ܓܥܳܬܶܗ ܕܡܶܣܟܺܢܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܟܽܘܢ ܥܰܡܰܢ ܫܰܒܪ̈ܶܐ ܒܪܺܝܪ̈ܶܐ ܨܠܽܘܬܟܽܘܢ ܥܰܡܰܢ܆

ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܦܶܣܬܳܐ ܕܫܰܒܪ̈ܶܐ ܐܶܬܢܰܩܫܰܬ ܗ̱ܘܳܬ ܒܰܐܪܥܳܐ ܕܺܝܗܽܘܕ܆ ܕܰܚܠܳܦ ܡܰܠܟܳܐ ܕܶܐܬܳܐ ܠܥܳܠܡܳܐ ܡܶܬܩܰܛܠܺܝܢ ܗ̱ܘܰܘ܆ ܣܳܗ̈ܕܶܐ ܚܰܕ̱̈ܬܶܐ ܗܘܰܘ ܠܶܗ ܠܰܒܪܳܐ ܟܰܕ ܡܶܬܢܰܟܣܺܝܢ܆ ܘܟܰܕ ܡܶܬܩܰܛܠܺܝܢ ܕܰܪܫܽܘܗ̇ ܠܽܐܘܪܚܳܐ ܕܩܶܛܠܶܗ ܕܰܒܪܳܐ܀

ܓܥܰܝ̈ ܐܶܡ̈ܗܳܬܳܐ ܕܰܚ̈ܙܰܝ ܚܰܪܒܳܐ ܕܝܰܠܽܘ̈ܕܰܝܗܶܝܢ܆ ܕܰܒܦܽܘܩܕܳܢܶܗ ܕܡܰܠܟܳܐ ܚܰܢܦܳܐ ܡܶܬܩܰܛܠܺܝܢ ܗ̱ܘܰܘ܆ ܐܰܝ̈ܠܶܠܝ ܣ̈ܰܬܶܐ ܥܰܠ ܛܽܘ̈ܛܝܳܬܗܶܝܢ ܒܰܟܳܪ̈ܳܬܳܐ܆ ܕܥܰܠ ܗ̱ܘܳܐ ܚܙܺܝܪܳܐ ܡܰܥܶܣ ܐܶܢܶܝܢ ܒܓܰܘ ܣܰܬܰܝ̈ܗܶܝܢ܀

ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀