ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܐܺܝܢ ܕܰܘܺܝܕ ܢܰܨܺܝܚܳܐ ܢܒܺܝܳܐ ܕܪܽܘܚܳܐ

ܣܠܶܩ ܗ̱ܘܳܐ ܡܽܘܫܶܐ ܠܛܽܘܪܳܐ ܘܥܰܠ ܒܰܥܢܳܢܳܐ܆ ܘܰܒܥܰܪܦܶܠܳܐ ܚܙܳܐ ܬܰܡܳܢ ܥܺܕܬܳܐ ܟܰܕ ܒܰܢܝܳܐ܆ ܡܨܰܒܬܳܐ ܒܟܽܠ ܕܶܡ̈ܘܳܬܳܐ ܘܰܓܠܺܝܦܺܝܢ ܒܳܗ̇܆ ܛܰܒ̈ܥܶܐ ܛܳܒ̈ܳܐ ܕܟܽܠ ܓܰܘܢܺܝ̈ܢ ܕܢܽܘܪܳܐ ܘܰܕܪܽܘܚܳܐ܆ ܚܙܳܐ ܙܺܝܘܳܐ ܚܰܝܳܐ ܕܡܶܬܢܰܒܪܰܫ܆ ܘܰܣܪ̈ܳܦܶܐ ܕܙܳܠܚܺܝܢ ܒܳܗ̇ ܩܽܘܕܫܳܐ܆ ܘܰܬܪܽܘܢܽܘܣ ܕܰܩܪܽܘܣܛܰܠܽܘܣ ܕܝܳܬܶܒ ܥܠܰܘܗ̱ܝ ܡܰܠܟܳܐ܀

ܛܽܘܒܰܝܟܝ ܥܺܕܬܳܐ ܡܗܰܝܡܰܢܬܳܐ ܡܟܺܝܪܬܶܗ ܕܰܒܪܳܐ܆ ܕܒܶܟܝ ܐܶܣܬܰܝܰܟܘ ܦ̈ܶܠܳܐܬܳܐ ܘܐ̱ܪ̈ܳܙܶܐ ܕܰܟܣܶܝܢ ܗ̱ܘܰܘ܆ ܨܳܪܶܟܝ ܗ̱ܘܳܐ ܢܽܘܚ ܟܺܐܢܳܐ ܒܓܰܘ ܟܶܐܘܶܠܳܐ܆ ܘܪܰܫܡܶܟܝ ܝܰܥܩܽܘܒ ܙܰܕܺܝܩܳܐ ܒܟܺܐܦܳܐ ܗܳܝ ܕܰܐܩܺܝܡ܆ ܚܙܳܟܝ ܡܽܘܫܶܐ ܓܰܒܝܳܐ ܒܛܽܘܪ ܣܺܝܢܰܝ܆ ܒܰܥܢܳܢܳܐ ܕܢܽܘܪܳܐ ܘܰܕܪܽܘܚܳܐ܆ ܘܰܡܫܺܝܚܳܐ ܫܰܡܠܺܝ ܐ̱ܪ̈ܳܙܰܝܟܝ ܒܰܕܡܳܐ ܕܡܶܢ ܕܰܦܢܶܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ݀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܣܺܝܡ ܒܳܗ̇ ܠܽܘ̈ܚܶܐ ܕܢܳܡܽܘܣܳܐ܆ ܘܩܺܐܒܽܘܬܳܐ ܕܕܺܝܰܬܺܩܺܐ܆ ܘܡܰܕܒܰܚ ܩܽܘܕܫܳܐ ܡܚܰܣܝܳܢܳܐ܆ ܕܰܡܩܰܒܶܠ ܟܽܠ ܕܶܒ̈ܚܳܬܳܐ܆ ܘܰܪܫܽܘܡ ܒܳܗ̇ ܛܽܘܦܣܳܐ ܘܐ̱ܪܳܙܳܐ܆ ܕܥܺܕܬܳܐ ܕܡܳܟܰܪ ܐ̱ܢܳܐ ܠܺܝܚܺܝܕܝ܀

ܬܶܫܒܽܘܚܬܳܐ ܠܡܳܪܶܗ ܕܡܽܘܫܶܐ܆ ܕܰܡܟܰܪ ܥܺܕܬܳܐ ܠܚܰܒܺܝܒܶܗ܆ ܘܗܳܐ ܙܳܡܪܺܝܢ ܥܰܡ̱̈ܡܶܐ ܒܓܰܘܳܗ̇܆ ܫܽܘܒܚܳܐ ܚܰܕ̱ܬܳܐ ܕܠܳܐ ܫܶܠܝܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܩܽܘܕܳܫ ܥܺܕܬܳܐ