ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܩܽܘܡܝ ܐܰܘܕܳܝ ܠܶܗ. ܥܺܕܬܳܐ ܡܗܰܝܡܰܢܬܳܐ܆ ܒܟܶܢ̈ܫܶܐ ܕܝܰܠ̈ܕܰܝܟܝ ܠܡܰܠܟܳܐ ܫܡܰܝܳܢܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܶܬܳܐ ܘܡܰܟܪܳܗ̇. ܘܦܰܪܩܳܗ̇ ܡܶܢ ܛܽܘܥܝܰܝ܆ ܘܳܐܦ ܦܶܪܢܺܝܬܳܐ ܒܰܕܡܶܗ ܟܬܰܒ ܝܰܗ̱ܒ ܠܳܗ̇܆ ܪܰܚܶܡ ܥܠܰܝܢ ܐܰܠܳܗܳܐ܀

ܥܰܠ ܛܽܘܪ ܒܶܝܬ ܐܺܝܠ. ܨܳܪܶܟܝ ܗ̱ܘܳܐ ܝܰܥܩܽܘܒ܆ ܒܟܺܐܦܳܐ ܕܰܡܫܰܚ ܐܰܒܳܐ ܕܰܢܒܺܝ̈ܶܐ܆ ܪܰܚܶܡܥܠܰܝܢ ܐܰܠܳܗܳܐ܀

ܡܰܠܟܳܐ ܡܫܺܝܚܳܐ. ܕܪܰܡܪܶܡ ܡܶܫܬܽܘܬܶܟܝ܆ ܗܽܘ ܫܪܳܐ ܒܓܰܘܶܟܝ ܘܡܰܐܓܶܢ ܡܩܰܕܶܫ ܠܶܟܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܟܶܢ̈ܫܶܐ ܕܥܺܝܪ̈ܶܐ. ܚܳܕܶܝܢ ܝܰܘܡܳܢܳܐ܆ ܘܝܰܠ̈ܕܰܝܟܝ ܙܳܡܪܺܝܢ ܫܽܘܒܚܳܐ ܠܰܡܟܺܝܪܶܟܝ܆ ܪܰܚܶܡܥܠܰܝܢ ܐܰܠܳܗܳܐ܀

ܗܰܘ ܕܰܠܥܺܕܬܶܗ. ܨܰܒܶܬ ܗ̱ܘܳܐ ܘܗܰܕܪܳܗ̇܆ ܒܟܽܠ ܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܠܫܽܘ̈ܟܳܢܶܐ. ܕܪܽܘܚܳܐ ܩܰܕܺܝܫܳܐ܆ ܒܝܰܕ ܫܠܺܝܚ̈ܶܐ ܘܟܳܗ̈ܢܶܐ ܩܰܕܫܳܗ̇ ܗ̱ܘܳܐ ܠܥܺܕܬܶܗ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܬܶܫܡܶܫܬܳܐ ܪܰܡܫܳܝܬܳܐ

ܚܕܳܝ ܛܳܒ ܘܰܪܘܰܙܝ ܒܰܪ̱ܬ ܥܰܡ̱̈ܡܶܐ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܕܫܶܬܶܐܣܰܝ̈ܟܝ ܐܶܫܬܰܪܰܪ̈ܝ ܗ̱ܘܰܝ̈܆ ܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܡܶܛܽܠ ܕܒܰܕܡܶܗ ܦܪܺܝܩܳܐ ܐܰܢ̱ܬܝ܆ ܕܰܡܫܺܝܚܳܐ ܐܰܠܳܗܳܐ ܕܥܰܠ ܟܽܠ܀

ܚܕܺܝܘ ܒܳܗ̇ ܟܽܠܗܽܘܢ ܢܒܺܝ̈ܶܐ܆ ܟܰܕ ܡܶܢ ܡܰܣܚܽܘܬܳܐ ܣܳܠܩܳܐ܆ ܘܛܰܝܶܒܘ ܗ̱ܘܰܘ ܠܳܗ̇ ܪܽܘܡܝܳܢܳܐ܆ ܘܰܒܪܰܘܡܳܐ ܐܰܣܶܩܘ ܐܰܘܬܒܽܘܗ̇܆ ܫܡܰܝܳܐ ܗܘܳܬ ܗ̱ܘܳܬ ܬܰܟܣܺܝܬܳܗ̇܆ ܘܳܐܐܰܪ ܟܠܺܝܠܳܐ ܓܳܕܶܠ ܗ̱ܘܳܐ܀

ܬܳܝ ܘܰܬܠܳܝ ܥܠܰܝܟܝ ܚܶܫ̈ܠܳܬܳܐ܆ ܝܰܩܺܝܪ̈ܳܬܳܐ ܕܰܕܡܰܝ̈ܳܐ܆ ܓܕܽܘ̈ܠܶܐ ܕܕܰܗܒܳܐ ܣܽܘ̈ܡܳܩܶܐ܆ ܘܥܶܩ̈ܶܐ ܕܣܺܐܡܳܐ ܕܰܡܦܰܬܟܺܝܢ܆ ܝܽܘ̈ܩܰܢܬܶܐ ܘܡܰܪ̈ܓܳܢܝܳܬܳܐ܆ ܘܒܶܪ̈ܽܘܠܶܐ ܘܛܰܒ̈ܥܶܐ ܛܳܒ̈ܶܐ܀

ܫܽܘܒܚܳܐ

ܬܳܝ ܐܶܬܚܰܕܰܬܝ ܐܳܘ ܥܺܕܬܳܐ܆ ܘܶܐܬܩܰܕܰܫܝ ܡܶܢ ܩܰܕܺܝܫܳܐ܆ ܬܳܝ ܠܶܟܝ ܘܶܐܬܥܰܛܰܦܝ ܢܰܚ̈ܬܶܐ܆ ܙܩܺܝܪ̈ܰܝ ܡܶܢ ܪܽܘܚܳܐ ܕܩܽܘܕܫܳܐ܆ ܬܳܝ ܐܶܨܛܰܒܰܬܝ ܒܰܠܒܽܘ̈ܫܶܐ܆ ܕܥܰܬܶܕ ܠܶܟܝ ܡܰܠܟܳܐ ܡܫܺܝܚܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܩܥܳܐ ܗ̱ܘܳܐ ܐܶܫܰܥܝܳܐ ܢܒܺܝܳܐ܆ ܘܣܰܒܪܳܗ̇ ܠܥܺܕܬܳܐ ܩܰܕܺܝܫܬܳܐ܆ ܦܬܰܚܝ ܬܰܪ̈ܥܰܝܟܝ ܠܳܐ ܢܶܬܬܰܚܕܽܘܢ܆ ܠܳܐ ܒܠܺܠܝܳܐ ܘܠܳܐ ܒܺܐܝܡܳܡܳܐ܆ ܕܢܶܥܠܽܘܢ ܡܰܠ̈ܟܶܐ ܒܬܳܓܰܝ̈ܗܽܘܢ܆ ܐܳܦ ܕܰܝ̈ܳܢܶܐ ܒܫܽܘܒܩܳܢ ܚܰܘܒܰܝ̈ܗܽܘܢ܆ ܘܥܰܡ̱̈ܡܶܐ ܟܰܕ ܙܳܡܪܺܝܢ ܫܽܘܒܚܳܐ܆ ܠܰܡܫܺܝܚܳܐ ܕܰܫܪܳܐ ܒܓܰܘܶܟܝ܆ ܘܥܳܡܰܪ ܠܥܶܠ ܒܪܰܘܡܳܐ܆ ܘܫܽܘܠܛܳܢܶܗ ܡܰܡܠܶܟ ܥܰܠ ܟܽܠ܆ ܒܪܺܝܟܽ ܗ̱ܘ ܕܒܰܫܡܰܝܳܐ ܘܒܰܐܪܥܳܐ܆ ܡܬܺܝܚ ܫܽܘܠܛܳܢܶܗ ܘܰܐܘܪܶܒ ܥܺܕܬܶܗ ܡܗܰܝܡܰܢܬܳܐ܀

ܫܽܘܒܚܳܐ

ܒܐ̱ܪ̈ܳܙܶܐ ܘܛܽܘܦ̈ܣܶܐ ܕܰܢܒܺܝ̈ܶܐ܆ ܐܶܬܪܰܫܡܰܬ ܥܺܕܰܬ ܩܽܘܕܫܳܐ܆ ܒܟܶܐܘܶܠܳܐ ܕܢܽܘܚ ܙܰܕܺܝܩܳܐ܆ ܒܡܰܫܟܢܳܐ ܫܒܺܝܚܳܐ ܕܰܐܒܪܳܗܳܡ܆ ܒܚܰܩܠܳܐ ܗܰܢܺܝܐܰܬ ܪܺܝܚܳܐ܆ ܐܳܦ ܒܰܥܠܳܬܳܐ ܗܳܝ ܕܺܐܝܣܚܳܩ ܕܶܒܚܳܐ܆ ܗܳܕܳܐ ܗ̱ܝ ܕܽܘܟܬܳܐ ܕܰܐܠܳܗܳܐ܆ ܐܶܡܰܪ ܝܰܥܩܽܘܒ ܙܰܕܺܝܩܳܐ܆ ܡܽܘܫܶܐ ܚܙܳܗ̇ ܕܒܰܢܝܳܐ܆ ܘܰܢܚܶܬ ܘܰܥܒܰܕ ܐܰܟܘܳܬܳܗ̇܆ ܒܪܺܝܟ ܕܰܓܒܳܗ̇ ܠܥܺܕܰܬ ܩܽܘܕܫܳܐ܆ ܘܗܳܐ ܡܶܢ ܠܩܽܘܕܡܺܝܢ ܥܰܡ̱̈ܡܶܐ ܟܰܕ ܣܳܓܕܺܝܢ ܠܰܫܡܳܟ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܟ ܬܶܫܒܽܘܚܬܳܐ ܡܶܠܬܳܐ ܕܚܰܝ̈ܶܐ

ܐܰܪܺܝܡ ܐܺܝܕܶܗ܆ ܡܳܪܝܳܐ ܘܰܐܓܢܳܗ̇ ܥܰܠ ܡܽܘܫܶܐ܆ ܘܒܶܗ ܡܰܠܶܠ ܪܽܘܚܳܐ ܕܚܰܝ̈ܶܐ܆ ܘܰܢܗܰܪ ܙܺܝܘܶܗ ܐܰܝܟ ܫܶܡܫܳܐ܆ ܗܳܪܟܳܐ ܕܶܝܢ ܥܺܕܰܬ ܩܽܘܕܫܳܐ܆ ܡܳܪܰܢ ܩܰܕܫܳܗ̇ ܒܪܽܘܚ ܩܽܘܕܫܳܐ܆ ܘܰܐܬܩܶܢ ܒܳܗ̇ ܡܰܥܡܽܘܕܺܝܬܳܐ܆ ܘܡܰܕܒܚܳܐ ܡܩܰܕܶܫ ܕܶܒ̈ܚܳܬܳܐ܆ ܘܩܰܕܶܫ ܠܰܢ ܦܰܓܪܶܗ ܘܰܕܡܶܗ܆ ܘܒܶܗ ܢܶܩܢܶܐ ܩܰܕܺܝܫܽܘܬܳܐ܀

ܫܽܘܒܚܳܐ

ܫܰܝܢܶܗ ܕܰܒܪܳܐ܆ ܕܶܐܫܬܰܘܕܺܝ ܗ̱ܘܳܐ ܠܰܫܠܺܝܚܰܘ̈ܗ̱ܝ܆ ܕܫܰܝܢܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ܆ ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ܆ ܗܽܘ ܢܫܰܝܶܢ ܠܥܺܕܰܬ ܩܽܘܕܫܳܐ܆ ܘܢܶܡܠܶܝܗ̇ ܕܰܘܨܳܐ ܪܽܘܚܳܢܳܐ܆ ܘܢܶܕܚܽܘܩ ܡܶܢܳܗ̇ ܚܶܪ̈ܝܳܢܶܐ܆ ܘܣܶܕܩܷ̈ܐ ܒܺܝ̈ܫܶܐ ܕܒܳܨܽܘ̈ܝܶܐ܆ ܘܰܢܪܰܡܪܶܡ ܩܰܪܢܳܐ ܕܺܝܠܳܗ̇܆ ܘܢܰܡܠܶܟ ܒܳܗ̇ ܫܠܳܡܳܐ ܠܥܳܠܰܡ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܒܢܳܐ ܥܰܠ ܪܰܘܡܳܐ ܡܰܩܕܫܶܗ܆ ܘܰܐܬܩܢܶܗ ܒܰܐܪܥܳܐ ܥܕܰܡܳܐ ܠܥܳܠܰܡ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܚܽܘܕܳܬܶܟܝ܀

ܚܙܳܐ ܠܒܶܢܝܳܢܳܐ ܕܰܡܟܰܠܰܠܬܳܐ ܡܽܘܫܶܐ ܒܛܽܘܪܳܐ܆ ܠܰܪܘܺܝܚܽܘܬܳܗ̇ ܕܰܡܥܰܕܰܢܬܳܐ ܒܪܰܘܡܳܐ ܪܳܡܳܐ܆ ܚܙܳܐ ܕܰܐܚܺܝܕܳܐ ܣܰܘܦܰܝ̈ ܪܰܘܡܳܐ ܘܰܙܥܽܘܪܺܝܢ ܠܳܗ̇܆ ܘܰܫܕܶܝܢ ܛܽܘܢܒܶܝ̈ܗ̇ ܥܰܠ ܦܶܢ̈ܝܳܬܳܐ ܘܬܽܘܒ ܐܰܪܺܝܟܺܝܢ܀

ܫܽܘܒܚܳܐ ܠܰܐܒܳܐ ܕܚܰܘܺܝ ܠܡܽܘܫܶܐ ܛܽܘܦܣܳܗ̇ ܕܥܺܕܬܳܐ܆ ܘܣܶܓܕܬܳܐ ܠܰܒܪܳܐ ܕܫܰܡܶܫ ܐ̱ܪ̈ܳܙܰܘܗ̱ܝ ܒܟܽܠ ܨܽܘܪ̈ܳܬܳܐ܆ ܬܰܘܕܺܝ ܠܪܽܘܚܳܐ ܕܰܫܪܳܐ ܘܒܰܛܶܠ ܛܶܠܳܢ̈ܝܳܬܳܐ܆ ܘܩܰܕܶܫ ܥܺܕܬܳܐ ܘܒܳܗ̇ ܗ̱ܘ ܓܳܡܰܪ ܟܽܠ ܕܶܒ̈ܚܳܬܳܐ܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀