ܬܶܫܡܶܫܬܳܐ ܬܪܰܝܳܢܺܝܬܳܐ
ܕܡܶܬܥܰܡ̈ܕܳܢܶܐ

ܩܳܐܶܡ ܟܳܗܢܳܐ ܩܕܳܡ ܡܰܥܡܽܘܕܺܝܬܳܐ ܘܦܳܬܰܚ ܠܶܗ ܠܽܐܘܙܢܳܐ ܕܚܰܝ̈ܶܐ ܘܡܳܠܶܐ ܡܰܝ̈ܳܐ ܒܽܐܘܙܢܳܐ܆ ܫܰܚܺܝ̈ܢܶܐ ܒܝܰܡܺܝܢܶܗ ܘܩܰܪܺܝܪ̈ܶܐ ܒܣܶܡܳܠܶܗ܆ ܟܰܕ ܝܰܡܺܝܢܶܗ ܠܥܶܠ ܡܶܢ ܣܶܡܳܠܶܗ ܨܠܺܝܒܳܐܺܝܬ. ܐܰܝܟܰܢܳܐ ܕܢܶܗܘܽܘܢ ܒܰܙܢܳܐ ܡܡܰܫܚܳܐ ܠܦܽܘܬ ܫܽܘܚ̈ܠܳـܦܶܐ ܕܫܰܢ̱ܬܳܐ. ܘܳܐܡܰܪ ܟܰܕ ܡܡܰܙܶܓ ܡܰܝ̈ܳܐ:

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚ̈ܰܛܳܝܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܨܠܽܘܬ݂ܐ ܕܫܽܘܪܳܝܳܐ

ܟܳܗܢܳܐ: ܡܰܙܶܓ ܡܳܪܝܳܐ ܒܡܰܝ̈ܳܐ ܗܳܠܶܝܢ܆ ܒܡܶܬܟܰܫܦܳܢܽܘܬܳܐ ܕܰܒܨܺܝܪܽܘܬܰܢ܆ ܚܰܝܠܳܐ ܘܡܰܥܒܕܳܢܽܘܬܳܐ ܕܪܽܘܚܳܟ ܩܰܕܺܝܫܳܐ܆ ܐܰܝܟܰܢܳܐ ܕܢܶܗܘܽܘܢ ܟܰܪܣܳܐ ܪܽܘܚܳܢܳܝܬܳܐ ܘܟܽܘܪܳܐ ܕܢܳܣܶܟ ܠܠܳܐ ܡܶܬܚܰܒܠܳـܢܽܘܬܳܐ. ܘܰܠܥܰܒܕܳܟ ܗܳܢܳܐ ܕܥܳܡܶܕ ܒܗܽܘܢ܆ ܗܰܒ ܕܢܶܗܘܽܘܢ ܠܶܗ ܠܒܽܘܫܳܐ ܕܠܳܐ ܡܶܬܚܰܒܠܳـܢܽܘܬܳܐ ܘܰܫܪܳܝܳܐ ܕܡܶܢ ܦܟܳܪ̈ܶܐ ܕܰܚܛܺܝܬܳܐ܆ ܒܫܰܦܺܝܪܽܘܬ ܨܶܒܝܳܢܳܐ ܕܺܝܠܳܟ ܘܰܒܪܶܚܡܰܬ ܐ̱ܢܳܫܽܘܬܳܟ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܒܡܰܥܒܕܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܘܰܡܚܰܦܶܐ ܟܳܗܢܳܐ ܠܡܰܝ̈ܳܐ ܒܡܰܢܕܺܝܠܳܐ ܚܶܘܳܪܬܳܐ ܘܣܳܐܶܡ ܨܠܺܝܒܳܐ ܙܥܽܘܪܳܐ ܘܡܰܢܗܪܺܝܢ ܬܪܶܝܢ ܩܶܪ̈ܝܽܘܢܶܐ ܡܶܟܳܐ ܘܡܶܟܳܐ.

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡ̈ܫܳܢܶܐ: ܥܰܡ ܪܽܘܚܳܐ ܕܺܝܠܳܟ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܟܳܗܢܳܐ: ܐܰܒܳܐ ܩܰܕܺܝܫܳܐ܆ ܗܰܘ ܕܒܺܐܝ̈ܕܰܝܳܐ ܕܰܫܠܺـܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܝܰܗ̱ܒܬ ܪܽܘܚܳܐ ܕܺܝܠܳܟ ܩܰܕܺܝܫܳܐ ܠܗܳܢܽܘܢ ܕܥܳܡܕܺܝܢ ܗ̱ܘܰܘ: ܘܳܐܦ ܗܳܫܳܐ܆ ܟܰܕ ܒܛܶܠܳـܢܺܝܬܳܐ ܕܺܐܝ̈ܕܰܝܳܐ ܕܺܝܠܝ ܡܶܬܚܰܫܰܚ ܐܰܢ̱ܬ܆ ܫܰܕܰܪ ܪܽܘܚܳܐ ܕܺܝܠܳܟ ܗܰܘ ܩܰܕܺܝܫܳܐ ܥܰܠ ܗܳܢܳܐ ܕܰܥܬܺܝܕ ܕܢܶܥܡܰܕ܆ ܐܰܝܟܰܢܳܐ ܕܟܰܕ ܡܶܬܡܠܶܐ ܡܶܢܶܗ ܘܡܶܢ ܫܽܘ̈ܟܳܢܰܘܗ̱ܝ ܐܰܠܳܗܳܝ̈ܶܐ܆ ܢܶܬܶܠ ܦܺܐܪ̈ܶܐ ܚܰܕ ܒܰܬܠܳـܬܺܝܢ ܘܒܶܫܬܺܝܢ ܘܒܰܡܳܐܐ܀

ܬܠܳܝܬܳܐ

ܡܶܢܳܟܺ ܗ̱ܝ ܓܶܝܪ܆ ܐܳܘ ܐܰܒܳܐ ܕܢܽܘܗܪ̈ܶܐ܆ ܟܽܠ ܡܰܘܗܰܒܬܳܐ ܛܳܒܬܳܐ ܘܟܽܠ ܫܽܘܟܳܢܳܐ ܡܫܰܡܠܝܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܠܪܽܘܚܳܐ ܩܰܕܺܝܫܳܐ܀

ܘܬܴܠܶܐ ܩܳܠܶܗ ܟܰܕ ܦܫܺܝ̈ܛܳܢ ܐܺܝ̈ܕܰܘܗ̱ܝ

ܘܛܰܦܶܣ ܘܨܰܠܶܡ ܠܰܡܫܺܝܚܳܟ ܒܗܳܢܳܐ ܕܰܥܬܺܝܕ ܕܢܶܬܺܝܠܶܕ ܡܶܢ ܕܪܺܝܫ ܒܝܰܕ ܕܳܘܝܽܘܬܳܐ ܕܺܝܠܝ. ܣܰܬܶܬܳܝܗ̱ܝ ܥܰܠ ܫܶܬܶܐܣܬܳܐ ܕܰܫܠܺـܝ̈ܚܶܐ ܘܕܰܢܒܺܝ̈ܶܐ܆ ܘܨܽܘܒܳܝܗ̱ܝ ܢܶܨܒܬܳܐ ܕܰܫܪܳܪܳܐ ܒܥܺܕܬܳܐ ܕܺܝܠܳܟ ܩܰܕܺܝܫܬܳܐ ܩܰܬܽܘܠܺܝܩܺܝ܆ ܐܰܝܟܰܢܳܐ ܕܟܰܕ ܡܶܫܬܰܘܫܰܛ ܒܫܰܦܺܝܪܽܘܬ ܕܶܚܠܬܳܐ܆ ܢܶܫܬܰܒܰܚ ܒܺܐܝ̈ܕܰܘܗ̱ܝ ܫܡܳܐ ܗܰܘ ܕܡܶܫܬܰܒܰܚ ܩܕܳܡ ܥܳܠܡ̈ܶܐ܆ ܕܺܝܠܳܟ ܐܰܠܳܗܳܐ ܐܰܒܳܐ ܘܕܺܝܚܺܝܕܳܝܳܐ ܒܪܳܐ ܕܺܝܠܳܟ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܳܚܳܐ ܕܡܶܫܚܳܐ ܕܙܰܝܬܳܐ

ܟܳܗܢܳܐ ܛܳܡܶܫ ܟܪܳܬܶܗ ܒܙܳܒܽܘܪܳܐ ܕܡܶܫܚܳܐ ܕܙܰܝܬܳܐ ܘܪܳܫܶܡ ܠܗܰܘ ܕܥܳܡܶܕ ܒܶܝܬ ܥܰܝ̈ܢܰܘܗ̱ܝ܆ ܟܰܕ ܒܟܽܠ ܩܪܳܝܬܳܐ ܪܳܫܶܡ ܨܠܺܝܒܳܐ ܘܳܐܡܰܪ ܗܳܟܰܢܳܐ:

ܡܶܬܪܫܶܡ (ܦܠܳܢ) ܒܡܶܫܚܳܐ ܕܚܰܕܽܘܬܳܐ ܠܽܘܩܒܰܠ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܘܰܠܡܶܬܛܰܥܡܳܢܽܘܬܳܐ ܕܙܰܝܬܳܐ ܛܳܒܳܐ ܒܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ ܒܰܫܡܳܐ ܕܰܐܒܳܐ ♱

ܡܫܰܡܫܳܢܳܐ: ܐܰܡܺܝܢ.

ܟܳܗܢܳܐ: ܘܕܰܒܪܳܐ ♱

ܡܫܰܡܫܳܢܳܐ: ܐܰܡܺܝܢ.

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡܫܳܢܳܐ: ܐܰܡܺܝܢ.

ܥܶܩܒܳܐ: ܩܳܢܽܘܢܳܐ ܝܰܘܢܳܝܳܐ

ܝܰܒܶܒ ܒܬܶܫܒܽܘܚܬܳܐ܆ ܟܰܕ ܒܐ̱ܪܳܙ ܚܶܙܘܳܐ ܐܰܨܶܕ ܗ̱ܘܳܐ܆ ܚܰܒܩܽܘܩ ܡܒܰܕܶܩ ܗ̱ܘܳܐ ܠܚܽܘܕܳܬܳܐ ܕܰܒܢܰܝ̈ܢܳܫܳܐ. ܘܰܐܙܥܶܩ ܒܰܪ̱ܬ ܩܳܠܳܐ ܕܰܒܪܽܘܚ ܩܽܘܕܫܳܐ ܐܶܬܟܰܪܙܰܬ: ܕܰܡܒܰܕܩܳܐ ܡܓܰܫܡܳܢܽܘܬܶܗ ܕܡܶܠܬܳܐ ܕܠܳܐ ܦܽܘܫܳܩ܆ ܗܳܝ ܕܫܰܦܠܰܬ ܘܰܙܟܳܬ ܠܚܰܝܠܳܐ ܟܽܠܶܗ ܕܓܰܢ̱ܒܳܪ̈ܶܐ܀

ܚܽܘܣܳܝܳܐ

ܡܫܰܡܫܳܢܳܐ: ܣܛܰܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬ݂ܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ݂ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܫܽܘܒܚܳܐ ܠܰܬܠܺܝܬܳܝܽܘܬܳܐ ܡܫܰܒܚܰܬ ܒܟܽܠ ܘܕܰܟܝܰܬ ܒܟܽܠ ܘܕܰܠܥܶܠ ܡܶܢ ܐܽܘܣܺܝܰܐ ܘܫܰܘܝܰܬ ܒܰܟܝܳܢܳܐ ܘܰܣܓܺܝܕܰܬ ܒܟܽܠ ܘܩܰܕܺܝܫܰܬ ܒܟܽܠ. ܘܗܺܝ ܐܰܠܳܗܳܐ ܥܳܒܽܘܕܳܐ ܘܒܳܪܽܘܝܳܐ ܕܟܽܠ܆ ܗܳܝ ܕܰܒܡܶܢܝܳܢܳܐ ܚܕܳܢܳܝܳܐ ܘܰܬܠܺܝܬܳܝܳܐ: ܡܶܛܽܠ ܗܳܝ ܟܰܕ ܗܺܝܽܘܬܳܐ ܕܽܐܘܣܺܝܰܐ܆ ܘܰܡܦܰܪܫܽܘܬܳܐ ܕܰܩܢܳܘ̈ܡܶܐ ܡܶܬܗܰܝܡܢܳܐ. ܘܠܳـܗ̇ ܟܳܦܳܐ ܘܣܳܓܕܳܐ ܟܽܠ ܒܽܘܪܟܳܐ ܕܰܫܡܰܝܳܢ̈ܶܐ ܘܕܰܐܪ̈ܥܳܢܳܝܶܐ ܘܕܰܠܬܰܚܬ ܡܶܢ ܐܰܪܥܳܐ܆ ܘܟܽܠ ܠܶـܫܳܢܳܐ ܠܳـܗ̇ ܡܰܘܕܶܐ ܘܰܡܪܰܡܪܶܡ ܘܰܡܩܰܠܶܣ܆ ܣܳܓܶܕ ܟܺܝܬ ܘܰܡܫܰܒܰܚ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡܫܳܢܳܐ: ܩܕܳܡ ܐܶܡܳܐ ܕܚܰܝ̈ܶܐ ܘܰܡܥܺܝܢܳܐ ܐ̱ܪܳܙܳܢܳܝܬܳܐ ܒܶܣ̈ܡܶܐ ܡܶܬܬܣܺܝܡܺܝܢ. ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ.

ܥܰܡܳܐ: ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܺܝܠܰܢ܆ ܗܰܘ ܝܳܗܽܘܒܳܐ ܕܟܽܠܳـܗ̇ ܩܰܕܺܝܫܽܘܬܳܐ ܘܦܳܪܽܘܩܳܐ ܕܓܶܢܣܳܐ ܕܰܒܢܰܝ̈ܢܳܫܳܐ܆ ܗܰܘ ܕܰܠܗܳܠܶܝܢ ܕܒܰܐܪܥܳܐ ܠܕܽܘܒܳܪܳܐ ܛܳܒܳܐ ܘܰܫܡܰܝܳܢܳܐ ܫܰܚܠܶܦܬ܆ ܘܚܰܕܶܬܬ ܠܰܢ ܐܽܘܪܚܳܐ ܕܚܰܝ̈ܶܐ ܘܰܕܦܽܘܪܩܳܢܳܐ ܒܝܰܕ ܡܰܝ̈ܳܐ ܘܪܽܘܚܳܐ܆ ܗܰܘ ܕܩܰܪܶܒܬ ܠܰܢ ܒܚܽܘܒܶܗ ܕܰܡܫܺܝܚܳܐ ܕܺܝܠܳܟ ܠܚܰܝ̈ܶܐ ܗܳܠܶܝܢ ܘܰܐܩܺܝܡܬ ܠܰܢ ܠܡܶܣ̈ܟܺܢܶܐ ܘܚܰܛܳܝ̈ܶܐ ܥܰܒܕܰܝ̈ܟ ܩܕܳܡ ܬܶܫܒܽܘܚܬܳܐ ܕܺܝܠܳܟ. ܐܰܢ̱ܬ ܡܳܪܝܳܐ ܡܳܪܰܢ܆ ܟܰܕ ܫܽܘܒܩܳܢܳܐ ܠܰܡܚܺܝܠܽܘܬܳܐ ܕܺܝܠܰܢ ܡܫܰܟܶܢ ܐܰܢ̱ܬ܆ ܩܰܒܶܠ ܠܒܶܣ̈ܡܶܐ ܗܳܠܶܝܢ ܡܶܢ ܐܺܝ̈ܕܰܝܳܐ ܕܺܝܠܰܢ ܚܰܛܳܝ̈ܶܐ ܘܰܡܠܺܝ ܠܰܢ ܡܶܢ ܚܰܝܠܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܘܡܶܢ ܛܰܝܒܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ܆ ܘܰܐܣܦܶܩ ܠܰܢ ܕܢܶܗܘܶܐ ܡܫܰܡ̈ܫܳܢܶܐ ܕܕܺܝܰܬܺܩܺܝ ܕܺܝܠܳܟ ܚܕܰܬܳܐ܆ ܐܰܝܟܰܢܳܐ ܕܢܶܗܘܶܐ ܫܳܘܶܝܢܰܢ ܕܥܰܡ ܝܺܕܰܥܬܳܐ ܟܺܝܬ ܘܡܶܬܬܰܘܝܳܢܽܘܬܳܐ ܢܫܰܡܶܫ ܠܰܫܡܳܐ ܕܺܝܠܳܟ ܡܝܰܩܰܪ ܒܟܽܠ ܘܰܐܝܟ ܫܽܘܟܳܢܳܐ ܕܰܡܫܺܝܚܳܐ ܕܺܝܠܳܟ܆ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܩܽܘܕܳܫ ܡܰܝ̈ܳܐ ܕܰܥܡܳܕܳܐ

ܩܳܠܳܐ ܒܩܺܝܢܬܳܐ܆ ܩܽܘܩܳܝܳܐ

ܦܶܬܓܳܡܳܐ: ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ ܗܰܠܶـܠܽܘܝܰܗ.

ܝܽܘܚܰܢܳܢ ܡܰܙܶܓ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܡܫܺܝܚܳܐ ܩܰܕܶܫ ܐܶܢܽܘܢ ܘܰܢܚܶܬ ܘܰܥܡܰܕ ܒܗܽܘܢ܆ ܒܗܰܘ ܥܶܕܳܢܳܐ ܕܰܣܠܶܩ ܡܶܢ ܡܰܝ̈ܳܐ܆ ܫܡܰܝܳܐ ܘܰܐܪܥܳܐ ܦܠܰܓܘ ܠܶܗ ܐܺܝܩܳܪܳܐ܆ ܫܶܡܫܳܐ ܐܰܪܟܶܢ ܙܰܠܺـܝ̈ܩܰܘܗ̱ܝ ܘܟܰܘܟ̈ܒܶܐ ܣܓܶܕܘ ܠܶܗ܆ ܠܗܰܘ ܕܩܰܕܶܫ ܢܰܗܪ̈ܰܘܳܬܳܐ ܘܡܰܒܽܘ̈ܥܶܐ ܟܽܠܗܽܘܢ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܦܶܬܓܳܡܳܐ: ܝܰܗ̱ܒܬ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ ܗܰܠܶـܠܽܘܝܰܗ.

ܡܰܢܽܘ ܚܙܳܐ ܬܰܪܬܶܝܢ ܐܰܚ̈ܘܳܢ ܫܰܦܺܝܪ̈ܳܬܳܐ܆ ܐܰܝܟ ܡܰܥܡܽܘܕܺܝܬܳܐ ܕܟܺܝܬܳܐ ܘܥܺܕܬܳܐ ܩܰܕܺܝܫܬܳܐ܆ ܕܰܚܕܳܐ ܝܳܠܕܳܐ ܘܰܐ̱ܚܪܺܬܳܐ ܡܪܰܒܝܳܐ ܝܰܠܕ̈ܶܐ ܚܰܕ̈ܬܶܐ ܐܳܦ ܪ̈ܽܘܚܳܢܳܝܶܐ. ܡܳܐ ܕܝܶܠܕܰܬ ܡܰܥܡܽܘܕܺܝܬܳܐ ܡܶܢ ܓܰܘ ܡܰܝ̈ܳܐ܆ ܩܰܒܶܠܬ݂ܶܗ ܥܺܕܰܬ ܩܽܘܕܫܳܐ ܘܩܰܪܶܒܬ݂ܶܗ ܠܡܰܕܒܚܳܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܗܳܪܟܳܐ ܡܪܺܝܡ ܟܳܗܢܳܐ ܡܰܢܕܺܝܠܳܐ ܘܦܳܬܰܚ ܠܽܐܘܙܢܳܐ

ܫܘ̄ܒ: ܬܶܗܪܳܐ ܪܰܒܳܐ ܡܳܐ ܕܦܳܫܶܛ ܝܰܡܺܝܢܶܗ ܟܳܗܢܳܐ܆ ܘܦܳܬܰܚ ܠܳـܗ̇ ܠܡܰܥܡܽܘܕܺܝܬܳܐ ܘܥܺܝܪ̈ܶܐ ܠܥܶܠ ܬܳܗܪܺܝܢ. ܩܳܐܶܡ ܥܰܦܪܳܐ ܠܥܶܠ ܡܶܢ ܓܰܘܙܰܠܬܳܐ܆ ܘܩܳܪܶܐ ܠܪܽܘܚܳܐ ܕܬܺܐܬܶܐ ܡܶܢ ܪܰܘܡܳܐ. ܘܥܳܢܝܳܐ ܠܶܗ ܩܰܠܺܝܠܳܐܺܝܬ ܘܨܶܒܝܳܢܶܗ ܥܳܒܕܳܐ܆ ܘܰܡܩܰܕܫܳܐ ܡܰܥܡܽܘܕܺܝܬܳܐ ܠܚܽܘܣܳܝܳܐ ܕܚܰܘ̈ܒܶܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܡܶܢ ܥܳܠܰܡ: ܡܥܺܝܢܳܐ ܕܚܰܝ̈ܶܐ ܐܶܬܦܰܬܚܰܬ ܡܰܥܡܽܘܕܺܝܬܳܐ܆ ܘܰܐܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܒܰܚܢܳܢܶܗ ܩܰܕܫܳܗ̇. ܐܰܒܳܐ ܒܩܳܠܶܗ ܕܗܳܢܰܘ ܒܶܪܝ ܚܰܒܺܝܒܝ܆ ܘܰܒܪܳܐ ܕܰܐܪܟܶܢ ܪܺܝܫܶܗ ܘܰܥܡܰܕ ܒܳܗ̇܆ ܘܪܽܘܚ ܩܽܘܕܫܳܐ ܕܒܰܕܡܽܘܬ ܝܰܘܢܳܐ ܢܶܚܬܰܬ ܥܠܰܘܗ̱ܝ: ܬܠܺܝܬܳܝܽܘܬܳܐ ܩܰܕܺܝܫܬܳܐ ܕܰܚܝܰܘ ܒܳܗ̇ ܥܳܠܡ̈ܶܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܚܰܘܳܐ ܠܫܰܒܪܳܐ ܗܳܢܳܐ ܥܰܒܕܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܫܘܶܐ ܠܡܰܘܗܰܒܬܳܐ ܕܰܣܚܳܬܳܐ ܕܡܰܘܠܳـܕܳܐ ܕܡܶܢ ܕܪܺܝܫ. ܘܥܰܬܶܕܳܝܗ̱ܝ ܠܰܥܒܳܕ̈ܶܐ ܛܳܒ̈ܶܐ ܘܰܕܟܰܝ̈ܳܐ ܟܽܠܶܗ ܙܰܒܢܳܐ ܕܚ̈ܰܝܰܘܗ̱ܝ. ܘܰܒܝܰܘܡܳܐ ܐ̱ܚܪܳܝܳܐ ܕܳܐܬܶܐ ܐܰܢ̱ܬ ܠܰܩܝܳܡܬܳܐ ܕܟܽܠ. ܐܰܫܘܳܐ ܘܩܰܪܶܒܳܝܗ̱ܝ ܩܕܳܡ ܐܰܒܽܘܟ ܐܰܝܟ ܫܽܘܘܕܳܝܳܟ܆ ܘܰܚܢܰܢ ܘܗܽܘ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܆ ܗܳܫܳܐ ܘܰܒܟܽܠܙܒܰܢ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܗܳܪܟܳܐ ܡܫܰܪܶܐ ܕܰܢܩܰܕܶܫ ܡܰܝ̈ܳܐ

ܝܰܗ̱ܒܬ ܠܰܢ ܡܥܺܝܢܳܐ ܕܬܰܕܟܺܝܬܳܐ ܫܰܪܺܝܪܬܳܐ܆ ܕܰܡܕܰܟܝܳܐ ܡܶܢ ܟܽܠܳـܗ̇ ܚܛܺܝܬܳܐ: ܡܰܝ̈ܳܐ ܗܳܠܶܝܢ ܕܰܒܝܰܕ ܩܪܳܝܬܳܐ ܕܺܝܠܳܟ ܡܶܬܩܰܕܫܺܝܢ܆ ܕܒܺܐܝ̈ܕܰܝܗܽܘܢ ܕܰܟܝܽܘܬܳܐ ܢܳܣܒܺܝܢܰܢ ܗܳܝ ܕܒܰܥܡܳܕܳܐ ܕܰܡܫܺܝܚܳܟ ܐܶܫܬܰܟܢܰܬ ܠܰܢ. ܗܰܒ ܡܳܪܝܳܐ ܚܰܝܠܳܐ ܒܡܰܝ̈ܳܐ ܗܳܠܶܝܢ ܕܰܒܝܰܕ ܚܰܫ̈ܶܐ ܕܺܝܚܺܝܕܳܝܳܐ ܒܪܳܟ ܡܫܰܟܶܢ ܐܰܢ̱ܬ܆ ܕܽܘܟܳܝܳܐ ܕܡܶܢ ܟܽܠܳـܗ̇ ܚܛܺܝܬܳܐ ܠܥܽܘܬܳܕܳܐ ܕܰܡܩܰܒܠܳـܢܽܘܬܳܐ ܕܪܽܘܚܳܐ ܕܺܝܠܳܟ܀

ܬܠܳܝܬܳܐ

ܡܶܛܽܠ ܕܰܐܢ̱ܬ ܐܺܝܬܰܝܟ ܝܳܗܽܘܒܳܐ ܘܰܡܫܰܟܢܳܢܳܐ ܕܟܽܠܗܶܝܢ ܛܳܒ̈ܳܬܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܠܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܳܫܳܐ ܘܰܠܥܳܠܡܺܝܢ܀

ܥܰܡܳܐ: ܐܰܡܺܝܢ.

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܰܠܪܽܘܚܳܐ ܕܺܝܠܳܟ.

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܒܳܪܽܘܝܳܐ ܕܟܽܠܳـܗ̇ ܒܪܺܝܬܳܐ ܡܶܬܚܰܙܝܳܢܺܝܬܳܐ ܟܺܝܬ ܘܠܳܐ ܡܶܬܚܰܙܝܳܢܺܝܬܳܐ܆ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ ܘܝܰܡ̱̈ܡܶܐ ܘܟܽܠ ܕܺܐܝܬ ܒܗܽܘܢ܆ ܗܰܘ ܕܟܰܢܶܫ ܡܰܝ̈ܳܐ ܠܰܟܢܽܘܫܝܳܐ ܚܰܕ܆ ܗܰܘ ܕܰܚܒܰܫ ܬܗܽܘܡܳܐ ܒܚܳܠܳܐ ܘܟܳܠܶܐ ܠܶܗ܆ ܗܰܘ ܕܰܦܪܰܫ ܡܰܝ̈ܳܐ ܠܥܶܠ ܡܶܢ ܫܡܰܝܳܐ܀

ܬܠܳܝܬܳܐ

ܐܰܢ̱ܬ ܫܰܪܰܪܬ ܒܚܰܝܠܳܐ ܕܺܝܠܳܟ ܠܝܰܡܳܐ. ܐܰܢ̱ܬ ܪܰܨܶܨܬ ܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܒܡܰܝ̈ܳܐ. ܐܰܢ̱ܬ ܐܺܝܬܰܝܟ ܕܚܺܝܠܳܐ ܘܡܰܢܽܘ ܢܩܽܘܡ ܠܩܽܘܒܠܳܟ. ܐܰܢ̱ܬ ܗܳܫܳܐ ܡܳܪܝܳܐ ܚܽܘܪ ܒܰܒܪܺܝܬܳܐ ܕܺܝܠܳܟ ܡܰܝ̈ܳܐ ܗܳܠܶܝܢ܆ ܘܗܰܒ ܠܗܽܘܢ ܛܰܝܒܽܘܬܳܐ ܕܦܽܘܪܩܳܢܳܐ ܕܺܝܠܳܟ܆ ܒܽܘܪܟܬܳܐ ܕܝܽܘܪܕܢܳܢ܆ ܩܰܕܺܝܫܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܕܢܶܥܪܩܽܘܢ ܡܶܢܗܽܘܢ ܟܽܠܗܽܘܢ ܐܰܝܠܶܝܢ ܕܡܰܟܶܝܢ ܠܰܓܒܺܝܠܬܳܐ ܕܺܝܠܳܟ܆ ܡܶܛܽܠ ܕܰܫܡܳܟ ܐܶܬܩܪܺܝ ܥܠܰܝܗܽܘܢ܆ ܗܰܘ ܪܰܒܳܐ ܘܰܕܚܺܝܠܳܐ ܥܰܠ ܗܳܢܽܘܢ ܕܕܰܠܩܽܘܒܠܳܐ܀

ܘܢܳܦܰܚ ܒܡܰܝ̈ܳܐ ܬܠܳܬ ܙܰܒ̈ܢܺܝܢ ܒܛܽܘܦܣܳܐ ܕܰܨܠܺܝܒܳܐ܆ ܡܶܢ ܡܰܥܪܒܳܐ ܠܡܰܕܢܚܳܐ ܘܡܶܢ ܬܰܝܡܢܳܐ ܠܓܰܪܒܝܳܐ܆ ܘܳܐܡܰܪ ܟܰܕ ܓܗܺܝܢ ܒܩܳܠܳܐ ܪܳܡܳܐ:

ܢܶܬܪܨܶܨ ♱ ܪܺܝܫܶܗ ܕܬܰܢܺܝܢܳܐ܆ ܗܰܘ ܩܳܛܶܠ ܒܢܰܝ̈ܢܳܫܳܐ܆ ܠܬܰܚܬ ܡܶܢ ܪܽܘܫܡܶܗ ܕܰܨܠܺܝܒܳܐ. ܘܢܶܥܪ̈ܩܳܢ ♱ ܗܳܟܺܝܠ ܛܶܠܳـܢܳܝ̈ܳܬܳܐ ܠܳܐ ܡܶܬܚܰܙܝܳܢܝ̈ܳܬܳܐ ܘܳܐܐܰܪ̈ܳܝܳܬܳܐ܆ ܒܒܳܥܽܘ ܡܶܢܳܟ ܡܳܪܝܳܐ. ܘܠܳܐ ܢܶܬܛܰܫܶܐ ܒܡܰܝ̈ܳܐ ܗܳܠܶܝܢ ܫܺܐܕܳܐ ܚܶܫܽܘܟܳܝܳܐ ♱ ܐܳܦܠܳܐ ܢܶܚܽܘܬ ܠܡܰܝ̈ܳܐ ܥܰܡ ܗܳܢܳܐ ܕܡܶܬܥܡܶܕ ܪܽܘܚܳܐ ܛܰܢܦܳܐ ܕܚܶܫܽܘܟܽܘܬܳܐ ܡܰܥܶܠ ܥܰܡ ܚܽܘܫܳܒ̈ܶܐ ܡܺܝ̈ܬܶܐ ܘܰܫܓܺܝܫܽܘܬܳܐ ܕܬܰܪܥܺܝܬܳܐ. ܘܛܰܠܶܩ ܡܶܢܶܗ ܡܰܥܒܕܳܢܽܘܬܳܐ ܕܳܐܟܶܠܩܰܪܨܳܐ܀

ܩܪܳܝܬܳܐ ܕܪܽܘܚܳܐ ܩܰܕܺܝܫܳܐ

ܓܗܳܢܬܳܐ

ܐܶܬܓܠܰܝ ܡܳܪܝܳܐ ܥܰܠ ܡܰܝ̈ܳܐ ܗܳܠܶܝܢ ܘܩܰܕܶܫ ܐܶܢܽܘܢ ܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܘܗܰܒ ܕܢܶܫܬܰܚܠܰܦ ܐܰܝܢܳܐ ܕܰܒܗܽܘܢ ܡܶܬܥܡܶܕ܆ ܐܰܝܟܰܢܳܐ ܕܢܶܫܠܰܚ ܠܒܰܪܢܳܫܳܐ ܥܰܬܺܝܩܳܐ ܕܡܶܬܚܰܒܰܠ ܒܰܪ̈ܓܺܝܓܳܬܳܐ ܕܛܽܘܥܝܰܝ܆ ܘܢܶܠܒܰܫ ܠܗܰܘ ܚܰܕܬܳܐ ܕܡܶܬܚܰܕܰܬ ܒܨܰܠܡܳܐ ܕܗܰܘ ܕܰܒܪܳܝܗ̱ܝ܀

ܘܬܴܠܶܐ ܩܳܠܶܗ ܟܰܕ ܒܟܽܠ ܩܪܳܝܬܳܐ ܥܳܒܶܕ ܦܶܫܚܳܐ ܕܰܨܠܺܝܒܳܐ:

ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ܆ ܚܰܘܳܐ ܐܶܢܽܘܢ ܠܡܰܝ̈ܳܐ ܗܳܠܶܝܢ: ܨ ܡܰܝ̈ܳܐ ܕܰܢܝܳܚܳܐ܆ ܠܝ ܡܰܝ̈ܳܐ ܕܚܰܕܽܘܬܳܐ ܘܕܰܪܘܳܙܳܐ܆ ܒ ܡܰܝ̈ܳܐ ܕܡܶܬܰܐܪܙܺܝܢ ܒܡܰܘܬܶܗ ܘܰܩܝܳܡܬܶܗ ܕܺܝܚܺܝܕܳܝܳܐ ܒܪܳܐ ܕܺܝܠܳܟ܆ ܐ ܡܰܝ̈ܳܐ ܕܬܰܕܟܺܝܬܳܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܨ ܕܽܘܟܳܝܳܐ ܕܛܰܡܽܐܘܬܳܐ ܕܒܶܣܪܳܐ ܘܰܕܪܽܘܚܳܐ܆ ܠܝ ܫܪܳܝܳܐ ܕܰܐܣܽܘܪ̈ܶܐ܆ ܒ ܫܽܘܒܩܳܢܳܐ ܕܫܽܘܪ̈ܥܳܬܳܐ܆ ܐ ܡܰܢܗܪܳܢܽܘܬܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܨ ܣܚܳܬܳܐ ܕܰܗܘܳܝܳܐ ܕܡܶܢ ܕܪܺܝܫ܆ ܠܝ ܫܽܘܟܳܢܳܐ ܕܣܺܝܡܰܬ ܒܢܰܝ̈ܳܐ܆ ܒ ܠܒܽܘܫܳܐ ܕܠܳܐ ܡܰܬܚܰܒܠܳـܢܽܘܬܳܐ܆ ܐ ܚܽܘܕܳܬܳܐ ܕܪܽܘܚܳܐ ܩܰܕܺܝܫܳܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܡܰܝ̈ܳܐ ܕܰܡܫܺܝܓܺܝܢ ܛܽܘܠܫܳܐ ܕܢܰܦܫܳܐ ܘܰܕܦܰܓܪܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܗܳܪܟܳܐ ܡܰܫܠܚܺܝܢ ܠܶܗ ܠܡܶܬܥܰܡܕܳܢܳܐ ܡܳܐܢܰܘ̈ܗ̱ܝ ܟܽܠܗܽܘܢ ܘܰܡܚܰܦܶܝܢ ܠܶܗ ܒܡܰܢܕܺܝܠܳܐ. ܟܳܗܢܳܐ ܢܳܣܶܒ ܩܰܪܢܳܐ ܕܡܽܘܪܽܘܢ ܩܰܕܺܝܫܳܐ ܘܰܡܙܰܝܰܚ ܠܳـܗ̇ ܠܥܶܠ ܡܶܢ ܡܰܝ̈ܳܐ ܨܠܺܝܒܳܐܺܝܬ ܟܰܕ ܐܳܡܰܪ:

ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܟܳܗܢܳܐ: ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ܆ ܐܰܠܳܗܳܐ ܡܫܰܒܚܳܐ ܪܥܶܡ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܟܳܗܢܳܐ: ܡܳܪܝܳܐ ܐܰܠܳܗܳܐ ܥܰܠ ܡܰܝ̈ܳܐ ܣܰܓܺܝ̈ܶܐܐ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܘܳܐܫܶܕ ܡܽܘܪܽܘܢ ܥܰܠ ܡܰܝ̈ܳܐ ܬܠܳܬ ܙܰܒ̈ܢܺܝܢ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ:

ܐܳܫܕܺܝܢܰܢ ܡܽܘܪܽܘܢ ܩܰܕܺܝܫܳܐ ܥܰܠ ܡܰܝ̈ܳܐ ܗܳܠܶܝܢ ܕܡܰܥܡܽܘܕܺܝܬܳܐ܆ ܕܢܶܬܚܰܕܰܬ ܒܗܽܘܢ ܒܰܪܢܳܫܳܐ ܥܰܬܺܝܩܳܐ ܠܚܰܕܬܳܐ܆ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܆ ܩܽܘܪܝܶܐܠܶܝܣܳܘܢ܆ ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܗܰܘ ܕܥܰܠ ܝܺܚܺܝܕܳܝܳܐ ܒܪܳܐ ܕܺܝܠܳܟ܆ ܡܶܠܬܳܐ ܐܰܠܳܗܳܐ܆ ܕܰܥܒܰܕܬ ܒܰܐܪܥܳܐ ܡܕܰܒܪܳܢܽܘܬܳܐ ܕܰܥܡܳܕܳܐ܆ ܘܫܰܕܰܪܬ ܪܽܘܚܳܐ ܕܺܝܠܳܟ ܩܰܕܺܝܫܳܐ ܒܰܕܡܽܘܬܳܐ ܕܝܰܘܢܳܐ܆ ܘܩܰܕܶܫܬ ܠܫܶܦ̈ܥܰܘܗ̱ܝ ܕܝܽܘܪܕܢܳܢ ܢܰܗܪܳܐ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܨܒܺܝ ܕܢܰܓܶܢ ܥܰܠ ܥܰܒܕܳܟ ܗܳܢܳܐ ܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܘܚܰܘܳܝܗ̱ܝ ܒܰܝܬܳܝܳܐ ܕܰܡܫܺܝܚܳܐ ܕܺܝܠܳܟ܆ ܟܰܕ ܡܕܰܟܶܐ ܐܰܢ̱ܬ ܠܶܗ ܒܰܣܚܳܬܳܐ ܗܳܕܶܐ ܩܰܕܺܝܫܬܳܐ ܘܦܳܪܽܘܩܳܝܬܳܐ܀

ܬܠܳܝܬܳܐ

ܐܰܝܟܰܢܳܐ ܕܟܰܕ ܗܳܘܶܐ ܢܰܨܺܝܚܳܐ ܘܡܶܬܚܰܕܰܬ ܠܘܳܬ ܚܰܝ̈ܶܐ ܠܳܐ ܡܶܬܚܰܒ̈ܠܳـܢܶܐ ܘܛܽܘ̈ܒܬܳܢܶܐ܆ ܘܡܶܬܡܠܶܐ ܡܶܢ ܛܰܝܒܽܘܬܶܗ ܘܚܰܝܠܶܗ܆ ܢܶܛܰܪ ܓܽܘܥܠܳـܢܳܐ ܕܦܽܘܩܕܳܢܳܟ܆ ܘܰܡܫܰܘܬܦܳܐ ܢܶܗܘܶܐ ܕܛܳܒ̈ܳܬܳܐ ܕܰܠܥܳܠܰܡ܆ ܗܳܠܶܝܢ ܕܶܐܫܬܰܘܕܺܝܬ ܠܰܐܝܠܶܝܢ ܕܡܰܚܒܺܝܢ ܠܳܟ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ. ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ ܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ ܐܳܡܰܪ ܨܠܽܘܬܳܐ ܗܳܕܶܐ ܟܰܕ ܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܡܰܝ̈ܳܐ:

ܡܒܰܪܟܺܝܢ ܘܰܡܩܰܕܫܺܝܢ ܡܰܝ̈ܳܐ ܗܳܠܶܝܢ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܫܳܠܡܳܐ ܠܟܽܠܟܽܘܢ܀

ܡܫܰܡ̈ܫܳܢܶܐ: ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ ܡܪܰܚܶܦ ܥܰܠ ܡܰܝ̈ܳܐ ܘܰܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܡܰܝ̈ܳܐ ܟܰܕ ܒܩܳܠܳܐ ܪܳܡܳܐ ܐܳܡܰܪ:

ܡܩܰܕܫܺܝܢ ܐܶܢܽܘܢ ܡܰܝ̈ܳܐ ܗܳܠܶܝܢ ܕܢܶܗܘܽܘܢ ܠܰܣܚܳܬܳܐ ܐܰܠܳܗܳܝܬܳܐ ܕܡܰܘܠܳـܕܳܐ ܕܡܶܢ ܕܪܺܝܫ.

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܟܳܗܢܳܐ: ܒܫܶܡ ܐܰܒܳܐ ܚܰܝܳܐ ܠܚܰܝ̈ܶܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܒܫܶܡ ܒܪܳܐ ܚܰܝܳܐ ܠܚܰܝ̈ܶܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܒܫܶܡ ܪܽܘܚܳܐ ܚܰܝܳܐ ܘܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ ♱

ܡܫܰܡ̈ܫܳܢܶܐ: ܐܰܡܺܝܢ܀

ܡܫܳܚܳܐ ܕܡܶܬܥܰܡܕܳܢܳܐ

ܗܳܝܕܶܝܢ ܡܩܰܪܶܒ ܡܫܰܡܫܳܢܳܐ ܠܡܶܬܥܰܡܕܳܢܳܐ ܠܘܳܬ ܟܳܗܢܳܐ ܘܗܽܘ ܛܳܡܶܫ ܟܪܳܬܶܗ ܒܡܶܫܚܳܐ ܩܰܕܺܝܫܳܐ ܘܥܳܒܶܕ ܨܠܺܝܒܳܐ ܒܟܽܠ ܩܪܳܝܬܳܐ ܒܶܝܬ ܥܰܝ̈ܢܰܘܗ̱ܝ ܘܳܐܡܰܪ ܨܠܽܘܬܳܐ ܗܳܕܶܐ:

ܡܶܬܡܫܰܚ (ܦܠܳܢ) ܒܡܶܫܚܳܐ ܕܚܰܕܽܘܬܳܐ ܕܒܶܗ ܢܶܙܕܰܝܰܢ ܠܽܘܩܒܰܠ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܘܢܳܣܶܟ ܟܳܗܢܳܐ ܡܶܫܚܳܐ ܩܰܕ݁ܺܝܫܳܐ ܥܰܠ ܦܰܣܰܬ ܐܺܝ̈ܕܰܘܗ̱ܝ ܘܡܳܫܰܚ ܠܟܽܠܶܗ ܓܽܘܫܡܶܗ ܕܡܶܬܥܰܡܕܳܢܳܐ ܠܪܺܝܫܶܗ ܘܒܶܝܬ ܨܶܒ̈ܥܳܬܳܐ ܕܺܐܝ̈ܕܰܘܗ̱ܝ ܘܰܕܪ̈ܶܓܠܰܘܗ̱ܝ ܘܩܽܘܕܡܰܘܗ̱ܝ ܘܒܶܣܬܪܶܗ.

ܩܳܠܳܐ ܒܩܺܝܢܬܳܐ܆ ܡܳܪܶܗ ܕܪܰܡܫܳܐ ܒܪܶܟܢܳܐ ܬܪܰܝܳܢܳܐ:

ܒܡܶܫܚܳܐ ܕܩܽܘܕܫܳܐ ܐܶܡܰܪ ܐܰܠܳܗܳܐ ܕܢܶܡܫܽܘܚ ܐܰܗܪܽܘܢ ܘܗܳܝܕܶܝܢ ܢܶܬܩܰܕܰܫ. ܒܡܶܫܚܳܐ ܕܩܽܘܕܫܳܐ ܗܳܫܳܐ ܡܶܬܡܫܰܚ ܐܶܡܪܳܐ ܒܪܺܝܪܳܐ ܕܶܐܬܳܐ ܠܰܥܡܳܕܳܐ܀

ܒܡܶܫܚܳܐ ܕܩܽܘܕܫܳܐ ܐܶܫܬܰܡܠܺܝ ܐܰܗܪܽܘܢ ܘܕܰܘܺܝܕ ܢܒܺܝܳܐ ܐܰܟܪܶܙ ܥܰܠ ܐ̱ܪܳܙܶܗ. ܘܗܳܐ ܒܓܰܘ ܥܺܕܬܳܐ ܒܶܗܽ ܗ̱ܘ ܡܶܬܪܫܶܡ ܐܶܡܪܳܐ ܚܰܕܬܳܐ ܕܶܐܬܳܐ ܠܰܥܡܳܕܳܐ܀

ܫܽܘܒܚܳܐ: ܩܳܐܶܡ ܟܳܗܢܳܐ ܥܰܠ ܡܰܥܡܽܘܕܺܝܬܳܐ ܘܩܳܪܶܐ ܠܪܽܘܚܳܐ ܘܢܳܚܬܳܐ ܡܶܢ ܪܰܘܡܳܐ. ܡܩܰܕܫܳܐ ܡܰܝ̈ܳܐ ܕܡܶܢܗܽܘܢ ܡܶܬܝܰܠܕܺܝܢ ܒܢܰܝ̈ܳܐ ܚܰܕ̈ܬܶܐ ܠܡܰܠܟܽܘܬܳܐ ܕܪܰܘܡܳܐ܀

ܡܶܢܥܳܠܰܡ: ܒܗܰܝܡܳܢܽܘܬܳܐ ܕܰܬܠܺܝܬܳܝܽܘܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܕܩܽܘܕܫܳܐ ܡܶܬܡܫܰܚ ܐܰܢ̱ܬ ܐܶܡܪܳܐ ܪܽܘܚܳܢܳܐ܆ ܕܶܐܣܛܰܠ ܫܽܘܒܚܳܐ ܬܶܠܒܰܫ ܡܶܢ ܡܰܝ̈ܳܐ܀

ܡܰܚܰܬܬܶܗ ܕܡܶܬܥܰܡܕܳܢܳܐ ܠܡܰܝ̈ܳܐ

ܘܡܰܚܶܬ ܠܶܗ ܠܫܰܒܪܳܐ ܠܡܰܥܡܽܘܕܺܝܬܳܐ܆ ܟܰܕ ܚܳܐܰܪ ܠܡܰܕܢܚܳܐ ܘܗܽܘ ܟܳܗܢܳܐ ܠܡܰܥܪܒܳܐ. ܘܣܳܐܶܡ ܝܰܡܺܝܢܶܗ ܥܰܠ ܪܺܝܫܶܗ ܕܗܰܘ ܕܥܳܡܶܕ܆ ܘܡܰܣܶܩ ܡܰܝ̈ܳܐ ܡܶܢ ܐܽܘܙܢܳܐ ܒܣܶܡܳܠܶܗ ܘܳܐܫܶܕ ܡܶܢ ܩܕܳܡܰܘܗ̱ܝ܆ ܟܶܢ ܡܶܢ ܒܶܣܬܪܶܗ܆ ܘܟܶܢ ܡܶܢ ܝܰܡܺܝܢܶܗ ܘܣܶܡܳܠܶܗ܆ ܟ݁ܳܕ݂ ܐܳܡܰܪ ܗܳܟܰܢܳܐ:

ܥܳܡܶܕ (ܦܠܳܢ) ܠܩܰܕܺܝܫܽܘܬܳܐ ܘܰܠܦܽܘܪܩܳܢܳܐ ܘܰܠܕܽܘܒܳܪ̈ܶܐ ܠܳܐ ܥܕܺܝ̈ܠܶܐ ܘܠܰܩܝܳܡܬܳܐ ܒܪܺܝܟܬܳܐ ܕܡܶܢ ܒܶܝܬ ܡܺܝ̈ܬܶܐ.

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܟܳܗܢܳܐ: ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܘܥܳܒܶܕ ܥܠܰܘܗ̱ܝ ܬܠܳܬ ܪ̈ܡܳܝܳܬܳܐ ܘܳܐܡܪܺܝܢ ܡܫܰܡ̈ܫܳܢܶܐ ܒܰܝܬܳܐ ܗܳܢܳܐ:

ܚܽܘܬ ܐܰܚܽܘܢ ܪܫܺܝܡܳܐ܆ ܘܰܠܒܽܘܫܳܝܗ̱ܝ ܠܡܳܪܰܢ܆ ܘܶܐܬܚܰܠܰܛ ܒܛܽܘܗܡܶܗ܆ ܕܒܰܪ ܛܽܘܗܡܰܐ ܗ̱ܘ ܪܰܒܳܐ܆ ܐܰܝܟ ܕܰܐܡܺܝܪ ܒܡܰܬܠܶܗ܀

ܘܟܰܕ ܡܰܣܶܩ ܟܳܗܢܳܐ ܠܫܰܒܪܳܐ ܡܶܢ ܐܽܘܙܢܳܐ ܘܰܡܩܰܒܶܠ ܠܶܗ ܫܰܘܫܒܺܝܢܳܐ܆

ܩܳܠܳܐ ܒܩܺܝܢܬܳܐ܆ ܬܪ̈ܰܝܗܽܘܢ ܥܳܠܡ̈ܶܐ:

ܦܪܽܘܣܝ ܟܶܢܦܰܝ̈ܟܝ ܥܺܕܰܬ ܩܽܘܕܫܳܐ܆ ܘܩܰܒܶܠܝ ܐܶܡܪܳܐ ܬܰܡܺܝܡܳܐ܆ ܕܺܝܠܶܕܬ݂ܶܗ ܪܽܘܚܳܐ ܕܩܽܘܕܫܳܐ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܥܰܠ ܗܳܕܶܐ ܡܰܥܡܽܘܕܺܝܬܳܐ܆ ܐܶܬܢܰܒܺܝ ܒܪܶܗ ܕܰܙܟܰܪܝܳܐ܆ ܕܶܐܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܘܗܰܘ ܕܳܐܬܶܐ ܒܪܽܘܚܳܐ ܕܩܽܘܕܫܳܐ܀

ܐܶܡܪܳܐ ܩܰܕܳܐ ܪܽܘܫܡܳܟ܆ ܘܥܽܘܠ ܘܶܐܬܚܰܠܰܛ ܒܰܓܙܳܪܳܐ܆ ܘܝܰܬܺܝܪ ܡܶܢ ܟܽܠܳـܗ̇ ܥܳܢ̈ܳܐ܆ ܚܳܕܶܐ ܒܳܟ ܡܰܠܟܳܐ ܡܫܺܝܚܳܐ܀

ܥܰܠ ܕܰܘܺܝܕ ܩܰܪܢܳܐ ܫܶܦܥܰܬ܆ ܘܰܥܠܰܝܟ ܐܳܦ ܡܰܥܡܽܘܕܺܝܬܳܐ܆ ܕܰܢܚܰܬܬ ܠܳـܗ̇ ܚܰܛܳܝܳܐ܆ ܣܠܶܩܬ ܠܰܡ ܡܶܢܳܗ̇ ܙܰܟܳܝܳܐ܀

ܘܰܐܝܠܶܝܢ ܕܩܰܪܺܝܒܺܝܢ ܐܳܡܪܺܝܢ:

ܛܽܘܒ̈ܬܳܢܶܐ ܗܳܢܽܘܢ ܕܶܐܫܬܒܶܩܘ ܠܳܐ ܢܳܡܽܘܣܳܝ̈ܘܳܬܗܽܘܢ ܘܶܐܬܟܰܣܺܝܘ ܚܛܳܗܰܝ̈ܗܽܘܢ܀

ܚܬܳܡܳܐ ܕܰܒܡܽܘܪܽܘܢ ܩܰܕܺܝܫܳܐ

ܘܫܳܩܶܠ ܟܳܗܢܳܐ ܒܣܶܡܳܠܶܗ ܠܩܰܪܢܳܐ ܕܡܽܘܪܽܘܢ ܘܰܡܨܰܠܶܐ ܥܰܠ ܚܬܳܡܶܗ ܟܰܕ ܦܫܺܝܛ ܘܝܰܡܺܝܢܶܗ ܣܺܝܡܳܐ ܥܰܠ ܪܺܝܫܶܗ ܕܰܥܡܺܝܕܳܐ:

ܘܠܶܗ ܠܗܳܢܳܐ ܚܳܬܡܳܐ ܒܰܫܡܳܟ ܩܰܕܺܝܫܳܐ ܢܩܰܒܶܠ ܥܰܒܕܳܟ ܗܳܢܳܐ܆ ܕܥܰܡ ܦܳܠܚܰܝ̈ܟ ܒܝܰܕ ܗܰܝܡܳܢܽܘܬܳܐ ܕܰܥܡܳܕܳܐ ܐܶܬܡܢܺܝ܆ ܐܰܝܟܰܢܳܐ ܕܟܰܕ ܒܗܳܢܳܐ ܡܽܘܪܽܘܢ ܟܽܠܳـܗ̇ ܒܰܣܺܝܡܽܘܬ ܪܺܝܚܳܐ ܪܽܘܚܳܢܳܐܺܝܬ ܡܶܬܡܠܶܐ܆ ܠܳܐ ܡܶܬܬܰܚܕܳܢܳܐ ܢܶܗܘܶܐ ܠܚܰܝܠܰـܘ̈ܳܬܳܐ ܣܰܩܽܘܒܠܳـܝ̈ܶܐ܆ ܟܰܕ ܠܳܐ ܡܶܟܺܝܠ ܕܳܚܶܠ ܡܶܢ ܐܰܪ̈ܟܰܐܣ ܘܫܰܠܺܝܛܳܢ̈ܶܐ ܕܚܶܫܽܘܟܳܐ܆ ܐܷܠܳܐ ܟܰܕ ܒܢܽܘܗܪܳܐ ܕܦܽܘܩ̈ܕܳܢܶܐ ܡܗܰܠܶܟ܆ ܒܪܳܐ ܕܢܽܘܗܪܳܐ ܕܺܝܠܳܟ ܢܶܗܘܶܐ. ܐܰܢ̱ܬ ܓܶܝܪ ܐܺܝܬܰܝܟ ܢܽܘܗܪܳܐ ܗܰܘ ܫܰܪܺܝܪܳܐ ܘܠܳܟ ܫܽܘܒܚܳܐ ܡܰܣܩܺܝܢܰܢ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܘܡܶܬܦܢܶܐ ܠܘܳܬ ܥܡܺܝܕܳܐ ܘܚܳܬܶܡ ܠܶܗ ܒܡܽܘܪܽܘܢ ܩܰܕܺܝܫܳܐ ܒܶܝܬ ܥܰܝܢܰܘ̈ܗ̱ܝ ܬܠܳܬ ܙܰܒ̈ܢܺܝܢ ܨܠܺܝܒܳܐܺܝܬ ܟܰܕ ܐܳܡܰܪ:

ܒܡܽܘܪܽܘܢ ܩܰܕܺܝܫܳܐ܆ ܪܺܝܚܳܐ ܒܰܣܺܝܡܳܐ ܕܰܡܫܺܝܚܳܐ܆ ܛܰܒܥܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܫܽܘܡܠܳـܝܳܐ ܕܫܽܘܟܳܢ̈ܶܐ ܕܪܽܘܚܳܐ ܩܰܕܺܝܫܳܐ܆ ܡܶܬܛܒܰܥ (ܦܠܳܢ) ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܘܢܳܣܶܟ ܟܳܗܢܳܐ ܡܽܘܪܽܘܢ ܒܦܰܣܰܬ ܐܺܝܕܶܗ ܘܡܳܫܰܚ ܠܰܥܡܺܝܕܳܐ ܒܶܝܬ ܥܰܝܢܰܘ̈ܗ̱ܝ ܘܡܰܘܒܶܠ ܥܰܠ ܐܶܕܢܶܗ ܕܝܰܡܺܝܢܳܐ ܘܰܕܪܳܥܶܗ ܘܟܰܬܦܶܗ ܘܟܽܠܶܗ ܓܰܒܶܗ ܕܝܰܡܺܝܢܳܐ ܘܒܶܝܬ ܨܶܒ̈ܥܳܬܳܐ ܕܺܐܝܕܶܗ ܕܝܰܡܺܝܢܳܐ ܘܪܶܓܠܶܗ ܘܒܶܝܬ ܥܰܛܡ̈ܳܬܶܗ. ܘܣܳܠܶܩ ܥܰܠ ܓܰܒܶܗ ܕܣܶܡܳܠܳܐ ܘܒܰܝܢܳܬ ܨܶܒ̈ܥܳܬܳܐ ܕܺܐܝܕܶܗ ܕܣܶܡܳܠܳܐ ܘܰܕܪܳܥܶܗ ܘܟܰܬܦܶܗ ܘܶܐܕܢܶܗ ܘܗܳܦܶܟ ܠܒܶܝܬ ܥܰܝܢܰܘ̈ܗ̱ܝ ܘܪܺܝܫܶܗ ܘܥܰܝܢܰܘ̈ܗ̱ܝ ܘܩܽܘܕܡܳܐ ܘܒܶܣܬܪܳܐ ܡܫܰܡܠܝܳܐܺܝܬ. ܘܠܳܐ ܢܶܫܒܽܘܩ ܒܶܗ ܕܽܘܟܬܳܐ ܕܠܳܐ ܡܳܫܰܚ. ܗܳܝܕܶܝܢ ܡܫܰܡ̈ܫܳܢܶܐ ܘܥܰܪܳܒܳܐ ܕܫܰܒܪܳܐ ܡܰܠܒܫܺܝܢ ܠܶܗ ܢܰܚ̈ܬܶܐ ܚܶܘܳܪ̈ܶܐ.

ܘܟܳܗܢܳܐ ܡܨܰܠܐ ܟܰܕ ܓܗܺܝܢ:

ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܡܰܒܽܘܥܳܐ ܕܚܰܝ̈ܶܐ ܘܰܕܛܳܒ̈ܳܬܳܐ܆ ܗܰܘ ܝܳܠܽܘܕܳܐ ܕܢܽܘܗܪܳܐ ܫܰܪܺܝܪܳܐ܆ ܗܰܘ ܕܰܒܝܰܕ ܕܶܢܚܳܐ ܕܺܝܚܺܝܕܳܝܳܐ ܕܺܝܠܳܟ ܒܪܳܐ ܡܳܪܝܳܐ ܕܶܝܢ ܕܺܝܠܰܢ ܝܶܫܽܘܥ ܡܫܺܝܚܳܐ܆ ܐܰܢܗܰܪܬ ܠܗܳܠܶܝܢ ܕܒܰܐܪܥܳܐ ܐܰܝܟ ܕܰܠܗܳܠܶܝܢ ܕܒܰܫܡܰܝܳܐ܆ ܗܰܘ ܕܝܰܗ̱ܒܬ ܕܽܘܟܳܝܳܐ ܛܽܘܒܬܳܢܳܐ ܒܰܥܡܳܕܳܐ ܦܳܪܽܘܩܳܝܳܐ܆ ܘܩܽܘܕܫܳܐ ܐܰܠܳܗܳܝܳܐ ܒܰܡܫܺܝܚܽܘܬܳܐ ܩܰܕܺܝܫܬܳܐ܆ ܘܰܚܕܳܝܽܘܬܳܐ ܗܳܝ ܕܰܠܘܳܬ ܡܫܺܝܚܳܐ ܕܺܝܠܳܟ ܘܪܽܘܚܳܟ ܗܰܘ ܡܰܥܒܶܕ ܚܰܝ̈ܶܐ܆ ܗܰܘ ܕܳܐܦ ܗܳܫܳܐ ܐܶܨܛܒܺܝܬ݁ ܕܰܒܝܰܕ ܬܶܫܡܶܫܬܰܢ ܬܰܘܠܶܕ ܡܶܢܕܪܺܝܫ ܠܥܰܒܕܳܟ ܗܳܢܳܐ ܒܝܰܕ ܡܰܝ̈ܳܐ ܘܪܽܘܚܳܐ܆ ܥܰܠ ܣܰܒܪܳܐ ܕܚܰܝ̈ܶܐ ܕܰܠܥܳܠܰܡ ܘܫܽܘܒܩܳܢܳܐ ܕܰܚ̈ܛܳܗܶܐ ܨܶܒܝܳܢܳܝ̈ܶܐ ܘܠܳܐ ܨܶܒܝܳܢܳܝ̈ܶܐ܆ ܗܳܢܽܘܢ ܕܡܶܢ ܩܕܺܝܡ ܐܺܝܬ ܗ̱ܘܰܘ ܠܶܗ ܫܰܟܶܢܬ: ܫܰܕܰܪ ܥܠܰܘܗ̱ܝ ܡܳܪܝܳܐ ܛܰܝܒܽܘܬܳܐ ܕܪܽܘܚܳܟ ܩܰܕܺܝܫܳܐ ܘܰܡܠܺܝܘܗ̱ܝ ܡܶܢ ܩܽܘܕܳܫܰܘ̈ܗ̱ܝ܀

ܬܠܳܝܬܳܐ

ܛܰܪܳܝܗ̱ܝ ܒܺܝܕܰܥܬܳܟ܆ ܫܰܪܰܪܳܝܗ̱ܝ܆ ܢܰܛܰܪܳܝܗ̱ܝ ܒܕܶܚܠܬܳܟ܆ ܙܰܗܰܪ ܗܰܠܟ̈ܳܬܶܗ ܒܰܫܪܳܪܳܟ܆ ܣܰܬܶܬ ܒܢܰܦܫܶܗ ܫܒܺܝ̈ܠܶܐ ܕܦܽܘ̈ܩܕܳܢܰܝܟ܆ ܒܪܳܐ ܕܢܽܘܗܪܳܐ ܚܰܘܳܝܗ̱ܝ ܕܢܺܚܶܐ ܠܳܐ ܥܕܺܝܠܳܐܺܝܬ ܬܚܽܘܬ ܡܰܠܟܽܘܬܳܐ ܕܰܡܫܺܝܚܳܟ܆ ܘܰܐܫܘܳܝܗ̱ܝ ܠܒܰܝܬܳܝܽܘܬܳܐ ܕܺܝܠܳܟ܆ ܡܶܛܽܠ ܕܰܐܢ̱ܬ ܐܺܝܬܰܝܟ ܐܰܠܳܗܳܐ ܕܦܽܘܪܩܳܢܰܢ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ.

ܡܫܰܡܫܳܢܳܐ: ܠܡܳܪܝܳܐ ܪ̈ܺܝܫܰܝܢ ܢܰܪܟܶܢ.

ܬܠܳܝܬܳܐ

ܨܠܽܘܬܳܐ ܕܰܐܒܽܘܢ ܕܒܰܫܡܰܝܳܐ ܟܰܕ ܦܫܺܝܛ:

ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܆ ܗܰܘ ܕܰܒܝܰܕ ܡܰܘܗܰܒܬܳܟ ܪܰܒܬܳܐ ܘܠܳܐ ܡܶܬܡܰܠܠܳـܢܺܝܬܳܐ ܐܶܬܩܰܕܰܫܘ ܡܰܝ̈ܳܐ ܗܳܠܶܝܢ ܒܡܶܐܬܺܝܬܳܐ ܕܪܽܘܚܳܟ ܩܰܕܺܝܫܳܐ܆ ܕܢܶܗܘܽܘܢ ܟܰܪܣܳܐ ܕܪܽܘܚܳܐ ܕܡܰܘܠܳـܕܳܐ ܠܒܰܪܢܳܫܳܐ ܚܰܕܬܳܐ ܡܶܢ ܥܰܬܺܝܩܳܐ܆ ܘܕܰܐܫܘܺܝܬ݁ ܠܥܰܒܕܳܟ ܗܳܢܳܐ ܠܰܩܝܳܡܬܳܐ ܕܰܒܝܰܕ ܡܰܝ̈ܳܐ ܘܪܽܘܚܳܐ: ܐܰܢ̱ܬ ܗܳܟܺܝܠ ܡܳܪܝܳܐ ܒܝܰܕ ܪ̈ܰܚܡܶܐ ܕܺܝܠܳܟ ܣܰܓܺܝ̈ܶܐܐ ܐܰܫܘܳܝܗ̱ܝ ܠܡܰܠܟܽܘܬܳܐ ܕܺܝܠܳܟ ܫܡܰܝܳܢܺܝܬܳܐ܆ ܘܰܚܢܰܢ ܘܗܽܘ ܒܰܚܕܳܐ ܫܰܘܝܽܘܬܳܐ ܢܰܡܪܰܚ ܘܢܶܩܪܶܝܟ ܐܰܠܳܗܳܐ ܡܫܰܒܚܳܐ ܘܪܳܚܶܡ ܒܢܰܝ̈ܢܳܫܳܐ ܐܰܒܳܐ ܐܰܚܺܝܕ ܟܽܠ ܘܩܰܕܺܝܫܳܐ ܘܰܢܨܰܠܐ ܘܢܺܐܡܰܪ: ܐܰܒܽܘܢ ܕܒܰܫܡܰܝܳܐ܀

ܥܰܡܳܐ: ܢܶܬܩܰܕܰܫ ܫܡܳܟ. ܬܺܐܬܶܐ ܡܰܠܟܽܘܬܳܟ. ܢܶܗܘܶܐ ܨܶܒܝܳܢܳܟ܆ ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘ̈ܒܰܝܢ ܘܰܚ̈ܛܳܗܰܝܢ܆ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ܆ ܐܷܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳـܟܺ ܗ̱ܝ ܡܰܠܟܽܘܬܳܐ ܘܚܰܝܠܳܐ ܘܬܫܒܽܘܚܬܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܬܠܳܝܬܳܐ

ܟܳܗܢܳܐ ܟܰܕ ܦܫܺܝܛ

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܕܦܽܘܪܩܳܢܳܐ ܕܒܰܡܫܺܝܚܳܟ ܫܰܟܶܢܬ܆ ܘܝܰܗ̱ܒܬ݁ ܠܥܰܒܕܳܟ ܗܳܢܳܐ ܕܗܳܫܳܐ ܥܡܰܕ ܝܺܠܺܝܕܽܘܬܳܐ ܕܡܶܢ ܕܪܺܝܫ ܒܝܰܕ ܡܰܝ̈ܳܐ ܘܪܽܘܚܳܐ ܩܰܕܺܝܫܳܐ. ܐܰܢ̱ܬ ܡܳܪܝܳܐ ܪܳܚܶܡ ܐ̱ܢܳܫ̈ܳܐ܆ ܚܰܝܶܠܳܝܗ̱ܝ ܘܳܐܦ ܒܩܰܕܺܝܫܽܘܬܳܐ ܛܰܪܳܝܗ̱ܝ. ܘܟܰܕ ܡܰܙܠܶܓ ܒܢܽܘܗܪܳܐ ܕܺܝܕܰܥܬܳܟ ܘܩܳܐܶܡ ܩܕܳܡ ܦܳܬܽܘܪܳܟ ܟܳܗܢܳܝܳܐ܆ ܐܰܫܘܳܝܗ̱ܝ ܠܛܽܘܒܬܳܢܽܘܬܳܐ ܕܺܝܠܳܟ ܫܡܰܝܳܢܺܝܬܳܐ܆ ܒܝܰܕ ܪ̈ܰܚܡܶܐ ܕܺܝܚܺܝܕܳܝܳܐ ܒܪܳܟ ܕܒܺܐܝ̈ܕܰܘܗ̱ܝ ܘܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܰܠܪܽܘܚܳܐ ܕܺܝܠܳܟ.

ܡܫܰܡܫܳܢܳܐ: ܩܕܳܡ ܡܳܪܝܳܐ ܡܪܰܚܡܳܢܳܐ ܘܰܩܕܳܡ ܡܰܕܒܚܶܗ ܡܚܰܣܝܳܢܳܐ ܘܰܩܕܳܡ ܡܰܥܡܽܘܕܺܝܬܳܐ ܗܳܕܶܐ ܩܰܕܺܝܫܬܳܐ܆ ܒܶܣ̈ܡܶܐ ܡܶܬܬܣܺܝܡܺܝܢ ܡܶܢ ܐܺܝ̈ܕܰܝ ܟܳܗܢܳܐ ܗܳܢܳܐ ܡܝܰܩܪܳܐ (ܐܶܢ ܐܶܦܣܩܽܘܦܳܐ ܡܛܰܝܰܒ ܢܺܐܡܰܪ: ܐܰܒܽܘܢ ܡܥܰܠܝܳܐ) ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ.

ܥܰܡܳܐ: ܩܕܳܡܰܝܟ ܡܳܪܰܢ ܘܰܐܠܳܗܰܢ.

ܟܳܗܢܳܐ ܟܰܕ ܦܫܺܝܛ

ܩܕܳܡܰܝܟ ܚܢܰܢ ܟܽܠܰܢ ܘܥܰܒܕܳܟ ܗܳܢܳܐ ܕܗܳܫܳܐ ܥܡܰܕ܆ ܐܰܪܟܶܢܢ ܨܰܘܪ̈ܶܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܕܺܝܠܰܢ. ܘܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܰܢ: ܚܽܘܪ ܒܰܢ ܘܰܒܝܳܪܬܽܘܬܳܐ ܕܺܝܠܳܟ܆ ܘܗܰܕܳܐ ܠܰܢ ܠܘܳܬ ܦܽܘܪܩܳܢܳܐ ܡܫܰܡܠܝܳܐ ܘܰܠܚܰܝ̈ܶܐ ܥܬܺܝ̈ܕܶܐ ܕܰܠܥܳܠܰܡ܆ ܟܰܕ ܡܒܰܛܶܠ ܐܰܢ̱ܬ ܡܶܢܰܢ ܠܰܚܣܳܡܳܐ ܘܰܠܡܰܟܝܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܘܰܕܢܶܫܬܰܘܬܰܦ ܠܐ̱ܪ̈ܳܙܶܐ ܗܳܠܶܝܢ ܫܡܰܝܳܢ̈ܶܐ ܘܡܰܥܒ̈ܕܰܝ ܚܰܝ̈ܶܐ ܒܬܺܐܪܬܳܐ ܕܟܺܝܬܳܐ ܐܰܫܘܳܐ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܺܝܠܳܟ܆ ܕܥܰܡܶܗ ܡܒܰܪܟܳܐ ܐܺܝܬܰܝܟ ܥܰܡ ܪܽܘܚܳܐ ܕܺܝܠܳܟ ܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܥܰܡܳܐ: ܐܰܡܺܝܢ܀

ܟܳܗܢܳܐ: ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܒܰܪܶܟ ܠܥܰܒܕܳܟ ܗܳܢܳܐ ܕܗܳܫܳܐ ܥܡܰܕ܆ ܘܰܠܟܽܠܰܢ ܒܒܽܘܪܟܬܳܐ ܕܺܝܠܳܟ ܫܡܰܝܳܢܺܝܬܳܐ ܘܠܳܐ ܡܶܬܬܪܺܝܡܳܢܺܝܬܳܐ. ܘܚܰܕܳܐ ܠܰܢ ܡܫܰܡܠܝܳܐܺܝܬ ܒܛܳܒ̈ܳܬܳܐ ܕܡܶܢ ܠܘܳܬܳܟ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܟܽܘܠܳܠ ܥܡܺܝܕܳܐ

ܘܥܰܪܳܒܳܐ ܡܰܣܶܩ ܠܰܥܡܺܝܕܳܐ ܠܡܰܕܒܚܳܐ ܘܟܳܗܢܳܐ ܩܳܛܰܪ ܠܶܗ ܒܪܺܝܫܶܗ ܟܠܺܝܠܳܐ ܐܰܘܟܺܝܬ ܙܽܘܢܳܪܳܐ ܘܰܡܨܰܠܶܐ:

ܟܰܠܶܠ ܡܳܪܝܳܐ ܠܥܰܒܕܳܟ ܗܳܢܳܐ ܒܗܶܕܪܳܐ ܘܬܶܫܒܽܘܚܬܳܐ ܕܰܫܡܳܟ ܩܰܕܺܝܫܳܐ ܘܢܶܗܘܽܘܢ ܚܰܝܰܘ̈ܗ̱ܝ ܠܰܢܝܳܚܳܟ ܘܰܠܬܶܫܒܽܘܚܬܳܐ ܕܡܳܪܽܘܬܳܟ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܡܺܝܢ܀

ܡܫܰܡ̈ܫܳܢܶܐ ܥܳܢܶܝܢ ܒܟܽܠ ܙܒܰܢ̱ܬܳܐ ܒܰܝܬܳܐ ܚܕܳܐ ܡܶܢ ܣܽܘܓܺܝܬܳܐ ܗܳܕܶܐ:

ܐܰܚܽܘܢ ܙܡܰܪ ܫܽܘܒܚܳܐ܆ ܠܰܒܪܶܗ ܕܡܳܪܶܐ ܟܽܠ܆ ܕܰܩܛܰܪ ܠܳـܟ ܬܳܓܳܐ܆ ܡܶܢ ܝܽܘܪܕܢܳܢ ܢܰܗܪܳܐ܀

ܐܰܦܪܶܓ ܐܳܦ ܠܒܽܘܫܶܟ܆ ܐܰܚܽܘܢ ܐܰܝܟ ܬܰܠܓܳܐ܆ ܘܰܢܗܰܪ ܐܳܦ ܙܺܝܘܶܟ܆ ܒܰܕܡܽܘܬ ܡܰܠܰܐܟ̈ܶܐ܀

ܒܰܕܡܽܘܬ ܡܰܠܰܐܟ̈ܶܐ܆ ܣܠܶܩ ܠܰܡ ܝܰܘܡܳܢܳܐ܆ ܡܶܢ ܝܽܘܪܕܢܳܢ ܢܰܗܪܳܐ܆ ܒܚܰܝܠܳܐ ܕܪܽܘܚ ܩܽܘܕܫܳܐ܀

ܟܠܺܝܠܳܐ ܕܠܳܐ ܚܳܡܶܐ܆ ܗܳܐ ܐܶܬܬܣܺܝܡ ܒܪܺܝܫܳܟ܆ ܘܫܽܘܒܚܳܐ ܕܒܶܝܬ ܐܳܕܳܡ܆ ܝܰܘܡܳܢܳܐ ܠܒܶܫܬܳܝܗ̱ܝ܀

ܟܳܗܢܳܐ ܡܫܰܘܬܶܦ ܠܶܗ ܠܰܥܡܺܝܕܳܐ ܒܐ̱ܪ̈ܳܙܶܐ ܩܰܕܺܝ̈ܫܶܐ ܘܳܐܡܰܪ ܬܠܳܬ ܙܰܒ̈ܢܺܝܢ:

ܦܺܐܪܳܐ ܕܠܳܐ ܛܰܥܡܶܗ܆ ܐܳܕܳܡ ܒܦܰܪܕܰܝܣܳܐ܆ ܝܰܘܡܳܢܳܐ ܒܦܽܘܡܳܟ܆ ܐܶܬܬܣܺܝܡ ܒܚܰܕܽܘܬܳܐ܀

ܡܫܰܡ̈ܫܳܢܶܐ ܥܳܢܶܝܢ ܒܟܽܠ ܙܒܰܢ̱ܬܳܐ ܒܰܝܬܳܐ ܚܕܳܐ ܡܶܢ ܣܽܘܓܺܝܬܳܐ ܗܳܕܶܐ:

ܥܺܝܪ̈ܶܐ ܘܡܰܠܰܐܟ̈ܶܐ܆ ܕܚܳܕܶܝܢ ܒܬܰܝܳܒ̈ܶܐ܆ ܢܶܚܕܽܘܢ ܒܳܟ ܝܰܘܡܳܢ܆ ܕܰܠܗܽܘܢ ܕܳܡܶܐ ܐܰܢܬ܀

ܙܶܠ ܠܳܟ ܒܰܫܠܳـܡܳܐ܆ ܒܰܪ ܡܰܥܡܽܘܕܺܝܬܳܐ܆ ܘܰܣܓܽܘܕ ܠܰܨܠܺܝܒܳܐ܆ ܕܗܽܘܝܽܘ ܡܢܰܛܰܪ ܠܳܟ܀

ܫܽܘܒܚܳܐ ܠܶܗ ܠܰܐܒܳܐ܆ ܘܬܰܘܕܺܝܬܳܐ ܠܰܒܪܳܐ܆ ܘܰܠܪܽܘܚܳܐ ܕܩܽܘܕܫܳܐ܆ ܘܣܶܓܕܬܳܐ ܘܪܽܘܡܪܳܡܳܐ܀

ܨܠܽܘܬܳܐ ܕܚܽܘܬܳܡܳܐ

ܐܰܠܳܗܳܐ ܐܰܒܳܐ ܢܶܗܘܶܐ ܥܰܡܳܟ܆ ܒܪܳܐ ܣܓܺܝܕܳܐ ܢܢܰܛܪܳܟ܆ ܪܽܘܚܳܐ ܩܰܕܺܝܫܳܐ ܕܰܠܒܶܫܬ ܢܶܓܡܪܳܟ ܘܡܶܢ ܢܶܟ̈ܝܳܢܶܐ ܢܫܰܘܙܒܳܟ܆ ܘܡܰܥܡܽܘܕܺܝܬܳܐ ܕܰܥܡܰܕܬ ܬܩܰܘܶܐ ܒܳܟ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܡܫܰܡܫܳܢܳܐ: ܙܶܠ ܒܰܫܠܳـܡܳܐ܀

ܟܳܗܢܳܐ: ܟܰܕ ܡܰܓܥܠܺܝܢܰܢ ܠܳܟ ܠܛܰܝܒܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܥܰܡ ܙܘܳܕ̈ܶܐ ܛܳܒ̈ܶܐ ܕܰܢܣܰܒܬ ܡܶܢ ܡܰܥܡܽܘܕܺܝܬܳܐ ܘܡܰܕܒܚܳܐ ܡܚܰܣܝܳܢܳܐ ܕܰܡܫܺܝܚܳܐ ܐܰܠܳܗܰܢ܆ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܨܠܽܘܬܳܐ ܡܳܐ ܕܫܳܪܶܝܢ ܟܠܺܝܠܳܐ ܕܰܥܡܺܝܕܳܐ (ܒܳܬܰܪ ܫܰܒܥܳܐ ܝܰܘܡܺܝ̈ܢ)

ܗܰܕܳܐ ܡܳܪܝܳܐ܆ ܒܝܰܕ ܗܰܘܢܳܟ ܡܰܥܒܶܕ ܚܰܝ̈ܶܐ܆ ܠܘܳܬ ܕܽܘܒܳܪܳܐ ܐܶܘܰܢܓܶܠܳـܝܳܐ ܠܥܰܒܕܳܟ ܗܳܢܳܐ܆ ܕܡܶܢ ܐܶܡܳܐ ܪܽܘܚܳܢܳܝܬܳܐ ܕܣܺܝܡܰܬ ܒܢܰܝ̈ܳܐ ܕܺܝܠܳܟ܆ ܐܰܚܳܐ ܠܺܝܚܺܝܕܳܝܳܐ ܒܪܳܟ ܫܰܡܠܺܝܬ. ܘܰܒܬܰܪܒܺܝܬܳܐ ܡܩܰܠܰܣܬܳܐ ܢܶܫܬܰܘܫܰܛ܆ ܘܰܒܡܰܠܟܽܘܬܳܟ ܫܡܰܝܳܢܺܝܬܳܐ ܟܠܺܝܠܳܐ ܗܳܢܳܐ ܢܩܰܒܶܠ ܕܰܢܛܺܝܪ ܠܗܳܢܽܘܢ ܕܫܰܦܺܝܪ ܚܳܙܩܺܝܢ. ܘܠܳܐ ܥܰܡ ܡܶܬܬܪܺܝܡܳܢܽܘܬܳܐ ܕܰܟܠܺܝܠܳܐ ܗܳܢܳܐ܆ ܡܶܢ ܣܽܘܝܳܥܳܐ ܕܝܰܡܺܝܢܳܟ ܢܶܫܬܰܘܚܰܕ܆ ܐܷܠܳܐ ܒܶܗ ܢܶܣܬܰܬܰܪ ܘܢܶܬܚܰܝܰܠ ܘܢܶܬܪܰܒܶܐ܆ ܘܰܢܩܰܒܶܠ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ܆ ܘܰܢܫܰܒܚܳܟ ܘܠܺܝܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ܀

ܫܠܶܡ ܛܶܟܣܳܐ ܕܰܥܡܳܕܳܐ ܕܚܰܕ ܫܰܒܪܳܐ