ܬܶܫܡܶܫܬܳܐ ܩܰܕܡܳܝܬܳܐ
ܕܡܶܬܰܐܡܪܳܐ ܥܰܠ ܡܶܬܬܰܪ̈ܬܝܳܢܶܐ

ܨܠܽܘܬ݂ܐ ܕܫܽܘܪܳܝܳܐ

ܒܬܶܫܡܶܫܬܳܐ ܩܰܕܡܳܝܬܳܐ ܟܳܗܢܳܐ ܠܳܐ ܦܳܫܶܛ ܐܺܝ̈ܕܰܘܗ̱ܝ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚ̈ܰܛܳܝܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܕܥܰܡ ܕܰܟܝܽܘܬܳܐ ܘܩܰܕܺܝܫܽܘܬܳܐ ܢܶܬܩܰܪܰܒ ܠܘܳܬ ܐ̱ܪ̈ܳܙܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ ܕܣܳܝܽܘܡܽܘܬ ܒ̈ܢܰܝܳܐ ܕܠܳܐ ܡܶܬܚܰܒܠܳـܢܽܘܬܳܐ. ܘܢܶܫܬܘܶܐ ܠܚܰܕܽܘܬܳܐ ܠܳܐ ܡܶܫܬܰܪܝܳܢܺܝܬܳܐ ܘܰܠܒܽܘܣܳܡܳܐ ܕܥܰܡܳܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܒܰܥܡܳܕܳܐ ܕܺܝܠܳܟ ܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܕܰܡܕܰܟܝܳܐ ܠܰܢ ܡܶܢ ܣܰܢ̈ܝܳܬܳܐ ܕܰܚܛܺܝܬܳܐ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐܰܢ̱ܬ ܡܳܪܝ ܕܺܐܝܬܰܝܟ ܨܶܡܚܳܐ ܕܢܽܘܗܪܳܐ ܕܰܕܢܰܚ ܡܶܢ ܐܰܒܳܐ܆ ܐܰܕܢܰܚ ܢܽܘܗܪܳܟ ܒܠܶـܒܰܘ̈ܳܬܳܐ ܕܣܳܓܽܘ̈ܕܰܝܟ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܫܘ̄ܒ: ܫܽܘܒܚܳܐ ܠܰܐܒܳܐ ܕܓܰܒܠܰܢ܆ ܘܠܰܒܪܳܐ ܕܦܰܪܩܰܢ܆ ܒܰܥܡܳܕܶܗ ܘܰܠܪܽܘܚ ܩܽܘܕܫܳܐ ܕܗܽܘ ܡܢܰܚܶܡ ܠܰܢ ܡܶܢ ܥܰܦܪܳܐ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܡܙܡܘܪܐ܆ ܩܳܠܳܐ: ܩܽܘܩܠܺܝܳܘܢ

ܐܰܝܬܰܘ ܠܡܳܪܝܳܐ ܒܢܰܝ̈ ܕܶܟܪ̈ܶܐ ܗ̄ ܐܰܝܬܰܘ ܠܡܳܪܝܳܐ ܫܽܘܒܚܳܐ ܘܺܐܝܩܳܪܳܐ܀

ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ ܗ̄ ܐܰܠܳܗܳܐ ܡܫܰܒܚܳܐ ܪܥܶܡ܀

ܡܳܪܝܳܐ ܥܰܠ ܡܰܝ̈ܳܐ ܣܰܓܺܝ̈ܶܐܐ ܗ̄ ܩܳܠܶܗ ܕܡܳܪܝܳܐ ܒܫܽܘܒܚܳܐ܀

ܨܠܽܘܬܳܐ

ܟܳܗܢܳܐ: ܡܳܪܝܳܐ ܐܰܠܳܗܳܐ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ܆ ܒܰܪܶܟ ܠܥܰܒ̈ܕܰܝܟ ܗܳܠܶܝܢ ܕܡܶܬܬܰܪܬܶܝܢ ܘܗܰܒ ܠܗܽܘܢ ܙܗܺܝܪܽܘܬܳܐ ܕܡ̈ܶܠܶܐ ܕܢܶܕܥܽܘܢ ܡܶܛܽܠ ܐܰܝܠܶܝܢ ܕܡܶܬܬܰܪܬܶܝܢ. ܟܬܽܘܒ ܕܶܚܠܬܳܟ ܒܠܶـܒܰܘ̈ܳܬܗܽܘܢ. ܦܬܰܚ ܥܰܝ̈ܢܶܐ ܕܬܰܪ̈ܥܝܳܬܗܽܘܢ ܠܘܳܬ ܗܳܝ ܕܢܶܕܥܽܘܢ ܣܪܺܝܩܽܘܬܶܗ ܕܥܳܠܡܳܐ܆ ܐܰܝܟܰܢܳܐ ܕܟܰܕ ܫܳܕܶܝܢ ܡܶܢܗܽܘܢ ܒܺܝܫܽܘܬܳܐ ܘܰܪ̈ܓܺܝܓܳܬܳܐ ܥܳܠܡܳܢܳܝ̈ܳܬܳܐ.
ܢܶܫܬܘܽܘܢ ܠܺܝܠܺܝܕܽܘܬܳܐ ܕܡܶܢ ܕܪܺܝܫ܆ ܗܳܝ ܕܡܶܢ ܠܥܶܠ ܗܳܝ ܕܰܒܝܰܕ ܡܰܝ̈ܳܐ ܘܪܽܘܚܳܐ܆ ܠܗܳܝ ܕܢܶܗܘܽܘܢ ܥܶܪ̈ܒܶܐ ܕܪܳܥܝܳܐ ܗܰܘ ܫܰܪܺܝܪܳܐ܆ ܕܰܛܒܺܝܥܺܝܢ ܒܛܰܒܥܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܰܕܳܡ̈ܶܐ ܡܝܰܩܪ̈ܶܐ ܒܓܽܘܫܡܳܐ ܕܥܺܕܬܳܐ ܕܺܝܠܳܟ ܩܰܕܺܝܫܬܳܐ܆ ܐܰܝܟܰܢܳܐ ܕܢܶܫܬܘܽܘܢ ܠܣܰܒܪܳܐ ܛܽܘܒܬܳܢܳܐ ܘܰܠܕܶܢܚܳܐ ܕܰܐܠܳܗܰܢ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܠܪܽܘܚܳܐ ܩܰܕܺܝܫܳܐ܀

ܥܶܩܒܳܐ

ܨܳܐܬܳܐ ܕܚܰܘ̈ܒܳܬܰܢ ܘܟܽܘ̈ܬܡܳܬܳܐ ܕܡܶܢ ܒܥܶܠܕܒܳܒܰܝ̈ܢ ܝܰܘܡܳܢ ܒܰܣܚܳܬܳܐ ܕܡܶܢ ܡܰܝ̈ܳܐ ܘܪܽܘܚܳܐ ܚܰܠܠܰܢ܆ ܟܰܕ ܠܽܐܘܪܚܳܐ ܐܶܬܗܰܕܺܝܢܰܢ ܚܕܰܬܳܐ ܘܠܳܐ ܡܥܰܬܩܳܐ܆ ܪܽܘܚܳܢܳܝܬܳܐ ܕܠܳܐ ܦܳܕܳܐ ܐܳܦܠܳܐ ܡܟܰܬܡܳܐ ܘܺܐܝܬܶܝܗ̇ ܒܚܽܘ̈ܫܳܒܶܐ ܕܡܰܢ ܕܰܐܠܳܗܳܐ ܡܰܚܶܒ ܠܶܗ܀

ܡܫܰܡܫܳܢܳܐ: ܣܛܰܘܡܶܢܩܰܐܠܽܘ̇ܣ ܩܽܘܪܝܶܐܠܰܝܣܽܘܢ

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬ݂ܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ݂ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܥܳܠܡ̈ܶܐ܆ ܠܳܐ ܡܶܬܚܰܒܠܳـܢܳܐ ܘܠܳܐ ܡܶܬܚܰܙܝܳܢܳܐ܆ ܗܰܘ ܕܒܰܠܚܽܘܕܰܘܗ̱ܝ ܚܰܟܺܝܡܳܐ܆ ܗܰܘ ܕܡܶܢܶܗ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܥܰܠ ܐܰܪܥܳܐ ܡܶܫܬܰܡܗܳܐ܆ ܗܰܘ ܕܒܰܠܚܽܘܕܳܝܽܘܬܳܐ ܡܶܬܗܰܘܢܰܢ܆ ܘܗܽܘ ܟܰܕ ܗܽܘ ܒܰܬܠܺܝܬܳܝܽܘܬܳܐ ܡܶܣܬܓܶܕ ܘܡܶܫܬܰܒܰܚ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܕܰܗܘܳܐ ܒܰܪܢܳܫܳܐ܆ ܘܠܳܐ ܡܶܬܕܰܪܟܳܢܳܐܺܝܬ ܡܶܢ ܒܬܽܘܠܬܳܐ ܩܰܕܺܝܫܬܳܐ ܦܰܓܪܳܢܳܐܺܝܬ ܕܠܳܐ ܙܽܘܘܳܓܳܐ ܐܶܬܺܝܠܶܕ܆ ܐܰܝܟܰܢܳܐ ܕܠܰܒܢܰܝ̈ܢܳܫܳܐ ܢܩܰܪܶܒ ܠܣܺܝܡܰܬ ܒܢܰܝ̈ܳܐ ܕܝܳܠܽܘܕܶܗ܆ ܘܢܶܥܒܶܕ ܐܶܢܽܘܢ ܒ̈ܢܰܝܳܐ ܕܰܐܠܳܗܳܐ ܐܰܒܳܐ ܒܝܰܕ ܡܰܝ̈ܳܐ ܘܪܽܘܚܳܐ. ܨܳܐܰܪ ܥܽܘ̈ܠܶܐ ܒܟܰܪ̈ܣܳܬܳܐ ܕܰܗܘܳܐ ܥܽܘܠܳܐ ܒܨܶܒܝܳܢܶܗ܆ ܕܰܢܚܰܕܶܬ ܠܳܐܕܳܡ ܨܰܠܡܶܗ ܕܰܐܥܬܶܩ ܘܰܒܠܺܝ ܒܰܚܛܺܝܬܳܐ ܘܢܶܡܪܩܺܝܘܗ̱ܝ ܘܰܢܚܰܕܬܺܝܘܗ̱ܝ ܒܟܽܘܪܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ. ܠܳܐ ܣܢܺܝܩܳܐ ܕܶܐܬܳܐ ܠܰܥܡܳܕܳܐ ܕܰܢܩܰܕܶܫ ܡܰܝ̈ܳܐ ܕܝܽܘܪܕܢܳܢ ܒܰܥܡܳܕܶܗ ܩܰܕܺܝܫܳܐ. ܒܪܳܐ ܕܪܰܒܽܘܬܳܐ ܕܰܐܪܟܶܢ ܪܺܝܫܶܗ ܩܕܳܡ ܐܺܝܕܶܗ ܕܡܰܥܡܕܳܢܳܐ܆ ܟܰܕ ܐܰܒܳܐ ܡܶܢ ܪܰܘܡܳܐ ܐܰܙܥܶܩ ܕܗܳܢܰܘ ܒܪܳܐ ܕܺܝܠܝ ܚܰܒܺܝܒܳܐ܆ ܘܪܽܘܚܳܐ ܩܰܕܺܝܫܳܐ ܒܰܕܡܽܘܬ ܓܽܘܫܡܳܐ ܕܝܰܘܢܳܐ ܐܶܬܚܙܺܝ܆ ܘܚܰܝܠܰـܘ̈ܳܬܳܐ ܫܡܰܝܳܢ̈ܶܐ ܒܕܶܚܠܬܳܐ ܘܒܰܪܬܺܝܬܳܐ ܩܳܝܡܺܝܢ ܗ̱ܘܰܘ.
ܐܰܢ̱ܬ ܡܳܪܝܳܐ ܐܰܓܶܢ ܝܰܡܺܝܢܳܐ ܕܰܡܪܰܚܡܳܢܽܘܬܳܟ ܥܰܠ ܥܰܒ̈ܕܰܝܟ ܗܳܠܶܝܢ ܕܶܐܬܛܰܝܰܒܘ ܠܰܥܡܳܕܳܐ ܩܰܕܺܝܫܳܐ܆ ܘܩܰܕܶܫ ܐܶܢܽܘܢ ܘܕܰܟܳܐ ܐܶܢܽܘܢ ܘܰܡܪܽܘܩ ܐܶܢܽܘܢ ܒܝܰܕ ܙܽܘܦܳܟ ܡܚܰܣܶܐ ܟܽܠ܆ ܘܒܰܪܶܟ ܠܥܰܡܳܟ ܘܢܰܛܰܪ ܠܝܳܪܬܽܘܬܳܟ. ܘܰܐܝܟܰܢܳܐ ܕܰܒܝܰܕ ܛܰܝܒܽܘܬܳܟ ܐܰܠܒܶܫܬܳܢ ܐܶܣܛܰܠ ܫܽܘܒܚܳܐ ܕܫܽܘ̈ܟܳܢܶܐ ܕܪܽܘܚܳܟ ܩܰܕܺܝܫܳܐ܆ ܘܝܰܗ̱ܒܬ ܠܰܢ ܕܰܒܢܰܝ̈ܳܐ ܪ̈ܽܘܚܳܢܶܐ ܢܶܗܘܶܐ ܠܰܐܒܳܐ ܩܰܕܺܝܫܳܐ ܒܰܥܡܳܕܳܐ ܬܪܰܝܳܢܳܐ ܕܡܰܥܡܽܘܕܺܝܬܳܐ ܗܳܕܶܐ ܕܰܡܙܰܕܩܳܐ ܠܚܰܛܳܝ̈ܶܐ.
ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ܆ ܐܰܫܘܳܐ ܠܰܢ ܕܰܒܓܰܠܝܽܘܬ ܐܰܦ̈ܶܐ ܘܰܒܦܰܪܶܗ̱ܣܺܝܰܐ ܕܠܳܐ ܒܶܗܬܬܳܐ ܢܫܰܡܶܫ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܰܡ ܥܳܠܡܺܝܢ܀

ܩܳܠܳܐ܆ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܩܳܠܶܗ ܕܝܽܘܚܰܢܳܢ ܫܶܡܥܶܬ ܟܰܕ ܐܳܡܰܪ ܠܶܗ ܠܝܽܘܪܕܢܳܢ: ܕܫܰܦܳܐ ܢܰܦܫܳܟ ܘܰܐܫܺܝܓ ܨܳܐܬܳܐ܆ ܕܰܒܓܰܘܳܟ ܕܡܳܪܳܗ̇ ܕܰܐܪܥܳܐ ܘܕܰܫܡܰܝܳܐ ܐܶܬܳܐ ܕܢܶܥܡܰܕ ܗܰܠܶـܠܽܘܝܰܗ ܘܰܢܩܰܕܶܫ ܟܽܠ܀

ܫܘ̄ܒ: ܬܠܳـܬܳܐ ܐ̱ܪ̈ܳܙܶܐ ܩܰܕܺܝܫ̈ܶܐ ܣܳܡ ܒܳܗ̇ ܡܳܪܰܢ ܒܥܺܕܬܳܐ ܦܪܺܝܩܰܬ݂ ܒܰܨܠܺܝܒܶܗ: ܡܰܥܡܽܘܕܺܝܬܳܐ ܘܩܽܘܪܒܳܢܳܐ ܘܟܳܗܢܳܐ ܙܰܗܝܳܐ܆ ܕܰܡܚܰܣܶܐ ܥܰܠ ܡܰܪܥܺܝܬܶܗ ܗܰܠܶـܠܽܘܝܰܗ ܘܫܳܐܶܠ ܪ̈ܰܚܡܶܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܠܣܰܓܺܝܽܐܘܬ ܪ̈ܰܚܡܶܐ ܕܺܝܠܳܟ ܡܩܰܪܒܺܝܢܰܢ ܡܳܪܝܳܐ ܐܰܠܳܗܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ܆ ܚܠܳܦ ܥܰܒ̈ܕܰܝܟ ܗܳܠܶܝܢ ܕܶܐܬܛܰܝܰܒܘ ܠܰܥܡܳܕܳܐ ܗܳܢܳܐ ܩܰܕܺܝܫܳܐ܆ ܐܰܝܟܰܢܳܐ ܕܒܳܟ ܢܶܬܪܰܫܡܽܘܢ ܠܚܰܝ̈ܶܐ܆ ܘܢܶܬܝܰܠܕܽܘܢ ܠܪܽܘܚܳܢܽܘܬܳܐ܆ ܘܢܶܬܟܰܬܒܽܘܢ ܒܒܰܝܬܳܝܽܘܬܳܐ ܕܡܽܘ̈ܠܟܳܢܶܐ ܕܺܝܠܳܟ܆ ܘܢܶܬܪܰܚܩܽܘܢ ܡܶܢ ܚܰܝܰܝ̈ܗܽܘܢ ܟܽܠܗܽܘܢ ܢܶܟܝܳܢܰܘ̈ܗ̱ܝ ܕܰܒܥܶܠܕܒܳܒܳܐ܆ ܘܢܶܗܘܶܐ ܠܗܽܘܢ ܚܳܬܡܳܐ ܕܺܝܠܳܟ ܩܰܕܺܝܫܳܐ ܡܙܰܗܪܳܢܳܐ ܘܰܡܢܰܛܪܳܢܳܐ܆ ܘܰܒܝܰܕ ܟܽܠܗܶܝܢ ܛܳܒ̈ܳܬܳܐ ܢܶܬܥܰܠܡܽܘܢ ܘܢܶܙܟܽܘܢ ܠܒܺܝ̈ܫܳܬܳܐ܆ ܘܢܶܬܢܰܩܦܽܘܢ ܠܦܽܘ̈ܩܕܳܢܶܐ ܕܺܝܠܳܟ ܐܰܠܳܗܳܝ̈ܶܐ܆ ܘܢܰܣܩܽܘܢ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܠܥܳܠܡܺܝܢ܀

ܩܶܪܝܳܢܳܐ ܡܶܢ ܐܶܓܪ̈ܳܬܳܐ ܕܦܰܘܠܳܘܣ ܫܠܺܝܚܳܐ

ܙܽܘܡܳܪܳܐ: ܡܳܐ ܠܳܟ ܝܰܡܳܐ ܕܰܥܪܰܩܬ܆ ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ ܗܰܠܶـܠܽܘܝܰܗ܀

ܡܫܰܡ̈ܫܳܢܶܐ: ܦܰܘܠܽܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ ܕܳܐܡܰܪ: ܕܶܐܢ ܐ̱ܢܳܫ ܢܺܐܬܶܐ ܢܣܰܒܰܪܟܽܘܢ ܠܒܰܪ ܡܶܢ ܡܳܐ ܕܣܰܒܰܪܢܳܟܽܘܢ܆ ܘܶܐܢ ܡܰܠܰܐܟܰܐ ܗ̱ܘ ܡܶܢ ܪܰܘܡܳܐ܆ ܢܶܗܘܶܐ ܡܰܚܪܰܡ ܡܶܢ ܥܺܕܬܳܐ. ܕܗܳܐ ܢܳܒܥܺܝܢ ܠܰܡ ܝܽܘ̈ܠܦܳܢܶܐ ܡܫܰܚ̈ܠܦܶܐ ܡܶܢ ܟܽܠ ܓܰܒܺܝ̈ܢ. ܛܽܘܒ ܠܰܐܝܢܳܐ ܕܰܒܝܽܘܠܦܳܢܶܗ ܕܰܐܠܳܗܳܐ ܫܰܪܺܝ ܘܫܰܠܶܡ܀

ܡܫܰܡ̈ܫܳܢܶܐ: ܡܶܢ ܐܶܓܰܪܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܪ̈ܽܗ̱ܘܡܳܝܶܐ. ܒܰܪܶܟܡܳܪܝ܀

ܩܶܦܰܠܶܐܘܳܢ ܘ: ܐ - ܚ

ܐܰܚ̈ܰܝ: ܡܳܢܳܐ ܗܳܟܺܝܠ ܢܺܐܡܰܪ. ܢܩܰܘܶܐ ܒܳܗ̇ ܒܰܚܛܺܝܬܳܐ܆ ܕܛܰܝܒܽܘܬܳܐ ܬܶܬܝܰܬܰܪܝ. ܚܳܣ. ܐܰܝܠܶܝܢ ܓܶܝܪ ܕܡܺܝܬܢ ܠܰܚܛܺܝܬܳܐ܆ ܐܰܝܟܰܢܳܐ ܢܺܚܶܐ ܒܳܗ̇ ܬܽܘܒ. ܐܰܘ ܠܳܐ ܝܳܕܥܺܝܢ ܐܰܢ̱ܬܽܘܢ ܕܰܐܝܠܶܝܢ ܕܰܥܡܰܕܢ ܒܝܶܫܽܘܥ ܡܫܺܝܚܳܐ܆ ܒܡܰܘܬܶܗܽ ܗ̱ܘ ܥܡܰܕܢ. ܐܶܬܩܒܰܪܢ ܓܶܝܪ ܥܰܡܶܗ ܒܡܰܥܡܽܘܕܺܝܬܳܐ ܠܡܰܘܬܳܐ܆ ܕܰܐܝܟܰܢܳܐ ܕܩܳܡ ܝܶܫܽܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܶܐ ܒܬܶܫܒܽܘܚܬܳܐ ܕܰܐܒܽܘܗ̱ܝ܆ ܗܳܟܰܢܳܐ ܐܳܦ ܚܢܰܢ ܒܚܰܝ̈ܶܐ ܚܰܕ̱̈ܬܶܐ ܢܗܰܠܶܟ. ܐܶܢ ܓܶܝܪ ܐܰܟܚܰܕ ܐܶܬܢܨܶܒܢ ܥܰܡܶܗ ܒܰܕܡܽܘܬܳܐ ܕܡܰܘܬܶܗ܆ ܗܳܟܰܢܳܐ ܐܳܦ ܒܰܩܝܳܡܬܶܗ ܢܶܗܘܶܐ. ܝܳܕܥܺܝܢܰܢ ܓܶܝܪ ܕܒܰܪܢܳܫܰܢ ܥܰܬܺܝܩܳܐ ܐܶܙܕܩܶܦ ܥܰܡܶܗ ܕܢܶܬܒܰܛܰܠ ܦܰܓܪܳܐ ܕܰܚܛܺܝܬܳܐ܆ ܕܬܽܘܒ ܠܳܐ ܢܫܰܡܶܫ ܠܰܚܛܺܝܬܳܐ. ܐܰܝܢܳܐ ܕܡܺܝܬ ܓܶܝܪ܆ ܐܶܬܚܰܪܰܪ ܠܶܗ ܡܶܢ ܚܛܺܝܬܳܐ. ܐܶܢ ܗܳܟܺܝܠ ܡܺܝܬܢ ܥܰܡ ܝܶܫܽܘܥ ܡܫܺܝܚܳܐ܆ ܢܗܰܝܡܶܢ ܕܥܰܡܶܗ ܥܰܡ ܡܫܺܝܚܳܐ ܢܺܚܶܐ܀

ܩܶܪܝܳܢܳܐ ܡܶܢ ܐܶܘܰܢܓܶܠܺـܝـܳܘܢ ܩܰܕܺܝܫܳܐ

ܗܽܘܠܳـܠܳܐ: ܪܽܘܣ ܥܠܰܝ ܒܙܽܘܦܳܟ ܘܶܐܬܕܰܟܶܐ܆ ܘܚܰܠܶـܠܰܝܢܝ ܒܶܗ ܘܡܶܢ ܬܰܠܓܳܐ ܐܶܚܘܰܪ ܗܰܠܶـܠܽܘܝܰܗ܀

ܐܶܘܰܢܓܶܠܺـܝܳܘܢ ܕܡܶܢ ܝܽܘܚܰܢܳܢ

ܩܶܦܰܠܶܐܘܳܢ ܓ: ܐ - ܛ

ܐܺܝܬ ܗ̱ܘܳܐ ܕܶܝܢ ܬܰܡܳܢ ܚܰܕ ܓܰܒܪܳܐ ܡܶܢ ܦܪ̈ܺܝܫܶܐ܆ ܢܺܝܩܳܕܺܡܳܘܣ ܫܡܶܗ ܗ̱ܘܳܐ܆ ܐܰܪܟܽܘܢܳܐ ܕܺܝܗܽܘ̈ܕܳܝܶܐ. ܗܳܢܳܐ ܐܶܬܳܐ ܠܘܳܬ ܝܶܫܽܘܥ ܒܠܺܠܝܳܐ ܘܶܐܡܰܪ ܠܶܗ: ܪܰܒܺܝ܆ ܝܳܕܥܺܝܢܰܢ ܕܡܶܢ ܐܰܠܳܗܳܐ ܐܶܫܬܰܕܰܪܬ ܡܰܠܦܳܢܳܐ. ܠܳܐ ܓܶܝܪ ܐ̱ܢܳܫ ܡܶܫܟܰܚ ܗܳܠܶܝܢ ܐܳܬܘ̈ܳܬܳܐ ܠܡܶܥܒܰܕ ܕܰܐܢ̱ܬ ܥܳܒܶܕ ܐܰܢ̱ܬ܆ ܐܷܠܳܐ ܡܰܢ ܕܰܐܠܳܗܳܐ ܥܰܡܶܗ. ܥܢܳܐ ܝܶܫܽܘܥ ܘܶܐܡܰܪ ܠܶܗ: ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ: ܕܶܐܢ ܐ̱ܢܳܫ ܠܳܐ ܡܶܬܺܝܠܶܕ ܡܶܢ ܕܪܺܝܫ܆ ܠܳܐ ܡܶܫܟܰܚ ܕܢܶܚܙܶܐ ܡܰܠܟܽܘܬܶܗ ܕܰܐܠܳܗܳܐ. ܐܳܡܰܪ ܠܶܗ ܢܺܝܩܳܕܺܡܳܘܣ: ܐܰܝܟܰܢܳܐ ܡܶܫܟܰܚ ܕܢܶܬܝܺܠܶܕ ܓܰܒܪܳܐ ܣܳܒܳܐ. ܕܰܠܡܳܐ ܡܶܫܟܰܚ ܬܽܘܒ ܠܟܰܪܣܳܐ ܕܶܐܡܶܗ ܕܬܰܪ̈ܬܶܝܢ ܙܰܒ̈ܢܺܝܢ ܠܡܶܥܰܠܕ ܘܢܶܬܝܺܠܶܕ. ܥܢܳܐ ܝܶܫܽܘܥ ܘܶܐܡܰܪ ܠܶܗ: ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ܆ ܕܶܐܢ ܐ̱ܢܳܫ ܠܳܐ ܡܶܬܺܝܠܶܕ ܡܶܢ ܡܰܝ̈ܳܐ ܘܪܽܘܚܳܐ܆ ܠܳܐ ܡܶܫܟܰܚ ܕܢܶܥܽܘܠ ܠܡܰܠܟܽܘܬܳܐ ܕܰܐܠܳܗܳܐ. ܡܶܕܶܡ ܕܺܝܠܺܝܕ ܡܶܢ ܒܶܣܪܳܐ ܒܶܣܪܰܐ ܗ̱ܘ܆ ܘܡܶܕܶܡ ܕܺܝܠܺܝܕ ܡܶܢ ܪܽܘܚܳܐ ܪܽܘܚܰܐ ܗ̱ܘ. ܠܳܐ ܬܶܬܕܰܡܰܪ ܕܶܐܡܪܶܬ ܠܳܟ ܕܘܳܠܶܐ ܠܟܽܘܢ ܠܡܶܬܺܝܠܳـܕܽܘ ܡܶܢ ܕܪܺܝܫ. ♱ ܪܽܘܚܳܐ ܐܰܬܰܪ ܕܨܳܒܝܳܐ ܢܳܫܒܳܐ܆ ܘܩܳܠܳـܗ̇ ܫܳܡܰܥ ܐܰܢ̱ܬ: ܐܷܠܳܐ ܠܳܐ ܝܳܕܰܥ ܐܰܢ̱ܬ ܐܰܝܡܶܟܳܐ ܐܳܬܝܳܐ ܘܠܰܐܝܟܳܐ ܐܳܙܳܠܐ̱. ܗܳܟܰܢܳܐ ܐܺܝܬܰܘܗ̱ܝ ܟܽܠܢܳܫ ܕܺܝܠܺܝܕ ܡܶܢ ܪܽܘܚܳܐ. ♱ ܥܢܳܐ ܢܺܝܩܳܕܺܡܳܘܣ ܘܶܐܡܰܪ ܠܶܗ: ܐܰܝܟܰܢܳܐ ܡܶܫܟܚ̈ܳܢ ܗܳܠܝܶܢ ܠܡܶܗܘܳܐ܀

ܘܳܐܡܪܺܝܢ ܡܰܥܢܺܝܬܳܐ:

ܦܶܬܓܳܡܳܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ. ܘܡܶܢ ܚ̈ܛܳܗܰܝ ܕܰܟܳܢܝ. ܠܰܚܛܺܝܬܳܐ ܐܰܝܕܳܐ ܕܣܶܥܪܶܬ ܠܳܐ ܡܨܶܐ ܚܰܝܠܳܐ ܕܙܽܘܦܳܐ ܢܕܰܟܶܝܗ̇. ܐܳܦܠܳܐ ܡܰܝ̈ܳܐ ܢܳܡܽܘ̈ܣܳܝܶܐ ܢܶܡܪܩܽܘܢܳܗ̇ ܛܽܘܦܣܳܢܳܐܺܝܬ. ܐܷܠܳܐ ܪܣܳܣܳܐ ܘܒܽܘܚܪܳܢܳܐ ܕܰܣܚܳܬܳܐ ܐܰܠܳܗܳܝܬܳܐ ܘܥܽܘܬܪܳܐ ܕܪ̈ܰܚܡܰܘܗ̱ܝ ܣܰܓܺܝ̈ܶܐܐ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܨܠܰـܘ̈ܳܬܳܐ ܘܪܽܘܫܡܳܐ

ܟܳܗܢܳܐ: ܨܠܽܘܬܳܐ ܕܥܰܠ ܢܰܦܫܶܗ ܟܰܕ ܓܗܺܝܢ ܠܰܐܦ݁ܰܝ̈ ܡܰܕܢܚܳܐ:

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܕܝܳܕܰܥ ܗܰܘ̈ܢܶܐ ܕܰܒܢܰܝ̈ܢܳܫܳܐ ܘܒܳܨܶܐ ܠܶـܒܰܘ̈ܳܬܳܐ ܘܟܽܘ̈ܠܝܳܬܳܐ܆ ܗܰܘ ܕܟܰܕ ܠܳܐ ܫܳܘܶܐ ܐ̱ܢܳܐ ܩܪܰܝܬܳܢܝ ܠܗܳܕܶܐ ܬܶܫܡܶܫܬܳܐ. ܠܳܐ ܬܶܢܰܕܝ ܠܳܟ ܡܶܢܝ ܡܶܛܽܠ ܚ̈ܛܳܗܰܝ ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܝ܆ ܐܷܠܳܐ ܠܚܺܝ ܟܽܠܗܶܝܢ ܫܽܘܪ̈ܥܳܬܝ ܘܰܐܫܺܝܓ ܨܳܐܬܳܐ ܕܦܰܓܪܝ ܘܟܽܘ̈ܬܡܳܬܳܐ ܕܢܰܦܫܝ ܘܰܡܫܰܡܠܝܳܐܺܝܬ ܩܰܕܶܫܰܝܢܝ܆ ܐܰܝܟܰܢܳܐ ܕܠܳܐ ܟܰܕ ܠܰܐ̱ܚܪ̈ܳܢܶܐ ܢܶܬܺܝܗܶܒ ܫܽܘܒܩܳܢܳܐ ܕܰܚ̈ܛܳܗܶܐ ܡܨܰܠܶܐ ܐ̱ܢܳܐ܆ ܐܶܢܳܐ ܥܰܒܕܳܐ ܡܰܣܠܝܳܐ ܕܰܚܛܺܝܬܳܐ ܐܶܗܘܶܐ. ܠܳܐ ܡܳܪܝ ܢܶܗܦܽܘܟ ܡܶܣܟܺܢܳܐ ܟܰܕ ܒܰܗܺܝܬ܆ ܐܷܠܳܐ ܫܰܕܰܪ ܥܠܰܝ ܪܽܘܚܳܟ ܩܰܕܺܝܫܳܐ ܘܚܰܝܶܠܰܝܢܝ ܠܘܳܬ ܬܶܫܡܶܫܬܳܐ ܕܐ̱ܪܳܙܳܐ ܗܳܢܳܐ ܪܰܒܳܐ ܘܰܫܡܰܝܳܢܳܐ ܕܩܰܕܺܝܡ ܣܺܝܡ܀

ܬܠܳܝܬܳܐ

ܐܰܝܟܰܢܳܐ ܕܗܳܠܶܝܢ ܕܰܗܘܰܘ ܫܘܶܝܢ ܒܢܶܨܒܬܳܐ ܠܰܕܡܽܘܬܶܗ ܕܰܡܫܺܝܚܳܐ ܒܝܰܕ ܥܡܳܕܳܐ܆ ܫܰܘܬܳܦ̈ܶܐ ܐܳܦ ܘܕܰܩܝܳܡܬܶܗ ܢܶܗܘܽܘܢ. ܘܟܰܕ ܢܳܛܪܺܝܢ ܡܰܘܗܰܒܬܳܐ ܕܪܽܘܚܳܟ ܩܰܕܺܝܫܳܐ ܘܰܡܪܰܒܶܝܢ ܠܓܽܘܥܠܳـܢܳܐ ܕܛܰܝܒܽܘܬܳܐ܆ ܢܩܰܒܠܽܘܢ ܟܠܺܝܠܳܐ ܕܙܳܟܽܘܬܳܐ ܕܰܩܪܳܝܬܳܐ ܕܰܠܥܶܠ܆ ܘܢܶܬܡܢܽܘܢ ܒܒܽܘܟܪ̈ܶܐ ܗܳܢܽܘܢ ܕܰܟܬܺܝܒܺܝܢ ܒܰܫܡܰܝܳܐ: ܒܰܡܫܺܝܚܳܐ ܝܶܫܽܘܥ ܡܳܪܰܢ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܥܰܡ ܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܩܽܘܪܝܶܐܠܶܝܣܳܘܢ܀

ܗܳܪܟܳܐ ܟܳܗܢܳܐ ܢܣܺܝܡ ܒܶܣ̈ܡܶܐ ܟܶܢ ܐܳܡܰܪ ܓܗܳܢܬܳܐ

ܝܳܗܽܘܒܳܐ ܕܢܽܘܗܪܳܐ ܘܡܰܢܗܪܳܢܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ܆ ܗܰܘ ܕܶܐܡܰܪ ܕܡܶܢ ܚܶܫܽܘܟܳܐ ܢܽܘܗܪܳܐ ܢܶܕܢܰܚ܆ ܗܰܘ ܕܝܰܗ̱ܒ ܕܽܘܟܳܝܳܐ ܛܽܘܒܬܳܢܳܐ ܒܡܰܝ̈ܳܐ ܦܳܪ̈ܽܘܩܳܝܶܐ܆ ܘܩܽܘܕܳܫܳܐ ܐܰܠܳܗܳܝܳܐ ܒܝܰܕ ܡܫܺܝܚܽܘܬܳܐ ܩܰܕܺܝܫܬܳܐ܆ ܘܰܚܕܳܝܽܘܬܳܐ ܗܳܝ ܕܰܠܘܳܬ ܡܳܪܰܢ ܝܶܫܽܘܥ ܡܫܺܝܚܳܐ ܘܫܰܘܬܳܦܽܘܬܳܐ ܕܦܰܓܪܶܗ ܘܰܕܡܶܗ ܩܰܕܺܝܫܳܐ܆ ܗܰܘ ܕܳܐܦ ܗܳܫܳܐ ܠܥܰܒܕܰܝ̈ܟ ܗܳܠܶܝܢ ܕܒܰܩܪܳܝܬܳܐ ܩܰܕܺܝܫܬܳܐ ܩܪܰܝܬ ܡܶܢ ܚܶܫܽܘܟܳܐ ܕܛܳܥܝܽܘܬܳܐ ܠܺܝܕܰܥܬܳܐ ܕܺܝܠܳܟ ܕܰܫܪܳܪܳܐ. ܐܰܢ̱ܬ ܡܳܪܝܳܐ ܡܪܰܚܡܳܢܳܐ ܟܬܽܘܒ ܫܡܳܗܰܝ̈ܗܽܘܢ ܒܰܟܬܳܒܳܟ ܕܚܰܝ̈ܶܐ܆ ܡܢܺܝ ܐܶܢܽܘܢ ܥܰܡ ܗܳܢܽܘܢ ܕܕܳܚܠܺܝܢ ܠܳܟ܆ ܢܶܬܪܫܶܡ ܒܗܽܘܢ ܢܽܘܗܪܳܐ ܕܦܰܪܨܽܘܦܳܟ܆ ܘܢܶܬܛܰܦܰܣ ܨܠܺܝܒܳܐ ܕܰܡܫܺܝܚܳܐ ܕܺܝܠܳܟ ܒܠܶـܒܰܘ̈ܳܬܗܽܘܢ ܘܡܰܚܫ̈ܒܳܬܗܽܘܢ܆ ܐܰܝܟܰܢܳܐ ܕܢܶܥܪܩܽܘܢ ܡܶܢ ܣܪ̈ܺܝܩܳܬܶܗ ܕܥܳܠܡܳܐ ܗܳܢܳܐ ܘܡܶܢ ܟܽܠܳـܗ̇ ܒܺܝܫܽܘܬܳܐ ܕܰܒܥܶܠܕܒܳܒܳܐ܆ ܘܢܶܪܕܽܘܢ ܒܦܽܘ̈ܩܕܳܢܰܝܟ ܩܰܕܺܝ̈ܫܶܐ܀

ܬܠܳܝܬܳܐ

ܗܰܒ ܠܗܽܘܢ ܡܳܪܝܳܐ ܡܰܦܽܘܚܺܝܬܳܐ ܕܺܝܠܳܟ ܩܰܕܺܝܫܬܳܐ܆ ܗܳܝ ܕܰܢܦܰܚ ܝܺܚܺܝܕܳܝܳܐ ܕܺܝܠܳܟ ܒܪܳܐ ܒܬܰܠܡܺܝ̈ܕܶܐ ܕܺܝܠܶܗ ♱ (ܘܢܳܦܰܚ ܒܰܐܦܰܝ̈ ܡܶܬܥܰܡ̈ܕܳܢܶܐ ܨܠܺܝܒܳܐܝܬ) ܘܟܽܠ ܫܰܪܟܳܢܳܐ ܕܦܽܘܠܚܳܢ ܦܬܰܟܪ̈ܶܐ ܐܰܪܚܶܩ ܡܶܢ ܬܰܪ̈ܥܝܳܬܗܽܘܢ܆ ܟܰܕ ܡܛܰܝܶܒ ܐܰܢ̱ܬ ܠܗܽܘܢ ܠܰܡܩܰܒܠܳـܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ♱. ܘܰܕܢܶܫܬܘܶܐ ܠܰܣܚܳܬܳܐ ܕܡܰܘܠܳـܕܳܐ ܕܡܶܢܕܪܺܝܫ ♱. ܐܰܫܘܳܐ ܐܶܢܽܘܢ ܘܰܠܫܽܘܒܩܳܢܳܐ ܕܺܝܠܗܽܘܢ ܕܒܺܐܝ̈ܕܰܘܗ̱ܝ ܕܺܝܠܶܗ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܝܰܐ܆ ܗܳܫܳܐ ܘܰܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܠܳـܒܶܟ ܡܫܰܡܫܳܢܳܐ ܠܪܺܝܫܶܗ ܕܡܶܬܥܰܡܕܳܢܳܐ ܘܳܐܡܰܪ: ܒܰܪܶܟܡܳܪܝ܀

ܘܟܳܗܢܳܐ ܚܳܬܶܡ ܠܶܗ ܠܡܶܬܥܰܡܕܳܢܳܐ ܒܶܝܬ ܥܰܝܢܰܘ̈ܗ̱ܝ ܬܠܳـܬܳܐ ܨܠܺܝܒ̈ܶܐ ܕܠܳܐ ܡܶܫܚܳܐ ܟܰܕ ܐܳܡܰܪ:

ܡܶܬܚܬܶܡ (ܦܠܳܢ) ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܚܰܝܳܐ ܘܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܩܽܘܪܝܶܐܠܶܝܣܳܘܢ܀

ܡܰܘܡܝܳܢܽܘܬܳܐ

ܡܫܰܡ̈ܫܳܢܶܐ ܡܰܫܠܚܺܝܢ ܠܗܽܘܢ ܡܳܐܢܰܝ̈ܗܽܘܢ ܘܚܶܫ̈ܠܳـܬܳܐ ܘܰܣܛܰܪ ܘܰܡܩܰܪܒܺܝܢ ܠܗܽܘܢ܆ ܟܰܕ ܐܰܦܰܝ̈ܗܽܘܢ ܕܡܶܬܥܰܡ̈ܕܳܢܶܐ ܠܡܰܕܢܚܳܐ ܘܟܳܗܢܳܐ ܠܡܰܥܪܒܳܐ

ܓܗܳܢܬܳܐ

ܠܳܟ ܩܳܪܶܐ ܐ̱ܢܳܐ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ ܒܝܰܕ ܝܺܚܺܝܕܳܝܳܐ ܒܪܳܐ܆ ܡܳܪܝܳܐ ܕܶܝܢ ܕܺܝܠܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܠܘܳܬ ܛܪܽܘܕܝܳܐ ܕܟܽܠ ܪܽܘܚܳܐ ܒܺܝܫܬܳܐ ܘܰܕܚܽܘܩܝܳܐ ܕܟܽܠ ܡܰܥܒܕܳܢܽܘܬܳܐ ܣܰܩܽܘܒܠܳܝܬܳܐ ܘܕܰܡܛܰܫܝܳܐ܆ ܐܰܝܟܰܢܳܐ ܕܰܒܡܰܓܢܳܢܽܘܬܳܐ ܕܪܽܘܚܳܟ ܩܰܕܺܝܫܳܐ ܕܰܟܝܳܐܺܝܬ ܢܩܰܒ̈ܠܳܢ ܢܰܦܫ̈ܳܬܳܐ ܗܳܠܶܝܢ ܕܡܶܬܩܰܪ̈ܒܳܢ ܠܳܟ. ܐܶܬܓܠܰܝ ܡܳܪܝܳܐ ܘܚܰܝܶܠ ܠܡܶܠܬܳܐ ܕܗܰܝܡܳܢܽܘܬܳܐ܆ ܗܳܝ ܕܰܡܡܰܠܠܺܝܢܰܢ ܒܰܫܡܳܐ ܕܰܡܫܺܝܚܳܐ ܕܺܝܠܳܟ܆ ܐܰܝܟܰܢܳܐ ܕܠܳܐ ܒܣܶܦ̈ܘܳܬܳܐ ܣܪ̈ܺܝܩܳܬܳܐ ܢܡܰܠܶܠ܆ ܐܷܠܳܐ ܒܛܰܝܒܽܘܬܳܐ ܕܺܝܠܳܟ ܘܰܒܚܰܝܠܳܐ ܕܺܝܠܳܟ܆ ܗܰܘ ܕܰܡܫܰܘܙܶܒ ܠܥܳܠܡܳܐ ܡܶܢ ܒܺܝܫܳܐ܀

ܬܠܳܝܬܳܐ

ܡܶܛܽܠ ܕܰܐܢ̱ܬ ܡܰܡܠܶܟ ܐܰܢ̱ܬ ܥܠܰܝܢ܆ ܐܰܠܳܗܳܐ ܐܰܒܳܐ ܘܺܝܚܺܝܕܳܝܳܐ ܒܪܳܐ ܕܺܝܠܳܟ ܘܪܽܘܚܳܟ ܩܰܕܺܝܫܳܐ܆ ܘܠܳܟ ܫܽܘܒܚܳܐ ܡܰܣܩܺܝܢܰܢ ܗܳܫܳܐ ܘܰܠܥܳܠܡܺܝܢ܀

ܟܳܗܢܳܐ ܐܳܡܰܪ ܡܰܘܡܝܳܢܽܘܬܳܐ ܗܳܕܶܐ܆ ܟܰܕ ܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܐܰܦܰܘ̈ܗ̱ܝ ܕܡܶܬܥܰܡܕܳܢܳܐ:

ܠܳܟ ܩܳܪܶܐ ܐ̱ܢܳܐ ܡܳܪܝܳܐ ܐܰܠܳܗܰܢ܆ ܠܗܰܘ ܒܳܪܽܘܝܳܐ ܕܟܽܠܳـܗ̇ ܒܪܺܝܬܳܐ ܡܶܬܚܰܙܝܳܢܺܝܬܳܐ ܘܠܳܐ ܡܶܬܚܰܙܝܳܢܺܝܬܳܐ܆ ܟܰܕ ܣܳܝܡܺܝܢܰܢ ܐܺܝܕܳܐ ܥܰܠ ܓܒܺܝܠܬܳܐ ܕܺܝܠܳܟ ܗܳܕܶܐ܆ ܘܚܳܬܡܺܝܢܰܢ ܒܰܫܡܳܐ ܕܺܝܠܳܟ ܩܰܕܺܝܫ ܒܟܽܠ܆ ܘܙܳܓܪܺܝܢܰܢ ܠܟܽܠ ܫܺܐܕܳܐ ܘܪܽܘܚܳܐ ܒܺܝܫܬܳܐ ܘܛܰܢܦܬܳܐ܆ ܐܰܝܟܰܢܳܐ ܕܢܶܪܚܩܽܘܢ ܡܶܢ ܓܒܺܝܠܬܳܐ ܕܺܝܠܳܟ ܘܡܶܢ ܥܒܳܕܳܐ ܕܺܐܝ̈ܕܰܝܟ ܩܰܕܺܝ̈ܫܳܬܳܐ. ܫܡܰܥ ܠܰܢ ܡܳܪܝ ܘܟܺܐܝ ܒܗܽܘܢ ܘܕܰܟܳܐ ܠܥܰܒܕܰܝ̈ܟ ܗܳܠܶܝܢ ܡܶܢ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ.

ܐ: ܫܡܰܥ ܕܶܝܢ ܐܰܢ̱ܬ ܡܥܰܩܡܳܐ ܘܡܳܪܽܘܕܳܐ ܗܰܘ ܡܰܢ ܕܺܐܝܬܰܝܟ ܕܡܰܠܶܙ ܐܰܢ̱ܬ ܠܗܳܕܶܐ ܓܒܺܝܠܬܳܐ ܕܰܐܠܳܗܳܐ ♱

ܒ: ܡܰܘܡܶܐ ܐ̱ܢܳܐ ܠܳܟ ܒܥܶܠܕܒܳܒܳܐ ܕܟܺܐܢܽܘܬܳܐ ܘܥܳܒܽܘܪܳܐ ܕܢܳܡܽܘ̈ܣܶܐ ܐܰܠܳܗܳܝ̈ܶܐ ܘܩܰܕܺܝ̈ܫܶܐ܆ ܒܬܶܫܒܽܘܚܬܳܐ ܕܡܰܠܟܳܐ ܪܰܒܳܐ. ܫܰܢܳܐ ܒܕܶܚܠܬܳܐ ܘܶܐܫܬܰܥܒܰܕ ܠܡܳܪܳܐ ܕܚܺܝܠܳܐ܆ ܗܰܘ ܕܰܒܦܽܘܩܕܳܢܶܗ ܐܰܪܥܳܐ ܥܰܠ ܡܰܝ̈ܳܐ ܣܺܝܡܳܐ ܘܰܡܫܰܪܪܳܐ܆ ܘܚܳܠܳܐ ܬܚܽܘܡܳܐ ܠܝܰܡܳܐ ܣܳܡ ♱

ܓ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܟܽܠ ܫܽܘܠܛܳܢܳܐ ܐܺܝܬ ܠܶܗ ܒܰܫܡܰܝܳܐ ܘܥܰܠ ܐܰܪܥܳܐ܆ ܒܗܰܘ ܕܟܽܠ ܡܶܕܶܡ ܒܶܗ ܐܶܬܒܪܺܝ ܘܡܶܬܢܛܰܪ܆ ܒܗܰܘ ܕܗܳܠܶܝܢ ܫܡܰܝܳܢ̈ܶܐ ܩܳܝܡܺܝܢ ܘܗܳܠܶܝܢ ܕܥܰܠ ܐܰܪܥܳܐ ܡܶܬܚܰܝܠܺܝܢ ♱

ܕ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܰܠܠܶـܓܝܽܘܢ ܕܫܺܐܕ̈ܶܐ ܠܰܬܗܽܘܡܳܐ ܒܝܰܕ ܚܙܺܝܪ̈ܶܐ ܫܰܕܰܪ܆ ܠܦܶܪܥܽܘܢ ܕܶܝܢ ܝܰܩܺܝܪ ܠܶـܒܳܐ ܡܛܰܒܥܳܐ ܥܰܡ ܡܰܪ̈ܟܒܳܬܳܐ ܘܦܰܪ̈ܳܫܶܐ ܕܺܝܠܶܗ ܥܒܰܕ ♱

ܗ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܰܠܪܽܘܚܳܐ ܚܰܪܫܳܐ ܘܰܕܠܳܐ ܡܰܡܠ̱ـܠܳܐ ܥܰܡ ܚܰܝܠܳܐ ܘܫܽܘܠܛܳܢܳܐ ܐܰܠܳܗܳܝܳܐ ܐܶܡܰܪ: ܕܦܽܘܩ ܡܶܢ ܗܳܢܳܐ ܒܰܪܢܳܫܳܐ ܘܠܳܐ ܬܽܘܒ ܬܶܥܽܘܠ ܠܶܗ ♱

ܘ: ܕܚܰܠ ܡܶܢ ܫܡܳܐ ܕܚܺܝܠܳܐ ܕܰܐܠܳܗܳܐ܆ ܡܶܢ ܗܰܘ ܕܟܽܠܳـܗ̇ ܒܪܺܝܬܳܐ ܕܡܰܠܰܐܟ̈ܶܐ ܘܪ̈ܺܝܫܰܝ ܡܰܠܰܐܟ̈ܶܐ ܪܳܬܳܐ܆ ܗܰܘ ܕܰܩܕܳܡܰܘܗ̱ܝ ܟܽܠ ܚܰܝ̈ܠܶܐ ܘܰܡܫܰܡ̈ܫܳܢܶܐ ܥܰܡ ܕܶܚܠܬܳܐ ܩܳܝܡܺܝܢ܆ ܠܘܳܬ ܗܰܘ ܕܠܳܐ ܟܪ̈ܽܘܒܶܐ ܐܳܦܠܳܐ ܣܪ̈ܳܦܶܐ ܕܰܢܚܽܘܪܽܘܢ ܒܶܗ ܣܳܟ ܡܰܡܪܚܺܝܢ܆ ܗܰܘ ܕܙܳܝܥܺܝܢ ܡܶܢܶܗ ܫܡܰܝܳܢ̈ܶܐ ܘܪܳܬܺܝܢ ܡܶܢܶܗ ܬܗܽܘ̈ܡܶܐ ♱

ܙ: ܕܚܰܠ ܡܶܢ ܫܡܳܐ ܕܚܺܝܠܳܐ܆ ܗܰܘ ܕܰܠܡܳܪܽܘܕܳܐ ܩܰܕܡܳܝܳܐ ܒܫܺܫ̈ܠܳـܬܳܐ ܕܚܶܫܽܘܟܳܐ ܠܰܬܗܽܘܡܳܐ ܫܰܕܰܪ ♱

ܚ: ܕܚܰܠ ܡܶܢ ܕܺܝܢܳܐ ܕܰܥܬܺܝܕ ܘܙܽܘܥ ܘܫܰܢܳܐ. ܠܰܓܒܺܝܠܬܳܐ ܕܰܐܠܳܗܳܐ ܠܳܐ ܬܶܬܩܰܪܰܒ. ܠܰܓܒܺܝܠܬܳܐ ܕܰܐܠܳܗܳܐ ܠܳܐ ܬܰܒܶܐܫ. ܒܰܓܒܺܝܠܬܳܐ ܕܰܐܠܳܗܳܐ ܠܳܐ ܬܶܥܡܰܪ. ܠܳܐ ܓܶܝܪ ܐܺܝܬܶܝܗ̇ ܒܶܝܬ ܡܰܥܡܪܳܐ ܕܫܺܐܕ̈ܶܐ܆ ܐܷܠܳܐ ܗܰܝܟܠܳܐ ܘܒܶܝܬ ܡܰܥܡܪܳܐ ܕܰܐܠܳܗܳܐ ܚܰܝܳܐ. ܗܽܘ ܓܶܝܪ ܐܶܡܰܪ: ܕܶܐܥܡܰܪ ܒܗܽܘܢ ܘܶܐܗܰܠܶܟ ܒܗܽܘܢ܆ ܘܶܐܗܘܶܐ ܠܗܽܘܢ ܐܰܠܳܗܳܐ ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ. ܠܳܟ ܕܶܝܢ ܣܳܡܳܟ ܢܕܺܝܕܳܐ ܘܨܰܕܝܳܐ ܘܡܶܐܟܽܘܠܬܳܐ ܠܢܽܘܪܳܐ ♱

ܛ: ܡܰܘܡܶܐ ܐ̱ܢܳܐ ܠܳܟ ܒܰܐܠܳـܗܳܐ ܗܰܘ ܙܰܟܳܝܳܐ ܘܩܰܕܺܝܫܳܐ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܐܶܬܪܰܚܩ ܡܶܢ ܥܰܒ̈ܕܰܘܗ̱ܝ ܕܰܐܠܳܗܳܐ ܘܫܰܢܳܐ ܠܰܐܪܥܳܐ ܠܳܐ ܡܶܬܗܰܠܟܳܢܺܝܬܳܐ ܘܰܕܠܳܐ ܡܰܝ̈ܳܐ܆ ܡܶܛܽܠ ܕܬܰܡܳܢ ܐܺܝܬܶܝܗ̇ ܕܽܘܟܬܳܐ ܕܺܝܠܳܟ ♱

ܐܶܬܥܰܩܪ ܘܶܐܬܛܰܠܩ. ܫܰܢܳܐ ܠܺܝܛܳܐ ܡܶܢ ܓܒܺܝܠܬܳܐ ܕܰܐܠܳܗܳܐ܆ ܪܽܘܚܳܐ ܛܰܢܦܳܐ܆ ܪܽܘܚܳܐ ܕܛܳܥܝܽܘܬܳܐ܆ ܡܶܐܟܽܘܠܬܳܐ ܕܢܽܘܪܳܐ. ܐܶܣܬܰܪܗܰܒ ܘܠܳܐ ܬܶܥܨܶܐ. ܡܶܥܩܰܪ ܓܶܝܪ ܢܶܥܩܪܳܟ ܐܰܠܳܗܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܟܰܕ ܡܶܢ ܟܽܠܳـܗ̇ ܓܒܺܝܠܬܶܗ ܛܳܪܶܕ ܠܳܟ܆ ܘܰܡܛܰܠܶܩ ܘܰܡܫܰܢܶܩ ܠܳܟ ܒܢܽܘܪܳܐ ܕܠܳܐ ܕܳܥܟܳܐ. ܠܗܳܢܳܐ ܕܶܝܢ ܥܒܳܕܳܐ ܕܺܐܝܕܰܘ̈ܗ̱ܝ ܡܫܰܘܙܶܒ ܥܕܰܡܳܐ ܠܝܰܘܡܳܐ ܕܦܽܘܪܩܳܢܳܐ܆ ܡܶܛܽܠ ܕܕܺܝܠܶـܗܽ ܗ̱ܘ ܚܰܝܠܳܐ ܘܽܐܘܚܕܳܢܳܐ ܘܫܽܘܠܛܳܢܳܐ܆ ܘܠܶܗ ܬܶܫܒܽܘܚܬܳܐ ܡܰܣܩܺܝܢܰܢ܆ ܗܳܫܳܐ ܘܰܠܥܳܠܰܡ ܥܳܠܡܺܝܢ܀

ܨܠܽܘܬܳܐ ܩܦܺܝܣܬܳܐ ܕܡܰܘܡܝܳܢܘܬܳܐ:

ܒܰܫܡܳܟ ܡܳܪܝܳܐ ܐܰܠܳܗܳܐ ܚܳܬܶܡ ܐ̱ܢܳܐ ܘܛܳܪܶܕ ܐ̱ܢܳܐ ܠܟܽܠ ܪܽܘܚܳܐ ܒܺܝܫܬܳܐ ܘܛܰܢܦܬܳܐ ܡܶܢ ܓܒܝܺܠܬܳܐ ܘܰܥܒܳܕܳܐ ܕܺܐܝ̈ܕܰܝܟ. ܟܺܐܝ ♱ ♱ ♱ ܒܰܡܥܰܩܡܳܐ ܘܡܳܪܽܘܕܳܐ ܘܕܰܟܳܐ ܠܥܰܒܕܰܝ̈ܟ ܡܶܢ ܪ̈ܽܘܚܶܐ ܕܛܳܥܝܽܘܬܳܐ. ܕܚܰܠ ♱ ♱ ♱ ܡܶܢ ܕܺܝܢܳܐ ܕܰܥܬܺܝܕ܆ ܐܳܘ ܪܽܘܚܳܐ ܛܰܢܦܳܐ܆ ܘܠܰܓܒܝܺܠܬܳܐ ܕܰܐܠܳܗܳܐ ܠܳܐ ܬܶܬܩܰܪܰܒ. ܠܳܐ ܓܶܝܪ ܐܺܝܬܶܝܗ̇ ܒܶܝܬ ܡܰܥܡܪܳܐ ܕܫܺܐܕ̈ܶܐ܆ ܐܷܠܳܐ ܗܰܝܟܠܳܐ ܗ̱ܝ ܕܰܐܠܳܗܳܐ. ܡܰܘܡܶܐ ܐ̱ܢܳܐ ܠܳܟ ♱ ♱ ♱ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܐܶܬܥܰܩܪ ܘܶܐܬܛܰܠܩ ܘܶܐܣܬܰܪܗܰܒ ܘܠܳܐ ܬܶܥܨܶܐ܆ ܪܽܘܚܳܐ ܛܰܢܦܳܐ܀

ܟܦܽܘܪܝܳܐ ܕܰܒܣܳܛܳܢܳܐ

ܘܦܳܢܶܐ ܡܶܬܥܰܡܕܳܢܳܐ ܐܰܦܰܘ̈ܗ̱ܝ ܠܡܰܥܪܒܳܐ ܘܰܐܦܰܘ̈ܗ̱ܝ ܕܟܳܗܢܳܐ ܠܡܰܕܢܚܳܐ܆ ܘܡܰܟܦܰܪ ܠܶܗ ܒܣܳܛܳܢܳܐ ܬܠܳܬ ܙܰܒ̈ܢܺܝܢ. ܘܠܳـܒܶܟ ܥܰܪܳܒܳܐ ܒܺܐܝܕܶܗ ܕܣܶܡܳܠܳܐ ܐܺܝܕܶܗ ܕܣܶܡܳܠܳܐ ܕܡܶܬܥܰܡܕܳܢܳܐ ܘܳܐܡܰܪ ܚܠܳـܦܰܘܗ̱ܝ ܗܳܟܰܢܳܐ:

ܟܳܦܰܪ ܐ̱ܢܳܐ ܐܶܢܳܐ (ܦܠܳܢ) ܒܣܳܛܳܢܳܐ ܘܰܒܟܽܠܗܽܘܢ ܥܒܳܕܰܘ̈ܗ̱ܝ ܘܰܒܟܽܠܳـܗ̇ ܦܳܠܚܽܘܬܶܗ ܘܰܒܟܽܠܳـܗ̇ ܕܶܚܠܬܶܗ ܘܰܒܟܽܠܳـܗ̇ ܡܶܙܕܰܝܚܳܢܽܘܬܶܗ ܘܰܒܟܽܠܳـܗ̇ ܛܳܥܝܽܘܬܶܗ ܥܳܠܡܳܢܳܝܬܳܐ ܘܰܒܟܽܠ ܕܫܳܠܶܡ ܠܶܗ ܘܳܐܙܶܠ ܒܳܬܪܶܗ܀

ܡܰܘܕܝܳܢܽܘܬܳܐ ܕܒܰܡܫܺܝܚܳܐ

ܘܦܳܢܶܐ ܡܶܬܥܰܡܕܳܢܳܐ ܠܡܰܕܢܚܳܐ ܘܟܳܗܢܳܐ ܠܡܰܥܪܒܳܐ܆ ܘܠܳـܒܶܟ ܥܰܪܳܒܳܐ ܒܺܐܝܕܶܗ ܕܝܰܡܺܝܢܳܐ ܐܺܝܕܶܗ ܕܝܰܡܺܝܢܳܐ ܕܡܶܬܥܰܡܕܳܢܳܐ ܘܳܐܡܰܪ ܚܠܳـܦܰܘܗ̱ܝ ܡܰܘܕܝܳܢܽܘܬܳܐ ܗܳܕܶܐ ܬܠܳܬ ܙܰܒ̈ܢܺܝܢ:

ܫܳܠܶܡ ܐ̱ܢܳܐ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܐܶܢܳܐ (ܦܠܳܢ) ܘܰܠܟܽܠܶܗ ܝܽܘܠܦܳܢܳܐ ܕܶܐܬܓܥܶܠ ܡܶܢܳܟ ܐܰܠܳܗܳܐܺܝܬ ܒܝܰܕ ܢܒܺܝ̈ܶܐ ܘܰܫܠܺـܝ̈ܚܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ. ܡܰܘܕܶܐ ܐ̱ܢܳܐ ܘܰܡܗܰܝܡܶܢ ܐ̱ܢܳܐ ܘܥܳܡܶܕ ܐ̱ܢܳܐ ܒܳܟ ܘܒܰܐܒܽܘܟ ܘܰܒܪܽܘܚܳܟ ܚܰܝܳܐ ܩܰܕܺܝܫܳܐ܀

ܘܟܳܗܢܳܐ ܐܳܡܰܪ ܘܥܳܢܶܐ ܥܰܪܳܒܳܐ ܒܳܬܪܶܗ ܗܳܟܰܢܳܐ ܬܠܳܬ ܙܰܒ̈ܢܺܝܢ:

ܠܡܰܥܪܒܳܐ:

ܟܶܦܪܶܬ ܒܣܳܛܳܢܳܐ...

ܟܶܢ ܠܡܰܕܢܚܳܐ:

...ܘܰܐܘܕܺܝܬ ܒܰܡܫܺܝܚܳܐ ܐܰܠܳܗܰܢ.

ܘܡܶܚܕܳܐ ܟܳܗܢܳܐ ܐܳܡܰܪ:

ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܘܽܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ. ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ. ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ. ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚ̈ܛܳܗܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀ ܣ‍ܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܘܦܳܢܶܐ ܟܳܗܢܳܐ ܠܡܰܕܢܚܳܐ ܘܰܡܨܰܠܶܐ ܟܰܕ ܦܫܺܝܛ:

ܡܰܘܕܶܝܢܰܢ ܠܳܟ ܡܳܪܝܳܐ܆ ܥܰܠ ܐܰܦܰܝ̈ ܗܳܝ ܕܰܐܫܘܺܝܬ݁ ܠܥܰܒܕܰܝ̈ܟ ܕܢܶܬܩܰܪܒܽܘܢ ܠܰܥܡܳܕܳܐ ܩܰܕܺܝܫܳܐ ܘܰܕܢܶܟܦܪܽܘܢ ܡܰܢ ܒܒܺܝܫܳܐ. ܢܶܫܠܡܽܘܢ ܕܶܝܢ ܠܰܘ ܠܒܶܣܪܳܐ ܘܰܕܡܳܐ܆ ܐܷܠܳܐ ܠܛܰܝܒܽܘܬܳܐ ܕܺܝܠܳܟ ܘܰܠܪܶܚܡܰܬ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܟ܆ ܡܳܪܝܳܐ ܕܶܝܢ ܕܺܝܠܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ. ܐܶܨܛܒܰܝ ܕܶܝܢ ܡܳܪܝܳܐ ܕܰܬܫܰܕܰܪ ܥܠܰܝܗܽܘܢ ܪܽܘܚܳܟ ܩܰܕܺܝܫܳܐ܆ ܘܰܐܓܶܢ ܘܰܒܨܺܝ ܟܽܠܗܽܘܢ ܗܰܕܳܡܰܝ̈ܗܽܘܢ ܘܩܰܕܶܡ ܕܰܟܳܐ ܘܩܰܕܶܫ ܐܶܢܽܘܢ܆ ܐܰܝܟܰܢܳܐ ܕܢܶܫܬܘܽܘܢ ܠܰܡܫܺܝܚܽܘܬܳܐ ܩܰܕܺܝܫܬܳܐ ܘܰܠܗܰܝܡܳܢܽܘܬܳܐ ܡܫܰܡܠܰܝܬܳܐ ܒܶܗ ܒܰܡܫܺܝܚܳܐ ܝܶܫܽܘܥ ܡܳܪܰܢ܆ ܕܥܰܡܶܗ ܡܒܰܪܟܳܐ ܐܺܝܬܰܝܟ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ܆ ܗܳܫܳܐ ܘܰܠܥܳܠܡܺܝܢ܀

ܫܶܠܡܰܬ ܬܶܫܡܶܫܬܳܐ ܩܰܕܡܳܝܬܳܐ