ܬܶܫܡܶܫܬܳܐ ܩܰܕܡܳܝܬܳܐ
ܕܡܶܬܰܐܡܪܳܐ ܥܰܠ ܡܶܬܬܰܪ̈ܬܝܳܢܝܳܬܳܐ

ܨܠܽܘܬ݂ܐ ܕܫܽܘܪܳܝܳܐ

ܒܬܶܫܡܶܫܬܳܐ ܩܰܕܡܳܝܬܳܐ ܟܳܗܢܳܐ ܠܳܐ ܦܳܫܶܛ ܐܺܝ̈ܕܰܘܗ̱ܝ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚ̈ܰܛܳܝܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܕܥܰܡ ܕܰܟܝܽܘܬܳܐ ܘܩܰܕܺܝܫܽܘܬܳܐ ܢܶܬܩܰܪܰܒ ܠܘܳܬ ܐ̱ܪ̈ܳܙܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ ܕܣܳܝܽܘܡܽܘܬ ܒ̈ܢܰܝܳܐ ܕܠܳܐ ܡܶܬܚܰܒܠܳـܢܽܘܬܳܐ. ܘܢܶܫܬܘܶܐ ܠܚܰܕܽܘܬܳܐ ܠܳܐ ܡܶܫܬܰܪܝܳܢܺܝܬܳܐ ܘܰܠܒܽܘܣܳܡܳܐ ܕܥܰܡܳܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܒܰܥܡܳܕܳܐ ܕܺܝܠܳܟ ܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܕܰܡܕܰܟܝܳܐ ܠܰܢ ܡܶܢ ܣܰܢ̈ܝܳܬܳܐ ܕܰܚܛܺܝܬܳܐ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐܰܢ̱ܬ ܡܳܪܝ ܕܺܐܝܬܰܝܟ ܨܶܡܚܳܐ ܕܢܽܘܗܪܳܐ ܕܰܕܢܰܚ ܡܶܢ ܐܰܒܳܐ܆ ܐܰܕܢܰܚ ܢܽܘܗܪܳܟ ܒܠܶـܒܰܘ̈ܳܬܳܐ ܕܣܳܓܽܘ̈ܕܰܝܟ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܫܘ̄ܒ: ܫܽܘܒܚܳܐ ܠܰܐܒܳܐ ܕܓܰܒܠܰܢ܆ ܘܠܰܒܪܳܐ ܕܦܰܪܩܰܢ܆ ܒܰܥܡܳܕܶܗ ܘܰܠܪܽܘܚ ܩܽܘܕܫܳܐ ܕܗܽܘ ܡܢܰܚܶܡ ܠܰܢ ܡܶܢ ܥܰܦܪܳܐ. ܐܰܠܳܗܳܐ ܐܶܬܪܰܚܰܡܥܠܰܝܢ܀

ܡܙܡܘܪܐ܆ ܩܳܠܳܐ: ܩܽܘܩܠܺܝܳܘܢ

ܐܰܒܰܥ ܠܶܒܝ ܦܶܬܓ̈ܳܡܶܐ ܛܳܒ̈ܶܐ ܗ̄ ܘܺܐܡܰܪ ܥܒܳܕܰܝ̈ ܠܡܰܠܟܳܐ܀

ܘܢܰܘܒܠܽܘܢ ܒܬܽܘ̈ܠܳـܬܳܐ ܚܰܒܪ̈ܳܬܳܗ̇ ܒܳܬܪܳܗ̇ ܗ̄ ܢܺܐܙ̈ܳܠ̱ܢ ܒܚܰܕܽܘܬܳܐ ܘܰܒܒܰܣܺܝܡܽܘܬܳܐ܀

ܘܢܶܥ̈ܠܳܢ ܠܗܰܝܟܠܶܗ ܕܡܰܠܟܳܐ ܗ̄ ܚܠܳܦ ܐܰܒܳܗܰܝ̈ܟܝ ܢܶܗܘܽܘܢ ܒܢܰܝ̈ܟܝ܀

ܨܠܽܘܬܳܐ

ܟܳܗܢܳܐ: ܡܳܪܝܳܐ ܐܰܠܳܗܳܐ ܕܚܰܝ̈ܠܰـܘܳܬܳܐ ܩܰܕܺܝ̈ܫܶܐ܆ ܒܰܪܶܟ ܠܰܐܡܗ̈ܳܬܳܟ ܗܳܠܶܝܢ ܕܡܶܬܬܰܪ̈ܬܝܳܢ ܘܗܰܒ ܠܗܶܝܢ ܙܗܺܝܪܽܘܬܳܐ ܕܡ̈ܶܠܶܐ ܕܢܶܕ̈ܥܳܢ ܡܶܛܽܠ ܐܰܝܠܶܝܢ ܕܡܶܬܬܰܪ̈ܬܝܳܢ. ܟܬܽܘܒ ܕܶܚܠܬܳܟ ܒܠܶـܒܰܘ̈ܳܬܗܶܝܢ. ܦܬܰܚ ܥܰܝ̈ܢܶܐ ܕܬܰܪ̈ܥܝܳܬܗܶܝܢ ܠܘܳܬ ܗܳܝ ܕܢܶܕ̈ܥܳܢ ܣܪܺܝܩܽܘܬܶܗ ܕܥܳܠܡܳܐ܆ ܐܰܝܟܰܢܳܐ ܕܟܰܕ ܫܳܕ̈ܝܳܢ ܡܶܢܗܶܝܢ ܒܺܝܫܽܘܬܳܐ ܘܰܪ̈ܓܺܝܓܳܬܳܐ ܥܳܠܡܳܢܳܝ̈ܳܬܳܐ. ܢܶܫܬܰܘ̈ܝܳܢ ܠܺܝܠܺܝܕܽܘܬܳܐ ܕܡܶܢ ܕܪܺܝܫ ܗܳܝ ܕܡܶܢ ܠܥܶܠ ܗܳܝ ܕܰܒܝܰܕ ܡܰܝ̈ܳܐ ܘܪܽܘܚܳܐ. ܠܗܳܝ ܕܢܶܗܘ̈ܝܳܢ ܢܩܰܘ̈ܳܬܳܐ ܕܪܳܥܝܳܐ ܗܰܘ ܫܰܪܺܝܪܳܐ܆ ܕܰܛܒܺܝ̈ܥܳܢ ܒܛܰܒܥܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ. ܗܰܕܳܡ̈ܶܐ ܡܝܰܩܪ̈ܶܐ ܒܓܽܘܫܡܳܐ ܕܥܺܕܬܳܐ ܕܺܝܠܳܟ ܩܰܕܺܝܫܬܳܐ. ܐܰܝܟܰܢܳܐ ܕܢܶܫܬܰܘ̈ܝܳܢ ܠܣܰܒܪܳܐ ܛܽܘܒܬܳܢܳܐ ܘܰܠܕܶܢܚܳܐ ܕܰܐܠܳܗܰܢ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܠܪܽܘܚܳܐ ܩܰܕܺܝܫܳܐ܀

ܥܶܩܒܳܐ

ܨܳܐܬܳܐ ܕܚܰܘ̈ܒܳܬܰܢ ܘܟܽܘ̈ܬܡܳܬܳܐ ܕܡܶܢ ܒܥܶܠܕܒܳܒܰܝ̈ܢ ܝܰܘܡܳܢ ܒܰܣܚܳܬܳܐ ܕܡܶܢ ܡܰܝ̈ܳܐ ܘܪܽܘܚܳܐ ܚܰܠܠܰܢ܆ ܟܰܕ ܠܽܐܘܪܚܳܐ ܐܶܬܗܰܕܺܝܢܰܢ ܚܕܰܬܳܐ ܘܠܳܐ ܡܥܰܬܩܳܐ܆ ܪܽܘܚܳܢܳܝܬܳܐ ܕܠܳܐ ܦܳܕܳܐ ܐܳܦܠܳܐ ܡܟܰܬܡܳܐ ܘܺܐܝܬܶܝܗ̇ ܒܚܽܘ̈ܫܳܒܶܐ ܕܡܰܢ ܕܰܐܠܳܗܳܐ ܡܰܚܶܒ ܠܶܗ܀

ܡܫܰܡܫܳܢܳܐ: ܣܛܰܘܡܶܢܩܰܐܠܽܘ̇ܣ ܩܽܘܪܝܶܐܠܰܝܣܽܘܢ

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬ݂ܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ݂ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܠܗܰܘ ܡܰܠܟܳܐ ܕܡܰܠܟ̈ܶܐ ܘܡܳܪܳܐ ܕܥܳܠܡ̈ܶܐ܆ ܠܳܐ ܡܶܬܚܰܒܠܳـܢܳܐ ܘܠܳܐ ܡܶܬܚܰܙܝܳܢܳܐ܆ ܗܰܘ ܕܒܰܠܚܽܘܕܰܘܗ̱ܝ ܚܰܟܺܝܡܳܐ܆ ܗܰܘ ܕܡܶܢܶܗ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܥܰܠ ܐܰܪܥܳܐ ܡܶܫܬܰܡܗܳܐ܆ ܗܰܘ ܕܒܰܠܚܽܘܕܳܝܽܘܬܳܐ ܡܶܬܗܰܘܢܰܢ܆ ܘܗܽܘ ܟܰܕ ܗܽܘ ܒܰܬܠܺܝܬܳܝܽܘܬܳܐ ܡܶܣܬܓܶܕ ܘܡܶܫܬܰܒܰܚ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܕܰܗܘܳܐ ܒܰܪܢܳܫܳܐ܆ ܘܠܳܐ ܡܶܬܕܰܪܟܳܢܳܐܺܝܬ ܡܶܢ ܒܬܽܘܠܬܳܐ ܩܰܕܺܝܫܬܳܐ ܦܰܓܪܳܢܳܐܺܝܬ ܕܠܳܐ ܙܽܘܘܳܓܳܐ ܐܶܬܺܝܠܶܕ܆ ܐܰܝܟܰܢܳܐ ܕܠܰܒܢܰܝ̈ܢܳܫܳܐ ܢܩܰܪܶܒ ܠܣܺܝܡܰܬ ܒܢܰܝ̈ܳܐ ܕܝܳܠܽܘܕܶܗ܆ ܘܢܶܥܒܶܕ ܐܶܢܽܘܢ ܒ̈ܢܰܝܳܐ ܕܰܐܠܳܗܳܐ ܐܰܒܳܐ ܒܝܰܕ ܡܰܝ̈ܳܐ ܘܪܽܘܚܳܐ. ܨܳܐܰܪ ܥܽܘ̈ܠܶܐ ܒܟܰܪ̈ܣܳܬܳܐ ܕܰܗܘܳܐ ܥܽܘܠܳܐ ܒܨܶܒܝܳܢܶܗ܆ ܕܰܢܚܰܕܶܬ ܠܳܐܕܳܡ ܨܰܠܡܶܗ ܕܰܐܥܬܶܩ ܘܰܒܠܺܝ ܒܰܚܛܺܝܬܳܐ ܘܢܶܡܪܩܺܝܘܗ̱ܝ ܘܰܢܚܰܕܬܺܝܘܗ̱ܝ ܒܟܽܘܪܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ. ܠܳܐ ܣܢܺܝܩܳܐ ܕܶܐܬܳܐ ܠܰܥܡܳܕܳܐ ܕܰܢܩܰܕܶܫ ܡܰܝ̈ܳܐ ܕܝܽܘܪܕܢܳܢ ܒܰܥܡܳܕܶܗ ܩܰܕܺܝܫܳܐ. ܒܪܳܐ ܕܪܰܒܽܘܬܳܐ ܕܰܐܪܟܶܢ ܪܺܝܫܶܗ ܩܕܳܡ ܐܺܝܕܶܗ ܕܡܰܥܡܕܳܢܳܐ܆ ܟܰܕ ܐܰܒܳܐ ܡܶܢ ܪܰܘܡܳܐ ܐܰܙܥܶܩ ܕܗܳܢܰܘ ܒܪܳܐ ܕܺܝܠܝ ܚܰܒܺܝܒܳܐ܆ ܘܪܽܘܚܳܐ ܩܰܕܺܝܫܳܐ ܒܰܕܡܽܘܬ ܓܽܘܫܡܳܐ ܕܝܰܘܢܳܐ ܐܶܬܚܙܺܝ܆ ܘܚܰܝܠܰـܘ̈ܳܬܳܐ ܫܡܰܝܳܢ̈ܶܐ ܒܕܶܚܠܬܳܐ ܘܒܰܪܬܺܝܬܳܐ ܩܳܝܡܺܝܢ ܗ̱ܘܰܘ.
ܐܰܢ̱ܬ ܡܳܪܝܳܐ ܐܰܓܶܢ ܝܰܡܺܝܢܳܐ ܕܰܡܪܰܚܡܳܢܽܘܬܳܟ ܥܰܠ ܐܰܡ̈ܗܳܬܳܟ ܗܳܠܶܝܢ ܕܶܐܬܛܰܝ̈ܰܒܝ ܠܰܥܡܳܕܳܐ ܩܰܕܺܝܫܳܐ܆ ܘܩܰܕܶܫ ܐܶܢܶܝܢ ܘܕܰܟܳܐ ܐܶܢܶܝܢ ܘܰܡܪܽܘܩ ܐܶܢܶܝܢ ܒܝܰܕ ܙܽܘܦܳܟ ܡܚܰܣܶܐ ܟܽܠ܆ ܘܒܰܪܶܟ ܠܥܰܡܳܟ ܘܢܰܛܰܪ ܠܝܳܪܬܽܘܬܳܟ. ܘܰܐܝܟܰܢܳܐ ܕܰܒܝܰܕ ܛܰܝܒܽܘܬܳܟ ܐܰܠܒܶܫܬܳܢ ܐܶܣܛܰܠ ܫܽܘܒܚܳܐ ܕܫܽܘ̈ܟܳܢܶܐ ܕܪܽܘܚܳܟ ܩܰܕܺܝܫܳܐ܆ ܘܝܰܗ̱ܒܬ ܠܰܢ ܕܰܒܢܰܝ̈ܳܐ ܪ̈ܽܘܚܳܢܶܐ ܢܶܗܘܶܐ ܠܰܐܒܳܐ ܩܰܕܺܝܫܳܐ ܒܰܥܡܳܕܳܐ ܬܪܰܝܳܢܳܐ ܕܡܰܥܡܽܘܕܺܝܬܳܐ ܗܳܕܶܐ ܕܰܡܙܰܕܩܳܐ ܠܚܰܛܳܝ̈ܶܐ.
ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ܆ ܐܰܫܘܳܐ ܠܰܢ ܕܰܒܓܰܠܝܽܘܬ ܐܰܦ̈ܶܐ ܘܰܒܦܰܪܶܗ̱ܣܺܝܰܐ ܕܠܳܐ ܒܶܗܬܬܳܐ ܢܫܰܡܶܫ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ܆ ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܰܡ ܥܳܠܡܺܝܢ܀

ܩܳܠܳܐ܆ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܩܳܠܶܗ ܕܝܽܘܚܰܢܳܢ ܫܶܡܥܶܬ ܟܰܕ ܐܳܡܰܪ ܠܶܗ ܠܝܽܘܪܕܢܳܢ: ܕܫܰܦܳܐ ܢܰܦܫܳܟ ܘܰܐܫܺܝܓ ܨܳܐܬܳܐ܆ ܕܰܒܓܰܘܳܟ ܕܡܳܪܳܗ̇ ܕܰܐܪܥܳܐ ܘܕܰܫܡܰܝܳܐ ܐܶܬܳܐ ܕܢܶܥܡܰܕ ܗܰܠܶـܠܽܘܝܰܗ ܘܰܢܩܰܕܶܫ ܟܽܠ܀

ܫܘ̄ܒ: ܬܠܳـܬܳܐ ܐ̱ܪ̈ܳܙܶܐ ܩܰܕܺܝܫ̈ܶܐ ܣܳܡ ܒܳܗ̇ ܡܳܪܰܢ ܒܥܺܕܬܳܐ ܦܪܺܝܩܰܬ݂ ܒܰܨܠܺܝܒܶܗ: ܡܰܥܡܽܘܕܺܝܬܳܐ ܘܩܽܘܪܒܳܢܳܐ ܘܟܳܗܢܳܐ ܙܰܗܝܳܐ܆ ܕܰܡܚܰܣܶܐ ܥܰܠ ܡܰܪܥܺܝܬܶܗ ܗܰܠܶـܠܽܘܝܰܗ ܘܫܳܐܶܠ ܪ̈ܰܚܡܶܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܠܣܰܓܺܝܽܐܘܬ ܪ̈ܰܚܡܶܐ ܕܺܝܠܳܟ ܡܩܰܪܒܺܝܢܰܢ ܡܳܪܝܳܐ ܐܰܠܳܗܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ. ܚܠܳܦ ܐܰܡ̈ܗܳܬܶܟ ܗܳܠܶܝܢ ܕܶܐܬܛܰܝܰܒ̈ܝ ܠܰܥܡܳܕܳܐ ܗܳܢܳܐ ܩܰܕܺܝܫܳܐ. ܐܰܝܟܰܢܳܐ ܕܒܳܟ ܢܶܬܪ̈ܰܫܡܳܢ ܠܚܰܝ̈ܶܐ. ܘܢܶܬܝ̈ܰܠܕܳܢ ܠܪܽܘܚܳܢܽܘܬܳܐ. ܘܢܶܬܟܰܬܒ̈ܳܢ ܒܒܰܝܬܳܝܽܘܬܳܐ ܕܡܽܘ̈ܠܟܳܢܶܐ ܕܺܝܠܳܟ. ܘܢܶܬܪܰܚܩܽܘܢ ܡܶܢ ܚܰܝܰܝ̈ܗܶܝܢ ܟܽܠܗܽܘܢ ܢܶܟܝܳܢܰܘ̈ܗ̱ܝ ܕܰܒܥܶܠܕܒܳܒܳܐ. ܘܢܶܗܘܶܐ ܠܗܶܝܢ ܚܳܬܡܳܐ ܕܺܝܠܳܟ ܩܰܕܺܝܫܳܐ ܡܙܰܗܪܳܢܳܐ ܘܰܡܢܰܛܪܳܢܳܐ. ܘܰܒܝܰܕ ܟܽܠܗܶܝܢ ܛܳܒ̈ܳܬܳܐ ܢܶܬܥ̈ܰܠܡܳܢ ܘܢܶܙܟ̈ܝܳܢ ܠܒܺܝ̈ܫܳܬܳܐ. ܘܢܶܬܢܰܩ̈ܦܳܢ ܠܦܽܘܩܕܳܢ̈ܶܐ ܕܺܝܠܳܟ ܐܰܠܳܗܳܝ̈ܶܐ. ܘܢܰܣ̈ܩܳܢ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܩܶܪܝܳܢܳܐ ܡܶܢ ܐܶܓܪ̈ܳܬܳܐ ܕܦܰܘܠܳܘܣ ܫܠܺܝܚܳܐ

ܙܽܘܡܳܪܳܐ: ܡܳܐ ܠܳܟ ܝܰܡܳܐ ܕܰܥܪܰܩܬ܆ ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ ܗܰܠܶـܠܽܘܝܰܗ܀

ܡܫܰܡ̈ܫܳܢܶܐ: ܦܰܘܠܽܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ ܕܳܐܡܰܪ: ܕܶܐܢ ܐ̱ܢܳܫ ܢܺܐܬܶܐ ܢܣܰܒܰܪܟܽܘܢ ܠܒܰܪ ܡܶܢ ܡܳܐ ܕܣܰܒܰܪܢܳܟܽܘܢ܆ ܘܶܐܢ ܡܰܠܰܐܟܰܐ ܗ̱ܘ ܡܶܢ ܪܰܘܡܳܐ܆ ܢܶܗܘܶܐ ܡܰܚܪܰܡ ܡܶܢ ܥܺܕܬܳܐ. ܕܗܳܐ ܢܳܒܥܺܝܢ ܠܰܡ ܝܽܘ̈ܠܦܳܢܶܐ ܡܫܰܚ̈ܠܦܶܐ ܡܶܢ ܟܽܠ ܓܰܒܺܝ̈ܢ. ܛܽܘܒ ܠܰܐܝܢܳܐ ܕܰܒܝܽܘܠܦܳܢܶܗ ܕܰܐܠܳܗܳܐ ܫܰܪܺܝ ܘܫܰܠܶܡ܀

ܡܫܰܡ̈ܫܳܢܶܐ: ܡܶܢ ܐܶܓܰܪܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܓܰܠܰـܛܳܝ̈ܶܐ. ܒܰܪܶܟܡܳܪܝ܀

ܩܶܦܰܠܶܐܘܳܢ ܓ: ܟܓ - ܟܛ

ܐܰܚ̈ܰܝ: ܥܰܕܠܳܐ ܕܶܝܢ ܬܺܐܬܶܐ ܗܰܝܡܳܢܽܘܬܐ܆ ܢܳܡܽܘܣܳܐ ܢܳܛܰܪ ܗ̱ܘܳܐ ܠܰܢ܆ ܟܰܕ ܚܒܺܝܫܺܝܢܰܢ ܠܗܰܝܡܳܢܽܘܬܳܐ ܕܰܥܬܺܝܕܳܐ ܗ̱ܘܳܬ ܠܡܶܬܓܠܳـܝܽܘ. ܢܳܡܽܘܣܳܐ ܗܳܟܺܝܠ ܬܳܪܐܳܐ ܗܘܳܐ ܠܰܢ ܠܘܳܬ ܡܫܺܝܚܳܐ܆ ܕܡܶܢ ܗܰܝܡܳܢܽܘܬܳܐ ܢܶܙܕܰܕܰܩ. ܟܰܕ ܐܶܬܳܬ ܕܝܶܢ ܗܰܝܡܳܢܽܘܬܳܐ܆ ܠܳܐ ܗܘܰܝܢ ܬܚܶܝܬ ܬܳܪ̈ܐܶܐ. ܟܽܠܟܽܘܢ ܓܶܝܪ ܒܢܰܝ̈ܳܐ ܐܰܢ̱ܬܽܘܢ ܕܰܐܠܳܗܳܐ ܒܗܰܝܡܳܢܽܘܬܳܐ ܕܝܶܫܽܘܥ ܡܫܺܝܚܳܐ. ܐܰܝܠܶܝܢ ܓܶܝܪ ܕܒܰܡܫܺܝܚܳܐ ܥܡܰܕܬܽܘܢ܆ ܠܰܡܫܺܝܚܳܐ ܠܒܶܫܬܽܘܢ. ܠܰܝܬ ܓܶܝܪ ܝܺܗܽܘܕܳܝܳܐ ܘܠܳܐ ܐܰܪܡܳܝܳܐ. ܠܰܝܬ ܥܰܒܕܳܐ ܘܠܳܐ ܒܰܪ ܚܺܐܪ̈ܶܐ. ܠܰܝܬ ܕܶܟܪܳܐ ܘܠܳܐ ܢܶܩܒܬܳܐ. ܟܽܠܟܽܘܢ ܓܶܝܪ ܚܰܕ ܐܰܢܬܽܘܢ ܒܝܶܫܽܘܥ ܡܫܺܝܚܳܐ. ܘܶܐܢ ܕܰܡܫܺܝܚܳܐ ܐܰܢܬܽܘܢ܆ ܡܶܟܺܝܠ ܙܰܪܥܶܗ ܐܰܢܬܽܘܢ ܕܰܐܒܪܳܗܳܡ. ܘܝܳܪ̈ܬܶܐ ܒܡܽܘܠܟܳܢܳܐ܀

ܩܶܪܝܳܢܳܐ ܡܶܢ ܐܶܘܰܢܓܶܠܺـܝـܳܘܢ ܩܰܕܺܝܫܳܐ

ܗܽܘܠܳـܠܳܐ: ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܘܽܟ ܡܳܪܝ ܡܰܝ̈ܳܐ ܘܰܕܚܶܠܘ ܗܰܠܶـܠܽܘܝܰܗ܀

ܐܶܘܰܢܓܶܠܺـܝܳܘܢ ܕܡܶܢ ܝܽܘܚܰܢܳܢ

ܩܶܦܰܠܶܐܘܳܢ ܓ: ܟܒ - ܟܙ

ܘܒܳܬܰܪ ܗܳܠܶܝܢ܆ ܐܶܬܳܐ ܝܶܫܽܘܥ ܘܬܰܠܡܺܝ̈ܕܰܘܗܝ ܠܰܐܪܥܳܐ ܕܝܺܗܽܘܕ ܘܬܰܡܳܢ ܡܶܬܗܰܦ݁ܰܟ ܗ̱ܘܳܐ ܥܰܡܗܽܘܢ ܘܡܰܥܡܶܕ. ܐܳܦ ܝܘܚܰܢܳܢ ܕܶܝܢ ܡܰܥܡܶܕ ܗ̱ܘܳܐ ܒܥܺܝܢ ܝܳܘܢ ܕܥܰܠ ܓܶܢ̱ܒ ܫܳܠܝܺܡ܆ ܡܶܛܽܠ ܕܡܰܝ̈ܳܐ ܐܺܝܬ ܗ̱ܘܰܘ ܬܰܡܳܢ ܣܰܓܝ̈ܶܐܐ܆ ܘܐܳܬܶܝܢ ܗ̱ܘܰܘ ܘܥܳܡܕܺܝܢ. ܠܳܐ ܓܶܝܪ ܥܕܰܟܺܝܠ ܢܦܰܠ ܗ̱ܘܳܐ ܝܘܚܰܢܳܢ ܒܒܶܝܬ ܐܰܣܺܝܪ̈ܶܐ. ܗܘܳܬ ܗ̱ܘܳܬ ܕܶܝܢ ܒܥܳܬܳܐ ܠܚܰܕ ܡܶܢ ܬܰܠܡܺܝ̈ܕܰܘܗ̱ܝ ܕܝܘܚܰܢܳܢ ܥܰܡ ܝܺܗܽܘܕܳܝܳܐ ܚܰܕ ܥܰܠ ܬܰܕܟܺܝܬܳܐ. ܘܶܐܬܰܘ ܠܘܳܬ ܝܽܘܚܰܢܳܢ ܘܐܶܡܰܪܘ ܠܶܗ: ܪܰܒܰܢ܆ ܗܰܘ ܕܥܰܡܳܟ ܗ̱ܘܳܐ ܒܥܶܒܪܳܐ ܕܝܽܘܪܕܢܳܢ܆ ܕܐܰܢ̱ܬ ܣܗܶܕܬ ܥܠܰܘܗܝ܆ ܗܳܐ ܐܳܦ ܗܽܘ ܡܰܥܡܶܕ ܘܣܰܓܺܝ̈ܶܐܐ ܐܳܬܶܝܢ ܠܘܳܬܶܗ. ܥܢܳܐ ܝܽܘܚܰܢܳܢ ܘܐܶܡܰܪ ܠܗܽܘܢ: ܠܳܐ ܡܶܫܟܰܚ ܒܰܪܢܳܫܳܐ ܠܡܶܣܰܒ ܡܶܢ ܨܒܽܘܬ ܢܰܦܫܶܗ ܡܶܕܶܡ܆ ܐܷܠܳܐ ܐܶܢ ܐܶܬܺܝܗܶܒ ܠܶܗ ܡܶܢ ܫܡܰܝܳܐ܀

ܘܳܐܡܪܺܝܢ ܡܰܥܢܺܝܬܳܐ:

ܦܶܬܓܳܡܳܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ. ܘܡܶܢ ܚ̈ܛܳܗܰܝ ܕܰܟܳܢܝ. ܠܰܚܛܺܝܬܳܐ ܐܰܝܕܳܐ ܕܣܶܥܪܶܬ ܠܳܐ ܡܨܶܐ ܚܰܝܠܳܐ ܕܙܽܘܦܳܐ ܢܕܰܟܶܝܗ̇. ܐܳܦܠܳܐ ܡܰܝ̈ܳܐ ܢܳܡܽܘ̈ܣܳܝܶܐ ܢܶܡܪܩܽܘܢܳـܗ̇ ܛܽܘܦܣܳܢܳܐܺܝܬ. ܐܷܠܳܐ ܪܣܳܣܳܐ ܘܒܽܘܚܪܳܢܳܐ ܕܰܣܚܳܬܳܐ ܐܰܠܳܗܳܝܬܳܐ ܘܥܽܘܬܪܳܐ ܕܪ̈ܰܚܡܰܘܗ̱ܝ ܣܰܓܺܝ̈ܶܐܐ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܨܠܰـܘ̈ܳܬܳܐ ܘܪܽܘܫܡܳܐ

ܟܳܗܢܳܐ: ܨܠܽܘܬܳܐ ܕܥܰܠ ܢܰܦܫܶܗ ܟܰܕ ܓܗܺܝܢ ܠܰܐܦ݁ܰܝ̈ ܡܰܕܢܚܳܐ:

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܕܝܳܕܰܥ ܗܰܘ̈ܢܶܐ ܕܰܒܢܰܝ̈ܢܳܫܳܐ ܘܒܳܨܶܐ ܠܶـܒܰܘ̈ܳܬܳܐ ܘܟܽܘ̈ܠܝܳܬܳܐ܆ ܗܰܘ ܕܟܰܕ ܠܳܐ ܫܳܘܶܐ ܐ̱ܢܳܐ ܩܪܰܝܬܳܢܝ ܠܗܳܕܶܐ ܬܶܫܡܶܫܬܳܐ. ܠܳܐ ܬܶܢܰܕܝ ܠܳܟ ܡܶܢܝ ܡܶܛܽܠ ܚ̈ܛܳܗܰܝ ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܝ܆ ܐܷܠܳܐ ܠܚܺܝ ܟܽܠܗܶܝܢ ܫܽܘܪ̈ܥܳܬܝ ܘܰܐܫܺܝܓ ܨܳܐܬܳܐ ܕܦܰܓܪܝ ܘܟܽܘ̈ܬܡܳܬܳܐ ܕܢܰܦܫܝ ܘܰܡܫܰܡܠܝܳܐܺܝܬ ܩܰܕܶܫܰܝܢܝ܆ ܐܰܝܟܰܢܳܐ ܕܠܳܐ ܟܰܕ ܠܰܐ̱ܚܪ̈ܳܢܶܐ ܢܶܬܺܝܗܶܒ ܫܽܘܒܩܳܢܳܐ ܕܰܚ̈ܛܳܗܶܐ ܡܨܰܠܶܐ ܐ̱ܢܳܐ܆ ܐܶܢܳܐ ܥܰܒܕܳܐ ܡܰܣܠܝܳܐ ܕܰܚܛܺܝܬܳܐ ܐܶܗܘܶܐ. ܠܳܐ ܡܳܪܝ ܢܶܗܦܽܘܟ ܡܶܣܟܺܢܳܐ ܟܰܕ ܒܰܗܺܝܬ܆ ܐܷܠܳܐ ܫܰܕܰܪ ܥܠܰܝ ܪܽܘܚܳܟ ܩܰܕܺܝܫܳܐ ܘܚܰܝܶܠܰܝܢܝ ܠܘܳܬ ܬܶܫܡܶܫܬܳܐ ܕܐ̱ܪܳܙܳܐ ܗܳܢܳܐ ܪܰܒܳܐ ܘܰܫܡܰܝܳܢܳܐ ܕܩܰܕܺܝܡ ܣܺܝܡ܀

ܬܠܳܝܬܳܐ

ܐܰܝܟܰܢܳܐ ܕܗܳܠܶܝܢ ܕܰܗ̈ܘܰܝ ܫܰܘ̈ܝܳܬ ܒܢܶܨܒܬܳܐ ܠܰܕܡܘ̣ܬܶܗ ܕܰܡܫܺܝܚܳܐ ܒܝܰܕ ܥܡܳܕܳܐ܆ ܫܰܘ̈ܬܳܦܳܬܳܐ ܐܳܦ ܕܰܩܝܳܡܬܶܗ ܢܶܗܘ̈ܝܳܢ. ܘܟܰܕ ܢܳܛܪ̈ܳܢ ܡܰܘܗܰܒܬܳܐ ܕܪܽܘܚܳܟ ܩܰܕܺܝܫܳܐ܆ ܘܰܡܪ̈ܰܒܝܳܢ ܠܓܽܘܥܠܳـܢܳܐ ܕܛܰܝܒܽܘܬܳܐ܆ ܢܩܰܒ̈ܠܳܢ ܟܠܺܝܠܳܐ ܕܙܳܟܽܘܬܳܐ ܕܰܩܪܳܝܬܳܐ ܕܰܠܥܶܠ܆ ܘܢܶܬܡܰܢ̈ܝܳܢ ܒܒܽܘܟܪ̈ܶܐ ܗܳܢܽܘܢ ܕܰܟܬܺܝܒܺܝܢ ܒܰܫܡܰܝܳܐ: ܒܰܡܫܺܝܚܳܐ ܝܶܫܽܘܥ ܡܳܪܰܢ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܥܰܡ ܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܩܽܘܪܝܶܐܠܶܝܣܳܘܢ܀

ܗܳܪܟܳܐ ܟܳܗܢܳܐ ܢܣܺܝܡ ܒܶܣ̈ܡܶܐ ܟܶܢ ܐܳܡܰܪ ܓܗܳܢܬܳܐ

ܝܳܗܽܘܒܳܐ ܕܢܽܘܗܪܳܐ ܘܡܰܢܗܪܳܢܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ܆ ܗܰܘ ܕܶܐܡܰܪ ܕܡܶܢ ܚܶܫܽܘܟܳܐ ܢܽܘܗܪܳܐ ܢܶܕܢܰܚ܆ ܗܰܘ ܕܝܰܗ̱ܒ ܕܽܘܟܳܝܳܐ ܛܽܘܒܬܳܢܳܐ ܒܡܰܝ̈ܳܐ ܦܳܪ̈ܽܘܩܳܝܶܐ܆ ܘܩܽܘܕܳܫܳܐ ܐܰܠܳܗܳܝܳܐ ܒܝܰܕ ܡܫܺܝܚܽܘܬܳܐ ܩܰܕܺܝܫܬܳܐ܆ ܘܰܚܕܳܝܽܘܬܳܐ ܗܳܝ ܕܰܠܘܳܬ ܡܳܪܰܢ ܝܶܫܽܘܥ ܡܫܺܝܚܳܐ ܘܫܰܘܬܳܦܽܘܬܳܐ ܕܦܰܓܪܶܗ ܘܰܕܡܶܗ ܩܰܕܺܝܫܳܐ܆ ܗܰܘ ܕܳܐܦ ܗܳܫܳܐ ܠܰܐܡ̈ܗܳܬܳܟ ܗܳܠܶܝܢ ܕܒܰܩܪܳܝܬܳܐ ܩܰܕܺܝܫܬܳܐ ܩܪܰܝܬ ܡܶܢ ܚܶܫܽܘܟܳܐ ܕܛܳܥܝܽܘܬܳܐ ܠܺܝܕܰܥܬܳܐ ܕܺܝܠܳܟ ܕܰܫܪܳܪܳܐ: ܐܰܢ̱ܬ ܡܳܪܝܳܐ ܡܪܰܚܡܳܢܳܐ ܟܬܽܘܒ ܫܡܳܗܰܝ̈ܗܶܝܢ ܒܰܟܬܳܒܳܟ ܕܚܰܝ̈ܶܐ܆ ܡܢܺܝ ܐܶܢܶܝܢ ܥܰܡ ܗܳܢܶܝܢ ܕܕܳܚ̈ܠܳܢ ܠܳܟ܆ ܢܶܬܪܫܶܡ ܒܗܶܝܢ ܢܽܘܗܪܳܐ ܕܦܰܪܨܽܘܦܳܟ܆ ܘܢܶܬܛܰܦܰܣ ܨܠܺܝܒܳܐ ܕܰܡܫܺܝܚܳܐ ܕܺܝܠܳܟ ܒܠܶـܒܰܘ̈ܳܬܗܶܝܢ ܘܡܰܚܫ̈ܒܳܬܗܶܝܢ܆ ܐܰܝܟܰܢܳܐ ܕܢܶܥܪ̈ܩܳܢ ܡܶܢ ܣܪ̈ܺܝܩܳܬܶܗ ܕܥܳܠܡܳܐ ܗܳܢܳܐ ܘܡܶܢ ܟܽܠܳـܗ̇ ܒܺܝܫܽܘܬܳܐ ܕܰܒܥܶܠܕܒܳܒܳܐ܆ ܘܢܶܪ̈ܕܝܳܢ ܒܦܽܘ̈ܩܕܳܢܰܝܟ ܩܰܕܺܝܫ̈ܶܐ܀

ܬܠܳܝܬܳܐ

ܗܰܒ ܠܗܶܝܢ ܡܳܪܝܳܐ ܡܰܦܽܘܚܺܝܬܳܐ ܕܺܝܠܳܟ ܩܰܕܺܝܫܬܳܐ ܗܳܝ ܕܰܢܦܰܚ ܝܺܚܺܝܕܳܝܳܐ ܕܺܝܠܳܟ ܒܪܳܐ ܒܬܰܠܡܺܝ̈ܕܶܐ ܕܺܝܠܶܗ ♱ (ܘܢܳܦܰܚ ܒܰܐܦܰܝ̈ ܡܶܬܥܰܡ̈ܕܳܢܝܳܬܳܐ ܨܠܺܝܒܳܐܺܝܬ) ܘܟܽܠ ܫܰܪܟܳܢܳܐ ܕܦܽܘܠܚܳܢ ܦܬܰܟܪ̈ܶܐ ܐܰܪܚܶܩ ܡܶܢ ܬܰܪ̈ܥܝܳܬܗܶܝܢ܆ ܟܰܕ ܡܛܰܝܶܒ ܐܰܢ̱ܬ ܠܗܶܝܢ ܠܰܡܩܰܒܠܳـܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ♱. ܘܰܕܢܶܫ̈ܬܰܘܝܳܢ ܠܰܣܚܳܬܳܐ ܕܡܰܘܠܳـܕܳܐ ܕܡܶܢܕܪܺܝܫ ♱. ܐܰܫܘܳܐ ܐܶܢܶܝܢ ܘܰܠܫܽܘܟܳܢܳܐ ܕܺܝܠܶܗ ܕܒܺܐܝ̈ܕܰܘܗ̱ܝ ܕܺܝܠܶܗ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܝܰܐ܆ ܗܳܫܳܐ ܘܰܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܘܠܳـܒܶܟ ܡܫܰܡܫܳܢܳܐ ܠܪܺܝܫܳܗ̇ ܕܟܽܠ ܡܶܬܥܰܡܕܳܢܺܝܬܳܐ ܘܳܐܡܰܪ: ܒܰܪܶܟܡܳܪܝ܀

ܘܟܳܗܢܳܐ ܚܳܬܶܡ ܠܟܽܠ ܡܶܬܥܰܡܕܳܢܺܝܬܳܐ ܒܶܝܬ ܥܰܝܢܶܝ̈ܗ̇ ܬܠܳـܬܳܐ ܨܠܺܝܒ̈ܶܐ ܕܠܳܐ ܡܶܫܚܳܐ ܟܰܕ ܐܳܡܰܪ:

ܡܶܬܚܰܬܡܳܐ (ܦܠܳـܢܺܝܬ) ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܚܰܝܳܐ ܘܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ. ܩܽܘܪܝܶܐܠܶܝܣܳܘܢ܀

ܡܰܘܡܝܳܢܽܘܬܳܐ

ܫܰܘܫܒܺܝܢܬܳܐ ܡܰܫܠܚܳܐ ܠܗܶܝܢ ܡܳܐܢܰܝ̈ܗܶܝܢ ܘܚܶܫ̈ܠܳـܬܳܐ ܘܰܣܛܰܪ ܘܰܡܩܰܪܒܳܢ ܠܗܶܝܢ ܟܰܕ ܐܰܦܰܝ̈ܗܶܝܢ ܕܰܡܶܬܥܰܡ̈ܕܳܢܝܳܬܳܐ ܠܡܰܕܢܚܳܐ ܘܟܳܗܢܳܐ ܠܡܰܥܪܒܳܐ

ܓܗܳܢܬܳܐ

ܠܳܟ ܩܳܪܶܐ ܐ̱ܢܳܐ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ ܒܝܰܕ ܝܺܚܺܝܕܳܝܳܐ ܒܪܳܐ ܡܳܪܝܳܐ ܕܶܝܢ ܕܺܝܠܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ: ܠܘܳܬ ܛܪܽܘܕܝܳܐ ܕܟܽܠ ܪܽܘܚܳܐ ܒܺܝܫܬܳܐ ܘܰܕܚܽܘܩܝܳܐ ܕܟܠ ܡܰܥܒܕܳܢܽܘܬܳܐ ܣܰܩܽܘܒܠܳܝܬܳܐ ܘܕܰܡܛܰܫܝܳܐ. ܐܰܝܟܰܢܳܐ ܕܰܒܡܰܓܢܳܢܽܘܬܳܐ ܕܪܽܘܚܳܟ ܩܰܕܺܝܫܳܐ ܕܰܟܝܳܐܺܝܬ ܢܩܰܒ̈ܠܳܢ ܢܰܦܫ̈ܳܬܳܐ ܗܳܠܶܝܢ ܕܡܶܬܩܰܪ̈ܒܳܢ ܠܳܟ. ܐܶܬܓܠܰܝ ܡܳܪܝܳܐ ܘܚܰܝܶܠ ܠܡܶܠܬܳܐ ܕܗܰܝܡܳܢܽܘܬܳܐ ܗܳܝ ܕܰܡܡܰܠـܠܺܝܢܰܢ ܒܰܫܡܳܐ ܕܰܡܫܺܝܚܳܐ ܕܺܝܠܳܟ. ܐܰܝܟܰܢܳܐ ܕܠܳܐ ܒܣܶܦ̈ܘܳܬܳܐ ܣܪ̈ܺܝܩܳܬܳܐ ܢܡܰܠܶܠ ܐܷܠܳܐ ܒܛܰܝܒܽܘܬܳܐ ܕܺܝܠܳܟ ܘܰܒܚܰܝܠܳܐ ܕܺܝܠܳܟ ܗܰܘ ܕܰܡܫܰܘܙܶܒ ܠܥܳܠܡܳܐ ܡܶܢ ܒܺܝܫܳܐ܀

ܬܠܳܝܬܳܐ

ܡܶܛܽܠ ܕܰܐܢ̱ܬ ܡܰܡܠܶܟ ܐܰܢ̱ܬ ܥܠܰܝܢ܆ ܐܰܠܳܗܳܐ ܐܰܒܳܐ ܘܺܝܚܺܝܕܳܝܳܐ ܒܪܳܐ ܕܺܝܠܳܟ ܘܪܽܘܚܳܟ ܩܰܕܺܝܫܳܐ܆ ܘܠܳܟ ܫܽܘܒܚܳܐ ܡܰܣܩܺܝܢܰܢ ܗܳܫܳܐ ܘܰܠܥܳܠܡܺܝܢ܀

ܟܳܗܢܳܐ ܐܳܡܰܪ ܡܰܘܡܝܳܢܽܘܬܳܐ ܗܳܕܶܐ܆ ܟܰܕ ܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܐܰܦܶܝ̈ܗ ܕܡܶܬܥܰܡܕܳܢܺܝܬܳܐ:

ܠܳܟ ܩܳܪܶܐ ܐ̱ܢܳܐ ܡܳܪܝܳܐ ܐܰܠܳܗܰܢ܆ ܠܗܰܘ ܒܳܪܽܘܝܳܐ ܕܟܽܠܳـܗ̇ ܒܪܺܝܬܳܐ ܡܶܬܚܰܙܝܳܢܺܝܬܳܐ ܘܠܳܐ ܡܶܬܚܰܙܝܳܢܺܝܬܳܐ܆ ܟܰܕ ܣܳܝܡܺܝܢܰܢ ܐܺܝܕܳܐ ܥܰܠ ܓܒܺܝܠܬܳܐ ܕܺܝܠܳܟ ܗܳܕܶܐ܆ ܘܚܳܬܡܺܝܢܰܢ ܒܰܫܡܳܐ ܕܺܝܠܳܟ ܩܰܕܺܝܫ ܒܟܽܠ܆ ܘܙܳܓܪܺܝܢܰܢ ܠܟܽܠ ܫܺܐܕܳܐ ܘܪܽܘܚܳܐ ܒܺܝܫܬܳܐ ܘܛܰܢܦܬܳܐ܆ ܐܰܝܟܰܢܳܐ ܕܢܶܪܚܩܽܘܢ ܡܶܢ ܓܒܺܝܠܬܳܐ ܕܺܝܠܳܟ ܘܡܶܢ ܥܒܳܕܳܐ ܕܺܐܝ̈ܕܰܝܟ ܩܰܕܺܝ̈ܫܳܬܳܐ. ܫܡܰܥ ܠܰܢ ܡܳܪܝ ܘܟܺܐܝ ܒܗܽܘܢ ܘܕܰܟܳܐ ܠܰܐܡ̈ܗܳܬܳܟ ܗܳܠܶܝܢ ܡܶܢ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ.

ܐ: ܫܡܰܥ ܕܶܝܢ ܐܰܢ̱ܬ ܡܥܰܩܡܳܐ ܘܡܳܪܽܘܕܳܐ ܗܰܘ ܡܰܢ ܕܺܐܝܬܰܝܟ ܕܡܰܠܶܙ ܐܰܢ̱ܬ ܠܗܳܕܶܐ ܓܒܺܝܠܬܳܐ ܕܰܐܠܳܗܳܐ ♱

ܒ: ܡܰܘܡܶܐ ܐ̱ܢܳܐ ܠܳܟ ܒܥܶܠܕܒܳܒܳܐ ܕܟܺܐܢܽܘܬܳܐ ܘܥܳܒܽܘܪܳܐ ܕܢܳܡܽܘ̈ܣܶܐ ܐܰܠܳܗܳܝ̈ܶܐ ܘܩܰܕܺܝ̈ܫܶܐ܆ ܒܬܶܫܒܽܘܚܬܳܐ ܕܡܰܠܟܳܐ ܪܰܒܳܐ. ܫܰܢܳܐ ܒܕܶܚܠܬܳܐ ܘܶܐܫܬܰܥܒܰܕ ܠܡܳܪܳܐ ܕܚܺܝܠܳܐ܆ ܗܰܘ ܕܰܒܦܽܘܩܕܳܢܶܗ ܐܰܪܥܳܐ ܥܰܠ ܡܰܝ̈ܳܐ ܣܺܝܡܳܐ ܘܰܡܫܰܪܪܳܐ܆ ܘܚܳܠܳܐ ܬܚܽܘܡܳܐ ܠܝܰܡܳܐ ܣܳܡ ♱

ܓ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܟܽܠ ܫܽܘܠܛܳܢܳܐ ܐܺܝܬ ܠܶܗ ܒܰܫܡܰܝܳܐ ܘܥܰܠ ܐܰܪܥܳܐ܆ ܒܗܰܘ ܕܟܽܠ ܡܶܕܶܡ ܒܶܗ ܐܶܬܒܪܺܝ ܘܡܶܬܢܛܰܪ܆ ܒܗܰܘ ܕܗܳܠܶܝܢ ܫܡܰܝܳܢ̈ܶܐ ܩܳܝܡܺܝܢ ܘܗܳܠܶܝܢ ܕܥܰܠ ܐܰܪܥܳܐ ܡܶܬܚܰܝܠܺܝܢ ♱

ܕ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܰܠܠܶـܓܝܽܘܢ ܕܫܺܐܕ̈ܶܐ ܠܰܬܗܽܘܡܳܐ ܒܝܰܕ ܚܙܺܝܪ̈ܶܐ ܫܰܕܰܪ܆ ܠܦܶܪܥܽܘܢ ܕܶܝܢ ܝܰܩܺܝܪ ܠܶـܒܳܐ ܡܛܰܒܥܳܐ ܥܰܡ ܡܰܪ̈ܟܒܳܬܳܐ ܘܦܰܪ̈ܳܫܶܐ ܕܺܝܠܶܗ ܥܒܰܕ ♱

ܗ: ܡܰܘܡܶܐ ܐ̱ܢܳܐ ܠܳܟ ܒܗܰܘ ܕܰܠܪܽܘܚܳܐ ܚܰܪܫܳܐ ܘܰܕܠܳܐ ܡܰܡܠ̱ـܠܳܐ ܥܰܡ ܚܰܝܠܳܐ ܘܫܽܘܠܛܳܢܳܐ ܐܰܠܳܗܳܝܳܐ ܐܶܡܰܪ: ܕܦܽܘܩ ܡܶܢ ܗܳܢܳܐ ܒܰܪܢܳܫܳܐ ܘܠܳܐ ܬܽܘܒ ܬܶܥܽܘܠ ܠܶܗ ♱

ܘ: ܕܚܰܠ ܡܶܢ ܫܡܳܐ ܕܚܺܝܠܳܐ ܕܰܐܠܳܗܳܐ܆ ܡܶܢ ܗܰܘ ܕܟܽܠܳـܗ̇ ܒܪܺܝܬܳܐ ܕܡܰܠܰܐܟ̈ܶܐ ܘܪ̈ܺܝܫܰܝ ܡܰܠܰܐܟ̈ܶܐ ܪܳܬܳܐ܆ ܗܰܘ ܕܰܩܕܳܡܰܘܗ̱ܝ ܟܽܠ ܚܰܝ̈ܠܶܐ ܘܰܡܫܰܡ̈ܫܳܢܶܐ ܥܰܡ ܕܶܚܠܬܳܐ ܩܳܝܡܺܝܢ܆ ܠܘܳܬ ܗܰܘ ܕܠܳܐ ܟܪ̈ܽܘܒܶܐ ܐܳܦܠܳܐ ܣܪ̈ܳܦܶܐ ܕܰܢܚܽܘܪܽܘܢ ܒܶܗ ܣܳܟ ܡܰܡܪܚܺܝܢ܆ ܗܰܘ ܕܙܳܝܥܺܝܢ ܡܶܢܶܗ ܫܡܰܝܳܢ̈ܶܐ ܘܪܳܬܺܝܢ ܡܶܢܶܗ ܬܗܽܘ̈ܡܶܐ ♱

ܙ: ܕܚܰܠ ܡܶܢ ܫܡܳܐ ܕܚܺܝܠܳܐ܆ ܗܰܘ ܕܰܠܡܳܪܽܘܕܳܐ ܩܰܕܡܳܝܳܐ ܒܫܺܫ̈ܠܳـܬܳܐ ܕܚܶܫܽܘܟܳܐ ܠܰܬܗܽܘܡܳܐ ܫܰܕܰܪ ♱

ܚ: ܕܚܰܠ ܡܶܢ ܕܺܝܢܳܐ ܕܰܥܬܺܝܕ ܘܙܽܘܥ ܘܫܰܢܳܐ. ܠܰܓܒܺܝܠܬܳܐ ܕܰܐܠܳܗܳܐ ܠܳܐ ܬܶܬܩܰܪܰܒ. ܠܰܓܒܺܝܠܬܳܐ ܕܰܐܠܳܗܳܐ ܠܳܐ ܬܰܒܶܐܫ. ܒܰܓܒܺܝܠܬܳܐ ܕܰܐܠܳܗܳܐ ܠܳܐ ܬܶܥܡܰܪ. ܠܳܐ ܓܶܝܪ ܐܺܝܬܶܝܗ̇ ܒܶܝܬ ܡܰܥܡܪܳܐ ܕܫܺܐܕ̈ܶܐ܆ ܐܷܠܳܐ ܗܰܝܟܠܳܐ ܘܒܶܝܬ ܡܰܥܡܪܳܐ ܕܰܐܠܳܗܳܐ ܚܰܝܳܐ. ܗܽܘ ܓܶܝܪ ܐܶܡܰܪ: ܕܶܐܥܡܰܪ ܒܗܽܘܢ ܘܶܐܗܰܠܶܟ ܒܗܽܘܢ܆ ܘܶܐܗܘܶܐ ܠܗܽܘܢ ܐܰܠܳܗܳܐ ܘܗܶܢܽܘܢ ܢܶܗܘܽܘܢ ܠܺܝ ܥܰܡܳܐ. ܠܳܟ ܕܶܝܢ ܣܳܡܳܟ ܢܕܺܝܕܳܐ ܘܨܰܕܝܳܐ ܘܡܶܐܟܽܘܠܬܳܐ ܠܢܽܘܪܳܐ ♱

ܛ: ܡܰܘܡܶܐ ܐ̱ܢܳܐ ܠܳܟ ܒܰܐܠܳـܗܳܐ ܗܰܘ ܙܰܟܳܝܳܐ ܘܩܰܕܺܝܫܳܐ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ: ܐܶܬܪܰܚܩ ܡܶܢ ܐܰܡ̈ܗܳܬܶܗ ܕܰܐܠܳܗܳܐ ܘܫܰܢܳܐ ܠܰܐܪܥܳܐ ܠܳܐ ܡܶܬܗܰܠܟܳܢܺܝܬܳܐ ܘܰܕܠܳܐ ܡܰܝ̈ܳܐ: ܡܶܛܽܠ ܕܬܰܡܳܢ ܐܺܝܬܶܝܗ̇ ܕܽܘܟܬܳܐ ܕܺܝܠܳܟ ♱

ܐܶܬܥܰܩܪ ܘܶܐܬܛܰܠܩ. ܫܰܢܳܐ ܠܺܝܛܳܐ ܡܶܢ ܓܒܺܝܠܬܳܐ ܕܰܐܠܳܗܳܐ܆ ܪܽܘܚܳܐ ܛܰܢܦܳܐ܆ ܪܽܘܚܳܐ ܕܛܳܥܝܽܘܬܳܐ܆ ܡܶܐܟܽܘܠܬܳܐ ܕܢܽܘܪܳܐ. ܐܶܣܬܰܪܗܰܒ ܘܠܳܐ ܬܶܥܨܶܐ. ܡܶܥܩܰܪ ܓܶܝܪ ܢܶܥܩܪܳܟ ܐܰܠܳܗܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܟܰܕ ܡܶܢ ܟܽܠܳـܗ̇ ܓܒܺܝܠܬܶܗ ܛܳܪܶܕ ܠܳܟ܆ ܘܰܡܛܰܠܶܩ ܘܰܡܫܰܢܶܩ ܠܳܟ ܒܢܽܘܪܳܐ ܕܠܳܐ ܕܳܥܟܳܐ. ܠܗܳܢܳܐ ܕܶܝܢ ܥܒܳܕܳܐ ܕܺܐܝܕܰܘ̈ܗ̱ܝ ܡܫܰܘܙܶܒ ܥܕܰܡܳܐ ܠܝܰܘܡܳܐ ܕܦܽܘܪܩܳܢܳܐ܆ ܡܶܛܽܠ ܕܕܺܝܠܶـܗܽ ܗ̱ܘ ܚܰܝܠܳܐ ܘܽܐܘܚܕܳܢܳܐ ܘܫܽܘܠܛܳܢܳܐ܆ ܘܠܶܗ ܬܶܫܒܽܘܚܬܳܐ ܡܰܣܩܺܝܢܰܢ܆ ܗܳܫܳܐ ܘܰܠܥܳܠܰܡ ܥܳܠܡܺܝܢ܀

ܨܠܽܘܬܳܐ ܩܦܺܝܣܬܳܐ ܕܡܰܘܡܝܳܢܘܬܳܐ:

ܒܰܫܡܳܟ ܡܳܪܝܳܐ ܐܰܠܳܗܳܐ ܚܳܬܶܡ ܐ̱ܢܳܐ ܘܛܳܪܶܕ ܐ̱ܢܳܐ ܠܟܽܠ ܪܽܘܚܳܐ ܒܺܝܫܬܳܐ ܘܛܰܢܦܬܳܐ ܡܶܢ ܓܒܝܺܠܬܳܐ ܘܰܥܒܳܕܳܐ ܕܺܐܝ̈ܕܰܝܟ. ܟܺܐܝ ♱ ♱ ♱ ܒܰܡܥܰܩܡܳܐ ܘܡܳܪܽܘܕܳܐ ܘܕܰܟܳܐ ܠܰܐܡ̈ܗܳܬܳܟ ܡܶܢ ܪ̈ܽܘܚܶܐ ܕܛܳܥܝܽܘܬܳܐ. ܕܚܰܠ ♱ ♱ ♱ ܡܶܢ ܕܺܝܢܳܐ ܕܰܥܬܺܝܕ܆ ܐܳܘ ܪܽܘܚܳܐ ܛܰܢܦܳܐ܆ ܘܠܰܓܒܝܺܠܬܳܐ ܕܰܐܠܳܗܳܐ ܠܳܐ ܬܶܬܩܰܪܰܒ. ܠܳܐ ܓܶܝܪ ܐܺܝܬܶܝܗ̇ ܒܶܝܬ ܡܰܥܡܪܳܐ ܕܫܺܐܕ̈ܶܐ܆ ܐܷܠܳܐ ܗܰܝܟܠܳܐ ܗ̱ܝ ܕܰܐܠܳܗܳܐ. ܡܰܘܡܶܐ ܐ̱ܢܳܐ ܠܳܟ ♱ ♱ ♱ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ: ܐܶܬܥܰܩܪ ܘܶܐܬܛܰܠܩ ܘܶܐܣܬܰܪܗܰܒ ܘܠܳܐ ܬܶܥܨܶܐ܆ ܪܽܘܚܳܐ ܛܰܢܦܳܐ܀

ܟܦܽܘܪܝܳܐ ܕܰܒܣܳܛܳܢܳܐ

ܘܦܳܢܝܳܐ ܡܶܬܥܰܡܕܳܢܺܝܬܳܐ ܐܰܦܶܝ̈ܗ̇ ܠܡܰܥܪܒܳܐ ܘܰܐܦܰܘ̈ܗ̱ܝ ܕܟܳܗܢܳܐ ܠܡܰܕܢܚܳܐ܆ ܘܡܰܟܦܪܳܐ ܠܳـܗ̇ ܒܣܳܛܳܢܳܐ ܬܠܳܬ ܙܰܒ̈ܢܺܝܢ. ܘܠܳܒܟܳܐ ܥܰܪܳܒܬܳܐ ܒܺܐܝܕܳܗ̇ ܕܣܶܡܳܠܳܐ ܐܺܝܕܳܗ̇ ܕܣܶܡܳܠܳܐ ܕܡܶܬܥܰܡܕܳܢܺܝܬܳܐ ܘܳܐܡܪܳܐ ܚܠܳـܦܶܝܗ̇ ܗܳܟܰܢܳܐ:

ܟܳܦܪܳܐ ܐ̱ܢܳܐ ܐܶܢܳܐ (ܦܠܳـܢܺܝܬ) ܒܣܳܛܳܢܳܐ ܘܰܒܟܽܠܗܽܘܢ ܥܒܳܕܰܘ̈ܗ̱ܝ ܘܰܒܟܽܠܳـܗ̇ ܦܳܠܚܽܘܬܶܗ ܘܰܒܟܽܠܳـܗ̇ ܕܶܚܠܬܶܗ ܘܰܒܟܽܠܳـܗ̇ ܡܶܙܕܰܝܚܳܢܽܘܬܶܗ ܘܰܒܟܽܠܳـܗ̇ ܛܳܥܝܽܘܬܶܗ ܥܳܠܡܳܢܳܝܬܳܐ ܘܰܒܟܽܠ ܕܫܳܠܶܡ ܠܶܗ ܘܳܐܙܶܠ ܒܳܬܪܶܗ܀

ܡܰܘܕܝܳܢܽܘܬܳܐ ܕܒܰܡܫܺܝܚܳܐ

ܘܦܳܢܝܳܐ ܡܶܬܥܰܡܕܳܢܺܝܬܳܐ ܠܡܰܕܢܚܳܐ ܘܟܳܗܢܳܐ ܠܡܰܥܪܒܳܐ ܘܠܳܒܟܳܐ ܥܰܪܳܒܬܳܐ ܒܺܐܝܕܳܗ̇ ܕܝܰܡܺܝܢܳܐ ܐܺܝܕܳܗ̇ ܕܝܰܡܺܝܢܳܐ ܕܡܶܬܥܰܡܕܳܢܺܝܬܳܐ ܘܳܐܡܪܳܐ ܚܠܳـܦܶܝܗ̇ ܡܰܘܕܝܳܢܽܘܬܳܐ ܗܳܕܶܐ ܬܠܳܬ ܙܰܒ̈ܢܺܝܢ:

ܫܳܠܡܳܐ ܐ̱ܢܳܐ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܐܶܢܳܐ (ܦܠܳـܢܺܝܬ) ܘܰܠܟܽܠܶܗ ܝܽܘܠܦܳܢܳܐ ܕܶܐܬܓܥܶܠ ܡܶܢܳܟ ܐܰܠܳܗܳܐܺܝܬ ܒܝܰܕ ܢܒܺܝ̈ܶܐ ܘܰܫܠܺـܝ̈ܚܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ. ܡܰܘܕܝܳܐ ܐ̱ܢܳܐ ܘܰܡܗܰܝܡܢܳܐ ܐ̱ܢܳܐ ܘܥܳܡܕܳܐ ܐ̱ܢܳܐ ܒܳܟ ܘܒܰܐܒܽܘܟ ܘܰܒܪܽܘܚܳܟ ܚܰܝܳܐ ܩܰܕܺܝܫܳܐ܀

ܘܟܳܗܢܳܐ ܐܳܡܰܪ ܘܥܳܢܝܳܐ ܥܰܪܳܒܬܳܐ ܒܳܬܪܶܗ ܗܳܟܰܢܳܐ ܬܠܳܬ ܙܰܒ̈ܢܺܝܢ:

ܠܡܰܥܪܒܳܐ:

ܟܶܦܪܶܬ ܒܣܳܛܳܢܳܐ...

ܟܶܢ ܠܡܰܕܢܚܳܐ:

...ܘܰܐܘܕܺܝܬ ܒܰܡܫܺܝܚܳܐ ܐܰܠܳܗܰܢ.

ܘܡܶܚܕܳܐ ܟܳܗܢܳܐ ܐܳܡܰܪ:

ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܥܰܡܳܐ: ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܘܽܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ. ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ. ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ. ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚ̈ܛܳܗܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀ ܣ‍ܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܘܦܳܢܶܐ ܟܳܗܢܳܐ ܠܡܰܕܢܚܳܐ ܘܰܡܨܰܠܶܐ ܟܰܕ ܦܫܺܝܛ:

ܡܰܘܕܶܝܢܰܢ ܠܳܟ ܡܳܪܝܳܐ܆ ܥܰܠ ܐܰܦ̈ܰܝ ܗܳܝ ܕܰܐܫܘܺܝܬ݁ ܠܰܐܡ̈ܗܳܬܳܟ ܕܢܶܬܩܰܪ̈ܒܳܢ ܠܰܥܡܳܕܳܐ ܩܰܕܺܝܫܳܐ ܘܰܕܢܶܟܦܪ̈ܳܢ ܡܰܢ ܒܒܺܝܫܳܐ. ܢܶܫ̈ܠܡܳܢ ܕܶܝܢ ܠܰܘ ܠܒܶܣܪܳܐ ܘܰܕܡܳܐ܆ ܐܷܠܳܐ ܠܛܰܝܒܽܘܬܳܐ ܕܺܝܠܳܟ ܘܰܠܪܶܚܡܰܬ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܟ܆ ܡܳܪܝܳܐ ܕܶܝܢ ܕܺܝܠܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ. ܐܶܨܛܒܰܝ ܕܶܝܢ ܡܳܪܝܳܐ ܕܰܬܫܰܕܰܪ ܥܠܰܝܗܶܝܢ ܪܽܘܚܳܟ ܩܰܕܺܝܫܳܐ܆ ܘܰܐܓܶܢ ܘܰܒܨܺܝ ܟܽܠܗܽܘܢ ܗܰܕܳܡܰܝ̈ܗܶܝܢ ܘܩܰܕܶܡ ܕܰܟܳܐ ܘܩܰܕܶܫ ܐܶܢܶܝܢ܆ ܐܰܝܟܰܢܳܐ ܕܢܶܫ̈ܬܰܘ̈ܝܳܢ ܠܰܡܫܺܝܚܽܘܬܳܐ ܩܰܕܺܝܫܬܳܐ ܘܰܠܗܰܝܡܳܢܽܘܬܳܐ ܡܫܰܡܠܰܝܬܳܐ ܒܶܗ ܒܰܡܫܺܝܚܳܐ ܝܶܫܽܘܥ ܡܳܪܰܢ܆ ܕܥܰܡܶܗ ܡܒܰܪܟܳܐ ܐܺܝܬܰܝܟ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ܆ ܗܳܫܳܐ ܘܰܠܥܳܠܡܺܝܢ܀

ܫܶܠܡܰܬ ܬܶܫܡܶܫܬܳܐ ܩܰܕܡܳܝܬܳܐ