ܬܶܫܡܶܫܬܳܐ ܬܪܰܝܳܢܺܝܬܳܐ
ܕܡܶܬܥܰܡ̈ܕܳܢܝܳܬܳܐ

ܩܳܐܶܡ ܟܳܗܢܳܐ ܩܕܳܡ ܡܰܥܡܽܘܕܺܝܬܳܐ ܘܦܳܬܰܚ ܠܶܗ ܠܽܐܘܙܢܳܐ ܕܚܰܝ̈ܶܐ ܘܡܳܠܶܐ ܡܰܝ̈ܳܐ ܒܽܐܘܙܢܳܐ܆ ܫܰܚܺܝ̈ܢܶܐ ܒܝܰܡܺܝܢܶܗ ܘܩܰܪܺܝܪ̈ܶܐ ܒܣܶܡܳܠܶܗ. ܟܰܕ ܝܰܡܺܝܢܶܗ ܠܥܶܠ ܡܶܢ ܣܶܡܳܠܶܗ ܨܠܺܝܒܳܐܺܝܬ. ܐܰܝܟܰܢܳܐ ܕܢܶܗܘܽܘܢ ܒܰܙܢܳܐ ܡܡܰܫܚܳܐ ܠܦܽܘܬ ܫܽܘܚ̈ܠܳـܦܶܐ ܕܫܰܢ̱ܬܳܐ ܘܳܐܡܰܪ ܟܰܕ ܡܡܰܙܶܓ ܡܰܝ̈ܳܐ:

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚ̈ܰܛܳܝܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܨܠܽܘܬ݂ܐ ܕܫܽܘܪܳܝܳܐ

ܟܳܗܢܳܐ: ܡܰܙܶܓ ܡܳܪܝܳܐ ܒܡܰܝ̈ܳܐ ܗܳܠܶܝܢ܆ ܒܡܶܬܟܰܫܦܳܢܽܘܬܳܐ ܕܰܒܨܺܝܪܽܘܬܰܢ܆ ܚܰܝܠܳܐ ܘܡܰܥܒܕܳܢܽܘܬܳܐ ܕܪܽܘܚܳܟ ܩܰܕܺܝܫܳܐ܆ ܐܰܝܟܰܢܳܐ ܕܢܶܗܘܽܘܢ ܟܰܪܣܳܐ ܪܽܘܚܳܢܳܝܬܳܐ ܘܟܽܘܪܳܐ ܕܢܳܣܶܟ ܠܠܳܐ ܡܶܬܚܰܒܠܳـܢܽܘܬܳܐ. ܘܠܰܐܡ̈ܗܳܬܳܟ ܗܳܠܶܝܢ ܕܥܳܡ̈ܕܳܢ ܒܗܽܘܢ܆ ܗܰܒ ܕܢܶܗܘܽܘܢ ܠܗܶܝܢ ܠܒܽܘܫܳܐ ܕܠܳܐ ܡܶܬܚܰܒܠܳـܢܽܘܬܳܐ ܘܰܫܪܳܝܳܐ ܕܡܶܢ ܦܟܳܪ̈ܶܐ ܕܰܚܛܺܝܬܳܐ܆ ܒܫܰܦܺܝܪܽܘܬ ܨܶܒܝܳܢܳܐ ܕܺܝܠܳܟ ܘܰܒܪܶܚܡܰܬ ܐ̱ܢܳܫܽܘܬܳܟ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܒܡܰܥܒܕܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܘܰܡܚܰܦܶܐ ܟܳܗܢܳܐ ܠܡܰܝ̈ܳܐ ܒܡܰܢܕܺܝܠܳܐ ܚܶܘܳܪܬܳܐ ܘܣܳܐܶܡ ܨܠܺܝܒܳܐ ܙܥܽܘܪܳܐ ܘܡܰܢܗܪܺܝܢ ܬܪܶܝܢ ܩܶܪ̈ܝܽܘܢܶܐ ܡܶܟܳܐ ܘܡܶܟܳܐ.

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡ̈ܫܳܢܶܐ: ܥܰܡ ܪܽܘܚܳܐ ܕܺܝܠܳܟ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܟܳܗܢܳܐ: ܐܰܒܳܐ ܩܰܕܺܝܫܳܐ܆ ܗܰܘ ܕܒܺܐܝ̈ܕܰܝܳܐ ܕܰܫܠܺـܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܝܰܗ̱ܒܬ ܪܽܘܚܳܐ ܕܺܝܠܳܟ ܩܰܕܺܝܫܳܐ ܠܗܳܢܽܘܢ ܕܥܳܡܕܺܝܢ ܗ̱ܘܰܘ: ܘܳܐܦ ܗܳܫܳܐ܆ ܟܰܕ ܒܛܶܠܳـܢܺܝܬܳܐ ܕܺܐܝ̈ܕܰܝܳܐ ܕܺܝܠܝ ܡܶܬܚܰܫܰܚ ܐܰܢ̱ܬ܆ ܫܰܕܰܪ ܪܽܘܚܳܐ ܕܺܝܠܳܟ ܗܰܘ ܩܰܕܺܝܫܳܐ ܥܰܠ ܗܳܠܶܝܢ ܕܰܥܬܺܝ̈ܕܳܢ ܕܢܶܥܡ̈ܕܳܢ܆ ܐܰܝܟܰܢܳܐ ܕܟܰܕ ܢܶܬܡ̈ܠܳܢ ܡܶܢܶܗ ܘܡܶܢ ܫܽܘܟܳܢܰܘ̈ܗ̱ܝ ܐܰܠܳܗܳܝ̈ܶܐ܆ ܢ̈ܶܬܠܳܢ ܦܺܐܪ̈ܶܐ ܚܰܕ ܒܰܬܠܳـܬܺܝܢ ܘܒܶܫܬܺܝܢ ܘܒܰܡܳܐܐ܀

ܬܠܳܝܬܳܐ

ܡܶܢܳܟܺ ܗ̱ܝ ܓܶܝܪ܆ ܐܳܘ ܐܰܒܳܐ ܕܢܽܘܗܪ̈ܶܐ܆ ܟܽܠ ܡܰܘܗܰܒܬܳܐ ܛܳܒܬܳܐ ܘܟܽܠ ܫܽܘܟܳܢܳܐ ܡܫܰܡܠܝܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܠܪܽܘܚܳܐ ܩܰܕܺܝܫܳܐ܀

ܘܬܴܠܶܐ ܩܳܠܶܗ ܟܰܕ ܦܫܺܝ̈ܛܳܢ ܐܺܝ̈ܕܰܘܗ̱ܝ

ܘܛܰܦܶܣ ܘܨܰܠܶܡ ܠܰܡܫܺܝܚܳܟ ܒܗܳܠܶܝܢ ܕܰܥܬܺܝ̈ܕܳܢ ܕܢܶܬܝ̈ܰܠܕܳܢ ܡܶܢ ܕܪܺܝܫ ܒܝܰܕ ܕܳܘܝܽܘܬܳܐ ܕܺܝܠܝ. ܣܰܬܶܬ ܐܶܢܶܝܢ ܥܰܠ ܫܶܬܶܐܣܬܳܐ ܕܰܫܠܺـܝ̈ܚܶܐ ܘܕܰܢܒܺܝ̈ܶܐ܆ ܘܨܽܘܒ ܐܶܢܶܝܢ ܢܶܨܒܬܳܐ ܕܰܫܪܳܪܳܐ ܒܥܺܕܬܳܐ ܕܺܝܠܳܟ ܩܰܕܺܝܫܬܳܐ ܩܰܬܽܘܠܺܝܩܺܝ܆ ܐܰܝܟܰܢܳܐ ܕܟܰܕ ܢܶܫܬܰܘܫ̈ܛܳܢ ܒܫܰܦܺܝܪܽܘܬ ܕܶܚܠܬܳܐ܆ ܢܶܫܬܰܒܰܚ ܒܺܐܝ̈ܕܰܝܗܶܝܢ ܫܡܳܐ ܗܰܘ ܕܡܶܫܬܰܒܰܚ ܩܕܳܡ ܥܳܠܡ̈ܶܐ܆ ܕܺܝܠܳܟ ܐܰܠܳܗܳܐ ܐܰܒܳܐ ܘܕܺܝܚܺܝܕܳܝܳܐ ܒܪܳܐ ܕܺܝܠܳܟ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܳܚܳܐ ܕܡܶܫܚܳܐ ܕܙܰܝܬܳܐ

ܟܳܗܢܳܐ ܛܳܡܶܫ ܟܪܳܬܶܗ ܒܙܳܒܽܘܪܳܐ ܕܡܶܫܚܳܐ ܕܙܰܝܬܳܐ ܘܪܳܫܶܡ ܠܗܳܝ ܕܥܳܡܕܳܐ ܒܶܝܬ ܥܰܝܢܶܝ̈ܗ̇. ܟܰܕ ܒܟܽܠ ܩܪܳܝܬܳܐ ܪܳܫܶܡ ܨܠܺܝܒܳܐ ܘܳܐܡܰܪ ܗܳܟܰܢܳܐ:

ܡܶܬܪܰܫܡܳܐ (ܦܠܳـܢܺܝܬ) ܒܡܶܫܚܳܐ ܕܚܰܕܽܘܬܳܐ ܠܽܘܩܒܰܠ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܘܰܠܡܶܬܛܰܥܡܳܢܽܘܬܳܐ ܕܙܰܝܬܳܐ ܛܳܒܳܐ ܒܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ ܒܰܫܡܳܐ ܕܰܐܒܳܐ ♱

ܡܫܰܡܫܳܢܳܐ: ܐܰܡܺܝܢ.

ܟܳܗܢܳܐ: ܘܕܰܒܪܳܐ ♱

ܡܫܰܡܫܳܢܳܐ: ܐܰܡܺܝܢ.

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡܫܳܢܳܐ: ܐܰܡܺܝܢ.

ܥܶܩܒܳܐ: ܩܳܢܽܘܢܳܐ ܝܰܘܢܳܝܳܐ

ܝܰܒܶܒ ܒܬܶܫܒܽܘܚܬܳܐ܆ ܟܰܕ ܒܐ̱ܪܳܙ ܚܶܙܘܳܐ ܐܰܨܶܕ ܗ̱ܘܳܐ܆ ܚܰܒܩܽܘܩ ܡܒܰܕܶܩ ܗ̱ܘܳܐ ܠܚܽܘܕܳܬܳܐ ܕܰܒܢܰܝ̈ܢܳܫܳܐ. ܘܰܐܙܥܶܩ ܒܰܪ̱ܬ ܩܳܠܳܐ ܕܰܒܪܽܘܚ ܩܽܘܕܫܳܐ ܐܶܬܟܰܪܙܰܬ: ܕܰܡܒܰܕܩܳܐ ܡܓܰܫܡܳܢܽܘܬܶܗ ܕܡܶܠܬܳܐ ܕܠܳܐ ܦܽܘܫܳܩ܆ ܗܳܝ ܕܫܰܦܠܰܬ ܘܰܙܟܳܬ ܠܚܰܝܠܳܐ ܟܽܠܶܗ ܕܓܰܢ̱ܒܳܪ̈ܶܐ܀

ܚܽܘܣܳܝܳܐ

ܡܫܰܡܫܳܢܳܐ: ܣܛܰܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬ݂ܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ݂ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܫܽܘܒܚܳܐ ܠܰܬܠܺܝܬܳܝܽܘܬܳܐ ܡܫܰܒܚܰܬ ܒܟܽܠ ܘܕܰܟܝܰܬ ܒܟܽܠ ܘܕܰܠܥܶܠ ܡܶܢ ܐܽܘܣܺܝܰܐ ܘܫܰܘܝܰܬ ܒܰܟܝܳܢܳܐ ܘܰܣܓܺܝܕܰܬ ܒܟܽܠ ܘܩܰܕܺܝܫܰܬ ܒܟܽܠ. ܘܗܺܝ ܐܰܠܳܗܳܐ ܥܳܒܽܘܕܳܐ ܘܒܳܪܽܘܝܳܐ ܕܟܽܠ܆ ܗܳܝ ܕܰܒܡܶܢܝܳܢܳܐ ܚܕܳܢܳܝܳܐ ܘܰܬܠܺܝܬܳܝܳܐ: ܡܶܛܽܠ ܗܳܝ ܟܰܕ ܗܺܝܽܘܬܳܐ ܕܽܐܘܣܺܝܰܐ܆ ܘܰܡܦܰܪܫܽܘܬܳܐ ܕܰܩܢܳܘ̈ܡܶܐ ܡܶܬܗܰܝܡܢܳܐ. ܘܠܳـܗ̇ ܟܳܦܳܐ ܘܣܳܓܕܳܐ ܟܽܠ ܒܽܘܪܟܳܐ ܕܰܫܡܰܝܳܢ̈ܶܐ ܘܕܰܐܪ̈ܥܳܢܳܝܶܐ ܘܕܰܠܬܰܚܬ ܡܶܢ ܐܰܪܥܳܐ܆ ܘܟܽܠ ܠܶـܫܳܢܳܐ ܠܳـܗ̇ ܡܰܘܕܶܐ ܘܰܡܪܰܡܪܶܡ ܘܰܡܩܰܠܶܣ܆ ܣܳܓܶܕ ܟܺܝܬ ܘܰܡܫܰܒܰܚ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡܫܳܢܳܐ: ܩܕܳܡ ܐܶܡܳܐ ܕܚܰܝ̈ܶܐ ܘܰܡܥܺܝܢܳܐ ܐ̱ܪܳܙܳܢܳܝܬܳܐ ܒܶܣ̈ܡܶܐ ܡܶܬܬܣܺܝܡܺܝܢ. ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ.

ܥܰܡܳܐ: ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܺܝܠܰܢ܆ ܗܰܘ ܝܳܗܽܘܒܳܐ ܕܟܽܠܳـܗ̇ ܩܰܕܺܝܫܽܘܬܳܐ ܘܦܳܪܽܘܩܳܐ ܕܓܶܢܣܳܐ ܕܰܒܢܰܝ̈ܢܳܫܳܐ܆ ܗܰܘ ܕܰܠܗܳܠܶܝܢ ܕܒܰܐܪܥܳܐ ܠܕܽܘܒܳܪܳܐ ܛܳܒܳܐ ܘܰܫܡܰܝܳܢܳܐ ܫܰܚܠܶܦܬ܆ ܘܚܰܕܶܬܬ ܠܰܢ ܐܽܘܪܚܳܐ ܕܚܰܝ̈ܶܐ ܘܰܕܦܽܘܪܩܳܢܳܐ ܒܝܰܕ ܡܰܝ̈ܳܐ ܘܪܽܘܚܳܐ܆ ܗܰܘ ܕܩܰܪܶܒܬ ܠܰܢ ܒܚܽܘܒܶܗ ܕܰܡܫܺܝܚܳܐ ܕܺܝܠܳܟ ܠܚܰܝ̈ܶܐ ܗܳܠܶܝܢ ܘܰܐܩܺܝܡܬ ܠܰܢ ܠܡܶܣ̈ܟܺܢܶܐ ܘܚܰܛܳܝ̈ܶܐ ܥܰܒܕܰܝ̈ܟ ܩܕܳܡ ܬܶܫܒܽܘܚܬܳܐ ܕܺܝܠܳܟ. ܐܰܢ̱ܬ ܡܳܪܝܳܐ ܡܳܪܰܢ܆ ܟܰܕ ܫܽܘܒܩܳܢܳܐ ܠܰܡܚܺܝܠܽܘܬܳܐ ܕܺܝܠܰܢ ܡܫܰܟܶܢ ܐܰܢ̱ܬ܆ ܩܰܒܶܠ ܠܒܶܣ̈ܡܶܐ ܗܳܠܶܝܢ ܡܶܢ ܐܺܝ̈ܕܰܝܳܐ ܕܺܝܠܰܢ ܚܰܛܳܝ̈ܶܐ ܘܰܡܠܺܝ ܠܰܢ ܡܶܢ ܚܰܝܠܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ ܘܡܶܢ ܛܰܝܒܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ܆ ܘܰܐܣܦܶܩ ܠܰܢ ܕܢܶܗܘܶܐ ܡܫܰܡ̈ܫܳܢܶܐ ܕܕܺܝܰܬܺܩܺܝ ܕܺܝܠܳܟ ܚܕܰܬܳܐ܆ ܐܰܝܟܰܢܳܐ ܕܢܶܗܘܶܐ ܫܳܘܶܝܢܰܢ ܕܥܰܡ ܝܺܕܰܥܬܳܐ ܟܺܝܬ ܘܡܶܬܬܰܘܝܳܢܽܘܬܳܐ ܢܫܰܡܶܫ ܠܰܫܡܳܐ ܕܺܝܠܳܟ ܡܝܰܩܰܪ ܒܟܽܠ ܘܰܐܝܟ ܫܽܘܟܳܢܳܐ ܕܰܡܫܺܝܚܳܐ ܕܺܝܠܳܟ܆ ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠܡ̈ܶܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܩܽܘܕܳܫ ܡܰܝ̈ܳܐ ܕܰܥܡܳܕܳܐ

ܩܳܠܳܐ ܒܩܺܝܢܬܳܐ܆ ܩܽܘܩܳܝܳܐ

ܦܶܬܓܳܡܳܐ: ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ ܗܰܠܶـܠܽܘܝܰܗ.

ܝܽܘܚܰܢܳܢ ܡܰܙܶܓ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܡܫܺܝܚܳܐ ܩܰܕܶܫ ܐܶܢܽܘܢ ܘܰܢܚܶܬ ܘܰܥܡܰܕ ܒܗܽܘܢ܆ ܒܗܰܘ ܥܶܕܳܢܳܐ ܕܰܣܠܶܩ ܡܶܢ ܡܰܝ̈ܳܐ܆ ܫܡܰܝܳܐ ܘܰܐܪܥܳܐ ܦܠܰܓܘ ܠܶܗ ܐܺܝܩܳܪܳܐ܆ ܫܶܡܫܳܐ ܐܰܪܟܶܢ ܙܰܠܺـܝ̈ܩܰܘܗ̱ܝ ܘܟܰܘܟ̈ܒܶܐ ܣܓܶܕܘ ܠܶܗ܆ ܠܗܰܘ ܕܩܰܕܶܫ ܢܰܗܪ̈ܰܘܳܬܳܐ ܘܡܰܒܽܘ̈ܥܶܐ ܟܽܠܗܽܘܢ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܦܶܬܓܳܡܳܐ: ܝܰܗ̱ܒܬ ܡܰܘܗ̈ܒܳܬܳܐ ܠܰܒܢܰܝ̈ܢܳܫܳܐ ܗܰܠܶـܠܽܘܝܰܗ.

ܡܰܢܽܘ ܚܙܳܐ ܬܰܪܬܶܝܢ ܐܰܚ̈ܘܳܢ ܫܰܦܺܝܪ̈ܳܬܳܐ܆ ܐܰܝܟ ܡܰܥܡܽܘܕܺܝܬܳܐ ܕܟܺܝܬܳܐ ܘܥܺܕܬܳܐ ܩܰܕܺܝܫܬܳܐ܆ ܕܰܚܕܳܐ ܝܳܠܕܳܐ ܘܰܐ̱ܚܪܺܬܳܐ ܡܪܰܒܝܳܐ ܝܰܠܕ̈ܶܐ ܚܰܕ̈ܬܶܐ ܐܳܦ ܪ̈ܽܘܚܳܢܳܝܶܐ. ܡܳܐ ܕܝܶܠܕܰܬ ܡܰܥܡܽܘܕܺܝܬܳܐ ܡܶܢ ܓܰܘ ܡܰܝ̈ܳܐ܆ ܩܰܒܶܠܬ݂ܶܗ ܥܺܕܰܬ ܩܽܘܕܫܳܐ ܘܩܰܪܶܒܬ݂ܶܗ ܠܡܰܕܒܚܳܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܗܳܪܟܳܐ ܡܪܺܝܡ ܟܳܗܢܳܐ ܡܰܢܕܺܝܠܳܐ ܘܦܳܬܰܚ ܠܽܐܘܙܢܳܐ

ܫܘ̄ܒ: ܬܶܗܪܳܐ ܪܰܒܳܐ ܡܳܐ ܕܦܳܫܶܛ ܝܰܡܺܝܢܶܗ ܟܳܗܢܳܐ܆ ܘܦܳܬܰܚ ܠܳـܗ̇ ܠܡܰܥܡܽܘܕܺܝܬܳܐ ܘܥܺܝܪ̈ܶܐ ܠܥܶܠ ܬܳܗܪܺܝܢ. ܩܳܐܶܡ ܥܰܦܪܳܐ ܠܥܶܠ ܡܶܢ ܓܰܘܙܰܠܬܳܐ܆ ܘܩܳܪܶܐ ܠܪܽܘܚܳܐ ܕܬܺܐܬܶܐ ܡܶܢ ܪܰܘܡܳܐ. ܘܥܳܢܝܳܐ ܠܶܗ ܩܰܠܺܝܠܳܐܺܝܬ ܘܨܶܒܝܳܢܶܗ ܥܳܒܕܳܐ܆ ܘܰܡܩܰܕܫܳܐ ܡܰܥܡܽܘܕܺܝܬܳܐ ܠܚܽܘܣܳܝܳܐ ܕܚܰܘ̈ܒܶܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܡܶܢ ܥܳܠܰܡ: ܡܥܺܝܢܳܐ ܕܚܰܝ̈ܶܐ ܐܶܬܦܰܬܚܰܬ ܡܰܥܡܽܘܕܺܝܬܳܐ܆ ܘܰܐܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܒܰܚܢܳܢܶܗ ܩܰܕܫܳܗ̇. ܐܰܒܳܐ ܒܩܳܠܶܗ ܕܗܳܢܰܘ ܒܶܪܝ ܚܰܒܺܝܒܝ܆ ܘܰܒܪܳܐ ܕܰܐܪܟܶܢ ܪܺܝܫܶܗ ܘܰܥܡܰܕ ܒܳܗ̇܆ ܘܪܽܘܚ ܩܽܘܕܫܳܐ ܕܒܰܕܡܽܘܬ ܝܰܘܢܳܐ ܢܶܚܬܰܬ ܥܠܰܘܗ̱ܝ: ܬܠܺܝܬܳܝܽܘܬܳܐ ܩܰܕܺܝܫܬܳܐ ܕܰܚܝܰܘ ܒܳܗ̇ ܥܳܠܡ̈ܶܐ ܗܰܠܶـܠܽܘܝܰܗ ܘܗܰܠܶـܠܽܘܝܰܗ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ ܚܰܘܳܐ ܠܫܰܒܪ̈ܳܬܳܐ ܗܳܠܶܝܢ ܐܰܡ̈ܗܳܬܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܫܳܘ̈ܝܳܢ ܠܡܰܘܗܰܒܬܳܐ ܕܰܣܚܳܬܳܐ ܕܡܰܘܠܳـܕܳܐ ܕܡܶܢ ܕܪܺܝܫ. ܘܥܰܬܶܕ ܐܶܢܶܝܢ ܠܰܥܒܳܕ̈ܶܐ ܛܳܒ̈ܶܐ ܘܰܕܟܰܝ̈ܳܐ ܟܽܠܶܗ ܙܰܒܢܳܐ ܕܚܰܝܰܝ̈ܗܶܝܢ. ܘܰܒܝܰܘܡܳܐ ܐ̱ܚܪܳܝܳܐ ܕܳܐܬܶܐ ܐܰܢ̱ܬ ܠܰܩܝܳܡܬܳܐ ܕܟܽܠ. ܐܰܫܘܳܐ ܘܩܰܪܶܒ ܐܶܢܶܝܢ ܩܕܳܡ ܐܰܒܽܘܟ ܐܰܝܟ ܫܽܘܘܕܳܝܳܟ. ܘܰܚܢܰܢ ܘܗܶܢܶܝܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܗܳܪܟܳܐ ܡܫܰܪܶܐ ܕܰܢܩܰܕܶܫ ܡܰܝ̈ܳܐ

ܝܰܗ̱ܒܬ ܠܰܢ ܡܥܺܝܢܳܐ ܕܬܰܕܟܺܝܬܳܐ ܫܰܪܺܝܪܬܳܐ: ܕܰܡܕܰܟܝܳܐ ܡܶܢ ܟܽܠܳـܗ̇ ܚܛܺܝܬܳܐ: ܡܰܝ̈ܳܐ ܗܳܠܶܝܢ ܕܰܒܝܰܕ ܩܪܳܝܬܳܐ ܕܺܝܠܳܟ ܡܶܬܩܰܕܫܺܝܢ܆ ܕܒܺܐܝ̈ܕܰܝܗܽܘܢ ܕܰܟܝܽܘܬܳܐ ܢܳܣܒܺܝܢܰܢ ܗܳܝ ܕܒܰܥܡܳܕܳܐ ܕܰܡܫܺܝܚܳܟ ܐܶܫܬܰܟܢܰܬ ܠܰܢ. ܗܰܒ ܡܳܪܝܳܐ ܚܰܝܠܳܐ ܒܡܰܝ̈ܳܐ ܗܳܠܶܝܢ ܕܰܒܝܰܕ ܚܰܫ̈ܶܐ ܕܺܝܚܺܝܕܳܝܳܐ ܒܪܳܟ ܡܫܰܟܶܢ ܐܰܢ̱ܬ܆ ܕܽܘܟܳܝܳܐ ܕܡܶܢ ܟܽܠܳـܗ̇ ܚܛܺܝܬܳܐ ܠܥܽܘܬܳܕܳܐ ܕܰܡܩܰܒܠܳـܢܽܘܬܳܐ ܕܪܽܘܚܳܐ ܕܺܝܠܳܟ܀

ܬܠܳܝܬܳܐ

ܡܶܛܽܠ ܕܰܐܢ̱ܬ ܐܺܝܬܰܝܟ ܝܳܗܽܘܒܳܐ ܘܰܡܫܰܟܢܳܢܳܐ ܕܟܽܠܗܶܝܢ ܛܳܒ̈ܳܬܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܠܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܗܳܫܳܐ ܘܰܠܥܳܠܡܺܝܢ܀

ܥܰܡܳܐ: ܐܰܡܺܝܢ.

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܰܠܪܽܘܚܳܐ ܕܺܝܠܳܟ.

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܒܳܪܽܘܝܳܐ ܕܟܽܠܳـܗ̇ ܒܪܺܝܬܳܐ ܡܶܬܚܰܙܝܳܢܺܝܬܳܐ ܟܺܝܬ ܘܠܳܐ ܡܶܬܚܰܙܝܳܢܺܝܬܳܐ܆ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ ܘܝܰܡ̱̈ܡܶܐ ܘܟܽܠ ܕܺܐܝܬ ܒܗܽܘܢ܆ ܗܰܘ ܕܟܰܢܶܫ ܡܰܝ̈ܳܐ ܠܰܟܢܽܘܫܝܳܐ ܚܰܕ܆ ܗܰܘ ܕܰܚܒܰܫ ܬܗܽܘܡܳܐ ܒܚܳܠܳܐ ܘܟܳܠܶܐ ܠܶܗ܆ ܗܰܘ ܕܰܦܪܰܫ ܡܰܝ̈ܳܐ ܠܥܶܠ ܡܶܢ ܫܡܰܝܳܐ܀

ܬܠܳܝܬܳܐ

ܐܰܢ̱ܬ ܫܰܪܰܪܬ ܒܚܰܝܠܳܐ ܕܺܝܠܳܟ ܠܝܰܡܳܐ. ܐܰܢ̱ܬ ܪܰܨܶܨܬ ܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܒܡܰܝ̈ܳܐ. ܐܰܢ̱ܬ ܐܺܝܬܰܝܟ ܕܚܺܝܠܳܐ ܘܡܰܢܽܘ ܢܩܽܘܡ ܠܩܽܘܒܠܳܟ. ܐܰܢ̱ܬ ܗܳܫܳܐ ܡܳܪܝܳܐ ܚܽܘܪ ܒܰܒܪܺܝܬܳܐ ܕܺܝܠܳܟ ܡܰܝ̈ܳܐ ܗܳܠܶܝܢ܆ ܘܗܰܒ ܠܗܽܘܢ ܛܰܝܒܽܘܬܳܐ ܕܦܽܘܪܩܳܢܳܐ ܕܺܝܠܳܟ: ܒܽܘܪܟܬܳܐ ܕܝܽܘܪܕܢܳܢ܆ ܩܰܕܺܝܫܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܕܢܶܥܪܩܽܘܢ ܡܶܢܗܽܘܢ ܟܽܠܗܽܘܢ ܐܰܝܠܶܝܢ ܕܡܰܟܶܝܢ ܠܰܓܒܺܝܠܬܳܐ ܕܺܝܠܳܟ܆ ܡܶܛܽܠ ܕܰܫܡܳܟ ܐܶܬܩܪܺܝ ܥܠܰܝܗܽܘܢ܆ ܗܰܘ ܪܰܒܳܐ ܘܰܕܚܺܝܠܳܐ ܥܰܠ ܗܳܢܽܘܢ ܕܕܰܠܩܽܘܒܠܳܐ܀

ܘܢܳܦܰܚ ܒܡܰܝ̈ܳܐ ܬܠܳܬ ܙܰܒ̈ܢܺܝܢ ܒܛܽܘܦܣܳܐ ܕܰܨܠܺܝܒܳܐ܆ ܡܶܢ ܡܰܥܪܒܳܐ ܠܡܰܕܢܚܳܐ ܘܡܶܢ ܬܰܝܡܢܳܐ ܠܓܰܪܒܝܳܐ܆ ܘܳܐܡܰܪ ܟܰܕ ܓܗܺܝܢ ܒܩܳܠܳܐ ܪܳܡܳܐ:

ܢܶܬܪܨܶܨ ♱ ܪܺܝܫܶܗ ܕܬܰܢܺܝܢܳܐ܆ ܗܰܘ ܩܳܛܶܠ ܒܢܰܝ̈ܢܳܫܳܐ܆ ܠܬܰܚܬ ܡܶܢ ܪܽܘܫܡܶܗ ܕܰܨܠܺܝܒܳܐ. ܘܢܶܥܪ̈ܩܳܢ ♱ ܗܳܟܺܝܠ ܛܶܠܳـܢܳܝ̈ܳܬܳܐ ܠܳܐ ܡܶܬܚܰܙܝܳܢܝ̈ܳܬܳܐ ܘܳܐܐܰܪ̈ܳܝܳܬܳܐ܆ ܒܒܳܥܽܘ ܡܶܢܳܟ ܡܳܪܝܳܐ. ܘܠܳܐ ܢܶܬܛܰܫܶܐ ܒܡܰܝ̈ܳܐ ܗܳܠܶܝܢ ܫܺܐܕܳܐ ܚܶܫܽܘܟܳܝܳܐ ♱ ܐܳܦܠܳܐ ܢܶܚܽܘܬ ܠܡܰܝ̈ܳܐ ܥܰܡ ܗܳܠܶܝܢ ܕܡܶܬܥܰܡ̈ܕܳܢ ܪܽܘܚܳܐ ܛܰܢܦܳܐ ܕܚܶܫܽܘܟܽܘܬܳܐ ܡܰܥܶܠ ܥܰܡ ܚܽܘܫܳܒ̈ܶܐ ܡܺܝ̈ܬܶܐ ܘܰܫܓܺܝܫܽܘܬܳܐ ܕܬܰܪܥܺܝܬܳܐ. ܘܛܰܠܶܩ ܡܶܢܗܶܝܢ ܡܰܥܒܕܳܢܽܘܬܳܐ ܕܳܐܟܶܠܩܰܪܨܳܐ܀

ܩܪܳܝܬܳܐ ܕܪܽܘܚܳܐ ܩܰܕܺܝܫܳܐ

ܓܗܳܢܬܳܐ

ܐܶܬܓܠܰܝ ܡܳܪܝܳܐ ܥܰܠ ܡܰܝ̈ܳܐ ܗܳܠܶܝܢ ܘܩܰܕܶܫ ܐܶܢܽܘܢ ܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ. ܘܗܰܒ ܕܢܶܫܬܰܚ̈ܠܦܳܢ ܐܰܝܠܶܝܢ ܕܰܒܗܽܘܢ ܡܶܬܥܰܡ̈ܕܳܢ: ܐܰܝܟܰܢܳܐ ܕܢܶܫ̈ܠܚܳܢ ܠܒܰܪܢܳܫܳܐ ܥܰܬܺܝܩܳܐ ܕܡܶܬܚܰܒܰܠ ܒܰܪ̈ܓܺܝܓܳܬܳܐ ܕܛܽܘܥܝܰܝ: ܘܢܶܠܒ̈ܫܳܢ ܠܗܰܘ ܚܰܕܬܳܐ ܕܡܶܬܚܰܕܰܬ ܒܨܰܠܡܳܐ ܕܗܰܘ ܕܰܒܪܳܝܗ̱ܝ܀

ܘܬܴܠܶܐ ܩܳܠܶܗ ܟܰܕ ܒܟܽܠ ܩܪܳܝܬܳܐ ܥܳܒܶܕ ܦܶܫܚܳܐ ܕܰܨܠܺܝܒܳܐ:

ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ܆ ܚܰܘܳܐ ܐܶܢܽܘܢ ܠܡܰܝ̈ܳܐ ܗܳܠܶܝܢ: ܨ ܡܰܝ̈ܳܐ ܕܰܢܝܳܚܳܐ܆ ܠܝ ܡܰܝ̈ܳܐ ܕܚܰܕܽܘܬܳܐ ܘܕܰܪܘܳܙܳܐ܆ ܒ ܡܰܝ̈ܳܐ ܕܡܶܬܰܐܪܙܺܝܢ ܒܡܰܘܬܶܗ ܘܰܩܝܳܡܬܶܗ ܕܺܝܚܺܝܕܳܝܳܐ ܒܪܳܐ ܕܺܝܠܳܟ܆ ܐ ܡܰܝ̈ܳܐ ܕܬܰܕܟܺܝܬܳܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܨ ܕܽܘܟܳܝܳܐ ܕܛܰܡܽܐܘܬܳܐ ܕܒܶܣܪܳܐ ܘܰܕܪܽܘܚܳܐ܆ ܠܝ ܫܪܳܝܳܐ ܕܰܐܣܽܘܪ̈ܶܐ܆ ܒ ܫܽܘܒܩܳܢܳܐ ܕܫܽܘܪ̈ܥܳܬܳܐ܆ ܐ ܡܰܢܗܪܳܢܽܘܬܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܨ ܣܚܳܬܳܐ ܕܰܗܘܳܝܳܐ ܕܡܶܢ ܕܪܺܝܫ܆ ܠܝ ܫܽܘܟܳܢܳܐ ܕܣܺܝܡܰܬ ܒܢܰܝ̈ܳܐ܆ ܒ ܠܒܽܘܫܳܐ ܕܠܳܐ ܡܰܬܚܰܒܠܳـܢܽܘܬܳܐ܆ ܐ ܚܽܘܕܳܬܳܐ ܕܪܽܘܚܳܐ ܩܰܕܺܝܫܳܐ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܡܰܝ̈ܳܐ ܕܰܡܫܺܝܓܺܝܢ ܛܽܘܠܫܳܐ ܕܢܰܦܫܳܐ ܘܰܕܦܰܓܪܳܐ܆ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܗܳܪܟܳܐ ܡܰܫܠܚܺܝܢ ܠܗܶܝܢ ܠܡܶܬܥܰܡ̈ܕܳܢܝܳܬܳܐ ܡܳܐܢܰܝ̈ܗܶܝܢ ܟܽܠܗܽܘܢ ܘܰܡܚܰܦܶܝܢ ܠܗܶܝܢ ܒܡܰܢܕܺܝܠܳܐ. ܟܳܗܢܳܐ ܢܳܣܶܒ ܩܰܪܢܳܐ ܕܡܽܘܪܽܘܢ ܩܰܕܺܝܫܳܐ ܘܰܡܙܰܝܰܚ ܠܳـܗ̇ ܠܥܶܠ ܡܶܢ ܡܰܝ̈ܳܐ ܨܠܺܝܒܳܐܺܝܬ ܟܰܕ ܐܳܡܰܪ:

ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܟܳܗܢܳܐ: ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ܆ ܐܰܠܳܗܳܐ ܡܫܰܒܚܳܐ ܪܥܶܡ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܟܳܗܢܳܐ: ܡܳܪܝܳܐ ܐܰܠܳܗܳܐ ܥܰܠ ܡܰܝ̈ܳܐ ܣܰܓܺܝ̈ܶܐܐ.

ܡܫܰܡ̈ܫܳܢܶܐ: ܗܰܠܶـܠܽܘܝܰܗ܀

ܘܳܐܫܶܕ ܡܽܘܪܽܘܢ ܥܰܠ ܡܰܝ̈ܳܐ ܬܠܳܬ ܙܰܒ̈ܢܺܝܢ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ:

ܐܳܫܕܺܝܢܰܢ ܡܽܘܪܽܘܢ ܩܰܕܺܝܫܳܐ ܥܰܠ ܡܰܝ̈ܳܐ ܗܳܠܶܝܢ ܕܡܰܥܡܽܘܕܺܝܬܳܐ܆ ܕܢܶܬܚܰܕܰܬ ܒܗܽܘܢ ܒܰܪܢܳܫܳܐ ܥܰܬܺܝܩܳܐ ܠܚܰܕܬܳܐ܆ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܡܫܰܡ̈ܫܳܢܶܐ: ܩܽܘܪܝܶܐܠܶܝܣܳܘܢ܆ ܩܽܘܪܝܶܐܠܶܝܣܳܘܢ܆ ܩܽܘܪܝܶܐܠܶܝܣܳܘܢ܀

ܓܗܳܢܬܳܐ

ܗܰܘ ܕܥܰܠ ܝܺܚܺܝܕܳܝܳܐ ܒܪܳܐ ܕܺܝܠܳܟ ܡܶܠܬܳܐ ܐܰܠܳܗܐ ܕܰܥܒܰܕܬ ܒܰܐܪܥܳܐ ܡܕܰܒܪܳܢܽܘܬܳܐ ܕܰܥܡܳܕܳܐ: ܘܫܰܕܰܪܬ ܪܽܘܚܳܐ ܕܺܝܠܳܟ ܩܰܕܺܝܫܳܐ ܒܰܕܡܽܘܬܳܐ ܕܝܰܘܢܳܐ: ܘܩܰܕܶܫܬ ܠܫܶܦ̈ܥܰܘܗ̱ܝ ܕܝܽܘܪܕܢܳܢ ܢܰܗܪܳܐ. ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܨܒܺܝ ܕܢܰܓܶܢ ܥܰܠ ܐܰܡ̈ܗܳܬܳܟ ܗܳܠܶܝܢ ܪܽܘܚܳܐ ܕܺܝܠܳܟ ܩܰܕܺܝܫܳܐ: ܘܰܐܡ̈ܗܳܬܳܐ ܕܰܡܫܺܝܚܳܟ ܚܰܘܳܐ ܐܶܢܶܝܢ ܟܰܕ ܡܕܰܟܶܐ ܐܰܢ̱ܬ ܠܗܶܝܢ ܒܰܣܚܳܬܳܐ ܗܳܕܶܐ ܩܰܕܺܝܫܬܳܐ ܘܦܳܪܽܘܩܳܝܬܳܐ܀

ܬܠܳܝܬܳܐ

ܐܰܝܟܰܢܳܐ ܕܟܰܕ ܗܳܘ̈ܝܳܢ ܢܰܨܺܝ̈ܚܳܬܳܐ ܘܡܶܬܚܰܕ̈ܬܳܢ ܠܘܳܬ ܚܰܝ̈ܶܐ ܠܳܐ ܡܶܬܚܰܒ̈ܠܳـܢܶܐ ܘܛܽܘ̈ܒܬܳܢܶܐ: ܘܡܶܬܡܰܠܝ̈ܳܢ ܡܶܢ ܛܰܝܒܽܘܬܶܗ ܘܚܰܝܠܶܗ܆ ܢܶܛܪ̈ܳܢ ܓܽܘܥܠܳـܢܳܐ ܕܦܽܘܩܕܳܢܳܟ: ܘܫܰܘ̈ܬܳܦܳܬܳܐ ܢܶܗ̈ܘܝܳܢ ܕܛܳܒ̈ܳܬܳܐ ܕܰܠܥܳܠܰܡ: ܗܳܠܶܝܢ ܕܶܐܫܬܰܘܕܺܝܬ ܠܰܐܝܠܶܝܢ ܕܡܰܚܒܺܝܢ ܠܳܟ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ. ܕܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ ܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ ܐܳܡܰܪ ܨܠܽܘܬܳܐ ܗܳܕܶܐ ܟܰܕ ܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܡܰܝ̈ܳܐ:

ܡܒܰܪܟܺܝܢ ܘܰܡܩܰܕܫܺܝܢ ܡܰܝ̈ܳܐ ܗܳܠܶܝܢ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܫܳܠܡܳܐ ܠܟܽܠܟܽܘܢ܀

ܡܫܰܡ̈ܫܳܢܶܐ: ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ ܡܪܰܚܶܦ ܥܰܠ ܡܰܝ̈ܳܐ ܘܰܒܟܽܠ ܩܪܳܝܬܳܐ ܥܳܒܶܕ ܨܠܺܝܒܳܐ ܥܰܠ ܡܰܝ̈ܳܐ ܟܰܕ ܒܩܳܠܳܐ ܪܳܡܳܐ ܐܳܡܰܪ:

ܡܩܰܕܫܺܝܢ ܐܶܢܽܘܢ ܡܰܝ̈ܳܐ ܗܳܠܶܝܢ ܕܢܶܗܘܽܘܢ ܠܰܣܚܳܬܳܐ ܐܰܠܳܗܳܝܬܳܐ ܕܡܰܘܠܳـܕܳܐ ܕܡܶܢ ܕܪܺܝܫ.

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܟܳܗܢܳܐ: ܒܫܶܡ ܐܰܒܳܐ ܚܰܝܳܐ ܠܚܰܝ̈ܶܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܒܫܶܡ ܒܪܳܐ ܚܰܝܳܐ ܠܚܰܝ̈ܶܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܒܫܶܡ ܪܽܘܚܳܐ ܚܰܝܳܐ ܘܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ ♱

ܡܫܰܡ̈ܫܳܢܶܐ: ܐܰܡܺܝܢ܀

ܡܫܳܚܳܐ ܕܡܶܬܥܰܡܕܳܢܺܝܬܳܐ

ܗܳܝܕܶܝܢ ܡܩܰܪܶܒ ܡܫܰܡܫܳܢܳܐ ܠܡܶܬܥܰܡܕܳܢܺܝܬܳܐ ܠܘܳܬ ܟܳܗܢܳܐ ܘܗܽܘ ܛܳܡܶܫ ܟܪܳܬܶܗ ܒܡܶܫܚܳܐ ܩܰܕܺܝܫܳܐ ܘܥܳܒܶܕ ܨܠܺܝܒܳܐ ܒܟܽܠ ܩܪܳܝܬܳܐ ܒܶܝܬ ܥܰܝ̈ܢܶܝܗ̇ ܘܳܐܡܰܪ ܨܠܽܘܬܳܐ ܗܳܕܶܐ:

ܡܶܬܡܰܫܚܳܐ (ܦܠܳـܢܺܝܬ) ܒܡܶܫܚܳܐ ܕܚܰܕܽܘܬܳܐ ܕܒܶܗ ܬܶܙܕܰܝܰܢܝ ܠܽܘܩܒܰܠ ܟܽܠܳـܗ̇ ܡܰܥܒܕܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ ܡܳܫܰܚ ܠܟܽܠ ܚܕܳܐ ܡܶܢ ܡܶܬܥܰܡ̈ܕܳܢܝܳܬܳܐ ܦܪܺܝܫܳܐܺܝܬ ܐܶܢ ܒܡܶܫܚܳܐ ܘܶܐܢ ܒܡܽܘܪܽܘܢ ܘܗܳܟܰܢܳܐ ܥܳܒܶܕ ܟܰܕ ܡܰܥܡܶܕ ܐܶܢܶܝܢ ܚܕܳܐ ܒܳܬܰܪ ܚܕܳܐ. ܘܢܳܣܶܟ ܡܶܫܚܳܐ ܩܰܕ݁ܺܝܫܳܐ ܥܰܠ ܦܰܣܰܬ ܐܺܝ̈ܕܰܘܗ̱ܝ ܘܡܳܫܰܚ ܠܟܽܠܶܗ ܓܽܘܫܡܳܗ̇ ܕܡܶܬܥܰܡܕܳܢܺܝܬܳܐ ܠܪܺܝܫܳܗ̇ ܘܒܶܝܬ ܨܶܒ̈ܥܳܬܳܐ ܕܺܐܝܕܶܝ̈ܗ̇ ܘܰܕܪ̈ܶܓܠܶܝܗ̇ ܘܩܽܘܕܡܳܗ̇ ܘܒܶܣܬܪܳܗ̇.

ܩܳܠܳܐ ܒܩܺܝܢܬܳܐ܆ ܡܳܪܶܗ ܕܪܰܡܫܳܐ ܒܪܶܟܢܳܐ ܬܪܰܝܳܢܳܐ:

ܒܡܶܫܚܳܐ ܕܩܽܘܕܫܳܐ ܐܶܡܰܪ ܐܰܠܳܗܳܐ ܕܢܶܡܫܽܘܚ ܐܰܗܪܽܘܢ ܘܗܳܝܕܶܝܢ ܢܶܬܩܰܕܰܫ. ܒܡܶܫܚܳܐ ܕܩܽܘܕܫܳܐ ܗܳܫܳܐ ܡܶܬܡܰܫ̈ܚܳܢ ܢܩܰܘ̈ܳܬܳܐ ܕܶܐܬܰܝ̈ ܠܰܥܡܳܕܳܐ܀

ܒܡܶܫܚܳܐ ܕܩܽܘܕܫܳܐ ܐܶܫܬܰܡܠܺܝ ܐܰܗܪܽܘܢ ܘܕܰܘܺܝܕ ܢܒܺܝܳܐ ܐܰܟܪܶܙ ܥܰܠ ܐ̱ܪܳܙܶܗ. ܘܗܳܐ ܒܓܰܘ ܥܺܕܬܳܐ ܒܶܗܽ ܗ̱ܘ ܡܶܬܪ̈ܰܫܡܳܢ ܢܩܰܘ̈ܳܬܳܐ ܚܰܕ̈ܳܬܳܐ ܕܶܐܬܰܝ̈ ܠܰܥܡܳܕܳܐ܀

ܫܽܘܒܚܳܐ: ܩܳܐܶܡ ܟܳܗܢܳܐ ܥܰܠ ܡܰܥܡܽܘܕܺܝܬܳܐ ܘܩܳܪܶܐ ܠܪܽܘܚܳܐ ܘܢܳܚܬܳܐ ܡܶܢ ܪܰܘܡܳܐ. ܡܩܰܕܫܳܐ ܡܰܝ̈ܳܐ ܕܡܶܢܗܽܘܢ ܡܶܬܝܰܠܕ̈ܳܢ ܒ̈ܢܳܬܳܐ ܚܰܕ̈ܬܳܬܳܐ ܠܡܰܠܟܽܘܬܳܐ ܕܪܰܘܡܳܐ܀

ܡܶܢܥܳܠܰܡ: ܒܗܰܝܡܳܢܽܘܬܳܐ ܕܰܬܠܺܝܬܳܝܽܘܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܕܩܽܘܕܫܳܐ ܡܶܬܡܰܫܚܺܝܬܶܝ̈ܢ ܢܶܩ̈ܩܳܬܳܐ ܬܰܡܺܝ̈ܡܳܬܳܐ܆ ܕܶܐܣܛܰܠ ܫܽܘܒܚܳܐ ܬܶܠܒܫܽܘܢ ܡܶܢ ܡܰܝ̈ܳܐ܀

ܡܰܚܰܬܬܳܗ̇ ܕܡܶܬܥܰܡܕܳܢܺܝܬܳܐ ܠܡܰܥܡܽܘܕܺܝܬܳܐ

ܘܡܰܚܶܬ ܠܳـܗ̇ ܠܰܫܒܰܪܬܳܐ ܠܡܰܥܡܽܘܕܺܝܬܳܐ܆ ܟܰܕ ܚܳܝܪܳܐ ܠܡܰܕܢܚܳܐ ܘܗܽܘ ܟܳܗܢܳܐ ܠܡܰܥܪܒܳܐ. ܘܣܳܐܶܡ ܝܰܡܺܝܢܶܗ ܥܰܠ ܪܺܝܫܳܗ̇ ܕܗܳܝ ܕܥܳܡܕܳܐ܆ ܘܡܰܣܶܩ ܡܰܝ̈ܳܐ ܡܶܢ ܐܽܘܙܢܳܐ ܒܣܶܡܳܠܶܗ ܘܳܐܫܶܕ ܡܶܢ ܩܕܳܡܶܝܗ̇܆ ܟܶܢ ܡܶܢ ܒܶܣܬܪܳܗ̇܆ ܘܟܶܢ ܡܶܢ ܝܰܡܺܝܢܳܗ̇ ܘܣܶܡܳܠܳـܗ̇܆ ܟ݁ܳܕ݂ ܐܳܡܰܪ ܗܳܟܰܢܳܐ:

ܥܳܡܕܳܐ (ܦܠܳـܢܺܝܬ) ܠܩܰܕܺܝܫܽܘܬܳܐ ܘܰܠܦܽܘܪܩܳܢܳܐ ܘܰܠܕܽܘܒܳܪ̈ܶܐ ܠܳܐ ܥܕܺܝ̈ܠܶܐ ܘܠܰܩܝܳܡܬܳܐ ܒܪܺܝܟܬܳܐ ܕܡܶܢ ܒܶܝܬ ܡܺܝ̈ܬܶܐ.

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܟܳܗܢܳܐ: ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܘܥܳܒܶܕ ܥܠܶܝܗ̇ ܬܠܳܬ ܪ̈ܡܳܝܳܬܳܐ ܘܳܐܡܪܺܝܢ ܡܫܰܡ̈ܫܳܢܶܐ ܒܰܝܬܳܐ ܗܳܢܳܐ:

ܚܽܘܬ ܒܰܪܬܳܐ ܪܫܺܝܡܬܳܐ܆ ܘܰܠܒܽܘܫܺܝܘܗ̱ܝ ܠܡܳܪܰܢ܆ ܘܶܐܬܚܰܠܰܛܝ ܒܛܽܘܗܡܶܗ܆ ܕܒܰܪ ܛܽܘܗܡܰܐ ܗ̱ܘ ܪܰܒܳܐ܆ ܐܰܝܟ ܕܰܐܡܺܝܪ ܒܡܰܬܠܶܗ܀

ܘܟܰܕ ܡܰܣܶܩ ܟܳܗܢܳܐ ܠܰܫܒܰܪܬܳܐ ܡܶܢ ܐܽܘܙܢܳܐ ܘܰܡܩܰܒܠܳܐ ܠܳـܗ̇ ܫܰܘܫܒܺܝܢܬܳܐ܆

ܩܳܠܳܐ ܒܩܺܝܢܬܳܐ܆ ܬܪ̈ܰܝܗܽܘܢ ܥܳܠܡ̈ܶܐ:

ܦܪܽܘܣܝ ܟܶܢܦܰܝ̈ܟܝ ܥܺܕܰܬ ܩܽܘܕܫܳܐ܆ ܘܩܰܒܶܠܝ ܢ̈ܩܰܘܳܢ ܬܰܡܺܝ̈ܡܳܬܳܐ܆ ܕܝܶܠܕܰܬ ܐܶܢܽܘ ܪܽܘܚܳܐ ܕܩܽܘܕܫܳܐ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܥܰܠ ܗܳܕܶܐ ܡܰܥܡܽܘܕܺܝܬܳܐ܆ ܐܶܬܢܰܒܺܝ ܒܪܶܗ ܕܰܙܟܰܪܝܳܐ܆ ܕܶܐܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܘܗܰܘ ܕܳܐܬܶܐ ܒܪܽܘܚܳܐ ܕܩܽܘܕܫܳܐ܀

ܥܰܠ ܕܰܘܺܝܕ ܩܰܪܢܳܐ ܫܶܦܥܰܬ܆ ܘܰܥܠܰܝܟܶܝܢ ܡܰܥܡܽܘܕܺܝܬܳܐ܆ ܕܰܢܚ̈ܶܬܬ݁ܶܝܢ ܠܳـܗ̇ ܚܰܛܳܝ̈ܳܢ܆ ܣܠܶـܩ̈ܬ݁ܶܝܢ ܡܶܢܳܗ̇ ܙܰܟܳܝܳܢ̈܀

ܡܰܫܪܺܝܬܳܐ ܕܰܫܡܰܝ̈ܳܢܶܐ܆ ܟܪܺܝܟܳܐ ܠܳـܗ̇ ܠܡܰܥܡܽܘܕܺܝܬܳܐ܆ ܕܰܢܩܰܒܠܽܘܢ ܡܶܢ ܓܰܘ ܡܰܝ̈ܶܐ܆ ܒ̈ܢܳܬܳܐ ܕܩܰܒܶܠܝ̈ ܪܽܘܚ ܩܽܘܕܫܳܐ܀

ܘܰܐܝܠܶܝܢ ܕܩܰܪܺܝܒܺܝܢ ܐܳܡܪܺܝܢ:

ܛܽܘܒ̈ܬܳܢܶܐ ܗܳܢܽܘܢ ܕܶܐܫܬܒܶܩܘ ܠܳܐ ܢܳܡܽܘܣܳܝ̈ܘܳܬܗܽܘܢ ܘܶܐܬܟܰܣܺܝܘ ܚܛܳܗܰܝ̈ܗܽܘܢ܀

ܚܬܳܡܳܐ ܕܰܒܡܽܘܪܽܘܢ ܩܰܕܺܝܫܳܐ

ܘܫܳܩܶܠ ܟܳܗܢܳܐ ܒܣܶܡܳܠܶܗ ܠܩܰܪܢܳܐ ܕܡܽܘܪܽܘܢ ܘܰܡܨܰܠܶܐ ܥܰܠ ܚܬܳܡܶܗ ܟܰܕ ܦܫܺܝܛ ܘܝܰܡܺܝܢܶܗ ܣܺܝܡܳܐ ܥܰܠ ܪܺܝܫܳܗ̇ ܕܰܥܡܺܝܕܬܳܐ:

ܘܠܶܗ ܠܗܳܢܳܐ ܚܳܬܡܳܐ ܒܰܫܡܳܟ ܩܰܕܺܝܫܳܐ ܢܩܰܒܶܠܝ ܐܰܡܬܳܟ ܗܳܕܶܐ܆ ܕܥܰܡ ܦܳܠܚܰܝ̈ܟ ܒܝܰܕ ܗܰܝܡܳܢܽܘܬܳܐ ܕܰܥܡܳܕܳܐ ܐܶܬܡܰܢܝܰܬ܆ ܐܰܝܟܰܢܳܐ ܕܟܰܕ ܒܗܳܢܳܐ ܡܽܘܪܽܘܢ ܟܽܠܳـܗ̇ ܒܰܣܺܝܡܽܘܬ ܪܺܝܚܳܐ ܪܽܘܚܳܢܳܐܺܝܬ ܡܶܬܡܰܠܝܳܐ܆ ܠܳܐ ܡܶܬܬܰܚܕܳܢܺܝܬܳܐ ܬܶܗܘܶܐ ܠܚܰܝܠܰـܘ̈ܳܬܳܐ ܣܰܩܽܘܒܠܳـܝ̈ܶܐ܆ ܟܰܕ ܠܳܐ ܡܶܟܺܝܠ ܕܳܚܠܳܐ ܡܶܢ ܐܰܪ̈ܟܰܐܣ ܘܫܰܠܺܝܛܳܢ̈ܶܐ ܕܚܶܫܽܘܟܳܐ܆ ܐܷܠܳܐ ܟܰܕ ܒܢܽܘܗܪܳܐ ܕܦܽܘܩ̈ܕܳܢܶܐ ܡܗܰܠܟܳܐ܆ ܒܰܪܬܳܐ ܕܢܽܘܗܪܳܐ ܕܺܝܠܳܟ ܬܶܗܘܶܐ. ܐܰܢ̱ܬ ܓܶܝܪ ܐܺܝܬܰܝܟ ܢܽܘܗܪܳܐ ܗܰܘ ܫܰܪܺܝܪܳܐ ܘܠܳܟ ܫܽܘܒܚܳܐ ܡܰܣܩܺܝܢܰܢ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܘܡܶܬܦܢܶܐ ܠܘܳܬ ܥܡܺܝܕܬܳܐ ܘܚܳܬܶܡ ܠܳـܗ̇ ܒܡܽܘܪܽܘܢ ܩܰܕܺܝܫܳܐ ܒܶܝܬ ܥܰܝܢܶܝ̈ܗ̇ ܬܠܳܬ ܙܰܒ̈ܢܺܝܢ ܨܠܺܝܒܳܐܺܝܬ ܟܰܕ ܐܳܡܰܪ:

ܒܡܽܘܪܽܘܢ ܩܰܕܺܝܫܳܐ܆ ܪܺܝܚܳܐ ܒܰܣܺܝܡܳܐ ܕܰܡܫܺܝܚܳܐ܆ ܛܰܒܥܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܫܽܘܡܠܳـܝܳܐ ܕܫܽܘܟܳܢ̈ܶܐ ܕܪܽܘܚܳܐ ܩܰܕܺܝܫܳܐ܆ ܡܶܬܛܰܒܥܳܐ (ܦܠܳـܢܺܝܬ) ܒܰܫܡܳܐ ܕܰܐܒܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܕܰܒܪܳܐ ♱

ܡܫܰܡ̈ܫܳܢܶܐ: ܐܰܡܺܝܢ܀

ܟܳܗܢܳܐ: ܘܰܕܪܽܘܚܳܐ ܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ.

ܡܫܰܡ̈ܫܳܢܶܐ: ܐܰܡܺܝܢ܀

ܘܢܳܣܶܟ ܟܳܗܢܳܐ ܡܽܘܪܽܘܢ ܒܦܰܣܰܬ ܐܺܝܕܶܗ ܘܡܳܫܰܚ ܠܰܥܡܺܝܕܬܳܐ ܒܶܝܬ ܥܰܝܢܶܝ̈ܗ̇ ܘܡܰܘܒܶܠ ܥܰܠ ܐܶܕܢܳܗ̇ ܕܝܰܡܺܝܢܳܐ ܘܰܕܪܳܥܳܗ̇ ܘܟܰܬܦܳܗ̇ ܘܟܽܠܶܗ ܓܰܒܳܗ̇ ܕܝܰܡܺܝܢܳܐ ܘܒܶܝܬ ܨܶܒ̈ܥܳܬܳܐ ܕܺܐܝܕܳܗ̇ ܕܝܰܡܺܝܢܳܐ ܘܪܶܓܠܳـܗ̇ ܘܒܶܝܬ ܥܰܛܡ̈ܳܬܳܗ̇. ܘܣܳܠܶܩ ܥܰܠ ܓܰܒܳܗ̇ ܕܣܶܡܳܠܳܐ ܘܒܰܝܢܳܬ ܨܶܒ̈ܥܳܬܳܐ ܕܺܐܝܕܳܗ̇ ܕܣܶܡܳܠܐ ܘܰܕܪܳܥܳܗ̇ ܘܟܰܬܦܳܗ̇ ܘܶܐܕܢܳܗ̇ ܘܗܳܦܶܟ ܠܒܶܝܬ ܥܰܝܢܶܝ̈ܗ̇ ܘܪܺܝܫܳܗ̇ ܘܥܰܝܢܶܝ̈ܗ̇ ܘܩܽܘܕܡܳܐ ܘܒܶܣܬܪܳܐ ܡܫܰܡܠܝܳܐܺܝܬ. ܘܠܳܐ ܢܶܫܒܽܘܩ ܒܳܗ̇ ܕܽܘܟܬܳܐ ܕܠܳܐ ܡܳܫܰܚ. ܗܳܝܕܶܝܢ ܡܫܰܡ̈ܫܳܢܶܐ ܘܥܰܪܳܒܬܳܐ ܕܺܝܠܳـܗ̇ ܕܰܫܒܰܪܬܳܐ ܡܰܠܒܫܺܝܢ ܠܳـܗ̇ ܢܰܚ̈ܬܶܐ ܚܶܘܳܪ̈ܶܐ.

ܘܟܳܗܢܳܐ ܡܨܰܠܐ ܟܰܕ ܓܗܺܝܢ:

ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܡܰܒܽܘܥܳܐ ܕܚܰܝ̈ܶܐ ܘܰܕܛܳܒ̈ܳܬܳܐ܆ ܗܰܘ ܝܳܠܽܘܕܳܐ ܕܢܽܘܗܪܳܐ ܫܰܪܺܝܪܳܐ܆ ܗܰܘ ܕܰܒܝܰܕ ܕܶܢܚܳܐ ܕܺܝܚܺܝܕܳܝܳܐ ܕܺܝܠܳܟ ܒܪܳܐ ܡܳܪܝܳܐ ܕܶܝܢ ܕܺܝܠܰܢ ܝܶܫܽܘܥ ܡܫܺܝܚܳܐ܆ ܐܰܢܗܰܪܬ ܠܗܳܠܶܝܢ ܕܒܰܐܪܥܳܐ ܐܰܝܟ ܕܰܠܗܳܠܶܝܢ ܕܒܰܫܡܰܝܳܐ܆ ܗܰܘ ܕܝܰܗ̱ܒܬ ܕܽܘܟܳܝܳܐ ܛܽܘܒܬܳܢܳܐ ܒܰܥܡܳܕܳܐ ܦܳܪܽܘܩܳܝܳܐ܆ ܘܩܽܘܕܫܳܐ ܐܰܠܳܗܳܝܳܐ ܒܰܡܫܺܝܚܽܘܬܳܐ ܩܰܕܺܝܫܬܳܐ܆ ܘܰܚܕܳܝܽܘܬܳܐ ܗܳܝ ܕܰܠܘܳܬ ܡܫܺܝܚܳܐ ܕܺܝܠܳܟ ܘܪܽܘܚܳܟ ܗܰܘ ܡܰܥܒܶܕ ܚܰܝ̈ܶܐ܆ ܗܰܘ ܕܳܐܦ ܗܳܫܳܐ ܐܶܨܛܒܺܝܬ݁ ܕܰܒܝܰܕ ܬܶܫܡܶܫܬܰܢ ܬܰܘܠܶܕ ܡܶܢܕܪܺܝܫ ܠܰܐܡ̈ܗܳܬܳܟ ܗܳܠܶܝܢ ܒܝܰܕ ܡܰܝ̈ܳܐ ܘܪܽܘܚܳܐ: ܥܰܠ ܣܰܒܪܳܐ ܕܚܰܝ̈ܶܐ ܕܰܠܥܳܠܰܡ: ܘܫܽܘܒܩܳܢܳܐ ܕܰܚ̈ܛܳܗܶܐ ܨܶܒܝܳܢܳܝ̈ܶܐ ܘܠܳܐ ܨܶܒܝܳܢܳܝ̈ܶܐ܆ ܗܳܢܽܘܢ ܕܡܶܢ ܩܕܺܝܡ ܐܺܝܬ ܗ̱ܘܰܘ ܠܗܶܝܢ ܫܰܟܶܢܬ: ܫܰܕܰܪ ܥܠܰܝܗܶܝܢ ܡܳܪܝܳܐ ܛܰܝܒܽܘܬܳܐ ܕܪܽܘܚܳܟ ܩܰܕܺܝܫܳܐ ܘܰܡܠܺܝ ܐܶܢܶܝܢ ܡܶܢ ܩܽܘܕܳܫܰܘ̈ܗ̱ܝ܀

ܬܠܳܝܬܳܐ

ܛܰܪ ܐܶܢܶܝܢ ܒܺܝܕܰܥܬܳܟ܆ ܫܰܪܰܪ ܐܶܢܶܝܢ ܒܗܰܝܡܳܢܽܘܬܳܐ ܕܒܳܟ܆ ܢܰܛܰܪ ܐܶܢܶܝܢ ܒܕܶܚܠܬܳܟ܆ ܙܰܗܰܪ ܗܰܠܟ̈ܳܬܗܶܝܢ ܒܰܫܪܳܪܳܟ܆ ܣܰܬܶܬ ܒܢܰܦ̈ܫܳܬܗܶܝܢ ܫܒܺܝ̈ܠܶܐ ܕܦܽܘ̈ܩܕܳܢܰܝܟ܆ ܒܢ̈ܳܬܳܐ ܕܢܽܘܗܪܳܐ ܚܰܘܳܐ ܐܶܢܶܝܢ ܕܢܺܝ̈ܚܳܢ ܠܳܐ ܥܕܺܝܠܳܐܺܝܬ ܬܚܽܘܬ ܡܰܠܟܽܘܬܳܐ ܕܰܡܫܺܝܚܳܟ܆ ܘܰܐܫܘܳܐ ܐܶܢܶܝܢ ܠܒܰܝܬܳܝܽܘܬܳܐ ܕܺܝܠܳܟ܆ ܡܶܛܽܠ ܕܰܐܢ̱ܬ ܐܺܝܬܰܝܟ ܐܰܠܳܗܳܐ ܕܦܽܘܪܩܳܢܰܢ ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܩܰܕܺܝܫܳܐ ܗܳܫܳܐ ܘܰܠܥܳܠܡܺܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ.

ܡܫܰܡܫܳܢܳܐ: ܠܡܳܪܝܳܐ ܪ̈ܺܝܫܰܝܢ ܢܰܪܟܶܢ.

ܬܠܳܝܬܳܐ

ܨܠܽܘܬܳܐ ܕܰܐܒܽܘܢ ܕܒܰܫܡܰܝܳܐ ܟܰܕ ܦܫܺܝܛ:

ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܆ ܗܰܘ ܕܰܒܝܰܕ ܡܰܘܗܰܒܬܳܟ ܪܰܒܬܳܐ ܘܠܳܐ ܡܶܬܡܰܠـܠܳـܢܺܝܬܳܐ ܐܶܬܩܰܕܰܫܘ ܡܰܝ̈ܳܐ ܗܳܠܶܝܢ ܒܡܶܐܬܺܝܬܳܐ ܕܪܽܘܚܳܟ ܩܰܕܺܝܫܳܐ܆ ܕܢܶܗܘܽܘܢ ܟܰܪܣܳܐ ܕܪܽܘܚܳܐ ܕܡܰܘܠܳـܕܳܐ ܠܒܰܪܢܳܫܳܐ ܚܰܕܬܳܐ ܡܶܢ ܥܰܬܺܝܩܳܐ܆ ܘܕܰܐܫܘܺܝܬ݁ ܠܰܐܡ̈ܗܳܬܳܟ ܗܳܠܶܝܢ ܠܰܩܝܳܡܬܳܐ ܕܰܒܝܰܕ ܡܰܝ̈ܳܐ ܘܪܽܘܚܳܐ: ܐܰܢ̱ܬ ܗܳܟܺܝܠ ܡܳܪܝܳܐ ܒܝܰܕ ܪ̈ܰܚܡܶܐ ܕܺܝܠܳܟ ܣܰܓܺܝ̈ܶܐܐ ܐܰܫܘܳܐ ܐܶܢܶܝܢ ܠܡܰܠܟܽܘܬܳܐ ܕܺܝܠܳܟ ܫܡܰܝܳܢܺܝܬܳܐ܆ ܘܰܚܢܰܢ ܘܗܶܢܶܝܢ ܒܰܚܕܳܐ ܫܰܘܝܽܘܬܳܐ ܢܰܡܪܰܚ ܕܢܶܩܪܶܝܟ ܠܳܟ ܐܰܠܳܗܳܐ ܡܫܰܒܚܳܐ ܘܪܳܚܶܡ ܒܢܰܝ̈ܢܳܫܳܐ ܐܰܒܳܐ ܐܰܚܺܝܕ ܟܽܠ ܘܩܰܕܺܝܫܳܐ ܘܰܢܨܰܠܐ ܘܢܺܐܡܰܪ: ܐܰܒܽܘܢ ܕܒܰܫܡܰܝܳܐ܀

ܥܰܡܳܐ: ܢܶܬܩܰܕܰܫ ܫܡܳܟ. ܬܺܐܬܶܐ ܡܰܠܟܽܘܬܳܟ. ܢܶܗܘܶܐ ܨܶܒܝܳܢܳܟ܆ ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘ̈ܒܰܝܢ ܘܰܚ̈ܛܳܗܰܝܢ܆ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ܆ ܐܷܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳـܟܺ ܗ̱ܝ ܡܰܠܟܽܘܬܳܐ ܘܚܰܝܠܳܐ ܘܬܫܒܽܘܚܬܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܬܠܳܝܬܳܐ

ܟܳܗܢܳܐ ܟܰܕ ܦܫܺܝܛ

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܗܰܘ ܕܦܽܘܪܩܳܢܳܐ ܕܒܰܡܫܺܝܚܳܟ ܫܰܟܶܢܬ ܠܰܢ܆ ܘܝܰܗ̱ܒܬ݁ ܠܰܐܡ̈ܗܳܬܳܟ ܗܳܠܶܝܢ ܕܗܳܫܳܐ ܥܡܰܕ̈ܝ ܝܺܠܺܝܕܽܘܬܳܐ ܕܡܶܢ ܕܪܺܝܫ ܒܝܰܕ ܡܰܝ̈ܳܐ ܘܪܽܘܚܳܐ ܩܰܕܺܝܫܳܐ. ܐܰܢ̱ܬ ܡܳܪܝܳܐ ܪܳܚܶܡ ܐ̱ܢܳܫ̈ܳܐ܆ ܚܰܝܶܠ ܐܶܢܶܝܢ ܘܳܐܦ ܒܩܰܕܺܝܫܽܘܬܳܐ ܛܰܪ ܐܶܢܶܝܢ. ܘܟܰܕ ܡܰܙ̈ܠܓܳܢ ܒܢܽܘܗܪܳܐ ܕܺܝܕܰܥܬܳܟ ܘܩܳܝ̈ܡܳܢ ܩܕܳܡ ܦܳܬܽܘܪܳܟ ܟܳܗܢܳܝܳܐ܆ ܐܰܫܘܳܐ ܐܶܢܶܝܢ ܠܛܽܘܒܬܳܢܽܘܬܳܐ ܕܺܝܠܳܟ ܫܡܰܝܳܢܺܝܬܳܐ܆ ܒܝܰܕ ܪ̈ܰܚܡܶܐ ܕܺܝܚܺܝܕܳܝܳܐ ܒܪܳܟ܆ ܕܒܺܐܝ̈ܕܰܘܗ̱ܝ ܘܥܰܡܶܗ ܠܳܟ ܦܶܐܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ.

ܥܰܡܳܐ: ܘܰܠܪܽܘܚܳܐ ܕܺܝܠܳܟ.

ܡܫܰܡܫܳܢܳܐ: ܩܕܳܡ ܡܳܪܝܳܐ ܡܪܰܚܡܳܢܳܐ ܘܰܩܕܳܡ ܡܰܕܒܚܶܗ ܡܚܰܣܝܳܢܳܐ ܘܰܩܕܳܡ ܡܰܥܡܽܘܕܺܝܬܳܐ ܗܳܕܶܐ ܩܰܕܺܝܫܬܳܐ܆ ܒܶܣ̈ܡܶܐ ܡܶܬܬܣܺܝܡܺܝܢ ܡܶܢ ܐܺܝ̈ܕܰܝ ܟܳܗܢܳܐ ܗܳܢܳܐ ܡܝܰܩܪܳܐ (ܐܶܢ ܐܶܦܣܩܽܘܦܳܐ ܡܛܰܝܰܒ ܢܺܐܡܰܪ: ܐܰܒܽܘܢ ܡܥܰܠܝܳܐ) ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ.

ܥܰܡܳܐ: ܩܕܳܡܰܝܟ ܡܳܪܰܢ ܘܰܐܠܳܗܰܢ.

ܟܳܗܢܳܐ ܟܰܕ ܦܫܺܝܛ

ܩܕܳܡܰܝܟ ܚܢܰܢ ܟܽܠܰܢ ܘܰܐܡ̈ܗܳܬܳܟ ܗܳܠܶܝܢ ܕܗܳܫܳܐ ܥܡܰܕ̈ܝ: ܐܰܪܟܶܢܢ ܨܰܘܪ̈ܶܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܕܺܝܠܰܢ. ܘܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܰܢ: ܚܽܘܪ ܒܰܢ ܘܰܒܝܳܪܬܽܘܬܳܐ ܕܺܝܠܳܟ܆ ܘܗܰܕܳܐ ܠܰܢ ܠܘܳܬ ܦܽܘܪܩܳܢܳܐ ܡܫܰܡܠܝܳܐ ܘܰܠܚܰܝ̈ܶܐ ܥܬܺܝ̈ܕܶܐ ܕܰܠܥܳܠܰܡ܆ ܟܰܕ ܡܒܰܛܶܠ ܐܰܢ̱ܬ ܡܶܢܰܢ ܠܰܚܣܳܡܳܐ ܘܰܠܡܰܟܝܳܢܽܘܬܳܐ ܕܗܰܘ ܕܰܠܩܽܘܒܠܳܐ܆ ܘܰܕܢܶܫܬܰܘܬܰܦ ܠܐ̱ܪ̈ܳܙܶܐ ܗܳܠܶܝܢ ܫܡܰܝܳܢ̈ܶܐ ܘܡܰܥܒ̈ܕܰܝ ܚܰܝ̈ܶܐ ܒܬܺܐܪܬܳܐ ܕܟܺܝܬܳܐ ܐܰܫܘܳܐ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܺܝܠܳܟ܆ ܕܥܰܡܶܗ ܡܒܰܪܟܳܐ ܐܺܝܬܰܝܟ ܥܰܡ ܪܽܘܚܳܐ ܕܺܝܠܳܟ ܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܝܰܐ܆ ܗܳܫܳܐ ܘܰܒܟܽܠܙܒܰܢ܆ ܠܥܳܠܡܺܝܢ܀

ܥܰܡܳܐ: ܐܰܡܺܝܢ܀

ܟܳܗܢܳܐ: ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ܆ ܒܰܪܶܟ ܠܰܐܡ̈ܗܳܬܳܟ ܗܳܠܶܝܢ ܕܗܳܫܳܐ ܥܡܰܕ̈ܝ܆ ܘܰܠܟܽܠܰܢ ܒܒܽܘܪܟܬܳܐ ܕܺܝܠܳܟ ܫܡܰܝܳܢܺܝܬܳܐ ܘܠܳܐ ܡܶܬܬܪܺܝܡܳܢܺܝܬܳܐ. ܘܚܰܕܳܐ ܠܰܢ ܡܫܰܡܠܝܳܐܺܝܬ ܒܛܳܒ̈ܳܬܳܐ ܕܡܶܢ ܠܘܳܬܳܟ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܠܙܒܰܢ܆ ܠܥܳܠܡܺܝܢ܀

ܟܽܘܠܳܠ ܥܡܺܝܕܬܳܐ

ܘܥܰܪܳܒܬܳܐ ܡܰܣܶܩ ܠܰܥܡܺܝܕܬܳܐ ܠܰܬܪܰܥ ܗܰܝܟܠܳܐ ܡܶܢ ܠܒܰܪ. ܘܟܳܗܢܳܐ ܩܳܛܰܪ ܠܳـܗ̇ ܟܠܺܝܠܳܐ ܐܰܘܟܺܝܬ ܙܽܘܢܳܪܳܐ ܚܳܙܶܩ ܠܳـܗ̇ ܒܪܺܝܫܳܗ̇. ܘܰܡܨܰܠܶܐ:

ܟܰܠܶܠ ܡܳܪܝܳܐ ܠܰܐܡܬܳܟ ܗܳܕܶܐ ܒܗܶܕܪܳܐ ܘܬܶܫܒܽܘܚܬܳܐ ܕܰܫܡܳܟ ܩܰܕܺܝܫܳܐ܆ ܘܢܶܗܘܽܘܢ ܚܰܝܶܝ̈ܗ̇ ܠܰܢܝܳܚܳܟ ܘܰܠܬܶܫܒܽܘܚܬܳܐ ܕܡܳܪܽܘܬܳܟ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܡܺܝܢ܀

ܡܫܰܡ̈ܫܳܢܶܐ ܥܳܢܶܝܢ ܒܟܽܠ ܙܒܰܢ̱ܬܳܐ ܒܰܝܬܳܐ ܚܕܳܐ ܡܶܢ ܣܽܘܓܺܝܬܳܐ ܗܳܕܶܐ:

ܚܳܬܰܢ ܙܡܰܪܝ ܫܽܘܒܚܳܐ܆ ܠܰܒܪܶܗ ܕܡܳܪܶܐ ܟܽܠ܆ ܕܰܩܛܰܪ ܠܶܟܝ ܬܳܓܳܐ܆ ܡܶܢ ܝܽܘܪܕܢܳܢ ܢܰܗܪܳܐ܀

ܐܰܦܪܶܓܘ ܠܒܽܘܫܰܝ̈ܟܝ܆ ܚܳܬܰܢ ܐܰܝܟ ܬܰܠܓܳܐ܆ ܘܰܢܗܰܪܘ ܐܳܦ ܙܺܝܘܰܝ̈ܟܝ܆ ܒܰܕܡܽܘܬ ܡܰܠܰܐܟ̈ܶܐ܀

ܒܰܕܡܽܘܬ ܡܰܠܰܐܟ̈ܶܐ܆ ܣܠܶܩܬܝ ܠܰܡ ܝܰܘܡܳܢܳܐ܆ ܡܶܢ ܝܽܘܪܕܢܳܢ ܢܰܗܪܳܐ܆ ܒܚܰܝܠܳܐ ܕܪܽܘܚ ܩܽܘܕܫܳܐ܀

ܟܠܺܝܠܳܐ ܕܠܳܐ ܚܳܡܶܐ܆ ܗܳܐ ܐܶܬܬܣܺܝܡ ܒܪܺܝܫܶܟܝ܆ ܘܫܽܘܒܚܳܐ ܕܒܶܝܬ ܐܳܕܳܡ܆ ܝܰܘܡܳܢܳܐ ܠܒܶܫܬܶܝܗ̇܀

ܟܳܗܢܳܐ ܡܫܰܘܬܶܦ ܠܳܗ ܠܥܡܺܝܕܬܳܐ ܒܐ̱ܪ̈ܳܙܶܐ ܩܰܕܺܝ̈ܫܶܐ ܘܳܐܡܰܪ ܬܠܳܬ ܙܰܒ̈ܢܺܝܢ:

ܦܺܐܪܳܐ ܕܠܳܐ ܛܰܥܡܶܗ܆ ܐܳܕܳܡ ܒܦܰܪܕܰܝܣܳܐ܆ ܝܰܘܡܳܢܳܐ ܒܦܽܘܡܶܟܝ܆ ܐܶܬܬܣܺܝܡ ܒܚܰܕܽܘܬܳܐ܀

ܡܫܰܡ̈ܫܳܢܶܐ ܥܳܢܶܝܢ ܒܟܽܠ ܙܒܰܢ̱ܬܳܐ ܒܰܝܬܳܐ ܚܕܳܐ ܡܶܢ ܣܽܘܓܺܝܬܳܐ ܗܳܕܶܐ:

ܥܺܝܪ̈ܶܐ ܘܡܰܠܰܐܟ̈ܶܐ܆ ܕܚܳܕܶܝܢ ܒܬܰܝܳܒ̈ܶܐ܆ ܢܶܚܕܽܘܢ ܒܶܟܝ ܝܰܘܡܳܢ܆ ܕܰܠܗܽܘܢ ܕܳܡܝܳܐ ܐܰܢܬ̱ܝ܀

ܙܶܠܝ ܠܶܟܝ ܒܰܫܠܳـܡܳܐ܆ ܒܰܪ̱ܬ ܡܰܥܡܽܘܕܺܝܬܳܐ܆ ܘܰܣܓܽܘܕܝ ܠܰܨܠܺܝܒܳܐ܆ ܕܗܽܘܝܽܘ ܡܢܰܛܰܪ ܠܶܟܝ܀

ܫܽܘܒܚܳܐ ܠܶܗ ܠܰܐܒܳܐ܆ ܘܬܰܘܕܺܝܬܳܐ ܠܰܒܪܳܐ܆ ܘܰܠܪܽܘܚܳܐ ܕܩܽܘܕܫܳܐ܆ ܘܣܶܓܕܬܳܐ ܘܪܽܘܡܪܳܡܳܐ܀

ܨܠܽܘܬܳܐ ܕܚܽܘܬܳܡܳܐ

ܐܰܠܳܗܳܐ ܐܰܒܳܐ ܢܶܗܘܶܐ ܥܰܡܟܶܝܢ܆ ܒܪܳܐ ܣܓܺܝܕܳܐ ܢܢܰܛܰܪܟܶܝܢ܆ ܪܽܘܚܳܐ ܩܰܕܺܝܫܳܐ ܕܰܠܒܶܫ̈ܬܶܝܢ ܢܶܓܡܽܘܪܟܶܝܢ ܘܡܶܢ ܢܶܟ̈ܝܳܢܶܐ ܢܫܰܘܙܶܒܟܶܝܢ܆ ܘܡܰܥܡܽܘܕܺܝܬܳܐ ܕܰܥܡܰܕ̈ܬܶܝܢ ܬܩܰܘܶܐ ܒܟܶܝܢ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܡܫܰܡܫܳܢܳܐ: ܙܶܠܶـܝ̈ܢ ܒܰܫܠܳـܡܳܐ܀

ܟܳܗܢܳܐ: ܟܰܕ ܡܰܓܥܠܺܝܢܰܢ ܠܟܶܝܢ ܠܛܰܝܒܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܥܰܡ ܙܘܳܕ̈ܶܐ ܛܳܒ̈ܶܐ ܕܰܢܣܰܒ̈ܬܶܝܢ ܡܶܢ ܡܰܥܡܽܘܕܺܝܬܳܐ ܘܡܰܕܒܚܳܐ ܡܚܰܣܝܳܢܳܐ ܕܰܡܫܺܝܚܳܐ ܐܰܠܳܗܰܢ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܨܠܽܘܬܳܐ ܡܳܐ ܕܫܳܪܶܝܢ ܟܠܺܝܠܳܐ ܕܰܥܡܺܝ̈ܕܳܬܳܐ (ܒܳܬܰܪ ܫܰܒܥܳܐ ܝܰܘܡܺܝ̈ܢ)

ܗܰܕܳܐ ܡܳܪܝܳܐ܆ ܒܝܰܕ ܗܰܘܢܳܟ ܡܰܥܒܶܕ ܚܰܝ̈ܶܐ܆ ܠܘܳܬ ܕܽܘܒܳܪܳܐ ܐܶܘܰܢܓܶܠܳـܝܳܐ ܠܰܐܡܬܳܟ ܗܳܕܶܐ܆ ܕܡܶܢ ܐܶܡܳܐ ܪܽܘܚܳܢܳܝܬܳܐ ܕܣܺܝܡܰܬ ܒܢܰܝ̈ܳܐ ܕܺܝܠܳܟ܆ ܚܳܬܳܐ ܠܺܝܚܺܝܕܳܝܳܐ ܒܪܳܟ ܫܰܡܠܺܝܬ. ܘܰܒܬܰܪܒܺܝܬܳܐ ܡܩܰܠܰܣܬܳܐ ܬܶܫܬܰܘܫܰܛܝ܆ ܘܰܒܡܰܠܟܽܘܬܳܟ ܫܡܰܝܳܢܺܝܬܳܐ ܟܠܺܝܠܳܐ ܗܳܢܳܐ ܬܩܰܒܶܠܝ ܕܰܢܛܺܝܪ ܠܗܳܢܽܘܢ ܕܫܰܦܺܝܪ ܚܳܙܩܺܝܢ. ܘܠܳܐ ܥܰܡ ܡܶܬܬܪܺܝܡܳܢܽܘܬܳܐ ܕܰܟܠܺܝܠܳܐ ܗܳܢܳܐ܆ ܡܶܢ ܣܽܘܝܳܥܳܐ ܕܝܰܡܺܝܢܳܟ ܬܶܫܬܰܘܚܰܕܝ܆ ܐܷܠܳܐ ܒܶܗ ܬܶܣܬܰܬܰܪ ܘܬܶܬܚܰܝܰܠܝ ܘܬܶܬܪܰܒܶܐ܆ ܘܰܬܩܰܒܶܠܝ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ܆ ܘܰܬܫܰܒܚܳܟ ܘܠܺܝܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ ܗܳܫܳܐ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܶܡ ܛܶܟܣܳܐ ܕܰܥܡܳܕܳܐ ܕܫܰܒܪ̈ܳܬܳܐ