ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܥܰܠ ܝܽܘܪܕܢܳܢ

ܥܰܠ ܝܽܘܪܕܢܳܢ. ܐ̱ܪ̈ܳܙܶܐ ܟܣܰܝ̈ܳܐ ܐܶܬܓܠܺܝܘ. ܪܽܘܚܳܐ ܕܢܳܚܶܬ. ܘܰܐܒܳܐ ܕܩܳܥܶܐ ܕܗܳܢܰܘ ܒܶܪܝ܀

ܬܗܰܪܘ ܟܶܢ̈ܫܶܐ. ܕܥܰܠ ܡܰܝ̈ܳܐ ܒܓܰܘ ܝܽܘܪܕܢܳܢ. ܕܰܚܙܰܘ ܪܽܘܚܳܐ. ܕܥܰܠ ܪܺܝܫܶܗ ܕܰܒܪܳܐ ܫܟܶܢ܀

ܒܪܺܝܟ ܕܶܢܚܳܟ. ܨܶܡܚܳܐ ܕܡܶܢ ܐܰܒܳܐ ܕܢܰܚ. ܘܰܠܝܽܘܪܕܢܳܢ܆ ܐܶܬܳܐ ܕܰܢܚܰܣܶܐ ܠܟܽܠ܀

ܝܽܘܪܕܢܳܢ ܚܕܺܝ. ܘܡܰܝ̈ܳܐ ܕܒܶܗ ܐܶܬܦܨܰܚܘ. ܕܰܒܟܽܘܢ ܥܡܰܕ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܥܺܕܬܳܐ ܚܕܳܝ. ܒܰܥܡܳܕܶܗ ܕܡܳܪܶܐ ܟܽܠ. ܘܨܰܒܶܬܝ ܒܢܰܝ̈ܟܝ܆ ܒܰܡܙܰܡܪ̈ܳܢܶܐ ܘܟܳܗ̈ܢܶܐ܀

ܫܽܘܒܚܳܐ ܠܳܟ ܡܳܪܝ. ܕܰܐܝܟ ܒܰܪܢܳܫܳܐ ܐܶܬܥܡܶܕܬ. ܟܰܕ ܐܺܝܬܰܝܟ܆ ܐܰܠܳܗܳܐ ܡܚܰܣܶܐ ܟܽܠ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܐܰܒܳܐ ܡܶܢ ܪܰܘܡܳܐ ܡܰܙܥܶܩ܆ ܘܝܽܘܚܰܢܳܢ ܒܰܐܪܥܳܐ ܡܰܟܪܶܙ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ. ܕܠܰܚܛܺܝܬܶܗ ܕܥܳܠܡܳܐ ܫܳܩܶܠ܀

ܚܙܳܬܶܗ ܥܺܕܬܳܐ ܠܰܡܫܺܝܚܳܐ܆ ܟܰܕ ܐܶܬܳܐ ܠܡܰܥܡܽܘܕܺܝܬܳܐ܆ ܘܗܰܝܡܢܰܬ ܒܶܗ ܕܗܽܘܝܽܘ ܡܳܪܳܗ̇܆ ܕܦܳܪܶܩ ܠܳܗ̇ ܡܶܢ ܛܳܥܝܽܘܬܳܐ܀

ܚܙܳܬܶܗ ܥܺܕܬܳܐ ܠܝܽܘܚܰܢܳܢ܆ ܒܝܽܘܪܕܢܳܢ ܢܰܗܪܳܐ ܘܶܐܡܪܰܬ ܠܶܗ܆ ܕܰܐܢ̱ܬܽ ܗ̱ܘ ܚܰܬܢܳܐ ܠܳܐ ܬܶܛܥܶܝܢܝ܆ ܘܶܐܡܰܪ ܠܳܗ̇ ܕܒܳܬܰܪ ܐܳܬܶܐ܀

ܒܝܰܘܡܳܐ ܫܒܺܝܚܳܐ ܕܰܥܡܳܕܳܟ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܫܰܟܶܢ ܠܰܢ ܫܽܘܒܩܳܢ ܚܰܘ̈ܒܶܐ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܡܰܠܰܐܟ̈ܶܐ ܛܦܰܣܘ ܒܰܚ̈ܕܳܕܶܐ܆ ܘܚܰܦܺܝܘ ܣܪ̈ܳܦܶܐ ܐܰܦܰܝ̈ܗܽܘܢ܆ ܟܰܕ ܚܳܝܪܺܝܢ ܗ̱ܘܰܘ ܒܰܡܫܺܝܚܳܐ܆ ܕܥܳܡܶܕ ܗ̱ܘܳܐ ܡܶܢ ܝܽܘܚܰܢܳܢ܀

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܆ ܕܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܕܒܰܥܡܳܕܳܟ ܡܰܥܒܶܕ ܚܰܝ̈ܶܐ܆ ܬܶܥܒܶܕ ܠܰܢ ܒܢܰܝ̈ܳܐ ܠܰܐܒܽܘܟ܀

ܫܽܘܒܚܳܐ

ܫܽܘܒܚܳܐ ܠܶܗ ܠܺܝܚܺܝܕܳܝܳܐ܆ ܕܶܐܬܳܐ ܘܰܥܡܰܕ ܒܓܰܘ ܝܽܘܪܕܢܳܢ܆ ܕܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܠܚܽܘܣܳܝ ܚܰܘ̈ܒܶܐ ܘܰܚ̈ܛܳܗܶܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ
ܫܡܳܗ̈ܶܐ ܪ̈ܓܺܝܓܶܐ ܘܫܰܦܺܝܪ̈ܶܐ

ܟܰܕ ܩܳܐܶܡ ܗ̱ܘܳܐ ܝܽܘܚܰܢܳܢ܆ ܘܡܰܟܪܶܙ ܗ̱ܘܳܐ ܠܰܐܝܠܶܝܢ ܕܳܐܬܶܝܢ܆ ܕܰܥܒܶܕܽܘܢ ܦܺܐܪ̈ܶܐ ܕܰܠ̈ܚܰܝܶܐ ܚܳܫܚܺܝܢ܆ ܚܙܳܝܗ̱ܝ ܗ̱ܘܳܐ ܠܶܐܡܪܶܗ ܕܰܐܠܳܗܳܐ܆ ܕܳܐܬܶܐ ܐܰܝܟ ܟܽܠ ܐ̱ܢܳܫ܆ ܕܡܶܢܶܗ ܢܶܥܡܰܕ ܒܓܰܘ ܡܰܝ̈ܳܐ܆ ܘܕܰܟܬܺܝ̈ܒܳܢ ܢܶܓܡܽܘܪ܆ ܘܶܐܡܰܪ ܠܶܗ ܕܶܐܢܳܐ ܣܢܺܝܩ ܐ̱ܢܳܐ܆ ܕܡܶܢܳܟ ܐܶܥܡܰܕ ܘܶܐܬܚܰܣܶܐ܆ ܘܰܐܢ̱ܬ ܐܰܝܟܰܢܳܐ ܠܘܳܬܝ ܐܶܬܰܝܬ܆ ܕܡܶܢܝ ܬܶܥܡܰܕ ܐܰܝܟ ܚܰܣܺܝܪܳܐ܆ ܘܶܐܡܰܪ ܠܶܗ ܕܰܫܒܽܘܩ ܕܟܺܐܢܽܘܬܳܐ ܬܶܬܓܡܰܪ܀

ܫܽܘܒܚܳܐ

ܙܶܩ̈ܬܶܐ ܒܡܰܝ̈ܳܐ ܛܡܰܪ ܝܰܥܩܽܘܒ܆ ܒܓܰܘ ܪ̈ܳܗܛܶܐ ܕܡܰܝ̈ܳܐ ܒܐ̱ܪܳܙܳܐ܆ ܘܰܐܝܟ ܓܰܘܢܳܐ ܕܰܚܙܳܬ܆ ܥܳܢ̈ܳܐ ܝܶܠܕܰܬ ܗ̱ܘܳܬ܆ ܡܫܺܝܚܳܐ ܕܶܝܢ ܡܳܪܶܗ ܕܝܰܥܩܽܘܒ ܨܠܺܝܒܳܐ ܒܡܰܝ̈ܳܐ ܩܒܰܥ܆ ܕܰܛܥܺܝܢ ܚܰܫ̈ܶܐ ܘܽܐܘܠ̈ܨܳܢܶܐ ܘܡܰܚ̈ܘܳܬܳܐ ܕܟܽܠ ܓܢܶܣ܆ ܥܳܢ̈ܶܗ ܕܟܺܐܢܳܐ ܥܰܠ ܙܶܩ̈ܬܶܐ܆ ܚܶܡܰܬ ܘܝܶܠܕܰܬ ܟܽܠ ܕܶܡ̈ܘܳܢ܆ ܡܰܥܡܽܘܕܺܝܬܳܐ ܕܚܽܘܣܳܝܳܐ܆ ܗܳܐ ܝܳܠܕܳܐ ܡܶܢ ܓܰܘ ܡܰܝ̈ܳܐ܆ ܢܰܟ̈ܦܶܐ ܘܨܰܝܳܡ̈ܶܐ ܒܰܨܠܺܝܒܳܐ ܡܝܰܩܪܳܐ܀

ܡܶܢ ܥܳܠܰܡ

ܐܰܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ. ܘܫܰܢܺܝܘ ܡܶܢ ܚܰܝ̈ܶܐ ܕܙܰܒܢܳܐ. ܥܰܕ ܗܳܘܶܐ ܝܰܘܡܳܐ ܕܰܩܝܳܡܬܳܐ ܕܕܰܡ̈ܟܶܐ. ܐܰܢܺܝܚ ܡܳܪܝܳܐ ܢܰܦ̈ܫܳܬܗܽܘܢ ܒܰܐܘ̈ܘܳܢܶܐ ܕܢܽܘܗܪܳܐ. ܘܢܰܪܓܫܽܘܢ ܒܩܰܒܪ̈ܶܐ ܓܰܪ̈ܡܰܝܗܽܘܢ ܒܝܰܘܡܳܐ ܕܥܽܘܗܕܳܢܗܽܘܢ. ܘܡܳܐ ܕܰܡܢܰܚܶܡ ܦܽܘܩܕܳܢܳܟ. ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܢܶܬܥܰܛܦܽܘܢ ܙܺܝܘܳܐ ܘܗܶܕܪܳܐ. ܘܢܶܥܠܽܘܢ ܥܰܡܳܟ ܠܰܓܢܽܘܢܳܟ. ܘܢܰܤܩܽܘܢ ܠܳܟ ܫܽܘܒܚܳܐ܆ ܕܰܐܢ̱ܬܽ ܗ̱ܘ ܡܢܰܚܡܳܢܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܐܶܡܪܰܬ ܡܰܪܝܰܡ ܠܓܰܒܪܺܐܶܝܠ ܪܺܝܫ

ܡܳܪܝܳܐ ܡܳܪܰܢ. ܠܓܰܘ ܥܺܕܰܬ ܩܽܘܕܫܳܐ ܥܶܠܶܬ ܘܰܚܙܺܝܬ ܬܰܡܳܢ. ܬܶܗܪܳܐ ܘܕܽܘܡܳܪܳܐ. ܡܰܝ̈ܳܐ ܕܰܪܡܶܝܢ܆ ܘܡܶܫܚܳܐ ܕܡܽܘܪܽܘܢ ܩܰܕܺܝܫܳܐ ܘܟܳܗܢܳܐ ܕܩܳܐܶܡ܆ ܘܪܳܫܶܡ ܒܰܨܠܺܝܒܳܐ܆ ܘܥܳܐܠܺܝܢ ܥܳܡܕܺܝܢ܆ ܝܰܠ̈ܕܶܝܗ̇ ܕܥܺܕܬܳܐ ܡܗܰܝܡܰܢܬܳܐ. ܒܰܫܡܳܐ ܕܰܐܒܳܐ. ܘܕܰܒܪܳܐ ܘܪܽܘܚ ܩܽܘܕܫܳܐ܀

ܫܽܘܒܚܳܐ

ܡܳܪܝܳܐ ܡܳܪܰܢ. ܝܽܘܚܰܢܳܢ ܟܰܕ ܡܰܥܡܶܕ ܗ̱ܘܳܐ ܒܚܽܘܪܒܳܐ ܕܺܝܗܽܘܕ܆ ܗܳܟܰܢ ܐܳܡܰܪ ܗ̱ܘܳܐ. ܕܒܳܬܰܪܝ ܐܳܬܶܐ܆ ܗܰܘ ܕܶܐܢܳܐ ܠܳܐ ܫܳܘܶܐ ܐ̱ܢܳܐ. ܐܶܬܓܗܶܢ ܐܶܫܪܶܐ܆ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ܆ ܗܽܘ ܢܰܥܡܶܕܟܽܘܢ܆ ܒܪܽܘܚܳܐ ܕܩܽܘܕܫܳܐ ܘܰܒܡܰܝ̈ܳܐ܆ ܡܶܛܽܠ ܕܗܽܘܝܽܘ. ܡܚܰܣܝܳܢܳܐ ܕܚܰܘ̈ܒܶܐ܀

ܡܶܢ ܥܳܠܰܡ

ܐܺܝܠ ܓܰܢ̱ܒܳܪܳܐ܆ ܕܩ̣ܳܡ ܥܰܠ ܪܰܘܡܳܗ̇ ܕܓܳܓܽܘܠܬܳܐ: ܘܰܩܥ̣ܳܐ ܒܩܳܠܶܗ: ܘܫܽܘ̈ܥܶܐ ܐܶܨܛܰܪܺܝ̣ܘ. ܐܰܫܡܰܥ ܩܳܠܳܟ. ܒܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ܆ ܘܢܰܚܶܡ ܐܶܢܽܘܢ: ܠܰܫܟܺܝ̈ܒܰܝ ܥܰܦܪܳܐ ܗ̄ ܕܢܰܘܕܽܘܢ ܠܳܟ ܥܰܠ ܛܰܝܒܽܘܬܳܟ. ܕܰܐܢ̱ܬܽ ܗ̱ܘ ܐܺܝܬܰܝܟ: ܡܢܰܚܡܳܢܳܐ ܕܡܺܝ̈ܬܶܐ܀

ܦܶܬܓܳܡܳܐ: ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ܆ ܐܰܠܳܗܳܐ ܡܫܰܒܚܳܐ ܪܥܶܡ܆ ܗܰܠܶܠܽܘܝܰܗ

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܫܶܡܥܰܬ ܩܳܠܶܗ ܕܰܐܒܳܐ ܓܢܺܝܙܳܐ ܕܡܰܙܥܶܩ ܘܳܐܡܰܪ܆ ܕܗܳܢܰܘ ܠܰܡ ܒܶܪܝ ܠܳܐ ܬܶܬܦܰܠܓܽܘܢ ܥܰܠ ܡܶܐܬܺܝܬܶܗ܆ ܒܰܫܪܳܪܳܐ ܓܶܝܪ ܗܽܘܝܽܘ ܝܰܠܕܶܗ ܕܰܐܒܳܐ ܓܢܺܝܙܳܐ܆ ܕܬܰܚܬܺܝ ܢܰܦܫܶܗ ܕܰܢܩܰܕܶܫ ܠܰܢ ܡܰܥܡܽܘܕܺܝܬܳܐ܀

ܫܽܘܒܚܳܐ ܠܛܳܒܳܐ ܕܬܰܚܬܺܝ ܝܳܬܶܗ ܨܶܝܕ ܬܰܚ̈ܬܳܝܶܐ܆ ܕܢܰܣܶܩ ܐܶܢܽܘܢ ܠܰܐܬܪܶܗ ܪܳܡܳܐ ܨܶܝܕ ܝܳܠܽܘܕܶܗ܆ ܬܰܘܕܺܝ ܠܰܫܡܶܗ ܕܰܚܠܰܛ ܝܳܬܶܗ ܥܰܡ ܥܰܦܪ̈ܳܢܶܐ܆ ܘܰܥܒܰܕ ܐܶܢܽܘܢ ܐܰܚܰܘ̈ܗ̱ܝ ܒܚܽܘܒܶܗ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀