ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܒܪܺܝܟܽ ܗ̱ܘ ܕܰܐܘܪܶܒܗ ܠܢܽܘܚܳܡܰܢ (ܣܳܠܶܩ܆ ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܚܙܳܗ̇ ܝܰܘܣܶܦ ܠܡܰܪܝܰܡ ܡܟܺܝܪܬܶܗ܆ ܕܰܛܥܺܝܢܳܐ ܥܽܘܠܳܐ ܒܓܰܘ ܟܰܪܣܳܗ̇܆ ܘܶܐܬܕܰܡܰܪ ܘܰܐܚܕܶܗ ܓܽܘܢܚܳܐ܆ ܠܟܺܐܢܳܐ ܠܽܘܩܒܰܠ ܒܰܪ̱ܬ ܕܰܘܺܝܕ܆ ܘܳܐܡܰܪ ܠܳܗ̇ ܕܡܳܢܰܘ ܗܳܢܳܐ܆ ܡܶܕܶܡ ܕܓܰܕܫܶܟܝ ܘܠܳܐ ܪܶܓܫܶܬ܆ ܫܰܢܳܝ ܡܶܢ ܨܶܐܕܰܝ܆ ܡܟܺܝܪܬܳܐ ܕܢܶܟܠܰܬ ܠܰܡܟܺܝܪܳܗ̇܀

ܫܽܘܒܚܳܐ

ܡܶܢ ܕܰܢܚܶܬ ܗ̱ܘܳܐ ܡܰܠܰܐܟܳܐ܆ ܨܶܝܕ ܝܰܘܣܶܦ ܘܰܓܠܳܐ ܠܶܗ ܐ̱ܪܳܙܳܐ܆ ܛܪܰܕ ܡܶܢܶܗ ܠܰܦܠܺܝܓܽܘܬܳܐ܆ ܘܗܽܘ ܣܳܓܶܕ ܠܳܗ̇ ܘܰܡܝܰܩܰܪ܆ ܘܳܐܡܰܪ ܠܳܗ̇ ܠܰܡܒܰܪܰܟܬܳܐ܆ ܕܚܳܣ ܠܺܝ ܡܶܟܺܝܠ ܕܶܐܬܦܠܶܓ܆ ܗܰܘ ܕܰܒܓܰܘ ܟܰܪܣܶܟܝ܆ ܗܽܘܝܽܘ ܚܰܝܠܶܗ ܕܥܶܠܳܝܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܕܡܰܘ̈ܕܝܳܢܶܐ
ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܒܝܰܕ ܥܺܝܪܳܐ܆ ܫܰܪܪܶܗ ܠܝܰܘܣܶܦ ܥܰܠ ܒܰܛܢܶܗ.

ܟܠܺܝܠ ܡܰܠܟܽܘܬܳܐ ܒܓܶܠܝܳܢܳܐ܆ ܝܰܗ̱ܒ ܠܶܗ ܡܰܠܰܐܟܳܐ ܠܝܰܘܣܶܦ܆ ܘܰܥܢܳܐ ܘܗܳܟܰܢ ܐܶܡܰܪ ܠܶܗ܆ ܕܠܳܐ ܬܶܬܦܰܠܰܓ ܥܰܠ ܡܰܪܝܰܡ܆ ܕܗܰܘ ܕܰܫܪܶܐ ܒܳܗ̇ ܩܰܕܺܝܫܰܐ ܗ̱ܘ܀

ܚܙܳܗ̇ ܗ̱ܘܳܐ ܝܰܘܣܶܦ ܠܒܰܪ̱ܬ ܕܰܘܺܝܕ܆ ܟܰܕ ܛܥܺܝܢܳܐ ܦܺܐܪܳܐ ܒܥܽܘܒܳܗ̇܆ ܘܥܰܠ ܕܰܒܬܽܘܠܬܳܐ ܗ̱ܝ ܐܶܬܦܰܠܰܓ܆ ܕܡܶܢ ܓܰܘܪܳܐ ܐܺܝܬܰܘܗ̱ܝ ܒܰܛܢܳܗ̇܆ ܘܠܳܐ ܝܺܕܰܥ ܕܡܶܢ ܪܽܘܚ ܩܽܘܕܫܰܐ ܗ̱ܘ܀

ܪܶܬܡܰܬ ܩܳܠܳܐ ܕܬܶܢ̈ܚܳܬܳܐ܆ ܠܽܘܩܒܰܠ ܥܽܘܒܳܗ̇ ܟܰܕ ܐܳܡܪܳܐ܆ ܚܽܘܪ ܡܳܪܝ ܒܡܽܘܟܳܟܳܗ̇ ܕܰܐܡܬܳܟ܆ ܕܗܳܐ ܚܕܺܝܪܺܝܢ ܠܺܝ ܝܗ̱ܽܘ̈ܕܳܝܶܐ܆ ܡܳܪܝ ܚܽܘܢܰܝܢܝ ܕܰܛܠܺܝܡܳܐ ܐ̱ܢܳܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܰܐܒܳܐ ܕܫܰܪܰܪ ܗ̱ܘܳܐ܆ ܠܟܺܐܢܳܐ ܝܰܘܣܶܦ ܕܰܦܠܺܝܓ ܗ̱ܘܳܐ.

ܐܰܚܰܝ̈ ܡܳܪܰܢ ܬܶܗܪܳܐ ܣܥܰܪ܆ ܕܰܢܚܶܬ ܘܰܫܪܳܐ ܒܰܒܬܽܘܠܬܳܐ܆ ܡܟܺܝܪܳܐ ܟܺܐܢܳܐ ܘܰܡܝܰܬܪܳܐ܆ ܘܰܚܬܺܝܡ ܥܽܘܒܳܗ̇ ܘܝܰܠܕܳܗ̇ ܫܒܺܝܚ܀

ܒܰܪ̱ܬ ܕܰܘܺܝܕ ܡܳܢܳܐ ܓܰܕܫܶܟܝ܆ ܝܰܘܣܶܦ ܠܡܰܪܝܰܡ ܐܳܡܰܪ ܗ̱ܘܳܐ܆ ܡܰܢ ܐܰܛܥܺܝ ܒܰܒܬܽܘܠܽܘܬܶܟܝ܆ ܓܠܳܝ ܠܺܝ ܐ̱ܪܳܙܳܐ ܘܠܳܐ ܬܕܰܓܶܠܝ܀

ܓܳܠܝܳܐ ܐ̱ܢܳܐ ܠܳܟ ܐܰܝܟ ܕܰܗܘܳܬ܆ ܐܳܡܪܳܐ ܡܰܪܝܰܡ ܝܰܘܣܶܦ ܫܡܰܥ܆ ܓܰܒܪܳܐ ܕܢܽܘܪܳܐ ܢܚܶܬ ܣܰܒܪܰܢܝ܆ ܘܝܰܗ̱ܒܠܺܝ ܫܠܳܡܳܐ ܘܗܳܕܶܐ ܗܘܳܬ܀

ܕܺܐܡܰܪ ܠܳܟ ܬܽܘܒ ܠܳܐ ܡܰܨܝܳܢ܆ ܕܶܐܡܰܪܬܳܗ̇ ܠܳܟ ܐܰܝܟ ܕܰܗܘܳܬ܆ ܪܺܝܫܳܐ ܕܥܺܝܪ̈ܶܐ ܢܚܶܬ ܣܰܒܪܰܢܝ܆ ܘܩܰܒܠܶܬ ܒܰܛܢܳܐ ܘܠܳܐ ܪܶܓܫܶܬ܀

ܗܳܠܶܝܢ ܟܽܠܗܶܝܢ ܗܳܐ ܐܳܡܪܳܢ܆ ܘܰܐܚܪ̈ܳܢܝܳܬܳܐ ܠܳܐ ܡܰܘܣܦܳܢ܆ ܕܰܚܬܺܝܡܳܐ ܐ̱ܢܳܐ ܘܗܳܐ ܣܳܗܕܺܝܢ܆ ܒܬܽܘ̈ܠܶܐ ܕܰܩܢܽܘܡܝ ܕܠܳܐ ܐܶܫܬܪܺܝܘ܀

ܘܳܠܶܐ ܗܳܘܶܐ ܠܳܟ ܕܬܰܫܰܪ ܠܩܳܠܝ܆ ܕܕܰܓܳܠܽܘܬܳܐ ܠܳܐ ܚܙܰܝܬ ܒܺܝ܆ ܢܰܟܦܽܘܬܝ ܘܰܫܪܳܪܝ ܥܠܰܝ ܣܳܗܕܺܝܢ܆ ܕܰܒܬܽܘܠܬܳܐ ܐ̱ܢܳܐ ܘܠܳܐ ܡܕܰܓܠܳܢ܀

ܙܰܘܥܰܐ ܗ̱ܘ ܪܰܒܳܐ ܕܠܳܐ ܡܰܫܪܰܬ܆ ܕܰܦܫܺܝܩܽ ܗ̱ܘ ܠܶܗ ܠܡܳܪܳܐ ܕܟܽܠ܆ ܕܢܶܬܶܠ ܦܺܐܪܳܐ ܠܰܒܬܽܘܠܬܳܐ܆ ܐܰܝܟ ܗܰܘ ܦܺܐܪܳܐ ܕܰܒܣܰܘܟܬܳܐ܀

ܚܰܘܳܐ ܠܡܶܠܰܝ̈ ܗܳܐ ܣܳܗܕܳܐ܆ ܕܰܕܠܳܐ ܢܶܩܦܳܐ ܕܓܰܒܪܳܐ ܗܘܳܬ܆ ܕܶܐܠܥܶܗ ܕܳܐܕܳܡ ܐܰܦܪܝܳܗ̇܆ ܘܠܺܝ ܐܰܝܟܰܢܳܐ ܠܳܐ ܡܰܫܪܰܬ܀

ܛܥܰܝܬ ܐܳܘ ܝܰܘܣܶܦ ܣܰܒ ܘܰܩܪܺܝ܆ ܕܗܳܐ ܒܶܐܫܰܥܝܳܐ ܟܬܺܝܒ ܗ̱ܽܘ ܥܠܰܝ܆ ܕܢܶܗܘܶܐ ܝܰܠܕܳܐ ܠܰܒܬܽܘܠܬܳܐ܆ ܘܶܐܢ ܠܳܐ ܫܰܪܺܝܪ ܠܡܽܘܢ ܐܺܝܬ ܒܶܗ܀

ܝܳܐܶܐ ܗ̱ܘܳܐ ܠܳܟ ܐܶܠܽܘ ܒܥܰܝܬ܆ ܫܪܳܪܳܐ ܕܡܶܠܰܝ̈ ܕܗܳܐ ܚܙܰܝܬ ܒܺܝ܆ ܕܶܐܢܳܐ ܚܬܺܝܡܳܢ ܟܰܕ ܣܳܗܕܺܝܢ܆ ܟܝܳܢ̈ܶܐ ܚܰܪ̈ܫܶܐ ܕܠܳܐ ܡܶܠܬܳܐ܀

ܟܰܕܽܘ ܟܺܐܢܳܐ ܡܥܺܝܩܰܬ ܠܺܝ܆ ܕܟܰܕ ܕܰܟܝܳܐ ܐ̱ܢܳܐ ܘܺܐܝܬ ܣܳܗ̈ܕܶܐ܆ ܩܪܺܝ ܠܚܰܟܺܝ̈ܡܳܬܳܐ ܕܰܐܬܪܰܢ܆ ܘܰܚܙܺܝ ܒܬܽܘ̈ܠܰܝ ܕܠܳܐ ܐܶܫܬܪܺܝܘ܀

ܠܳܐ ܙܳܕܶܩ ܠܺܝ ܐܶܕܡܶܐ ܠ̱ܐܢܳܫ܆ ܕܠܰܘ ܓܶܝܪ ܚܰܒܪܳܐ ܐܺܝܬ ܠܶܗ ܠܒܶܪܝ܆ ܝܺܚܺܝܕܳܝܰܐ ܗ̱ܘ ܕܒܰܛܢܳܐ ܐ̱ܚܪܺܝܢ܆ ܕܰܐܝܟ ܕܺܝܠܝ ܢܶܗܘܶܐ ܠܳܐ ܡܶܫܟܚܳܐ܀

ܡܶܢ ܬܰܚܘܺܝܬܳܐ ܠܳܐ ܬܰܕܚܠܰܢܝ܆ ܕܺܐܝܬ ܗ̱ܽܘ ܕܬܶܚܙܶܐ ܐܶܢ ܚܳܝܪܰܬ܆ ܠܟܺܐܦܳܐ ܒܚܽܘܪܺܝܒ ܡܰܢ ܐܰܪܕܝܳܗ̇܆ ܘܰܠܗܰܘ ܫܰܒܛܳܐ ܡܰܢ ܐܰܦܪܥܶܗ܀

ܢܶܫܠܶܐ ܦܽܘܡܳܟ ܘܠܳܐ ܢܒܰܣܪܰܢܝ܆ ܕܠܳܐ ܒܣܺܝܪܳܐ ܐ̱ܢܳܐ ܒܰܐܦܰܝ̈ ܐ̱ܢܳܫ܆ ܕܠܳܟ ܐܶܬܡܰܟܪܶܬ ܘܠܳܐ ܚܰܠܦܶܬ܆ ܫܪܳܪܳܟ ܝܰܘܣܶܦ ܠܳܐ ܬܥܰܫܩܰܢܝ܀

ܣܰܒܪܳܐ ܐܺܝܬ ܠܺܝ ܘܰܡܣܰܟܝܳܢ܆ ܒܗܰܘ ܐܰܠܳܗܳܐ ܕܟܽܠ ܦܫܺܝܩ ܠܶܗ܆ ܕܢܶܓܠܶܐ ܫܪܳܪܶܗ ܒܰܛܠܺܝܡܽܘܬܝ܆ ܘܰܢܚܰܘܶܐ ܠܳܟ ܕܠܳܐ ܡܕܰܓܠܳܢ܀

ܥܶܠܬܳܐ ܕܩܰܫܝܳܐ ܡܶܢܳܟ ܘܡܶܢܝ܆ ܗܳܐ ܥܳܨܝܳܐ ܠܺܝ ܘܰܡܡܰܠܠܳܢ܆ ܘܰܟܡܳܐ ܕܰܫܪܳܪܝ ܣܳܗܶܕ ܥܠܰܝ܆ ܠܳܐ ܪܳܟܶܢ ܩܳܠܝ ܘܠܳܐ ܒܳܗܬܳܢ܀

ܦܫܺܝܩ ܗ̱ܽܘ ܠܥܽܘܠܳܐ ܕܰܒܥܽܘܒܝ ܫܪܶܐ܆ ܢܡܰܠܶܠ ܚܠܳܦܰܝ ܡܳܐ ܕܶܐܙܕܟܺܝܬ܆ ܘܢܶܓܠܶܐ ܐ̱ܪܳܙܳܐ ܕܨܶܐܕܰܝ ܗܘܳܐ܆ ܘܰܢܦܰܫܶܩ ܠܳܟ ܕܠܳܐ ܕܰܓܠܶܬ܀

ܨܰܘܬܳܟ ܝܰܘܣܶܦ ܚܰܒܺܝܒ ܠܺܝ܆ ܠܰܘ ܠܙܽܘܘܳܓܳܐ ܡܶܬܪܰܓܪܓܳܢ܆ ܕܶܐܢ ܐܰܫܰܪܬܳܢ ܠܳܐ ܐܶܬܓܠܶܙ܆ ܡܶܢ ܥܶܢܝܳܢܳܟ ܕܠܳܐ ܕܰܓܠܶܬ܀

ܩܳܠܰܝ̈ ܡܶܟܺܝܠ ܠܥܽܘܒܝ ܐܶܫܕܶܐ܆ ܘܶܐܡܰܠܶܠ ܠܶܗ ܒܟܶܣܝܳܐ ܠܒܶܪܝ܆ ܘܗܽܘ ܢܰܦܺܝܣ ܕܰܡܓܰܙܝܳܢ܆ ܡܶܢ ܥܶܢܝܳܢܳܟ ܕܠܳܐ ܐܶܬܓܠܶܙ܀

ܪܰܘܒܳܐ ܪܰܒܳܐ ܗܳܘܶܐ ܥܠܰܝ܆ ܘܥܰܡܳܐ ܣܰܟܠܳܐ ܣܳܒܶܟ ܒܺܝ܆ ܘܡܶܬܚܰܫܒܳܐ ܐ̱ܢܳܐ ܓܰܝܳܪܬܳܐ܆ ܘܶܐܢ ܒܶܪܝ ܢܶܗܘܶܐ ܠܺܝ ܡܒܰܣܒܣܺܝܢ܀

ܫܟܶܒ ܗ̱ܘܳܐ ܝܰܘܣܶܦ ܘܥܺܝܪܳܐ ܢܚܶܬ܆ ܘܰܓܠܳܐ ܠܐ̱ܪܳܙܳܐ ܐܰܝܟ ܕܶܐܣܬܥܰܪ܆ ܘܩܰܕܶܡ ܝܰܘܣܶܦ ܒܪܶܟ ܘܰܣܓܶܕ܆ ܠܡܰܠܝܰܬ ܫܽܘܦܪ̈ܶܐ ܕܠܳܐ ܕܰܓܠܰܬ܀

ܬܰܘܕܺܝ ܠܰܒܪܳܐ ܕܡܶܢܳܗ̇ ܕܢܰܚ܆ ܘܰܒܡܰܘܠܳܕܶܗ ܥܳܠܡܳܐ ܦܪܰܩ܆ ܣܶܓܕܬܳܐ ܠܪܽܘܚܳܐ ܩܰܕܺܝܫܳܐ܆ ܕܠܳܐ ܡܣܰܝ̈ܟܳܢ ܠܶܗ ܒܶܪ̈ܝܳܬܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܳܘ ܪܳܚܡܶܗ ܕܡܺܝܬܳܐ ܕܰܥܢܰܕ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܝܰܘܣܶܦ ܟܺܐܢܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܛܳܣ ܗ̱ܘܳܐ ܓܰܒܪܺܐܶܝܠ ܥܺܝܪܳܐ܆ ܡܶܢ ܪܰܘܡܳܐ ܡܛܳܐ ܨܶܝܕ ܝܰܘܣܶܦ܆ ܘܚܰܘܺܝ ܠܶܗ ܙܺܝܘܳܐ ܕܚܺܝܠܳܐ܆ ܕܰܢܙܺܝܥܶܗ ܗ̱ܘܳܐ ܒܰܚܙܳܬܶܗ܆ ܛܪܰܦ ܓܶܦܳܐ ܘܰܕܢܰܚܘ ܒܰܪ̈ܩܶܐ܆ ܦܬܰܚ ܦܽܘܡܶܗ ܘܰܪܥܶܠ ܒܰܝܬܳܐ܀

ܫܽܘܒܚܳܐ ܠܪܳܡܳܐ ܕܶܐܬܡܰܟܰܟ܆ ܘܥܽܘܠܳܐ ܗܘܳܐ ܒܟܰܪܣܳܗ̇ ܕܡܰܪܝܰܡ܆ ܘܰܓܠܳܐ ܐ̱ܪܳܙܳܐ ܕܥܰܠ ܒܰܛܢܳܗ̇܆ ܠܟܺܐܢܳܐ ܝܰܘܣܶܦ ܕܰܢܗܰܝܡܶܢ܆ ܕܗܽܘܝܘ ܒܩܽܘܫܬܳܐ ܐܰܠܳܗܳܐ܆ ܕܰܨܒܳܐ ܕܢܶܗܘܶܐ ܒܰܪܢܳܫܳܐ܆ ܘܠܰܐܒܽܘܗ̱ܝ ܘܰܠܪܽܘܚܳܐ ܕܩܽܘܕܫܳܐ܆ ܬܶܫܒܽܘܚܬܳܐ ܒܟܽܠ ܥܶܕܳܢܺܝ̈ܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܝܰܘܣܶܦ ܟܺܐܢܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀