ܗܰܘ ܕܝܰܘܢܳܐܺܝܬ ܐܰܪܟܶܕܺܝܰܩܽܘܢ ܡܶܬܩܪܶܐ

ܢܽܘܗܳܪܳܐ

ܒܳܬܰܪ ܕܶܝܢ ܙܽܘܝܳܚܳܐ ܕܐ̱ܪ̈ܳܙܶܐ ܘܰܩܕܳܡ ܫܰܘܬܳܦܽܘܬܳܐ܆ ܡܩܰܪܒܺܝܢ ܠܶܗ ܟܰܕ ܡܥܰܛܰܦ ܐܽܘܪܳܪܳܐ ܕܰܡܫܰܡܫܳܢܽܘܬܳܐ܆ ܘܩܳܐܶܡ ܩܕܳܡ ܦܳܬܽܘܪ ܚܰܝ̈ܶܐ܀

ܪܺܝܫܟܳܗ̈ܢܶܐ ܕܶܝܢ ܡܫܺܝܓ ܨܶܒ̈ܥܳܬܶܗ ܒܰܡܫܰܡܫܳܢܺܝܬܳܐ ܘܠܳܒܶܫ ܬܳܓܳܐ܆ ܘܳܐܚܶܕ ܨܠܺܝܒܳܐ ܘܚܽܘܛܪܳܐ ܘܰܡܫܰܪܶܐ ܒܛܶܟܣܳܐ ܟܰܕ ܐܳܡܰܪ:

ܨܠܽܘܬܳܐ ܕܫܽܘܪܳܝܳܐ

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܪܺܝܫܟܳܗ̈ܢܶܐ: ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܰܢ ܕܰܢܫܰܡܠܶܐ ܠܬܶܫܡܶܫܬܳܐ ܗܳܕܶܐ ܕܟܺܝܬܳܐ ܘܐ̱ܪܳܙܳܢܳܝܬܳܐ܆ ܘܢܶܗܘܶܐ ܠܳܟ ܗܰܝ̈ܟܠܶܐ ܩܰܕܺܝ̈ܫܶܐ܆ ܘܬܶܥܡܰܪܝ ܒܰܢ ܫܟܺܝܢܬܳܟ ܐܰܠܳܗܳܝܬܳܐ܆ ܘܰܠܥܰܒܕܳܟ ܗܳܢܳܐ ܓܡܽܘܪ ܘܫܰܡܠܳܐ ܒܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ܆ ܕܰܚܢܰܢ ܘܗܽܘ ܢܫܰܒܚܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܩܽܘܩܰܠܺܝܽܘܢ (ܒܪܶܟܢܳܐ ܬܪܰܝܳܢܳܐ)

ܡܫܰܡ̈ܫܳܢܶܐ: ܡܳܪܝܳܐ ܡܰܢܽܘ ܢܶܥܡܰܪ ܒܡܰܫܟܢܳܟ ܗ̄ ܘܡܰܢܽܘ ܢܶܫܪܶܐ ܒܛܽܘܪܳܟ ܩܰܕܺܝܫܳܐ܀

ܡܫܰܡ̈ܫܳܢܶܐ: ܐܰܝܢܳܐ ܕܰܡܗܰܠܶܟ ܕܠܳܐ ܡܽܘܡ ܘܥܳܒܶܕ ܙܰܕܺܝܩܽܘܬܳܐ ܗ̄ ܘܰܡܡܰܠܶܠ ܩܽܘܫܬܳܐ ܒܠܶܒܶܗ ܘܠܳܐ ܢܰܟܽܘܠܬܳܢ ܒܠܶܫܳܢܶܗ܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܶܢܥܳܠܰܡ܀

ܥܶܩܒܳܐ: ܒܪܶܟܢܳܐ ܕܰܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܡܫܰܡ̈ܫܳܢܶܐ: ܦܳܥܠܳܐ ܒܰܛܺܝܠܳܐ ܗܘܺܝܬ ܠܺܝ: ܒܓܰܘ ܟܰܪܡܳܟ ܡܳܪܰܢ ܝܶܫܽܘܥ: ܘܡܳܐ ܕܰܐܓܪܳܐ ܒܪܰܡܫܳܐ ܝܳܗܒܰܬ: ܠܟܰܫܺܝܪ̈ܶܐ ܡܢܺܝܢܝ ܡܳܪܝ ܥܰܡܗܽܘܢ܀

ܩܳܠܳܐ ܒܩ̄: ܩܽܘܩܰܠܺܝܽܘܢ (ܒܪܶܟܢܳܐ ܫܒܺܝܥܳܝܳܐ)

ܡܫܰܡ̈ܫܳܢܶܐ: ܛܰܝܒܽܘܬܶܗ ܕܡܳܪܝܳܐ ܠܥܳܠܰܡ ܐܶܙܡܰܪ ܗ̄ܘܗ̄ ܘܰܠܕܳܪܕܳܪ̈ܺܝܢ ܐܰܘܕܰܥ ܗܰܝܡܳܢܽܘܬܶܗ ܒܦܽܘܡܝ܀

ܡܫܰܡ̈ܫܳܢܶܐ: ܗܳܢܳܐ ܢܩܰܒܶܠ ܒܽܘܪܟܬܳܐ ܡܶܢ ܡܳܪܝܳܐ ܗ̄ܘܗ̄ ܘܙܰܕܺܝܩܽܘܬܳܐ ܡܶܢ ܐܰܠܳܗܳܐ ܦܳܪܽܘܩܰܢ܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܶܢܥܳܠܰܡ܀

ܥܶܩܒܳܐ: ܒܪܶܟܢܳܐ ܕܰܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܡܫܰܡ̈ܫܳܢܶܐ: ܒܥܶܕܳܢ ܨܰܦܪܳܐ ܡܩܰܕܡܺܝܢܰܢ: ܣܳܓܕܺܝܢܰܢ ܠܪܽܘܚܳܐ ܕܩܽܘܕܫܳܐ: ܕܰܒܡܰܘܗܰܒܬܶܗ ܢܶܬܦܰܨ̈ܚܳܢ ܢܰܦ̈ܫܳܬܳܐ ܕܰܡܦܺܝ̈ܣܳܢ ܠܶܗ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ܀

ܨܠܽܘܬܳܐ

ܨܰܒܶܬ ܡܳܪܝܳܐ ܠܥܰܒܕܳܟ ܒܥܽܘܬܪܳܐ ܕܫܽܘܟܳܢܰܝ̈ܟ ܐܰܠܳܗܳܝ̈ܶܐ. ܐܰܝܟܰܢܳܐ ܕܰܒܚܰܕܽܘܬܳܐ ܘܒܰܦܨܺܝܚܽܘܬܳܐ ܘܰܒܕܰܟܝܽܘܬܳܐ ܕܢܰܦܫܳܐ ܘܰܕܦܰܓܪܳܐ. ܢܫܰܡܶܫ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܘܗܝ. ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ: ܒܪܶܟܢܳܐ ܕܚܽܘܣܳܝܳܐ ܗܘܺܝ ܠܺܝ

ܪܺܝܫܟܳܗ̈ܢܶܐ: ܪܰܚܶܡܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܚܽܘܣܳܝܳܐ ܗܘܺܝ ܠܺܝ܆ ܐܰܢ̱ܬ ܠܚܽܘܕܰܝܟ ܣܰܓܺܝ ܪ̈ܰܚܡܶܐ ܐܰܠܳܗܳܐ. ܘܩܰܒܶܠܰܝܢܝ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܪܺܝܫܟܳܗ̈ܢܶܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ܀

ܡܫܰܡ̈ܫܳܢܶܐ: ܐܰܒܳܐ ܩܰܕܺܝܫܳܐ܆ ܘܝܳܗܽܘܒܳܐ ܕܩܰܕܺܝܫܽܘܬܳܐ ܐܰܠܳܗܳܐ. ܩܰܕܶܫ ܒܛܰܝܒܽܘܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܡܰܘܗܰܒܬܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܠܳܟ ܒܰܠܚܽܘܕܰܝܟ ܚܛܺܝܬ܀

ܡܫܰܡ̈ܫܳܢܶܐ: ܒܪܳܐ ܕܰܒܡܰܘܗܰܒܬܶܗ܆ ܠܰܫܠܺܝ̈ܚܶܐ ܕܺܝܠܶܗ ܚܰܟܶܡ ܐܰܠܳܗܳܐ. ܚܰܟܶܡ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܚܰܟܰܡ (ܢܶܬܚܰܟܡܽܘܢ)܀

ܪܺܝܫܟܳܗ̈ܢܶܐ: ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ܀

ܡܫܰܡ̈ܫܳܢܶܐ: ܪܽܘܚܳܐ ܕܠܰܫܠܺܝ̈ܚܶܐ܆ ܒܠܶܫܳܢ̈ܐ ܕܢܽܘܪܳܐ ܚܰܟܶܡ ܐܰܠܳܗܳܐ. ܩܰܕܶܫ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܐܰܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ܀

ܡܫܰܡ̈ܫܳܢܶܐ: ܠܬܰܪ̈ܥܶܐ ܕܰܫܡܰܝ̈ܳܐ܆ ܬܶܦܬܰܚܝ ܛܰܝܒܽܘܬܳܟ ܩܕܳܡܰܝܢ ܐܰܠܳܗܳܐ. ܘܰܐܓܶܢ ܝܰܡܺܝܢܳܟ܆ ܥܰܠ ܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܳܗ ܕܒܳܗ ܢܶܬܒܰܪܰܟ (ܢܶܬܒܰܪܟܽܘܢ)܀

ܪܺܝܫܟܳܗ̈ܢܶܐ: ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ܀

ܡܫܰܡ̈ܫܳܢܶܐ: ܒܶܐܣܛܠܳܟ ܢܶܨܛܰܒܰܬ܆ ܨܰܘܪܳܐ ܕܰܩܕܳܡܰܝܟ ܪܟܺܝܢܽ ܗ̱ܘ ܐܰܠܳܗܳܐ. ܘܚܳܐܰܪ ܠܡܰܘܗܰܒܬܳܟ܆ ܕܒܳܗ ܢܶܨܛܰܒܰܬ ܒܨܶܒ̈ܬܶܐ ܕܪܽܘܚܳܐ ܩܰܕܺܝܫܳܐ܀

ܪܺܝܫܟܳܗ̈ܢܶܐ: ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ܀

ܡܫܰܡ̈ܫܳܢܶܐ: ܟܶܢ̈ܫܶܐ ܫܡܰܝܳܢ̈ܶܐ܆ ܡܶܬܦܰܨܚܺܝܢ ܒܫܽܘܡܠܳܝ ܥܰܒܕܳܟ (ܥܰܒܕܰܝ̈ܟ) ܐܰܠܳܗܳܐ. ܘܙܳܡܪܺܝܢ ܬܰܚ̈ܬܳܝܶܐ܆ ܬܶܫܒܽܘܚܬܳܐ ܠܰܕܚܰܠܛܶܗ (ܠܕܰܚܠܰܛ ܐܶܢܽܘܢ) ܒܶܝܬ ܟܶܢܫܰܝ̈ܗܽܘܢ܀

ܪܺܝܫܟܳܗ̈ܢܶܐ: ܦܰܨܳܢܝ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ܀

ܡܫܰܡ̈ܫܳܢܶܐ: ܬܳܡܗܺܝܢ ܢܽܘܪ̈ܳܢܶܐ܆ ܟܰܕ ܨܳܪܶܐ ܠܪܰܘܡܳܐ ܪܽܘܚܳܐ ܩܰܕܺܝܫܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܒܺܐܝܕܰܝ̈ ܪܺܝܫܟܳܗ̈ܢܶܐ ܠܰܕܫܳܐܠܺܝܢ ܠܳܗ܀

ܪܺܝܫܟܳܗ̈ܢܶܐ: ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܘܳܐܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ܀

ܡܫܰܡ̈ܫܳܢܶܐ: ܠܳܐ ܡܶܣܬܰܝܟܳܢܳܐ܆ ܒܺܐܝܕܰܝ̈ܳܐ ܕܕܰܟܝ̈ܳܢ ܡܶܬܬܚܶܕ ܪܽܘܚܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܠܪܺܝܫܳܐ ܕܟܳܗ̈ܢܶܐ ܒܰܕܡܽܘܬ ܐܰܗܪܽܘܢ܀

ܪܺܝܫܟܳܗ̈ܢܶܐ: ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ ܕܽܐܘܪܺܫܠܶܡ܀

ܡܫܰܡ̈ܫܳܢܶܐ: ܡܕܰܟܝܳܢܳܐ ܕܚܰܘ̈ܒܶܐ܆ ܒܝܰܕ ܡܰܓܢܳܢܽܘܬܶܗ ܕܪܽܘܚܳܐ ܐܰܠܳܗܳܐ܆ ܕܰܟܳܐ ܒܪܽܘܚܳܦܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܫܽܘܡܠܳܝܳܟ܆ ܕܒܶܗ ܢܶܬܕܰܟܶܐ (ܢܶܬܕܰܟܽܘܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢܥܳܠܰܡ܀ ܫܽܘܒ̈ܚܶܐ ܬܠܺܝ̈ܬܳܝܶܐ܆ ܠܗܰܘ ܚܰܕ ܕܰܬܠܳܬܰܐ ܗ̱ܘ ܘܚܰܕܽ ܗ̱ܘ ܐܰܠܳܗܳܐ܆ ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ ܕܠܶܗ ܣܳܓܕܺܝܢܰܢ܀

ܚܽܘܣܳܝܳܐ

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ ܩܽܘܪܝܶܐܠܶܝܣܽܘܢ܀

ܪܺܝܫܟܳܗ̈ܢܶܐ: ܢܨܰܠܶܐ ܟܽܠܰܢ܆ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀ ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܺܝܽܘܢ

ܠܗܰܘ ܛܳܒܳܐ ܒܰܟܝܳܢܶܗ. ܘܰܡܫܰܟܢܳܢܳܐ ܕܫܽܘܟܳܢ̈ܶܐ ܐܰܠܳܗܳܝ̈ܶܐ ܠܰܒ̈ܢܰܝܳܐ ܕܛܰܝܒܽܘܬܳܐ. ܗܰܘ ܬܠܺܝܬܳܝܳܐ ܒܰܩ̈ܢܽܘܡܶܐ. ܘܰܠܚܽܘܕܳܝܳܐ ܒܰܟܝܳܢܳܐ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܝܪܳܐ. ܕܠܶܗ ܬܶܫܒ̈ܚܳܢ ܘܒܽܘܪ̈ܟܳܢ ܙܳܕ̈ܩܳܢ ܘܡܶܬܬܚܺܝ̈ܒܳܢ. ܒܗܳܢܐ ܥܶܕܳܢܳܐ ܕܚܽܘܣܳܝܳܐ ܕܟܺܝܪܳܛܽܘܢܺܝܰܐ ܗܳܕܶܐ ܡܶܫܬܰܡܠܝܳܐ ܘܰܒܟܽܠܗܽܘܢ ܥܺܐܕ̈ܐ ܘܥܶܕܳܢ̈ܐ ܘܫܳܥ̈ܶܐ ܘܙܰܒ̈ܢܶܐ܆ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܕܫܰܪܰܪ ܠܥܺܕܬܶܗ ܩܰܕܺܝܫܬܳܐ ܒܫܽܘܟܳܢ̈ܶܐ ܐܰܠܳܗܳܝ̈ܶܐ. ܘܢܰܨܰܚ ܠܪ̈ܳܥܰܘܳܬܳܗ ܒܡܰܘܗ̈ܒܳܬܳܐ ܐܰܠܳܗܳܝܳـ̈ܬܳܐ ܕܡܶܢܶܗ. ܐܰܝܟܰܢܳܐ ܕܳܐܦ ܗܶܢܽܘܢ ܢܪܰܒܽܘܢ ܘܰܢܫܰܟܢܽܘܢ ܠܟܽܠ ܚܰܕ ܡܶܢ ܒܢܰܝ̈ܳܐ ܪ̈ܽܘܚܳܢܳܝܶܐ ܐܰܝܟ ܠܳܚܡܽܘܬܳܐ ܘܰܓܒܺܝܬܳܐ ܕܛܰܝܒܽܘܬܶܗ ܐܰܠܳܗܳܝܬܳܐ. ܐܰܢ̱ܬ ܡܳܪܝܳܐ ܡܪܰܚܡܳܢܳܐ܆ ܫܰܕܰܪ ܛܰܝܒܽܘܬܳܟ ܥܰܠ ܥܰܒܕܳܟ ܗܳܢܳܐ. ܘܰܓܒܺܝܘܗ̱ܝ ܕܢܶܗܘܶܐ ܪܺܝܫ ܡܫܰܡ̈ܫܳܢܶܐ ܐܰܝܟ ܛܶܟܣܶܗ ܕܶܐܣܛܶܦܰܢܽܘܣ ܒܽܘܟܪܳܐ ܕܣܳܗ̈ܕܶܐ. ܐܰܥܬܰܪܳܝܗ̱ܝ ܒܚܶܟܡܬܳܐ ܫܰܪܺܝܪܬܳܐ. ܘܗܰܕܳܝܗ̱ܝ ܠܘܳܬ ܡܕܰܒܪܳܢܽܘܬܳܐ ܟܺܐܢܬܳܐ ܘܰܕܠܳܐ ܡܰܣܰܒ ܒܰܐܦ̈ܶܐ. ܘܠܺܝܕܰܥܬܶܗ ܐܰܢܗܰܪ ܒܨܶܡ̈ܚܶܐ ܕܙܰܗܪܺܝܪ̈ܰܝܟ. ܘܫܰܟܶܢ ܠܶܗ ܦܰܪܶܗܣܺܝܰܐ ܡܫܰܡܠܰܝܬܳܐ. ܘܗܰܒ ܠܶܗ ܕܰܒܦܽܘܩܕܳܢܰܝ̈ܟ ܐܰܠܳܗܳܝ̈ܶܐ ܢܶܬܐܶܡܶܢ ܒܠܺܠܝܳܐ ܘܒܺܐܝܡܳܡܳܐ. ܒܛܰܝܒܽܘܬܳܐ ܕܺܝܠܳܟ ܘܕܺܝܚܺܝܕܳܝܳܐ ܒܪܳܟ ܘܰܕܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܳܠܳܐ ܒܩ̄: ܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ (ܒܪܶܟܢܳܐ ܫܒܺܝܥܳܝܳܐ)

ܡܫܰܡ̈ܫܳܢܶܐ: ܡܫܰܡ̈ܫܳܢܶܐ ܕܢܽܘܪܳܐ ܘܰܕܪܽܘܚܳܐ܆ ܥܒܰܕܬ ܠܳܟ ܡܳܪܝ ܕܰܢܫܰܡܫܽܘܢܳܟ. ܘܰܒܥܺܕܬܳܐ ܕܒܽܘܟܪ̈ܶܐ ܫܡܰܝܳܢ̈ܶܐ܆ ܗܳܐ ܩܳܝܡܺܝܢ ܥܰܠ ܬܶܫܡܶܫܬܳܟ. ܘܒܰܐܪܥܳܐ ܐܰܩܺܝܡܬ ܠܺܐܝܩܳܪܳܟ܆ ܒܰܕܡܽܘܬ ܥܺܝܪ̈ܶܐ ܡܫܰܡ̈ܫܳܢܶܐ܆ ܘܗܳܐ ܒܓܰܘ ܥܺܕܬܳܐ ܐܰܪ̈ܥܳܢܶܐ. ܡܫܰܡܫܺܝܢ ܠܳܗ ܠܰܐܠܳܗܽܘܬܳܟ܆ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܀

ܫܘܒܚܐ: ܓܒܳܐ ܡܳܪܰܢ ܫܰܒܥܺܝܢ ܬܰܠܡܺܝ̈ܕܶܐ܆ ܘܫܰܕܰܪ ܐܶܢܽܘܢ ܠܰܒܪܺܝܬܳܐ. ܦܽܘܩܕܳܢܳܐ ܚܰܕܬܳܐ ܝܰܗ̱ܒ ܠܗܽܘܢ܆ ܕܠܳܐ ܢܶܩܢܽܘܢ ܡܶܕܶܡ ܒܰܐܪܥܳܐ. ܠܳܐ ܟܺܝܣܳܐ ܘܠܳܐ ܬܰܪܡܳܠܳܐ܆ ܘܠܳܐ ܫܰܒܛܳܐ ܘܠܳܐ ܡܳܡܽܘܢܳܐ܆ ܕܠܳܐ ܢܶܬܬܰܟܠܽܘܢ ܥܰܠ ܗܳܕܶܐ. ܘܰܢܫܽܘܛܽܘܢ ܠܗܳܝ ܕܰܟܬܺܝܒܳܐ܆ ܕܠܳܐ ܬܺܐܨܦܽܘܢ ܐܳܦܠܳܐ ܕܰܡܚܳܪ܀

ܡܶܢܥܳܠܰܡ: ܟܰܕ ܡܰܟܪܳܗ ܚܰܬܢܳܐ ܫܡܰܝܳܢܳܐ܆ ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ. ܩܪܳܐ ܠܫܶܡܥܽܘܢ ܘܰܩܪܳܐ ܠܝܽܘܚܰܢܢ܆ ܘܦܰܩܶܕ ܐܶܢܽܘܢ ܫܰܘܝܳܐܺܝܬ. ܠܫܶܡܥܽܘܢ ܥܰܒܕܶܗ ܪܰܒܒܰܝܬܳܐ܆ ܘܰܠܝܽܘܚܰܢܢ ܟܳܪܘܙܳܐ܆ ܩܪܳܐ ܐܶܢܽܘܢ ܘܦܰܩܶܕ ܐܶܢܽܘܢ. ܕܒܰܙܗܺܝܪܽܘܬܳܐ ܢܶܛܪܽܘܢܳܗ܆ ܕܒܰܕܡܶܗ ܝܰܩܺܝܪܳܐ ܙܒܺܝܢܳܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܩܰܒܶܠ ܡܳܪܝ ܗܰܢܺܝܳܐܺܝܬ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܠܳܟ ܒܥܶܕܳܢܳܐ ܗܳܢܳܐ ܕܬܶܫܡܶܫܬܳܐ ܗܳܕܶܐ. ܘܬܶܬܢܺܝܚܝ ܒܶܗ ܡܳܪܽܘܬܳܟ. ܘܢܶܬܪܰܥܶܐ ܒܶܗ ܨܶܒܝܳܢܳܟ. ܘܬܶܬܓܡܰܪܝ ܬܶܫܡܶܫܬܰܢ ܒܦܽܘܢܳܝܳܐ ܕܫܶܐܠ̈ܬܰܢ܆ ܐܰܝܟ ܫܦܺܝܥܽܘܬ ܛܰܝܒܽܘܬܳܟ ܠܳܐ ܡܶܬܡܰܠܠܳܢܺܝܬܳܐ ܘܪ̈ܰܚܡܰܝܟ ܣܰܓܺܝ̈ܐܶܐ. ܡܶܛܽܠ ܕܝܳܗܽܘܒܳܐ ܕܛܳܒ̈ܬܳܐ ܘܰܡܦܰܢܝܳܢܳܐ ܕܫܶܐܠ̈ܬܳܐ ܘܥܰܬܺܝܪ ܒܡܰܘܗ̈ܒܳܬܳܐ ܪܰܘܪ̈ܒܳܬܳܐ ܘܰܫܦܺܝܥ ܒܫܽܘܟܳܢ̈ܐ ܐܺܝܬܰܝܟ ܡܳܪܝܳܐ. ܘܠܳܟ ܦܰܐܝܳܐ ܬܶܫܒܽܘܚܬܳܐ ܡܶܢ ܟܽܠ ܕܰܒܪܰܝܬ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܙܽܘܡܳܪܳܐ

ܡܫܰܡ̈ܫܳܢܶܐ: ܫܠܺܝ̈ܚܶܐ ܓܒܰܝ̈ܳܐ ܕܶܐܫܬܰܕܰܪܘ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ܆ ܘܰܢܦܰܩܘ ܐܰܟܪܶܙܘ ܣܒܰܪܬܶܗ ܕܰܒܪܳܐ ܒܶܝܬ ܥܰܡ̈ܡܶܐ܆ ܠܥܶܒܪ̈ܶܝܗ ܕܰܐܪܥܳܐ܆ ܣܰܒܰܪܘ ܗ̱ܘܰܘ ܡܰܠܟܽܘܬܳܐ ܕܰܫܡܰܝܳܐ ܟܰܕ ܐܳܡܪܺܝܢ ܛܽܘܒܳܐ ܠܰܡܗܰܝܡ̈ܢܶܐ܀

ܡܫܰܡܫܳܢܳܐ: ܡܶܢ ܦܪܰܟܣܺܝܣ ܕܰܐܒܳܗ̈ܬܰܢ ܫܠܺܝ̈ܚܶܐ ܩܰܕܺܝ̈ܫܶܐ ܨܠܽܘܬܗܽܘܢ ܥܰܡܰܢ ܒܰܪܶܟܡܳܪܝ܀

ܡܫܰܡ̈ܫܳܢܶܐ: ܫܽܘܒܚܳܐ ܠܡܳܪܗܽܘܢ ܕܰܫܠܺܝ̈ܚܶܐ ܨܠܽܘܬܗܽܘܢ ܥܰܡܰܢ ܐܰܡܺܝܢ܀

ܦܪܰܟܣܺܝܣ: ܘ: ܒ - ܘ܇ ܝܒ: ܟܗ܇ ܝܓ: ܒ - ܓ

ܘܰܩܪܰܘ ܬܪܰܥܣܰܪ ܫܠܺܝ̈ܚܶܐ ܠܟܽܠܶܗ ܟܶܢܫܳܐ ܕܬܰܠܡܺܝ̈ܕܶܐ ܘܶܐܡܰܪܘ ܠܗܽܘܢ: ܠܳܐ ܫܰܦܺܝܪ ܕܢܶܫܒܽܘܩ ܡܶܠܬܳܐ ܕܰܐܠܳܗܳܐ ܘܰܢܫܰܡܶܫ ܦܳܬܽܘܪ̈ܶܐ. ܒܨܰܘ ܗܳܟܺܝܠ ܐܰܚܰܝ̈܆ ܘܰܓܒܰܘ ܫܰܒܥܳܐ ܓܰܒܪ̈ܺܝܢ ܡܶܢܟܽܘܢ ܕܺܐܝܬ ܥܠܰܝܗܽܘܢ ܣܳܗܕܽܘܬܳܐ ܘܰܡܠܶܝܢ ܪܽܘܚܶܗ ܕܡܳܪܝܳܐ ܘܚܶܟܡܬܳܐ܆ ܘܰܢܩܺܝܡ ܐܶܢܽܘܢ ܥܰܠ ܗܳܕܶܐ ܨܒܽܘܬܳܐ. ܘܰܚܢܰܢ ܢܶܗܘܶܐ ܐܰܡܺܝܢܺܝ̈ܢ ܒܰܨܠܽܘܬܳܐ ܘܰܒܬܶܫܡܶܫܬܳܐ ܕܡܶܠܬܳܐ. ܘܫܶܦܪܰܬ ܗܳܕܶܐ ܡܶܠܬܳܐ ܩܕܳܡ ܟܽܠܶܗ ܥܰܡܳܐ. ܘܰܓܒܰܘ ܠܶܐܣܛܶܦܰܢܽܘܣ ܓܰܒܪܳܐ ܕܰܡܠܶܐ ܗ̱ܘܳܐ ܗܰܝܡܳܢܽܘܬܳܐ ܘܪܽܘܚܳܐ ܕܩܽܘܕܫܳܐ܆ ܘܰܠܦܺܝܠܺܝܦܽܘܣ ܘܠܰܦܪܳܟܳܪܽܘܣ ܘܰܠܢܺܝܩܰܢܽܘܪ ܘܰܠܛܺܝܡܽܘܢ ܘܰܠܦܰܪܡܶܢܰܐ ܘܰܠܢܺܝܩܳܠܰܐܽܘܣ ܓܺܝܽܘܪܳܐ ܐܰܢܛܺܝܽܘܟܳܝܳܐ. ܗܳܠܶܝܢ ܩܳܡܘ ܩܕܳܡܰܝܗܽܘܢ ܕܰܫܠܺܝ̈ܚܶܐ. ܘܟܰܕ ܨܰܠܺܝܘ܆ ܣܳܡܘ ܥܠܰܝܗܽܘܢ ܐܺܝܕܳܐ܀ ܒܰܪܢܰܒܰܐ ܕܶܝܢ ܘܫܳܐܘܳܠ܆ ܦܢܰܘ ܡܶܢ ܐܽܘܪܺܫܠܶܡ ܠܰܐܢܛܺܝܽܘܟܺܝ ܡܶܢ ܒܳܬܰܪ ܕܫܰܠܶܡܘ ܬܶܫܡܶܫܬܗܽܘܢ܆ ܘܰܕܒܰܪܘ ܥܰܡܗܽܘܢ ܠܝܽܘܚܰܢܢ ܗܰܘ ܕܶܐܬܟܰܢܺܝ ܡܰܪܩܽܘܣ܀ ܘܟܰܕ ܗܶܢܽܘܢ ܨܳܝܡܺܝܢ ܗ̱ܘܰܘ ܘܡܶܬܟܰܫܦܺܝܢ ܠܰܐܠܳܗܳܐ܆ ܐܶܡܪܰܬ ܠܗܽܘܢ ܪܽܘܚܳܐ ܕܩܽܘܕܫܳܐ: ܦܪܽܘܫܘ ܠܺܝ ܠܫܳܐܘܳܠ ܘܰܠܒܰܪܢܰܒܰܐ ܠܰܥܒܳܕܳܐ ܐܰܝܢܳܐ ܕܶܐܢܳܐ ܩܪܺܝܬ ܐܶܢܽܘܢ. ܘܒܳܬܰܪ ܕܨܳܡܘ ܘܨܰܠܺܝܘ܆ ܣܳܡܘ ܥܠܰܝܗܽܘܢ ܐܺܝܕܳܐ ܘܫܰܕܰܪܘ ܐܶܢܽܘܢ܀

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܡܳܪܝܳܐ ܪܶܚܡܶܬ ܬܶܫܡܶܫܬܶܗ ܕܒܰܝܬܳܟ. ܘܰܐܬܪܳܐ ܕܡܰܫܪܝܶܗ ܕܫܽܘܒܚܳܟ ܠܳܐ ܬܰܘܒܶܕܰܝܢܝ ܥܰܡ ܚܰܛܳܝ̈ܶܐ ܗܰܠܶܠܽܘܝܰܗ܀

ܘܩܳܐܶܡ ܪܺܝܫܟܳܗ̈ܢܶܐ ܡܶܢ ܬܪܽܘܢܺܝܽܘܢ܆ ܘܳܐܬܶܐ ܠܰܩܕܳܡ ܦܳܬܽܘܪ ܚܰܝ̈ܐ܆ ܘܟܰܕ ܐܰܦܰܘܗ̱̈ܝ ܠܡܰܥܪܒܳܐ ܩܳܪܶܐ ܠܶܐܘܰܢܓܶܠܺܝܽܘܢ ܩܰܕܺܝܫܳܐ ܡܶܢ ܠܽܘܩܳܐ ܡܣܰܒܪܳܢܳܐ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܺܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ ܚܰܝܶـ̈ܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰܝ̈܀

ܐܶܘܰܢܓܶܠܺܝܽܘܢ ܡܶܢ ܠܽܘܩܳܐ ܡܣܰܒܪܳܢܳܐ

ܝ: ܐ - ܝܐ

ܒܳܬܰܪ ܗܳܠܶܝܢ܆ ܦܪܰܫ ܝܶܫܽܘܥ ܡܶܢ ܬܰܠܡܺܝ̈ܕܰܘܗ̱ܝ ܐ̱ܚܪ̈ܳܢܶܐ ܫܰܒܥܺܝܢ܆ ܘܫܰܕܰܪ ܐܶܢܽܘܢ ܬܪܶܝܢ ܬܪܶܝܢ ܩܕܳܡ ܦܰܪܨܽܘܦܶܗ ܠܟܽܠ ܐܰܬܰܪ ܘܰܡܕܺܝܢܳܐ ܕܰܥܬܺܝܕ ܗ̱ܘܳܐ ܠܡܺܐܙܰܠ. ܘܶܐܡܰܪ ܠܗܽܘܢ: ܚܨܳܕܳܐ ܣܰܓܺܝ ܘܦܳܥ̈ܠܶܐ ܙܥܽܘܪܺܝܢ. ܒܥܰܘ ܗܳܟܺܝܠ ܡܶܢ ܡܳܪܶܐ ܚܨܳܕܳܐ ܕܢܰܦܶܩ ܦܳܥ̈ܠܶܐ ܠܰܚܨܳܕܶܗ. ܙܶܠܘ ܗܳܐ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ ܐܰܝܟ ܐܶܡܪ̈ܶܐ ܒܰܝܢܰܝ ܕܺܐܒܶـ̈ܐ. ܠܳܐ ܬܶܫܩܠܽܘܢ ܠܟܽܘܢ ܟܺܝ̈ܣܶܐ ܘܠܳܐ ܬܰܪ̈ܡܳܠܶܐ ܘܠܳܐ ܡܣܳܐܢ̈ܶܐ ܘܒܰܫܠܳܡܳܐ ܕܐ̱ܢܳܫ ܒܽܐܘܪܚܳܐ ܠܳܐ ܬܶܫܐܠܽܘܢ. ܘܠܰܐܝܢܳܐ ܒܰܝܬܳܐ ܕܥܳܐܠܺܝܬܽܘܢ܆ ܠܽܘܩܕܰܡ ܐܶܡܰܪܘ ܫܠܳܡܳܐ ܠܒܰܝܬܳܐ ܗܳܢܳܐ. ܘܶܐܢ ܐܺܝܬ ܬܰܡܳܢ ܒܰܪ ܫܠܳܡܳܐ܆ ܢܶܬܬܢܺܝܚ ܥܠܰܘܗ̱ܝ ܫܠܳܡܟܽܘܢ. ܐܶܢ ܕܶܝܢ ܠܳܐ܆ ܥܠܰܝܟܽܘܢ ܢܶܗܦܽܘܟ. ܒܶܗ ܕܶܝܢ ܒܒܰܝܬܳܐ ܗܘܰܘ ܟܰܕ ܠܳܥܣܺܝܬܽܘܢ ܘܫܳܬܶܝܢ ܡܶܢ ܕܺܝܠܗܽܘܢ. ܫܳܘܶܐܽ ܗ̱ܘ ܓܶܝܪ ܦܳܥܠܳܐ ܐܰܓܪܶܗ. ܘܠܳܐ ܬܫܰܢܽܘܢ ܡܶܢ ܒܰܝܬܳܐ ܠܒܰܝܬܳܐ. ܘܠܰܐܝܕܳܐ ܡܕܺܝܢ̱ܬܳܐ ܕܥܳܐܠܺܝܬܽܘܢ ܘܰܡܩܰܒܠܺܝܢ ܠܟܽܘܢ܆ ܠܥܰܣܘ ܡܶܕܶܡ ܕܡܶܬܬܣܺܝܡ ܠܟܽܘܢ. ܘܰܐܣܰܘ ܠܰܐܝܠܶܝܢ ܕܰܟܪܺܝܗܺܝܢ ܒܳܗ. ܘܶܐܡܰܪܘ ܠܗܽܘܢ: ܩܶܪܒܰܬ ܥܠܰܝܟܽܘܢ ܡܰܠܟܽܘܬܶܗ ܕܰܐܠܳܗܳܐ. ܠܰܐܝܕܳܐ ܡܕܺܝܢ̱ܬܳܐ ܕܶܝܢ ܕܥܳܐܠܺܝܬܽܘܢ܆ ܘܠܳܐ ܢܩܰܒܠܽܘܢܳܟܽܘܢ܆ ܦܽܘܩܘ ܠܟܽܘܢ ܠܫܽܘܩܳܐ ܘܶܐܡܰܪܘ: ܘܳܐܦ ܚܶܠܳܐ ܕܰܕܒܶܩ ܠܰܢ ܒܪ̈ܶܓܠܰܝܢ ܡܶܢ ܡܕܺܝܢ̱ܬܟܽܘܢ܆ ܢܳܦܨܺܝܢܰܢ ܠܟܽܘܢ. ܒܪܰܡ ܗܳܕܶܐ ܕܰܥܘ ܕܩܶܪܒܰܬ ܠܳܗ ܥܠܰܝܟܽܘܢ ܡܰܠܟܽܘܬܶܗ ܕܰܐܠܳܗܳܐ܀

ܪܺܝܫܟܳܗ̈ܢܶܐ ܡܨܰܠܶܐ ܟܰܕ ܐܰܦܰܘܗ̈ܝ ܠܡܰܕܢܚܳܐ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܓܗܳܢܬܳܐ

ܡܳܪܝܳܐ ܐܰܠܳܗܳܐ ܐܰܚܺܝܕ ܟܽܠ. ܗܰܘ ܝܳܗܽܘܒܳܐ ܕܫܽܘܟܳܢ̈ܶܐ ܐܰܠܳܗܳܝ̈ܶܐ. ܫܰܟܶܢ ܛܰܝܒܽܘܬܳܟ ܪܰܒܬܳܐ ܘܠܳܐ ܡܶܬܡܰܠܠܳܢܺܝܬܳܐ ܠܗܳܢܳܐ ܥܰܒܕܳܟ. ܘܰܐܫܘܳܝܗ̱ܝ ܕܰܐܝܟ ܗܰܘ ܪܺܝܫܳܐ ܕܣܳܗ̈ܕܶܐ ܐܶܣܛܶܦܰܢܽܘܣ ܢܰܦܪܶܓ ܒܕܽܘܒܳܪ̈ܶܐ ܕܰܡܢܺܝܚܺܝܢ ܠܳܟ. ܚܰܟܶܡܳܝܗ̱ܝ ܒܺܝܕܰܥܬܳܐ. ܣܰܟܶܠܳܝܗ̱ܝ ܒܒܽܘܝܳܢܳܐ ܨܰܒܶܬܳܝܗ̱ܝ ܒܡܰܟܺܝܟܽܘܬܳܐ ܦܐܺܝܬܳܐ. ܠܬܶܫܡܶܫܬܶܗ ܙܗܺܝܬܳܐ ܘܪܽܘܚܳܢܳܝܬܳܐ ܙܰܗܳܐ ܒܚܽܘܒܳܐ ܕܠܳܐ ܡܰܣܰܒ ܒܰܐܦ̈ܶܐ. ܒܛܰܝܒܽܘܬܳܐ ܕܺܝܠܳܟ ܘܕܺܝܚܺܝܕܳܝܳܐ ܒܪܳܟ ܘܰܕܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܘܩܰܒܶܠ ܒܪܶܚܡܰܬ ܐ̱ܢܳܫܘܬܳܟ ܠܗܳܢܳܐ ܥܰܒܕܳܟ ܕܰܩܪܳܬ ܛܰܝܒܽܘܬܳܟ܆ ܠܛܶܟܣܳܐ ܐܶܣܛܶܦܰܢܳܝܳܐ. ܡܶܛܽܠ ܕܒܰܣܺܝܡܳܐ ܐܺܝܬܰܝܟ ܘܣܰܓܺܝ ܪ̈ܰܚܡܶܐ. ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ. ܘܠܺܝܚܺܝܕܳܝܳܐ ܒܪܳܟ ܘܰܠܪܽܘܚܳܟ ܩܰܕܺܝܫ ܒܟܽܠ. ܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ. ܘܰܫܘܶܐ ܠܳܟ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ܀

ܘܡܶܬܦܢܶܐ ܪܺܝܫܟܳܗ̈ܢܶܐ ܠܘܳܬܶܗ ܕܡܶܬܬܰܣܪܚܳܢܳܐ ܘܚܳܬܶܡ ܠܶܗ ܒܶܝܬ ܥܰܝܢ̈ܰܘܗܝ ܒܪܽܘܫܡܳܐ ܕܰܨܠܺܝܒܐ ܬܠܳܬ ܙܰܒܢܺܝ̈ܢ ܟܰܕ ܐܳܡܰܪ:

ܪܺܝܫܟܳܗ̈ܢܶܐ: ܡܶܫܬܰܡܠܶܐ (ܦܠܳܢ) ܪܺܝܫ ܡܫܰܡ̈ܫܳܢܶܐ ܠܥܺܕܬܳܐ ܩܰܕܺܝܫܬܳܐ ܕܕܽܘܟܬܳܐ (ܦܠܳܢܺܝܬ)܀

ܪܺܝܫܟܳܗ̈ܢܶܐ: ܒܰܫܡܳܐ ܕܰܐܒܳܐ܀♱

ܡܫܰܡ̈ܫܳܢܶܐ: ܐܰܡܺܝܢ܀

ܪܺܝܫܟܳܗ̈ܢܶܐ: ܘܕܰܒܪܳܐ♱

ܡܫܰܡ̈ܫܳܢܶܐ: ܐܰܡܺܝܢ܀

ܪܺܝܫܟܳܗ̈ܢܶܐ: ܘܰܕܪܽܘܚܳܐ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀♱

ܘܡܺܝܛܪܳܦܽܘܠܺܝܛܳܐ ܝܳܗܶܒ ܠܶܗ ܠܡܶܛܥܰܢ ܡܽܘܪܳܢܺܝܬܶܗ ܕܪܺܝܫܟܳܗ̈ܢܶܐ܆ ܘܡܰܢܗܪܺܝܢ ܩܶܪ̈ܝܽܘܢܶܐ ܟܰܕ ܩܰܫܺܝ̈ܫܶܐ ܠܒܺܝܫܺܝܢ ܛܶܟܣܰܝ̈ܗܽܘܢ܆ ܘܟܳܪܟܺܝܢ ܕܳܪܳܐ ܟܰܕ ܐܳܡܪܺܝܢ ܩܰܬܺܝܣܡܰܐ ܕܬܰܟܫ̈ܦܳܬܳܐ ܒܩܺܝܢܬܳܐ ܫܬܺܝܬܳܝܬܳܐ:

ܒܽܘܟܪܳܐ ܕܣܳܗܕ̈ܶܐ ܣܛܶܦܰܢܽܘܣ. ܩܪܳܢܝ ܠܰܚܠܽܘܠܶܗ ܝܰܘܡܳܢܳܐ. ܗܰܒܠܺܝ ܡܳܪܝ ܕܰܒܪܽܘܡܝܳܢܶܗ. ܐܶܚܕܶܐ ܥܰܡܶܗ ܒܡܰܠܟܽܘܬܳܐ. ܬܗܰܪܘ ܡܰܠܰܐܟ̈ܶܐ ܘܶܐܬܕܰܡܰܪܘ. ܒܕܰܪܶܗ ܕܣܳܗܕܳܐ ܟܡܳܐ ܣܰܝܒܰܪ܆ ܕܰܒܟܺܐܦ̈ܐ ܪܳܓܡܺܝܢ ܗ̱ܘܰܘ ܠܶܗ. ܘܗܽܘ ܡܨܰܠܶܐ ܥܰܠ ܪ̈ܳܓܽܘܡܰܘܗܝ. ܒܡܳܪܶܗ ܐܶܬܕܰܡܝ ܓܰܒܝܳܐ. ܕܟܰܕ ܙܳܩܦܺܝܢ ܠܶܗ ܥܠܰܝܗܽܘܢ ܡܨܰܠܶܐ ܗ̱ܘܳܐ. ܘܟܰܕ ܐܰܪܺܝܡ ܥܰܝ̈ܢܰܘܗ̱ܝ ܠܪܰܘܡܳܐ. ܚܙܳܐ ܗ̱ܘܳܐ ܠܝܶܫܘܥ ܟܰܕ ܩܳܐܶܡ. ܡܶܢ ܝܰܡܺܝܢܳܐ ܕܫܳܠܽܘܚܶܗ. ܒܪܺܝܟ ܡܳܪܝܳܐ ܕܝܰܩܰܪ ܥܰܒܕܶܗ. ܗܳܪܟܳܐ ܘܰܠܥܶܠ ܒܰܫܡܰܝܳܐ܀

ܘܣܳܠܩܺܝܢ ܠܒܺܐܡܰܐ ܘܩܳܪܶܐ ܪܺܝܫ ܡܫܰܡ̈ܫܳܢܶܐ ܬܰܡܳܢ ܠܶܐܘܰܢܓܶܠܺܝܽܘܢ. ܘܶܐܢ ܠܰܝܬ ܒܺܐܡܰܐ ܒܬܰܪܥܳܐ ܕܡܰܕܒܚܳܐ ܩܳܪܶܐ ܠܶܐܘܰܢܓܶܠܺܝܽܘܢ ܕܥܺܐܕܳܐ ܕܡܳܪܝ ܐܶܣܛܶܦܰܢܽܘܣ ܐܰܘ ܩܶܪܝܳܢܳܐ ܕܠܽܘܩܳܐ ܕܰܟܬܺܝܒ ܡܶܢ ܠܥܶܠ:

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܡܳܐ ܚܰܒܺܝܒܺܝܢ ܡܰܫܟܢܰܝ̈ܟ ܡܳܪܝܳܐ ܚܰܝܠܬܳܢܳܐ܆ ܣܰܟܝܰܬ ܢܰܦܫܝ ܘܶܐܬܪܰܓܪܓܰܬ ܠܕܳܪ̈ܰܘܗ̱ܝ ܕܡܳܪܝܳܐ ܗܰܠܶܠܽܘܝܰܗ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܺܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ ܚܰܝܶـ̈ܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰܝ̈܀

ܐܶܘܰܢܓܶܠܺܝܽܘܢ ܡܶܢ ܠܽܘܩܳܐ ܡܣܰܒܪܳܢܳܐ

ܝ: ܐ - ܝܒ

ܒܳܬܰܪ ܗܳܠܶܝܢ܆ ܦܪܰܫ ܝܶܫܽܘܥ ܡܶܢ ܬܰܠܡܺܝ̈ܕܰܘܗ̱ܝ ܐ̱ܚܪ̈ܳܢܶܐ ܫܰܒܥܺܝܢ܆ ܘܫܰܕܰܪ ܐܶܢܽܘܢ ܬܪܶܝܢ ܬܪܶܝܢ ܩܕܳܡ ܦܰܪܨܽܘܦܶܗ ܠܟܽܠ ܐܰܬܰܪ ܘܰܡܕܺܝܢܳܐ ܕܰܥܬܺܝܕ ܗ̱ܘܳܐ ܠܡܺܐܙܰܠ. ܘܶܐܡܰܪ ܠܗܽܘܢ: ܚܨܳܕܳܐ ܣܰܓܺܝ ܘܦܳܥ̈ܠܶܐ ܙܥܽܘܪܺܝܢ. ܒܥܰܘ ܗܳܟܺܝܠ ܡܶܢ ܡܳܪܶܐ ܚܨܳܕܳܐ ܕܢܰܦܶܩ ܦܳܥ̈ܠܶܐ ܠܰܚܨܳܕܶܗ. ܙܶܠܘ ܗܳܐ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ ܐܰܝܟ ܐܶܡܪ̈ܶܐ ܒܰܝܢܰܝ ܕܺܐܒ̈ܶܐ. ܠܳܐ ܬܶܫܩܠܽܘܢ ܠܟܽܘܢ ܟܺܝ̈ܣܶܐ ܘܠܳܐ ܬܰܪ̈ܡܳܠܶܐ ܘܠܳܐ ܡܣܳܐܢ̈ܶܐ ܘܒܰܫܠܳܡܳܐ ܕܐ̱ܢܳܫ ܒܽܐܘܪܚܳܐ ܠܳܐ ܬܶܫܐܠܽܘܢ. ܘܠܰܐܝܢܳܐ ܒܰܝܬܳܐ ܕܥܳܐܠܺܝܬܽܘܢ܆ ܠܽܘܩܕܰܡ ܐܶܡܰܪܘ ܫܠܳܡܳܐ ܠܒܰܝܬܳܐ ܗܳܢܳܐ. ܘܶܐܢ ܐܺܝܬ ܬܰܡܳܢ ܒܰܪ ܫܠܳܡܳܐ܆ ܢܶܬܬܢܺܝܚ ܥܠܰܘܗ̱ܝ ܫܠܳܡܟܽܘܢ. ܐܶܢ ܕܶܝܢ ܠܳܐ܆ ܥܠܰܝܟܽܘܢ ܢܶܗܦܽܘܟ. ܒܶܗ ܕܶܝܢ ܒܒܰܝܬܳܐ ܗܘܰܘ ܟܰܕ ܠܳܥܣܺܝܬܽܘܢ ܘܫܳܬܶܝܢ ܡܶܢ ܕܺܝܠܗܽܘܢ. ܫܳܘܶܐܽ ܗ̱ܘ ܓܶܝܪ ܦܳܥܠܳܐ ܐܰܓܪܶܗ. ܘܠܳܐ ܬܫܰܢܽܘܢ ܡܶܢ ܒܰܝܬܳܐ ܠܒܰܝܬܳܐ. ܘܠܰܐܝܕܳܐ ܡܕܺܝܢ̱ܬܳܐ ܕܥܳܐܠܺܝܬܽܘܢ ܘܰܡܩܰܒܠܺܝܢ ܠܟܽܘܢ܆ ܠܥܰܣܘ ܡܶܕܶܡ ܕܡܶܬܬܣܺܝܡ ܠܟܽܘܢ. ܘܰܐܣܰܘ ܠܰܐܝܠܶܝܢ ܕܰܟܪܺܝܗܺܝܢ ܒܳܗ. ܘܶܐܡܰܪܘ ܠܗܽܘܢ: ܩܶܪܒܰܬ ܥܠܰܝܟܽܘܢ ܡܰܠܟܽܘܬܶܗ ܕܰܐܠܳܗܳܐ. ܠܰܐܝܕܳܐ ܡܕܺܝܢ̱ܬܳܐ ܕܶܝܢ ܕܥܳܐܠܺܝܬܽܘܢ܆ ܘܠܳܐ ܢܩܰܒܠܽܘܢܳܟܽܘܢ܆ ܦܽܘܩܘ ܠܟܽܘܢ ܠܫܽܘܩܳܐ ܘܶܐܡܰܪܘ: ܘܳܐܦ ܚܶܠܳܐ ܕܰܕܒܶܩ ܠܰܢ ܒܪ̈ܶܓܠܰܝܢ ܡܶܢ ܡܕܺܝܢ̱ܬܟܽܘܢ܆ ܢܳܦܨܺܝܢܰܢ ܠܟܽܘܢ. ܒܪܰܡ ܗܳܕܶܐ ܕܰܥܘ ܕܩܶܪܒܰܬ ܠܳܗ ܥܠܰܝܟܽܘܢ ܡܰܠܟܽܘܬܶܗ ܕܰܐܠܳܗܳܐ. ܐܳܡܰܪ ܐ̱ܢܳܐ ܠܟܽܘܢ ܕܠܰܣܕܽܘܡ ܢܶܗܘܶܐ ܢܺܝܚ ܒܝܰܘܡܳܐ ܗܰܘ ܐܰܘ ܠܰܡܕܺܝܢ̱ܬܳܐ ܗܳܝ܀

ܐܶܢ ܗܳܘܝܳܐ ܡܶܬܬܰܣܪܚܳܢܽܘܬܳܐ ܒܝܽܘܡ ܥܺܐܕܶܗ ܕܡܳܪܝ ܐܶܣܛܶܦܰܢܽܘܣ܆ ܗܰܘ ܕܡܶܬܬܰܣܪܰܚ ܩܳܪܶܐ ܠܶܐܘܰܢܓܶܠܺܝܽܘܢ ܕܺܝܠܶܗ ܕܝܰܘܡܳܐ ܕܥܺܐܕܳܐ܆ ܚܠܳܦ ܗܳܢܳܐ ܕܰܪܫܺܝܡ ܠܥܶܠ. ܘܒܳܬܰܪ ܩܶܪܝܳܢܳܐ ܕܶܐܘܰܢܓܶܠܺܝܽܘܢ܆ ܡܰܟܪܙܺܝܢ ܡܫܰܡ̈ܫܳܢܶܐ ܐܰܟܣܺܝܽܘܣ ܬܠܳܬ ܙܰܒܢܺܝ̈ܢ܀

ܗܳܝܕܶܝܢ ܡܦܰܩܶܕ ܠܶܗ ܪܺܝܫ ܟܳܗ̈ܢܶܐ ܠܪܺܝܫ ܡܫܰܡ̈ܫܳܢܶܐ ܚܰܕܬܳܐ܆ ܕܠܳܐ ܢܶܨܛܠܶܐ ܠܘܳܬ ܡܰܣܰܒ ܒܰܐܦ̈ܐ ܒܬܶܫܡܶܫܬܶܗ. ܘܠܳܐ ܢܝܰܩܰܪ ܠܚܰܕ ܫܽܘܦܪܳܢܳܐܺܝܬ܆ ܘܰܢܫܘܛ ܠܰܐ̱ܚܪܺܢܳܐ ܚܰܫܳܢܳܐܺܝܬ. ܘܠܳܐ ܠܰܩܢܽܘܡܶܗ ܢܶܚܛܽܘܦ ܐܺܝܩܳܪܳܐ ܝܰܬܺܝܪܳܐ܆ ܒܩܶܪ̈ܝܳܢܶܐ ܘܰܣܛܰܪ܆ ܘܢܰܟܫܶܠ ܠܰܩܠܺܝܪܽܘܣ. ܐܶܠܳܐ ܒܟܽܠܙܒܰܢ ܘܰܒܟܽܠܙܢܺܝ̈ܢ܆ ܢܳܡܘܣܳܐܺܝܬ ܢܶܬܕܰܒܰܪ. ܘܢܶܩܢܶܐ ܠܟܽܠܢܳܫ. ܡܶܛܽܠ ܕܰܐܠܳܗܳܐ ܩܳܐܶܡ ܘܚܳܐܰܪ ܒܶܗ܀ ܗܳܝܕܶܝܢ ܪܺܝܫܟܳܗ̈ܢܶܐ ܡܶܫܬܰܘܬܰܦ ܒܐ̱ܪ̈ܳܙܶܐ ܩܰܕܺܝ̈ܫܶܐ ܘܰܡܫܰܘܬܶܦ ܠܗܰܘ ܕܶܐܬܬܰܣܪܰܚ. ܟܶܢ ܪܺܝܫܟܳܗ̈ܢܶܐ ܡܫܰܘܬܶܦ ܠܰܐ̱ܚܪ̈ܳܢܶܐ ܘܰܡܫܰܡܠܶܐ ܠܩܽܘܪܳܒܳܐ܀ ܘܒܳܬܰܪܟܶܢ ܝܳܗܶܒ ܠܶܗ ܪܺܝܫܟܳܗ̈ܢܶܐ ܠܪܺܝܫ ܡܫܰܡ̈ܫܳܢܶܐ ܕܰܐܣܪܰܚ: ܟܬܺܝܒܬܳܐ ܕܰܓܒܺܝܬܶܗ܆ ܐܰܝܟܰܢܳܐ ܕܬܶܬܢܛܰܪܝ ܠܘܳܬܶܗ ܐܰܝܟ ܕܰܠܣܳܗܕܽܘܬܳܐ܀

ܫܶܠܡܰܬ ܓܒܺܝܬܶܗ ܕܪܺܝܫ ܡܫܰܡ̈ܫܳܢܶܐ