ܢܽܘܗܳܪܳܐ

ܡܫܰܡܫܳܢܳܐ ܗ̄ܕ̄ ܡܕܰܝܠܳܢܳܐ ܕܝܰܘܢܳܐܺܝܬ ܕܺܝܰܩܽܘܢ ܡܶܬܩܪܶܐ. ܡܳܐ ܕܡܶܬܬܰܣܪܰܚ܆ ܩܳܐܶܡ ܠܬܰܚܬ ܡܶܢ ܕܰܪ̈ܓܶܐ ܩܕܳܡ ܡܰܕܒܚܳܐ. ܘܶܐܢ ܐܺܝܬܰܘܗ̱ܝ ܐܰܦܽܘܕܝܰܩܢܳܐ܆ ܢܶܗܘܶܐ ܟܒܺܝܢ ܠܶܐܣܛܠܶܗ ܘܠܽܐܘܪܳܪܶܗ ܐܰܝܟ ܛܶܟܣܶܗ ܘܰܓܠܶܐ ܪܺܝܫܶܗ ܘܰܓܗܺܝܢ ܥܕܰܡܳܐ ܕܡܶܫܬܰܡܠܶܐ ܩܽܘܪܳܒܳܐ܀

ܒܥܶܕܳܢܳܐ ܕܶܝܢ ܕܰܣܝܳܡܺܝܕܳܐ ܗ̄ܕ̄ ܩܕܳܡ ܫܰܘܬܳܦܽܘܬܳܐ ܕܰܒܐ̱ܪ̈ܳܙܶܐ ܩܰܕܺܝ̈ܫܶܐ܆ ܡܫܺܝܓ ܪܺܝܫܟܳܗ̈ܢܶܐ ܨܶܒ̈ܥܳܬܶܗ ܒܰܡܫܰܡܫܳܢܺܝܬܳܐ ܘܠܳܒܶܫ ܬܳܓܳܐ܆ ܘܳܐܚܶܕ ܨܠܺܝܒܳܐ ܒܝܰܡܺܝܢܶܗ ܘܚܽܘܛܪܳܐ ܒܣܶܡܳܠܶܗ܆ ܘܝܳܬܶܒ ܥܰܠ ܟܽܘܪܣܝܳܐ ܒܰܬܪܰܥ ܡܰܕܒܚܳܐ܆ ܘܩܳܪܶܐ ܠܬܽܘܪܓܳܡܳܐ ܗܰܘ ܕܝܰܘܢܳܐܺܝܬ ܐܰܡܽܘܠܽܘܓܺܝܰܐ ܡܶܬܩܪܶܐ܆ ܟܰܕ ܗܳܢܽܘܢ ܕܰܥܬܺܝܕܺܝܢ ܕܢܶܬܬܰܣܪܚܽܘܢ ܩܳܝܡܺܝܢ ܥܰܠ ܪ̈ܶܓܠܰܝܗܽܘܢ ܘܰܓܗܺܝܢܺܝܢ ܘܨܳܝܬܺܝܢ ܫܰܠܝܳܐܺܝܬ܀

ܘܗܳܝܕܶܝܢ ܡܣܰܦܰܪ ܣܰܥܪܶܗ ܪܺܝܫܟܳܗ̈ܢܶܐ ܨܠܺܝܒܳܐܺܝܬ ܘܝܳܗܶܒ ܠܶܗ ܠܪܰܒܶܗ ܘܰܡܦܰܩܶܕ ܥܰܠ ܫܽܘܡܠܳܝ ܝܽܘܠܦܳܢܶܗ܆ ܘܳܐܦ ܠܶܗ ܡܙܰܗܰܪ ܥܰܠ ܡܶܫܬܰܡܥܳܢܽܘܬܳܐ ܕܰܠܪܰܒܶܗ ܐܰܝܟ ܕܰܠܡܳܪܶܗ܀

ܬܽܘܪܓܳܡܳܐ ܕܩܳܪܶܐ ܠܶܗ ܪܺܝܫܟܳܗ̈ܢܶܐ ܥܰܠ ܗܳܢܽܘܢ ܕܡܶܬܛܰܝܒܺܝܢ ܕܰܢܩܰܒܠܽܘܢ ܠܰܣܝܳܡܺܝܕܳܐ ܕܰܡܫܰܡܫܳܢܽܘܬܳܐ

ܘܟܰܕ ܡܫܰܡܠܶܐ ܪܺܝܫܟܳܗ̈ܢܶܐ ܠܬܽܘܪܓܳܡܳܐ܆ ܩܳܐܶܡ ܡܶܢ ܟܽܘܪܣܝܶܗ ܘܠܳܒܶܟ ܠܡܶܬܬܰܣܪܚܳܢܳܐ ܒܝܰܡܺܝܢܶܗ ܘܳܐܡܰܪ: ܪܽܘܚܳܐ ܩܰܕܺܝܫܳܐ ܩܳܪܶܐ ܠܳܟ ܕܬܶܗܘܶܐ ܡܫܰܡܫܳܢܳܐ ܒܥܺܕܬܳܐ ܩܰܕܺܝܫܬܳܐ. ܘܡܰܥܶܠ ܠܶܗ ܠܡܰܕܒܚܳܐ ܘܩܳܥܶܕ ܗܽܘ ܡܶܬܬܰܣܪܚܳܢܳܐ ܥܰܠ ܚܕܳܐ ܒܽܘܪܟܶܗ ܕܝܰܡܺܝܢܳܐ. ܩܥܳܕܳܐ ܕܥܰܠ ܚܕܳܐ ܒܽܘܪܟܳܐ ܕܝܰܡܺܝܢܳܐ ܕܰܡܫܰܡܫܳܢܳܐ ܡܫܰܘܕܰܥ܆ ܕܰܡܕܰܟܝܳܢܳܐ ܒܰܠܚܽܘܕ ܐܺܝܬܰܘܗ̱ܝ

ܩܳܠܳܐ ܒܩ̄: ܩܽܘܩܳܝܳܐ (ܒܪܶܟܢܳܐ ܫܒܺܝܥܳܝܳܐ)

ܡܫܰܡ̈ܫܳܢܶܐ: ܛܽܘܒܰܝܗܽܘܢ ܠܥܰܒ̈ܕܶܐ ܛܳܒܶـ̈ܐ ܡܳܐ ܕܳܐܬܶܐ ܡܳܪܗܽܘܢ܆ ܘܡܶܫܟܰܚ ܠܗܽܘܢ ܟܰܕ ܥܺܝܪܺܝܢ ܘܰܒܟܰܪܡܶܗ ܦܳܠܚܺܝܢ܆ ܐܳܣܰܪ ܚܰܨܰܘܗ̈ܝ ܘܰܡܫܰܡܶܫ ܠܗܽܘܢ ܕܰܠܐܺܝܘ ܥܰܡܶܗ ܡܶܢ ܨܰܦܪܳܐ ܠܪܰܡܫܳܐ܆ ܐܰܒܳܐ ܡܰܣܡܶܟ ܦܰܠܳܚܰܘܗ̱̈ܝ ܘܰܒܪܳܐ ܡܫܰܡܶܫ ܠܗܽܘܢ܆ ܪܽܘܚܩܽܘܕܫܳܐ ܦܰܪܩܠܺܝܛܳܐ܆ ܟܠܺܝܠܰܝ̈ܗܽܘܢ ܓܳܕܠܳܐ ܗܰܠܶܠܽܘܝܰܗ ܘܣܳܝܡܳܐ ܒܪ̈ܺܝܫܰܝܗܽܘܢ܀

ܨܠܽܘܬܳܐ ܕܫܽܘܪܳܝܳܐ

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܪܺܝܫܟܳܗ̈ܢܶܐ: ܐܰܫܘܳܐ ܠܰܢ ܡܫܺܝܚܳܐ ܐܰܠܳܗܰܢ ܕܰܢܫܰܡܠܶܐ ܠܬܶܫܡܶܫܬܳܐ ܗܳܕܶܐ ܕܟܺܝܬܳܐ ܘܐ̱ܪܳܙܳܢܳܝܬܳܐ܆ ܘܢܶܗܘܶܐ ܠܳܟ ܗܰܝ̈ܟܠܶܐ ܩܰܕܺܝ̈ܫܶܐ܆ ܘܬܶܥܡܰܪܝ ܒܰܢ ܫܟܺܝܢܬܳܟ ܐܰܠܳܗܳܝܬܳܐ܆ ܘܰܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܓܡܽܘܪ ܘܫܰܡܠܳܐ ܒܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ܆ ܕܰܚܢܰܢ ܘܗܽܘ (ܘܗܶܢܽܘܢ) ܢܫܰܒܚܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ: ܒܪܶܟܢܳܐ ܕܚܽܘܣܳܝܳܐ ܗܘܺܝ ܠܺܝ

ܪܺܝܫܟܳܗ̈ܢܶܐ: ܪܰܚܶܡܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܚܽܘܣܳܝܳܐ ܗܘܺܝ ܠܺܝ܆ ܐܰܢ̱ܬ ܠܚܽܘܕܰܝܟ ܣܰܓܺܝ ܪ̈ܰܚܡܶܐ ܐܰܠܳܗܳܐ. ܘܩܰܒܶܠܰܝܢܝ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܪܺܝܫܟܳܗ̈ܢܶܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ܀

ܡܫܰܡ̈ܫܳܢܶܐ: ܐܰܒܳܐ ܩܰܕܺܝܫܳܐ܆ ܘܝܳܗܽܘܒܳܐ ܕܩܰܕܺܝܫܽܘܬܳܐ ܐܰܠܳܗܳܐ. ܩܰܕܶܫ ܒܛܰܝܒܽܘܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܡܰܘܗܰܒܬܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܠܳܟ ܒܰܠܚܽܘܕܰܝܟ ܚܛܺܝܬ܀

ܡܫܰܡ̈ܫܳܢܶܐ: ܒܪܳܐ ܕܰܒܡܰܘܗܰܒܬܶܗ܆ ܠܰܫܠܺܝ̈ܚܶܐ ܕܺܝܠܶܗ ܚܰܟܶܡ ܐܰܠܳܗܳܐ. ܚܰܟܶܡ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܚܰܟܰܡ (ܢܶܬܚܰܟܡܽܘܢ)܀

ܪܺܝܫܟܳܗ̈ܢܶܐ: ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ܀

ܡܫܰܡ̈ܫܳܢܶܐ: ܪܽܘܚܳܐ ܕܠܰܫܠܺܝ̈ܚܶܐ܆ ܒܠܶܫܳܢ̈ܐ ܕܢܽܘܪܳܐ ܚܰܟܶܡ ܐܰܠܳܗܳܐ. ܩܰܕܶܫ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܐܰܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ܀

ܡܫܰܡ̈ܫܳܢܶܐ: ܠܬܰܪ̈ܥܶܐ ܕܰܫܡܰܝ̈ܳܐ܆ ܬܶܦܬܰܚܝ ܛܰܝܒܽܘܬܳܟ ܩܕܳܡܰܝܢ ܐܰܠܳܗܳܐ. ܘܰܐܓܶܢ ܝܰܡܺܝܢܳܟ܆ ܥܰܠ ܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܳܗ ܕܒܳܗ ܢܶܬܒܰܪܰܟ (ܢܶܬܒܰܪܟܽܘܢ)܀

ܪܺܝܫܟܳܗ̈ܢܶܐ: ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ܀

ܡܫܰܡ̈ܫܳܢܶܐ: ܒܶܐܣܛܠܳܟ ܢܶܨܛܰܒܰܬ܆ ܨܰܘܪܳܐ ܕܰܩܕܳܡܰܝܟ ܪܟܺܝܢܽ ܗ̱ܘ ܐܰܠܳܗܳܐ. ܘܚܳܐܰܪ ܠܡܰܘܗܰܒܬܳܟ܆ ܕܒܳܗ ܢܶܨܛܰܒܰܬ ܒܨܶܒ̈ܬܶܐ ܕܪܽܘܚܳܐ ܩܰܕܺܝܫܳܐ܀

ܪܺܝܫܟܳܗ̈ܢܶܐ: ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ܀

ܡܫܰܡ̈ܫܳܢܶܐ: ܟܶܢ̈ܫܶܐ ܫܡܰܝܳܢ̈ܶܐ܆ ܡܶܬܦܰܨܚܺܝܢ ܒܫܽܘܡܠܳܝ ܥܰܒܕܳܟ (ܥܰܒܕܰܝ̈ܟ) ܐܰܠܳܗܳܐ. ܘܙܳܡܪܺܝܢ ܬܰܚ̈ܬܳܝܶܐ܆ ܬܶܫܒܽܘܚܬܳܐ ܠܰܕܚܰܠܛܶܗ (ܠܕܰܚܠܰܛ ܐܶܢܽܘܢ) ܒܶܝܬ ܟܶܢܫܰܝ̈ܗܽܘܢ܀

ܪܺܝܫܟܳܗ̈ܢܶܐ: ܦܰܨܳܢܝ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ܀

ܡܫܰܡ̈ܫܳܢܶܐ: ܬܳܡܗܺܝܢ ܢܽܘܪ̈ܳܢܶܐ܆ ܟܰܕ ܨܳܪܶܐ ܠܪܰܘܡܳܐ ܪܽܘܚܳܐ ܩܰܕܺܝܫܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܒܺܐܝܕܰܝ̈ ܪܺܝܫܟܳܗ̈ܢܶܐ ܠܰܕܫܳܐܠܺܝܢ ܠܳܗ܀

ܪܺܝܫܟܳܗ̈ܢܶܐ: ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܘܳܐܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ܀

ܡܫܰܡ̈ܫܳܢܶܐ: ܠܳܐ ܡܶܣܬܰܝܟܳܢܳܐ܆ ܒܺܐܝܕܰܝ̈ܳܐ ܕܕܰܟܝ̈ܳܢ ܡܶܬܬܚܶܕ ܪܽܘܚܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܠܪܺܝܫܳܐ ܕܟܳܗ̈ܢܶܐ ܒܰܕܡܽܘܬ ܐܰܗܪܽܘܢ܀

ܪܺܝܫܟܳܗ̈ܢܶܐ: ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ ܕܽܐܘܪܺܫܠܶܡ܀

ܡܫܰܡ̈ܫܳܢܶܐ: ܡܕܰܟܝܳܢܳܐ ܕܚܰܘ̈ܒܶܐ܆ ܒܝܰܕ ܡܰܓܢܳܢܽܘܬܶܗ ܕܪܽܘܚܳܐ ܐܰܠܳܗܳܐ܆ ܕܰܟܳܐ ܒܪܽܘܚܳܦܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܫܽܘܡܠܳܝܳܟ܆ ܕܒܶܗ ܢܶܬܕܰܟܶܐ (ܢܶܬܕܰܟܽܘܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢܥܳܠܰܡ܀ ܫܽܘܒ̈ܚܶܐ ܬܠܺܝ̈ܬܳܝܶܐ܆ ܠܗܰܘ ܚܰܕ ܕܰܬܠܳܬܰܐ ܗ̱ܘ ܘܚܰܕܽ ܗ̱ܘ ܐܰܠܳܗܳܐ܆ ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ ܕܠܶܗ ܣܳܓܕܺܝܢܰܢ܀

ܚܽܘܣܳܝܳܐ

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ ܩܽܘܪܝܶܐܠܶܝܣܽܘܢ܀

ܪܺܝܫܟܳܗ̈ܢܶܐ: ܢܨܰܠܶܐ ܟܽܠܰܢ܆ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀ ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܺܝܽܘܢ

ܬܶܫܒܽܘܚܬܳܐ ܠܗܰܘ ܕܰܒܛܰܝܒܽܘܬܳܐ ܕܺܝܠܶܗ ܕܠܳܐ ܚܣܳܡ. ܐܰܩܺܝܡ ܠܰܢ ܒܰܫܡܰܝ̈ ܫܡܰܝܳܐ ܥܺܕ̈ܳܬܳܐ ܥܶܠ̈ܳܝܳܬܳܐ. ܘܰܡܫܰܡ̈ܫܳܢܶܐ ܕܢܽܘܪܳܐ ܘܰܕܪܘܚܳܐ. ܘܗܰܕܰܪ ܘܢܰܨܰܚ ܐܶܢܽܘܢ ܒܰܗܕܺܝܪܽܘܬܳܐ ܕܢܰܨܺܝܚܽܘܬܳܐ ܩܰܕܡܳܝܬܳܐ ܕܢܶܗܘܽܘܢ ܐܰܡܺܝܢܺܝ̈ܢ ܥܰܠ ܬܶܫܡܶܫܬܶܗ. ܘܡܶܛܽܠ ܪܶܚܡܰܬ ܐ̱ܢܳܫܘܬܶܗ ܪܰܒܬܳܐ܆ ܫܰܪܰܪ ܘܫܰܡܠܺܝ ܒܥܺܕܬܳܐ ܕܺܝܠܶܗ ܩܰܕܺܝܫܬܳܐ܆ ܡܫܰܡ̈ܫܳܢܶܐ ܙܗܰܝ̈ܐ ܕܰܒܕܰܟܝܽܘܬܳܐ ܢܫܰܡܫܽܘܢܳܝܗ̱ܝ. ܛܽܘܦܣܳܐ ܕܗܳܢܽܘܢ ܕܡܶܬܝܰܕܥܳܢܳܐܺܝܬ ܡܫܰܡܫܺܝܢ ܠܡܳܪܽܘܬܶܗ. ܥܰܠ ܕܠܳܐ ܡܶܣܬܰܝܟܳܐ ܬܶܫܒܽܘܚܬܳܐ ܕܪܰܒܘܬܶܗ. ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܛܳܒܽܘܬܳܟ ܕܬܰܓܶܢܝ ܥܠܰܝܢ ܘܥܰܠ ܥܰܒܕܳܟ ܗܳܢܳܐ (ܥܰܒܕܰܝ̈ܟ ܗܳܠܶܝܢ) ܛܰܝܒܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ. ܐܰܝܟܰܢܳܐ ܕܰܐܝܟ ܕܰܦܐܶܐ ܠܡܳܪܽܘܬܳܐ ܕܺܝܠܳܟ ܢܫܰܡܶܫ (ܢܫܰܡܫܽܘܢ) ܩܕܳܡ ܪܰܒܽܘܬܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܒܗܳܢܳܐ ܥܶܕܳܢܳܐ ܕܚܽܘܣܝܳܐ ܕܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܘܗ̱ܝ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܗܰܘ ܡܢܰܨܚܳܢܳܐ ܕܬܶܫܡܶܫܬܳܐ ܪܽܘܚܳܢܳܝܬܳܐ. ܘܰܡܨܰܒܬܳܢܳܐ ܘܰܡܥܰܠܝܢܳܐ ܕܛܶܟܣܶـ̈ܐ ܥܺܕ̈ܬܳܢܳܝܶܐ. ܗܰܘ ܕܠܰܐܝܠܶܝܢ ܕܰܡܝܰܩܪܺܝܢ ܠܡܰܕܒܚܳܐ ܕܺܝܠܳܟ ܘܰܡܫܰܡܫܺܝܢ ܒܕܰܟܝܽܘܬܳܐ܆ ܘܩܰܕܺܝܫܽܘܬܳܐ܆ ܡܙܰܡܢܰܝ̈ ܠܡܰܠܟܽܘܬܳܐ ܥܒܰܕܬ. ܒܗܳܝ ܕܶܐܡܰܪܬ: ܕܰܐܝܟܳܐ ܕܶܐܢܳܐ ܐܺܝܬܰܝ܆ ܬܰܡܳܢ ܢܶܗܘܶܐ ܐܳܦ ܡܫܰܡܫܳܢܝ. ܗܰܘ ܕܠܶܐܣܛܶܦܰܢܽܘܣ ܪܺܝܫܳܐ ܕܰܡܫܰܡ̈ܫܳܢܶܐ ܘܩܰܕܡܳܝܳܐ ܕܣܳܗ̈ܕܶܐ ܚܰܘܺܝܬܳܝܗ̱ܝ ܕܺܐܝܬܰܘܗ̱ܝ: ܡܫܰܡܠܝܳܢܳܐ ܕܦܽܘܩܕܳܢܰܝ̈ܟ. ܡܦܺܝܣܺܝܢܰܢ ܠܪ̈ܰܚܡܰܝܟ ܕܰܒܝܰܕ ܒܳܥܽܘܬܶܗ ܘܰܕܟܽܠܗܽܘܢ ܡܢܺܝ̈ܚܳܢܶܐ ܕܡܳܪܽܘܬܳܟ. ܘܳܐܦ ܠܥܰܒܕܳܟ ܗܳܢܳܐ ܕܶܐܬܩܰܪܰܒ (ܠܥܰܒܕܰܝ̈ܟ ܗܳܠܶܝܢ ܕܶܐܬܩܰܪܰܒܘ) ܠܛܶܟܣܳܐ ܕܰܡܫܰܡܫܳܢܽܘܬܳܐ ܥܒܶܕܳܝܗ̱ܝ [ܐ] ܡܫܰܡܫܳܢܳܐ ܕܰܐܝܟ ܨܶܒܝܳܢܳܟ ܡܶܬܗܰܕܶܐ ܒܽܐܘܪܚܳܐ ܕܦܽܘܩܕܳܢܰܝ̈ܟ ܬܪ̈ܺܝܨܶܐ. [ܒ] ܡܫܰܡܫܳܢܳܐ ܕܰܒܢܳܡܽܘܣܳܐ ܕܡܳܪܽܘܬܳܟ ܡܶܬܗܰܓܶܐ ܐܺܝܡܳܡܳܐ ܘܠܺܠܝܳܐ. [ܓ] ܡܫܰܡܫܳܢܳܐ ܕܓܰܢ̱ܒܳܪܽܘܬܳܐ ܪܽܘܚܳܢܳܝܬܳܐ܆ ܐܰܡܺܝܢܳܐܺܝܬ ܡܰܝܬܶܐ ܒܶܗ. [ܕ] ܡܫܰܡܫܳܢܳܐ ܕܕܰܟܝܽܘܬܳܐ ܕܢܰܦܫܳܐ ܘܰܕܦܰܓܪܳܐ ܡܶܬܬܰܓܰܪ. [ܗ] ܡܫܰܡܫܳܢܳܐ ܕܗܽܘ̈ܠܳܠܶܐ ܘܰܙܡܺܝܪ̈ܳܬܳܐ ܘܩܺܝ̈ܢܳܬܳܐ ܪ̈ܽܘܚܳܢܳܝܳܬܳܐ ܐܰܡܺܝܢܳܐܺܝܬ ܠܳܥܶܙ. [ܘ] ܡܫܰܡܫܳܢܳܐ ܕܘܳܠܝܳܐܺܝܬ ܡܫܰܡܠܶܐ ܠܪܶܗܛܳܐ ܐܶܘܰܢܓܶܠܳܝܳܐ. [ܙ] ܡܫܰܡܫܳܢܳܐ ܡܫܰܪܪܳܐ ܕܚܽܘܒܳܐ ܫܰܪܺܝܪܳܐ ܘܰܡܫܰܡܠܝܳܐ ܒܶܗ ܡܶܬܚܙܶܐ. [ܚ] ܡܫܰܡܫܳܢܳܐ ܕܛܰܝܒܽܘܬܶܗ ܕܡܳܪܝܳܐ ܠܥܳܠܰܡ ܡܙܰܡܰܪ. [ܛ] ܡܫܰܡܫܳܢܳܐ ܕܝܰܨܺܝܦܽܘܬܳܐ ܥܳܒܶܕ ܕܝܽܘܠ̈ܦܳܢܶܐ ܐܶܘܰܢ̈ܓܶܠܳܝܶܐ. [ܝ] ܡܫܰܡܫܳܢܳܐ ܕܟܰܟܪܳܐ ܪܽܘܚܳܢܳܝܬܳܐ ܕܠܳܗ ܐܶܬܗܰܝܡܰܢ ܡܥܰܦܶܦ ܦܰܐܝܳܐܺܝܬ ܘܶܐܘܰܢܓܶܠܳܐܺܝܬ. [ܟ] ܡܫܰܡܫܳܢܳܐ ܕܰܠܡܰܕܒܚܳܐ ܩܰܕܺܝܫܳܐ ܡܨܰܒܶܬ ܒܡܰܟܺܝܟܽܘܬܳܐ ܘܰܒܩܰܕܺܝܫܽܘܬܳܐ ܡܪܰܡܪܡܳܢܺܝܬܳܐ. [ܠ] ܡܫܰܡܫܳܢܳܐ ܕܰܡܚܰܘܶܐ ܒܶܗ ܕܡܽܘܬܳܐ ܫܰܦܺܝܪܬܳܐ ܐܰܝܟ ܦܽܘܩܕܳܢܳܐ ܫܠܺܝܚܳܝܳܐ. [ܡ] ܡܫܰܡܫܳܢܳܐ ܝܰܡܺܝܢܳܝܳܐ ܕܢܳܛܰܪ ܠܶܒܶܗ ܘܠܶܫܳܢܶܗ ܡܶܢ ܟܽܠ ܢܶܟܠܳܐ ܘܒܺܝܫܬܳܐ. [ܢܢ] ܡܫܰܡܫܳܢܳܐ ܝܰܡܺܝܢܳܝܳܐ ܕܣܶܢܐܬܳܐ ܡܫܰܡܠܰܝܬܳܐ ܗܳܘܝܳܐ ܠܶܗ ܠܽܘܩܒܰܠ ܟܽܠ ܗܶܪ̈ܶܣܺܝܣ ܡܚܰܒ̈ܠܳܬܳܐ [ܣ] ܡܫܰܡܫܳܢܳܐ ܝܰܡܺܝܢܳܝܳܐ ܘܰܡܗܰܝܡܢܳܐ܆ ܕܰܥܒܳܕ̈ܶܐ ܛܳܒܶـ̈ܐ ܡܶܬܚܙܶܝܢ ܒܶܗ ܐܰܝܟ ܥܰܒܕܳܐ ܛܳܒܳܐ ܥܦܺܝܦܳܐܺܝܬ. [ܥ] ܡܫܰܡܫܳܢܳܐ ܝܰܡܺܝܢܳܝܳܐ ܕܦܺܝܪܡܳܐ ܡܪܰܥܝܳܢܳܐ ܡܰܥܛܰܪ ܒܡܰܕ̈ܒܚܶܐ ܟܳܗ̈ܢܳܝܶܐ. [ܦ] ܡܫܰܡܫܳܢܳܐ ܕܨܰܘ̈ܡܶܐ ܕܟܰܝ̈ܳܐ ܘܰܨܠܰܘ̈ܬܳܐ ܫܡܺܝ̈ܥܳܬܳܐ ܨܳܐܶܡ ܘܰܡܨܰܠܶܐ ܐܰܡܺܝܢܳܐܺܝܬ. [ܨ] ܡܫܰܡܫܳܢܳܐ ܝܰܡܺܝܢܳܝܳܐ ܩܺܝܬܳܪܽܘܕܳܐ ܐܰܠܳܗܳܝܳܐ ܕܢܶܥ̈ܡܳܬܳܐ ܚܰܠ̈ܝܳܬܳܐ ܕܪܽܘܚܳܐ ܩܰܕܺܝܫܳܐ ܠܥܺܝ̈ܙܳܢ ܡܫܰܡܶܫ. [ܩ] ܡܫܰܡܫܳܢܳܐ ܐܰܠܳܗܳܝܳܐ ܕܪܶܚܡܰܬ ܐܰܠܳܗܳܐ ܘܪܶܚܡܰܬ ܐܰܟܣ̈ܢܳܝܶܐ ܘܪܶܚܡܰܬ ܐܰܚ̈ܶܐ ܡܶܬܚܰܙܝܳܐ ܒܶܗ. [ܪ] ܡܫܰܡܫܳܢܳܐ ܝܰܡܺܝܢܳܝܳܐ ܕܫܽܘܒ̈ܚܶܐ ܘܩܽܘ̈ܠܳܣܶܐ ܒܕܳܪ̈ܳܬܳܐ ܟܳܗ̈ܢܳܝܳܬܳܐ ܕܥܺܕܬܳܐ ܕܰܐܠܳܗܳܐ ܐܰܡܺܝܢܳܐܺܝܬ ܡܰܪܕܶܐ [ܫ] ܡܫܰܡܫܳܢܳܐ ܝܰܡܺܝܢܳܝܳܐ ܕܬܶܫܒ̈ܚܳܬܶܗ ܕܡܳܪܝܳܐ ܡܰܒܰܥ ܐܰܡܺܝܢܳܐܺܝܬ [ܬ] ܡܫܰܡܫܳܢܳܐ ܝܰܡܺܝܢܳܝܳܐ ܕܰܒܟܽܠܙܒܰܢ ܘܰܒܟܽܠܡܶܕܶܡ ܟܽܠ ܐܰܝܠܶܝܢ ܕܦܰܐܝ̈ܢ ܘܰܡܪ̈ܰܥܝܳܢ ܠܰܐܠܳܗܳܐ ܫܰܪܺܝܪܳܐܺܝܬ ܥܳܒܶܕ ܘܰܡܫܰܡܠܶܐ܀ ܘܟܰܕ ܒܗܳܠܶܝܢ ܕܰܡܪܰܥܶܝܢ ܠܨܶܒܝܳܢܳܟ ܡܶܬܕܰܒܪܺܝܢܰܢ. ܚܢܰܢ ܘܗܽܘ ܫܰܘܝܳܐܺܝܬ ܡܫܰܡ̈ܫܳܢܶܐ ܝܰܡܺܝ̈ܢܳܝܶܐ ܘܶܐܣ̈ܛܶܦܰܢܳܝܶܐ ܢܶܬܚܙܶܐ ܩܕܳܡܰܝܟ ܒܶܐܣܟܺܝܡܳܐ ܕܫܳܦܰܪ ܠܡܳܪܽܘܬܳܟ. ܘܥܰܡܗܽܘܢ ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ. ܘܰܠܪܽܘܚܳܐ ܕܺܝܠܳܟ ܩܰܕܺܝܫܳܐ ܘܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܳܠܳܐ ܒܩ̄: ܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܦܶܬܓܳܡܳܐ: ܫܡܰܥܘ ܗܳܕܶܐ ܟܽܠܟܽܘܢ ܥܰܡ̈ܡܶܐ:

ܫܳܠܰܚ ܠܶܗ ܦܰܘܠܽܘܣ ܛܽܘܒܳܢܳܐ܆ ܠܛܺܝܡܳܬܶܐܽܘܣ ܬܰܠܡܺܝܕܶܗ. ܚܙܺܝ ܐܰܚܽܘܢ ܡܳܢܳܐ ܥܳܒܶܕ ܐܰܢ̱ܬ܆ ܡܶܢ ܥܺܕ̈ܳܬܶܗ ܕܰܡܫܺܝܚܳܐ. ܚܙܺܝ ܠܳܐ ܬܶܬܶܠ ܟܳܗܢܽܘܬܳܐ܆ ܠܳܐ ܠܪ̈ܳܡܶܐ ܘܠܳܐ ܠܙܰܠܺܝ̈ܠܶܐ܆ ܘܠܳܐ ܠܝܰܥ̈ܢܶܐ ܘܠܳܐ ܠܳܐܣܽܘ̈ܛܶܐ. ܐܶܠܳܐ ܠܢܺܝ̈ܚܶܐ ܘܡܰܟܺܝ̈ܟܶܐ܆ ܘܕܰܡܕܰܒܰܪ ܒܰܝܬܶܗ ܫܰܦܺܝܪ܀

ܐܰܢܗܰܪܘ ܒܰܪ̈ܩܰܝܟ ܠܬܺܒܶܝܠ:

ܡܶܢ ܢܽܘܪܳܐ ܘܪܽܘܚܳܐ ܐܰܩܺܝܡ ܠܶܗ܆ ܡܫܰܡ̈ܫܳܢܶܐ ܠܰܐܠܳܗܽܘܬܶܗ. ܕܠܳܐ ܫܳܠܶܝܢ ܒܠܺܠܝܳܐ ܘܒܺܐܝܡܳܡܳܐ܆ ܠܰܡܫܰܡܳܫܘ ܠܡܳܪܽܘܬܶܗ. ܘܰܨܒܳܐ ܒܪ̈ܰܚܡܶܐ ܕܛܰܝܒܽܘܬܶܗ܆ ܒܪܳܐ ܡܶܠܬܳܐ ܗܰܘ ܕܶܐܬܒܰܣܰܪ܆ ܘܰܒܥܺܕܬܳܐ ܕܒܶܝܬ ܐܰܪ̈ܥܳܢܶܐ. ܐܰܩܺܝܡ ܠܶܗ ܥܰܠ ܬܶܫܡܶܫܬܶܗ܆ ܒܢܰܝ̈ܢܳܫܳܐ ܠܒܺܝܫܰܝ̈ ܒܶܣܪܳܐ܀

ܫܘܒܚܐ: ܡܫܰܡ̈ܫܳܢܶܐ ܕܢܽܘܪܳܐ ܘܰܕܪܽܘܚܳܐ ܥܒܰܕܬ ܠܳܟ ܡܳܪܝ ܕܰܢܫܰܡܫܽܘܢܳܟ. ܘܰܒܥܺܕܬܳܐ ܕܒܽܘܟܪ̈ܶܐ ܫܡܰܝܳܢ̈ܶܐ. ܗܳܐ ܩܳܝܡܺܝܢ ܥܰܠ ܬܶܫܡܶܫܬܳܟ. ܘܒܰܐܪܥܳܐ ܐܰܩܺܝܡܬ ܠܺܐܝܩܳܪܳܟ܆ ܒܰܕܡܽܘܬ ܥܺܝܪ̈ܶܐ ܡܫܰܡ̈ܫܳܢܶܐ܆ ܘܗܳܐ ܒܓܰܘ ܥܺܕܬܳܐ ܐܰܪ̈ܥܳܢܶܐ܆ ܡܫܰܡܫܺܝܢ ܠܳܗ ܠܰܐܠܳܗܽܘܬܳܟ܆ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܀

ܡܶܢܥܳܠܰܡ: ܟܰܕ ܡܰܟܪܳܗ ܚܰܬܢܳܐ ܫܡܰܝܳܢܳܐ܆ ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ. ܩܪܳܐ ܠܫܶܡܥܽܘܢ ܘܰܩܪܳܐ ܠܝܽܘܚܰܢܢ܆ ܘܦܰܩܶܕ ܐܶܢܽܘܢ ܫܰܘܝܳܐܺܝܬ. ܠܫܶܡܥܽܘܢ ܥܰܒܕܶܗ ܪܰܒܒܰܝܬܳܐ܆ ܘܰܠܝܽܘܚܰܢܢ ܟܳܪܽܘܙܳܐ܆ ܩܪܳܐ ܐܶܢܽܘܢ ܘܦܰܩܶܕ ܐܶܢܽܘܢ. ܕܒܰܙܗܺܝܪܽܘܬܳܐ ܢܶܛܪܽܘܢܳܗ܆ ܕܒܰܕܡܶܗ ܝܰܩܺܝܪܳܐ ܙܒܺܝܢܳܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܠܣܰܓܺܝܐܽܘܬ ܪ̈ܰܚܡܶܐ ܕܺܝܠܳܟ ܡܳܪܝܳܐ܆ ܡܩܰܪܒܺܝܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܚܠܳܦ ܥܰܒܕܳܐ ܕܺܝܠܳܟ ܗܳܢܳܐ ܕܶܐܬܛܰܝܰܒ (ܥܰܒܕ̈ܶܐ ܕܺܝܠܳܟ ܗܳܠܶܝܢ ܕܶܐܬܛܰܝܰܒܘ) ܠܟܽܘܗܳܢܳܐ ܩܰܕܺܝܫܳܐ܆ ܐܰܝܟܰܢܳܐ ܕܒܳܟ ܢܶܬܩܰܕܰܫ (ܢܶܬܩܰܕܫܽܘܢ) ܒܒܰܝܬܳܝܽܘܬܳܐ ܕܐ̱ܪ̈ܳܙܰܝܟ ܐܰܠܳܗܳܝ̈ܶܐ. ܘܥܰܡ ܪ̈ܰܒܰܝ ܒ̈ܬܶܐ ܡܗܰܝܡ̈ܢܶܐ ܘܚܰܟܺܝ̈ܡܶܐ ܢܩܰܒܶܠ (ܢܩܰܒܠܽܘܢ) (ܘܢܰܣܩܽܘܢ) ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܙܽܘܡܳܪܳܐ

ܡܫܰܡ̈ܫܳܢܶܐ: ܐܽܘܪ̈ܚܳܬܳܟ ܡܳܪܝܳܐ ܚܰܘܳܢܝ ܘܰܫܒܺܝܠܰܝ̈ܟ ܐܰܘܕܰܥܰܝܢܝ܆ ܕܰܒܰܪܰܝܢܝ ܒܩܽܘܫܬܳܟ ܘܰܐܠܶܦܰܝܢܝ ܗܰܠܶܠܽܘܝܰܗ܀

ܡܫܰܡܫܳܢܳܐ: ܡܶܢ ܐܶܓܰܪܬܳܐ ܩܰܕܡܳܝܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܒܰܪܶܟܡܳܪܝ܀

ܡܫܰܡ̈ܫܳܢܶܐ: ܫܽܘܒܚܳܐ ܠܡܳܪܶܗ ܕܰܫܠܺܝܚܳܐ ܨܠܽܘܬܶܗ ܥܰܡܰܢ ܐܰܡܺܝܢ܀

ܐ ܛܺܝܡܳܬܶܐܳܘܣ: ܓ: ܚ - ܝܓ܇ ܕ: ܘ

ܒܶܪܝ܆ ܘܳܐܦ ܡܫܰܡ̈ܫܳܢܶܐ ܗܳܟܰܢܳܐ ܢܶܗܘܽܘܢ ܕܟܶܝܢ܆ ܘܠܳܐ ܢܡܰܠܠܽܘܢ ܬܰܪܬܶܝܢ ܘܠܳܐ ܢܶܗܘܽܘܢ ܨܠܶܝܢ ܠܚܰܡܪܳܐ ܣܰܓܺܝܐܳܐ ܘܠܳܐ ܢܶܪܚܡܽܘܢ ܝܽܘܬܪ̈ܳܢܶܐ ܛܰܢ̈ܦܶܐ. ܐܶܠܳܐ ܢܶܐܚܕܽܘܢ ܐ̱ܪܳܙܳܐ ܕܗܰܝܡܳܢܽܘܬܳܐ ܒܬܺܐܪܬܳܐ ܕܟܺܝܬܳܐ. ܘܗܶܢܽܘܢ ܗܳܠܶܝܢ ܢܶܬܒܩܽܘܢ ܠܽܘܩܕܰܡ܆ ܘܗܳܝܕܶܝܢ ܢܫܰܡܫܽܘܢ ܟܰܕ ܐܺܝܬܰܝܗܽܘܢ ܕܠܳܐ ܪܶܫܝܳܢ. ܗܳܟܰܢܳܐ ܐܳܦ ܢܶܫ̈ܶܐ ܢܶܗܘ̈ܝܳܢ ܢܰܟ̈ܦܳܢ ܘܢܶܗܘܶܐ ܥܺܝܪ ܪܶܥܝܳܢܗܶܝܢ ܘܢܶܗܘ̈ܝܳܢ ܡܗܰܝܡ̈ܢܳܢ ܒܟܽܠ ܡܶܕܶܡ. ܡܫܰܡ̈ܫܳܢܶܐ ܢܶܗܘܽܘܢ: ܐܰܝܢܳܐ ܕܰܚܕܳܐ ܐܰܢ̱ܬܬܳܐ ܗܘܳܬ ܠܶܗ ܘܕܰܒܰܪ ܒܢܰܘܗ̱̈ܝ ܘܒܰܝܬܶܗ ܫܰܦܺܝܪ. ܐܰܝܠܶܝܢ ܓܶܝܪ ܕܫܰܡܶܫܘ ܫܰܦܺܝܪ܆ ܕܰܪܓܳܐ ܛܳܒܳܐ ܩܳܢܶܝܢ ܠܢܰܦܫܗܽܘܢ ܘܡܰܓܠܶܐ ܐܰܦ̈ܶܐ ܣܰܓܺܝܐܳܐ ܒܗܰܝܡܳܢܽܘܬܳܐ ܕܝܶܫܽܘܥ ܡܫܺܝܚܳܐ. ܗܳܠܶܝܢ ܟܳܬܶܒ ܐ̱ܢܳܐ ܠܳܟ ܟܰܕ ܡܣܰܒܰܪ ܐ̱ܢܳܐ ܕܒܰܥܓܰܠ ܐܳܬܶܐ ܐ̱ܢܳܐ ܠܘܳܬܳܟ. ܘܶܐܢ ܗܽܘ ܕܶܝܢ ܕܡܰܘܚܰܪ ܐ̱ܢܳܐ܆ ܕܬܶܕܰܥ ܐܰܝܟܰܢܳܐ ܘܳܠܶܐ ܠܡܶܬܗܰܦܳܟܽܘ ܒܒܰܝܬܶܗ ܕܰܐܠܳܗܳܐ ܕܺܐܝܬܶܝܗ ܥܺܕܬܳܐ ܕܰܐܠܳܗܳܐ ܚܰܝܳܐ ܥܰܡܽܘܕܳܐ ܘܫܶܬܐܶܣܬܳܐ ܕܰܫܪܳܪܳܐ. ܗܳܠܶܝܢ ܟܰܕ ܬܶܡܠܽܘܟ ܠܰܐܚ̈ܶܐ܆ ܬܶܗܘܶܐ ܡܫܰܡܫܳܢܳܐ ܛܳܒܳܐ ܕܰܡܫܺܝܚܳܐ ܝܶܫܘܥ. ܟܰܕ ܡܶܬܪܰܒܶܐ ܐܰܢ̱ܬ ܒܡ̈ܠܶܐ ܕܗܰܝܡܳܢܽܘܬܳܐ܆ ܘܰܕܡܰܠܦܳܢܽܘܬܳܐ ܫܰܦܺܝܪܬܳܐ ܗܳܝ ܕܶܐܬܢܩܶܦܬ܀

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܡܳܪܝܳܐ ܪܶܚܡܶܬ ܬܶܫܡܶܫܬܶܗ ܕܒܰܝܬܳܟ. ܘܰܐܬܪܳܐ ܕܡܰܫܪܝܶܗ ܕܫܽܘܒܚܳܟ ܠܳܐ ܬܰܘܒܶܕܰܝܢܝ ܥܰܡ ܚܰܛܳܝ̈ܶܐ ܗܰܠܶܠܽܘܝܰܗ܀

ܘܩܳܐܶܡ ܪܺܝܫܟܳܗ̈ܢܶܐ ܡܶܢ ܬܪܽܘܢܺܝܽܘܢ܆ ܘܳܐܬܶܐ ܠܰܩܕܳܡ ܦܳܬܽܘܪ ܚܰܝ̈ܶܐ܆ ܘܟܰܕ ܐܰܦܰܘܗ̱̈ܝ ܠܡܰܥܪܒܳܐ ܩܳܪܶܐ ܠܶܐܘܰܢܓܶܠܺܝܽܘܢ ܩܰܕܺܝܫܳܐ ܡܶܢ ܝܽܘܚܰܢܢ ܫܠܺܝܚܳܐ ܘܠܽܘܩܳܐ ܡܣܰܒܪܳܢܳܐ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܺܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܟܳܪܽܘܙܽܘܬܳܐ ܡܰܚܝܳܢܺܝܬܳܐ ܡܶܢ ܝܽܘܚܰܢܳܢ ܫܠܺܝܚܳܐ ܡܰܟܪܙܳܢܳܐ ܕܡܰܟܪܶܙ ܚܰܝ̈ܶܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰܝ̈܀

ܐܶܘܰܢܓܶܠܺܝܽܘܢ ܡܶܢ ܝܽܘܚܰܢܳܢ ܫܠܺܝܚܳܐ

ܝܒ: ܟܕ - ܟܘ܇ ܠܗ - ܠܘ܇ ܝܓ: ܠܐ - ܠܗ܇ ܠܘܩܐ: ܝܐ: ܝܓ

ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ ܕܰܦܪܶܕܬܳܐ ܕܚܶܛܬܳܐ܆ ܐܶܠܳܐ ܢܳܦܠܳܐ ܘܡܳܝܬܳܐ ܒܰܐܪܥܳܐ ܒܰܠܚܽܘܕܶܝܗ ܦܳܝܫܳܐ. ܐܶܢ ܕܶܝܢ ܡܳܝܬܳܐ܆ ܦܺܐܪ̈ܶܐ ܣܰܓܺܝ̈ܐܶܐ ܡܰܝܬܝܳܐ. ܡܰܢ ܕܪܳܚܶܡ ܢܰܦܫܶܗ܆ ܢܰܘܒܕܺܝܗ. ܘܡܰܢ ܕܣܳܢܶܐ ܢܰܦܫܶܗ ܒܥܳܠܡܳܐ ܗܳܢܳܐ܆ ܢܶܛܪܺܝܗ ܠܚܰܝ̈ܶܐ ܕܰܠܥܳܠܰܡ. ܐܶܢ ܠܺܝ ܐ̱ܢܳܫ ܡܫܰܡܶܫ܆ ܢܺܐܬܶܐ ܒܳܬܰܪܝ. ܘܰܐܝܟܳܐ ܕܶܐܢܳܐ ܐܺܝܬܰܝ ܬܰܡܳܢ ܢܶܗܘܶܐ ܐܳܦ ܡܫܰܡܫܳܢܝ. ܡܰܢ ܕܠܺܝ ܡܫܰܡܶܫ܆ ܢܝܰܩܪܺܝܘܗ̱ܝ ܐܰܒܳܐ܀ ܐܳܡܰܪ ܠܗܽܘܢ ܝܶܫܽܘܥ: ܩܰܠܺܝܠ ܐ̱ܚܪܺܝܢ ܙܰܒܢܳܐ ܢܽܘܗܪܳܐ ܥܰܡܟܽܘܢܽ ܗ̱ܘ. ܗܰܠܶܟܘ ܥܰܕ ܐܺܝܬ ܠܟܽܘܢ ܢܽܘܗܪܳܐ܆ ܕܠܳܐ ܚܶܫܽܘܟܳܐ ܢܰܕܪܶܟܟܽܘܢ. ܘܡܰܢ ܕܰܡܗܰܠܶܟ ܒܚܶܫܽܘܟܳܐ܆ ܠܳܐ ܝܳܕܰܥ ܠܰܐܝܟܳܐ ܐܳܙܶܠ. ܥܰܕ ܐܺܝܬ ܠܟܽܘܢ ܢܽܘܗܪܳܐ ܗܰܝܡܶܢܘ ܒܢܽܘܗܪܳܐ ܕܰܒܢܰܘܗ̱̈ܝ ܕܢܽܘܗܪܳܐ ܬܶܗܘܽܘܢ܀ ܗܳܫܳܐ ܐܶܫܬܰܒܰܚ ܒܪܶܗ ܕܐ̱ܢܳܫܳܐ ܘܰܐܠܳܗܳܐ ܐܶܫܬܰܒܰܚ ܒܶܗ. ܘܶܐܢ ܐܰܠܳܗܳܐ ܐܶܫܬܰܒܰܚ ܒܶܗ܆ ܘܳܐܦ ܐܰܠܳܗܳܐ ܡܫܰܒܰܚ ܠܶܗ ܒܶܗ ܘܡܶܚܕܳܐ ܡܫܰܒܰܚ ܠܶܗ. ܒܢܰܝ̈܆ ܩܰܠܺܝܠ ܐܚܪܺܝܢ ܥܰܡܟܽܘܢ ܐ̱ܢܳܐ ܘܬܶܒܥܽܘܢܳܢܝ. ܘܰܐܝܟܰܢܳܐ ܕܶܐܡܪܶܬ ܠܝܽܗ̱ܘ̈ܕܳܝܶܐ: ܕܠܰܐܝܟܳܐ ܕܶܐܢܳܐ ܐܳܙܶܠ ܐܢܳܐ܆ ܐܰܢ̱ܬܽܘܢ ܠܳܐ ܡܶܫܟܚܺܝܬܽܘܢ ܠܡܶܐܬܳܐ. ܘܳܐܦ ܠܟܽܘܢ ܐܳܡܰܪ ܐܢܳܐ ܗܳܫܳܐ. ܦܽܘܩܕܳܢܳܐ ܚܰܕܬܳܐ ܝܳܗܶܒ ܐ̱ܢܳܐ ܠܟܽܘܢ: ܕܰܗܘܰܝܬܽܘܢ ܡܰܚܒܺܝܢ ܚܰܕ ܠܚܰܕ ܐܰܝܟܰܢܳܐ ܕܶܐܢܳܐ ܐܰܚܶܒܬܟܽܘܢ ܐܳܦ ܐܰܢ̱ܬܽܘܢ ܬܰܚܒܽܘܢ ܚܰܕ ܠܚܰܕ. ܒܗܳܕܶܐ ܢܶܕܰܥ ܟܽܠ ܐ̱ܢܳܫ ܕܬܰܠܡܺܝܕܰܝ̈ ܐܰܢ̱ܬܽܘܢ. ܐܶܢ ܚܽܘܒܳܐ ܢܶܗܘܶܐ ܒܟܽܘܢ ܚܰܕ ܠܘܳܬ ܚܰܕ܀ ܘܶܐܢ ܐܰܢ̱ܬܽܘܢ ܕܒܺܝ̈ܫܶܐ ܐܺܝܬܰܝܟܽܘܢ ܝܳܕܥܺܝܬܽܘܢ ܡܰܘܗ̈ܒܳܬܳܐ ܛܳܒ̈ܳܬܳܐ ܠܡܶܬܰܠ ܠܰܒܢܰܝ̈ܟܽܘܢ. ܟܡܳܐ ܝܰܬܺܝܪܳܐܺܝܬ ܐܰܒܽܘܟܽܘܢ ܕܒܰܫܡܰܝܳܐ܆ ܢܶܬܶܠ ܪܽܘܚܳܐ ܩܰܕܺܝܫܳܐ ܠܗܳܢܽܘܢ ܕܫܳܐܠܺܝܢ ܠܶܗ܀

ܥܶܢܝܳܢܳܐ ܕܫܰܒܰܚܘ ܠܡܳܪܝܳܐ ܒܪܶܟܢܳܐ ܕܩܰܕܺܝܫܳܐ ܕܰܐܫܪܺܝ

ܪܺܝܫܟܳܗ̈ܢܶܐ: ܫܰܒܰܚܘ ܠܡܳܪܝܳܐ ܒܩܽܘܕܫܶܗ ܫܰܒܚܽܘܗ̱ܝ ܒܰܪܩܺܝܥܳܐ ܕܥܽܘܫܢܶܗ܀

ܡܫܰܡ̈ܫܳܢܶܐ: ܩܰܕܺܝܫܳܐ ܕܰܐܫܪܺܝ ܫܟܺܝܢܬܶܗ܆ ܥܰܠ ܛܽܘܪ ܣܺܝܢܰܝ ܘܩܰܕܫܶܗ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܚܰܝܠܬܳܢܽܘܬܶܗ܆ ܫܰܒܚܽܘܗ̱ܝ ܒܣܽܘܓܐܳܐ ܕܪܰܒܽܘܬܶܗ܀

ܡܫܰܡ̈ܫܳܢܶܐ: ܨܠܳܐ ܪܳܡܳܐ ܥܰܠ ܛܽܘܪ ܣܺܝܢܰܝ܆ ܘܰܐܓܶܢ ܐܺܝܕܶܗ ܥܰܠ ܡܽܘܫܶܐ. ܘܡܽܘܫܶܐ ܣܳܡܳܗ ܥܰܠ ܐܰܗܪܽܘܢ܆ ܘܶܐܬܝܰܒܠܰܬ ܨܶܝܕ ܝܽܘܚܰܢܢ܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܩܳܠܳܐ ܕܩܰܪܢܳܐ. ܫܰܒܚܽܘܗ̱ܝ ܒܩܺܝܬܳܪ̈ܶܐ ܘܰܒܟܶܢܳܪ̈ܶܐ܀

ܡܫܰܡ̈ܫܳܢܶܐ: ܪܽܘܚܳܐ ܩܰܕܺܝܫܳܐ ܕܰܐܓܶܢ܆ ܥܰܠ ܫܠܺܝ̈ܚܶܐ ܒܓܰܘ ܥܶܠܺܝܬܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܰܦ̈ܠܰܓܶܐ ܘܒܰܪ̈ܒܺܝܥܶܐ܆ ܫܰܒܚܽܘܗ̱ܝ ܒܡܶܢ̈ܶܐ ܚܰܠ̈ܝܳܬܳܐ܀

ܡܫܰܡ̈ܫܳܢܶܐ: ܪܽܘܚܳܐ ܕܡܰܠܶܠ ܒܰܢ̈ܒܺܝܶܐ܆ ܘܶܐܬܳܐ ܘܰܐܓܶܢ ܥܰܠ ܫܠܺܝ̈ܚܶܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܨܺܝܨܠܰܝ̈ ܫܶܡܥܳܐ܆ ܫܰܒܚܽܘܗ̱ܝ ܒܩܳܠܳܐ ܘܒܰܩܥܳܬܳܐ܆ ܟܽܠ ܢܶܫܡܳܐ ܬܫܰܒܰܚܝ ܠܡܳܪܝܳܐ܀

ܡܫܰܡ̈ܫܳܢܶܐ: ܛܳܒܳܐ ܕܰܐܓܥܶܠ ܠܰܫܠܺܝ̈ܚܰܘܗ̱ܝ܆ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ. ܐܰܫܪܳܐ ܫܟܺܝܢܬܳܟ ܒܛܰܝܒܽܘܬܳܟ܆ ܥܰܠ ܥܰܒܕܳܟ (ܥܰܒܕܰܝ̈ܟ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܫܽܘܒܚܳܐ ܠܰܐܒܐ ܩܰܕܺܝܫܳܐ܆ ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܰܒܝܰܕ ܪܽܘܚܶܗ ܩܰܕܺܝܫܳܐ܆ ܝܳܗܶܒ ܩܽܘܕ̈ܫܶܐ ܠܩܰܕܺܝ̈ܫܶܐ܀

ܪܺܝܫܟܳܗ̈ܢܶܐ: ܡܶܢܥܳܠܰܡ: ܪܽܘܚܳܐ ܩܰܕܺܝܫܳܐ ܕܩܰܕܶܫ܆ ܠܰܫܡܽܘܐܶܝܠ ܡܶܢ ܓܰܘ ܟܰܪܣܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ(ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫ ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ܀

ܥܰܡܳܐ: ܩܽܘܪܝܶܠܶܝܣܽܘܢ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܪܺܝܫܟܳܗ̈ܢܶܐ ܡܨܰܠܶܐ ܨܠܽܘܬܳܐ ܗܳܕܶܐ ܟܰܕ ܓܳܗܶܝܢ

ܓܗܳܢܬܳܐ

ܡܳܪܝܳܐ ܐܰܠܳܗܳܐ ܕܚܰܝ̈ܠܰܘܳܬܳܐ ܩܰܕܺܝ̈ܫܶܐ. ܗܰܘ ܕܣܳܡܬ ܠܰܢ ܒܦܶܣܳܐ ܕܬܶܫܡܶܫܬܳܟ ܗܳܕܶܐ. ܗܰܘ ܕܚܳܟܶܡ ܐܰܢ̱ܬ ܠܗܰܘ̈ܢܶܐ ܕܰܒܢܰܝ̈ܢܳܫܳܐ. ܘܒܳܨܶܐ ܐܰܢ̱ܬ ܠܶܒܰـ̈ܘܳܬܳܐ ܘܟܽܘܠ̈ܝܳܬܳܐ. ܫܡܰܥ ܠܰܢ ܡܶܛܽܠ ܣܽܘܓܐܳܐ ܕܪ̈ܰܚܡܰܝܟ. ܘܕܰܟܳܐ ܠܰܢ ܡܶܢ ܟܽܠܶܗ ܛܽܘܠܫܳܐ ܕܒܶܣܪܳܐ ܘܰܕܪܽܘܚܳܐ. ܐܰܥܒܰܪ ܚܛܳܗܰܝ̈ܢ ܐܰܝܟ ܥܢܳܢܳܐ. ܘܰܐܝܟ ܥܰܪܦܶܠܳܐ ܥܰܘܠܰܝ̈ܢ. ܡܠܺܝ ܠܰܢ ܡܶܢ ܚܰܝܠܳܐ ܕܺܝܠܳܟ. ܘܡܶܢ ܛܰܝܒܽܘܬܳܐ ܕܺܝܚܺܝܕܳܝܳܐ ܒܪܳܐ. ܘܡܶܢ ܡܰܥܒܕܳܢܽܘܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ. ܘܰܐܣܦܶܩ ܠܰܢ ܕܢܶܗܘܶܐ ܡܫܰܡ̈ܫܳܢܶܐ ܕܕܺܝܰܬܺܝܩܺܐ ܕܺܝܠܳܟ ܚܕܰܬܳܐ. ܐܰܝܟܰܢܳܐ ܕܢܶܫܟܰܚ ܕܰܐܝܟ ܕܫܳܘܶܐ ܠܰܫܡܳܟ ܩܰܕܺܝܫܳܐ܆ ܢܩܽܘܡ ܩܕܳܡܰܝܟ ܠܰܡܫܰܡܳܫܽܘ ܘܠܰܡܟܰܗܳܢܽܘ ܠܐ̱ܪ̈ܳܙܰܝܟ ܐܰܠܳܗܳܝ̈ܶܐ. ܘܠܳܐ ܬܶܫܒܽܘܩ ܠܰܢ ܕܫܰܘܬܳܦ̈ܐ ܢܶܗܘܶܐ ܕܰܚ̈ܛܳܗܶܐ ܢܽܘܟܪ̈ܳܝܶܐ. ܐܶܠܳܐ ܐܳܦ ܠܗܳܠܶܝܢ ܕܺܝܠܰܢ ܠܚܺܝ. ܘܗܰܒ ܠܰܢ ܡܳܪܝܳܐ܆ ܕܠܳܐ ܢܶܥܒܶܕ ܡܶܕܶܡ ܒܡܶܨܛܰܠܝܳܢܽܘܬܳܐ. ܐܶܠܳܐ ܫܰܟܶܢ ܠܰܢ ܝܺܕܰܥܬܳܐ. ܠܡܶܓܒܳܐ ܠܗܳܠܶܝܢ ܕܫܳܘܶܝܢ ܘܠܰܡܩܰܪܳܒܘ ܠܳܟ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܘܩܰܒܶܠ ܠܰܡܫܰܡܫܳܢܳܐ (ܠܰܡܫܰܡ̈ܫܳܢܶܐ) ܘܫܰܡܠܳܐ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܕܗܳܪܟܳܐ ܩܰܪܺܝܒ (ܩܰܪܺܝܒܺܝܢ)܆ ܘܰܡܣܰܟܶܐ (ܘܰܡܣܰܟܶܝܢ) ܠܡܰܘܗܰܒܬܳܟ ܫܡܰܝܳܢܺܝܬܳܐ. ܡܶܛܽܠ ܕܒܰܣܺܝܡܳܐ ܐܺܝܬܰܝܟ ܘܣܰܓܺܝ ܪ̈ܰܚܡܶܐ ܠܟܽܠܗܽܘܢ ܗܳܢܽܘܢ ܕܩܳܪܶܝܢ ܠܳܟ. ܘܚܰܝܠܬܳܢ ܐܽܘܚܕܳܢܳܐ ܕܺܝܠܳܟ. ܘܕܺܝܚܺܝܕܳܝܳܐ ܒܪܳܐ ܕܺܝܠܳܟ. ܘܰܕܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ. ܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ. ܘܰܫܘܶܐ ܠܳܟ ܒܽܐܘܣܺܝܰܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ܀

ܝܳܗܶܒ ܟܬܳܒܳܐ ܠܪܺܝܫܡܫܰܡ̈ܫܳܢܶܐ ܘܰܡܥܰܢܶܐ ܗܳܕܶܐ ܡܰܥܢܺܝܬܳܐ ܒܬܰܪܥܳܐ ܕܡܰܕܒܚܳܐ ܟܰܕ ܚܰܕ ܡܶܢ ܩܠܺܝܪ̈ܺܝܩܳܝܶܐ ܐܰܚܺܝܕ ܠܡܽܘܪܳܢܺܝܬܳܐ ܘܰܠܩܶܪܝܽܘܢܳܐ ܡܶܢ ܓܰܪܒܝܳܐ. ܘܪܺܝܫ ܟܳܗ̈ܢܶܐ ܡܪܰܚܶܦ ܠܰܟܬܳܒܳܐ ܠܥܶܠ ܡܶܢ ܐܪ̈ܳܙܶܐ ܘܳܐܡܰܪ:

ܪܺܝܫܟܳܗ̈ܢܶܐ: ܛܰܝܒܽܘܬܶܗ܆ ܕܡܳܪܰܢ ܝܶܫܽܘܥ ܡܫܺܝܚܳܐ ܗܳܝ ܕܰܒܟܽܠܙܒܰܢ ܡܡܰܠܝܳܐ ܚܰܣܺܝܪ̈ܳܬܰܢ. ܒܨܶܒܝܳܢܳܐ ܓܶܝܪ ܕܰܐܠܳܗܳܐ ܐܰܒܳܐ. ܘܰܒܚܰܝܠܳܐ ܕܪܽܘܚܳܐ ܩܰܕܺܝܫܳܐ. ܠܗܳܢܳܐ ܕܗܳܪܟܳܐ ܩܰܪܺܝܒ. (ܠܗܳܠܶܝܢ ܕܗܳܪܟܳܐ ܩܰܪܺܝܒܺܝܢ) ܘܰܒܕܶܚܠܬܳܐ ܘܒܰܪܬܺܝܬܳܐ ܘܰܒܗܰܝܡܳܢܽܘܬܳܐ ܕܰܫܪܳܪܳܐ܆ ܨܰܘܪܶܗ (ܨܰܘܪ̈ܰܝܗܽܘܢ) ܩܕܳܡ ܡܰܕܒܚܳܐ ܩܰܕܺܝܫܳܐ ܐܰܪܟܶܢ (ܐܰܪܟܶܢܘ). ܘܰܒܥܰܝܢܳܐ ܕܬܰܪܥܺܝܬܶܗ (ܕܬܰܪܥܺܝܬܗܽܘܢ) ܠܘܳܬܳܟ ܗܰܘ ܕܥܳܡܰܪ ܐܰܢ̱ܬ ܒܰܡܪ̈ܰܘܡܶܐ ܚܳܐܰܪ (ܚܳܝܪܺܝܢ) ܘܰܡܣܰܟܶܐ (ܘܰܡܣܰܟܶܝܢ) ܠܡܰܘܗܰܒܬܳܟ ܗܳܝ ܫܡܰܝܳܢܺܝܬܳܐ܀

ܘܟܰܕ ܡܶܫܬܰܡܠܝܳܐ ܟܳܪܽܘܙܽܘܬܳܐ ܗܳܕܶܐ܆ ܪܺܝܫܡܫܰܡ̈ܫܳܢܶܐ ܡܩܰܪܶܒ ܐܶܢܽܘܢ ܠܘܳܬ ܪܺܝܫܟܳܗ̈ܢܶܐ ܘܣܳܐܶܡ ܪܺܝܫܟܳܗ̈ܢܶܐ ܝܰܡܺܝܢܶܗ ܥܰܠ ܒܶܝܬ ܥܰܝ̈ܢܰܘܗ̱ܝ ܕܚܰܕ ܚܰܕ ܡܶܢܗܽܘܢ ܘܳܐܡܰܪ:

ܪܺܝܫܟܳܗ̈ܢܶܐ: ܗܳܝ ܕܩܳܪܝܳܐ ܘܰܡܩܰܪܒܳܐ ܡܶܢ ܛܶܟܣܳܐ ܕܰܐܦܽܘܕܝܰܩ̈ܢܽܘ ܠܕܰܪܓܳܐ ܕܰܡܫܰܡ̈ܫܳܢܶܐ܀

ܪܺܝܫ ܡܫܰܡ̈ܫܳܢܶܐ: (ܦܠܢ) ܡܫܰܡܫܳܢܳܐ ܠܡܰܕܒܚܳܐ ܩܰܕܺܝܫܳܐ ܘܰܐܠܳܗܳܝܳܐ ܕܥܺܕܬܳܐ ܕܰ(ܦܠܳܢܺܝܬ) ܕܰܒܕܽܘܟܬܳܐ (ܦܠܳܢܺܝܬ) ܕܡܶܢ ܬܚܶܝܬ ܐܶܘܬܰܢܛܺܝܰܐ ܕܟܽܘܪܣܝܳܐ ܫܠܺܝܚܳܝܳܐ ܕܰܐܢܛܺܝܽܘܟܺܝܰܐ ܪܳܚܡܰܬ ܠܰܡܫܺܝܚܳܐ ܘܰܪܚܺܝܡܰܬ ܡܶܢ ܡܫܺܝܚܳܐ܀

ܪܺܝܫܟܳܗ̈ܢܶܐ ܡܪܰܚܶܦ ܠܰܟܬܳܒܳܐ ܠܥܶܠ ܡܶܢ ܐܪ̈ܳܙܶܐ ܘܝܳܗܶܒ ܠܶܗ ܠܰܟܬܳܒܳܐ ܠܪܺܝܫ ܡܫܰܡ̈ܫܳܢܶܐ ܘܰܡܥܰܢܶܐ ܒܰܬܪܰܥ ܡܰܕܒܚܳܐ ܘܳܐܡܰܪ:

ܪܺܝܫܟܳܗ̈ܢܶܐ: ܒܩܺܝܢܕܽܘܢܽܘܣ܆ ܕܗܳܠܶܝܢ ܕܩܰܪܶܒܘ܆ ܢܨܰܠܶܐ ܗܳܟܺܝܠ ܟܽܠܰܢ ܕܬܺܐܬܶܐ ܥܠܰܘܗ̱ܝ (ܥܠܰܝܗܽܘܢ) ܛܰܝܒܽܘܬܳܐ ܘܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ. ܡܶܢ ܗܳܫܳܐ ܘܰܥܕܰܡܳܐ ܠܥܳܠܰܡ ܢܰܙܥܶܩ ܬܠܺܝܬܳܐܺܝܬ. ܩܽܘܪܝܶܠܶܝܣܽܘܢ܆ ܩܽܘܪܝܶܠܶܝܣܽܘܢ܆ ܩܽܘܪܝܶܠܶܝܣܽܘܢ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܘܟܰܕ ܪܺܝܫ ܡܫܰܡ̈ܫܳܢܶܐ ܡܰܟܪܶܙ ܒܩܺܝܢܕܽܘܢܽܘܣ܆ ܪܺܝܫܟܳܗ̈ܢܶܐ ܡܶܬܦܢܶܐ ܠܡܰܕܒܚܳܐ ܘܰܡܨܰܠܶܐ ܨܠܽܘܬܳܐ ܗܳܕܶܐ ܟܰܕ ܓܗܺܝܢ ܘܳܐܡܰܪ:

ܓܗܳܢܬܳܐ

ܪܺܝܫܟܳܗ̈ܢܶܐ: ܐܺܝܢ ܡܳܪܝܳܐ ܕܫܳܘܶܐ ܥܒܶܕܳܝܗ̱ܝ (ܕܫܳܘܶܝܢ ܥܒܶܕ ܐܶܢܽܘܢ) ܠܰܩܪܳܝܬܳܐ ܕܰܡܫܰܡ̈ܫܳܢܶܐ. ܐܰܝܟܰܢܳܐ ܕܢܶܫܬܘܶܐ (ܕܢܶܫܬܘܽܘܢ) ܒܝܰܕ ܪܶܚܡܰܬ ܐ̱ܢܳܫܽܘܬܳܟ. ܕܰܐܝܟ ܕܫܳܘܶܐ ܠܰܫܡܳܟ ܩܰܕܺܝܫܳܐ ܢܶܦܠܽܘܚ ܘܰܢܫܰܡܶܫ (ܢܶܦܠܚܽܘܢ ܘܰܢܫܰܡܫܽܘܢ) ܒܗܰܝܟܠܳܐ ܕܬܶܫܒܽܘܚܬܳܟ. ܘܢܶܫܟܰܚ (ܘܢܶܫܟܚܽܘܢ) ܪ̈ܰܚܡܶܐ ܩܕܳܡܰܝܟ܀

ܪܺܝܫܟܳܗ̈ܢܶܐ: ܐܰܝܟܰܢܳܐ ܕܢܶܗܘܶܐ ܘܢܶܫܬܘܶܐ (ܕܢܶܗܘܽܘܢ ܘܢܶܫܬܘܽܘܢ) ܒܝܰܕ ܪܶܚܡܰܬ ܐ̱ܢܳܫܽܘܬܳܐ ܕܺܝܠܳܟ܆ ܕܰܐܝܟ ܕܫܳܘܶܐ ܠܰܫܡܳܟ܆ ܠܡܶܦܠܰܚ ܠܳܟ ܥܰܒܕܽܘܬܳܐ܆ ܘܠܰܡܫܰܡܳܫܽܘ ܠܡܰܕܒܚܳܟ ܩܰܕܺܝܫܳܐ܆ ܘܰܠܡܶܫܟܳܚܽܘ ܪ̈ܰܚܡܶܐ ܩܕܳܡܰܝܟ܆ ܡܶܛܽܠ ܕܰܐܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܐܺܝܬܰܝܟ. ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܘܠܰܒܪܳܟ ܘܰܠܪܽܘܚܳܟ ܩܰܕܺܝܫ ܒܟܽܠ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܪܺܝܫܟܳܗ̈ܢܶܐ ܓܳܠܶܐ ܠܐ̱ܪ̈ܳܙܶܐ ܘܣܳܐܶܡ ܬܰܪ̈ܬܰܝܗܶܝܢ ܐܺܝܕܰܘܗ̱̈ܝ ܟܰܕ ܦܫܺܝ̈ܛܳܢ ܥܰܠ ܦܰܓܪܳܐ ܩܰܕܺܝܫܳܐ܆ ܘܦܳܫܶܛ ܕܪ̈ܳܥܰܘܗ̱ܝ ܘܰܡܪܰܚܶܦ ܬܰܪܬܶܝܢ ܙܰܒܢܺܝ̈ܢ ܟܰܕ ܒܟܽܠ ܙܒܰܢ̱ܬܳܐ ܡܟܰܢܶܫ ܡܶܢ ܦܰܓܪܳܐ ܘܡܰܘܒܶܠ ܠܗܶܝܢ ܠܚܽܘܦ̈ܢܰܘܗ̱ܝ ܟܰܕ ܨܡܺܝ̈ܕܳܢ ܥܰܠ ܟܳܣܳܐ ܘܪܳܡܶܐ ܒܶܗ. ܟܶܢ ܡܪܰܚܶܦ ܚܕܳܐ ܙܒܰܢ̱ܬܳܐ ܥܰܠ ܟܳܣܳܐ ܘܡܰܘܒܶܠ ܠܗܶܝܢ ܠܚܽܘܦ̈ܢܰܘܗܝ ܟܰܕ ܨܡܺܝ̈ܕܳܢ ܠܘܳܬ ܦܰܓܪܳܐ܀ ܗܳܝܕܶܝܢ ܢܳܣܶܒ ܠܗܶܝܢ ܠܚܽܘܦ̈ܢܰܘܗ̱ܝ ܟܰܕ ܨܡܺܝ̈ܕܳܢ ܘܰܡܟܰܣ̈ܝܳܢ ܒܦܶܕܬܳܐ܆ ܘܡܶܬܦܢܶܐ ܠܘܳܬ ܗܰܘ ܕܡܶܬܬܰܣܪܰܚ ܘܣܳܐܶܡ ܠܗܶܝܢ ܠܺܐܝ̈ܕܰܘܗܝ ܥܰܠ ܪܺܝܫܶܗ ܘܡܳܫܰܚ܀ ܘܬܽܘܒ ܡܪܺܝܡ ܐܺܝܕܰܘܗ̱̈ܝ ܟܰܕ ܦܳܫܶܛ ܕܪ̈ܳܥܰܘܗ̱ܝ ܠܥܶܠ ܘܡܰܚܶܬ ܠܗܶܝܢ ܟܰܕ ܪ̈ܳܥܠܳܢ ܥܰܠ ܪܺܝܫܶܗ. ܘܗܳܕܶܐ ܬܠܳܬ ܙܰܒܢܺܝ̈ܢ ܥܳܒܶܕ ܗܽܘ ܪܺܝܫ ܟܳܗ̈ܢܶܐ܆ ܟܰܕ ܥܰܝܢܰܘܗ̈ܝ ܚܳܝܪ̈ܳܢ ܠܥܶܠ ܒܕܶܚܠܬܳܐ܀ ܘܒܳܬܰܪܟܶܢ ܣܳܐܶܡ ܝܰܡܺܝܢܶܗ ܥܰܠ ܪܺܝܫܶܗ ܕܡܶܬܬܰܣܪܚܳܢܳܐ ܘܰܒܣܶܡܳܠܶܗ ܕܳܚܶܐ ܠܟܳܐ ܘܰܠܟܳܐ ܘܡܰܟܪܶܟ ܠܣܶܡܳܠܶܗ ܚܽܘܕܪܳܢܳܐܺܝܬ ܥܰܠ ܩܕܳܠܶܗ ܘܦܰܪܨܽܘܦܶܗ ܘܟܰܬܦܶܗ ܬܠܳܬ ܙܰܒܢܺܝ̈ܢ܀ ܘܢܶܗܘܶܐ ܗܳܝܕܶܝܢ ܪܺܝܫܟܳܗ̈ܢܶܐ ܡܟܰܣܶܐ ܠܺܐܝ̈ܕܰܘܗ̱ܝ ܘܰܠܪܺܝܫܶܗ ܕܡܶܬܬܰܣܪܚܳܢܳܐ ܒܦܰܝܢܶܗ܀

ܗܳܟܰܢܳܐ ܢܶܥܒܶܕ ܥܰܠ ܟܽܠ ܚܰܕ ܚܰܕ ܡܶܢܗܽܘܢ. ܘܡܳܐ ܕܰܡܪܰܚܶܦ܆ ܡܰܪ̈ܘܚܳܬܳܐ ܡܪܰܚܦܺܝܢ ܥܰܡܶܗ ܡܫܰܡ̈ܫܳܢܶܐ. ܘܶܐܡܰܬܝ ܕܬܳܢܶܐ ܠܰܨܠܽܘܬܳܐ ܕܰܓܗܳܢܬܳܐ܆ ܢܺܐܡܪܽܘܢ ܗܰܘ ܡܳܐ ܕܳܐܡܪܺܝܢ ܗܳܕܶܐ ܩܰܐܬܺܝܣܡܰܐ ܐܰܘ ܩܽܘܪܝܶܠܶܝܣܽܘܢ ܚܢܺܝܓܳܐܺܝܬ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܡܰܥܢܺܝܬܳܐ ܕܪܽܘܚܳܐ ܩܰܕܺܝܫܳܐ

ܡܫܰܡ̈ܫܳܢܶܐ: ܢܺܐܬܶܐ ܪܽܘܚܳܐ ܩܰܕܺܝܫܳܐ. ܘܢܰܓܶܢ ܥܰܠ ܚܰܕ ܚܰܕ ܡܶܢܗܽܘܢ. ܐܰܝܟ ܫܽܘܘܕܝܳܟ ܦܳܪܘܩܰܢ. ܠܳܐ ܬܶܓܠܽܘܙ ܐܶܢܽܘܢ ܡܳܪܝܳܐ. ܘܡܶܢ ܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ. ܗܳܕܶܐ ܫܳܐܠܺܝܢܰܢ ܡܶܢܳܟ. ܡܩܰܒܠܳܢܳܐ ܕܰܨܠܰܘ̈ܬܳܐ. ܠܪܽܘܚܳܐ ܗܰܘ ܩܰܕܺܝܫܳܐ. ܡܶܛܽܠܗܳܕܶܐ ܩܳܥܶܝܢܰܢ ܟܰܕ ܐܳܡܪܺܝܢܰܢ. ܩܰܕܺܝܫܰܬ ܪܽܘܚܳܐ ܗܰܘ ܦܰܪܩܠܺܝܛܳܐ܆ ܩܰܕܺܝܫܰܬ ܪܽܘܚܳܐ ܗܰܘ ܡܰܥܒܶܕ ܚܰܝ̈ܶܐ. ܩܰܕܺܝܫܰܬ ܪܽܘܚܳܐ ܗܰܘ ܕܶܐܫܬܰܟܰܢ ܠܰܢ. ܐܳܘ̃ ܠܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ. ܐܳܘ̃ ܠܐ̱ܪܳܙܳܐ ܪܰܒܳܐ ܕܠܳܐ ܡܶܬܡܰܠܰܠ. ܐܳܘ̃ ܠܰܬܡܺܝ̈ܗܳܬܳܟ ܕܰܠܘܳܬ ܓܶܢܣܰܢ. ܡܳܪܶܐ ܟܽܠ ܫܽܘܒܚܳܐ ܠܳܟ܀

ܗܳܪܟܳܐ ܪܺܝܫܟܳܗ̈ܢܶܐ ܡܟܰܣܶܐ ܠܶܗ ܒܶܐܣܛܠܶܗ ܟܳܗܢܳܝܬܳܐ ܘܣܳܐܶܡ ܝܰܡܺܝܢܶܗ ܥܰܠ ܪܺܝܫܶܗ ܕܡܶܬܬܰܣܪܚܳܢܳܐ܆ ܟܰܕ ܒܣܶܡܳܠܶܗ ܕܳܚܶܐ ܠܟܳܐ ܘܰܠܟܳܐ ܘܰܡܨܰܠܶܐ ܠܰܩܪܳܝܬܳܐ ܕܪܽܘܚܳܐ ܩܰܕܺܝܫܳܐ ܓܗܺܝܢܳܐܺܝܬ܀

ܩܪܳܝܬܳܐ ܕܪܽܘܚܳܐ ܩܰܕܺܝܫܳܐ܆ ܓܗܺܝܢܳܐܺܝܬ

ܪܺܝܫܟܳܗ̈ܢܶܐ: ܐܰܠܳܗܳܐ ܗܰܘ ܕܒܳܢܶܐ ܐܰܢ̱ܬ ܠܥܺܕܬܳܟ ܩܰܕܺܝܫܬܳܐ ܘܰܡܣܰܬܶܬ ܐܰܢ̱ܬ ܠܳܗ. ܘܡܰܘܣܶܦ ܐܰܢ̱ܬ ܡܡܰܠܶܐ ܚܰܣܝܪ̈ܳܬܳܐ ܕܺܝܠܳܗ ܒܝܰܕ ܩܰܕܺܝ̈ܫܰܝܟ. ܗܳܠܶܝܢ ܕܰܒܟܽܠ ܕܳܪ̈ܺܝܢ ܠܰܡܕܰܒܪܳܢܽܘܬܳܐ ܕܺܝܠܳܗ ܐܶܬܬܰܣܪܰܚܘ. ܐܰܢ̱ܬ ܗܳܟܺܝܠ ܡܳܪܝܳܐ ܒܫܳܥܬܳܐ ܗܳܕܶܐ܆ ܚܽܘܪ ܒܥܰܒܕܳܟ ܗܳܢܳܐ. ܘܫܰܕܰܪ ܥܠܰܘܗ̱ܝ ܛܰܝܒܽܘܬܳܐ ܕܪܽܘܚܳܟ ܩܰܕܺܝܫܳܐ. ܘܰܡܠܺܝܘܗ̱ܝ ܗܰܝܡܳܢܽܘܬܳܐ ܘܚܽܘܒܳܐ ܘܚܰܝܠܳܐ ܘܩܰܕܺܝܫܽܘܬܳܐ. ܘܰܐܝܟ ܛܰܝܒܽܘܬܳܐ ܕܬܶܫܡܶܫܬܳܐ ܕܝܰܗ̱ܒܬ ܠܶܐܣܛܶܦܰܢܽܘܣ ܡܫܰܡܫܳܢܳܟ܆ ܗܰܘ ܕܰܩܪܰܝܬ ܩܰܕܡܳܝܳܐ ܠܰܥܒܳܕܳܐ ܕܬܶܫܡܶܫܬܳܐ ܗܳܕܶܐ. ܗܳܟܰܢܳܐ ܗܰܒ ܕܳܐܦ ܠܥܰܒܕܳܟ ܗܳܢܳܐ ܢܺܐܬܶܐ ܥܽܘܕܪܳܢܳܐ ܡܶܢ ܫܡܰܝܳܐ. ܠܰܘ ܓܶܝܪ ܒܰܣܝܳܡܳܐ ܕܺܐܝܕ̈ܰܝܳܐ ܕܺܝܠܰܢ ܚܰܛܳܝ̈ܶܐ܆ ܐܶܠܳܐ ܒܣܳܥܽܘܪܽܘܬܳܐ ܕܪ̈ܰܚܡܰܝܟ ܥܰܬܺܝܪ̈ܶܐ ܡܶܬܝܰܗܒܳܐ ܛܰܝܒܽܘܬܳܐ ܠܗܳܠܶܝܢ ܕܫܳܘܶܝܢ ܠܳܗ. ܡܶܛܽܠܗܳܕܶܐ ܒܳܥܶܝܢܰܢ ܘܡܶܬܟܰܫܦܺܝܢܰܢ ܠܳܟ. ܦܰܨܳܐ ܠܰܢ ܡܶܢ ܫܰܘܬܳܦܽܘܬܳܐ ܕܰܚܛܳܗ̈ܶܐ. ܡܶܛܽܠ ܕܰܐܢ̱ܬ ܐܺܝܬܰܝܟ ܗܰܘ ܕܦܳܪܰܥ ܠܟܽܠ ܚܰܕ ܐܰܝܟ ܥܒܳܕܰܘ̈ܗ̱ܝ. ܗܰܒ ܠܰܢ ܕܶܝܢ ܡܳܪܝܳܐ܆ ܕܠܳܐ ܢܶܥܒܶܕ ܡܶܕܶܡ ܒܡܶܨܛܰܠܝܳܢܽܘܬܳܐ. ܐܶܠܳܐ ܫܰܟܶܢ ܠܰܢ ܝܺܕܰܥܬܳܐ ܠܡܶܓܒܳܐ ܠܗܳܠܶܝܢ ܕܫܳܘܶܝܢ. ܘܠܰܡܩܰܪܳܒܽܘ ܠܡܰܕܒܚܳܟ ܩܰܕܺܝܫܳܐ. ܐܰܝܟܰܢܳܐ ܕܠܳܐ ܥܕܺܝܠܳܐܺܝܬ ܢܫܰܡܫܽܘܢ ܬܶܫܡܶܫܬܳܐ܆ ܠܫܽܘܘܫܳܛܳܐ ܘܰܠܬܰܪܒܺܝܬܳܐ ܕܥܰܡܳܟ. ܘܰܕܠܳܐ ܢܶܗܘܽܘܢ ܬܽܘܩܰܠܬܳܐ ܠܥܺܕܬܳܟ. ܐܰܝܟܰܢܳܐ ܕܳܐܦ ܗܶܢܽܘܢ ܢܶܬܦܰܨܽܘܢ ܡܶܢ ܚܽܘܝܳܒܳܐ ܕܰܠܥܳܠܰܡ. ܘܰܚܢܰܢ ܢܶܥܪܽܘܩ ܡܶܢ ܦܽܘܪܥܳܢܳܐ ܕܚܺܝܠܳܐ ܕܗܳܢܽܘܢ ܕܚܳܛܶܝܢ ܒܡܰܕܒܚܰܝ̈ܟ܀

ܘܶܐܢ ܣܰܓܺܝܐܺܝܢ ܡܶܬܬܰܣܪ̈ܚܳܢܶܐ܆ ܗܳܟܰܢܳܐ ܢܶܥܒܶܕ ܪܺܝܫܟܳܗ̈ܢܶܐ ܥܰܠ ܚܰܕ ܚܰܕ ܡܶܢܗܽܘܢ܆ ܟܰܕ ܡܪܰܚܶܦ ܥܰܠ ܐܪ̈ܳܙܶܐ ܘܰܡܟܰܢܶܫ ܬܠܳܬ ܙܰܒܢܺܝ̈ܢ. ܟܶܢ ܡܪܰܚܶܦ ܥܰܠ ܪܺܝܫ ܡܶܬܬܰܣܪܚܳܢܳܐ܆ ܬܠܳܬ ܙܰܒܢܺܝ̈ܢ ܘܣܳܐܶܡ ܝܰܡܺܝܢܶܗ ܥܰܠ ܪܺܝܫܶܗ ܘܬܳܢܶܐ ܩܪܳܝܬܳܐ ܕܪܽܘܚܳܐ ܩܰܕܺܝܫܳܐ. ܘܡܰܩܶܦ ܬܠܳܝܬܳܐ: ܐܰܝܟܰܢܳܐ ܕܟܰܕ ܒܕܰܟܝܽܘܬܳܐ ܕܠܶܒܳܐ ܘܫܪ̄.
ܘܡܶܬܦܢܶܐ ܪܺܝܫܟܳܗ̈ܢܶܐ ܠܘܳܬ ܡܰܕܒܚܳܐ ܩܰܕܺܝܫܳܐ ܘܬܳܠܶܐ ܩܳܠܶܗ ܟܰܕ ܦܫܺܝ̈ܛܳܢ ܐܺܝ̈ܕܰܘܗ̱ܝ:

ܬܠܳܝܬܳܐ

ܪܺܝܫܟܳܗ̈ܢܶܐ: ܐܰܝܟܰܢܳܐ ܕܟܰܕ ܒܕܰܟܝܽܘܬܳܐ ܕܠܶܒܳܐ ܩܳܝܡܺܝܢܰܢ ܩܕܳܡ ܡܰܕܒܚܳܐ ܩܰܕܺܝܫܳܐ܆ ܢܶܫܟܰܚ ܪ̈ܰܚܡܶܐ ܐܳܦ ܚܢܳܢܳܐ ܥܰܡ ܥܰܒܕܳܟ ܗܳܢܳܐ (ܥܰܒܕܰܝ̈ܟ ܗܳܠܶܝܢ)܆ ܒܝܰܘܡܳܐ ܕܦܽܘܪܥܳܢܳܐ ܟܺܐܢܳܐ. ܡܶܛܽܠ ܕܰܐܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܐܺܝܬܰܝܟ. ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ. ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ܀

ܪܺܝܫ ܡܫܰܡ̈ܫܳܢܶܐ: ܠܡܳܪܝܳܐ ܪ̈ܺܝܫܰܝܢ ܢܰܪܟܶܢ܀

ܥܰܡܳܐ: ܩܕܳܡܰܝܟ ܡܳܪܰܢ ܘܰܐܠܳܗܰܢ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܓܗܳܢܬܳܐ

ܪܺܝܫܟܳܗ̈ܢܶܐ: ܚܽܘܪ ܒܰܢ ܡܳܪܝܳܐ ܘܰܒܬܶܫܡܶܫܬܰܢ. ܘܕܰܟܳܐ ܠܰܢ ܡܶܢ ܟܽܠ ܟܽܘ̈ܬܡܳܬܳܐ. ܟܰܕ ܡܶܢ ܫܡܰܝܳܐ ܝܳܗܶܒ ܐܰܢ̱ܬ ܛܰܝܒܽܘܬܳܐ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܐܰܝܟܰܢܳܐ ܕܢܶܫܬܘܶܐ. (ܕܢܶܫܬܘܽܘܢ) ܒܝܰܕ ܡܰܘܗܰܒܬܳܟ܆ ܕܠܳܐ ܥܕܺܝܠܳܐܺܝܬ ܢܫܰܡܫܳܟ (ܢܫܰܡܫܽܘܢܳܟ) ܘܢܶܫܟܰܚ. (ܘܢܶܫܟܚܽܘܢ) ܪ̈ܰܚܡܶܐ ܕܡܶܢܳܟ ܥܰܡ ܟܽܠܗܽܘܢ ܩܰܕܺܝܫܰܝ̈ܟ. ܗܳܢܽܘܢ ܕܡܶܢ ܥܳܠܰܡ ܫܦܰܪܘ ܠܳܟ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܡܶܛܽܠ ܕܰܐܠܳܗܳܐ ܕܨܳܒܶܐ ܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܐܺܝܬܰܝܟ. ܘܠܳܟ ܦܐܶܐ ܡܶܢ ܟܽܠ ܐܺܝܩܳܪܳܐ ܘܣܶܓܕܬܳܐ. ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܘܡܶܬܦܢܶܐ ܪܺܝܫܟܳܗ̈ܢܶܐ ܠܘܳܬ ܗܰܘ ܕܡܶܬܬܰܣܪܰܚ ܘܣܳܐܶܡ ܝܰܡܺܝܢܶܗ ܥܰܠ ܪܺܝܫܶܗ ܕܡܶܬܬܰܣܪܚܳܢܳܐ ܘܳܐܡܰܪ:

ܪܺܝܫܟܳܗ̈ܢܶܐ: ܐܶܬܬܰܣܪܰܚ ܒܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ܀

ܪܺܝܫ ܡܫܰܡ̈ܫܳܢܶܐ: (ܦܠܳܢ) ܡܫܰܡܫܳܢܳܐ ܠܡܰܕܒܚܳܐ ܩܰܕܺܝܫܳܐ ܘܰܐܠܳܗܳܝܳܐ ܕܥܺܕܬܳܐ ܩܰܕܺܝܫܬܳܐ ܕܰ(ܦܠܳܢܺܝܬ) ܕܕܽܘܟܬܳܐ ܕܰ(ܦܠܳܢܺܝܬ)܀

ܪܺܝܫܟܳܗ̈ܢܶܐ: (ܦܠܳܢ) ܡܫܰܡܫܳܢܳܐ ܠܡܰܕܒܚܳܐ ܩܰܕܺܝܫܳܐ ܕܕܽܘܟܬܳܐ ܕܳܐܪ̈ܬܳܕܽܘܟܣܽܘ ܕܩܰܕܡܰܬ ܐܶܫܬܰܡܗܰܬ܀

ܪܺܝܫ ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ ܚܳܬܶܡ ܠܶܗ ܠܡܶܬܬܰܣܪܚܳܢܳܐ ܒܶܝܬ ܥܰܝܢܰܘ̈ܗ̱ܝ ܬܠܳܬ ܙܰܒܢܺܝ̈ܢ ܒܛܽܘܦܣܳܐ ܕܰܨܠܺܝܒܳܐ ܟܰܕ ܐܳܡܰܪ܀

ܪܺܝܫܟܳܗ̈ܢܶܐ: ܒܰܫܡܳܐ ܕܰܐܒܳܐ܀♱

ܡܫܰܡ̈ܫܳܢܶܐ: ܐܰܡܺܝܢ܀

ܪܺܝܫܟܳܗ̈ܢܶܐ: ܘܕܰܒܪܳܐ♱

ܡܫܰܡ̈ܫܳܢܶܐ: ܐܰܡܺܝܢ܀

ܪܺܝܫܟܳܗ̈ܢܶܐ: ܘܰܕܪܽܘܚܳܐ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀♱

ܡܫܰܡ̈ܫܳܢܶܐ: ܐܰܡܺܝܢ܀

ܘܶܐܢ ܣܰܓܺܝܐܺܝܢ ܡܶܬܬܰܣܪ̈ܚܳܢܶܐ܆ ܥܰܠ ܚܰܕ ܚܰܕ ܡܶܢܗܽܘܢ ܡܫܰܡܠܶܐ ܙܢܳܐ ܗܳܢܳܐ ܕܰܪܫܺܝܡ ܟܰܕ ܐܳܡܰܪ: ܐܶܬܬܰܣܪܰܚ ܒܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ ܘܫܪ̄. ܘܡܶܬܦܢܶܐ ܪܺܝܫ ܟܳܗ̈ܢܶܐ ܠܘܳܬ ܡܰܕܒܚܳܐ ܘܰܡܨܰܠܶܐ ܨܠܽܘܬܳܐ ܗܳܕܶܐ ܟܰܕ ܓܗܺܝܢ܀

ܪܺܝܫ ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܓܗܳܢܬܳܐ

ܪܺܝܫܟܳܗ̈ܢܶܐ: ܡܩܰܒܠܺܝܢܰܢ ܛܰܝܒܽܘܬܳܟ ܡܳܪܰܢ ܐܰܚܺܝܕ ܟܽܠ܆ ܒܟܽܠܗܶܝܢ ܘܡܶܛܽܠ ܟܽܠܗܶܝܢ܆ ܘܰܡܩܰܠܣܺܝܢܰܢ ܘܰܡܫܰܒܚܺܝܢܰܢ ܠܰܫܡܳܟ ܩܰܕܺܝܫܳܐ. ܡܶܛܽܠ ܕܰܐܘܪܶܒܬ ܠܡܶܥܒܰܕ ܥܰܡܰܢ. ܘܶܐܫܰܕܬ ܡܰܘܗܰܒܬܳܟ ܥܰܠ ܥܰܒܕܳܟ ܗܳܢܳܐ (ܥܰܒܕܰܝ̈ܟ ܗܳܠܶܝܢ). ܒܳܥܶܝܢܰܢ ܕܶܝܢ ܡܶܢܳܟ ܘܰܡܦܺܝܣܺܝܢܰܢ ܠܳܟ ܡܳܪܝܳܐ. ܫܡܰܥ ܠܰܢ ܡܶܛܽܠ ܣܰܓܺܝܐܽܘܬܳܐ ܕܪ̈ܰܚܡܰܝܟ. ܘܰܨܒܺܝ ܒܟܺܝܪܳܛܽܘܢܺܝܰܐ ܗܳܕܶܐ ܕܰܗܘܳܬ ܕܰܡܫܰܡܫܳܢܽܘܬܳܐ ܥܰܠ ܥܰܒܕܳܟ ܗܳܢܳܐ (ܥܰܒܕܰܝ̈ܟ ܗܳܠܶܝܢ) ܒܝܰܕ ܡܶܐܬܺܝܬܳܐ ܕܪܽܘܚܳܟ ܩܰܕܺܝܫ ܒܟܽܠ. ܘܰܐܘܣܶܦ ܥܰܠ ܩܪܳܝܬܳܐ ܠܰܓܒܺܝܬܳܐ ܘܰܠܩܰܕܺܝܫܽܘܬܳܐ܆ ܘܰܠܛܰܝܒܽܘܬܳܐ ܕܛܳܒܽܘܬܳܟ. ܘܰܓܒܺܝ ܠܰܢ ܘܠܶܗ (ܘܰܠܗܽܘܢ) ܠܛܳܒܬܳܐ. ܘܗܰܒ ܠܶܗ ܕܢܶܦܠܽܘܚ (ܠܗܽܘ ܢ ܕܢܶܦܠܚܽܘܢ) ܠܳܟ ܒܟܰܟܪ̈ܶܐ ܕܰܢܣܰܒ (ܕܰܢܣܰܒܘ)܀

ܬܠܳܝܬܳܐ

ܪܺܝܫܟܳܗ̈ܢܶܐ: ܐܰܝܟܰܢܳܐ ܕܥܰܡ ܟܽܠܗܽܘܢ ܗܳܢܽܘܢ ܕܡܶܢ ܥܳܠܰܡ ܫܦܰܪܘ ܠܨܶܒܝܳܢܳܟ܆ ܢܶܣܰܒ (ܢܶܣܒܽܘܢ) ܐܰܓܪܳܐ ܕܰܡܫܰܡ̈ܫܳܢܶܐ ܡܗܰܝܡ̈ܢܶܐ ܘܚܰܟܺܝ̈ܡܶܐ. ܒܡܶܐܬܺܝܬܳܐ ܕܬܰܪܬܶܝܢ ܕܡܶܢ ܫܡܰܝܳܐ. ܕܡܳܪܝܳܐ ܕܺܝܠܰܢ ܘܰܐܠܳܗܰܢ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫ ܒܟܽܠ ܛܳܒܳܐ ܘܰܣܓܺܝܕܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܥܰܡܳܐ: ܐܰܡܺܝܢ܀

ܘܡܶܚܕܳܐ ܡܶܬܦܢܶܐ ܪܺܝܫ ܟܳܗ̈ܢܶܐ ܠܘܳܬ ܗܰܘ ܕܡܶܬܬܰܣܪܰܚ ܘܠܳܒܶܟ ܠܶܗ ܒܺܐܝܕܶܗ ܕܝܰܡܺܝܢܳܐ ܘܰܡܩܺܝܡ ܠܶܗ܆ ܘܢܳܣܶܒ ܐܽܘܪܳܪܳܐ ܘܰܡܙܰܝܰܚ ܠܥܶܠ ܡܶܢ ܪܺܝܫܶܗ ܕܡܶܬܬܰܣܪܚܳܢܳܐ ܨܠܺܝܒܳܐܺܝܬ ܬܠܳܬ ܙܰܒܢܺܝ̈ܢ ܟܰܕ ܐܳܡܰܪ:

ܠܬܶܫܒܽܘܚܬܳܐ ܘܠܺܐܝܩܳܪܳܐ ܘܗܶܕܪܳܐ ܘܪܽܘܡܪܳܡܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ ܒܽܐܘܣܺܝܰܐ. ܘܰܠܫܰܝܢܳܐ ܘܒܶܢܝܳܢܳܐ ܕܥܺܕܬܳܐ ܩܰܕܺܝܫܬܳܐ ܕܰܐܠܳܗܳܐ܀

ܘܰܡܙܰܝܰܚ ܠܦܺܝܪܡܳܐ ܐܳܦ ܥܰܠ ܐܪ̈ܳܙܶܐ ܘܥܰܠ ܪܺܝܫܶܗ ܘܣܳܐܶܡ ܒܶܗ ܒܶܣ̈ܡܶܐ ܘܝܳܗܶܒ ܠܶܗ ܘܟܳܪܶܟ ܒܡܰܕܒܚܳܐ ܘܥܰܠ ܥܰܡܳܐ ܘܗܽܘ ܟܰܕ ܗܽܘ ܦܶܬܓܳܡܳܐ ܐܳܡܰܪ. ܘܶܐܢ ܣܰܓܺܝ̈ܐܶܐ ܢܶܗܘܽܘܢ܆ ܗܳܟܰܢܳܐ ܡܫܰܡܠܶܝܢ. ܗܳܝܕܶܝܢ ܝܳܗܒܺܝܢ ܠܗܽܘܢ ܫܠܳܡܳܐ ܘܰܡܫܰܘܬܶܦ ܠܗܽܘܢ ܒܐ̱ܪ̈ܳܙܶܐ ܘܳܐܡܪܺܝܢ ܡܰܥܢܺܝܬܳܐ܀

ܒܳܬܰܪ ܡܶܬܬܰܣܪܚܳܢܽܘܬܳܐ܆ ܡܰܣܪܚܳܐ ܚܰܕܬܳܐ ܒܰܠܘܺܝܬܗܽܘܢ ܕܰܒܢܰܝ̈ ܬܶܫܡܶܫܬܶܗ܆ ܠܒܶܝܬ ܐܰܒܳܗ̈ܳܬܳܐ ܐܰܘ ܠܒܶܝܬ ܐܶܦܣܩܽܘܦܺܝܽܘܢ ܟܰܕ ܠܦܺܝܪܡܳܐ ܛܥܺܝܢ ܨܳܐܶܒ܆ ܠܡܰܥܢܳܝܽܘ ܩܕܳܡܰܘܗ̱ܝ ܕܬܰܪܥܳܐ ܬܠܺܝܬܳܐܺܝܬ: ܩܳܠܳܐ ܕܥܰܠ ܗܰܘ ܬܰܪܥܳܐ ܒܰܪܳܝܳܐ܀

ܟܶܢ ܐܳܡܪܺܝܢ ܩܠܺܝܪ̈ܺܝܩܽܘ: ܒܥܰܕܥܺܐܕܶܗ ܕܡܰܠܟܳܐ ܡܫܺܝܚܳܐ ܘܫܪ̄܀ ܘܟܰܕ ܡܶܫܬܰܘܬܰܦ ܪܺܝܫܟܳܗ̈ܢܶܐ ܒܐ̱ܪ̈ܳܙܶܐ ܡܰܚ̈ܝܳܢܶܐ܆ ܡܫܰܘܬܶܦ ܠܰܡܫܰܡܫܳܢܳܐ ܕܶܐܬܬܰܣܪܰܚ ܒܦܰܓܪܳܐ ܘܰܕܡܳܐ. ܘܡܶܬܒܰܪܰܟ ܡܶܢܶܗ ܟܽܠܶܗ ܥܰܡܳܐ ܒܬܰܪܥܳܐ ܕܡܰܕܒܚܳܐ܀ ܟܶܢ ܝܳܗܶܒ ܠܶܗ ܪܺܝܫܟܳܗ̈ܢܶܐ ܠܰܡܫܰܡܫܳܢܳܐ ܚܰܕܬܳܐ܆ ܟܬܺܝܒܬܳܐ ܕܰܣܝܳܡܺܝܕܶܗ܆ ܐܰܝܟܰܢܳܐ ܕܬܶܬܢܛܰܪܝ ܠܘܳܬܶܗ ܐܰܝܟ ܕܰܠܣܳܗܕܽܘܬܳܐ܀

ܫܠܶܡ ܛܶܟܣܳܐ ܕܡܶܬܬܰܣܪܚܳܢܽܘܬܳܐ ܕܰܡܫܰܡ̈ܫܳܢܶܐ