ܫܚܝܡܐ - ܕܢܓܗ ܝܘܡ ܫܒܬܐ
ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ
ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀
ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀
ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀
ܨܠܽܘܬܳܐ ܡܳܪܳܢܳܝܬܳܐ
ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܥܢܝܢܐ ܕܪܡܫܐ ܩܰܕܡܳܝܰܬ ܡܰܙܡܘܪܳܐ:
ܡܪܝܐ ܩܪܝܬܟ 141, 142, 119: 105-112, 117
ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝ̣ܢܝ̱. ܨܽܘ̣ܬ ܡܶܠܰܝ̈ ܘܩܰܒܶܠ܀
ܨܠܽܘܬܝ̱ ܐܰܝܟ ܥܶܛܪܳܐ ܩܕܳܡܰܝܟ. ܩܽܘܪܒܳܢܳܐ ܕܺܐܝ̈ܕܰܝ ܐܰܝܟ ܩܽܘܪܒܳܢܳܐ ܕܪܰܡܫܳܐ. ܐܰܩܺܝܡ ܡܳܪܝܳܐ ܢܳܛܽܘܪܳܐ ܠܦܽܘܡܝ̱ ܘܢܳܛܽܘܪܳܐ ܠܣܶܦܘ̈ܳܬܝ̱ ܕܠܳܐ ܢܶܣܛܶܐ ܠܶܒܝ̱ ܠܡܶܠܬܳܐ ܒܺܝܫܬܳܐ ܘܶܐܥܒܶܕ ܥܒܳܕ̈ܶܐ ܕܥܰܘܠܳܐ܀
ܥܰܡ ܓܰܒܪ̈ܶܐ ܪ̈ܰܫܺܝ̣ܥܶܐ ܠܳܐ ܐܶܬܡܰܠܰܚ ܥܰܡܗܽܘܢ. ܢܰܠܦܰܢܝ̱ ܙܰܕܺܝܩܳܐ ܘܢܰܟܣܰܢܝ̱. ܡܶܫܚܳܐ ܕܪ̈ܰܫܺܝ̣ܥܶܐ ܠܪܺܝܫܝ̱ ܠܳܐ ܢܰܕܗܶܢ ܡܶܛܽܠ ܕܰܨܠܽܘܬܝ̱ ܥܰܠ ܒܺܝܫܽܘܬܗܽܘܢ. ܘܶܐܬܟܠܺܝܘ̱ ܒܺܐܝܕܳܐ ܕܟܺܐܦܳܐ ܕܰܝܳܢܰܝ̈ܗܽܘܢ ܘܰܫܡܰܥ ܡܶܠܰܝ̈ ܕܒܰܣܺܝ̈ܡܳܢ܀
ܐܰܝܟ ܣܶܟܬܳܐ ܕܨܳܪܝܳܐ ܐܰܪܥܳܐ ܐܶܬܒܰܕܰܪܘ̱ ܓܰܪ̈ܡܰܝܗܽܘܢ ܥܰܠ ܦܽܘܡܳܗ̇ ܕܰܫܝܽܘܠ. ܘܶܐܢܳܐ ܠܘܳܬܳܟ ܡܳܪܝܳܐ ܐܰܪܺܝܡܶܬ ܥܰܝ̈ܢܰܝ ܘܰܥܠܰܝܟ ܐܶܬܬܰܟܠܶܬ ܠܳܐ ܬܶܫܕܶܝܗ̇ ܠܢܰܦܫܝ̱܀
ܢܰܛܰܪܰܝܢܝ̱ ܡܶܢ ܐܺܝ̣ܕܳܐ ܕܫܰܒܗܪ̈ܳܢܶܐ ܕܰܛܡܰܪܘ̱ ܠܺܝ̣ ܦܰܚ̈ܶܐ. ܢܶܦܠܽܘܢ ܥܰܘ̈ܳܠܶܐ ܒܰܡܨܺܝ̈ܕܳܬܗܽܘܢ ܥܕܰܡܳܐ ܕܶܐܥܒܰܪ ܐܶܢܳܐ܀
ܒܩܳܠܝ̱ ܠܡܳܪܝܳܐ ܩܪܺܝܬ ܒܩܳܠܝ̱ ܠܡܳܪܝܳܐ ܐܶܬܟܰܫܦܶܬ. ܘܰܐܪܡܺܝܬ ܩܕܳܡܰܘܗ̱ܝ ܬܰܟܫܶܦܬܝ̱ ܘܽܐܘܠܨܳܢܝ̱ ܩܕܳܡܰܘܗ̱ܝ ܚܰܘܺܝܬ. ܟܰܕ ܐܶܬܛܰܪܦܰܬ ܪܽܘܚܝ̱ ܐܰܢ̱ܬ ܝܳܕܰܥ ܐܰܢ̱ܬ ܫܒܺܝ̈ܠܰܝ܀
ܒܽܐܘܪܚܳܐ ܕܗܰܠ̈ܟܳܬܝ̱ ܛܡܰܪܘ̱ ܠܺܝ̣ ܦܰܚ̈ܶܐ. ܚܳܪܶܬ ܠܝܰܡܺܝܢܳܐ ܘܰܚܙܺܝܬ ܘܠܰܝܬ ܕܚܳܟܶܡ ܠܺܝ. ܐܶܒܰܕ ܡܶܢܝ̱ ܒܶܝܬ ܡܰܥܪܩܳܐ ܘܠܰܝܬ ܬܳܒܽܘܥܳܐ ܠܢܰܦܫܝ̱. ܘܰܓܥܺܝܬ ܠܘܳܬܳܟ ܘܶܐܡܪܶܬ ܕܰܐܢ̱ܬ ܗ̱ܽܘ ܣܰܒܪܝ̱ ܘܰܡܢܳܬܝ̱ ܒܰܐܪܥܳܐ ܕܚܰܝ̈ܶܐ܀
ܨܽܘ̣ܬ ܠܒܳܥܽܘܬܝ̱ ܡܶܛܽܠ ܕܶܐܬܡܰܟܟܶܬ ܛܳܒ. ܦܰܨܳܢܝ̱ ܡܶܢ ܪ̈ܳܕܽܘܦܰܝ ܡܶܛܽܠ ܕܰܥܫܶܢܘ̱ ܡܶܢܝ̱. ܐܰܦܶܩ ܢܰܦܫܝ̱ ܡܶܢ ܒܶܝܬ ܚܒܽܘܫܝܳܐ ܕܰܐܘܕܶܐ ܠܰܫܡܳܟ. ܠܺܝ ܢܣܰܟܽܘܢ ܙܰܕܺܝܩܰܝ̈ܟ ܟܰܕ ܬܶܦܪܥܰܢܝ̱܀
ܫܪܳܓܳܐ ܗ̱ܝ ܡܶܠܬܳܟ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ. ܝܺܡܺܝܬ ܘܰܐܫܪܶܬ ܕܶܐܛܰܪ ܕܺܝ̈ܢܶܐ ܕܙܰܕܺܝܩܽܘܬܳܟ. ܐܶܬܡܰܟܟܶܬ ܪܰܘܪܒܳܐܺܝܬ ܡܳܪܝܳܐ ܐܰܚܳܢܝ̱ ܐܰܝܟ ܡܶܠܬܳܟ. ܒܡܶܠܰܘ̈ܗ̱ܝ ܕܦܽܘܡܝ̱ ܨܒܺܝ ܡܳܪܝܳܐ ܘܡܶܢ ܕܺܝܢܰܝ̈ܟ ܐܰܠܶܦܰܝܢܝ̱܀
ܢܰܦܫܝ̱ ܒܺܐܝ̈ܕܰܝܟ ܗܺܝ ܒܟܽܠܙܒܰܢ ܘܢܳܡܽܘܣܳܟ ܠܳܐ ܛܥܺܝܬ. ܣܳܡܘ̱ ܠܺܝ ܚܰܛܳܝ̈ܶܐ ܦܰܚ̈ܶܐ ܘܡܶܢ ܦܽܘܩܕܳܢܰܝ̈ܟ ܠܳܐ ܣܛܺܝܬ. ܝܶܪܬܶܬ ܣܳܗܕܽܘܬܳܟ ܠܥܳܠܰܡ ܡܶܛܽܠ ܕܒܽܘܣܳܡܳܐ ܗ̱ܝ ܕܠܶܒܝ̱. ܐܰܦܢܺܝܬ ܠܶܒܝ̱ ܕܶܐܥܒܶܕ ܦܽܘܩܕܳܢܰܝ̈ܟ ܠܥܳܠܰܡ ܒܰܫܪܳܪܳܐ܀
ܫܰܒܰܚܘ̱ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗ̱ܝ ܟܽܠܗܶܝܢ ܐܶܡܘ̈ܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ܀
ܫܽܘܒܚܳܐ ܘܥܶܩܒܳܐ: H
ܠܟܽܘܢ ܛܘܒܰܝܟܽܘܢ ܥܰܢܝ̈ܕܶܐ. ܒܗܰܘ ܝܰܘܡܳܐ ܕܗܳܘܶܐ ܢܽܘܚܳܡܳܐ. ܕܦܰܓܪܳܐ ܚܰܝܳܐ ܗܰܘ ܕܶܐܟܰܠܬܘܢ. ܕܡܳܐ ܡܚܰܣܝܳܢܳܐ ܗܰܘ ܕܶܐܫܬܺܝܬܽܘܢ. ܡܩܺܝܡ ܠܟܽܘܢ ܒܓܰܒܳܐ ܕܝܰܡܺܝܢܳܐ܀
ܣܶܕܪܳܐ ܓܰܘܳܢܳܝܳܐ:
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀
ܩܠܐ ܩܕܡܝܐ ܒܩ̄: ܥܰܡ ܟܽܠܗܽܘܢ ܩܰܕܺܝ̈ܫܰܝܟ
ܓܘܫܡܐ ܚܡܝܫܝܐ H
ܦܶܬܓܳܡܳܐ: ܒܰܪܶܟܝ ܢܰܦܫܝ ܠܡܳܪܝܳܐ: ܥܰܡ ܕܟܽܠܗܽܘܢ ܩܰܕܺܝ̈ܫܰܝܟ. ܐܰܢܺܝܚ ܡܰܠܟܳܐ ܡܫܺܝܚܳܐ ܠܢܰܦ̈ܫܳܬܳܐ ܕܥܰܒܕܰܝ̈ܟ ܒܰܫܠܳܡܳܐ. ܐܰܝܟܳܐ ܕܠܳܐ ܡܰܡܠܶܟ ܡܰܘܬܳܐ. ܘܠܳܐ ܚܰܫܳܐ ܘܠܳܐ ܟܰܪܝܽܘܬܳܐ. ܐܶܠܳܐ ܚܰܝ̈ܶܐ ܕܰܠܥܳܠܰܡ܀
ܟܽܠܗܽܘܢ ܓܰܪ̈ܡܰܝ ܠܰܫܡܶܗ ܩܰܕܺܝܫܳܐ: ܥܰܠ ܐܰܠܳܗܰܐ ܗ̱ܘ ܬܽܘܟܠܳܢܰܢ. ܓܳܒܽܘܠܶܗ ܕܰܐܒܽܘܢ ܐܳܕܳܡ. ܤܰܒܪܳܐ ܕܚܰܝ̈ܶܐ ܘܰܕܡܺܝ̈ܬܶܐ. ܥܳܠܡܳܐ ܠܳܐ ܡܶܕܶܡ ܐܺܝܬܰܘܗ̱ܝ. ܘܠܳܐ ܢܝܳܚܶܗ ܘܠܳܐ ܫܽܘܠܛܳܢܶܗ ܐܶܠܳܐ ܚܶܠܡܰܐ ܗ̱ܘ ܥܳܒܽܘܪܳܐ܀
ܫܽܘܒܚܳܐ: ܩܪܺܝܬܳܟ ܡܳܪܝܳܐ ܒܟܽܠ ܝܽܘܡ. ܘܦܶܫܛܶܬ ܐܺܝܕܰܝ̈ ܠܘܳܬܳܟ ܕܗܳܐ ܠܡܺܝ̈ܬܶܐ ܥܒܰܕܬ ܬܶܕܡܽܘܪܬܳܐ. ܘܓܰܢ̱ܒܳܪ̈ܶܐ ܢܰܘܕܽܘܢ ܠܳܟ. ܘܢܶܫܬܰܥܽܘܢ ܥܰܠ ܛܰܝܒܽܘܬܳܟ. ܕܰܐܢ̱ܬ ܗ̱ܽܘ ܡܢܰܚܶܡ ܠܥܰܢܺܝ̈ܕܶܐ܀
ܡܶܢ ܥܳܠܰܡ: ܗܳܢܳܐ ܡܰܘܬܳܐ ܚܰܒܺܝ̈ܒܰܝ. ܫܶܢܬܳܐ ܐܺܝܬܰܘܗ̱ܝ ܐܰܝܟ ܕܶܐܡܰܪ ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ. ܢܨܰܠܶܐ ܘܢܶܒܥܶܐ ܡܶܢ ܡܳܪܰܢ. ܕܡܰܘܬܳܐ ܐ̱ܚܪܺܢܳܐ ܠܳܐ ܢܶܛܥܰܡ ܗܰܘ ܕܶܐܬܟܰܢܺܝ ܬܶܢܝܳܢܳܐ܀
ܕܝܳܠܕܰܬ ܐܰܠܳܗܳܐ: ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܩܳܥ̈ܝܳܢ ܟܽܠܗܶܝܢ ܒܶܪ̈ܝܳܬܳܐ. ܫܠܳܡ ܠܶܟܝ ܕܺܝܠܶܕܬܝ ܠܰܢ ܒܰܒܤܰܪ. ܡܶܠܬܳܐ ܡܬܽܘܡܳܝܶܗ ܕܰܐܒܳܐ. ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀
ܕܢܰܚ ܡܶܢܶܟܝ ܡܰܟܺܝܟܳܐܺܝܬ. ܪܳܡܳܐ ܕܰܙܥܰܪ ܕܰܢܪܰܡܪܶܡ ܫܶܦܠܶܗ ܕܳܐܕܳܡ ܥܰܦܪܳܢܳܐ. ܘܝܰܩܰܪ ܘܰܐܘܪܶܒ ܕܽܘܟܪܳܢܶܟܝ. ܗܳܪܟܳܐ ܘܰܠܥܶܠ ܒܰܫܡܰܝܳܐ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀
ܒܤܶܒܠܬܳܐ ܨܳܪܶܟܝ ܝܰܥܩܽܘܒ. ܕܰܚܙܳܗ̇ ܒܒܶܝܬ ܐܺܝܠ ܟܰܕ ܕܰܡܺܝܟ. ܘܰܩܪܳܗ̇ ܕܽܘܟܬܶܗ ܕܰܐܠܳܗܳܐ. ܒܰܫܪܳܪܳܐ ܐܰܢ̱ܬ ܗ̱ܺܝ ܫܟܺܝܢܬܶܗ. ܕܰܡܪܰܝܡܳܐ ܕܒܶܟܝ ܗ̱ܽܘ ܫܪܶܐ ܗ̱ܘܳܐ. ܘܶܐܬܓܰܫܰܡ ܡܶܢ ܕܰܟܝܽܘܬܶܟܝ܀
ܡܽܘܫܶܐ ܒܤܰܢܝܳܐ ܡܰܬܠܶܟܝ ܗ̱ܘܳܐ. ܘܕܰܘܺܝܕ ܐܰܒܽܘܟܝ ܒܩܺܐܒܽܘܬܳܐ ܘܓܶܕܥܽܘܢ ܒܓܶܙܬܳܐ ܨܳܪܶܟܝ ܗ̱ܘܳܐ. ܘܝܰܥܩܽܘܒ ܟܺܐܢܳܐ ܒܤܶܒܠܬܳܐ. ܕܒܳܗ̇ ܓܶܢܤܳܐ ܕܰܒܢܰܝ̈ܢܳܫܳܐ ܐܶܬܥܰܠܺܝ ܠܶܗ ܠܰܫܡܰܝܳܐ܀
ܕܩܰܕܺܝ̈ܫܶܐ: ܐܳܤܰܘ̈ܳܬܳܐ ܫܰܪܺܝܪ̈ܶܐ. ܐܺܝܬܰܝܟܽܘܢ ܐܳܘ ܢܰܨܺܝ̈ܚܶܐ. ܢܒܺܝ̈ܶܐ ܘܰܫܠܺܝ̈ܚܶܐ ܘܤܳܗ̈ܕܶܐ. ܦܬܰܚܘ ܓܰܙܳܐ ܕܰܨܠܰܘ̈ܳܬܟܽܘܢ. ܘܗܰܒܘ ܥܽܘܕܪܳܢܳܐ ܠܰܤܢܺܝ̈ܩܶܐ ܕܫܳܐܠܺܝܢ ܡܶܢܟܽܘܢ ܥܽܘܕܪ̈ܳܢܶܐ܀
ܠܗܰܘ ܒܽܘܤܳܡܳܐ ܕܠܳܐ ܥܳܒܰܪ. ܢܛܺܝܪ ܦܽܘܪܥܳܢܟܽܘܢ ܩܰܕܺܝ̈ܫܶܐ ܒܝܰܘܡܳܐ ܐ̱ܚܪܳܝܳܐ ܕܢܽܘܚܳܡܳܐ. ܘܥܰܡ ܝܶܫܽܘܥ ܕܰܐܘܕܺܝܬܽܘܢ ܒܶܗ. ܡܰܨܡܰܚ ܦܽܘܪܥܳܢ ܥܰܡܠܰܝ̈ܟܽܘܢ. ܒܢܽܘܗܪܳܐ ܓܰܐܝܳܐ ܕܠܳܐ ܡܰܘܦܶܐ܀
ܠܳܐ ܡܰܠ̈ܟܶܐ ܘܠܳܐ ܕܰܝܳܢ̈ܶܐ. ܘܠܳܐ ܫܰܠܺܝ̈ܛܶܐ ܕܰܒܥܳܠܡܳܐ ܩܢܰܘ ܡܶܕܶܡ ܕܰܩܢܰܘ ܤܳܗ̈ܕܶܐ. ܕܶܐܫܰܕܘ ܠܰܕܡܳܐ ܕܨܰܘܪ̈ܰܝܗܽܘܢ. ܘܰܙܒܰܢܘ ܠܗܽܘܢ ܚܰܝ̈ܶܐ ܚܰܕ̈ܬܶܐ ܒܡܰܠܟܽܘܬܳܐ ܫܡܰܝܳܢܺܝܬܳܐ܀
ܒܰܕܡܽܘܬ ܫܽܘܪܳܐ ܠܰܡܕܺܝܢ̱ܬܳܐ. ܤܳܡ ܡܽܘܫܶܐ ܓܰܪ̈ܡܰܘܗ̱ܝ ܕܝܰܘܤܶܦ ܠܡܰܫܪܺܝܬܳܐ ܕܺܝܤܰܪ̈ܠܳܝܶܐ. ܘܓܰܪ̈ܡܰܝܟܽܘܢ ܕܺܝܠܟܽܘܢ ܤܳܗ̈ܕܶܐ. ܥܒܺܝ̈ܕܺܝܢ ܫܽܘܪ̈ܶܐ ܠܢܰܦ̈ܫܳܬܰܢ ܬܚܶܝܬ ܟܶܢܦܰܝ̈ܟܽܘܢ ܢܶܤܬܰܬܰܪ܀
ܕܝܰܘܤܶܦ: ܒܫܶܡ ܐܰܠܳܗܳܐ ܡܰܘܡܶܐ ܗ̱ܘܳܐ. ܝܰܘܤܶܦ ܠܰܐܚܰܘ̈ܗܝ ܟܰܕ ܡܳܐܶܬ ܕܠܳܐ ܬܰܪܦܽܘܢܳܢܝ ܒܰܐܟܤܶܢܝܳܐ. ܐܰܤܶܩ ܓܰܪ̈ܡܰܝ ܡܶܢ ܡܶܨܪܶܝܢ. ܕܥܰܡܟܽܘܢ ܐܺܙܰܠ ܒܰܠܘܺܝܬܳܐ. ܘܗܳܘܶܐ ܡܳܪܝܳܐ ܡܥܰܕܪܳܢܟܽܘܢ܀
ܠܳܐ ܬܶܟܪܶܐ ܠܳܟ ܐܳܚܝ ܝܰܘܤܶܦ ܘܠܳܐ ܢܶܬܩܰܢܰܛ ܪܶܥܝܳܢܳܟ ܕܳܐܙܠ̱ܺܝܢܰܢ ܘܫܳܒܩܺܝܢܳܢ ܠܳܟ. ܕܠܳܐ ܛܰܥܝܳܐ ܠܰܢ ܛܳܒܽܘܬܳܟ. ܕܰܤܥܰܪܬ ܥܰܡܰܢ ܒܓܰܘ ܡܶܨܪܶܝܢ ܕܠܳܐ ܐܶܬܕܟܰܪܬ ܠܰܢ ܤܰܟܠܽܘܬܰܢ܀
ܕܰܬܝܳܒܽܘܬܳܐ: ܚܰܛܳܝܬܳܐ ܕܡܶܫܚܰܬ ܪ̈ܶܓܠܰܝܟ. ܐܳܘ ܝܰܡܳܐ ܕܰܡܠܶܐ ܪ̈ܰܚܡܶܐ ܫܒܰܩܬ ܠܳܗ̇ ܚܰܘܒܶܝ̈ܗ̇ ܘܰܚܛܳܗܶܝ̈ܗ̇. ܘܶܐܢܳܐ ܕܳܘܝܳܐ ܕܰܚܛܺܝܬ ܠܳܟ. ܐܰܝܟ ܗܰܘ ܡܳܟܤܳܐ ܓܳܥܶܐ ܐ̱ܢܳܐ ܚܽܘܢܰܝܢܝ ܘܶܐܬܪܰܚܰܡܥܠܰܝ܀
ܝܶܫܽܘܥ ܡܰܠܟܰܢ ܕܤܰܚܦܶܗ ܗ̱ܘܳܐ. ܠܚܰܝܠܶܗ ܕܒܺܝܫܳܐ ܒܥܶܠܕܰܪܳܐ ܐܰܥܒܰܪ ܡܶܢܰܢ ܢܶܤܝܽܘ̈ܢܶܐ. ܘܚ̈ܰܫܶܐ ܕܫܳܓܫܺܝܢ ܠܳܗ̇ ܠܢܰܦܫܰܢ. ܘܬܶܗܘܶܐ ܨܠܽܘܬܰܢ ܠܰܢܝܳܚܳܟ. ܘܒܳܥܽܘܬܰܢ ܬܶܥܽܘܠܝ ܩܕܳܡܰܝܟ܀
ܕܥܰܢܺܝ̈ܕܶܐ: ܢܶܦܬܰܚ ܩܰܒܪ̈ܶܐ ܘܢܶܬܒܰܩܶܐ. ܒܓܰܢ̱ܒܳܪ̈ܶܐ ܘܰܒܫܰܦܺܝܪ̈ܶܐ ܕܰܐܝܟܰܢܳܐ ܫܪܶܟܘ ܠܰܚܒܳܠܳܐ. ܐܳܘ ܠܩܰܘ̈ܡܳܬܗܽܘܢ ܕܶܐܬܟܰܦܰܦ̈ܝ. ܘܗܳܐ ܥܒܺܝܕܺܝܢ ܤܝܳܢܳܐ ܒܰܫܝܽܘܠ. ܬܶܟܪܶܐ ܠܳܟ ܡܳܪܝ ܥܰܠ ܨܰܠܡܳܟ܀
ܡܶܢ ܐܺܝܠܳܢܳܐ ܕܺܝܕܰܥܬܳܐ. ܦܫܰܛ ܐܳܕܳܡ ܐܺܝܕܶܗ ܘܶܐܟܰܠ ܦܺܐܪܳܐ ܕܰܟܤܶܐ ܒܶܗ ܡܰܘܬܳܐ. ܘܡܳܪܰܢ ܕܰܤܠܶܩ ܠܰܨܠܺܝܒܳܐ. ܛܥܶܡ ܡܰܘܬܳܐ ܡܶܛܽܠܳܬܶܗ. ܦܰܢܝܶܗ ܠܰܥܕܶܝܢ ܝܳܪܬܽܘܬܶܗ܀
ܥܰܠ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ. ܕܩܰܪܶܒܢܰܢ ܠܰܐܠܳܗܽܘܬܳܟ. ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ. ܠܰܐܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ. ܘܰܫܡܳܗܰܝ̈ܗܽܘܢ ܟܬܽܘܒ ܐܶܢܽܘܢ ܒܰܤܦܰܪ ܚܰܝ̈ܶܐ ܒܡܰܠܟܽܘܬܳܟ܀
ܩܠܐ ܕܬܪܝܢ
ܒܩ̄: ܬܪ̈ܰܝܗܽܘܢ ܥܳܠ̈ܡܶܐ
ܓܘܫܡܐ ܩܕܡܝܐ H
ܦܶܬܓܳܡܳܐ: ܐܰܠܳܗܰܢ ܢܪܰܚܶܡ ܥܠܰܝܢ: ܒܪܰܡܫܳܐ ܕܫܰܠܶܡܘ ܒܶܗ ܟܺܐܢ̈ܶܐ. ܥܰܡܠܰܝ̈ܗܽܘܢ ܘܰܫܩܰܠܘ ܐܰܓܪܳܐ. ܫܰܡܠܳܐ ܥܰܡܰܢ ܛܰܝܒܽܘܬܳܟ. ܘܒܰܛܶܠܳܝܗ̱ܝ ܠܒܺܝܫܳܐ ܡܶܢܰܢ܀
ܢܒܰܪܟܰܢ ܘܢܰܢܗܰܪ ܐܰܦܰܘ̈ܗܝ ܒܰܢ: ܒܪܺܝܟ ܪܰܡܫܳܟ ܕܰܡܟܰܢܶܫ ܠܰܢ. ܘܰܨܠܺܝܒܳܟ ܕܰܡܢܰܛܰܪ ܠܰܢ. ܒܪܺܝܟܳܐ ܗ̱ܝ ܝܰܡܺܝܢܳܟ ܡܳܪܰܢ. ܕܰܠܤܳܗ̈ܕܶܐ ܟܠܺܝ̈ܠܶܐ ܓܶܕܠܰܬ܀
ܫܽܘܒܚܳܐ: ܒܬܶܫܡܶܫܬܳܐ ܕܪܰܡܫܳܐ ܚܽܘܢܰܝܢ. ܘܰܒܥܶܕܳܢܳܐ ܕܰܨܠܽܘܬܳܐ. ܘܡܳܐ ܕܬܳܩܶܢ ܟܽܘܪܤܰܝ ܕܺܝܢܳܟ. ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀
ܡܶܢ ܥܳܠܰܡ: ܪܰܡܫܳܐ ܡܳܪܝ ܕܰܡܠܶܐ ܫܰܝܢܳܐ. ܐܳܦ ܠܺܠܝܳܐ ܕܙܰܕܺܝܩܽܘܬܳܐ. ܗܰܒ ܠܰܢ ܡܫܺܝܚܳܐ ܦܳܪܽܘܩܰܢ. ܕܰܐܢ̱ܬ ܗ̱ܽܘ ܡܰܠܟܳܐ ܡܫܰܒܚܳܐ܀
ܕܝܳܠܕܰܬ ܐܰܠܳܗܳܐ: ܩܰܪܶܒܝ ܒܳܥܽܘܬܳܐ ܚܠܳܦܰܝܢ. ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ. ܠܺܝܚܺܝܕܳܐ ܕܰܕܢܰܚ ܡܶܢܶܟܝ. ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܒܬܽܘܠܬܳܐ ܕܰܗܘܳܬ ܪܺܝܫܺܝܬܳܐ. ܘܶܐܬܝܰܒܰܠܘ ܚܰܝ̈ܶܐ ܡܶܢܶܟܝ. ܨܠܽܘܬܶܟܝ ܬܶܗܘܶܐ ܤܶܬܳܪܳܐ. ܠܢܰܦ̈ܫܳܬܳܐ ܕܰܡܦܺܝ̈ܤܳܢ ܠܶܟܝ܀
ܒܬܽܘܠܬܳܐ ܝܳܠܕܰܬ ܐܰܠܳܗܳܐ. ܐܰܦܺܝܤܝ ܥܰܡܰܢ ܠܝܺܚܺܝܕܶܟܝ. ܕܢܰܥܒܰܪ ܘܰܢܒܰܛܶܠ ܡܶܢܰܢ. ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀
ܡܰܪܝܰܡ ܬܶܗܪܳܐ ܡܰܠܝܳܐ ܗ̱ܘܳܬ. ܘܰܒܢܰܦܫܳܗ̇ ܩܰܕܺܝܫܳܐ ܗ̱ܘܳܬ. ܘܰܒܚܽܘܫܳܒܶܝ̈ܗ̇ ܙܰܗܝܳܐ ܗ̱ܘܳܬ. ܕܰܠܓܰܘܙܰܠܬܳܐ ܛܥܺܝܢܳܐ ܗ̱ܘܳܬ܀
ܕܩܰܕܺܝ̈ܫܶܐ: ܢܒܺܝ̈ܶܐ ܕܰܒܪܽܘܚܳܐ ܡܰܠܠܽܘܟ. ܫܠܺܝ̈ܚܶܐ ܕܤܰܒܰܪܘ ܓܶܠܝܳܢܳܟ. ܘܤܳܗ̈ܕܶܐ ܕܡܺܝܬܘ ܡܶܛܽܠ ܚܽܘܒܳܟ. ܢܦܺܝܤܽܘܢܳܟ ܪܰܚܶܡܥܠܰܝܢ܀
ܠܰܢ̈ܒܺܝܶܐ ܫܠܺܝ̈ܚܶܐ ܘܤܳܗ̈ܕܶܐ. ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ. ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀
ܤܳܗ̈ܕܶܐ ܠܢܶܫܪ̈ܶܐ ܕܳܡܶܝܬܽܘܢ. ܘܡܶܢ ܐܳܐܰܪ ܩܰܠܺܝܠܺܝܬܽܘܢ. ܕܩܳܪܶܐ ܒܝܰܡܳܐ ܥܳܢܶܝܬܽܘܢ. ܘܰܒܝܰܒܫܳܐ ܬܽܘܒ ܐܺܝܬܰܝܟܽܘܢ܀
ܘܰܒܓܰܘ ܓܽܘܪ̈ܢܶܐ ܓܰܪ̈ܡܰܝܟܽܘܢ. ܘܰܩܠܺܝ̈ܕܶܐ ܕܪܰܘܡܳܐ ܥܰܡܟܽܘܢ. ܩܰܕܺܝ̈ܫܶܐ ܦܬܰܚܘ ܓܰܙܰܝ̈ܟܽܘܢ. ܘܗܰܒܘ ܥܽܘܕܪ̈ܳܢܶܐ ܠܰܤܢܺܝ̈ܩܶܐ܀
ܕܚܰܕ ܩܢܽܘܡܳܐ: ܕܽܘܟܪܳܢܳܟ ܡܳܪܝ ܝܽܘܚܰܢܳܢ. ܗܳܪܟܳܐ ܘܰܠܥܶܠ ܒܰܫܡܰܝܳܐ. ܘܰܐܝܠܶܝܢ ܕܝܰܩܰܪܘ ܕܽܘܟܪܳܢܳܟ. ܢܶܬܥܰܕܪܽܘܢ ܒܰܨܠܰܘ̈ܬܳܟ܀
ܐܰܬܪܳܐ ܕܤܺܝܡܺܝܢ ܒܶܗ ܓܰܪ̈ܡܰܝܟ. ܢܰܨܺܝܚܳܐ ܡܳܪܝ ܓܰܒܪܺܐܶܝܠ. ܫܰܝܢܶܗ ܕܡܳܪܳܟ ܘܰܫܠܳܡܶܗ. ܢܕܰܝܰܪ ܒܶܗ ܥܕܰܡܳܐ ܠܥܳܠܰܡ܀
ܕܰܬܝܳܒܽܘܬܳܐ: ܒܬܰܪܥܳܐ ܕܺܝܠܳܟ ܚܰܢܳܢܳܐ. ܢܳܩܶܫ ܩܳܠܳܐ ܕܒܳܥܽܘܬܰܢ. ܠܳܐ ܬܶܟܠܶܐ ܡܶܢ ܤܳܓܽܘܕܰܝ̈ܟ. ܫ̈ܶܐܠܳܬܳܐ ܕܤܽܘܢܩܳܢܰܝ̈ܗܽܘܢ܀
ܐܰܠܳܗܳܐ ܠܳܟ ܩܳܪܶܝܢܰܢ. ܠܥܽܘܕܪܳܢܳܐ ܕܰܡܚܺܝܠܽܘܬܰܢ. ܫܡܰܥ ܛܳܒܳܐ ܩܳܠ ܒܳܥܽܘܬܰܢ. ܘܦܰܢܳܐ ܒܪ̈ܰܚܡܰܝܟ ܫܶܐܠܳــ̈ܬܰܢ܀
ܨܠܽܘܬܳܐ ܕܤܶܠܩܰܬ ܡܶܢ ܝܰܡܳܐ. ܘܡܶܢ ܓܽܘܒܳܐ ܘܡܶܢ ܐܰܬܽܘܢܳܐ. ܗܺܝ ܬܶܦܬܰܚܝ ܬܰܪܥܳܐ ܕܪ̈ܰܚܡܶܐ. ܠܰܨܠܽܘܬܰܢ ܘܰܠܒܳܥܽܘܬܰܢ܀
ܚܽܘܣ ܥܠܰܝ ܡܳܪܝ ܚܽܘܣ ܥܠܰܝ. ܒܤܽܘܓܳܐܐ ܕܰܡܪܰܚܡܳܢܽܘܬܳܟ. ܘܒܺܝ̈ܫܳܬܳܐ ܕܰܤܥܺܝܪ̈ܳܢ ܠܺܝ. ܠܳܐ ܬܶܬܕܟܰܪ ܠܺܝ ܡܪܰܚܡܳܢܳܐ܀
ܕܥܰܢܺܝ̈ܕܶܐ: ܥܰܢܺܝ̈ܕܶܐ ܡܳܪܝ ܕܝܰܘܡܳܢܳܐ. ܫܰܡܠܺܝܢܰܢ ܥܽܘܗܕܳܢܰܝ̈ܗܽܘܢ. ܟܬܽܘܒ ܐܶܢܽܘܢ ܠܰܫܡܳܗܰܝ̈ܗܽܘܢ. ܒܰܤܦܰܪ ܚܰܝ̈ܶܐ ܒܡܰܠܟܽܘܬܳܟ܀
ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ. ܝܰܡܺܝܢܳܟ ܬܰܠܒܶܫܝ ܐܶܢܽܘܢ. ܐܶܤܛܰܠ ܫܽܘܒܚܳܐ ܒܡܰܠܟܽܘܬܳܟ܀
ܚܽܘܣ ܡܳܪܝܳܐ ܥܰܠ ܥܰܢܺܝ̈ܕܶܐ. ܕܰܐܝܟ ܙܰܪ̈ܥܶܐ ܒܰܐܪܥܳܐ ܛܡܺܝܪ̈ܺܝܢ. ܕܢܰܚ ܠܗܽܘܢ ܐܰܝܟ ܕܰܡܥܳܕ ܐܰܢ̱ܬ. ܘܒܰܝܰܐ ܐܶܢܽܘܢ ܕܰܡܥܳܩܺܝܢ܀
ܩܽܘܩܠܺܝܳܘܢ ܩܕܡܝܐ H
ܐܰܝܟ ܕܰܡܪܰܚܶܡ ܐܰܒܳܐ ܥܰܠ ܒܢܰܝ̈ܳܐ ܗ̄ܘܗ̄ ܡܪܰܚܶܡ ܡܳܪܝܳܐ ܥܰܠ ܕܳܚ̈ܠܰܘܗ̱ܝ܀
ܡܶܛܽܠ ܕܗܽܘ ܝܳܕܰܥ ܓܒܺܝܠܬܰܢ ܗ̄ܘܗ̄ ܘܶܐܬܕܟܰܪ ܕܥܰܦܪܳܐ ܚܢܰܢ܀
ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘܡܰܘ̈ܗܝ ܗ̄ܘܗ̄ ܘܰܐܝܟ ܥܽܘܦܝܳܐ ܕܚܰܩܠܳܐ ܗܳܟܰܢ ܝܳܥܶܐ܀
ܕܡܳܐ ܕܢܶܫܒܰܬ ܒܶܗ ܪܽܘܚܳܐ ܠܰܝܬܰܘܗ̱ܝ ܗ̄ܘܗ̄ ܘܳܐܦܠܳܐ ܡܶܬܝܰܕܥܳܐ ܕܽܘܟܬܶܗ܀
ܫܽܘܒܚܳܐ H
ܫܽܘܒܚܳܐ ܘܥܶܩܒܳܐ: ܪܰܥܡܶܗ ܕܢܽܘܚܳܡܳܐ. ܢܶܪܥܰܡ ܥܰܠ ܚܶܙܶܝ̈ܗ̇ ܕܰܫܝܽܘܠ. ܘܢܶܫܡܰܥ ܡܰܘܬܳܐ ܘܢܶܬܒܰܠܗܶܐ. ܘܝܽܘ̈ܩܢܶܐ ܕܰܒܠܺܝܘ ܢܶܬܚܰܕܬܽܘܢ. ܚܰܕܶܬ ܡܠܶܐ ܪ̈ܰܚܡܶܐ. ܠܥܰܒܕܰܝ̈ܟ ܕܰܫܟܶܒܘ ܥܰܠ ܤܰܒܪܳܟ܀
ܣܶܕܪܳܐ ܕܥܰܢܺܝ̈ܕܶܐ:
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܚܰܝܳܐ ܕܡܺܝܬ ܒܰܒܣܰܪ. ܘܰܒܡܰܘܬܶܗ ܐܰܚܺܝ ܠܟܽܠܗܽܘܢ ܫܟܺܝ̈ܒܶܐ. ܗܰܘ ܕܰܡܡܺܝܬ ܘܡܰܚܶܐ ܘܡܰܚܶܬ ܠܰܫܝܽܘܠ ܘܡܰܣܶܩ. ܠܗܰܘ ܕܒܺܐܝ̈ܕܰܘܗܝ ܐܶܢܶܝܢ ܢܰܦ̈ܫܳܬܳܐ ܘܪ̈ܽܘܚܳܬܳܐ ܕܟܽܠ ܒܣܰܪ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܡܫܺܝܚܳܐ ܐܰܠܳܗܳܐ ܕܺܝܠܰܢ ܒܫܳܥܬܳܐ ܡܳܪܝ ܕܕܳܢܰܚ ܐܰܢ̱ܬ ܥܰܠ ܥܢܳܢܰܝ̈ ܫܡܰܝܳܐ ܘܫܳܩܠܺܝܢ ܓܰܒܪܺܐܶܝܠ ܘܡܺܝܟܳܐܺܝܠ ܩܰܪ̈ܢܳܬܳܐ ܩܕܳܡܰܝܟ. ܘܦܳܩܥܺܝܢ ܫܽܘ̈ܥܶܐ ܘܡܶܨܛܰܪܺܝܢ ܩܰܒܪ̈ܶܐ ܘܩܳܝܡܺܝܢ ܡܺܝ̈ܬܶܐ ܘܚܳܫܶܟ ܫܶܡܫܳܐ ܘܛܳܫܶܐ ܣܰܗܪܳܐ ܘܥܳܡܛܺܝܢ ܟܰܘܟ̈ܒܶܐ ܘܡܶܬܓܕܶܕ ܢܰܘܠܶܗ ܕܥܳܠܡܳܐ ܘܡܶܬܦܰܣܩܳܐ ܡܶܫܬܺܝܬܳܐ ܕܒܶܪ̈ܝܳܬܳܐ ܘܡܶܬܟܰܪܟܳܐ ܫܡܰܝܳܐ ܐܰܝܟ ܡܓܰܠܬܳܐ. ܘܗܳܘܝܳܐ ܐܰܪܥܳܐ ܬܽܘܗ ܘܒܽܘܗ. ܐܺܝܢ ܡܪܰܚܡܳܢܳܐ ܡܳܪܰܢ ܝܶܫܽܘܥ ܡܫܺܝܚܳܐ ܒܗܰܘ ܥܶܕܳܢܳܐ ܕܚܺܝܠܳܐ ܘܰܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ ܚܽܘܣ ܥܰܠ ܥܰܒ̈ܕܶܐ ܕܺܝܠܳܟ. ܘܠܳܐ ܬܶܥܽܘܠ ܠܕܺܝܢܳܐ ܥܰܡܗܽܘܢ. ܡܶܛܽܠ ܕܛܳܒܳܐ ܐܺܝܬܰܝܟ ܘܪܳܚܶܡ ܐ̱ܢܳܫܳܐ. ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀
ܩܠܐ ܒܩ̄: ܬܪ̈ܰܝܗܽܘܢ ܥܳܠ̈ܡܶܐ H
ܐܰܒܪܳܗܳܡ ܤܳܡ ܠܳܟ ܒܶܣ̈ܡܶܐ. ܘܢܽܘܚ ܩܰܪܶܒ ܠܳܟ ܩܽܘܪ̈ܒܳܢܶܐ. ܘܰܠܥܰܒܕܰܝ̈ܟ ܕܤܳܡܢܰܢ ܒܶܣ̈ܡܶܐ. ܐܰܢܺܝܚ ܐܶܢܽܘܢ ܒܛܰܝܒܽܘܬܳܟ܀
ܐܰܒܪܳܗܳܡ ܘܺܐܝܤܚܳܩ ܘܝܰܥܩܽܘܒ. ܒܰܐܟܤܶܢܝܳܐ ܫܠܶܡܘ ܚܰܝܰܝ̈ܗܽܘܢ. ܘܗܳܐ ܤܺܝܡܺܝܢ ܒܰܐܪܥܳܐ ܕܰܟܢܰܥܰܢ. ܘܰܡܤܰܟܶܝܢ ܠܝܽܘܡ ܓܶܠܝܳܢܳܟ܀
ܫܽܘܒܚܳܐ: ܨܗܶܝܢ ܗ̱ܘܰܘ ܟܺܐܢ̈ܶܐ ܕܢܶܚܙܽܘܢܳܟ. ܘܢܳܡܘ ܘܰܕܡܶܟܘ ܘܰܡܤܰܟܶܝܢ ܠܳܟ. ܘܥܰܠ ܕܠܳܐ ܚܙܰܐܘܽܟ ܒܰܒܪܺܝܬܳܐ. ܠܩܰܒܪܳܐ ܢܚܶܬܬ ܘܰܤܥܰܪܬ ܐܶܢܽܘܢ܀
ܡܶܢ ܥܳܠܰܡ: ܥܰܢܺܝ̈ܕܶܐ ܕܰܒܚܰܝܰܝ̈ܗܽܘܢ. ܙܡܰܪܘ ܫܽܘܒܚܳܐ ܒܠܶܫܳܢܰܝ̈ܗܽܘܢ. ܩܳܠܳܟ ܚܰܝܳܐ ܢܥܺܝܪ ܐܶܢܽܘܢ. ܡܶܢ ܩܰܒܪ̈ܶܐ ܠܓܰܘ ܦܰܪܕܰܝܤܳܐ܀
ܠܥܰܒܕܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ. ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܰܝܟ܀
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ. ܘܡܰܠܒܶܫ ܠܗܽܘܢ ܐܶܤܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀
ܗܳܐ ܤܕܺܝܪ̈ܺܝܢ ܒܳܗ̇ ܒܽܐܘܪܚܶܗ ܕܥܳܠܡܳܐ ܕܳܪ̈ܺܝܢ ܘܳܐܬܶܝܢ: ܚܰܕ ܒܳܬܰܪ ܚܰܕ ܘܰܪ̈ܗܺܝܒܺܝܢ ܒܶܗ ܠܰܡܫܰܢܳܝܽܘ. ܗܳܐ ܡܶܬܝܰܒܠܺܝܢ ܥܰܠ ܡܰܥܒܰܪܬܶܗ ܕܓܺܝܫܪܳܐ ܪܰܒܳܐ: ܘܗܳܢܳܐ ܠܗܳܢܳܐ ܙܳܪܶܒ ܕܢܶܥܒܰܪ ܨܶܝܕ ܫܽܘܠܳܡܳܐ܀
ܗܳܐ ܫܚܺܝܩܺܝܢ ܒܶܗ ܒܥܳܠܡܳܐ ܒܺܝܫܳܐ ܟܽܠ ܥܳܠܽܘ̈ܠܰܘܗ̱ܝ: ܘܟܰܕ ܪܳܚܡܺܝܢ ܠܶܗ ܠܳܐ ܡܶܫܬܰܒܩܺܝܢ ܕܰܢܩܰܘܽܘܢ ܒܶܗ. ܐܰܝܟ ܥܳܡܽܘܪ̈ܶܐ ܘܰܐܝܟ ܝܳܪ̈ܽܘܬܶܐ ܗܳܐ ܠܳܐܝܶܢ ܒܶܗ: ܘܰܐܝܟ ܫܳܪ̈ܽܘܝܶܐ ܘܰܐܝܟ ܚܳܙܽܘ̈ܩܶܐ ܢܳܦܩܺܝܢ ܡܶܢܶܗ܀
ܒܰܙܒܰܢ ܚܰܝ̈ܶܐ ܦܳܩܕܺܝܢ ܐ̱ܢܳܫ̈ܳܐ ܐܰܝܟ ܐܰܠܳܗ̈ܶܐ: ܘܒܰܙܒܰܢ ܩܶܨܳܐ ܡܳܝܬܺܝܢ ܟܽܠܗܽܘܢ ܐܰܝܟ ܚܰܝ̈ܘܳܬܳܐ. ܐܶܬܡܳܠܝ ܡܰܠ̈ܟܶܐ ܓܰܐܝ̈ܳܐ ܘܪ̈ܳܡܶܐ ܘܫܰܠܺܝ̈ܛܳܢܶܐ: ܘܝܰܘܡܳܢ ܡܺܝ̈ܬܶܐ ܡܫܰܦ̈ܠܶܐ ܤܚܺܝ̈ܦܶܐ ܐܳܦ ܕܳܘܰܝ̈ܳܐ܀
ܒܫܽܘܪܳܝ ܙܰܒ̈ܢܶܐ ܫܽܘܒܚܳܐ ܠܰܐܒܳܐ ܕܰܒܪܳܐ ܐܶܢܽܘܢ: ܒܡܶܨܥܰܬ ܙܰܒ̈ܢܶܐ ܤܶܓܕܬܳܐ ܠܰܒܪܳܐ ܕܗܽܘ ܦܪܰܩ ܐܶܢܽܘܢ. ܫܽܘܠܳܡ ܙܰܒ̈ܢܶܐ ܡܳܐ ܕܡܶܫܬܰܪܝܳܐ ܫܡܰܝܳܐ ܘܰܐܪܥܳܐ: ܤܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܀
ܡܫܺܝܚܳܐ ܕܨܰܠܺܝ ܕܢܶܥܒܰܪ ܡܶܢܶܗ ܟܳܣܶܗ ܕܡܰܘܬܳܐ܀
ܐܰܥܒܰܪ ܡܶܢܰܢ ܟܳܤܳܐ ܕܡܰܘܬܳܐ ܗܰܘ ܬܶܢܝܳܢܳܐ܀
ܡܳܪܰܢ ܝܶܫܽܘܥ ܡܫܺܝܚܳܐ
ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀
ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀
ܩܰܕܺܝܫܰܬ ܐܰܠܗܳܐ. ܩܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀
ܫܽܘܒܚܳܐ ܠܳܟ ܐܰܠܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀
ܨܠܽܘܬܳܐ ܡܳܪܳܢܳܝܬܳܐ
ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ
ܩܳܢܽܘܢܳܐ ܕܗܰܝܡܳܢܽܘܬܳܐ
ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.
ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀
ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ
ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀
ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀
ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀
ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܝܳܠܕܰܬ ܐܰܠܳܗܳܐ
ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀
ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀
ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ
ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀
ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀
ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀
ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀
ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ
ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀
ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀
ܫܠܳܡ ܠܶܟܝ
ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀