ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܥܢܝܢܐ ܕܪܡܫܐ ܩܰܕܡܳܝܰܬ ܡܰܙܡܘܪܳܐ:
ܡܪܝܐ ܩܪܝܬܟ 141, 142, 119: 105-112, 117

ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝ̣ܢܝ̱. ܨܽܘ̣ܬ ܡܶܠܰܝ̈ ܘܩܰܒܶܠ܀

ܨܠܽܘܬܝ̱ ܐܰܝܟ ܥܶܛܪܳܐ ܩܕܳܡܰܝܟ. ܩܽܘܪܒܳܢܳܐ ܕܺܐܝ̈ܕܰܝ ܐܰܝܟ ܩܽܘܪܒܳܢܳܐ ܕܪܰܡܫܳܐ. ܐܰܩܺܝܡ ܡܳܪܝܳܐ ܢܳܛܽܘܪܳܐ ܠܦܽܘܡܝ̱ ܘܢܳܛܽܘܪܳܐ ܠܣܶܦܘ̈ܳܬܝ̱ ܕܠܳܐ ܢܶܣܛܶܐ ܠܶܒܝ̱ ܠܡܶܠܬܳܐ ܒܺܝܫܬܳܐ ܘܶܐܥܒܶܕ ܥܒܳܕ̈ܶܐ ܕܥܰܘܠܳܐ܀

ܥܰܡ ܓܰܒܪ̈ܶܐ ܪ̈ܰܫܺܝ̣ܥܶܐ ܠܳܐ ܐܶܬܡܰܠܰܚ ܥܰܡܗܽܘܢ. ܢܰܠܦܰܢܝ̱ ܙܰܕܺܝܩܳܐ ܘܢܰܟܣܰܢܝ̱. ܡܶܫܚܳܐ ܕܪ̈ܰܫܺܝ̣ܥܶܐ ܠܪܺܝܫܝ̱ ܠܳܐ ܢܰܕܗܶܢ ܡܶܛܽܠ ܕܰܨܠܽܘܬܝ̱ ܥܰܠ ܒܺܝܫܽܘܬܗܽܘܢ. ܘܶܐܬܟܠܺܝܘ̱ ܒܺܐܝܕܳܐ ܕܟܺܐܦܳܐ ܕܰܝܳܢܰܝ̈ܗܽܘܢ ܘܰܫܡܰܥ ܡܶܠܰܝ̈ ܕܒܰܣܺܝ̈ܡܳܢ܀

ܐܰܝܟ ܣܶܟܬܳܐ ܕܨܳܪܝܳܐ ܐܰܪܥܳܐ ܐܶܬܒܰܕܰܪܘ̱ ܓܰܪ̈ܡܰܝܗܽܘܢ ܥܰܠ ܦܽܘܡܳܗ̇ ܕܰܫܝܽܘܠ. ܘܶܐܢܳܐ ܠܘܳܬܳܟ ܡܳܪܝܳܐ ܐܰܪܺܝܡܶܬ ܥܰܝ̈ܢܰܝ ܘܰܥܠܰܝܟ ܐܶܬܬܰܟܠܶܬ ܠܳܐ ܬܶܫܕܶܝܗ̇ ܠܢܰܦܫܝ̱܀

ܢܰܛܰܪܰܝܢܝ̱ ܡܶܢ ܐܺܝ̣ܕܳܐ ܕܫܰܒܗܪ̈ܳܢܶܐ ܕܰܛܡܰܪܘ̱ ܠܺܝ̣ ܦܰܚ̈ܶܐ. ܢܶܦܠܽܘܢ ܥܰܘ̈ܳܠܶܐ ܒܰܡܨܺܝ̈ܕܳܬܗܽܘܢ ܥܕܰܡܳܐ ܕܶܐܥܒܰܪ ܐܶܢܳܐ܀

ܒܩܳܠܝ̱ ܠܡܳܪܝܳܐ ܩܪܺܝܬ ܒܩܳܠܝ̱ ܠܡܳܪܝܳܐ ܐܶܬܟܰܫܦܶܬ. ܘܰܐܪܡܺܝܬ ܩܕܳܡܰܘܗ̱ܝ ܬܰܟܫܶܦܬܝ̱ ܘܽܐܘܠܨܳܢܝ̱ ܩܕܳܡܰܘܗ̱ܝ ܚܰܘܺܝܬ. ܟܰܕ ܐܶܬܛܰܪܦܰܬ ܪܽܘܚܝ̱ ܐܰܢ̱ܬ ܝܳܕܰܥ ܐܰܢ̱ܬ ܫܒܺܝ̈ܠܰܝ܀

ܒܽܐܘܪܚܳܐ ܕܗܰܠ̈ܟܳܬܝ̱ ܛܡܰܪܘ̱ ܠܺܝ̣ ܦܰܚ̈ܶܐ. ܚܳܪܶܬ ܠܝܰܡܺܝܢܳܐ ܘܰܚܙܺܝܬ ܘܠܰܝܬ ܕܚܳܟܶܡ ܠܺܝ. ܐܶܒܰܕ ܡܶܢܝ̱ ܒܶܝܬ ܡܰܥܪܩܳܐ ܘܠܰܝܬ ܬܳܒܽܘܥܳܐ ܠܢܰܦܫܝ̱. ܘܰܓܥܺܝܬ ܠܘܳܬܳܟ ܘܶܐܡܪܶܬ ܕܰܐܢ̱ܬ ܗ̱ܽܘ ܣܰܒܪܝ̱ ܘܰܡܢܳܬܝ̱ ܒܰܐܪܥܳܐ ܕܚܰܝ̈ܶܐ܀

ܨܽܘ̣ܬ ܠܒܳܥܽܘܬܝ̱ ܡܶܛܽܠ ܕܶܐܬܡܰܟܟܶܬ ܛܳܒ. ܦܰܨܳܢܝ̱ ܡܶܢ ܪ̈ܳܕܽܘܦܰܝ ܡܶܛܽܠ ܕܰܥܫܶܢܘ̱ ܡܶܢܝ̱. ܐܰܦܶܩ ܢܰܦܫܝ̱ ܡܶܢ ܒܶܝܬ ܚܒܽܘܫܝܳܐ ܕܰܐܘܕܶܐ ܠܰܫܡܳܟ. ܠܺܝ ܢܣܰܟܽܘܢ ܙܰܕܺܝܩܰܝ̈ܟ ܟܰܕ ܬܶܦܪܥܰܢܝ̱܀

ܫܪܳܓܳܐ ܗ̱ܝ ܡܶܠܬܳܟ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ. ܝܺܡܺܝܬ ܘܰܐܫܪܶܬ ܕܶܐܛܰܪ ܕܺܝ̈ܢܶܐ ܕܙܰܕܺܝܩܽܘܬܳܟ. ܐܶܬܡܰܟܟܶܬ ܪܰܘܪܒܳܐܺܝܬ ܡܳܪܝܳܐ ܐܰܚܳܢܝ̱ ܐܰܝܟ ܡܶܠܬܳܟ. ܒܡܶܠܰܘ̈ܗ̱ܝ ܕܦܽܘܡܝ̱ ܨܒܺܝ ܡܳܪܝܳܐ ܘܡܶܢ ܕܺܝܢܰܝ̈ܟ ܐܰܠܶܦܰܝܢܝ̱܀

ܢܰܦܫܝ̱ ܒܺܐܝ̈ܕܰܝܟ ܗܺܝ ܒܟܽܠܙܒܰܢ ܘܢܳܡܽܘܣܳܟ ܠܳܐ ܛܥܺܝܬ. ܣܳܡܘ̱ ܠܺܝ ܚܰܛܳܝ̈ܶܐ ܦܰܚ̈ܶܐ ܘܡܶܢ ܦܽܘܩܕܳܢܰܝ̈ܟ ܠܳܐ ܣܛܺܝܬ. ܝܶܪܬܶܬ ܣܳܗܕܽܘܬܳܟ ܠܥܳܠܰܡ ܡܶܛܽܠ ܕܒܽܘܣܳܡܳܐ ܗ̱ܝ ܕܠܶܒܝ̱. ܐܰܦܢܺܝܬ ܠܶܒܝ̱ ܕܶܐܥܒܶܕ ܦܽܘܩܕܳܢܰܝ̈ܟ ܠܥܳܠܰܡ ܒܰܫܪܳܪܳܐ܀

ܫܰܒܰܚܘ̱ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗ̱ܝ ܟܽܠܗܶܝܢ ܐܶܡܘ̈ܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ܀

ܫܽܘܒܚܳܐ ܘܥܶܩܒܳܐ: H

ܠܶܟܝ ܢܶܬܟܰܫܰܦ ܕܥܰܡܰܢ ܘܰܚܠܳܦܰܝܢ ܬܶܗܘܶܝܢ ܡܦܺܝܤܳܢܺܝܬܳܐ. ܠܰܡܠܶܟ ܡܰܠ̈ܟܶܐ. ܕܢܰܫܪܶܐ ܫܰܝܢܶܗ ܘܰܫܠܳܡܶܗ ܒܥܳܠܡܳܐ ܟܽܠܶܗ. ܘܢܰܥܒܰܪ ܫܰܒ̈ܛܶܐ ܕܪܽܘܓܙܳܐ. ܡܶܢ ܟܽܠܳܗ̇ ܥܳܡܰܪܬܳܐ ܒܰܡܪܰܚܡܳܢܽܘܬܶܗ܀

ܣܶܕܪܳܐ ܓܰܘܳܢܳܝܳܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ ܩܕܡܝܐ ܒܩ̄: ܥܰܠ ܥܶܛܪܳܐ ܕܒܶܣ̈ܡܶܐ:
ܓܘܫܡܐ ܫܒܝܥܝܐ H

ܦܶܬܓܳܡܳܐ: ܫܰܒܰܚܘ ܙܰܕܺܝ̈ܩܶܐ ܠܡܳܪܝܳܐ: ܥܰܠ ܥܶܛܪܳܐ ܕܒܶܣ̈ܡܶܐ. ܢܶܗܘܶܐ ܕܽܘܟܪܳܢܳܐ. ܠܰܒܬܽܘܠܬܳܐ ܡܰܪܝܰܡ ܝܳܠܕܰܬ ܐܰܠܳܗܳܐ܀

ܫܰܒܚܳܝ̈ܗ̱ܝ ܟܽܠܗܶܝܢ ܐܶܡ̈ܘܳܬܳܐ: ܥܰܠ ܥܶܛܪܳܐ ܕܒܶܣ̈ܡܶܐ. ܢܶܗܘܶܐ ܕܽܘܟܪܳܢܳܐ. ܠܰܢܒܺܝ̈ܶܐ ܫܠܺܝ̈ܚܶܐ. ܘܤܳܗ̈ܕܶܐ ܩܰܕܺܝ̈ܫܶܐ܀

ܫܽܘܒܚܳܐ: ܥܰܠ ܥܶܛܪܳܐ ܕܒܶܣ̈ܡܶܐ. ܢܶܗܘܶܐ ܕܽܘܟܪܳܢܳܐ. ܠܡܰܠ̈ܦܳܢܶܐ ܘܟܳܗ̈ܢܶܐ. ܘܟܺܐܢ̈ܶܐ ܘܙܰܕܺܝ̈ܩܶܐ܀

ܡܶܢ ܥܳܠܰܡ: ܥܰܠ ܥܶܛܪܳܐ ܕܒܶܣ̈ܡܶܐ ܢܶܗܘܶܐ ܕܽܘܟܪܳܢܳܐ. ܠܥܺܕܬܳܐ ܩܰܕܺܝܫܬܳܐ. ܘܰܠܟܽܠܗܽܘܢ ܝܰܠܕܶܝ̈ܗ̇܀

ܕܝܳܠܕܰܬ ܐܰܠܳܗܳܐ: ܕܽܘܟܪܳܢܳܗ̇ ܕܡܰܪܝܰܡ. ܢܶܗܘܶܐ ܠܒܽܘܪ̈ܟܳܬܰܢ. ܘܰܨܠܽܘܬܳܗ̇ ܬܶܗܘܶܐ. ܫܽܘܪܳܐ ܠܢܰܦ̈ܫܳܬܰܢ܀

ܪܺܝܚܳܐ ܒܰܤܺܝܡܳܐ. ܗܳܐ ܦܳܐܰܚ ܒܳܐܰܐܪ. ܠܰܒܬܽܘܠܬܳܐ ܡܰܪܝܰܡ. ܝܳܠܕܰܬ ܐܰܠܳܗܳܐ܀

ܛܽܘܒܰܝܟܝ ܫܽܘܒܗܳܪܰܢ. ܛܽܘܒܰܝܟܝ ܒܶܝܬܓܰܘܤܰܢ. ܛܽܘܒܰܝܟܝ ܕܰܗܘܰܝܬܝ ܠܶܗ. ܐܶܡܳܐ ܠܰܐܠܳܗܳܐ܀

ܗܺܝ ܡܰܪܝܰܡ ܐܶܡܪܰܬ ܕܠܰܘ ܐܶܢܳܐ ܛܥܶܢܬܶܗ. ܗܽܘܝܽܘ ܕܰܛܥܺܝܢ ܠܺܝ. ܘܰܡܕܰܒܰܪ ܤܰܘ̈ܦܶܐ܀

ܕܩܰܕܺܝ̈ܫܶܐ: ܛܽܘܒܳܐ ܠܰܢܒܺܝ̈ܶܐ. ܛܽܘܒܳܐ ܠܰܫܠܺܝ̈ܚܶܐ. ܘܛܽܘܒܰܝܗܽܘܢ ܠܤܳܗ̈ܕܶܐ. ܒܝܰܘܡܶܗ ܕܢܽܘܚܳܡܳܐ܀

ܒܗܳܝ ܓܰܢܬܳܐ ܕܰܥܕܶܝܢ. ܙܳܡܪܺܝܢ ܩܰܕܺܝ̈ܫܶܐ. ܛܽܘܒܳܐ ܠܗܳܝ ܐܶܕܢܳܐ ܕܨܳܝܬܳܐ ܠܩܳܠܰܝ̈ܗܽܘܢ܀

ܡܶܢ ܤܳܗ̈ܕܶܐ ܢܶܒܥܶܐ. ܘܰܠܗܽܘܢ ܢܶܬܟܰܫܰܦ. ܕܗܶܢܽܘܢ ܢܶܗܘܽܘܢ ܠܳܟ. ܡܦܺܝ̈ܤܳܢܶܐ ܚܠܳܦܰܝܢ܀

ܩܳܠ ܣܳܗ̈ܕܶܐ ܫܶܡܥܶܬ. ܚܕܳܪ̈ܰܝ ܦܰܪܕܰܝܣܳܐ. ܟܰܕ ܙܳܡܪܺܝܢ ܫܽܘܒܚܳܐ. ܒܟܶܢܳܪ̈ܰܝ ܕܰܘܺܝܕ܀

ܕܰܬܝܳܒܽܘܬܳܐ: ܐܶܬܪܰܚܰܡܥܠܰܝܢ. ܕܰܝܳܢܳܐ ܟܺܐܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ. ܒܤܽܘܓܳܐܐ ܕܛܰܝܒܽܘܬܳܟ܀

ܕܰܝܳܢܳܐ ܟܺܐܢܳܐ. ܕܕܳܐܶܢ ܟܺܐܢܳܐܺܝܬ. ܠܕܺܝܢܳܐ ܠܳܐ ܬܰܥܠܰܢ. ܘܚܰܘܒܰܝ̈ܢ ܠܳܐ ܬܶܬܕܟܰܪ܀

ܬܳܐ ܡܳܪܝ ܠܺܐܝܳܠܰܢ. ܘܚܰܝܶܠ ܡܚܺܝܠܽܘܬܰܢ. ܕܰܥܠܰܝܟ ܗ̱ܽܘ ܤܰܒܪܰܢ. ܒܠܺܠܝܳܐ ܘܒܺܐܝܡܳܡܳܐ܀

ܫܶܡܥܽܘܢ ܕܰܟܦܰܪ ܒܳܟ. ܚܰܣܺܝܬ ܠܶܗ ܚܰܘ̈ܒܰܘܗܝ . ܘܶܐܢܳܐ ܕܛܶܦܣܶܬ ܒܳܟ. ܐܶܬܪܰܚܡܥܠܰܝ܀

ܕܥܰܢܺܝ̈ܕܶܐ: ܒܽܐܘܪܺܫܠܶܡ ܕܰܠܥܶܠ. ܩܕܳܡ ܒܺܐܡ ܕܰܡܫܺܝܚܳܐ. ܢܶܗܘܶܐ ܕܽܘܟܪܳܢܳܐ. ܠܥܰܢܺܝ̈ܕܶܐ ܡܗܰܝ̈ܡܢܶܐ܀

ܩܠܐ ܕܬܪܝܢ
ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܓܘܫܡܐ ܫܒܝܥܝܐ H

ܦܶܬܓܳܡܳܐ: ܒܰܫܡܰܝܳܐ ܘܒܰܐܪܥܳܐ ܘܒܰܥܕܶܝܢ ܗ̄: ܕܽܘܟܪܳܢܳܐ ܛܳܒܳܐ ܢܶܗܘܶܐ ܒܰܐܪܒܰܥ ܦܶܢ̈ܝܳܢ. ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܠܰܒܬܽܘܠܬܳܐ ܡܰܪܝܰܡ. ܕܕܰܟܝܳܐ ܗ̱ܘܳܬ ܘܩܰܕܺܝܫܳܐ ܗ̱ܘܳܬ ܒܰܒܬܽܘܠܽܘܬܳܗ̇. ܘܫܶܦܪܰܬ ܠܶܗ ܠܰܡܠܶܟ ܡܰܠ̈ܟܶܐ ܘܰܢܚܶܬ ܫܪܳܐ ܒܥܽܘܒܳܗ̇. ܕܽܘܟܪܳܢܳܗ̇ ܒܰܫܡܰܝܳܐ ܘܒܰܐܪܥܳܐ. ܘܰܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ. ܥܒܶܕ ܠܰܢ ܡܳܪܝ ܫܰܘܬܳܦܽܘܬܳܐ ܒܕܽܘܟܪܳܢ ܝܳܠܶܕܬܳܟ܀

ܘܡܰܠܟܬܳܐ ܡܶܢ ܝܰܡܺܝܢܳܟ ܗ̄: ܐܰܝܟܰܢܳܐ ܐܶܩܪܶܝܟܝ ܡܰܪܝܰܡ ܛܽܘܒܳܢܺܝܬܳܐ. ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܥܢܳܢܳܐ ܡܓܰܫܰܡܬܳܐ. ܫܡܰܝܳܐ ܕܰܐܙܠܶܓ ܒܳܗ̇ ܫܶܡܫܳܐ ܕܙܰܕܺܝܩܽܘܬܳܐ. ܘܫܽܘܫܶܦܳܐ ܕܰܐܠܳܗܽܘܬܳܐ ܕܡܽܘܫܶܐ ܪܫܰܡ ܐ̱ܪ̈ܳܙܰܝܟܝ. ܡܰܪܟܰܒܬܳܐ ܕܒܶܤܪܳܐ ܕܰܛܥܶܢܬܺܝܘܗ̱ܝ. ܠܗܰܘ ܕܰܛܥܺܝܢ ܠܰܐܪܥܳܐ ܘܠܰܫܡܰܝܳܐ. ܥܠܰܝܡܬܳܐ ܕܰܗܘܳܬ ܠܶܗ ܐܶܡܳܐ ܠܡܳܪܰܢ ܒܨܶܒܝܳܢܶܗ܀

ܫܽܘܒܚܳܐ: ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ ܕܰܨܒܳܐ ܘܰܕܢܰܚ. ܡܶܢ ܥܽܘܒܳܗ̇ ܕܰܡܒܰܪܰܟܬܳܐ ܒܬܽܘܠܬܳܐ ܩܰܕܺܝܫܬܳܐ. ܡܶܢ ܐܶܕܢܳܐ ܩܰܒܶܠܬܶܗ ܒܟܰܪܤܳܐ ܛܥܶܢܬܶܗ. ܢܦܰܩ ܡܶܢ ܡܰܪܒܥܳܐ ܘܰܚܬܺܝܡܳܐ ܘܰܐܒܗܶܬ ܠܟܳܦܽܘܪ̈ܶܐ. ܫܽܘܒܚܳܐ ܠܶܗ ܕܰܟܡܳܐ ܐܶܬܡܰܟܰܟ. ܫܽܘܒܚܳܐ ܠܶܗ ܕܰܗܘܳܐ ܒܰܪܢܳܫܳܐ. ܫܽܘܒܚܳܐ ܠܶܗ ܕܰܦܪܰܩ ܥܺܕܬܶܗ ܘܗܳܐ ܙܳܡܪܳܐ ܫܽܘܒܚܳܐ܀

ܡܶܢ ܥܳܠܰܡ: ܠܩܺܐܒܽܘܬܳܐ ܕܕܺܝܰܬܺܩܺܝ ܕܳܡܝܰܬܝ ܡܰܪܝܰܡ. ܕܺܐܝܬ ܗ̱ܘܳܐ ܒܳܗ̇ ܩܶܤܛܳܐ ܕܡܰܢܢܳܐ ܘܠܽܘ̈ܚܶܐ ܕܢܳܡܽܘܤܳܐ. ܘܺܐܝܬ ܗ̱ܘܳܐ ܒܳܗ̇ ܫܰܒܛܶܗ ܕܰܐܗܪܽܘܢ ܟܳܗܢܳܐ ܙܰܗܝܳܐ. ܕܰܒܐ̱ܪܳܙܳܐ ܐܶܬܪܰܓܺܝ ܗ̱ܘܳܐ ܘܛܰܪ̈ܦܶܐ ܛܥܶܢ ܚܰܕ̈ܬܶܐ. ܒܪܶܟܝ ܕܺܝܠܶܟܝ ܐܺܝܬܰܘܗ̱ܝ ܗܰܘ ܠܰܚܡܳܐ. ܫܡܰܝܳܢܳܐ ܕܰܢܚܶܬ ܡܶܢ ܪܰܘܡܳܐ. ܦܺܐܪܳܐ ܕܰܐܟܠܽܘܗ̱ܝ ܡܳܝܽܘ̈ܬܶܐ. ܘܚܰܝ̈ܶܐ ܩܢܰܘ ܡܶܢܶܗ܀

ܕܩܰܕܺܝ̈ܫܶܐ: ܫܠܺܝ̈ܚܶܐ ܦܝܳܤܳܐ ܩܰܪܶܒܘ ܠܗܰܘ ܕܰܓܒܳܟܽܘܢ. ܕܢܶܫܠܽܘܢ ܤܶܕ̈ܩܶܐ ܘܚܶܪ̈ܝܳܢܶܐ. ܡܶܢ ܥܺܕܬܳܐ ܘܝܰܠܕܶܝ̈ܗ̇. ܕܗܳܐ ܟܪܺܝܟܺܝܢ ܠܳܗ̇ ܕܳܪ̈ܽܘܫܶܐ ܡܶܢ ܟܽܠ ܓܰܒܺܝ̈ܢ. ܕܰܢܚܰܦܽܘܢ ܠܗܰܝܡܳܢܽܘܬܳܐ ܗܳܝ ܕܰܐܟܪܶܙܬܽܘܢ ܒܳܗ̇. ܫܪܳܪܳܟ ܡܳܪܝ ܟܽܘܪܳܐ ܢܶܗܘܶܐ ܠܳܗ̇. ܘܢܶܬܒܰܚܪ̈ܳܢ ܡܶܠܶܝ̈ܗ̇ ܐܰܝܟ ܕܰܗܒܳܐ. ܘܢܶܩܥܽܘܢ ܟܳܗ̈ܢܶܐ ܒܙܰܗܝܽܘܬܳܐ. ܒܪܺܝܟ ܕܰܐܘܪܒܳܗ̇ ܠܥܺܕܬܶܗ܀

ܒܰܨܠܰܘ̈ܳܬܗܽܘܢ ܕܰܫܠܺܝ̈ܚܶܐ ܬܪܶܥܤܰܪ ܕܰܓܒܰܝܬ. ܠܰܬܪܶܥܤܰܪ ܝܰܪ̈ܚܶܐ ܕܫܰܢ̱ܬܳܐ ܒܰܪܶܟ ܒܛܰܝܒܽܘܬܳܟ. ܢܺܐܬܶܐ ܩܰܝܛܳܐ ܒܰܥܝܳܕܶܗ ܘܤܰܬܘܳܐ ܒܙܰܒܢܶܗ. ܘܡܳܪܝܳܐ ܢܶܬܶܠ ܛܳܒ̈ܳܬܶܗ ܘܰܐܪܥܳܐ ܥܰܠ̈ܠܳܬܳܗ̇. ܐܰܚܶܬ ܡܳܪܝ ܡܶܛܪ̈ܶܐ ܕܒܽܘܪ̈ܟܳܬܳܐ. ܘܰܪ̈ܤܺܝܤܶܐ ܕܢܶܬܪܰܒܽܘܢ ܦܺܐܪ̈ܶܐ. ܘܢܶܐܟܠܽܘܢ ܒܳܝ̈ܫܶܐ ܘܡܶܤ̈ܟܺܢܶܐ. ܘܰܢܫܰܒܚܽܘܢ ܠܰܫܡܳܟ܀

ܒܩܶܛܠܶܗ ܕܶܐܤܛܶܦܰܢܳܘܣ ܡܶܬܒܰܩܶܐ ܗ̱ܘܺܝܬ. ܘܰܐܚܕܰܢܝ ܬܶܗܪܳܐ ܘܕܽܘܡܳܪܳܐ ܕܰܟܡܳܐ ܡܤܰܝܒܰܪ ܗ̱ܘܳܐ. ܒܟܺܐܦ̈ܶܐ ܪܳܓܡܺܝܢ ܗ̱ܘܰܘ ܠܶܗ. ܘܗܽܘ ܡܨܰܠܶܐ ܗ̱ܘܳܐ. ܕܡܳܪܰܢ ܝܶܫܽܘܥ ܫܒܽܘܩ ܠܗܽܘܢ. ܡܶܛܽܠ ܕܠܳܐ ܝܳܕܥܺܝܢ. ܐܳܘ ܠܥܰܒܕܳܐ ܕܰܠܡܳܪܶܗ ܕܳܡܶܐ. ܕܟܰܕ ܡܳܐܶܬ ܥܠܰܝܗܽܘܢ ܡܨܰܠܶܐ ܗ̱ܘܳܐ. ܫܰܘܬܶܦ ܠܰܢ ܒܰܨܠܰܘ̈ܳܬܶܗ ܝܶܫܽܘܥ ܡܠܶܐ ܪ̈ܰܚܡܶܐ܀

ܠܗܰܘ ܕܰܐܪܟܶܢ ܪܺܝܫܶܗ ܒܩܰܝܤܳܐ ܚܙܰܝܬܽܘܢ ܤܳܗ̈ܕܶܐ. ܟܰܕ ܝܳܬܶܒ ܡܶܢ ܝܰܡܺܝܢܳܐ ܘܓܳܕܶܠ ܟܠܺܝܠܰܝ̈ܟܽܘܢ. ܡܶܛܽܠ ܗܳܕܶܐ ܐܰܡܤܰܪܬܽܘܢ ܥܰܠ ܟܽܠ ܫܶܢܕܺܝ̈ܢ. ܘܚܰܠܶܠܬܽܘܢ ܗܰܕܳܡܰܝ̈ܟܽܘܢ. ܒܰܕܡܳܐ ܕܨܰܘܪ̈ܰܝܟܽܘܢ. ܠܟܽܘܢ ܛܽܘܒܳܐ ܕܕܳܫܬܽܘܢ ܠܟܽܠ ܚܰܫܺܝ̈ܢ. ܘܰܪܚܶܡܬܽܘܢ ܠܚܽܘܒܶܗ ܕܰܡܫܺܝܚܳܐ. ܘܗܳܐ ܢܳܨܚܺܝܢ ܕܽܘܟܪ̈ܳܢܰܝܟܽܘܢ ܒܰܫܡܰܝܳܐ ܘܒܰܐܪܥܳܐ܀

ܕܚܰܕ ܩܢܽܘܡܳܐ: ܐܳܤܝܳܐ ܐܰܢ̱ܬ ܚܰܟܺܝܡܳܐ ܐܳܘ ܡܳܪܝ ܐܰܘܓܺܝܢ. ܕܡܳܪܳܟ ܝܰܗ̱ܒ ܠܳܟ ܫܽܘܠܛܳܢܳܐ ܕܬܰܐܤܶܐ ܡܡܰܚܰܝ̈ܳܐ. ܗܳܐ ܟܶܢܫܰܢ ܡܶܬܓܰܘܰܣ ܒܤܺܝܡܰܬ ܓܰܪ̈ܡܰܝܟ. ܒܰܨܠܰܘ̈ܳܬܳܟ ܢܶܬܦܰܢ̈ܝܳܢ ܟܽܠܗܶܝܢ ܫ̈ܶܐܠܳܬܰܢ. ܚܽܘܠܡܳܢܳܐ ܠܰܐܝܠܶܝܢ ܕܰܟܪ̈ܺܝܗܺܝܢ. ܘܰܢܦܺܐܫܳܐ ܠܰܐܝܠܶܝܢ ܕܰܐܠܺܝ̈ܨܺܝܢ. ܘܦܽܘܢܳܝܳܐ ܠܰܕܪ̈ܰܚܺܝܩܺܝܢ. ܘܠܰܢ ܫܽܘܒܩܳܢ ܚܰܘ̈ܒܶܐ܀

ܐܰܝܟ ܬܰܓܳܪܳܐ ܟܰܫܺܝܪܳܐ ܕܓܳܒܶܐ ܘܫܳܩܶܠ. ܡܰܪ̈ܓܳܢܝܳܬܳܐ ܛܳܒ̈ܳܬܳܐ ܕܚܳܫ̈ܚܳܢ ܠܬܶܐܓܽܘܪܬܶܗ. ܡܳܪܝ ܐܰܦܪܶܝܡ ܢܰܨܺܝܚܳܐ ܓܒܳܐ ܘܰܫܩܰܠ ܠܶܗ. ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܕܰܢܢܺܝܚ ܠܰܐܠܳܗܳܐ. ܘܗܽܘ ܡܳܪܶܗ ܕܰܚܙܳܐ ܕܽܘܒܳܪ̈ܰܘܗ̱ܝ. ܫܰܟܶܢ ܠܶܗ ܚܰܝ̈ܠܶܐ ܘܳܐܣ̈ܘܳܬܳܐ. ܕܢܰܐܤܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܕܓܶܢܤܳܐ ܕܒܶܝܬ ܐܳܕܳܡ܀

ܕܰܬܝܳܒܽܘܬܳܐ: ܠܳܟ ܡܳܪܝܳܐ ܩܳܪܶܝܢܰܢ ܬܳܐ ܠܥܽܘܕܪܳܢܰܢ. ܕܗܳܐ ܒܺܝܫܳܐ ܒܰܨܢܺܝܥܽܘܬܶܗ ܫܰܓܫܳܗ̇ ܠܰܒܪܺܝܬܳܐ. ܐܰܪܡܺܝ ܚܰܪܒܳܐ ܒܶܝܬ ܡܰܠ̈ܟܶܐ ܫܓܰܫ ܕܰܝܳܢ̈ܶܐ. ܘܶܐܢ ܡܰܨܝܳܐ ܐܳܦ ܠܰܓܒܰܝ̈ܳܐ ܡܰܛܥܶܐ ܐܰܝܟ ܕܰܟܬܺܝܒ. ܡܶܟܺܝܠ ܡܳܪܝ ܒܡܰܢܽܘ ܢܶܬܓܰܘܰܣ. ܐܶܠܳܐ ܐܶܢ ܒܰܡܪܰܚܡܳܢܽܘܬܳܟ. ܒܰܛܶܠܳܝܗ̱ܝ ܠܒܺܝܫܳܐ ܡܶܢܰܢ ܒܢܺܝܫܳܐ ܕܰܨܠܺܝܒܳܟ܀

ܠܰܝܬ ܒܶܗ ܡܰܤܰܒ ܒܰܐܦ̈ܶܐ ܒܕܺܝܢܳܟ ܡܳܪܰܢ. ܡܶܛܽܠ ܗܳܕܶܐ ܟܰܪܝܳܐ ܠܺܝ ܕܺܐܝܬܰܝ ܚܰܝܳܒܳܐ. ܒܥܶܕܳܢܳܐ ܕܡܶܬܦܰܬܚܺܝܢ ܤܶܦܪ̈ܶܐ ܕܚܺܝ̈ܠܶܐ. ܘܩܳܪܝܳܐ ܠܚܰܘ̈ܒܰܝ ܟܺܐܢܽܘܬܳܟ ܬܶܚܢܰܢܝ ܛܰܝܒܽܘܬܳܟ. ܛܰܝܒܽܘܬܳܟ ܬܰܦܺܝܤܝ ܠܟܺܐܢܽܘܬܳܟ. ܘܚܰܝܳܒܽܘܬܝ ܬܶܤܰܒܝ ܫܽܘܒܩܳܢܳܐ. ܕܰܚܛܺܝܬ ܡܳܪܝ ܠܳܐ ܟܳܦܰܪ ܐ̱ܢܳܐ ܚܽܘܣ ܘܶܐܬܪܰܚܡܥܰܠܝ܀

ܕܰܝܳܢܳܐ ܕܕܰܝܳܢ̈ܶܐ ܠܳܐ ܬܰܪܟܶܢ ܪܺܝܫܝ. ܒܶܝܬ ܕܺܝܢܳܐ ܡܶܛܽܠ ܚܰܘ̈ܒܰܝ ܕܰܚܛܺܝܬ ܘܰܐܪܓܶܙܬܳܟ. ܘܶܐܢܗܽܘ ܕܰܠܫܽܘܒܩܳܢܳܐ ܠܳܐ ܫܳܘܶܐ ܐ̱ܢܳܐ. ܚܽܘܣ ܥܠܰܝ ܡܶܛܽܠ ܦܰܓܪܳܟ ܘܰܕܡܳܟ ܕܰܛܡܺܝܪ ܒܺܝ. ܠܳܟ ܪܶܚܡܶܬ ܘܠܰܨܠܺܝܒܳܟ ܤܶܓܕܶܬ. ܘܰܒܦܰܓܪܳܟ ܘܒܰܕܡܳܟ ܐܶܬܚܰܤܺܝܬ. ܒܗܽܘܢ ܐܶܬܪܰܥܳܐ ܘܰܫܒܽܘܩ ܠܺܝ ܝܶܫܽܘܥ ܡܠܶܐ ܪ̈ܰܚܡܶܐ܀

ܕܰܝܳܢܳܐ ܕܠܳܐ ܡܩܰܒܶܠ ܫܽܘܚܕܳܐ ܡܶܢ ܐ̱ܢܳܫ. ܡܽܘܢ ܐܺܝܬ ܠܺܝ ܕܶܐܩܰܪܶܒ ܠܳܟ ܫܽܘܚܕܳܐ ܕܪܳܚܶܡ ܐܰܢ̱ܬ. ܫܡܺܝܥ ܠܺܝ ܕܚܰܒܺܝ̈ܒܳܢ ܠܳܟ ܕܶܡ̈ܥܶܐ ܕܥܰܝ̈ܢܶܐ. ܝܰܬܺܝܪ ܡܶܢ ܕܰܗܒܳܐ ܤܢܺܝܢܳܐ ܘܟܺܐܦ̈ܶܐ ܛܳܒ̈ܳܬܳܐ. ܩܰܒܶܠ ܡܳܪܝ ܕܶܡ̈ܥܶܐ ܕܡܶܢ ܥܰܝ̈ܢܰܝ. ܘܰܫܒܽܘܩ ܠܺܝ ܚܰܘ̈ܒܰܝ ܘܰܚܛܳܗܰܝ̈. ܐܰܝܟ ܕܰܡܥܳܕܳܐ ܗ̱ܝ ܛܰܝܒܽܘܬܳܟ. ܚܽܘܣ ܘܶܐܬܪܰܚܡܥܠܰܝ܀

ܕܥܰܢܺܝ̈ܕܶܐ: ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ ܒܪܳܐ ܕܰܐܠܳܗܳܐ. ܠܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ ܘܰܫܟܶܒܘ ܥܰܠ ܤܰܒܪܳܟ. ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ ܡܳܐ ܕܳܐܬܶܐ ܐܰܢ̱ܬ. ܘܢܶܥܠܽܘܢ ܥܰܡܳܟ ܠܰܓܢܽܘܢܳܐ ܒܰܐܦ̈ܶܐ ܓܰܠ̈ܝܳܬܳܐ. ܘܢܰܤܩܽܘܢ ܠܳܟ ܩܳܠܰܝ̈ ܬܶܫܒܽܘܚܬܳܐ. ܥܰܡ ܟܺܐܢ̈ܶܐ ܕܪܰܚܡܽܘܟ ܘܗܰܝܡܶܢܘ ܒܳܟ. ܒܗܳܝ ܫܳܥܬܳܐ ܕܦܳܤܺܝ̈ܩܳܬܳܐ ܚܽܘܣ ܘܶܐܬܪܰܚܰܡܥܠܰܝܢ܀

ܩܽܘܩܰܠܝܽܘܢ ܫܒܝܥܝܐ H

ܒܰܪܬ ܡܰܠܟܳܐ ܒܫܽܘܒܚܳܐ ܩܳܡܰܬ ܗ̄ܘܗ̄ ܘܡܰܠܟܬܳܐ ܡܶܢ ܝܰܡܺܝܢܳܟ܀

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ ܒܪܰܬܝ ܘܰܚܙܳܝ ܘܰܨܠܳܝ ܐܶܕܢܶܟܝ܀

ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ ܗ̄ܘܗ̄ ܕܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟܝ܀

ܡܶܛܽܠ ܕܗܽܘܝܽܘ ܡܳܪܶܟܝ ܤܓܽܘܕܝ ܠܶܗ ܗ̄ܘܗ̄ ܘܒܰܪ̱ܬ ܨܽܘܪ ܬܶܤܓܽܘܕܝ ܠܶܗ܀

ܫܽܘܒܚܳܐ ܘܥܶܩܒܳܐ: H

ܕܶܐܬܦܢܺܝ ܒܪ̈ܰܚܡܰܘܗ̱ܝ ܥܰܠ ܡܽܘܟܳܟܶܗ ܕܰܐܡܬܶܗ. ܗܽܘ ܡܰܘܪܶܒ ܠܝܳܠܶܕܬܶܗ ܩܰܕܺܝܫܳܐ ܐܰܠܳܗܳܐ܀

ܐ̱ܚܪܺܢܳܐ: H

ܐܶܬܟܰܫܰܦܝ ܘܰܒܥܳܝ ܐܳܘ ܡܒܰܪܰܟܬܳܐ. ܥܰܡ ܚܰܝ̈ܠܰܘܳܬܳܐ ܕܰܫܡܰܝܳܢ̈ܶܐ. ܠܰܡܫܺܝܚܳܐ ܐܰܠܳܗܳܐ ܕܰܕܢܰܚ ܡܶܢܶܟܝ. ܕܰܒܝܰܕ ܨܠܰܘ̈ܳܬܶܟܝ. ܪ̈ܰܚܡܶܐ ܢܶܗܘܽܘܢ ܥܰܠ ܟܽܠܰܢ܀

ܣܶܕܪܳܐ ܕܝܳܠܕܰܬ ܐܰܠܳܗܳܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܢܽܘܗܪܳܐ ܡܬܽܘܡܳܝܳܐ ܕܡܶܢ ܢܽܘܗܪܳܐ ܐܰܠܳܗܳܝܳܐ ܨܡܰܚ. ܘܡܶܢ ܥܽܘܒܳܐ ܒܬܽܘܠܳܝܳܐ ܘܟܰܪܣܳܐ ܐܶܡܗܳܝܬܳܐ ܣܰܒܪܳܐ ܕܚܰܝ̈ܶܐ ܫܘܰܚ. ܠܗܰܘ ܕܰܠܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ ܐܰܘܪܶܒ ܘܙܰܝܰܚ. ܕܠܶܗ ܝܳܐܶܐ ܫܽܘܒܚܳܐ ܐܺܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܐܰܝܠܶܝܢ ܠܶܫܳܢ̈ܶܐ ܣܳܦܩܺܝܢ ܕܰܢܡܰܠܠܽܘܢ ܩܽܘܠܳܣܰܝ̈ܟܝ̱ ܐܳܘ ܒܬܽܘܠܬܳܐ ܕܟܺܝܬܳܐ ܘܡܰܠܝܰܬ ܟܽܠ ܫܽܘܦܪ̈ܺܝܢ ܐܶܡܶܗ ܕܰܡܫܺܝܚܳܐ ܦܳܪܽܘܩܰܢ. ܗܰܘ ܕܰܒܝܰܕ ܡܶܬܓܰܠܝܳܢܽܘܬܶܗ ܦܳܪܽܘܩܳܝܬܳܐ ܛܰܠܶܩ ܡܶܢܰܢ ܠܚܶܫܽܘܟܽܘܬܳܐ ܕܰܚܛܺܝܬܳܐ. ܘܰܠܛܽܘܥܝܰܝ ܕܡܶܬܚܰܒܠܳܢܽܘܬܳܐ. ܒܰܕܓܽܘܢ ܠܶܟܝ̱ ܝܳܕܥܺܝܢܰܢ ܐܳܘ ܡܥܺܝܢܳܐ ܕܚܰܝ̈ܶܐ ܢܶܒܥܳܐ ܕܦܽܘܪܩܳܢܳܐ ܚܰܩܠܳܐ ܡܒܰܪܰܟܬܳܐ ܘܣܶܒܶܠܬܳܐ ܕܡܰܣܩܳܐ ܠܰܫܡܰܝܳܐ. ܘܥܰܠ ܗܳܕܶܐ ܟܰܕ ܬܳܗܪܺܝܢܰܢ ܐܳܡܪܺܝܢܰܢ: ܛܽܘܒܰܝܟܝ̱ ܡܰܪܟܰܒܬܳܐ ܒܶܣܪܳܢܳܝܬܳܐ ܕܡܳܪܳܐ ܕܡܰܠܰܐܟ̈ܶܐ ܒܶܟܝ̱ ܫܪܳܐ. ܛܽܘܒܰܝܟܝ̱ ܣܰܢܝܳܐ ܡܶܬܝܰܕܥܳܢܳܐ ܕܳܐܪܽܘܢܶܗ ܕܪܳܡܳܐ ܡܶܢܶܟܝ ܐܶܬܚܙܺܝ. ܘܗܳܫܳܐ ܐܳܘ ܡܰܠܝܰܬ ܛܰܝܒܽܘܬܳܐ. ܐܰܦܺܝܣܝ̱ ܥܰܡܰܢ ܠܰܒܪܳܐ ܡܬܽܘܡܳܝܳܐ ܕܡܶܢܶܟܝ̱ ܕܢܰܚ. ܕܠܰܚܛܳܗܰܝ̈ܢ ܢܶܠܚܶܐ ܒܛܰܝܒܽܘܬܶܗ ܘܰܠܣܰܟܠ̈ܘܳܬܰܢ ܢܶܥܛܶܐ ܒܰܚܢܳܢܶܗ. ܘܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܠܰܐܘܳܢ̈ܶܐ ܐܽܘܪ̈ܺܫܠܶܡܳܝܶܐ ܘܰܠܥܽܘ̈ܒܶܐ ܐܰܒܪ̈ܳܗܳܡܳܝܶܐ. ܐܰܝܟܰܢܳܐ ܕܡܶܢ ܦܽܘܡ ܟܽܠܰܢ ܫܽܘܒܚܳܐ ܢܶܣܰܩ ܠܶܗ ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀

ܩܠܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ H

ܚܰܝܶܠܬܳܢܝ ܘܰܛܥܶܢܬܳܟ ܐܶܡܪܰܬ ܡܰܪܝܰܡ. ܘܟܰܕ ܝܺܠܶܕܬܳܟ ܒܰܡܥܰܪܬܳܐ ܚܰܘܺܝܬ ܠܺܝ ܫܽܘܒܚܳܟ. ܫܰܠܗܶܒܺܝܬܳܐ ܟܪܺܝܟܳܐ ܠܶܗ ܠܽܐܘܪܝܳܐ ܙܥܽܘܪܳܐ ܘܰܤܪ̈ܳܦܶܐ ܕܶܫܬܳܐ ܓܶܦܺܝ̈ܢ ܛܳܝܤܺܝܢ ܠܥܶܠ ܡܶܢܶܗ. ܦܩܽܘܕ ܠܗܽܘܢ ܕܬܳܠܶܝܢ ܓܶܦܰܝ̈ܗܽܘܢ. ܕܶܐܥܽܘܠ ܡܳܪܝ ܘܶܐܒܪܽܘܟ ܘܶܐܤܓܽܘܕ ܠܳܟ. ܘܶܐܬܶܠ ܠܳܟ ܚܰܠܒܳܐ ܕܰܟܝܳܐ ܕܫܳܦܰܪ ܠܨܶܒܝܳܢܳܟ܀

ܠܰܝܬ ܠܺܝ ܒܰܝܬܳܐ ܒܰܐܪܥܳܐ ܐܶܡܪܰܬ ܡܰܪܝܰܡ. ܘܠܳܐ ܥܰܪܤܳܐ ܘܠܳܐ ܬܰܫܘܺܝܬܳܐ ܡܓܰܙܰܝܬܳܐ ܐܺܝܬܰܝ. ܒܥܰܙܪ̈ܽܘܪܶܐ ܟܳܪܟܳܐ ܐ̱ܢܳܐ ܠܶܗ ܠܩܰܫܺܝܫ ܡܶܢ ܟܽܠ. ܐܳܦ ܒܽܐܘܪܝܳܐ ܤܳܝܡܳܐ ܐ̱ܢܳܐ ܠܶܗ ܠܡܳܪܗܶܝܢ ܕܒܶܪ̈ܝܳܬܳܐ. ܠܳܐ ܠܰܐܒܽܘܗ̱ܝ ܚܰܒܪܳܐ ܒܰܫܡܰܝܳܐ. ܘܠܳܐ ܠܶܐܡܶܗ ܕܽܘܡܝܳܐ ܥܰܠ ܐܰܪܥܳܐ. ܗܽܘ ܡܳܪܳܐ ܘܶܐܢܳܐ ܐܰܡܬܶܗ ܘܰܡܟܺܝܪܬܶܗ ܥܺܕܬܳܐ܀

ܫܽܘܒܚܳܐ: ܫܡܶܟܝ ܡܰܪܝܰܡ ܗܳܐ ܡܶܬܢܰܨܰܚ ܒܰܐܪܒܰܥ ܦܶܢ̈ܝܳܢ. ܘܡܰܢ ܠܳܐ ܢܰܘܪܶܒ ܕܽܘܟܪܳܢܶܟܝ ܕܰܡܫܺܝܚܳܐ ܐܰܘܪܒܶܟܝ. ܒܺܝܪܰܬ ܩܽܘܕ̈ܫܶܐ ܕܡܰܠܟܳܐ ܢܚܶܬ ܘܰܫܪܳܐ ܒܶܟܝ. ܫܡܰܝܳܐ ܚܕܰܬܳܐ ܕܛܶܥܢܰܬ ܗ̱ܘܳܬ ܠܰܐܠܳܗܳܐ ܡܶܠܬܳܐ. ܒܰܕܪ̈ܳܥܰܝܟܝ ܥܰܦܶܩܬܝ ܠܓܰܘܙܰܠܬܳܐ. ܘܚܰܠܒܳܐ ܝܰܗ̱ܒܬܝ ܠܢܽܘܪܳܐ ܐܳܟܶܠܬܳܐ. ܒܪܺܝܟ ܗ̱ܽܘ ܠܳܐ ܡܶܤܬܰܝܟܳܢܳܐ. ܕܰܨܒܳܐ ܘܶܐܤܬܰܝܰܟ܀

ܡܶܢ ܥܳܠܰܡ: ܒܢܳܡܽܘܤܳܐ ܘܒܰܢܒܺܝܽܘܬܳܐ ܨܳܪ ܠܳܗ̇ ܛܽܘܦܤܳܐ. ܡܽܘܫܶܐ ܪܺܝܫܳܐ ܕܰܢܒܺܝ̈ܶܐ ܠܶܐܡܳܐ ܡܒܰܪܰܟܬܳܐ. ܒܗܳܝ ܩܺܐܒܽܘܬܳܐ ܕܢܳܡܽܘܤܳܐ ܘܩܶܤܛܳܐ ܕܡܰܢܢܳܐ. ܘܰܒܫܰܒܛܶܗ ܕܰܐܗܪܽܘܢ ܕܰܐܦܪܰܥ ܒܓܰܘ ܒܶܝܬ ܩܕܽܘܫ ܩܽܘܕܫܺܝ̈ܢ. ܘܰܒܛܰܠܳܐ ܘܓܶܙܬܳܐ ܕܒܶܝܬ ܓܶܕܥܽܘܢ. ܘܰܒܩܽܘܩܬܳܐ ܚܕܰܬܳܐ ܕܶܐܠܺܝܫܰܥ. ܘܒܰܥܢܳܢ̈ܶܐ ܩܰܠܺܝ̈ܠܳܬܳܐ ܕܰܚܙܳܐ ܐܶܫܰܥܝܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ ܓܰܘܳܢܳܝܬܳܐ H

ܫܰܘܬܶܦ ܠܰܢ ܡܳܪܝ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ:

ܒܰܨܠܰܘ̈ܳܬܗܽܘܢ ܚܰܤܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܒܰܨܠܽܘܬ ܐܶܡܳܟ ܥܰܡ ܕܰܢܒܺܝ̈ܶܐ ܫܠܺܝ̈ܚܶܐ ܘܤܳܗ̈ܕܶܐ. ܠܚܰܝ̈ܶܐ ܢܰܛܰܪ ܘܰܠܥܰܢܺܝ̈ܕܶܐ ܚܰܤܳܐ ܒܪ̈ܰܚܡܰܝܟ܀

ܐܳܘ ܒܰܪ̱ܬ ܕܰܘܺܝܕ ܦܰܪܶܗܤܺܝܰܐ ܪܰܒܬܳܐ ܐܺܝܬ ܠܶܟܝ: ܨܶܝܕ ܗܰܘ ܡܰܠܟܳܐ ܕܟܽܠܗܽܘܢ ܡܰܠ̈ܟܶܐ ܗܽܘܝܽܘ ܫܳܪܶܐ. ܡܦܺܝܤܺܝܢܰܢ ܠܶܟܝ ܡܰܪܓܳܢܺܝܬܳܐ ܕܠܰܝܬ ܒܳܗ̇ ܡܽܘܡܳܐ: ܕܬܶܒܥܶܝܢ ܚܠܳܦܰܝܢ ܡܶܢ ܗܰܘ ܦܺܐܪܳܐ ܕܰܕܢܰܚ ܡܶܢܶܟܝ܀

ܐܳܘ ܛܽܘ̈ܒܬܳܢܶܐ ܢܒܺܝ̈ܶܐ ܫܠܺܝ̈ܚܶܐ ܘܤܳܗ̈ܕܶܐ ܒܪ̈ܺܝܟܶܐ: ܒܰܨܠܰܘ̈ܳܬܟܽܘܢ ܡܶܬܓܰܘܤܺܝܢܰܢ ܬܰܘ ܠܺܐܝܳܠܰܢ. ܪ̈ܚܽܘܡܰܘܗ̱ܝ ܕܰܐܒܳܐ ܘܰܒܢܰܝ̈ ܐ̱ܪܳܙܶܗ ܕܺܝܚܺܝܕܳܝܳܐ: ܐܰܦܶܩܘ ܡܶܢܶܗ ܥܽܘܬܪܳܐ ܘܦܰܪܢܶܤܘ ܠܰܤܢܺܝܩܽܘܬܰܢ܀

ܐܳܘ ܥܰܢܺܝ̈ܕܶܐ ܥܳܡܪ̈ܰܝ ܩܰܒܪ̈ܶܐ ܩܢܰܘ ܒܽܘܝܳܐܳܐ: ܤܒܰܪܬܳܐ ܥܠܰܝܟܽܘܢ ܕܗܳܐ ܢܽܘܚܳܡܳܐ ܩܪܶܒ ܘܰܡܛܳܐ ܠܶܗ. ܪܶܡܙܳܐ ܕܨܳܪܟܽܘܢ ܒܓܰܘ ܟܰܪ̈ܤܳܬܳܐ ܕܰܒܥܺܝ̈ܠܳܬܳܐ: ܗܽܘ ܩܳܪܶܐ ܠܟܽܘܢ ܘܰܕܠܳܐ ܚܒܳܠܳܐ ܡܩܺܝܡ ܦܰܓܪ̈ܰܝܟܽܘܢ܀

ܐܳܘ ܕܰܡܩܰܒܶܠ ܫܽܘ̈ܒܚܶܐ ܫܦܰܝ̈ܳܐ ܡܶܢ ܡܰܠܰܐܟ̈ܶܐ: ܫܡܰܥ ܘܩܰܒܶܠ ܫܽܘܒܚܳܐ ܕܦܽܘܡܰܝ̈ܢ ܘܪܰܚܶܡܥܠܰܝܢ. ܘܰܐܝܠܶܝܢ ܕܰܠܐܺܝܘ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ: ܒܰܨܠܰܘ̈ܳܬܗܽܘܢ ܚܰܤܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܠܥܶܠ ܒܰܫܡܰܝܳܐ ܘܗܳܪܟܳܐ ܒܥܺܕܬܳܐ ܢܗܶܐ ܕܽܘܟܪܳܢܳܐ܀

ܠܰܡܒܰܪܰܟܬܳܐ ܘܰܠܩܰܕܺܝ̈ܫܶܐ ܘܰܠܥܰܢܺܝ̈ܕܶܐ܀

ܡܳܪܰܢ ܝܶܫܽܘܥ ܡܫܺܝܚܳܐ

ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀

ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܗܳܐ. ܩܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀