ܕܰܬܪܶܝܢ ܒܫܰܒܳܐ

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܛܳܒܳܐ ܕܶܐܬܪܰܥܺܝ ܠܢܺܝܢܘܶܐ܆ ܐܶܬܪܰܥܳܐ ܬܽܘܒ ܠܥܰܒ̈ܕܰܝܟ ܘܠܰܐܡ̈ܗܳܬܳܟ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܛܳܒܳܐ ܕܶܐܬܪܰܥܺܝ ܠܢܺܝܢܘܶܐ܆ ܐܶܬܪܰܥܳܐ ܬܽܘܒ ܠܥܰܡܳܟ ܘܰܠ̈ܥܳܢܳܟ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܐܰܫܦܰܥ ܪ̈ܰܚܡܰܝܟ ܐܰܠܳܗܰܢ܆ ܥܰܠ ܚܰܛܳܝ̈ܶܐ ܕܰܒܬܰܪܥܳܟ ܢܳܩܫܺܝܢ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܳܪܰܢ ܡܳܪܳܐ ܕܡܰܠܰܐܟ̈ܶܐ܆ ܫܡܰܥ ܒܳܥܽܘܬܰܢ ܘܩܰܒܶܠ ܬܶܫܡܶܫܬܰܢ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܒܬܰܪܥܳܟ ܢܳܩܫܺܝܢܰܢ܆ ܘܡܶܢ ܒܶܝܬ ܓܰܙܳܟ ܥܰܬܺܝܪܳܐ܆ ܚܢܳܢܳܐ ܘܪ̈ܰܚܡܶܐ ܫܳܐܠܺܝܢܰܢ܆ ܚܰܣܳܐ ܚܰܘ̈ܒܰܝܢ ܒܛܰܝܒܽܘܬܳܟ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܣܡܳܟܳܐ ܕܠܳܐ ܥܳܒܰܪ܆ ܘܫܶܩܝܳܐ ܚܰܝܳܐ ܕܪܽܘܚ ܩܽܘܕܫܳܐ܆ ܡܰܬܩܶܢ ܒܚܽܘܒܶܗ ܒܰܪ ܡܰܠܟܳܐ܆ ܠܟܶܢܫܳܐ ܫܰܦܝܳܐ ܕܬܰܝܳܒ̈ܶܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܢܦܺܝܣܺܝܘܗ̱ܝ ܠܰܐܠܳܗܳܐ܆ ܐܰܝܟ ܢܺܝܢ̈ܘܳܝܶܐ ܒܰܚܢܰܓܬܳܐ܆ ܕܢܰܥܒܰܪ ܘܰܢܒܰܛܶܠ ܡܶܢܰܢ܆ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܠܳܟܽ ܗ̱ܘ ܩܳܪܶܝܢܰܢ܆ ܐܰܝܟ ܢܺܝܢ̈ܘܳܝܶܐ ܚܰܢܳܢܳܐ܆ ܚܽܘܢ ܒܺܝܫܽܘܬܰܢ ܒܰܚܢܳܢܳܟ܆ ܘܩܰܒܶܠ ܒܪ̈ܰܚܡܰܝܟ ܬܶܫܡܶܫܬܰܢ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܒ̈ܡܰܬܠܶܐ ܡܰܠܶܠ ܦܳܪܽܘܩܰܢ

ܐܶܡܰܪ ܐܰܠܳܗܳܐ ܠܝܰܘܢܳܢ܆ ܡܛܺܝ ܠܢܺܝܢܘܶܐ ܡܕܺܝܢ̱ܬܳܐ ܪܰܒܬܳܐ܆ ܘܰܐܟܪܶܙ ܒܳܗ̇ ܗܦܽܘܟܝܳܐ ܩܰܫܝܳܐ܆ ܠܳܗ̇ ܘܰܠܟܽܠܗܽܘܢ ܥܳܡܽܘܪ̈ܶܝܗ̇܆ ܡܶܛܽܠ ܕܰܚܛܺܝܬܳܐ ܘܥܰܘܠܳܐ܆ ܕܣܶܥܪܰܬ ܩܕܳܡܰܝ܆ ܣܰܓܺܝ ܐܶܬܥܰܫܢܰܬ܆ ܡܶܟܺܝܠ ܗܳܐ ܡܫܰܕܰܪ ܐ̱ܢܳܐ ܥܠܶܝܗ̇܆ ܐܰܒܕܳܢܳܐ ܕܰܡܓܰܡܰܪ ܠܳܗ̇܆ ܠܫܽܘ݉ܡܠܳܝ ܝܰܘ̈ܡܳܬܳܐ܆ ܐܰܪܒܥܺܝܢ ܗܳܘܶܐ ܚܽܘܒܳܠܳܗ̇܆ ܘܛܶܒܳܗ̇ ܢܳܦܶܩ ܒܶܝܬ ܥܰܡ̱̈ܡܶܐ ܘܰܐܬܪ̈ܰܘܳܬܳܐ܆ ܕܰܒܥܰܘܠܳܐ ܕܥܶܒܕܰܬ ܐܶܒܕܰܬ܀

ܫܽܘܒܚܳܐ

ܡܳܐ ܫܰܦܺܝܪܳܐ ܗ̱ܘܳܬ ܐܰܚܰܝ̈܆ ܬܝܳܒܽܘܬܳܐ ܕܥܶܒܕܰܬ ܢܺܝܢܘܶܐ܆ ܕܠܰܒܢܰܝ̈ܢܳܫܳܐ ܘܰܒܥܺܝܪܳܐ܆ ܓܶܙܪܰܬ ܨܰܘܡܳܐ ܐܰܡܺܝܢܳܐ܆ ܨܳܡ ܡܰܠܟܳܐ ܥܰܡ ܪ̈ܺܝܫܳܢܰܘܗ̱ܝ܆ ܘܰܐܡܶܟ ܩܶܛܡܳܐ ܘܰܥܠܰܘܗ̱ܝ ܝܺܬܶܒ ܗ̱ܘܳܐ܆ ܘܨܳܡܘ ܥܰܬܺܝܪ̈ܶܐ ܘܡܶܣ̈ܟܺܢܶܐ܆ ܘܰܓܥܰܘ ܒܚܰܫܳܐ ܠܘܳܬ ܡܳܪܰܢ܆ ܡܳــ݉ܪܳܐ ܡܪܰܚܡܳܢܳܐ܆ ܐܶܬܪܰܚܰܡ ܥܰܠ ܡܰܪܥܺܝܬܳܟ܆ ܕܗܳܐ ܓܳܥܝܳܐ ܠܘܳܬܳܟ ܥܢܺܝܝܳܗ̇ ܘܰܫܡܰܥܶܝܗ̇ ܡܳܪܝ܆ ܘܰܐܥܒܰܪ ܡܶܢܰܢ ܟܽܠ ܡܰܚ̈ܘܳܢ܀

ܡܶܢ ܥܳܠܰܡ

ܒܬܰܪܥܳܐ ܕܺܝܠܳܟ ܚܰܢܳܢܳܐ: ܢܳܩܶܫ ܩܳܠܳܐ ܕܒܳܥܽܘܬܰܢ: ܠܳܐ ܬܶܟܠܶܐ ܡ̣ܶܢ ܣܳܓܽܘ̈ܕܰܝܟ: ܫܶܐܠܴ̈ܬܳܐ ܕܣܽܘܢܩܳܢܰܝ̈ܗܽܘܢ: ܒܕܶܡ̈ܥܶܐ ܩܪܳܬܳܟ ܚܰܛܳܝܬܳܐ ܘܫܽܘܒܩܳܢ ܚܰܘ̈ܒܶܐ: ܡܶܢܳܟ ܢܶܣܒܰܬ݀ ܗ̱ܘܳܬ݀: ܒܕܶܡ̈ܥܶܐ ܕܟܳܗ̈ܢܶܐ ܡܰܪܥܺܝܬܳܟ: ܚܽܘܣ ܥܰܠ ܥܺܕ̱ܬܳܟ ܗܳܝ ܕܰܩܢ̣ܰܝܬ: ܕܰܚ݉ܛܰܝܢ ܝܳܕܥܺܝܢܰܢ: ܟܽܠ ܫܳܥ ܣܳܓ̈ܝܳܢ ܒܺܝ̈ܫܳܬܰܢ: ܒܰܪ ܛܳܒܳܐ ܚܽܘܣ ܒܰܚܢܳܢܳܟ: ܘܕܰܟܳܢ ܒܖ̈ܰܚܡܰܝܟ ܡܶܢ ܟܽܠ: ܛܽܘ̈ܠܫܺܝܢ ܕܰܚܛܺܝܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ
ܕܰܘܺܝܕ ܡܰܠܟܳܐ ܘܰܢܒܺܝܳܐ ܙܰܡܰܪ ܘܶܐܡܰܪ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‍ܠܳܗܳܐ)

ܐܰܟܪܶܙ ܝܰܘܢܳܢ ܒܰܪ ܡܰܬܰܝ ܕܢܺܝܢܘܶܐ ܡܕܺܝܢ̱ܬܳܐ܆ ܠܰܐܪܒܥܺܝܢ ܝܰܘ̈ܡܺܝܢ ܡܶܬܗܰܦܟܳܐ܆ ܘܰܫܡܰܥܘ ܩܳܠܶܗ ܢܺܝܢ̈ܘܳܝܶܐ ܘܫܰܪܺܝܘ ܩܳܥܶܝܢ܆ ܐܰܠܳܗܰܢ ܪܰܚܶܡ ܥܠܰܝܢ܆ ܗ̄ ܘܫܰܘܙܶܒ ܠܚܰܝܰܝ̈ܢ܀

ܫܽܘܒܚܳܐ

ܒܬܰܪܥܳܐ ܕܺܝܠܳܟ ܐܳܘ ܛܳܒܳܐ ܗܳܐ ܢܳܩܫܺܝܢܰܢ܆ ܐܰܝܟ ܕܰܐܠܶܦܬ ܪܳܚܶܡ ܐ̱ܢܳܫ̈ܳܐ܆ ܫܡܰܥ ܒܳܥܽܘܬܰܢ ܚܰܢܳܢܳܐ ܘܦܰܢܳܐ ܒܪ̈ܰܚܡܰܝܟ܆ ܫ̈ܶܐܠܳܬܰܢ ܫܰܦܺܝܪ̈ܳܬܳܐ܆ ܗ̄ ܐܰܝܟ ܕܶܐܫܬܰܘܕܺܝܬ܀

ܡܶܢ ܥܳܠܰܡ

ܕܰܘܺܝܕ ܡܰܠܟܳܐ ܘܰܢܒܺܝܳܐ ܙܰܡܰܪ ܘܶܐܡܰܪ: ܒܡܰܙܡܽܘܪܳܐ ܕܚܰܡܫܺܝܢ ܘܚܰܕ: ܪܰܚܶܡ ܥܠܰܝ ܐܰܠܰܗܳܐ: ܐܰܣܓܳܐ ܐܰܫܺܝܓܰܝܢܝ: ܡܶܢ ܥܰܘܠܳܐ ܕܰܣܥܰܪ̈ܝ ܐܺܝ̈ܕܰܝ ܗ̄ ܘܪܰܚܶܡ ܥܠܰܝ܀

ܦܶܬܓܳܡܳܐ: ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ܆ ܐܳܦܠܳܐ ܒܚܶܡܬܳܟ ܬܶܪܕܶܝܢܝ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܩܳܠܶܗ ܕܝܰܘܢܳܢ ܫܶܡܥܰܬ ܢܺܝܢܘܶܐ ܘܙܳܥܰܬ ܡܶܢܶܗ܆ ܘܡܶܢ ܕܶܚܠܬܳܗ̇ ܠܘܳܬ ܐܰܠܳܗܳܐ ܬܶܪܨܰܬ ܐܽܘܪܚܳܗ̇܆ ܒܳܥܝܳܐ ܐ̱ܢܳܐ ܡܳܪܝ ܫܪܺܝ ܓܙܳܪ ܕܺܝܢܳܐ ܕܰܡܛܰܝܰܒ ܠܺܝ܆ ܘܰܟܠܺܝ ܪܽܘܓܙܳܐ ܕܶܐܬܳܐ ܕܢܶܥܩܽܘܪ ܫܽܘܪ̈ܰܝ ܪ̈ܳܡܶܐ܆ ܓܳܙܶܡ ܗ̱ܘܳܐ ܠܳܗ̇ ܝܰܘܢܳܢ ܘܳܐܡܰܪ ܘܳܝܠܶܟܝ ܢܺܝܢܘܶܐ܆ ܕܡܶܟܳܐ ܠܰܐܪܒܥܺܝܢ ܝܰܘ̈ܡܺܝܢ ܗܳܘܝܰܬܝ ܡܰܫܪܽܘܩܺܝܬܳܐ܀

ܠܳܟ ܬܶܫܒܽܘܚܬܳܐ ܡܳܪܝܳܐ ܕܚܰܢܳܗ̇ ܠܢܺܝܢܘܶܐ ܡܕܺܝܢ̱ܬܳܐ܆ ܠܳܟ ܬܰܘܕܺܝܬܳܐ ܚܰܝܽܘܣܬܳܢܳܐ ܘܪܳܚܶܡ ܐ̱ܢܳܫ̈ܳܐ܆ ܫܠܳܡܳܐ ܠܢܺܝܢܘܶܐ ܡܶܢ ܕܰܝܳܢܳܐ ܕܟܽܠܳܗ̇ ܐܰܪܥܳܐ܆ ܫܰܝܢܳܐ ܠܟܰܪܟܳܐ ܡܶܢ ܕܰܝܳܢܳܐ ܕܟܽܠܶܗ ܥܳܠܡܳܐ܆ ܟܠܺܝܠܳܐ ܘܪ̈ܰܚܡܶܐ ܡܶܢ ܐܰܠܳܗܳܐ ܠܰܬܝܳܒܽܘܬܳܐ܆ ܐܳܦ ܠܒܳܥܽܘܬܶܗ ܫܡܳܐ ܘܢܶܨܚܳܢܳܐ ܒܥܳܠܡܳܐ ܟܽܠܶܗ܀

ܡܫܺܝܚܳܐ ܕܩܰܒܶܠ ܠܰܬܝܳܒܽܘܬܗܽܘܢ ܘܰܦܪܰܩ ܐܶܢܽܘܢ: ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ: ܕܰܢܫܰܒܚܳܟ ܡܳܪܝ ܘܠܰܐܒܽܘܟ ܟܰܣܝܳܐ ܓܢܺܝܙ ܒܺܐܝܬܽܘܬܶܗ: ܘܰܠܪܽܘܚ ܩܽܘܕܫܳܐ ܗܶܕܪܳܐ ܘܣܶܓܕܬܳܐ ܐܳܦ ܪܽܘܡܪܳܡܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܥܢܺܝܢ ܐܰܠܳܗܳܐ ܥܢܺܝܢ ܐܰܠܳܗܳܐ ܘܪܰܚܶܡܥܠܰܝܢ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀