ܕܰܬܠܳܬܳܐ ܒܫܰܒܳܐ

ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܓܙܰܪܘ ܨܰܘܡܳܐ ܘܰܠܒܶܫܘ ܣܰܩܳܐ܆ ܢܺܝܢ̈ܘܳܝܶܐ ܒܚܰܫܳܐ ܪܰܒܳܐ܆ ܘܶܐܬܥܰܛܰܦܘ ܗ̱ܘܰܘ ܟܰܪܝܽܘܬܳܐ܆ ܘܶܐܬܪܰܥܺܝ ܠܗܽܘܢ ܐܰܠܳܗܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܰܕܡܽܘܬܳܗ̇ ܕܢܺܝܢܘܶܐ ܡܕܺܝܢ̱ܬܳܐ܆ ܗܳܐ ܩܳܪܝܳܐ ܠܳܟ ܡܰܪܥܺܝܬܳܟ܆ ܡܳܪܳܐ ܕܪ̈ܰܚܡܶܐ ܘܕܰܚܢܳܢܳܐ܆ ܐܶܬܪܰܚܰܡ ܥܰܠ ܢܰܦ̈ܫܳܬܰܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܢܺܝܢ̈ܘܳܝܶܐ ܕܨܳܡܘ ܐܶܬܦܰܨܺܝܘ܆ ܡܶܢ ܪܽܘܓܙܳܐ ܕܰܓܙܰܪ ܝܰܘܢܳܢ܆ ܘܰܒܚܰܫܳܐ ܘܕܶܡ̈ܥܶܐ ܐܰܦܺܝܣܘ܆ ܘܰܒܨܰܘܡܳܐ ܘܳܐܦ ܒܰܨܠܽܘܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܚܰܢܳܢܳܐ ܪܟܶܢ ܨܶܐܕܰܝܗܽܘܢ܆ ܘܦܰܢܺܝ ܒܰܥܓܰܠ ܫ̈ܶܐܠܳܬܗܽܘܢ܆ ܘܰܚܢܰܢ ܐܰܚܰܝ̈ ܬܰܘ ܕܰܢܨܽܘܡ܆ ܕܢܶܥܢܶܐ ܠܰܢ ܡܳܪܳܐ ܛܳܒܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܰܡܳܐ ܪܰܒܳܐ ܕܰܡܠܶܐ ܚܢܳܢܳܐ ܒܳܟ ܐܶܬܕܰܠܶܐ܆ ܡܶܢ ܛܽܘܒܳܥܶܗ ܕܥܳܠܡܳܐ ܗܳܢܳܐ܆ ܒܰܕܡܽܘܬ ܦܶܛܪܳܘܣ ܒܶܝܬ ܡܰܚ̈ܫܽܘܠܶܐ܆ ܕܰܐܢ̱ܬܽ ܗ̱ܘ ܠܡܺܐܢܳܐ ܕܟܽܠܗܽܘܢ ܐܰܝܠܶܝܢ ܕܰܡܣܰܒܪܺܝܢ ܒܳܟ܀

ܩܳܠܳܐ ܒܩ̄: ܣܳܗ̈ܕܶܐ ܗܘܰܘ ܦܺܝܪ̈ܡܶܐ
(ܣܳܠܶܩ ܒܗܰܒܠܳܗ̇ ܠܥܺܕܬܳܟ - ܫܽܘܒܚܳܐ ܠܗܰܘ ܕܛܳܥܶܢ ܘܰܡܣܰܝܒܰܪ)

ܨܠܽܘܬܶܗ ܕܥܶܒܪܳܝܳܐ. ܝܰܘܢܳܢ ܢܒܺܝܳܐ ܐܶܫܬܰܡܥܰܬ܆ ܡܶܢ ܓܰܘ ܝܰܡܳܐ ܟܰܕ ܣܳܠܩܳܐ܆ ܘܰܐܚܕܰܢܝ ܕܽܘܡܳܪܳܐ܆ ܕܡܰܢܽܘ ܚܰܒܫܶܗ ܒܰܬܗܽܘܡܳܐ܆ ܒܰܡ̈ܥܰܝ ܢܽܘܢܳܐ ܥܰܠ ܕܰܐܣܟܶܠ܆ ܗ̄ ܒܪܺܝܟܽ ܗ̱ܘ ܕܰܫܡܰܥ ܠܰܨܠܽܘܬܶܗ܆ ܘܢܰܛܪܳܗ̇ ܠܢܰܦܫܶܗ ܕܠܳܐ ܬܺܐܒܰܕ܀

ܫܽܘܒܚܳܐ

ܠܳܐ ܐܰܪܥܳܐ ܡܰܨܝܳܐ. ܘܠܳܐ ܫܡܰܝܳܐ ܐܳܦܠܳܐ ܬܗܽܘܡܳܐ܆ ܠܡܶܬܦܰܨܳܝܽܘ ܡܶܢ ܪܽܘܓܙܳܟ܆ ܣܳܗܶܕ ܠܰܢ ܝܰܘܢܳܢ܆ ܕܰܐܢ̱ܬܽ ܗ̱ܘ ܚܒܰܫܬܳܝܗ̱ܝ ܒܓܰܘ ܝܰܡܳܐ܆ ܥܰܠ ܕܰܥܒܰܪ ܥܰܠ ܦܽܘܩܕܳܢܳܟ܆ ܗ̄ ܘܟܰܕ ܐܶܬܦܢܺܝ ܘܰܗܦܰܟ ܨܶܐܕܰܝܟ܆ ܩܰܒܶܠܬܳܝܗ̱ܝ ܡܳܪܳܐ ܛܳܒܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܩܽܘܡ ܦܰܘܠܳܘܣ ܐܰܪܕܺܝܟܠܳܐ

ܥܽܘܢܺܝܬܳܐ: ܒܪܺܝܟ ܕܫܰܕܪܶܗ ܠܝܰܘܢܳܢ ܕܰܢܥܺܝܪܺܝܗ̇܆ ܒܝܰܕ ܩܳܠܶܗ ܠܢܺܝܢܘܶܐ ܕܠܳܐ ܬܺܐܒܰܕ.

ܐܶܡܰܪ ܠܶܗ ܡܳܪܝܳܐ ܠܒܰܪ ܡܰܬܰܝ܆ ܩܽܘܡ ܙܶܠ ܠܳܟ ܘܰܐܟܪܶܙ ܒܓܰܘ ܢܺܝܢܘܶܐ܆ ܩܽܘܡ ܙܶܠ ܠܳܟ ܠܰܡܕܺܝܢ̱ܬܳܐ ܪܰܒܬܳܐ܆ ܘܰܐܟܪܶܙ ܠܳܗ̇ ܗܦܽܘܟܝܳܐ ܘܰܐܒܕܳܢܳܐ܆ ܩܽܘܡ ܙܶܠ ܠܳܟ ܨܶܐܕܶܝܗ̇܆ ܘܰܐܥܺܝܪܺܝܗ̇ ܒܩܳܠܳܟ܆ ܠܢܺܝܢܘܶܐ ܕܕܶܡܟܰܬ ܠܳܗ̇܆ ܕܬܶܬܥܺܝܪ ܡܶܢ ܫܶܢܬܳܗ̇܆ ܕܗܳܐ ܥܶܠܰܬ ܚܛܺܝܬܳܗ̇ ܩܕܳܡ ܐܰܦܰܝ̈܆ ܐܳܦ ܥܰܘܠܳܗ̇ ܥܫܶܢ ܠܶܗ ܡܶܢ ܕܰܣܕܽܘܡ܀

ܓܙܽܘܪ ܪܽܘܓܙܳܐ ܘܰܩܪܺܝ ܠܳܗ̇ ܗܦܽܘܟܝܳܐ܆ ܘܰܐܟܪܶܙ ܠܳܗ̇ ܥܩܽܘܪܝܳܐ ܘܰܐܒܕܳܢܳܐ܆ ܐܶܡܰܪ ܠܳܗ̇ ܕܠܰܐܪܒܥܺܝܢ ܝܰܘ̈ܡܳܬܳܐ܆ ܡܶܬܥܰܩܪܺܝܢ ܘܡܶܬܗܰܓܡܺܝܢ ܫܽܘܪ̈ܰܝܟܝ܆ ܗܳܐ ܡܶܟܳܐ ܠܰܐܪܒܥܺܝܢ܆ ܫܽܘܠܳܡ ܝܰܘ̈ܡܳܬܳܐ܆ ܐܳܬܶܐ ܡܚܰܒܠܳܢܳܐ܆ ܘܰܡܚܰܒܶܠ ܫܽܘܪ̈ܰܝܟܝ܆ ܡܥܰܕܰܢܬܳܐ ܕܥܶܫܢܰܬ ܡܰܪܕܽܘܬܳܗ̇܆ ܕܗܳܐ ܩܪܶܒ ܠܶܗ ܙܰܒܢܳܐ ܕܡܰܪܕܽܘܬܶܟܝ܀

ܗܳܐ ܪܰܡܝܳܐ ܒܫܶܢܬܳܐ ܘܛܽܘܒܳܥܳܐ܆ ܘܰܣܝܳܢܳܐ ܛܺܝܫ ܒܳܗ̇ ܘܒܰܣܺܝܡ ܠܳܗ̇܆ ܗܳܐ ܕܰܡܟܳܐ ܗ̱ܝ ܘܰܒܫܶܢܬܳܐ ܡܺܝܬܰܬ܆ ܘܠܳܐ ܪܓܺܝܫܳܐ ܕܳܐܬܶܐ ܥܠܶܝܗ̇ ܪܽܘܓܙܳܐ܆ ܬܳܐ ܗܘܺܝ ܠܳܗ̇ ܕܰܘܩܳܐ܆ ܘܒܰܕܶܩ ܥܰܠ ܪܽܘܓܙܳܐ܆ ܕܰܥܬܺܝܕ ܕܰܢܚܰܒܠܺܝܗ̇܆ ܘܢܶܥܩܽܘܪ ܣܳܚܪ̈ܳܬܳܗ̇܆ ܘܡܶܬܬܥܺܝܪܳܐ ܡܶܢ ܫܶܠܝ ܡܶܢ ܫܶܢܬܳܗ̇܆ ܘܰܒܪ̈ܰܚܡܶܐ ܚܢܳܢܳܐ ܚܳܐܶܢ ܠܳܗ̇܀

ܛܰܝܶܒ ܠܳܗ̇ ܒܝܰܕ ܩܳܠܳܟ ܪܽܘܓܙܳܐ܆ ܘܰܐܟܪܶܙ ܠܳܗ̇ ܒܡܶܠܰܝ̈ܟ ܡܰܦܽܘܠܬܳܐ܆ ܓܰܪܶܓܶܝܗ̇ ܒܝܰܕ ܕܶܚܠܰܬ ܡܰܘܬܳܐ܆ ܠܒܳܥܽܘܬܳܐ ܘܕܶܡ̈ܥܶܐ ܕܰܬܘܳܬܳܐ܆ ܘܰܗܘܺܝ ܠܳܗ̇ ܬܳܪܐܳܐ܆ ܘܰܐܪܺܝܡ ܥܠܶܝܗ̇ ܫܰܒܛܳܐ܆ ܘܰܬܠܺܝܘܗ̱ܝ ܥܠܶܝܗ̇ ܒܚܶܡܬܳܐ܆ ܘܰܐܣܓܳܐ ܣܽܘܪ̈ܳܕܶܝܗ̇܆ ܟܒܰܪ ܒܳܛܢܳܐ ܘܝܳܠܕܳܐ ܬܝܳܒܽܘܬܳܐ܆ ܘܰܒ̈ܕܶܡܥܶܐ ܘܚܰܫܳܐ ܡܶܬܚܰܢܢܳܐ܀

ܡܶܢ ܩܳܠܳܟ ܪܳܥܠܳܐ ܘܡܶܣܬܰܪܕܳܐ܆ ܘܕܳܚܠܳܐ ܘܡܶܬܬܙܺܝܥܳܐ ܒܦܶܬܓܳܡܰܝ̈ܟ܆ ܡܶܬܪܰܗܒܳܐ ܡܶܢ ܫܶܠܝ ܘܡܶܬܬܰܟܣܳܐ܆ ܡܶܢ ܪܶܗܛܳܐ ܕܥܰܘܠܳܐ ܥܰܫܺܝܢܳܐ܆ ܘܳܐܬܝܳܐ ܘܡܶܬܓܰܘܣܳܐ܆ ܒܪ̈ܰܚܡܶܐ ܕܣܰܓܺܝܐܺܝܢ܆ ܘܡܶܬܚܰܢܢܳܐ ܘܚܳܝܳܐ܆ ܘܠܳܐ ܐܳܒܕܳܐ ܒܪܽܘܓܙܳܐ܆ ܙܶܠ ܝܰܘܢܳܢ ܡܶܟܺܝܠ ܐܰܟܪܶܙ ܠܳܗ̇܆ ܠܗܳܝ ܢܺܝܢܘܶܐ ܕܰܬܬܽܘܒ ܡܶܢ ܥܰܘܠܳܗ̇܀

ܦܣܽܘܩ ܙܰܒܢܳܐ ܘܬܰܚܶܡ ܥܶܕܳܢܳܐ܆ ܕܒܶܗ ܥܬܺܝܕܳܐ ܕܬܶܚܽܘܬ ܠܰܐܒܕܳܢܳܐ܆ ܣܺܝܡ ܐܰܦܰܝ̈ܟ ܠܡܶܬܢܰܒܳܝܽܘ ܥܠܶܝܗ̇܆ ܘܰܓܠܺܝ ܠܳܗ̇ ܫܳܥܬܳܐ ܕܥܽܘܢܕܳܢܳܐ܆ ܣܰܒܰܪ ܠܳܗ̇ ܗܦܽܘܟܝܳܐ܆ ܕܡܶܢ ܫܶܠܝܳܐ ܐܳܬܶܐ܆ ܕܡܰܚܪܶܒ ܘܥܳܩܰܪ ܠܳܗ̇܆ ܘܡܰܗܦܶܟ ܫܶܬܶܐܣܶܝ̈ܗ̇܆ ܘܙܳܥ ܝܰܘܢܳܢ ܘܩܰܒܶܠ ܦܽܘܩܕܳܢܳܐ܆ ܘܶܐܙܰܠ ܠܳܗ̇ ܠܢܺܝܢܘܶܐ ܕܢܰܟܪܶܙ ܒܳܗ̇܀

ܩܪܺܝ ܚܰܪܒܳܐ ܘܰܐܟܪܶܙ ܚܽܘܒܳܠܳܐ܆ ܠܰܡܕܺܝܢ̱ܬܳܐ ܕܥܶܫܢܰܬ ܡܰܪܕܽܘܬܳܗ̇܆ ܐܶܡܰܪ ܠܳܗ̇ ܕܘܳܝ ܠܶܟܝ ܡܥܰܕܰܢܬܳܐ܆ ܕܰܥܬܺܝܕܰܬܝ ܕܬܶܗܘܶܝܢ ܬܽܘܢܳܝܳܐ܆ ܘܟܽܠܡܰܢ ܕܚܳܙܶܐ ܠܶܟܝ܆ ܪܺܝܫܶܗ ܡܢܺܝܕ ܥܠܰܝܟܝ܆ ܘܢܰܫܪܶܩ ܒܰܢܚܺܝܪܶܗ܆ ܘܢܰܦܛܰܪ ܒܣܶܦ̈ܘܳܬܶܗ܆ ܕܳܐܘ ܡܕܺܝܢ̱ܬܳܐ ܪܰܒܬܳܐ ܘܟܰܗܺܝܢܬܳܐ܆ ܐܰܝܟܰܢܳܐ ܚܰܪܒܳܐ ܫܳܪܶܐ ܒܶܟܝ܀

ܫܡܰܥ ܝܰܘܢܳܢ ܘܶܐܬܬܦܺܝܣ ܘܠܳܐ ܬܶܣܪܽܘܒ܆ ܘܶܐܬܛܰܝܰܒ ܕܰܠܢܺܝܢܘܶܐ ܬܺܐܙܰܠ܆ ܩܽܘܡ ܙܶܠ ܠܳܟ ܠܘܳܬ ܢܺܝܢܘܶܐ ܡܕܺܝܢ̱ܬܳܐ܆ ܘܶܐܡܰܪ ܠܳܗ̇ ܕܡܳܪܝܳܐ ܥܳܩܰܪ ܠܶܟܝ܆ ܘܰܡܩܰܛܶܠ ܒܓܰܘܶܟܝ܆ ܠܰܒ̈ܢܰܝܟܝ ܘܠܰܒ̈ܢܳܬܶܟܝ܆ ܘܚܺܐܪ̈ܰܝܟܝ ܘܪ̈ܺܝܫܳܢܰܝܟܝ܆ ܥܠܰܝܡܰܝ̈ܟܝ ܘܝܰܠܽܘܕܰܝ̈ܟܝ܆ ܒܚܰܕ ܩܰܒܪܳܐ ܟܽܠܗܽܘܢ ܡܶܬܚܰܒܫܺܝܢ܆ ܘܥܰܠ ܥܰܦܪܳܐ ܫܠܰܕܰܝ̈ܗܽܘܢ ܡܶܬܟܫܶܝܢ܀

ܕܽܘܟܪܳܢܳܐ ܛܳܒܳܐ ܢܶܗܘܶܐ ܠܶܗ܆ ܠܗܰܘ ܡܰܠܟܳܐ ܘܟܶܢܫܳܐ ܕܢܺܝ̈ܢܘܳܝܶܐ܆ ܕܡܶܢ ܛܶܒܳܐ ܒܺܝܫܳܐ ܕܶܐܬܳܐ ܠܗܽܘܢ܆ ܬܘܳܬ ܢܰܦܫܳܐ ܒܒܳܥܽܘܬܳܐ ܩܰܪܶܒܘ܆ ܪܰܥܺܝܘ ܠܟܺܐܢܽܘܬܳܐ܆ ܒ̈ܣܰܩܶܐ ܘܰܒܩܶܛܡܳܐ܆ ܘܨܰܘܡܳܐ ܕܝܰܠܽܘ̈ܕܶܐ܆ ܘܟܰܦܢܳܐ ܕܚܰܝ̈ܘܳܬܳܐ܆ ܣܠܶܩܘ ܩ̈ܳܠܶܐ ܕܰܡܠܶܝܢ ܚܶܢ̈ܓܳܬܳܐ܆ ܢܚܶܬܘ ܪ̈ܰܚܡܶܐ ܠܟܰܪܟܳܐ ܕܬܰܝܳܒ̈ܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܪܓܺܝܓ ܗ̱ܘܳܐ ܦܺܐܪܳܐ ܕܫܰܕܰܪ ܝܰܘܢܳܢ ܡܶܢ ܓܰܘ ܢܽܘܢܳܐ܆ ܨܠܽܘܬܳܐ ܕܣܶܠܩܰܬ ܐܰܝܟ ܪܺܝܫܺܝܬܳܐ ܠܡܳܪܶܐ ܪ̈ܰܘܡܶܐ܆ ܪܰܚܺܝܩ ܐܰܬܪܳܐ ܕܶܐܬܳܬ ܡܶܢܶܗ ܟܰܕ ܫܰܦܺܝܪܳܐ܆ ܡܰܢ ܓܶܝܪ ܨܰܠܺܝ ܠܬܰܚܬ ܡܶܢ ܐܰܪܥܳܐ ܐܶܠܳܐ ܝܰܘܢܳܢ܀

ܩܳܠܳܐ ܐܰܪܡܺܝ ܚܰܕ ܥܶܒܪܳܝܳܐ ܒܠܶܒܳܗ̇ ܕܰܐܪܥܳܐ܆ ܘܰܣܠܶܩ ܘܰܡܛܳܐ ܠܪܺܝܫܳܐ ܕܪܰܘܡܳܐ ܒܬܶܗܪܳܐ ܪܰܒܳܐ܆ ܣܓܽܘܠܳܐ ܕܫܽܘܒܚܳܐ ܕܡܶܢ ܓܰܘ ܢܽܘܢܳܐ ܩܰܛܦܶܗ ܝܰܘܢܳܢ܆ ܘܫܰܕܪܶܗ ܕܢܶܣܰܩ ܢܰܬܗܰܪ ܠܥܺܝܪ̈ܶܐ ܒܛܰܥܡܶܗ ܚܰܠܝܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀