ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܠ ܡܳܢܳܐ ܪܳܚܡܰܬܝ ܫܶܢܬܳܐ

ܫܶܡܥܽܘܢ ܣܳܒܳܐ ܐܰܣܺܝܪܳܐ. ܥܰܠ ܕܪ̈ܳܥܰܘܗ̱ܝ ܒܗܰܝܟܠܳܐ ܛܰܥܢܳܟ܆ ܘܥܺܕܬܳܐ ܒܩ̈ܳܠܶܐ ܕܬܰܘܕܺܝܬܳܐ܆ ܡܦܺܝܣܳܐ ܠܳܟ ܪܳܚܶܡ ܐ̱ܢܳܫ̈ܳܐ܆ ܥܢܺܝ ܠܝܰܠ̈ܕܶܝܗ̇ ܕܡܶܬܟܰܫܦܺܝܢ ܠܳܟ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܝܰܠܕܳܐ ܓܢܺܝܙܳܐ ܕܺܐܝܬܽܘܬܳܐ܆ ܨܶܡܚܳܐ ܕܬܶܫܒܽܘܚܬܳܐ ܕܰܐܒܳܐ܆ ܕܰܗܘܳܐ ܐ̱ܢܳܫܳܐ ܡܶܢ ܓܶܢܣܰܢ܆ ܟܰܕ ܠܳܐ ܐܰܘܒܶܕ ܪܰܒܽܘܬܶܗ܆ ܠܰܘ ܐܰܝܟ ܥܰܘܠܰܢ ܬܶܦܪܽܘܥ ܠܰܢ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܢܽܘܗܪܳܐ ܫܒܺܝܚܳܐ ܗܰܘ ܕܶܐܬܳܐ܆ ܕܢܰܦܢܶܝܘܗ̱ܝ ܠܥܳܠܡܳܐ ܡܶܢ ܛܽܘܥܝܰܝ܆ ܠܺܝܕܰܥܬܳܐ ܗܳܝ ܕܰܫܪܳܪܳܐ܆ ܒܓܰܘ ܗܰܝܟܠܳܐ ܛܰܥܢܶܗ ܫܶܡܥܽܘܢ܆ ܘܶܐܡܰܪ ܠܶܗ ܕܰܫܪܺܝܢܝ ܐܶܬܬܢܺܝܚ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܫܽܘܒܚܳܐ

ܗܳܐ ܡܶܟܺܝܠ ܒܛܶܠ ܢܳܡܽܘܣܳܐ܆ ܦܰܓܪܳܢܳܐ ܗܰܘ ܕܰܓܙܽܘܪܬܳܐ܆ ܕܗܳܐ ܪܰܒ ܟܽܘܡܪ̈ܶܐ ܡܶܙܕܰܝܰܚ. ܒܗܰܝܟܰܠ ܩܽܘܕܫܳܐ ܐܰܝܟ ܫܰܒܪܳܐ܆ ܥܰܠ ܐܺܝ̈ܕܰܝ ܫܶܡܥܽܘܢ ܣܳܒܳܐ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܩܽܘܩܳܝܳܐ
ܕܟܺܝܪ ܡܽܘܫܶܐ ܪܺܝܫ ܡܰܒܽܘܥܳܐ

ܛܥܶܢܬܶܗ ܡܰܪܝܰܡ ܠܰܡܫܺܝܚܳܐ ܘܰܐܣܶܩܬܶܗ ܠܗܰܝܟܠܳܐ܆ ܐܰܝܟ ܢܳܡܽܘܣܳܐ ܕܺܐܝܬ ܗ̱ܘܳܐ ܠܶܗ܆ ܠܺܝܣܪܳܐܶܝܠ ܡܶܢ ܩܕܺܝܡ܆ ܛܰܥܢܶܗ ܫܶܡܥܽܘܢ܆ ܣܳܒܳܐ ܥܰܠ ܕܪ̈ܳܥܰܘܗ̱ܝ܆ ܘܰܒܢܽܘܨܪ̈ܳܬܳܐ܆ ܗܳܟܰܢ ܐܶܡܰܪ ܠܶܗ܆ ܫܳܪܶܐ ܡܰܠ̈ܟܶܐ ܘܕܰܝܳܢ̈ܶܐ ܘܬܳܓܶܗ ܠܳܐ ܡܶܫܬܪܶܐ܆ ܫܪܺܝ ܡܳܪܝ ܠܣܰܝܒܽܘܬܝ ܒܰܫܠܳܡܳܐ܆ ܕܰܚܙܺܝܬ ܪܰܒܽܘܬܳܟ܆ ܗ̄ܘܗ̄܀

ܫܽܘܒܚܳܐ

ܒܗܰܝܟܰܠ ܩܽܘܕܫܳܐ ܛܰܥܢܶܗ ܗ̱ܘܳܐ ܫܶܡܥܽܘܢ ܣܳܒܳܐ܆ ܠܩܰܫܺܝܫ ܡܶܢ ܟܽܠ ܕܶܐܬܳܐ ܗ̱ܘܳܐ܆ ܕܢܶܫܪܶܝܘܗ̱ܝ ܡܶܢ ܚܰܝ̈ܶܐ܆ ܙܰܒܢܳܐ ܗܘܳܐ ܠܺܝ܆ ܕܰܡܣܰܟܶܐ ܐ̱ܢܳܐ ܠܳܟ܆ ܕܗܳܐ ܚܙܰܝ̈ ܥܰܝܢܰܝ̈܆ ܠܰܚܢܳܢܳܟ ܪܰܒܳܐ܆ ܐܰܝܟ ܕܶܐܫܬܰܘܕܺܝܬ ܫܽܘܒܚܳܐ ܠܳܟ ܘܰܠܫܳܠܽܘܚܳܟ܆ ܦܳܪܩܳܐ ܪܰܒܳܐ ܕܶܐܬܳܐ ܠܶܗ܆ ܕܢܶܦܪܩܰܢ ܡܶܢ ܒܺܝܫܳܐ܆ ܗ̄ܘܗ̄܀

ܡܰܕܪܳܫܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܬܶܫܒ̈ܚܳܢ ܠܰܐܒܽܘܟ ܕܫܰܠܚܳܟ ܨܶܐܕܰܝܢ ܘܛܰܥܢܳܟ ܫܶܡܥܽܘܢ ܒܗܰܝܟܰܠ ܩܽܘܕܫܳܐ.

ܝܰܠܕܶܗ ܕܰܐܒܳܐ ܕܰܗܘܳܐ ܐ̱ܢܳܫܳܐ܆ ܠܗܰܝܟܠܳܐ ܣܠܶܩ ܗ̱ܘܳܐ ܥܰܡ ܐܰܒܳܗܰܘ̈ܗ̱ܝ܆ ܕܰܐܝܟ ܢܳܡܽܘܣܳܐ܆ ܢܩܰܪܒܽܘܢ ܚܠܳܦܰܘܗ̱ܝ܆ ܕܶܒܚܳܐ ܫܰܠܡܳܐ ܐܳܦ ܩܽܘܪܒܳܢܳܐ܆ ܚܙܳܝܗ̱ܝ ܫܶܡܥܽܘܢ ܘܰܣܘܰܚ ܠܩܽܘܒܠܶܗ܆ ܩܳܡ ܘܰܡܢܰܨܰܪ ܠܶܗ ܒܪܶܚܡܬܳܐ܆ ܬܳܐ ܒܰܫܠܳܡܳܐ܆ ܣܽܘܟܳܝܳܐ ܕܥܰܡ̱̈ܡܶܐ܆ ܒܪܺܝܟ ܐܰܒܳܐ ܕܫܰܠܚܳܟ܀

ܚܙܳܝܗ̱ܝ ܗ̱ܘܳܐ ܫܶܡܥܽܘܢ܆ ܒܪܶܟ ܘܰܣܓܶܕ ܠܶܗ܆ ܟܰܕ ܡܶܬܟܰܫܰܦ ܘܗܳܟܰܢ ܐܶܡܰܪ܆ ܬܳܐ ܒܰܫܠܳܡܳܐ܆ ܚܳܐܶܢ ܣܰܝܒܽܘܬܝ܆ ܘܡܰܥܶܠ ܓܰܪ̈ܡܰܝ ܒܰܫܠܳܡ ܠܰܫܝܽܘܠ܆ ܗܳܫܳܐ ܕܰܚܙܺܝܬܳܟ ܡܳܪܝ ܫܪܺܝܢܝ܆ ܕܠܳܟ ܚܳܐܰܪ ܗ̱ܘܺܝܬ ܢܽܘܓܪܳܐ ܪܰܒܳܐ܆ ܐܺܙܰܠ ܐܶܬܬܢܺܝܚ܆ ܥܰܕ ܢܽܘܚܳܡܳܐ܆ ܘܰܐܘܕܶܐ ܠܛܰܝܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠܽ ܗ̱ܘ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܚܰܝܠܳܐ ܕܰܒܝܰܕ ܚܽܘܒܶܗ܆ ܛܰܥܢܶܗ ܥܰܠ ܕܪ̈ܳܥܰܘܗ̱ܝ ܫܶܡܥܽܘܢ ܣܳܒܳܐ.

ܛܥܶܢܬܶܗ ܗ̱ܘܳܬ ܡܰܪܝܰܡ ܠܥܽܘܠܳܐ ܟܰܕ ܒܶܗ܆ ܟܣܶܝܢ ܗ̱ܘܰܘ ܟܽܠ ܐ̱ܪ̈ܳܙܺܝܢ ܕܰܢܒܺܝܽܘܬܳܐ܆ ܛܥܺܝܢ ܗ̱ܘܳܐ ܠܶܗ ܝܰܘܣܶܦ ܘܰܟܣܶܐ ܗ̱ܘܳܐ ܒܶܗ܆ ܚܰܝܠܳܐ ܕܰܡܕܰܒܰܪ ܟܽܠ ܒܶܪ̈ܝܳܬܳܐ܀

ܡܰܪܝܰܡ ܗܳܐ ܝܶܠܕܰܬ ܒܰܒܬܽܘܠܽܘܬܳܗ̇܆ ܘܰܢܗܰܪܘ ܓܶܠ̈ܝܳܢܶܐ ܕܰܢܒܺܝܽܘܬܳܐ܆ ܫܰܪܒܳܐ ܕܶܐܬܡܰܠܰܠ ܐ̱ܪܳܙܳܢܳܐܺܝܬ܆ ܗܳܐ ܡܰܠܝܳܐ ܡܶܢܶܗ ܒܪܺܝܬܳܐ ܟܽܠܳܗ̇܀

ܫܪܺܝܢܝ ܡܳܪܝ ܒܰܫܠܳܡܳܐ ܡܶܬܟܰܫܰܦ ܗ̱ܘܳܐ܆ ܕܗܳܐ ܚܙܰܝܶܝ̈ܢ ܥܰܝ̈ܢܰܝ ܚܢܳܢܳܟ ܪܰܒܳܐ܆ ܢܽܘܗܪܳܐ ܗܰܘ ܕܶܐܬܳܐ ܕܢܶܬܓܠܶܐ ܠܥܳܠܡܳܐ܆ ܘܰܠܫܽܘܒܚܳܐ ܕܥܰܡܳܟ ܗܰܘ ܝܺܣܪܳܐܶܝܠ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܘܳܐ ܢܽܘܗܪܳܐ ܐܰܝܟ
ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܒܪܳܐ ܕܰܐܠܳܗܳܐ ܕܰܐܝܟ ܝܰܠܽܘܕܳܐ ܠܗܰܝܟܠܳܐ ܐܶܬܛܥܶܢܬ.

ܚܙܳܝܗ̱ܝ ܗ̱ܘܳܐ ܫܶܡܥܽܘܢ ܠܺܝܚܺܝܕܳܝܳܐ܆ ܘܰܪܬܰܚ ܠܽܐܘܪܥܶܗ ܒܚܽܘܒܳܐ ܪܰܒܳܐ܆ ܕܰܐܢ̱ܬܽ ܗ̱ܘ ܥܽܘܠܳܐ ܕܡܶܢ ܟܽܠ ܩܰܫܺܝܫ܆ ܕܰܗܘܰܝܬ ܐ̱ܢܳܫܳܐ ܡܶܢ ܒܰܪ̱ܬ ܕܰܘܺܝܕ ܒܪܺܝܟ ܐܺܝܩܳܪܳܟ܀

ܢܰܨܪܶܗ ܫܶܡܥܽܘܢ ܠܒܰܪ ܐܰܠܳܗܳܐ܆ ܒܓܰܘ ܒܶܝܬ ܩܽܘܕܫܳܐ ܒܚܽܘܒܳܐ ܪܰܒܳܐ܆ ܚܕܺܝ ܒܰܚܙܳܬܶܗ ܘܰܣܓܶܕ ܩܽܘܕܡܰܘܗ̱ܝ܆ ܕܗܽܘ ܫܳܪܶܐ ܠܶܗ ܡܶܢ ܐܰܣܽܘܪ̈ܰܘܗ̱ܝ܆ ܒܪܺܝܟ ܝܳܠܽܘܕܶܗ܀

ܫܳܪܶܐ ܠܰܐܪܥܳܐ ܘܠܰܫܡܰܝܳܐ܆ ܫܪܺܝܗ̇ ܡܳܪܝ ܠܣܰܝܒܽܘܬܝ ܒܰܫܠܳܡܳܐ܆ ܐܺܙܰܠ ܐܶܬܬܢܺܝܚ ܒܶܝܬ ܥܰܢܺܝ̈ܕܶܐ܆ ܘܰܐܟܪܶܙ ܫܰܝܢܳܐ ܠܟܽܠ ܕܰܫܟܺܝܒܺܝܢ܆ ܒܪܺܝܟܽ ܗ̱ܘ ܡܶܐܬܝܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ
ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܐܰܫܘܳܢܝ ܐܳܦ ܠܺܝ ܡܳܪܝ ܕܥܰܡ ܟܽܠ ܩܰܕܺܝܫܰܝ̈ܟ܆ ܐܰܣܶܩ ܠܳܟ ܫܽܘܒܚܳܐ ܒܝܰܘܡܳܐ ܕܡܶܐܬܺܝܬܳܟ.

ܣܳܒܳܐ ܘܪܰܒ ܟܽܘܡܪ̈ܶܐ܆ ܕܶܐܬܦܩܶܕ ܛܥܶܢ ܬܽܘܩܦܳܟ܆ ܛܳܥܽܘܢܳܐ ܛܥܺܝܢܳܐ ܕܶܐܬܕܰܡܺܝ ܠܛܳܥܽܘܢܰܘ̈ܗ̱ܝ܆ ܝܰܠܽܘܕܳܐ ܕܨܰܒܶܬ܆ ܕܪ̈ܳܥܶܐ ܕܣܰܝܒܽܘܬܳܐ܆ ܐܰܦܶܣ ܐܳܦ ܠܺܝ ܡܳܪܝ ܕܰܒܠܰܚܡܳܟ ܐܰܫܩܠܳܟ܆ ܐܳܘ ܛܽܘܪܳܐ ܕܰܨܒܳܐ ܘܶܐܬܛܥܶܢ܆ ܘܰܒܚܽܘ̈ܦܢܶܐ ܝܰܡܳܟ ܢܶܬܚܒܶܫ܆ ܘܰܒܟܶܢܦܳܐ ܢܽܘܪܳܟ ܬܶܬܥܰܦܰܩ܀

ܫܶܡܥܽܘܢ ܐܰܣܺܝܪܳܐ܆ ܕܣܰܟܺܝ ܠܡܰܘܠܳܕܳܟ܆ ܫܰܡܠܺܝܬ ܣܽܘܟܳܝܶܗ ܘܰܚܙܳܟ ܘܰܚܕܺܝ ܒܳܟ܆ ܒܒܶܝܬ ܩܽܘܕܫܳܐ ܛܰܥܢܳܟ܆ ܘܫܰܪܺܝ ܡܢܰܨܰܪ ܠܳܟ܆ ܐܳܘ ܝܰܠܕܳܐ ܪܚܺܝܡܳܐ ܕܥܰܠ ܕܪ̈ܳܥܶܐ ܐܶܙܕܰܝܰܚ܆ ܫܪܺܝܢܝ ܡܳܪܝ ܒܰܫܠܳܡܳܐ ܕܠܳܟ ܚܙܺܝܬ܆ ܘܡܳܐ ܕܫܶܟܒܶܬ ܬܽܘܒ ܠܳܐ ܬܶܛܥܶܝܢܝ܆ ܐܶܠܳܐ ܢܰܚܶܡܰܝܢܝ ܕܰܐܘܕܶܐ ܠܳܟ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ ܘܣܳܒܳܐ ܩܰܝܳܡ܆

ܒܪܺܝܟܽ ܗ̱ܘ ܕܡܰܥܒܰܪ ܠܟܽܠܗܽܘܢ ܕܳܪ̈ܶܐ ܘܗܽܘ ܠܳܐ ܥܳܒܰܪ܀

ܐܰܝܟ ܢܳܡܽܘܣܳܐ ܠܗܰܝܟܠܳܐ ܣܠܶܩ ܗ̱ܘܳܐ ܡܶܠܬܶܗ ܕܰܐܒܳܐ܆ ܘܥܰܡܶܗ ܝܰܘܣܶܦ ܟܺܐܢܳܐ ܘܡܰܪܝܰܡ ܒܬܽܘܠܬܳܐ ܕܟܺܝܬܳܐ܆ ܕܰܢܩܰܪܒܽܘܢ ܗ̱ܘܰܘ ܬܪܶܝܢ ܫܽܘ̈ܦܢܺܝܢܶܐ ܕܶܒܚܳܐ ܫܰܠܡܳܐ܆ ܐܰܝܟ ܢܳܡܽܘܣܳܐ ܕܰܐܫܠܶܡ ܡܽܘܫܶܐ ܠܒܶܝܬ ܝܺܣܪܳܐܶܝܠ܀

ܪܬܰܚ ܗ̱ܘܳܐ ܫܶܡܥܽܘܢ ܒܪܽܘܚܳܐ ܕܩܽܘܕܫܳܐ ܠܽܘܩܒܰܠ ܛܰܠܝܳܐ܆ ܘܫܰܪܺܝ ܡܚܰܒܶܒ ܘܰܡܢܰܨܰܪ ܠܶܗ ܒܬܶܗܪܳܐ ܪܰܒܳܐ܆ ܕܪ̈ܳܥܶܐ ܡܚܺܝ̈ܠܶܐ ܛܰܥܢܽܘܗ̱ܝ ܠܰܒܪܳܐ ܘܫܰܪܺܝ ܡܦܺܝܣ ܠܶܗ܆ ܕܳܐܘ ܣܽܘܟܳܝܶܗ ܕܥܰܡܝ ܝܺܣܪܳܐܶܝܠ ܫܪܺܝܢܝ ܒܰܫܠܳܡܳܐ܀

ܥܢܳܢ̈ܶܐ ܩܪܰܐܽܘܟ ܕܬܶܚܽܘܬ ܠܡܶܨܪܶܝܢ ܒܚܰܝܠܳܐ ܘܓܽܘܢܚܳܐ܆

ܘܰܛܥܺܝܢܰܬ ܠܶܗ ܠܡܳܪܳܐ ܕܟܽܠܗܽܘܢ ܐܰܬܪ̈ܰܘܳܬܳܐ܀