ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܶܗ܆ ܕܡܳܪܝ ܒܰܪܨܰܘܡܳܐ ܒܰܐܪܒܰܥ ܦܶܢ̈ܝܳܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܝܰܘܡܳܢܳܐ ܗܳܐ ܡܶܙܕܰܝܰܚ܆ ܝܽܘܡ ܕܽܘܟܪܳܢܶܗ ܒܥܺܕܬܳܐ ܩܰܕܺܝܫܬܳܐ܆ ܕܓܰܒܝܳܐ ܘܪܰܒܳܐ ܒܰܪܨܰܘܡܳܐ ܨܠܽܘܬܶܗ ܥܰܡܰܢ܀

ܒܰܠܒܽܘ̈ܫܶܐ ܕܦܰܪܙܠܳܐ ܘܣܰܥܪܳܐ܆ ܒܨܰܘ̈ܡܶܐ ܐܰܡܺܝ̈ܢܶܐ ܘܰܒܫܰܗܪ̈ܶܐ ܡܬܺܝ̈ܚܶܐ܆ ܡܶܬܓܰܢ̱ܒܰܪ ܗ̱ܘܰܝܬ ܥܰܠ ܚܰܫ̈ܶܐ ܠܰܝ̈ܠܰܝ ܐܺܝܡܳܡ܀

ܟܶܢܫܳܐ ܕܙܰܝܰܚ ܕܽܘܟܪܳܢܳܟ܆ ܡܳܪܝ ܒܰܪܨܰܘܡܳܐ ܢܶܬܢܰܛܰܪ ܒܰܨܠܽܘܬܳܟ܆ ܡܶܢ ܟܡܺܐܢ̈ܶܐ ܕܳܐܟܶܠܩܰܪܨܳܐ ܨܠܽܘܬܳܟ ܥܰܡܰܢ܀

ܛܽܘܒܰܝܟ ܐܰܒܽܘܢ ܩܰܕܺܝܫܳܐ܆ ܕܰܫܘܰܝܬ ܕܬܶܗܘܶܐ ܢܰܘܣܳܐ ܠܪܽܘܚ ܩܽܘܕܫܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܥܰܡ̱̈ܡܶܐ ܕܙܰܝܰܚܘ ܕܽܘܟܪܳܢܳܟ܆ ܐܰܒܽܘܢ ܚܰܣܝܳܐ ܓܰܒܝܳܐ ܒܰܪܨܰܘܡܳܐ܆ ܢܶܫܬܘܽܘܢ ܠܚܽܘܣܳܝ ܚܰܘ̈ܒܰܝܗܽܘܢ ܒܰܨ̈ܠܰܘܳܬܳܟ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܒܰܨܠܽܘܬܳܟ ܐܰܒܽܘܢ܆ ܒܬܽܘܩ̈ܠܳܬܳܟ ܕܒܰܝܢܳܬ ܛܽܘܪ̈ܶܐ܆ ܒܕܶܡ̈ܥܶܐ ܕܰܐܪ̈ܕܺܝ ܗ̱ܘܰܘ ܥܰܝ̈ܢܰܝܟ܆ ܐܰܦܺܝܣ ܥܰܡܰܢ ܠܰܐܠܳܗܳܐ܆ ܕܰܒܝܰܕ ܨܠܰܘ̈ܳܬܳܟ. ܢܚܰܣܶܐ ܘܢܶܫܒܽܘܩ ܚܰܘ̈ܒܳܬܰܢ܀

ܫܠܳܡ ܠܳܟ ܐܳܘ ܓܰܒܝܳܐ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܫܠܳܡܳܐ ܠܣܳܗ̈ܕܶܐ ܕܥܰܡܳܟ܆ ܕܰܠܥܳܠܰܡ ܢܶܨܚܳܢܰܝ̈ܟܽܘܢ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܒܰܠܒܽܘܫܳܐ ܕܦܰܪܙܠܳܐ܆ ܒܫܰܗܪܳܐ ܘܨܰܘܡܳܐ ܘܰܨܠܽܘܬܳܐ܆ ܒܟܰܘܪ̈ܳܢܶܐ ܘܥܰܪܝܳܐ ܘܬܰܠܓܳܐ܆ ܐܶܬܢܰܨܰܚ ܡܳܪܝ ܒܰܪܨܰܘܡܳܐ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܒܰܝܬܳܟ ܐܶܬܰܝܢܰܢ ܡܳܪܝܳܐ

ܘܳܠܶܐ ܠܰܢ ܕܰܒܩܽܘ̈ܠܳܣܶܐ܆ ܘܰܒܗܽܘ̈ܠܳܠܶܐ ܘܒܰܙܡܺܝܪ̈ܳܬܳܐ ܕܪܽܘܚ ܕܩܽܘܕܫܳܐ܆ ܘܕܽܘܒܳܪ̈ܶܐ ܕܟܰܝ̈ܳܐ܆ ܢܝܰܩܰܪ ܠܝܰܘܡܳܐ ܕܕܽܘܟܪܳܢܶܗ܆ ܕܡܳܪܝ ܒܰܪܨܰܘܡܳܐ ܡܢܰܨܚܳܢܳܐ ܕܗܰܝܡܳܢܽܘܬܳܐ܆ ܘܣܳܬܽܘܪܳܐ ܕܛܽܘܥܝܰܝ܆ ܕܣܰܝܒܰܪ ܨܰܥܪܳܐ ܘܨܽܘ̈ܚܝܳܬܳܐ܆ ܪܓܽܘܡܝܳܐ ܕܟܺܐܦ̈ܶܐ ܘܠܳܐ ܐܶܬܪܰܦܺܝ ܪܶܥܝܳܢܶܗ܆ ܘܰܙܟܳܐ ܠܶܐܪ̈ܶܣܺܝܣ܆ ܕܰܬܪ̈ܰܝܰܝ ܟܝܳܢ̈ܶܐ܆ ܐܰܠܳܗܳܐ ܒܰܨ̈ܠܰܘܳܬܶܗ ܐܶܬܪܰܚܰܡ ܥܠܰܝܢ܀

ܫܽܘܒܚܳܐ

ܝܳܐܶܐ ܘܙܳܕܶܩ ܕܰܢܫܰܒܰܚ܆ ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ ܦܰܪܰܩܠܺܝܛܳܐ܆ ܚܰܕ ܐܺܝܬܝܳܐ ܡܫܰܒܚܳܐ܆ ܒܗܳܢܳܐ ܝܰܘܡܳܐ ܕܕܽܘܟܪܳܢܶܗ܆ ܕܢܰܨܺܝܚ ܫܽܘܦܪ̈ܶܐ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܐܰܬܠܺܝܛܳܐ ܙܪܺܝܙܳܐ܆ ܕܡܶܢ ܛܰܠܝܽܘܬܶܗ ܠܣܰܝܒܽܘܬܶܗ܆ ܒܥܰܡ̈ܠܶܐ ܘܕܽܘܥ̈ܬܶܐ ܩܪܰܒܬܳܢܳܐܺܝܬ ܐܶܬܟܰܬܰܫ܆ ܘܰܙܟܳܐ ܘܶܐܬܢܰܨܰܚ܆ ܘܰܐܫܩܶܠ ܠܰܡܪ̈ܰܘܡܶܐ܆ ܐܰܠܳܗܳܐ ܒܰܨ̈ܠܰܘܳܬܶܗ ܚܰܣܳܐ ܠܰܢ ܚܰܘ̈ܒܰܝܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ ܡܽܘܢ ܝܺܬܰܪܘ

ܛܽܘܒܰܝܟ ܐܰܒܽܘܢ ܩܰܕܺܝܫܳܐ܆ ܢܰܨܺܝܚܳܐ ܡܳܪܝ ܒܰܪܨܰܘܡܳܐ܆ ܕܫܰܡܠܺܝܬ ܪܶܗܛܳܐ ܕܕܽܘܒܳܪ̈ܰܝܟ܆ ܒܦܽܘܠܚܳܢܳܐ ܕܰܡܝܰܬܪ̈ܳܬܳܐ܆ ܗܳܐ ܡܶܬܓܰܐܶܝܬ ܒܰܣܡܳܟܳܐ܆ ܥܰܡ ܢܰܨܺܝ̈ܚܶܐ ܕܰܢܨܰܚܘ ܘܶܐܬܟܰܠܰܠܘ܆ ܥܰܡ ܛܽܘ̈ܒܳܢܶܐ ܘܰܐܒܺܝ̈ܠܶܐ܆ ܕܰܣܢܰܘ ܥܳܠܡܳܐ ܕܥܳܩ̈ܳܬܳܐ܆ ܥܰــ݉ܠ ܗܳܝ ܐܰܟܘܳܬܗܽܘܢ܆ ܒܰܥܕܶܢ ܐܺܝܬܰܘܗ̱ܝ ܕܽܘܝܳܪܳܟ܆ ܒܥܺܝ ܘܶܐܬܟܰܫܰܦ ܐܳܘ ܓܰܒܝܳܐ ܕܢܶܚܙܶܝܟ ܟܽܠܰܢ܆ ܒܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܀

ܫܽܘܒܚܳܐ

ܐܰܓܽܘܢܳܐ ܬܡܺܝܗܳܐ ܣܰܝܒܰܪ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܐܩܪܶܒ ܘܰܙܟܳܐ ܘܶܐܬܢܰܨܰܚ܆ ܘܰܐܟܶܣ ܡܰܠ̈ܟܶܐ ܕܠܳܐ ܟܽܘܚܳܕ܆ ܘܰܒ̈ܚܰܝܶܐ ܕܟܰܝ̈ܳܐ ܥܰܙܺܝ ܒܟܰܦܢܳܐ ܘܨܰܗܝܳܐ ܟܽܠܗܽܘܢ ܝܰܘ̈ܡܳܬܶܗ܆ ܘܠܳܐ ܐܶܬܪܰܦܝܰܬ ܚܠܺܝܨܽܘܬܶܗ܆ ܥܕܰܡܳܐ ܕܫܰܠܶܡ ܐܰܓܽܘܢܶܗ܆ ܫܽܘ݉ܒܚܳܐ ܠܗܰܘ ܕܥܰܒܕܶܗ܆ ܢܰܘܣܳܐ ܕܚܳܫܰܚ ܠܺܐܝܩܳܪܶܗ܆ ܘܰܥܡܰܪ ܒܶܗ ܐܳܦ ܡܰܠܶܠ ܒܶܗ܆ ܘܝܰܗ̱ܒܠܶܗ ܟܠܺܝܠܳܐ܆ ܕܙܳܟܽܘܬܳܐ ܥܰܡ ܢܰܨܺܝ̈ܚܶܐ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ

ܦܐܶܐ ܗ̱ܘܳܐ ܘܰܪܓܺܝܓ܆ ܗܰܘ ܩܳܠܳܐ ܕܶܐܡܰܪ ܡܳܪܰܢ܆ ܕܡܰܘܒܶܕ ܢܰܦܫܶܗ ܡܶܛܽܠܳܬܝ܆ ܒܡܰܠܟܽܘܬ ܪܰܘܡܳܐ ܡܶܫܟܰܚ ܠܳܗ̇܆ ܘܟܽܠ ܕܡܰܘܕܶܐ ܒܺܝ ܩܕܳܡ ܐ̱ܢܳܫ̈ܳܐ܆ ܩܽܘܕܡܰܬ ܐܰܒܳܐ ܐܰܘܕܶܐ ܒܶܗ܆ ܘܫܰܡܥܶܗ ܟܺܐܢܳܐ ܒܰܪܨܰܘܡܳܐ܆ ܘܰܣܢܳܐ ܢܝܳܚ̈ܶܐ ܥܳܒܽܘܪ̈ܶܐ܆ ܘܗܳܐ ܡܶܬܒܰܣܰܡ ܒܰܓܢܽܘܢܳܐ܆ ܥܰܡ ܦܰܠܳܚ̈ܶܐ ܟܰܫܺܝܪ̈ܶܐ܀

ܫܽܘܒܚܳܐ

ܒܪܺܝܟܽ ܗ̱ܘ ܕܰܐܘܪܶܒ܆ ܕܽܘܟܪܳܢܳܟ ܡܳܪܝ ܒܰܪܨܰܘܡܳܐ܆ ܟܳܗܢܳܐ ܕܰܐܠܶܦ ܬܰܩ̈ܢܳܬܳܐ܆ ܘܚܰܡܫܺܝܢ ܓܶܝܪ ܘܰܐܪܒܰܥ ܫܢܰܝ̈ܳܐ܆ ܚܰܡܣܶܢ ܒܟܰܦܢܳܐ ܘܰܒܨܰܗܝܳܐ܆ ܘܠܳܐ ܐܰܡܶܢ ܐܰܘ ܡܶܐܢܰܬ ܠܶܗ܆ ܘܗܳܐ ܡܳܪܰܢ ܐܰܝܟ ܕܶܐܫܬܰܘܕܺܝ܆ ܦܳܪܰܥ ܠܶܗ ܐܰܓܪܳܐ ܕܥܰܡ̈ܠܰܘܗ̱ܝ܆ ܘܡܶܬܒܰܣܰܡ ܒܦܳܬܽܘܪ ܚܰܝ̈ܶܐ܆ ܘܥܳܐܶܠ ܠܰܓܢܽܘܢ ܚܰܕ̈ܘܳܬܳܐ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܘܰܢܫܰܒܚܽܘܢ ܝܳܬܒܰܝ̈ ܫܩܺܝ̈ܦܶܐ܆ ܘܡܶܢ ܪ̈ܺܝܫܶܐ ܕܛܽܘܪ̈ܶܐ ܢܶܩܥܽܘܢ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܓܢܺܝܙܬܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܒܳܥܶܝܢܰܢ ܡܶܢܳܟ ܡܳܪܝܳܐ܆ ܚܽܘܣ ܥܠܰܝܢ ܒܝܰܕ ܒܳܥ̈ܘܳܬܶܗ܀

ܢܶܬܟܰܫܰܦ ܘܢܶܒܥܶܐ ܪ̈ܰܚܡܶܐ. ܘܰܢܦܺܝܣ ܥܰܡܰܢ ܠܰܐܠܳܗܳܐ. ܢܰܨܺܝܚܳܐ ܠܒܺܝܫ ܙܳܟܽܘܬܳܐ. ܒܬܽܘܠܳܐ ܢܰܟܦܳܐ ܘܨܰܝܳܡܳܐ. ܘܪܰܒܳܐ ܘܓܰܒܝܳܐ ܕܰܐܒܺܝ̈ܠܶܐ. ܕܶܐܬܢܰܨܰܚ ܒܰܐܬܠܺܝܛܽܘܬܳܐ. ܒܰܪܨܰܘܡܳܐ ܢܰܨܺܝܚ ܫܽܘܦܪ̈ܶܐ. ܪܳܚܡܶܗ ܕܡܳܪܝܳܐ ܫܰܪܺܝܪܳܐ. ܓܰܒܪܳܐ ܕܰܪܒܳܐ ܒܓܶܠ̈ܝܳܢܶܐ. ܡܶܢ ܛܰܠܝܽܘܬܶܗ ܠܣܰܝܒܽܘܬܶܗ. ܒܨܰܘ݉ܡܳܐ ܐܶܬܪܰܒܺܝ ܗ̱ܘܳܐ ܩܰܕܺܝܫܳܐ܆ ܡܶـ݉ܢ ܫܽܘܪܳܝܳܐ ܠܫܽܘܠܳܡܳܐ ܨܠܽܘܬܶܗ ܥܰܡܰܢ܀

ܚܰܡܫܺܝܢ ܓܶܝܪ ܘܰܐܪܒܰܥ ܫ̈ܢܰܝܳܐ. ܚܰܡܣܶܢ ܒܟܰܦܢܳܐ ܘܰܒܨܶܗܝܳܐ. ܘܠܳܐ ܪܰܛܶܢ ܐܰܘ ܡܶܐܢܰܬ ܠܶܗ. ܒܗܳܢܳܐ ܢܽܘܓܪܳܐ ܕܰܫ̈ܢܰܝܳܐ. ܒܰܫ̈ܩܺܝܦܶܐ ܥܒܰܕ ܠܶܗ ܥܽܘܡܪܳܐ. ܘܒܰܡܥܰܪ̈ܶܐ ܥܡܰܪ ܥܰܡ ܕܺܐܒ̈ܶܐ. ܗܘܰܘ ܠܶܗ ܥܰܡܶܗ ܬܰܠܡܺܝ̈ܕܶܐ. ܐܰܝܟ ܡܳܐܐ ܘܚܰܡܫܺܝܢ ܫܰܪܺܝܪ̈ܶܐ. ܕܳܐܦ ܗܶܢܽܘܢ ܝܺܪܶܒܘ ܘܰܢܨܰܚܘ ܘܶܐܫܬܰܒܰܚܘ ܩܕܳܡ ܐܰܠܳܗܳܐ. ܘܳܐ݉ܬܘ̈ܳܬܳܐ ܘܚܰܝ̈ܠܶܐ ܣܥܰܪܘ ܗ̱ܘܰܘ ܩܰܕܺܝ̈ܫܶܐ. ܒܚܰܝܰܝ̈݉ܗܽܘܢ ܘܰܒܡܰܘ̈ܬܰܝܗܽܘܢ ܨܠܽܘܬܗܽܘܢ ܥܰܡܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܒܰܨܠܽܘܬܶܗ ܘܒܰܨܠܽܘܬ ܚܰܒܪ̈ܰܘܗ̱ܝ: ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀