ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܰܚܠܳܦܰܘܗ̱ܝ. ܝܰܠܽܘ̈ܕܶܐ ܕܒܶܝܬ ܠܚܶܡ܆ ܒܦܽܘܡܳܐ ܕܣܰܝܦܳܐ ܝܰܩ̈ܕܶܐ ܫܰܠ̈ܡܶܐ ܗܘܰܘ܆ ܪܰܚܶܡ ܥܠܰܝܢ ܐܰܠܳܗܳܐ܀

ܚܠܰܛܘ ܗ̱ܘܰܘ ܕܶܡ̈ܥܶܐ. ܥܰܡ ܚܰܠܒܳܐ ܘܰܕܡܳܐ܆ ܒܓܰܘ ܟܶܢ̈ܦܳܬܳܐ܆ ܘܰܠܡܳܪܝܳܐ ܩܰܪܶܒܘ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܠܫܰܒܪ̈ܶܐ. ܥܠܺܝ̈ܒܶܐ ܕܶܐܬܩܰܛܰܠܘ. ܡܶܢ ܗܶܪܳܘܕܶܣ ܐܰܝܟ ܣܳܗ̈ܕܶܐ ܟܰܠܶܠ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܒܝܰܠܕܶܗ. ܕܒܰܒܣܰܪ ܕܡܶܢ ܒܬܽܘܠܬܳܐ܆ ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ ܕܒܶܝܬ ܠܚܶܡ܀

ܫܽܘܒܚܳܐ ܠܛܳܒܳܐ. ܕܰܓܒܳܐ ܠܝܰܠܽܘ̈ܕܶܐ܆ ܘܡܶܛܽܠ ܚܽܘܒܶܗ ܡܰܘܬܳܐ ܚܢܺܝܓܳܐ ܣܒܰܠܘ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܒܚܽܘܒܶܗ. ܝܰܠܽܘ̈ܕܶܐ ܐܶܬܢܟܶܣܘ܆ ܡܶܢ ܗܶܪܳܘܕܶܣ ܡܰܠܟܳܐ ܕܠܳܐ ܢܳܡܽܘܣ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܒܪܺܝܟܽ ܗ̱ܘ ܕܰܒܣܶܡ ܠܶܗ܆ ܪܺܝܚܳܐ ܕܩܶܛܠܰܝ̈ܗܽܘܢ܆ ܕܝܰܠܽܘ̈ܕܶܐ ܕܟܰܝ̈ܳܐ܆ ܕܶܐܬܩܰܛܰܠܘ ܡܶܛܽܠܳܬܶܗ܆ ܗܳܐ ܢܛܺܝܪ ܠܗܽܘܢ ܓܢܽܘܢܳܐ܆ ܘܓܰܢܬܳܐ ܘܡܰܠܟܽܘܬܳܐ܆ ܘܠܗܶܪܳܘܕܶܣ ܛܪܽܘܢܳܐ܆ ܓܺܗܰܢܳܐ ܕܠܳܐ ܡܶܬܕܰܥܟܳܐ܀

ܟܽܠ ܐܰܝܢܳܐ ܕܥܳܒܶܕ܆ ܕܽܘܟܪܳܢܗܽܘܢ ܕܫܰܒܪ̈ܶܐ܆ ܠܰܡܫܺܝܚܳܐ ܡܝܰܩܰܪ܆ ܕܰܫܪܶܐ ܒܓܰܪ̈ܡܰܝܗܽܘܢ܆ ܗܰܘ ܕܡܶܛܽܠ ܟܳܣܳܐ܆ ܕܡܰܝ̈ܳܐ ܐܶܫܬܰܘܕܺܝ܆ ܕܝܳܗܶܒ ܡܰܠܟܽܘܬܳܐ܆ ܘܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܒܰܚܣܳܡܳܐ ܕܪܽܘܓܙܳܐ܆ ܦܩܰܕ ܗ̱ܘܳܐ ܗܶܪܳܘܕܶܣ܆ ܕܢܶܬܩܰܛܠܽܘܢ ܛܠܳܝ̈ܶܐ܆ ܝܰܠܽܘ̈ܕܶܐ ܕܒܶܝܬ ܠܚܶܡ܆ ܕܰܫܡܰܥ ܗ̱ܘܳܐ ܡܶܛܽܠ܆ ܡܰܘܠܳܕܶܗ ܕܰܒܪܳܐ܆ ܕܫܳܪܶܐ ܫܽܘܠܛܳܢܶܗ܆ ܘܰܠܥܳܠܰܡ ܥܳܠܡܺܝܢ ܡܰܡܠܶܟ܀

ܩܳܠܳܐ ܡܰܪܺܝܪܳܐ܆ ܫܡܰܥ ܗ̱ܘܳܐ ܐܶܪܰܡܝܳܐ܆ ܒܪܳܡܬܳܐ ܕܒܶܝܬ ܠܚܶܡ܆ ܟܰܕ ܡܶܬܩܰܛܠܺܝܢ ܗ̱ܘܰܘ ܫܰܒܪ̈ܶܐ܆ ܘܰܥܢܳܐ ܘܶܐܡܰܪ ܠܳܗ̇܆ ܠܪܳܚܶܝܠ ܕܠܳܐ ܬܶܒܟܶܝܢ܆ ܕܕܳܢܰܚ ܡܫܺܝܚܳܐ܆ ܘܰܒܢܽܘܗܪܶܗ ܗܽܘ ܡܒܰܝܰܐ ܠܶܟܝ܀

ܒܪܺܝܚܳܐ ܕܩܶܛܠܰܝ̈ܟܽܘܢ܆ ܫܰܒܪ̈ܶܐ ܘܝܰܠܽܘ̈ܕܶܐ܆ ܐܶܬܬܢܺܝܚ ܐܰܠܳܗܳܐ܆ ܘܩܰܒܶܠ ܣܳܗܕܽܘܬܟܽܘܢ܆ ܘܰܒܗܶܬ ܥܰܘܳܠܳܐ. ܡܰܠܟܳܐ ܗܶܪܳܘܕܶܣ܆ ܘܰܗܘܳܐ ܒܶܙܚܳܐ܆ ܒܰܩܪܳܒܳܐ ܕܰܣܕܰܪ ܥܰܡܟܽܘܢ܀

ܫܽܘܒܚܳܐ

ܒܓ̈ܶܦܶܐ ܩܰܠܺܝ̈ܠܶܐ܆ ܢܶܫܪܳܐ ܡܛܳܐ ܠܡܶܨܪܶܝܢ܆ ܘܢܶܨܳܐ ܗܰܘ ܠܺܝܛܳܐ܆ ܫܡܰܛ ܣܰܝܦܳܐ ܠܩܶܛܠܳܐ܆ ܘܝܰܠܽܘ̈ܕܶܐ ܘܫܰܒܪ̈ܶܐ܆ ܩܰܛܶܠ ܕܠܳܐ ܪ̈ܰܚܡܶܐ܆ ܘܰܠܕܶܡܗܽܘܢ ܐܶܫܰܕ. ܘܨܰܘܪ̈ܰܝܗܽܘܢ ܦܰܣܶܩ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ ܡܽܘܢ ܝܺܬܰܪܘ

ܪܳܚܶܝܠ ܒܳܟܝܳܐ ܠܚܰܒܺܝ̈ܒܶܝܗ̇. ܘܠܳܐ ܨܳܒܝܳܐ ܠܡܶܬܒܰܝܳܐܽܘ. ܩܰܕܶܡ ܒܰܕܶܩ ܐܶܪܰܡܝܳܐ. ܕܶܐܫܬܰܠܰܛ ܥܰܠ ܟܰܣ̈ܝܳܬܳܐ. ܕܰܚܙܳܐ ܫܰܒܪ̈ܶܐ ܕܡܶܬܢܰܣܟܺܝܢ. ܒܓܰܘ ܒܶܝܬ ܠܚܶܡ ܒܺܐܝ̈ܕܰܝ ܗܶܪܳܘܕܶܣ. ܕܰܨܒܳܐ ܢܚܰܒܶܠ ܥܰܘܳܠܳܐ܆ ܠܶܐܡܪܶܗ ܚܰܝܳܐ ܕܰܐܠܳܗܳܐ. ܫܽܘ݉ܒܚܳܐ ܠܗܰܘ ܟܰܣܝܳܐ. ܕܶܐܬܬܰܚܬܺܝ ܘܰܗܘܳܐ ܓܰܠܝܳܐ. ܘܫܰܢܺܝ ܠܡܶܨܪܶܝܢ ܕܰܫܦܰܪ ܠܶܗ. ܠܳܐ ܗ̱ܘܳܐ ܕܰܕܚܶܠ ܐܶܠܳܐ ܢܫܰܡܠܶܐ ܢܒܺܝܽܘܬܳܐ܀

ܫܽܘܒܚܳܐ

ܡܳܐ ܦܐܶܐ ܗ̱ܘܳܐ ܕܶܡܗܽܘܢ ܚܰܣܝܳܐ. ܕܝܰܠܽـܘ̈ܕܶܐ ܟܰܕ ܡܶܬܚܰܪܒܺܝܢ܆ ܕܩܰܪܶܒ ܣܰܝܦܶܗ ܕܗܶܪܳܘܕܶܣ. ܫܰܒܪ̈ܶܐ ܐܶܡܪ̈ܶܐ ܬܰܡܺܝ̈ܡܶܐ. ܘܰܐܝܟ ܩܽܘܪ̈ܒܳܢܶܐ ܐܶܬܩܰܪܰܒܘ܆ ܠܰܡܠܶܟ ܡܰܠ̈ܟܶܐ ܕܰܨܒܳܐ ܘܶܐܬܬܰܚܬܺܝ. ܘܰܟܠܺܝ̈ܠܰܝܗܽܘܢ ܒܰܫܡܰܝܳܐ. ܘܰܓ̈ܢܽܘܢܰܝܗܽܘܢ ܒܰܡܪ̈ܰܘܡܶܐ. ܘܰܒܝܰܘ݉ܡܳܐ ܕܳܐܬܶܐ܆ ܦܳܪܽܘܩܰܢ ܕܢܶܥܒܶܕ ܕܺܝܢܳܐ. ܥܳܐܠܺܝܢ ܥܰܡܶܗ ܠܰܓܢܽܘܢܳܐ. ܘܙܳܡܪܺܝܢ ܫܽܘܒܚܳܐ ܘܡܶܬܒܰܣܡܺܝܢ ܡܶܢ ܦܰܪܨܽܘܦܶܗ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡ̣ܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡ̣ܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ ܥܰܠ

ܠܟܽܘܢ ܛܽܘܒܰܝܟܽܘܢ܆ ܝܰܠܽܘ̈ܕܶܐ ܕܡܺܝܬܘ ܒܰܡܫܺܝܚܳܐ܆ ܕܰܗܘܳܐ ܕܶܡܟܽܘܢ ܩܽܘܪܒܳܢܳܐ܆ ܘܶܐܬܩܰܪܰܒܘ ܠܰܡܠܶܟ ܡܰܠ̈ܟܶܐ܆ ܘܰܚܛܺܝܬܳܐ ܒܟܽܘܢ ܠܳܐ ܫܶܠܛܰܬ܆ ܒܥܰܘܠܳܐ ܠܳܐ ܐܶܬܟܰܬܰܡܬܽܘܢ܆ ܫܽܘܒܚܳܐ ܠܶܗ ܠܺܝ݂ܚܺܝ݂ܕܳܝܳܐ܆ ܕܰܗܘܳܐ ܥܽܘܠܳܐ ܒܨܶܒܝܳܢܶܗ܆ ܘܶܐܬܬܰܚܬܺܝ ܠܰܙܥܽܘܪܽܘܬܳܐ܆ ܡܶܛܽܠ ܚܰܝ̈ܶܐ ܕܐ̱ܢܳܫܽܘܬܳܐ܀

ܫܽܘܒܚܳܐ

ܒܗܳܢܳܐ ܝܰܘܡܳܐ܆ ܩ̈ܳܠܶܐ ܚܢܺܝ̈ܓܶܐ ܡܶܫܬܰܡܥܺܝܢ܆ ܡܶܢ ܒܶܝܬ ܠܚܶܡ ܕܺܝܗܽܘܕܳܐ܆ ܥܰܠ ܝܰܠܽܘ̈ܕܶܐ ܕܶܐܬܩܰܛܰܠܘ܆ ܡܶܢ ܦܽܘܡ ܐܶܡ̈ܗܳܬܳܐ ܕܡܺܝܬܘ ܗ̱ܘܰܘ܆ ܥܽܘ̈ܠܰܝܗܶܝܢ ܡܶܛܽܠ ܡܳܪܰܢ܆ ܛܽܘܒܰܝܗܶܝܢ ܕܰܐܝܟ ܩܽܘܪ̈ܒܳܢܶܐ܆ ܐܶܬܩܰܪܰܒܘ ܩܕܳܡ ܐܰܠܳܗܳܐ܆ ܘܗܳܐ ܡܶܙܕܰܝ݂ܰܚ ܝܽܘܡ ܥܺܐܕܗܽܘܢ܆ ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝ̣ܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒܕ̈ܶܐ: ܝܳܪ̈ܬܶܐ ܛܳܒ̈ܶܐ ܘܰܒܢܰܝ̈ܳܐ. ܘܗ̣ܽܘ ܡܦܰܨܶܐ ܠܗܽܘܢ ܡ̣ܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܐܶܫܰܕܘ ܕܶܡܗܽܘܢ ܐܰܝܟ ܡܰܝ̈ܳܐ܆ ܚܕܳܪ̈ܶܝܗ̇ ܕܽܐܘܪܫܠܶܡ ܘܠܰܝܬ ܕܩܳܒܰܪ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܟܽܘܢ ܥܰܡܰܢ ܫܰܒܪ̈ܶܐ ܒܪܺܝܪ̈ܶܐ ܨܠܽܘܬܟܽܘܢ ܥܰܡܰܢ܆

ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܢܦܰܩ ܦܽܘܩܕܳܢܳܐ ܘܥܰܡܶܗ ܣܰܝܦܳܐ ܕܒܶܝܬ ܗܶܪܳܘܕܶܣ܆ ܕܰܢܒܰܥܰܪ ܗ̱ܘܳܐ ܫܰܒܪ̈ܰܘܗ̱ܝ ܕܰܐܬܪܳܐ ܕܢܶܚܪܽܘܒ ܐܶܢܽܘܢ܆ ܣܓܺܝܘ ܫܳܐܽܘ̈ܠܶܐ ܡܶܛܽܠ ܕܶܟܪ̈ܶܐ ܢܡܺܝܬܽܘܢ ܐܶܢܽܘܢ܆ ܘܰܕܠܳܐ ܪ̈ܰܚܡܶܐ ܥܰܡ ܐܶܡ̈ܗܳܬܗܽܘܢ ܡܶܬܩܰܛܠܺܝܢ ܗ̱ܘܰܘ܀

ܫܽܘܒܚܳܐ ܠܰܐܒܳܐ ܕܩܰܒܶܠ ܕܶܒܚܳܐ ܕܫܰܒܪ̈ܶܐ ܒܪܺܝܪ̈ܶܐ. ܘܣܶܓܕܬܳܐ ܠܰܒܪܳܐ ܕܡܶܛܽܠܳܬܶܗ ܐܶܬܩܰܛܰܠܘ ܗ̱ܘܰܘ. ܬܰܘܕܺܝ ܠܪܽܘܚܳܐ ܕܚܰܘܺܝ ܐܶܢܽܘܢ ܣܳܗ̈ܕܶܐ ܚܰܕ̱̈ܬܶܐ܆ ܠܡܳܪܗܽܘܢ ܫܽܘܒܚܳܐ ܠܗܽܘܢ ܐܺܝܩܳܪܳܐ ܘܰܥܠܰܝܢ ܪ̈ܰܚܡܶܐ܀

ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀