ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܛܽܘܒܳܐ ܪܰܒܳܐ ܠܝܰܠܽܘ̈ܕܶܐ܆ ܕܰܒܫܰܒܪܽܘܬܗܽܘܢ ܐܶܬܟܰܠܰܠܘ܆ ܘܰܐܝܟ ܪ̈ܺܝܫܝܳܬܳܐ ܘܩܽܘܪ̈ܒܳܢܶܐ܆ ܐܶܬܩܰܪܰܒܘ ܠܰܡܠܶܟ ܡܰܠ̈ܟܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܪܳܚܶܝܠ ܒܳܟܝܳܐ ܥܰܠ ܝܰܠ̈ܕܶܝܗ̇: ܘܠܳܐ ܨܳܒܝܳܐ ܠܡܶܬܒܰܝܳܐܽܘ: ܕܩܰܕܶܡ ܒܰܕܶܩ ܐܶܪܰܡܝܳܐ: ܕܶܐܫܬܰܠܰܬ ܥܰܠ ܟܰܣ̈ܝܳܬܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܡܳܐ ܚܢܺܝܓ ܡܰܘܬܳܐ ܕܝܰܠܽܘ̈ܕܶܐ܆ ܕܩܰܛܶܠ ܣܰܝܦܶܗ ܕܗܶܪܳܘܕܶܣ܆ ܘܡܰܪܺܝܪ ܗ̱ܘܳܐ ܫܽܘܦܳܥ ܕܶܡܗܽܘܢ܆ ܕܫܰܒܪ̈ܶܐ ܐܶܡܪ̈ܶܐ ܬܰܡܺܝ̈ܡܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܚܙܳܐ ܗܶܪܳܘܕܶܣ ܕܶܐܬܒܰܙܰܚ܆ ܡܶܢ ܪ̈ܰܚܺܝܩܶܐ ܒܢܰܝ̈ ܦܳܪܶܣ܆ ܘܶܐܬܡܰܪܡܰܪ ܗ̱ܘܳܐ ܒܰܚܣܳܡܳܐ܆ ܘܫܰܕܰܪ ܩܰܛܶܠ ܝܰܠܽܘ̈ܕܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ ܠܰܐܒܳܐ ܕܰܒܣܶܡ ܠܶܗ܆ ܪܺܝܚܳܐ ܚܰܠܝܳܐ ܕܩܶܛܠܰܝ̈ܟܽܘܢ܆ ܘܬܰܘܕܺܝܬܳܐ ܠܰܒܪܳܐ ܕܩܰܒܶܠ܆ ܕܶܡܟܽܘܢ ܐܰܝܟ ܥܶܛܪܳܐ ܓܰܒܝܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܺܝܚܺܝܕܳܝܳܐ܆ ܕܰܗܘܳܐ ܫܰܒܪܳܐ ܒܨܶܒܝܳܢܶܗ܆ ܘܰܒܫܰܒܪ̈ܶܐ ܐܶܫܬܰܒܰܚ ܗ̱ܘܳܐ܆ ܘܟܰܠܶܠ ܐܶܢܽܘܢ ܒܰܒܪܺܝܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ

ܝܰܠܽܘ̈ܕܶܐ ܟܰܕ ܡܶܬܚܰܪܒܺܝܢ ܚܙܳܐ ܗ̱ܘܳܐ ܢܒܺܝܳܐ܆ ܘܡܶܬܢܰܟܣܺܝܢ ܒܓܰܘ ܒܶܝܬ ܠܚܶܡ ܒܺܐܝ̈ܕܰܝ ܗܶܪܳܘܕܶܣ܆ ܫܡܰܥ ܩܳܠܳܐ ܕܽܐܘܠ̈ܝܳܬܳܐ ܕܝܰܠܳܕ̈ܳܬܳܐ܆ ܕܥܰܠ ܝܰܠ̈ܕܰܝܗܶܝܢ ܡܶܬܐܰܒ̈ܠܳܢ ܒܚܰܫܳܐ ܘܟܰܪܝܽܘܬܳܐ܆ ܫܰܒܪܽܘܬܳܐ ܕܢܶܨܚܰܬ ܒܰܐܓܽܘܢܳܐ܆ ܘܰܟܠܺܝܠܳܐ ܓܶܕܠܰܬ ܛܰܠܝܽܘܬܳܐ܆ ܒܪܺܝܟܽ ܗ̱ܘ ܕܟܰܠܶܠ ܠܰܪ̈ܚܽܘܡܰܘܗ̱ܝ ܘܢܰܨܰܚ ܥܺܐܕܰܝ̈ܗܽܘܢ܀

ܫܽܘܒܚܳܐ

ܥܰܠ ܒܶܝܬ ܠܚܶܡ ܥܳܒܰܪ ܗ̱ܘܺܝܬ ܩܽܘܪܝܰܬ ܕܰܘܺܝܕ܆ ܫܶܡܥܶܬ ܩܳܠ ܝܰܠܳܕ̈ܳܬܳܐ ܕܒܳܟ̈ܝܳܢ ܠܝܰܠ̈ܕܰܝܗܶܝܢ܆ ܡܠܶܐ ܗ̱ܘܳܐ ܦܽܘܡܗܶܝܢ ܒܶܟܝܳܐ ܘܚܰܫܳܐ ܪܰܒܳܐ܆ ܘܥܰܠ ܝܰܠ̈ܕܰܝܗܶܝܢ ܡܶܬܚܰܢ̈ܓܳܢ ܕܰܢܟܰܣ ܥܰܘܳܠܳܐ܆ ܛܽܘܒܳܐ ܠܟܰܪ̈ܣܳܬܳܐ ܕܠܳܐ ܝܺܠܶܕ̈ܝ܆ ܘܠܰܬܕܰܝ̈ܳܐ ܕܠܳܐ ܐܰܝܢܶܩܘ ܚܰܠܒܳܐ܆ ܒܪܺܝܟ ܛܳܒܳܐ ܕܟܰܠܶܠ ܐܶܢܽܘܢ ܒܰܫܡܰܝܳܐ ܘܒܰܐܪܥܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܶܦܢܶܐ ܕܶܝܢ ܘܶܐܫܬܰܥܶܐ ܠܟܽܘܢ
ܒܬܽܘܠܬܳܐ ܩܪܳܬܰܢܝ ܕܺܐܡܰܪ ܫܰܪܒܳܗ̇

ܥܽܘܢܺܝܬܳܐ: ܫܽܘܒܚܳܐ ܠܶܗ ܠܰܒܪܳܐ ܕܝܰܩܰܪ܆ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܘܗ̱ܝ.

ܫܳܪܽܘܬܳܐ ܥܒܰܕ ܗܶܪܳܘܕܶܣ܆ ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ܆ ܬܰܘ ܐܰܚܰܝ̈ ܐܶܫܬܰܥܶܐ ܠܟܽܘܢ܆ ܡܽܘܢ ܐܰܬܩܶܢ ܒܳܗ̇ ܡܰܪܳܚܳܐ܆ ܣܪܰܚ ܕܶܝܢ ܩܰܘ̈ܡܺܝܢ ܕܰܛܠܳܝ̈ܶܐ ܘܶܐܫܰܕ ܠܰܕܡܳܐ ܕܝܰܠܽܘ̈ܕܶܐ܆ ܒܓܰܘ ܟܶܢ̈ܦܳܬܳܐ ܕܶܐܡ̈ܗܳܬܗܽܘܢ ܚܰܒܶܠ ܐܶܢܽܘܢ ܥܰܘܳܠܳܐ܆ ܘܗܳܐ ܢܛܺܝܪܳܐ ܠܗܽܘܢ ܡܰܠܟܽܘܬܳܐ܆ ܘܰܠܡܰܪܳܚܳܐ ܗܳܐ ܢܛܺܝܪܳܐ ܠܶܗ ܓܺܗܰܢܳܐ܀

ܕܰܐܪܦܺܝ ܡܳܪܰܢ ܥܶܠܳܝ̈ܶܐ܆ ܘܰܢܚܶܬ ܠܶܗ ܨܶܝܕ ܬܰܚ̈ܬܳܝܶܐ܆ ܐܰܣܶܩ ܡܶܢܗܽܘܢ ܪܺܝܫܺܝܬܳܐ܆ ܕܟܽܠܳܗ̇ ܕܰܟܝܳܐ ܘܩܰܕܺܝܫܳܐ܆ ܘܫܰܪܝܳܐ ܒܳܗ̇ ܩܰܕܺܝܫܽܘܬܳܐ ܘܢܰܩܕܽܘܬܳܐ ܘܰܒܪܺܝܪܽܘܬܳܐ܆ ܡܶܢ ܟܽܠ ܚܰܘ̈ܒܺܝܢ ܕܰܟܝܳܐ ܗ̱ܘܳܬ ܣܺܝܥܬܳܐ ܟܽܠܳܗ̇ ܕܰܠܡܰܠܟܽܘܬܳܐ ܐܳܙܠ̱ܺܝܢ ܗ̱ܘܰܘ܆ ܐܰܝܟ ܙܡܺܝ̈ܢܶܐ ܠܒܶܝܬ ܡܶܫܬܽܘܬܳܐ܆ ܠܗܽܘܢ ܛܽܘܒܳܐ ܘܠܰܢ ܒܰܨܠܽܘܬܗܽܘܢ ܥܽܘܕܪ̈ܳܢܶܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܩܪܳܒܳܐ ܥܒܰܕ ܗ̱ܘܳܐ ܗܶܪܳܘܕܶܣ. ܥܰܡ ܫܰܒܪ̈ܶܐ ܒܓܰܘ ܒܶܝܬ ܠܚܶܡ. ܕܰܢܡܺܝܬ ܗ̱ܘܳܐ ܠܥܽܘܠܳܐ ܡܰܠܟܳܐ. ܕܶܐܬܳܐ ܕܢܶܫܪܶܐ ܡܰܠܟܽܘܬܶܗ܀

ܥܰܠܘ ܗ̱ܘܰܘ ܡܓܽܘ̈ܫܶܐ ܘܰܣܓܶܕܘ ܠܶܗ. ܠܡܰܠܟܳܐ ܕܺܝܠܺܝܕ ܒܰܡܥܰܪܬܳܐ. ܘܩܰܪܶܒܘ ܗ̱ܘܰܘ ܠܶܗ ܩܽܘܪ̈ܒܳܢܶܐ. ܘܗܶܪܳܘܕܶܣ ܦܳܫ ܟܰܕ ܡܰܕܘܰܝ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܫܰܒܪ̈ܶܐ ܒܪܺܝܪ̈ܶܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀