ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܢܚܶܬ ܡܰܠܰܐܟܳܐ ܕܰܢܣܰܒܰܪ. ܠܰܙܟܰܪܝܳܐ ܒܗܰܝܟܰܠ ܩܽܘܕܫܳܐ܆ ܕܶܐܠܺܝܫܒܰܥ ܕܰܐܢ̱ܬܬܳܟ ܬܺܐܠܰܕ܆ ܝܰܠܕܳܐ ܕܡܶܬܩܪܶܐ ܝܽܘܚܰܢܳܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܶܡܰܪ ܥܺܝܪܳܐ ܠܰܙܟܰܪܝܳܐ܆ ܥܰܠ ܕܶܐܬܦܰܠܰܓܬ ܥܰܠ ܡܶܠܰܝ̈܆ ܡܶܢ ܗܳܫܳܐ ܬܶܗܘܶܐ ܫܰܬܺܝܩ ܥܕܰܡܳܐ ܕܝܰܠܕܳܟ ܫܳܪܶܐ ܠܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܙܟܰܪܝܳܐ ܟܳܗܢܳܐ ܒܶܝܬ ܩܽܘܕܫܳܐ܆ ܡܶܢ ܡܰܠܰܐܟܳܐ ܐܶܣܬܰܒܰܪ܆ ܘܰܒܫܶܬܩܳܐ ܐܶܬܒܠܶܡ ܦܽܘܡܶܗ܆ ܥܰܠ ܕܠܳܐ ܗܰܝܡܶܢ ܗ̱ܘܳܐ ܠܥܺܝܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܥܺܝܪܳܐ ܕܢܽܘܪܳܐ ܐܶܡܰܪ ܠܶܗ܆ ܐܶܬܠܰܒܰܒ ܣܳܒܳܐ ܙܰܗܝܳܐ܆ ܕܰܨܠܽܘܬܳܟ ܐܶܫܬܰܡܥܰܬ ܠܳܗ̇܆ ܘܫܰܠܚܰܢܝ ܕܶܐܚܽܘܬ ܐܶܣܰܒܪܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܟܰܣܝܳܐ ܕܶܐܬܳܐ܇ ܕܢܶܗܘܶܐ ܥܽܘܠܳܐ ܒܓܰܘ ܟܰܪܣܳܐ܇ ܠܰܙܟܰܪܝܳܐ ܣܒܰܪܬܳܐ ܐܰܝܬܺܝ܇ ܕܡܶܢܶܗ ܕܳܢܰܚ ܟܳܪܽܘܙܳܐ܇ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܩܽܘܩܳܝܳܐ
ܕܟܺܝܪ ܡܽܘܫܶܐ ܪܺܝܫ ܡܰܒܽܘܥܳܐ ܕܰܢܒܺܝܽܘܬܳܐ

ܚܰܕ ܟܳܗܢܳܐ ܡܶܢ ܬܶܫܡܶܫܬܳܐ ܕܒܶܝܬ ܐܰܒܺܝܰܐ܆ ܘܰܐܢ̱ܬܬܶܗ ܡܶܢ ܒܢ̈ܳܬܶܗ ܕܰܐܗܪܽܘܢ ܕܰܫܡܳܗ̇ ܐܶܠܺܝܫܒܰܥ܆ ܙܰܕܺܝܩܺܝܢ ܗ̱ܘܰܘ. ܛܳܒ ܩܕܳܡ ܐܰܠܳܗܳܐ ܆ ܘܰܡܗܰܠܟܺܝܢ ܗ̱ܘܰܘ. ܒܟܽܠܗܽܘܢ ܦܽܘܩܕܳܢܰܘ̈ܗ̱ܝ܆ ܘܰܒܟܺܐܢܽܘܬܳܐ ܕܠܳܐ ܥܶܕܠܳܝ ܒܪܳܐ ܕܶܝܢ ܠܰܝܬ ܗ̱ܘܳܐ ܠܗܽܘܢ܆ ܡܶܛܽܠ ܕܶܐܠܺܝܫܒܰܥ ܐܰܢ̱ܬܬܶܗ ܥܩܰܪܬܳܐ ܐܺܝܬܶܝܗ̇ ܗ̱ܘܳܬ܆ ܗ̄ܘܗ̄܀

ܫܽܘܒܚܳܐ

ܟܰܕ ܐܶܫܬܰܡܠܺܝܘ ܝܰܘ̈ܡܳܬܳܐ ܕܛܶܟܣܳܐ ܕܬܶܫܡܶܫܬܶܗ܆ ܟܰܕ ܒܕܶܚܠܳܐ ܐܳܦ ܒܰܪܬܺܝܬܳܐ ܐܶܙܰܠ ܗ̱ܘܳܐ ܠܒܰܝܬܶܗ܆ ܒܳܬܰܪ ܗܳܝܕܶܝܢ. ܝܰܘ̈ܡܳܬܳܐ ܗܳܢܽܘܢ܆ ܩܰܒܠܰܬ ܒܰܛܢܳܐ. ܐܶܠܺܝܫܒܰܥ ܐܰܢ̱ܬܬܶܗ܆ ܘܝܰܪ̈ܚܶܐ ܚܰܡܫܳܐ ܡܛܰܫܝܳܐ ܗ̱ܘܳܬ ܢܰܦܫܳܗ̇ ܘܳܐܡܪܳܐ܆ ܕܗܳܠܶܝܢ ܟܽܠܗܽܘܢ ܥܒܰܕ ܠܺܝ ܡܳܪܝ ܒܝܰܘ̈ܡܳܬܳܐ ܕܚܳܪ ܒܺܝ܆ ܗ̄ܘܗ̄܀

ܡܰܕܪܳܫܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܫܽܘܒܚܳܐ ܠܰܐܒܳܐ ܕܫܰܠܚܶܗ ܠܓܰܒܪܺܐܶܝܠ܇ ܘܰܐܝܬܺܝ ܠܶܗ ܣܒܰܪܬܳܐ ܠܰܙܟܰܪܝܳܐ.

ܫܡܰܥ ܗ̱ܘܳܐ ܠܥܺܝܪܳܐ ܙܟܰܪܝܳܐ܆ ܟܰܕ ܡܣܰܒܰܪ ܠܶܗ ܡܶܛܽܠ ܒܰܛܢܳܐ܆ ܘܶܐܬܦܰܠܰܓ ܗ̱ܘܳܐ ܟܳܗܢܳܐ܆ ܥܰܠ ܡܰܠܰܐܟܳܐ ܘܠܳܐ ܐܰܫܪܶܗ ܗ̱ܘܳܐ܆ ܚܳܪ ܒܰܟܝܳܢܳܐ܆ ܘܠܳܐ ܐܶܬܒܰܩܺܝ܆ ܒܚܺܝܠ ܐܰܠܳܗܳܐ܆ ܕܟܽܠܗܶܝܢ ܡܶܫܟܰܚ܆ ܗܰܘ ܕܳܐܦ ܡܶܢ ܟܺܐܦ̈ܶܐ܆ ܦܫܺܝܩ ܠܶܗ ܠܰܡܩܳܡܽܘ܆ ܒܢܰܝ̈ܳܐ ܠܰܐܒܪܳܗܳܡ ܐܰܝܟ ܕܶܐܡܰܪ܀

ܐܶܬܦܠܰܓ ܘܠܳܐ ܐܰܫܪܶܗ܆ ܐܰܝܟ ܕܶܐܡܰܪ ܠܶܗ ܒܫܶܬܩܳܐ ܦܰܟܪܶܗ܆ ܥܺܝܪܳܐ ܕܢܽܘܪܳܐ ܠܟܳܗܢܳܐ܆ ܕܠܳܐ ܫܡܰܥ ܡ̈ܶܠܶܐ ܕܰܐܟܪܶܙ ܒܶܐܕܢܰܘ̈ܗ̱ܝ܆ ܫܰܬܺܝܩ ܘܰܚܪܶܫ܆ ܬܶܗܘܶܐ ܡܶܟܺܝܠ܆ ܘܠܳܐ ܬܽܘܒ ܬܶܫܟܰܚ ܬܡܰܠܶܠ ܥܰܡܗܽܘܢ܆ ܡܶܛܽܠ ܕܠܳܐ ܗܰܝܡܶܢܬ܆ ܠܡܶܠܰܝ̈ ܕܶܐܬܡܰܠܰܠܝ̈܆ ܠܙܰܒܢܳܐ ܕܨܶܒܝܳܢܶܗ ܕܗܰܘ ܕܫܰܠܚܰܢܝ܀

ܥܰܠ ܗ̱ܘܳܐ ܙܟܰܪܝܳܐ ܟܳܗܢܳܐ܆ ܕܰܢܣܺܝܡ ܒܶܣ̈ܡܶܐ ܒܗܰܝܟܰܠ ܩܽܘܕܫܳܐ܆ ܕܥܺܐܕܳܐ ܪܰܒܳܐ ܡܛܳܝܗ̱ܝ ܗ̱ܘܳܐ܆ ܕܰܢܚܰܣܶܐ ܗ̱ܘܳܐ ܠܰܒ̈ܢܰܝ ܥܰܡܶܗ܆ ܘܡܶܢ ܐܰܠܳܗܳܐ. ܐܶܫܬܰܕܰܪ ܗ̱ܘܳܐ܆ ܥܺܝܪܳܐ ܕܢܽܘܪܳܐ. ܕܰܢܣܰܒܪܶܗ ܗ̱ܘܳܐ܆ ܕܰܒܪܳܐ ܗܳܘܶܐ ܠܳܟ܆ ܒܚܰܪܬܳܐ ܕܝܰܘ̈ܡܳܬܳܟ܆ ܘܬܶܩܪܶܐ ܫܡܳܐ ܕܺܝܠܶܗ ܝܽܘܚܰܢܳܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܥܺܝܪܳܐ܆ ܘܰܐܝܬܺܝ ܣܒܰܪܬܳܐ ܠܰܙܟܰܪܝܳܐ.

ܥܰܠ ܗ̱ܘܳܐ ܠܗܰܝܟܠܳܐ ܙܟܰܪܝܳܐ܆ ܕܰܢܣܺܝܡ ܒܶܣ̈ܡܶܐ ܠܡܳܪܝܳܐ܆ ܘܰܚܙܳܐ ܠܥܺܝܪܳܐ ܕܢܽܘܪܳܐ܆ ܘܰܒܚܰܕܽܘܬܳܐ ܣܒܰܪܬܳܐ ܛܥܶܢ܆ ܘܣܰܒܰܪ ܒܰܛܢܶܗ ܪܓܺܝܓܳܐ܆ ܕܟܳܪܽܘܙ ܩܽܘܫܬܳܐ ܘܰܫܪܳܪܳܐ܆ ܕܡܶܢ ܐܶܠܺܝܫܒܰܥ ܡܶܬܚܙܶܐ܀

ܐܳܡܰܪ ܟܳܗܢܳܐ ܠܥܺܝܪܳܐ܆ ܕܰܐܝܟܰܢ ܬܶܗܘܶܐ ܗܳܕܶܐ܆ ܕܶܐܢܳܐ ܐܺܝܬܰܝ ܣܳܒܳܐ܆ ܘܒܰܪ̱ܬ ܠܶܘܳܝ̈ܶܐ ܥܶܬܩܰܬ ܠܳܗ̇܆ ܘܥܰܛܠܳܐ ܗ̱ܝ ܠܺܝ ܗܳܕܶܐ ܕܰܐܫܰܪ܆ ܕܣܰܬܳܐ ܡܶܢ ܒܳܬܰܪ ܕܰܐܥܬܩܰܬ܆ ܬܰܦܪܶܐ ܐܰܟܡܳܐ ܕܡܰܠܶܠܬ܀

ܬܶܗܪܳܐ ܡܰܠܝܳܐ ܣܒܰܪܬܳܐ܆ ܕܰܐܝܬܺܝ ܥܺܝܪܳܐ ܠܟܳܗܢܳܐ܆ ܘܰܐܙܺܝܥܶܗ ܗ̱ܘܳܐ ܒܕܶܚܠܳܐ܆ ܟܰܕ ܒܒܶܝܬ ܩܽܘܕܫܳܐ ܩܳܐܶܡ ܗ̱ܘܳܐ܆ ܛܠܰܡ ܗ̱ܘܳܐ ܡܶܠܰܘ̈ܗ̱ܝ ܘܠܳܐ ܐܰܫܪܶܗ܆ ܘܰܓܙܳܪ ܕܺܝܢܳܐ ܩܰܒܶܠ ܗ̱ܘܳܐ܆ ܕܢܶܗܘܶܐ ܚܰܪܫܳܐ ܕܫܰܬܺܝܩ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܫܺܝܚܳܐ ܕܰܐܣܗܶܕܘ ܥܰܠ ܩܶܛܠܶܗ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܗܢܳܐ ܙܟܰܪܝܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܡܰܠܰܐܟܳܐ ܗܳܘܶܐ ܠܶܗ ܒܪܳܟ܆ ܩܕܳܡ ܦܰܪܨܽܘܦܶܗ ܕܰܡܪܰܝܡܳܐ܆ ܘܰܢܫܰܦܶܐ ܐܽܘܪܚܳܐ ܠܡܳܪܝܳܐ܆ ܘܢܶܩܥܶܐ ܘܢܺܐܡܰܪ ܬܽܘܒܘ ܘܶܐܬܦܢܰܘ܆ ܘܰܥܒܶܕܘ ܦܺܐܪ̈ܶܐ ܫܰܦܺܝܪ̈ܶܐ܆ ܕܫܳܘܶܝܢ ܠܗܽܘܢ ܠܰܬܝܳܒܽܘܬܳܐ܀

ܣܒܰܪܬܳܐ ܚܕܰܬܳܐ ܐܶܣܰܒܪܳܟ܆ ܟܒܰܪ ܡܶܬܩܰܒ̈ܠܳܢ ܡܶܠܰܝ̈ ܥܠܰܝܟ܆ ܕܶܐܢܳܐ ܐܺܝܬܰܝ ܓܰܒܪܺܐܶܝܠ܆ ܕܰܩܕܳܡ ܡܳܪܝܳܐ ܡܫܰܡܶܫ ܐ̱ܢܳܐ܆ ܨܗܶܐ ܗ̱ܘܳܐ ܟܶܢܫܳܐ ܘܰܠܗܺܝܩ ܗ̱ܘܳܐ܆ ܕܢܶܦܽܘܩ ܙܟܰܪܝܳܐ ܡܶܢ ܡܰܕܒܚܳܐ܆ ܘܟܰܕ ܢܳܦܶܩ ܚܙܰܐܽܘܗ̱ܝ ܕܰܚܪܶܫ܆ ܘܪܳܡܶܙ ܗ̱ܘܳܐ ܠܗܽܘܢ ܕܚܶܙܘܳܐ ܚܙܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܗܢܳܐ ܙܟܰܪܝܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀