ܡܶܛܽܠ ܐܰܝܟܰܢܳܝܽܘܬ ܡܟܺܝܪܽܘܬܳܐ
ܟܰܕ ܡܶܬܛܰܝܒܺܝܢ ܒܥܺܕܬܳܐ ܐܶܦܛܪܽܘܦܳܐ ܕܰܡܟܺܝܪܳܐ: ܐܰܒܳܐ ܢܗܶܐ ܐܰܘ ܐ̱ܚܪܺܝܢ܆ ܘܶܐܦܛܪܽܘܦܳܐ ܕܟܰܠܬܳܐ ܘܟܳܗܢܳܐ ܘܰܡܫܰܡܫܳܢܳܐ ܘܰܬܪܶܝܢ ܣܳܗܕ̈ܶܐ ܡܗܰܝܡ̈ܢܶܐ. ܘܢܶܗܘܶܐ ܐܶܦܛܪܽܘܦܳܐ ܕܰܢܣܰܒ ܫܰܠܡܽܘܬܳܗ̇ ܕܰܡܟܺܝܪܬܳܐ܆ ܘܰܐܘܕܥܳܗ̇ ܠܰܡܟܺܝܪܳܗ̇. ܐܰܟܡܳܐ ܕܬܰܚܶܡ ܩܳܢܽܘܢܳܐ ܩܰܕܡܳܝܳܐ ܕܦܳܣܽܘܩܳܐ ܬܪܰܝܳܢܳܐ ܕܩܶܦܰܠܶܐܽܘܢ ܬܡܺܝܢܳܝܳܐ ܕܰܟܬܳܒܳܐ ܕܗܽܘܕ̈ܳܝܶܐ܀

ܐܳܚܶܕ ܟܳܗܢܳܐ ܠܝܰܡܺܝܢܳܐ ܕܶܐܦܛܪܽܘܦܳܐ ܕܰܡܟܺܝܪܳܐ ܘܰܡܫܰܐܶܠ ܠܶܗ ܟܰܕ ܐܳܡܰܪ:

ܐܳܘ ܒܪܳܐ ܡܗܰܝܡܢܳܐ܆ ܐܶܬܰܝܬ ܠܡܶܡܟܰܪ ܒܠܶܒܳܐ ܫܰܦܝܳܐ ܘܰܒܬܺܐܪܬܳܐ ܕܟܺܝܬܳܐ (ܠܦܠܢܝܬ) ܒܰܪ̱ܬ (ܦܠܢ) ܕܬܶܗܘܶܐ ܐܰܢ̱ܬܬܳܐ (ܠܦܠܢ) ܒܰܪ (ܦܠܢ)܆ ܐܰܝܟ ܢܳܡܽܘܣܳܐ ܡܫܺܝܚܳܝܳܐ ܘܩܳܢܽܘܢܳܐ ܫܠܺܝܚܳܝܳܐ. ܘܩܰܒܶܠܬ ܥܠܰܝܟ ܕܬܶܬܶܠ ܠܳܗ̇ ܡܰܗܪܳܐ ܢܳܡܽܘܣܳܝܳܐ. ܘܰܠܬܰܢܘܰܝ ܗܳܕܶܐ ܒܣܳܗܕܽܘܬܳܐ ܕܰܡܗܰܝܡ̈ܢܶܐ ܗܳܠܶܝܢ ܕܶܐܬܛܰܝܰܒܘ. ܟܰܕ ܝܳܕܥܰܬ ܕܙܽܘܘܳܓܳܐ ܗܳܢܳܐ ܠܳܐ ܦܳܐܶܫ ܒܶܗ ܦܽܘܠܳܓܳܐ ܐܰܘ ܦܽܘܪܫܳܢܳܐ ܘܠܳܐ ܫܪܳܝܳܐ ܥܕܰܡܳܐ ܠܡܰܘܬܳܐ.

ܘܶܐܢ ܡܦܰܢܶܐ: ܐܺܝܢ. ܐܳܚܶܕ ܟܳܗܢܳܐ ܠܝܰܡܺܝܢܳܐ ܕܶܐܦܛܪܽܘܦܳܐ ܕܟܰܠܬܳܐ ܟܰܕ ܐܳܡܰܪ:

ܘܰܐܢ̱ܬ ܐܳܘ ܒܪܳܐ ܡܗܰܝܡܢܳܐ ܐܶܬܰܝܬ ܘܝܰܗ̱ܒܬ ܒܫܰܦܝܽܘܬ ܠܶܒܳܐ ܘܰܒܕܰܟܝܽܘܬ ܬܺܐܪܬܳܐ (ܠܦܠܢܝܬ) ܒܰܪ̱ܬ (ܦܠܢ) ܕܬܶܗܘܶܐ ܒܫܰܠܡܽܘܬܳܗ̇ ܘܰܒܨܶܒܝܳܢܳܗ̇ ܚܺܐܪܳܐ ܐܰܢ̱ܬܬܳܐ (ܠܦܠܢ) ܒܰܪ (ܦܠܢ) ܐܰܝܟ ܢܳܡܽܘܣܳܐ ܡܫܺܝܚܳܝܳܐ ܘܩܳܢܽܘܢܳܐ ܫܠܺܝܚܳܝܳܐ. ܘܰܦܣܰܩܬ ܘܬܰܚܶܡܬ ܠܡܰܗܪܳܗ̇ ܥܰܠ ܬܰܢܘܰܝ ܕܺܐܝܬܶܝܗ̇ ܡܫܰܡܠܝܰܬ ܒܩܰܘܡܬܳܐ ܐܰܘܟܺܝܬ ܒܰܫܢܰܝ̈ܳܐ ܘܰܒܗܰܘܢܳܐ. ܘܰܕܟܺܝܬܳܐ ܘܰܚܠܺܝܡܰܬ ܒܦܰܓܪܳܗ̇ ܘܰܡܒܰܪܝܰܬ ܡܶܢ ܡܽܘ̈ܡܶܐ ܕܰܟܠܶܝܢ ܡܶܢ ܩܳܢܽܘ̈ܢܶܐ ܕܥܺܕܬܳܐ؟

ܘܟܰܕ ܡܦܰܢܶܐ: ܐܺܝܢ. ܐܳܡܰܪ ܟܳܗܢܳܐ܆ ܟܰܕ ܝܰܡܺܝ̈ܢܶܐ ܕܰܬܪ̈ܰܝܗܽܘܢ ܩܽܘܪܰܛܽܘܪ̈ܶܐ ܒܰܚܕܳܕ̈ܶܐ ܠܒܺܝܟܺܝܢ:

ܗܳܫܳܐ ܣܳܗܶܕ ܥܠܰܝܟܽܘܢ ܐܰܠܳܗܳܐ ܚܰܝܳܐ ܘܡܰܠܰܐܟܰܘ̈ܗ̱ܝ̱ ܩܰܕ̈ܺܝܫܶܐ܆ ܘܣܳܗܕܺܝܢ ܥܠܰܝܟܽܘܢ ܗܳܠܶܝܢ ܟܳܗ̈ܢܶܐ ܘܰܡܗܰܝܡ̈ܢܶܐ.

ܘܟܰܕ ܡܦܰܢܶܝܢ: ܐܺܝܢ. ܗܳܝܕܶܝܢ ܡܫܰܡܠܶܐ ܥܠܰܝܗܽܘܢ ܠܰܨܠܽܘܬܳܐ ܗܳܕܶܐ ܕܺܝܗܺܝܒܽܘܬ ܝܰܡܺܝܢܳܐ ܟܰܕ ܪ̈ܺܝܫܰܝܗܽܘܢ ܓܠܶܝܢ.

ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܝܰܡܺܝܢܶܗ ܕܡܳܪܰܢ ܚܰܝܠܬܳܢܺܝܬܳܐ ܘܡܰܠܝܰܬ ܙܳܟܽܘܬܳܐ ܗܳܝ ܕܰܗܘܳܬ ܥܰܡ ܢܒܺܝ̈ܶܐ ܒܕܳܪ̈ܰܝܗܽܘܢ ܘܥܰܡ ܫܠܺܝ̈ܚܶܐ ܒܙܰܒܢܰܝ̈ܗܽܘܢ ܘܥܰܡ ܣܳܗܕ̈ܶܐ ܒܰܐܓܽܘܢܰܝ̈ܗܽܘܢ. ܗܺܝ ܬܒܰܪܶܟ ܠܝܰܡܺܝܢܳܐ ܗܳܕܶܐ ܘܬܺܐܬܶܐ ܘܬܰܓܶܢ ܥܰܠ ܟܶܢܫܳܐ ܗܳܢܳܐ ܘܥܰܠ ܡܟܺܝܪܳܐ ܘܰܡܟܺܝܪܬܳܐ ܘܥܰܠ ܙܡܺܝ̈ܢܶܐ ܘܰܡܙܰܡ̈ܢܳܢܶܐ ܘܣܳܒ̈ܶܐ ܘܰܛܠܳܝ̈ܶܐ ܘܥܰܠ ܟܽܠ ܡܰܢ ܕܶܐܬܛܰܝܰܒ ܗܳܪܟܳܐ. ܘܰܬܒܰܪܶܟ ܠܰܡܟܺܝܪܳܐ ܘܠܰܡܟܺܝܪܬܳܐ ܘܬܰܣܓܶܐ ܠܘܳܬܗܽܘܢ ܛܳܒ̈ܳܬܳܐ ܘܛܰܝܒܘ̈ܳܬܳܐ. ܘܬܰܦܪܶܐ ܡܶܢܗܽܘܢ ܒܢܰܝ̈ܳܐ ܘܰܒܢ̈ܳܬܳܐ܆ ܒܝܰܕ ܨܠܰܘ̈ܳܬܳܐ ܕܰܒܬܽܘܠܬܳܐ ܩܰܕܺܝܫܬܳܐ ܘܰܕܟܽܠܗܽܘܢ ܩܰܕ̈ܺܝܫܶܐ ܘܩܰܕ̈ܺܝܫܳܬܳܐ ܐܰܡܺܝܢ܀

ܟܰܕ ܚܰܬܢܳܐ ܘܟܰܠܬܳܐ ܥܳܐܠܺܝܢ ܠܥܺܕܬܳܐ܆ ܩܳܝܡܺܝܢ ܩܕܳܡ ܡܰܕܒܚܳܐ. ܟܰܠܬܳܐ ܡܰܢ ܩܳܝܡܳܐ ܡܶܢ ܝܰܡܺܝܢܶܗ ܕܚܰܬܢܳܐ܆ ܫܰܘܫܒܺܝܢܳܐ ܕܶܝܢ ܡܶܢ ܣܶܡܳܠܶܗ. ܘܳܐܚܶܕ ܫܰܘܫܒܺܝܢܳܐ ܠܰܨܠܺܝܒܳܐ ܒܝܰܡܺܝܢܶܗ ܠܥܶܠ ܡܶܢ ܟܰܬܦ̈ܳܬܳܐ ܕܚܰܬܢܳܐ ܘܰܕܟܰܠܬܳܐ. ܫܰܘܫܒܺܝܢܬܳܐ ܕܶܝܢ ܩܳܝܡܳܐ ܡܶܢ ܝܰܡܺܝܢܳܗ̇ ܕܟܰܠܬܳܐ.

ܩܰܕܡܳܝܰܬ ܟܳܗܢܳܐ ܢܫܰܐܶܠ ܠܚܰܬܢܳܐ ܘܢܺܐܡܰܪ ܠܶܗ:

ܐܳܘ ܦܠܳܢ ܨܳܒܶܐ ܐܰܢ̱ܬ ܕܬܶܣܰܒ ܦܠܳܢܺܝܬ ܕܰܡܛܰܝܒܳܐ ܗܳܪܟܳܐ ܕܬܶܗܘܶܐ ܠܳܟ ܐܰܢ̱ܬܬܳܐ ܢܳܡܽܘܣܳܝܬܳܐ ܠܦܽܘܬ ܦܽܘܩ̈ܕܳܢܶܐ ܕܰܐ‎ܠܳܗܳܐ ܘܩܳܢ̈ܽܘܢܶܐ ܕܥܺܕܬܳܐ ܩܰܕܺܝܫܬܳܐ؟

ܚܰܬܢܳܐ ܢܺܐܡܰܪ

ܐܺܝܢ ܨܳܒܶܐ ܐ̱ܢܳܐ.

ܟܳܗܢܳܐ ܢܫܰܐܶܠ ܐܳܦ ܠܟܰܠܬܳܐ ܘܢܺܐܡܰܪ ܠܳܗ̇:

ܐܳܘ ܦܠܳܢܺܝܬ ܨܳܒܝܳܐ ܐܰܢ̱ܬܝ̱ ܟܰܝ ܕܬܶܣܒܺܝܢ ܦܠܳܢ ܕܰܡܛܰܝܰܒ ܗܳܪܟܳܐ ܕܢܶܗܘܶܐ ܠܶܟܝ ܒܰܥܠܳܐ ܢܳܡܽܘܣܳܝܐ ܠܦܽܘܬ ܦܽܘܩ̈ܕܳܢܶܐ ܕܰܐܠܗܐ ܘܩܳܢ̈ܽܘܢܶܐ ܕܥܺܕܬܳܐ ܩܰܕܺܝܫܬܳܐ؟

ܟܰܠܬܳܐ ܬܺܐܡܰܪ:

ܐܺܝܢ ܨܳܒܝܳܐ ܐ̱ܢܳܐ.

ܬܶܫܡܶܫܬܳܐ ܩܰܕܡܳܝܬܳܐ
ܕܒܽܘܪܳܟ ܥܶܙ̈ܩܳܬܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܡܚܰܕܝܳܢܳܐ ܕܥܰܒ̈ܕܰܘܗ̱ܝ̱ ܘܡܰܦܨܚܳܢܳܐ ܕܣܳܓܽܘ̈ܕܰܘܗ̱ܝ̱ ܘܰܡܢܰܛܪܳܢܳܐ ܕܕܳܚܠܰܘ̈ܗ̱ܝ̱ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡܥܳܠܡܺܝܢ܀

ܨܠܽܘܬܐ ܕܫܽܘܪܳܝܳܐ

ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܒܳܟ ܢܶܗܘܶܐ ܠܰܢ ܫܽܘܪܳܝܳܐ ܕܚܰܕܘ̈ܳܬܰܢ܆ ܘܒܳܟ ܢܶܗܘܶܐ ܫܽܘܡܠܳܝܳܐ ܕܰܦܨܺܝܚܘ̈ܳܬܰܢ ܘܒܳܟ ܢܶܬܒܰܣ̈ܡܳܢ ܢܰܦ̈ܫܳܬܰܢ ܘܪ̈ܽܘܚܳܬܰܢ. ܘܒܰܚܢܳܢܳܟ ܢܶܬܥܰܛܝ̈ܳܢ ܥܳܩ̈ܳܬܰܢ܆ ܘܒܰܡܪܰܚܡܳܢܽܘܬܳܟ ܢܶܣܓ̈ܝܳܢ ܛܳܒ̈ܳܬܰܢ ܘܢܶܫܬܰܦ̈ܥܳܢ ܒܽܘܪ̈ܟܳܬܰܢ. ܘܢܶܥܛܪ̈ܳܢ ܬܰܪ̈ܥܝܳܬܰܢ ܘܢܶܫܬܰܡܠܽܘܢ ܚܰܬܢܰܝ̈ܢ ܘܢܶܬܓܰܡܪܽܘܢ ܟܠܺܝ̈ܠܶܐ ܠܟܰܠ̈ܠܳܬܰܢ. ܐܰܝܟܰܢܳܐ ܕܥܰܡܳܟ ܢܶܬܒܰܣܰܡ ܒܛܽܘ̈ܒܶܐ ܕܠܳܐ ܡܰܘܦܶܝܢ ܘܰܒܓܽܘܕܰܝ̈ܗܽܘܢ ܕܩܰܕ̈ܺܝܫܰܝܟ. ܢܰܣܶܩ ܠܳܟ ܫܽܘܒܚܳܐ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕ̊ܺܝܫܳܐ ܠܥܳܠܰܡܥܳܠܡܺܝܢ ܐܰܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫܡܰܝ̈ܳܢܶܐ - H

ܒܪܺܝܟ ܕܚܰܕܺܝ ܠܰܫܡܰܝ̈ܳܢܶܐ ܘܰܐܦܨܰܚ ܠܰܐܪ̈ܥܳܢܶܐ. ܚܰܕܳܐ ܠܟܶܢܫܳܐ ܕܣܳܓܽܘ̈ܕܰܝܟ ܡܫܺܝܚܳܐ ܡܠܶܐ ܪ̈ܰܚܡܶܐ܀

ܦܫܽܘܛ ܝܰܡܺܝܢܳܟ ܦܳܪܽܘܩܰܢ ܘܒܰܪܶܟ ܒܛܰܝܒܽܘܬܳܟ. ܠܥܶܙ̈ܩܳܬܳܐ ܕܝܳܗܒܺܝܢ ܟܳܗ̈ܢܶܐ ܒܰܫܡܳܟ ܩܰܕܺܝܫܳܐ܀

ܚܰܬܢܳܐ ܕܰܡܟܰܪ ܠܶܗ ܥܺܕܬܳܐ ܘܟܰܠܠܳܗ̇ ܒܰܫܪܳܪܶܗ. ܒܰܪܶܟ ܚܰܬܢ̈ܶܐ ܘܟܰܠ̈ܠܳܬܳܐ ܒܣܽܘܓܳܐܐ ܕܛܰܝܒܽܘܬܳܟ܀

ܫܘ̄ܒ: ܣܓܺܝܕ ܐܰܒܳܐ ܘܰܒܪܳܐ ܘܪܽܘܚܳܐ ܐ̱ܪܳܙܳܐ ܬܠܺܝܬܳܝܳܐ. ܕܡܶܢ ܥܶܠܳܝ̈ܶܐ ܘܬܰܚܬܳܝ̈ܶܐ ܡܶܣܬܓܶܕ ܘܡܶܫܬܰܒܰܚ܀

ܨܠܽܘܬܳܐ

ܟܳܗܢܳܐ: ܫܰܝܢܳܟ ܡܳܪܝ̱ ܗܰܘ ܕܒܶܗ ܐܶܫܬܰܝܰܢܘ̱ ܫܡܰܝ̈ܳܐ ܘܰܐܪܥܳܐ ܘܪ̈ܰܘܡܶܐ ܘܟܽܠ ܕܰܒܗܽܘܢ܆ ܗܽܘ ܢܫܰܝܶܢ ܠܰܒܢܰܝ̈ܢ ܗܳܠܶܝܢ ܕܰܠܘܳܬ ܚܕ̈ܳܕܶܐ ܐܶܬܩܰܪܰܒܘ̱. ܐܰܝܟܰܢܳܐ ܕܰܚܕܳܐ ܐܰܘܝܽܘܬܳܐ ܬܶܗܘܶܐ ܠܗܽܘܢ ܕܠܰܚܕ̈ܳܕܶܐ ܢܰܚܒܽܘܢ܆ ܘܚܰܕ ܠܚܰܕ ܒܰܦܨܺܝܚܽܘܬܳܐ ܢܩܰܒܠܽܘܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܰܢܫܰܒܚܽܘܢܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܡܺܝܢ܀

ܩܽܘܩܠܺܝܳܘܢ - H

ܐܰܒܰܥ ܠܶܒܝ̱ ܦܶܬܓ̈ܳܡܶܐ ܛܳܒ̈ܶܐ ܗ̄ ܘܺܐܡܰܪ ܥܒ̈ܳܕܰܝ ܠܡܰܠܟܳܐ܀

ܠܶܫܳܢܝ̱ ܩܰܢܝܶܗ ܕܣܳܦܪܳܐ ܡܗܺܝܪܳܐ ܗ̄ ܫܰܦܺܝܪ ܒܚܶܙܘܶܗ ܡܶܢ ܒܢܰܝ̈ܢܳܫܳܐ܀

ܐܶܬܢܣܶܟܘ̱ ܪ̈ܰܚܡܶܐ ܥܰܠ ܣܶܦܘ̈ܳܬܳܟ ܗ̄ ܡܶܛܽܠ ܗܳܢܳܐ ܒܰܪܟܳܟ ܐܰܠܳܗܳܐ ܠܥܳܠܰܡ܀

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ ܗ̄ ܘܡܰܠܟܬܳܐ ܡܶܢ ܝܰܡܺܝܢܳܟ܀

ܥܶܩܒܳܐ - H

ܟܰܕ ܫܠܶܝܡܽܘܢ ܒܦ̈ܶܠܳܐܬܳܐ ܡܡܰܠܶܠ ܗ̱ܘܳܐ ܕܡܰܢ ܕܳܕܶܟܝ ܫܰܦܺܝܪܬܳܐ. ܐܶܡܰܪܝ ܕܣܰܓܺܝ ܚܬܺܝܪܰܬܝ ܒܶܗ. ܕܳܕܳܐ ܕܺܝܠܝ ܐܶܬܓܒܺܝ ܡܶܢ ܣܽܘܓܳܐܐ ܕܪ̈ܶܒܘܳܬܳܐ܆ ܗܰܘ ܕܟܰܪܡܶܗ ܐܺܝܬܰܘܗ̱ܝ̱ ܐܝܣܪܳܐܶܝܠ. ܚܶܘܳܪ ܡܶܢ ܓܦܶܬܳܐ ܕܝܰܥܩܽܘܒ ܘܣܽܘܡܳܩ ܡܶܢ ܡܶܫܚܳܐ ܕܢܰܪܕܺܝܢ܆ ܘܩܰܛܺܝܢ ܡܶܢ ܐܰܪ̈ܙܶܐ ܕܠܶܒܢܳܢ. ܕܡܽܘܬܰܐ ܗ̱ܘ ܓܶܝܪ ܕܰܐܠܳܗܳܐ܆ ܗܰܘ ܕܠܶܗ ܗܽܘ ܡܫܰܒܚܺܝܢܰܢ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ̱܀

ܡܫܰܡܫܳܢܳܐ: ܣܛܰܘܡܶܢܩܰܐܠܽܘ̇ܣ ܩܽܘܪܝܶܐܠܰܝܣܽܘܢ

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܚܰܬܢܳܐ ܫܡܰܝܳܢܳܐ ܕܰܒܚܽܘܒܶܗ ܡܟܰܪ ܠܶܗ ܥܺܕܰܬ ܥܰܡ̱̈ܡܶܐ ܡܟܰܬܰܡܬܳܐ܆ ܘܒܰܙܩܺܝܦܶܗ ܡܰܪܩܳܗ̇ ܘܚܰܠܠܳܗ̇ ܘܥܰܒܕܳܗ̇ ܠܶܗ ܟܰܠܬܳܐ ܡܫܰܒܰܚܬܳܐ. ܘܙܰܡܶܢ ܠܰܚܠܽܘܠܳܗ̇ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ. ܕܠܶܗ ܝܳܐܶܐ ܫܽܘܒܚܳܐ ܒܗܳܢܳܐ ܥܶܕܳܢܳܐ ܕܒܽܘܪܳܟ ܥܶܙ̈ܩܳܬܳܐ ܕܥܰܒ̈ܕܰܘܗ̱ܝ ܘܰܒܟܽܠܗܽܘܢ ܥܶܕ̈ܳܢܶܐ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܕܺܐܝܬܰܘܗ̱ܝ ܡܠܶܐ ܡܶܢ ܛܳܒܽܘܬܳܐ. ܗܰܘ ܡܥܺܝܢܳܐ ܕܛܰܝܒܽܘܬܳܐ ܘܡܰܒܽܘܥܳܐ ܕܒܽܘܪ̈ܟܳܬܳܐ. ܗܰܘ ܡܽܘܪܽܘܢ ܕܰܟܝܳܐ ܕܠܳܐ ܡܶܬܚܰܒܠܳܢܽܘܬܳܐ. ܗܰܘ ܕܰܠܟܽܠ ܡܨܰܒܶܬ ܐܰܢ̱ܬ ܒܰܦܬܺܝܟܽܘܬ ܡܰܘܗ̈ܒܳܬܳܟ ܘܠܰܐܝܠܶܝܢ ܕܰܒܗܰܝܡܳܢܽܘܬܳܐ ܕܰܫܪܪܳܐ ܩܳܪܒܺܝܢ ܠܘܳܬܳܟ. ܒܽܘܪ̈ܟܳܬܳܐ ܠܳܐ ܡܶܬܛܰܠܩܳܢ̈ܝܳܬܳܐ ܡܳܠܶܐ ܐܰܢ̱ܬ. ܗܰܘ ܕܰܒܝܰܕ ܡܶܐܬܺܝܬܳܟ ܕܒܰܒܣܰܪ ܠܥܺܕܬܳܟ ܩܰܕܺܝܫܬܳܐ ܒܰܣܺܝܡܽܘܬ ܪܺܝܚܳܐ ܚܰܠܝܳܐ ܕܺܝܕܰܥܬܳܟ ܐܰܠܳܗܳܝܬܳܐ ܡܠܰܝܬ. ܘܒܶܐܣܛܠܳܐ ܪܺܝܫܳܝܬܳܐ ܕܬܶܫܒܽܘܚܬܳܐ ܠܳܐ ܡܶܬܚܰܒܠܳܢܺܝܬܳܐ. ܘܒܰܟܠܺܝܠܳܐ ܕܙܰܕܺܝܩܽܘܬܳܐ ܠܳܗ̇ ܨܰܒܶܬܬ ܘܗܰܕܰܪܬ. ܘܰܡܟ̣ܺܝܪܬܳܐ ܕܺܝܠܳܟ ܡܫܰܒܰܚܬܳܐ ܡܶܢ ܡܰܝ̈ܳܐ ܘܪܽܘܚܳܐ ܠܳܗ̇ ܥܒܰܕܬ ܘܫܰܡܠܺܝܬ. ܘܰܒܝܰܕ ܥܶܙܰܩܬܳܐ ܕܰܨܠܺܝܒܳܟ ܘܰܕܦܰܓܪܳܟ ܘܰܕܡܳܟ ܗܰܘ ܕܠܳܗ̇ ܐܰܓܥܶܠܬ. ܫܽܘܪܳܪܳܐ ܘܰܚܕܳܝܽܘܬܳܐ ܕܺܝܠܳܟ ܕܥܰܡܳܗ̇ ܚܰܘܺܝܬ. ܗܰܘ ܕܰܠܗܳܕܶܐ ܡܟܺܝܪܽܘܬܳܐ ܢܳܡܽܘܣܳܐܺܝܬ ܨܰܒܶܬܬ. ܘܰܠܫܰܦܺܝܪܽܘܬ ܡܛܰܟܣܽܘܬܳܐ ܕܙܽܘܘܳܓܳܐ ܒܺܐܝ̈ܕܰܝ ܫܠܺܝ̈ܚܶܐ ܩܰܕܺܝ̈ܫܶܐ ܠܰܢ ܐܰܫܠܶܡܬ. ܐܰܝܟܰܢܳܐ ܕܰܒܝܰܕ ܥܶܙܰܩܬܳܐ ܬܶܗܘܶܐ ܡܟܺܝܪܽܘܬܳܐ ܘܰܚܕܳܝܽܘܬܳܐ ܕܰܐܢ̱ܬܬܳܐ ܥܰܡ ܓܰܒܪܳܐ. ܗܳܝ ܕܒܳܗ̇ ܟܽܠܗܽܘܢ ܐܰܒܳܗ̈ܳܬܳܐ ܘܪ̈ܺܝܫܰܝ ܐܰܒܳܗ̈ܳܬܳܐ ܟܺܐܢ̈ܶܐ ܘܙܰܕܺܝ̈ܩܶܐ ܐܶܬܒܰܪܰܟܘ̱. ܘܗܳܫܳܐ ܡܳܪܝܳܐ ܐܰܠܳܗܳܐ ܕܺܝܠܰܢ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܠܳܟ ܗܰܘ ܕܰܠܟܽܠ ܡܒܰܪܶܟ ܐܰܢ̱ܬ ܘܡܶܢ ܟܽܠ ܡܶܬܒܰܪܰܟ ܐܰܢ̱ܬ. ܕܰܬܫܰܟܶܢ ܠܰܢ ܒܽܘܪܟܬܳܐ ܫܦܺܝܥܬܳܐ ܘܠܳܐ ܡܶܬܬܪܺܝܡܳܢܺܝܬܳܐ. ܘܰܬܒܰܪܶܟ ܠܥܶܙ̈ܩܳܬܳܐ ܗܳܠܶܝܢ ܕܥܰܠ ܐܺܝ̈ܕܰܝܢ. ܐܰܝܟܰܢܳܐ ܕܢܶܗܘ̈ܝܳܢ ܠܗܳܢܽܘܢ ܕܢܳܣܒܺܝܢ ܠܗܶܝܢ ܠܫܽܘܪܳܪܳܐ ܕܰܡܟܺܝܪܽܘܬܳܐ. ܠܰܚܕܳܝܽܘܬܳܐ ܚܽܘܒܳܢܳܝܬܳܐ. ܠܕܽܘܒܳܪ̈ܶܐ ܡܝܰܬܪ̈ܶܐ ܘܰܡܩܰܠ̈ܣܶܐ. ܠܫܰܘܬܳܦܽܘܬܳܐ ܟܢܺܝܟܬܳܐ ܘܰܟܚܺܝܕܬܳܐ. ܐܰܝܟܰܢܳܐ ܕܟܰܕ ܒܗܳܠܶܝܢ ܡܰܦܪܓܺܝܢ ܘܡܶܬܗܰܕܪܺܝܢ. ܘܰܒܗܳܠܶܝܢ ܕܰܡܪܰܥܶܝܢ ܠܰܐܠܳܗܽܘܬܳܟ ܡܗܰܠܟܺܝܢ. ܚܰܕܽܘܬܳܢܳܐܺܝܬ ܘܝܰܬܺܝܪ ܦܨܺܝܚܳܐܺܝܬ ܢܶܬܡܰܢܥܽܘܢ ܠܰܓܢܽܘܢܳܐ ܕܰܬܢܳܢ ܘܰܠܗܰܘ ܕܠܳܐ ܡܶܫܬܪܶܐ. ܘܰܚܕܳܐ ܡܡܰܠܠܽܘܬ ܬܶܫܒܽܘܚܬܳܐ ܢܩܰܪܒܽܘܢ ܠܳܟ ܘܠܰܐܒܽܘܟ ܡܒܰܪܟܳܐ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ܆ ܬܠܺܝܬܳܝܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ H

ܠܳܐ ܬܙܽܘܥܺܝܢ ܥܺܕܬܳܐ ܡܗܰܝܡܰܢܬܳܐ܆ ܘܠܳܐ ܢܶܬܩܰܢܰܛ ܪܶܥܝܳܢܶܟܝ̱. ܕܠܳܐ ܡܚܰܠܶܦ ܐ̱ܢܳܐ ܠܶܟܝ̱ ܒܰܐ̱ܚܪܺܬܳܐ܆ ܕܠܳܐ ܚܰܠܶܦܬܺܝܢܝ̱ ܒܰܐ̱ܚܪܺܢܳܐ. ܘܶܐܢܗܽܘ ܕܒܰܙܒܰܢ ܫܽܘܠܳܡܳܐ܆ ܡܶܫܬܰܪܝܳܐ ܫܡܰܝܳܐ ܘܰܐܪܥܳܐ܆ ܠܶܟܝ̱ ܩܶܢܛܳܐ ܠܳܐ ܢܶܗܘܶܐ ܠܶܟܝ̱. ܕܰܬܪܽܘܢܽܘܣ ܕܺܝܠܶܟܝ̱ ܡܰܬܩܰܢ ܒܶܝܬ ܐܰܒܳܐ ܘܰܒܪܳܐ ܘܪܽܘܚܳܐ܀

ܫܘ̄ܒ: ܠܳܐ ܡܶܡܬܽܘܡ ܗܘܳܬ ܠܳܗ̇ ܐܰܝܟ ܗܳܕܶܐ܆ ܡܟܺܝܪܬܳܐ ܕܰܡܟܰܪ ܠܶܗ ܒܽܘܟܪܳܐ. ܕܗܽܘ ܡܰܟܪܳܗ̇ ܡܶܢ ܩܕܳܡ ܟܽܠ ܡܶܕܶܡ܆ ܘܰܒܩܶܛܠܶܗ ܚܠܽܘܠܳܐ ܥܒܰܕ ܠܳܗ̇. ܬܠܶܐ ܒܩܰܝܣܳܐ ܘܗܺܝ ܥܰܠ ܓܰܢ̱ܒܶܗ܆ ܬܪܺܝܥ ܣܶܛܪܶܗ ܘܦܺܝܠܳܐ ܒܰܕܡܶܗ܆ ܘܰܐܪܺܝܡܰܬ ܩܳܠܳܗ̇ ܘܶܐܡܪܰܬ. ܩܰܕܺܝܫ ܩܰܕܺܝܫ ܩܰܕܺܝܫܰܬ ܒܪܳܐ ܕܟܽܠܶܗ ܠܰܐܒܽܘܗ̱ܝ ܕܳܡܶܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܚܰܬܢܳܐ ܕܩܽܘܫܬܳܐ ܘܕܰܫܪܳܪܳܐ ܕܡܶܬܡܰܟܪ̈ܳܢ ܠܶܗ ܒܬܽܘ̈ܠܳܬܳܐ ܢܰܦܫ̈ܳܬܳܐ ܕܰܟܝ̈ܳܬܳܐ. ܐܰܫܘܳܐ ܐܶܢܽܘܢ ܠܥܰܒܕ̈ܰܝܟ ܗܳܠܶܝܢ ܕܠܰܚܕܳܕ̈ܶܐ ܐܶܬܡܟܰܪܘ̱܆ ܘܠܳܟ ܫܩܰܠܘ̱ ܡܶܨܥܳܝܳܐ ܕܚܰܬܢܽܘܬܗܽܘܢ ܒܝܰܕ ܒܨܺܝܪܽܘܬܰܢ. ܕܢܶܥܛܰܪ ܡܶܢܗܽܘܢ ܪܺܝܚܳܐ ܚܰܠܝܳܐ ܘܗܰܢܺܝܳܐܐ ܕܕܽܘܒܳܪ̈ܶܐ ܕܰܡܝܰܬܪ̈ܳܬܳܐ. ܘܰܕܢܶܗܘܶܐ ܒܰܝܢܳܬܗܽܘܢ ܚܽܘܒܳܐ ܫܰܪܺܝܪܳܐ ܘܫܰܝܢܳܐ ܘܰܫܠܳܡܳܐ ܘܰܐܘܝܽܘܬܳܐ ܠܳܐ ܚܰܫܳܢܳܝܬܳܐ. ܘܚܰܝܶܠ ܐܶܢܽܘܢ ܠܘܳܬ ܗܳܝ ܕܢܶܛܪܽܘܢ ܕܰܟܝܽܘܬܳܐ ܠܰܚܕܳܕ̈ܶܐ ܒܢܰܦܫܳܐ ܘܰܒܦܰܓܪܳܐ. ܘܢܰܣܩܽܘܢ ܠܳܟ ܫܽܘܒܚܳܐ ܘܗܳܫܳܐ ܘܠܥܳܠܡܺܝܢ܀

ܨܠܽܘܬܳܐ ܕܥܰܠ ܥܶܙ̈ܩܳܬܳܐ

ܡܳܪܰܢ ܝܶܫܽܘܥ ܡܫܺܝܚܳܐ ܚܰܬܢܳܐ ܕܩܽܘܫܬܳܐ ܘܕܰܫܪܳܪܳܐ܆ ܗܰܘ ܕܰܡܟܰܪ ܠܶܗ ܥܺܕܰܬ ܥܰܡ̱̈ܡܶܐ ܘܒܰܕܡܶܗ ܟܬܰܒ ܠܳܗ̇ ܦܶܪܢܺܝܬܳܐ܆ ܘܝܰܗ̱ܒ ܠܳܗ̇ ܥܶܙܰܩܬܳܐ ܒܝܰܕ ܨܶܨܰܘ̈ܗ̱ܝ. ܒܰܪܶܟ ܒܛܰܝܒܽܘܬܳܟ ܠܥܶܙ̈ܩܳܬܳܐ ܗܳܠܶܝܢ ܕܝܳܗܒܺܝܢܰܢ ܠܥܰܒܕܳܟ ܘܠܰܐܡܬܳܟ܆ ܐܰܝܟ ܕܶܐܬܒܰܪܟܰܬ ܥܶܙܩܬܳܐ ܕܥܺܕܬܳܐ ܩܰܕܺܝܫܬܐ. ܗܳܕܳܐ ܗ̱ܝ ܥܶܙܰܩܬܳܐ ܕܒܳܗ̇ ܐܶܬܡܰܟܪܰܬ ܣܰܪܳܐ ܠܰܐܒܪܳܗܳܡ ܘܪܰܦܩܳܐ ܠܺܐܝܣܚܳܩ ܘܪܳܚܶܝܠ ܠܝܰܥܩܽܘܒ. ܘܒܳܗ̇ ܐܶܬܬܣܺܝܡ ܫܽܘܠܛܳܢܳܐ ܕܡܶܨܪܶܝܢ ܒܺܐܝܕ̈ܰܝ ܝܰܘܣܶܦ. ܘܒܰܫܪܳܪܳܗ̇ ܐܶܬܦܰܨܺܝ ܕܳܢܺܝܐܶܝܠ ܘܰܩܕܳܡ ܡܰܠܟܳܐ ܐܶܬܢܰܨܰܚ. ܘܒܳܗ̇ ܐܶܬܩܰܒܰܠ ܗܰܘ ܒܪܳܐ ܐܳܣܽܘܛܳܐ. ܗܳܕܳܐ ܗ̱ܝ ܥܶܙܩܬܳܐ ܕܰܠܙܰܕܺܝ̈ܩܶܐ ܐܰܥܬܰܪ ܫܪܳܪܳܗ̇ ܘܰܠܬܰܓܳܪ̈ܶܐ ܫܰܪܒܳܗ̇܆ ܘܪܰܒܽ ܗ̱ܘ ܪܰܗܒܽܘܢܳܗ̇. ܗܳܕܳܐ ܗ̱ܝ ܥܶܙܩܬܳܐ ܕܩܳܪܝܳܐ ܠܛܽܘܗ̈ܡܶܐ ܘܫܰܪ̈ܒܳܬܳܐ ܠܰܡܟܽܘܪ̈ܝܶܐ ܘܰܠܡܶܫܬܘ̈ܳܬܳܐ. ܘܰܡܟܰܢܫܳܐ ܠܪ̈ܰܚܺܝܩܶܐ ܘܒܰܝܬܳܝܽܘܬܳܐ ܠܰܚܕܳܕ̈ܶܐ ܥܳܒܕܳܐ. ܘܒܳܗ̇ ܡܶܬܡܰܟܪ̈ܳܢ ܢܶܫ̈ܶܐ ܠܓܰܒܪ̈ܶܐ܆ ܘܒܳܗ̇ ܡܶܬܚܰܬܢܺܝܢ ܚܰܬܢ̈ܶܐ ܘܟܰܠ̈ܠܳܬܳܐ. ♱ ܒܰܪܶܟ ܡܳܪܝ̱ ܠܥܶܙ̈ܩܳܬܳܐ ܗܳܠܶܝܢ ܐܰܝܟܰܢܳܐ ܕܢܶܗܘܝ̈ܳܢ ܛܰܒܥܳܐ ܘܚܳܬܡܳܐ ܕܰܡܟܺܝܪܽܘܬܳܐ ܫܰܪܺܝܪܬܳܐ ܕܒܰܪܬܳܐ ܕܺܝܠܰܢ (ܦܠܳܢܺܝܬ) ܘܠܰܒܪܳܐ ܕܺܝܠܰܢ (ܦܠܳܢ). ܘܰܢܩܰܒܠܽܘܢ ܒܽܘܪܟܬܳܐ ܫܡܰܝܳܢܺܝܬܳܐ ܘܢܶܗܘܽܘܢ ܡܰܦܪ̈ܝܳܢܶܐ ܕܰܒܢܰܝ̈ܳܐ ܘܕܰܒ̈ܢܳܬܳܐ ܕܙܰܕܺܝܩܽܘܬܳܐ. ܘܰܥܒܶܕ ܒܛܰܝܒܽܘܬܳܟ ܕܢܺܐܬܶܐ ܫܽܘܘܕܳܝܗܽܘܢ ܠܫܽܘܡܠܳܝܳܐ ܫܰܦܺܝܪܳܐ. ܐܰܝܟܰܢܳܐ ܕܟܰܕ ܚܳܕܶܝܢ ܘܕܳܝܨܺܝܢ܆ ܢܰܣܩܽܘܢ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܠܙܒܰܢ ܠܥܳܠܡܺܝܢ ܐܰܡܝܢ܀

ܘܰܡܢܺܝܦ ܐܺܝܕܶܗ ܟܳܗܢܳܐ ܘܰܡܪܰܚܶܦ ܥܰܠ ܥܶܙ̈ܩܳܬܳܐ ܘܳܐܡܰܪ ܒܩܳܠܳܐ ܪܳܡܳܐ:

ܡܒܰܪ̈ܟܳܢ ܐܶܢܶܝܢ ܥܶܙ̈ܩܳܬܳܐ ܗܳܠܶܝܢ ܠܫܽܘܡܠܳܝ ܚܰܕ̈ܘܳܬܳܐ ܕܰܒܢܰܝ̈ܳܐ ܕܥܺܕܬܳܐ ܩܰܕܺܝܫܬܳܐ܀

ܡܫܰܡ̈ܫܳܢܶܐ: ܒܰܪܶܟܡܳܪܝ̱.

ܟܳܗܢܳܐ: ܒܰܫܡܳܐ ܕܰܐܒܳܐ ♱ ܐܰܡܺܝܢ ܘܕܰܒܪܳܐ ♱ ܐܰܡܺܝܢ ܘܰܕܪܽܘܚܳܐ ܚܰܝܳܐ ܘܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ. ܐܰܡܺܝܢ܀

ܘܝܳܗܶܒ ܟܳܗܢܳܐ ܥܶܙܩܬܐ ܠܚܰܬܢܳܐ ܘܳܐܡܰܪ ܨܠܽܘܬܳܐ ܗܳܕܶܐ:

ܝܰܡܺܝܢܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܬܶܬܦܫܶܛܝ̱ ܒܪ̈ܰܚܡܶܐ ܠܘܳܬܳܟ ܘܰܬܩܰܒܶܠ ܡܶܢܶܗ ܥܰܡ ܥܶܙܩܬܳܐ ܗܳܕܶܐ ܓܠܺܝܬܳܐ ܕܰܡܟܺܝܪܽܘܬܳܟ ܛܰܝܒܽܘܬܳܐ ܟܣܺܝܬܳܐ ܕܰܡܪܰܚܡܳܢܽܘܬܳܐ܆ ܘܗܺܝ ܗܳܕܶܐ ܝܰܡܺܝܢܳܐ ܡܰܠܝܰܬ ܛܳܒ̈ܳܬܳܐ ܘܝܳܗܒܰܬ ܒܽܘܪ̈ܟܳܬܳܐ ܬܶܗܘܶܐ ܥܰܡܳܟ ܘܰܬܢܰܛܪܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܟ. ܐܰܡܺܝܢ܀

ܘܝܳܗܶܒ ܥܶܙܩܬܳܐ ܠܟܰܠܬܳܐ ܘܳܐܡܰܪ:

ܝܰܡܺܝܢܶܗ ܕܡܳܪܰܢ ܝܶܫܽܘ̇ܥ ܡܫܺܝܚܳܐ ܬܶܬܦܫܶܛܝ̱ ܠܘܳܬܶܟܝ̱ ܒܥܶܕܳܢܳܐ ܗܳܢܳܐ ܒܪ̈ܰܚܡܶܐ. ܘܰܬܩܰܒܠܺܝܢ ܡܶܢܳܗ̇ ܥܰܡ ܥܶܙܩܬܳܐ ܗܳܕܶܐ ܓܠܺܝܬܐ ܕܰܡܟܺܝܪܽܘܬܶܟܝ̱ ܐܳܦ ܒܽܘܪܟܬܳܐ ܟܣܺܝܬܳܐ ܕܰܡܪܰܚܡܳܢܽܘܬܳܐ. ܗܳܝ ܕܡܰܥܬܪܳܐ ܠܢܳܣܽܘܒܶܝ̈ܗ̇ ܕܠܳܐ ܟܰܝܠܳܐ܆ ܘܟܺܐܒܳܐ ܠܰܝܬ ܥܰܡܳܗ̇. ܘܰܒܝܰܕ ܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ ܘܰܒܚܰܕܽܘܬܳܐ ܕܠܶܒܳܐ ܬܰܣܩܺܝܢ ܠܶܗ ܬܶܫܒܽܘܚܬܳܐ ܠܥܳܠܡܺܝܢ܀

ܨܠܽܘܬܳܐ ܕܥܰܠ ܡܟܺܝܪ̈ܐ ܬܪ̈ܝܗܽܘܢ

ܡܳܪܝܳܐ ܕܨܳܒܶܐ ܒܚܰܝ̈ܶܐ ܕܟܽܠܗܽܘܢ ܒܢܰܝ̈ܢܳܫܳܐ، ܗܽܘ ܢܶܨܒܶܐ ܒܚܰܝܰܝ̈ܟܽܘܢ ܘܰܢܒܰܪܶܟ ܡܟܺܝܪܽܘܬܟܽܘܢ. ܡܫܺܝܚܳܐ ܚܰܬܢܳܐ ܫܡܰܝܳܢܳܐ ܢܶܚܬܽܘܡ ܚܰܬܢܽܘܬܟܽܘܢ ܒܚܰܬܢܽܘܬܶܗ ܕܰܫܪܳܪܳܐ. ܘܝܰܡܺܝܢܶܗ ܬܰܓܶܢ ܥܠܰܝܟܽܘܢ ܘܰܬܢܰܛܰܪܟܽܘܢ ܡܶܢ ܟܽܠ ܢܶܟܝ̈ܳܢܺܝܢ. ܢܶܬܶܠ ܠܟܽܘܢ ܡܳܪܝܳܐ ܦܺܐܪ̈ܶܐ ܕܒܽܘܪ̈ܟܳܬܳܐ ܘܰܕܪ̈ܰܚܡܶܐ. ܘܬܶܚܕܽܘܢ ܒܗܽܘܢ ܐܰܝܟ ܕܰܚܕܺܝ ܐܰܒܪܳܗܳܡ ܒܺܐܝܣܚܳܩ܆ ܐܰܝܟ ܐܺܝܣܚܳܩ ܒܝܰܥܩܽܘܒ܆ ܐܰܝܟ ܝܰܥܩܽܘܒ ܒܝܰܘܣܶܦ܆ ܐܰܝܟ ܐܺܝܫܰܝ ܒܕܰܘܺܝܕ܆ ܐܰܝܟ ܚܰܢܰܐ ܒܰܫܡܽܘܐܝܠ܆ ܐܰܝܟ ܐܰܗܪܽܘܢ ܒܶܐܠܺܝܥܳܙܳܪ. ܘܢܶܫܬܰܒܰܚ ܫܡܶܗ ܕܰܐܠܳܗܳܐ ܒܰܝܢܳܬܟܽܘܢ. ܕܠܶܗ ܫܽܘܒܚܳܐ ܘܰܥܠܰܝܟܽܘܢ ܒܽܘܪ̈ܟܳܬܶܗ ܘܪ̈ܰܚܡܰܘܗ̱ܝ ܠܥܳܠܡܺܝܢ ܐܰܡܝܢ܀

ܨܠܽܘܬܳܐ ܕܚܽܘܬܡܳܐ

ܘܰܐܢ̱ܬܽܘܢ ܐܰܚ̈ܰܝ ܡܗܰܝ̈ܡܢܶܐ ܕܶܐܬܰܝܬܽܘܢ ܘܶܐܬܛܰܝܰܒܬܽܘܢ ܒܣܳܗܕܽܘܬܳܐ ܗܳܕܶܐ ܡܙܰܕܩܰܬ ܡܶܢ ܐܰܠܳܗܳܐ. ܗܽܘ ܢܶܬܶܠ ܠܟܽܘܢ ܐܰܓܪܳܐ ܛܳܒܳܐ ܘܢܶܦܪܽܘܥܟܽܘܢ ܫܰܦܺܝܪ̈ܳܬܳܐ ܒܟܽܠܙܒܰܢ. ܘܰܨܠܺܝܒܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܢܶܗܘܶܐ ܠܟܽܘܢ ܡܢܰܛܪܳܢܳܐ ܒܺܐܝܡܳܡܳܐ ܘܰܒܠܺܠܝܳܐ ܡܶܢ ܒܺܝܫܳܐ ܘܚܰܝ̈ܠܰܘܳܬܶܗ ܠܥܳܠܡܺܝܢ ܐܰܡܺܝܢ܀

ܒܳܥܽܘܬܳܐ ܕܡܳܪܝ ܝܰܥܩܽܘ̇ܒ H

ܫܰܪܒܶܟܝ̱ ܥܺܕܬܳܐ ܗܳܐ ܙܳܩܶܬ ܠܶܗ ܠܡܰܕܥܳܐ ܡܠܺܝܠܳܐ܆ ܕܰܠܦܰܐܝܽܘܬܶܟܝ ܡܶܢ ܒܶܝܬ ܚܽܘ̈ܩܶܐ ܢܰܥܕܶܐ ܟܠܺܝܠܳܐ܀

ܘܰܐܝܟܰܢ ܡܰܘܦܶܐ ܠܡܺܐܡܰܪ ܫܰܪܒܶܟܝ̱ ܡܰܕܥܳܐ ܡܚܺܝܠܳܐ܆ ܕܡܶܢ ܬܶܫܒܽܘܚܬܶܗ ܕܚܰܬܢܳܐ ܡܳܪܶܟܝ ܗܘܳܐ ܒܰܛܺܝܠܳܐ܀

ܗܳܐ ܒܶܝܬ ܥܰܝ̈ܢܰܝܟܝ ܪܽܘܫܡܶܗ ܡܝܰܩܪܳܐ ܨܠܺܝܒܳܐ ܕܚܺܝܠܳܐ܆ ܘܰܒܓܰܘ ܦܽܘܡܶܟܝ ܡܰܪܓܳܢܺܝܬܳܐ ܕܒܰܕܡܶܗ ܦܺܝܠܳܐ܀

ܛܰܠܝܳܐ ܕܡܰܟܪܶܟܝ ܕܳܡܶܐ ܠܛܰܒܝܳܐ ܘܰܠܥܽܘܙܰܝܠܳܐ܆ ܠܶܟܝ ܕܶܝܢ ܛܽܘܒܳܐ ܘܠܶܗ ܬܶܫܒܽܘܚܬܳܐ ܕܠܳܐ ܡܶܬܬܟܺܝܠܳܐ܀

ܩܰܕܝܫܰܬ ܐܰܠܳܗܐ

ܩܰܕܝܫܰܬ ܐܠܗܐ. ܩܰܕܝܫܰܬ ܚܰܝܠܬܳܢܐ. ܩܰܕܝܫܰܬ ܠܐ ܡܳܝܘܬܐ. ܕܶܐܨܛܠܶܒܬ ܚܠܳܦܰܝܢ. ܐܶܬܪܰܚܰܡܥܠܰܝܢ܀ (ܬܠܬ ܙܒܢܝܢ)

ܡܳܪܰܢ ܐܶܬܪܰܚܰܡܥܠܰܝܢ. ܡܳܪܰܢ ܚܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨ̈ܠܰܘܳܬܰܢ. ܐܶܬܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰ̈ܛܳܝܶܐ ܥܰܒ̈ܕܰܝܟ܀

ܐܰܒܽܘܢ ܕܒܰܫܡܰܝܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀