ܬܶܫܡܶܫܬܳܐ ܬܪܰܝܳܢܺܝܬܳܐ
ܕܒܽܘܪܳܟ ܟܠܺܝ̈ܠܶܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ. ܐܰܡܺܝܢ.

ܨܠܽܘܬܐ

ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܠܡܶܫܬܽܘܬܳܐ ܗܳܝ ܕܠܳܐ ܦܳܛܪܳܐ ܘܠܰܓܢܽܘܢܳܐ ܗܰܘ ܕܠܳܐ ܡܶܫܬܪܶܐ. ܘܥܰܡ ܚܕܽܘ̈ܓܶܐ ܕܶܐܙܕܰܡܰܢܘ ܠܗܳܝ ܡܶܫܬܽܘܬܳܐ܆ ܙܰܡܶܢ ܠܰܢ ܠܚܰܕ̈ܘܳܬܳܟ ܕܰܠܥܳܠܰܡ. ܐܰܝܟܰܢܳܐ ܕܥܰܡܗܽܘܢ ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ: ܐܶܡܳܐ ܕܟܺܝܬܳܐ H

ܡܫܺܝܚܳܐ ܕܒܰܪܶܟ ܠܟܺܐܢ̈ܶܐ ܩܰܕܡܳܝ̈ܶܐ܆ ܗܽܘ ܢܒܰܪܶܟ ܠܥܰܒܕ̈ܰܘܗ̱ܝ̱ ܒܣܽܘܓܳܐܐ ܕܛܰܝܒܽܘܬܶܗ܆ ܪܰܚܶܡܥܠܰܝܢ ܐܰܠܳܗܳܐ܀

ܡܳܪܝܳܐ ܕܒܰܪܶܟ ܠܳܐܕܳܡ ܘܰܠܚܰܘܳܐ܆ ܒܰܪܶܟ ܠܥܰܒܕ̈ܰܝܟ ܒܣܽܘܓܳܐܐ ܕܛܰܝܒܽܘܬܳܟ܆ ܪܰܚܶܡܥܠܰܝܢ ܐܰܠܳܗܳܐ܀

ܒܰܪܶܟ ܡܳܪܝܳܐ ܠܚܰܬܢܳܐ ܘܰܠܟܰܠܬܳܐ܆ ܘܰܐܫܘܳܐ ܐܶܢܽܘܢ ܕܢܶܥܠܽܘܢ ܠܰܓܢܽܘܢܳܟ܆ ܪܰܚܶܡܥܠܰܝܢ ܐܰܠܳܗܳܐ܀

ܩܽܘܩܠܺܝܳܘܢ H

ܡܳܪܝܳܐ ܒܚܰܝܠܳܟ ܢܶܚܕܶܐ ܡܰܠܟܳܐ ܗ̄ܘܗ̄ ܘܰܒܦܽܘܪܩܳܢܳܟ ܢܕܽܘܨ ܪܰܘܪܒܳܐܺܝܬ܀

ܪܶܓܬܳܐ ܕܠܶܒܶܗ ܝܰܗ̱ܒܬ ܠܶܗ ܗ̄ܘܗ̄ ܘܛܽܘܝܳܒܳܐ ܕܣܶܦ̈ܘܳܬܶܗ ܠܳܐ ܟܠܰܝܬܳܝܗ̱ܝ̱܀

ܡܶܛܽܠ ܕܩܰܕܶܡܬܳܝܗ̱ܝ̱ ܒܽܘܪܟܬܳܐ ܛܳܒܬܳܐ ܗ̄ܘܗ̄ ܘܣܳܡܬ ܒܪܺܝܫܶܗ ܟܠܺܝܠܳܐ ܡܫܰܒܚܳܐ܀

ܚܰܝ̈ܶܐ ܫܶܐܠ ܠܳܟ ܘܝܰܗ̱ܒܬ ܠܶܗ ܗ̄ܘܗ̄ ܢܽܘܓܪܳܐ ܕܝܰܘ̈ܡܳܬܳܐ ܠܥܳܠܰܡ ܥܳܠܡܺܝܢ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.

ܥܶܩܒܳܐ H

ܥܺܕܬܳܐ ܩܰܕܺܝܫܬܳܐ ܐܶܫܬܰܪܪܰܬ ܒܗܰܝܡܳܢܽܘܬܳܐ ܕܰܡܫܺܝܚܳܐ. ܐܳܦ ܓܶܝܪ ܕܠܳܐ ܫܶܠܝܳܐ ܬܶܫܒ̈ܚܳܬܳܐ ܡܰܙܥܩܳܐ ܠܟ ܟܰܕ ܐܳܡܪܳܐ: ܩܰܕܺܝܫܳܐ ܠܳܐ ܡܳܝܽܘܬܳܐ ܦܳܪܽܘܩܳܐ ܕܢܰܦ̈ܫܳܬܳܐ ܕܟܽܠܰܢ܀

ܡܫܰܡܫܳܢܳܐ: ܣܛܰܘܡܶܢܩܰܐܠܽܘ̇ܣ ܩܽܘܪܝܶܐܠܰܝܣܽܘܢ

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܠܗܰܘ ܚܰܬܢܳܐ ܪܽܘܚܳܢܳܐ܆ ܠܗܰܘ ܡܰܠܟܳܐ ܫܡܰܝܳܢܳܐ. ܠܗܰܘ ܟܠܺܝܠܳܐ ܕܠܳܐ ܥܳܒܰܪ܆ ܠܗܰܘ ܬܳܓܳܐ ܕܠܳܐ ܦܳܛܰܪ. ܠܗܰܘ ܡܫܰܡܠܝܳܢܳܐ ܕܚܰܬܢܰܝ̈ܢ ܘܡܰܦܨܚܳܢܳܐ ܕܟܰܠ̈ܠܳܬܰܢ. ܘܰܡܡܰܠܝܳܢܳܐ ܕܚܰܕ̈ܘܳܬܰܢ ܘܡܰܥܒܪܳܢܳܐ ܕܥܳܩ̈ܳܬܰܢ܆ ܘܰܡܫܰܡܠܝܳܢܳܐ ܕܫܰܦܺܝܪ̈ܳܬܰܢ. ܗܰܘ ܕܡܰܦܨܰܚ ܠܚܰܬܢ̈ܶܐ ܘܰܠܟܰܠ̈ܠܳܬܳܐ܆ ܘܠܰܙܡܺܝ̈ܢܶܐ ܛܳܒ̈ܶܐ ܒܰܓܢܽܘܢܶܗ ܓܰܐܝܳܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܫܽܘܡܠܳܝ ܚܰܕܽܘܬܳܐ ܕܥܰܒܕ̈ܰܘܗ̱ܝ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܕܰܥܒܰܕ ܫܡܰܝܳܐ ܒܚܶܟܡܬܶܗ܆ ܘܰܪܩܰܥ ܐܰܪܥܳܐ ܥܰܠ ܡܰܝ̈ܳܐ ܒܚܰܝܠܬܳܢܽܘܬܶܗ ܘܰܥܒܰܕ ܡܰܠܰܐܟ̈ܶܐ ܠܬܶܫܒܽܘܚܬܳܐ ܕܰܫܡܶܗ. ܘܰܥܒܰܕ ܠܳܐܕܳܡ ܨܰܠܡܳܐ ܕܪܰܒܽܘܬܶܗ ܘܫܰܦܺܝܪܳܐ ܒܰܕܡܽܘܬܶܗ܆ ܘܣܳܡܶܗ ܒܓܰܘ ܥܕܶܢ ܕܰܢܕܰܝܰܪ ܒܳܗ̇ ܫܰܦܺܝܪܳܐܺܝܬ. ܘܶܐܡܰܪ ܐܰܠܳܗܳܐ ܕܠܳܐ ܫܰܦܺܝܪ ܕܢܶܗܘܶܐ ܐܳܕܳܡ ܒܰܠܚܽܘܕܰܘܗ̱ܝ̱ ܐܶܠܳܐ ܕܢܶܥܒܶܕ ܠܶܗ ܡܥܰܕܪܳܢܳܐ ܕܢܶܗܘܶܐ ܥܰܡܶܗ. ܘܰܐܪܡܺܝ ܐܰܠܳܗܳܐ ܫܶܢܬܳܐ ܥܰܠ ܐܳܕܳܡ ܘܰܕܡܶܟ܆ ܘܰܢܣܰܒ ܐܶܠܥܳܐ ܡܶܢ ܓܰܪ̈ܡܰܘܗ̱ܝ̱ ܘܥܰܒܕܳܗ̇ ܠܚܰܘܳܐ ܟܰܠܬܳܐ ܘܝܰܗܒܳܗ̇ ܠܶܗ. ܘܶܐܬܬܥܺܝܪ ܐܳܕܳܡ ܡܶܢ ܫܶܢܬܶܗ ܘܰܚܙܳܗ̇ ܠܚܰܘܳܐ ܘܶܐܡܰܪ: ܗܳܕܶܐ ܬܶܬܩܪܶܐ ܐܰܢ̱ܬܬܳܐ ܡܶܛܽܠ ܕܡܶܢ ܓܰܒܪܳܐ ܢܣܺܝܒܳܐ. ܘܒܰܪܶܟ ܐܰܠܳܗܳܐ ܠܚܰܘܳܐ ܘܠܳܐܕܳܡ ܒܓܰܘ ܥܕܶܢ ܘܶܐܡܰܪ: ܕܰܦܪܰܘ ܘܰܣܓܰܘ ܘܰܡܠܰܘ ܐܰܪܥܳܐ ܘܟܽܘܒܫܽܘܗ̇܆ ܘܶܐܫܬܰܠܛܘ ܒܢܽܘ̈ܢܰܝ ܝܰܡܳܐ ܘܰܒܦܳܪܰܚܬܳܐ ܕܰܫܡܰܝܳܐ. ܐܰܢ̱ܬ ܗܳܟܺܝܠ ܚܰܢܳܢܳܐ ܘܪܳܚܶܡ ܐ̱ܢܳܫ̈ܳܐ ܡܳܪܝܳܐ܆ ܒܰܪܶܟ ܠܥܰܒܕ̈ܰܝܟ ܗܳܠܶܝܢ ܕܫܳܐܠܺܝܢ ܡܶܢܳܟ ܒܽܘܪܟܬܳܐ ܘܣܺܝܡ ܬܚܽܘܡܳܐ ܕܙܽܘܘܳܓܗܽܘܢ ܒܰܢܛܽܘܪܽܘܬܳܐ ܕܺܝܠܳܟ. ܘܫܰܪܰܪ ܐܶܢܽܘܢ ܘܣܰܗܶܕ ܐܶܢܽܘܢ ܒܝܰܕ ܡܶܨܥܳܝܽܘܬܳܐ ܕܺܝܠܝ ܒܨܺܝܪܳܐ ܕܰܒܕܰܪ̈ܓܶܐ ܕܟܳܗ̈ܢܶܐ ܦܶܣܬܳܐ ܕܺܝܠܝ ܐܶܬܬܣܺܝܡܰܬ܆ ܗܳܝ ܕܰܐܝܟ ܡܶܠܬܳܟ ܒܪܰܘܡܳܐ ܘܰܒܥܽܘܡܩܳܐ ܐܶܫܬܰܠܛܰܬ. ܩܰܪܶܒ ܐܶܢܽܘܢ ܠܘܳܬܳܟ ܕܬܽܘܒ ܢܶܫܬܰܪܪܽܘܢ ܒܕܶܚܠܬܳܟ. ܘܢܶܗܘܽܘܢ ܬܽܘܒ ܐܺܝܠܳܢ̈ܶܐ ܕܥܳܒܕܺܝܢ ܦܺܐܪ̈ܶܐ ܛܳܒ̈ܶܐ ܠܬܶܫܒܽܘܚܬܳܟ ܕܢܶܬܚܰܝܕܽܘܢ ܠܰܚܕܳܕ̈ܶܐ ܒܚܽܘܒܳܐ ܘܰܒܪܶܚܡܬܳܐ ܕܠܳܐ ܙܺܐܦܳܐ܆ ܘܢܶܗܘܽܘܢ ܚܰܕ ܕܠܳܐ ܡܩܰܒܶܠ ܣܰܩܽܘܒܠܳܝܽܘܬܳܐ ܡܶܢܶܗ ܘܠܶܗ. ܡܶܟܺܝܠ ܠܰܘ ܬܪܶܝܢ ܕܢܶܬܰܐܡܪܽܘܢ ܕܕܰܠܩܽܘܒܠܳܝܺܝܢ ܐܶܠܳܐ ܬܪܶܝܢ ܕܰܚܠܺܝܛܺܝܢ ܘܰܡܫܰܝܢܺܝܢ ܘܰܢܛܺܝܪܺܝܢ ܐܰܝܟ ܒܳܒܬܳܐ ܕܥܰܝܢܳܐ. ܐܰܢ̱ܬ ܡܳܪܝ ܐܶܡܰܪܬ ܒܝܰܕ ܒܪܳܟ ܚܰܒܺܝܒܳܐ: ܕܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ̱ ܘܠܶܐܡܶܗ ܘܢܶܩܰܦ ܠܰܐܢ̱ܬܬܶܗ ܘܢܶܗܘܽܘܢ ܬܪ̈ܰܝܗܽܘܢ ܚܰܕ ܒܣܰܪ. ܗܰܒ ܠܗܽܘܢ ܕܢܶܩܦܽܘܢ ܚܰܕ ܠܚܰܕ ܘܰܢܝܰܩܪܽܘܢ ܠܰܐܒܳܗܰܝ̈ܗܽܘܢ. ܕܢܶܬܝܰܩܪܽܘܢ ܡܶܢ ܒܢܰܝ̈ܗܽܘܢ ܐܰܝܟ ܡܶܠܬܶܗ ܕܰܫܠܺܝܚܳܐ ܐܰܠܳܗܳܝܳܐ ܕܶܐܡܰܪ: ܕܓܰܒܪ̈ܶܐ ܐܰܚܶܒܽܘܢ ܢܶܫܰܝ̈ܟܽܘܢ ܐܰܝܟ ܕܰܡܫܺܝܚܳܐ ܐܰܚܶܒ ܠܥܺܕܬܶܗ܆ ܘܢܶܫ̈ܶܐ ܐܰܚܶܒܶܝ̈ܢ ܠܒܰܥܠܰܝ̈ܟܶܝܢ ܐܰܝܟܰܢܳܐ ܕܠܰܡܫܺܝܚܳܐ ܐܰܚܒܰܬ ܥܺܕܬܶܗ. ܘܬܽܘܒ ܗܰܒ ܠܗܽܘܢ ܕܢܶܗܘܽܘܢ ܐܰܒܳܗ̈ܶܐ ܕܠܳܐ ܡܰܪܓܙܺܝܢ ܠܰܒܢܰܝ̈ܗܽܘܢ܆ ܘܰܕܢܶܗܘܽܘܢ ܒܢܰܝ̈ܗܽܘܢ ܡܶܫܬܰܡܥܺܝܢ ܠܗܽܘܢ ܐܰܝܟ ܕܦܰܘܠܽܘܣ ܐܰܠܳܗܳܝܳܐ ܦܰܩܶܕ ܘܙܰܗܰܪ. ܘܰܕܢܺܐܠܦܽܘܢ ܗܳܠܶܝܢ ܕܡܰܘܬܪ̈ܳܢ ܘܰܡܩܰܪ̈ܒܳܢ ܠܘܳܬ ܐܰܠܳܗܳܐ܆ ܘܰܕܢܶܬܪܰܚܩܽܘܢ ܡܶܢ ܗܳܠܶܝܢ ܕܡܰܚܣܪ̈ܳܢ. ܘܰܕܢܶܫܬܘܽܘܢ ܕܢܶܦܠܚܽܘܢ ܠܳܟ ܥܰܒܕܽܘܬܳܐ ܛܳܒܬܳܐ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܩܰܕܺܝܫܳܐ ܘܛܳܒܳܐ܆ ܕܥܰܡܶܗ ܘܥܰܡ ܪܽܘܚܳܟ ܩܰܕܺܝܫܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܆ ܒܰܪܶܟܡܳܪܝ܀

ܩܳܠܳܐ܆ ܩܽܘܩܳܝܳܐ H

ܡܳܐ ܫܰܦܺܝܪܰܬܝ̱ ܒܰܪ̱ܬ ܥܰܡ̱̈ܡܶܐ ܡܳܐ ܫܰܦܺܝܪܰܬܝ̱. ܫܠܶܝܡܽܘܢ ܡܰܠܟܳܐ ܡܢܰܨܰܪ ܠܶܟܝ ܥܺܕܬܳܐ ܩܰܕܺܝܫܬܳܐ. ܟܰܟܳܪܺܝܬܳܐ ܡܰܛ̈ܦܳܢ ܣܶܦܘ̈ܳܬܶܟܝ܆ ܘܪܺܝܚܳܐ ܕܡܳܐܢܰܝ̈ܟܝ ܐܰܝܟ ܘܰܪܕܳܐ ܒܢܺܝܣܳܢ. ܟܽܠܶܟܝ ܥܺܕܬܳܐ ܫܰܦܺܝܪܰܬܝ̱ ܘܡܽܘܡܳܐ ܠܳܐ ܐܺܝܬ ܒܶܟܝ. ܘܡܰܠܟܳܐ ܡܫܺܝܚܳܐ ܡܢܰܛܰܪ ܠܶܟܝ ܕܠܰܨܠܺܝܒܶܗ ܣܳܓܕܰܬܝ ܗ̄ܘܗ̄܀

ܫܘ̄ܒ: ܡܰܢ ܗ̱ܝ ܗܳܕܶܐ ܒܰܪ̱ܬ ܡܰܠܟܳܐ ܕܶܐܡܰܪ ܕܰܘܺܝܕ. ܕܰܒܫܽܘܒܚܳܐ ܪܰܒܳܐ ܩܳܝܡܳܐ ܡܶܢ ܝܰܡܺܝܢ ܡܳܪܝܳܐ. ܠܒܽܘܫܳܗ̇ ܙܺܝܘܳܐ ܘܰܦܪܺܝܣܳܗ̇ ܢܽܘܗܪܳܐ܆ ܘܥܰܠ ܥܰܪ̈ܦܶܠܶܐ ܕܳܐܐܰܪ ܡܶܬܓܰܝܳܐܐ. ܡܬܺܝܚ ܫܽܘܠܛܳܢܳܗ̇ ܡܶܢ ܣܰܘܦܶܝ̈ܗ̇ ܠܣܰܘܦܶܝ̈ܗ̇ ܕܰܐܪܥܳܐ܆ ܗܺܝ ܗ̱ܝ ܥܺܕܬܐ ܡܗܰܝܡܰܢܬܳܐ ܕܰܡܨܰܒܬܐ ܘܩܳܝܡܳܐ ܗ̄ܘܗ̄܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܐܺܝܢ ܡܳܪܝܳܐ ܩܰܒܶܠ ܠܒܶܣ̈ܡܶܐ ܗܳܠܶܝܢ ܕܡܶܢܰܢ ܩܕܳܡ ܐܰܠܳܗܽܘܬܳܟ ܡܪܰܝܰܡܬܳܐ ܘܰܓܢܺܝܙܬܳܐ ܐܶܬܩܰܪܰܒܘ. ܘܰܒܪܽܘܚܳܦܳܐ ܕܡܶܢܳܟ ܒܰܪܶܟ ܠܥܰܒܕ̈ܰܝܟ ܗܳܠܶܝܢ ܘܰܠܥܽܘܡܪܳܐ ܗܳܢܳܐ ܘܥܳܡܽܘܪ̈ܰܘܗ̱ܝ̱. ܘܰܥܒܶܕܳܝܗ̱ܝ̱ ܐܰܝܟ ܕܟܺܐܢ̈ܶܐ ܕܡܶܢ ܥܳܠܰܡ ܫܦܰܪܘ ܠܳܟ. ܘܫܰܪܬܰܚܳܝܗ̱ܝ̱ ܒܛܳܒ̈ܳܬܳܐ ܕܡܶܢܳܟ ܘܰܐܣܓܳܐ ܒܶܗ ܒܽܘܪ̈ܟܳܬܳܟ. ܘܠܰܢ ܘܰܠܗܽܘܢ ܢܰܛܰܪ ܒܛܰܝܒܽܘܬܳܟ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܙܽܘܡܳܪܳܐ:

ܡܳܪܝܳܐ ܐܰܡܠܶܟ ܘܓܰܐܝܽܘܬܳܐ ܠܒܶܫ܆ ܠܒܶܫ ܡܳܪܝܳܐ ܥܽܘܫܢܳܐ ܘܶܐܬܥܰܫܰܢ ܗ̄܀

ܡܫܰܡ̈ܫܳܢܶܐ: ܦܰܘܠܽܘܣ ܫܠܺܝܚܳܐ ܘܛܽܘܒܳܢܳܐ ܫܶܡܥܶܬ ܕܳܐܡܰܪ܆ ܕܶܐܢ ܐ̱ܢܳܫ ܢܺܐܬܶܐ ܢܣܰܒܰܪܟܽܘܢ. ܠܒܰܪ ܡܶܢ ܡܳܐ ܕܣܰܒܰܪܢܳܟܽܘܢ. ܘܶܐܢ ܡܰܠܐܰܟܰܐ ܗ̱ܘ ܡܶܢ ܪܰܘܡܳܐ܆ ܢܶܗܘܶܐ ܡܰܚܪܰܡ ܡܶܢ ܥܺܕܬܳܐ. ܕܗܳܐ ܢܳܒܥܺܝܢ ܠܰܡ ܝܽܘܠܦܳܢ̈ܶܐ܆ ܡܫܰܚ̈ܠܦܶܐ ܡܶܢ ܟܽܠ ܓܰܒܺܝ̈ܢ. ܛܽܘܒ ܠܰܐܝܢܳܐ ܕܰܒܝܽܘܠܦܳܢܶܗ܆ ܕܰܐܠܳܗܳܐ ܫܰܪܺܝ ܘܫܰܠܶܡ܀

ܡܶܢ ܐܶܓܰܪܬܳܐ ܕܦܰܘܠܽܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ܆ ܒܰܪܶܟܡܳܪܝ.

ܐܶܦܶܣܳܝ̈ܶܐ ܗ: ܟܒ ـ ܠܓ

ܢܶܫ̈ܶܐ ܗܘܰܝܬܶܝ̈ܢ ܡܶܫܬܰܥܒ̈ܕܳܢ ܠܒܰܥܠܰܝ̈ܟܶܝܢ ܐܰܝܟ ܕܰܠܡܳܪܰܢ. ܡܶܛܽܠ ܕܓܰܒܪܳܐ ܪܺܝܫܳܗ̇ ܗ̱ܘ ܕܰܐܢ̱ܬܬܳܐ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܪܺܝܫܰܐ ܗ̱ܘ ܕܥܺܕܬܳܐ܆ ܘܗܽܘܝܽܘ ܡܰܚܝܳܢܳܐ ܕܦܰܓܪܳܐ. ܐܶܠܳܐ ܐܰܝܟܰܢܳܐ ܕܥܺܕܬܳܐ ܡܶܫܬܰܥܒܕܳܐ ܠܰܡܫܺܝܚܳܐ܆ ܗܳܟܰܢܳܐ ܐܳܦ ܢܶܫ̈ܶܐ ܠܒܰܥܠܰܝ̈ܗܶܝܢ ܒܟܽܠ ܡܶܕܶܡ. ܓܰܒܪ̈ܶܐ ܐܰܚܶܒܘ ܢܶܫܰܝ̈ܟܽܘܢ܆ ܐܰܝܟ ܕܳܐܦ ܡܫܺܝܚܳܐ ܐܰܚܶܒ ܠܥܺܕܬܶܗ ܘܢܰܦܫܶܗ ܐܰܫܠܶܡ ܥܰܠ ܐܰܦܶܝ̈ܗ̇܆ ܕܰܢܩܰܕܫܺܝܗ̇ ܘܰܢܕܰܟܶܝܗ̇ ܒܰܣܚܳܝܳܐ ܕܡܰܝ̈ܳܐ ܘܰܒܡܶܠܬܳܐ. ܘܰܢܩܺܝܡܺܝܗ̇ ܥܺܕܬܳܐ ܠܢܰܦܫܶܗ ܟܰܕ ܡܫܰܒܚܳܐ܆ ܘܠܰܝܬ ܒܳܗ̇ ܛܽܘܠܫܳܐ ܘܠܳܐ ܩܶܢܛܳܐ ܘܠܳܐ ܡܶܕܶܡ ܕܰܠܗܳܠܶܝܢ ܕܳܡܶܐ܆ ܐܶܠܳܐ ܬܶܗܘܶܐ ܩܰܕܺܝܫܳܐ ܕܠܳܐ ܡܽܘܡ. ܗܳܟܰܢܳܐ ܘܳܠܶܐ ܠܓܰܒܪ̈ܶܐ ܕܢܰܚܒܽܘܢ ܢܶܫܰܝ̈ܗܽܘܢ ܐܰܝܟ ܕܰܠܦܰܓܪ̈ܰܝܗܽܘܢ. ܘܡܰܢ ܕܠܰܐܢ̱ܬܬܶܗ ܓܶܝܪ ܡܰܚܶܒ܆ ܢܰܦܫܶܗ ܗ̱ܘ ܡܰܚܶܒ. ܠܳܐ ܓܶܝܪ ܐ̱ܢܳܫ ܡܶܡܬܽܘܡ ܣܳܢܶܐ ܦܰܓܪܶܗ܆ ܐܶܠܳܐ ܡܬܰܪܣܶܐ ܠܶܗ ܘܝܳܨܶܦ ܕܺܝܠܶܗ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܕܥܺܕܬܶܗ. ܡܶܛܽܠ ܕܗܰܕ̈ܳܡܶܐ ܚܢܰܢ ܕܦܰܓܪܶܗ ܘܡܶܢ ܒܶܣܪܶܗ ܚܢܰܢ ܘܡܶܢ ܓܰܪ̈ܡܰܘܗ̱ܝ̱. ܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ ܘܢܶܩܰܦ ܠܰܐܢ̱ܬܬܶܗ܆ ܘܢܶܗܘܽܘܢ ܬܪ̈ܰܝܗܽܘܢ ܚܰܕ ܒܣܰܪ. ܗܳܢܳܐ ܐ̱ܪܳܙܳܐ ܪܰܒ ܗ̱ܘ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܥܰܠ ܡܫܺܝܚܳܐ ܘܥܰܠ ܥܺܕܬܶܗ. ܒܪܰܡ ܐܳܦ ܐܰܢ̱ܬܽܘܢ ܟܽܠܚܰܕ ܚܰܕ ܡܶܢܟܽܘܢ ܗܳܟܰܢܳܐ ܢܶܪܚܰܡ ܐܰܢ̱ܬܬܶܗ ܐܰܝܟ ܕܰܠܢܰܦܫܶܗ. ܐܰܢ̱ܬܬܳܐ ܕܶܝܢ ܬܶܗܘܶܐ ܕܳܚܠܳܐ ܡܶܢ ܒܰܥܠܳܗ̇. ܒܰܪܶܟܡܳܪܝ܀

ܗܽܘܠܳܠܳܐ: ܒܽܘܪܟܬܶܗ ܕܡܳܪܝܳܐ ܥܠܰܝܟܽܘܢ܆ ܒܰܪܶܟܢܳܟܽܘܢ ܒܰܫܡܶܗ ܕܡܳܪܝܳܐ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ܆ ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܘܬ ܘܢܶܫܡܰܥ ܠܰܣܒܰܪܬܐ ܕܡ̈ܠܶܐ ܚܰܝܳ̈ܬܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܟܳܪܽܘܙܽܘܬܳܐ ܡܰܚܝܳܢܺܝܬܳܐ ܕܡܰܬܰܝ ܫܠܺܝܚܳܐ ܕܡܰܟܪܶܙ ܚܰܝ̈ܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܟܳܗܢܳܐ: ܒܙܰܒܢܳܐ ܗܳܟܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬܳܐ ܕܚܰܝ̈ܐ ܐܰܠܳܗܳܐ ܕܶܐܬܒܰܣܰܪ ܡܶܢ ܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟܰܢܐ ܗܘܰ̈ܝ܀

ܐܶܘܰܢܓܶܠܺܝܽܘ̇ܢ ܡܶܢ ܡܰܬܰܝ ܫܠܺܝܚܳܐ

ܝܛ: ܓ ـ ܝܐ

ܘܰܩܪܶܒܘ ܠܘܳܬܶܗ ܦܪ̈ܺܝܫܶܐ ܘܰܡܢܰܣܶܝܢ ܗ̱ܘܰܘ ܠܶܗ ܘܳܐܡܪܺܝܢ: ܐܶܢ ܫܰܠܺܝܛ ܠܐ̱ܢܳܫ ܕܢܶܫܪܶܐ ܐܰܢ̱ܬܬܶܗ ܒܟܽܠ ܥܶܠܳܐ؟ ܗܽܘ ܕܶܝܢ ܥܢܳܐ ܘܶܐܡܰܪ ܠܗܽܘܢ: ܠܳܐ ܩܪܰܝܬܽܘܢ ܕܗܰܘ ܕܰܥܒܰܕ ܒܪܺܝܫܺܝܬ ܕܶܟܪܳܐ ܘܢܶܩܒܬܳܐ ܥܒܰܕ ܐܶܢܽܘܢ܆ ܘܶܐܡܰܪ: ܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ ܘܢܶܩܰܦ ܠܰܐܢ̱ܬܬܶܗ܆ ܘܢܶܗܘܽܘܢ ܬܪ̈ܰܝܗܽܘܢ ܚܰܕ ܒܣܰܪ. ܡܳܕܶܝܢ ܠܳܐ ܗܘܰܘ ܬܪܶܝܢ ܐܶܠܳܐ ܚܰܕ ܦܓܰܪ. ܡܶܕܶܡ ܗܳܟܺܝܠ ܕܰܐܠܳܗܳܐ ܙܰܘܶܓ ܒܰܪܢܳܫܳܐ ܠܳܐ ܢܦܰܪܶܫ܀

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ. ܐܰܡܺܝܢ.

ܨܠܘܬܐ

ܟܳܗܢܳܐ: ܦܫܽܘܛ ܡܳܪܝܳܐ ܐܰܠܳܗܳܐ ܝܰܡܺܝܢܳܟ ܠܳܐ ܡܶܬܡܰܠܠܳܢܺܝܬܳܐ ܘܠܳܐ ܡܶܬܚܰܙܝܳܢܺܝܬܳܐ ܘܒܰܪܶܟ ܠܡܶܫܬܽܘܬܳܐ ܗܳܕܶܐ܆ ܐܰܝܟܰܢܳܐ ܕܢܶܚܕܽܘܢ ܒܳܗ̇ ܙܡܺܝ̈ܢܶܐ ܘܰܡܙܰܡ̈ܢܳܢܶܐ. ܘܢܶܬܦܰܨܚܽܘܢ ܒܳܗ̇ ܣܳܒ̈ܶܐ ܘܰܥܠܰܝ̈ܡܶܐ܆ ܘܰܢܕܽܘܨܽܘܢ ܒܳܗ̇ ܓܰܕܽܘܕ̈ܶܐ ܘܰܒܬܽܘ̈ܠܳܬܳܐ ܘܢܶܬܡܠܶܐ ܦܽܘܡܗܽܘܢ ܓܽܘܚܟܳܐ ܘܠܶܫܳܢܗܽܘܢ ܬܶܫܒܽܘܚܬܳܐ܆ ܘܢܰܣܩܽܘܢ ܫܽܘܒܚܳܐ ܘܬܰܘܕܺܝܬܳܐ ܠܳܟ ܡܳܪܝ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܡܫܰܡܫܳܢܳܐ ܛܳܥܶܢ ܠܰܟܠܺܝ̈ܠܶܐ ܥܰܠ ܕܪ̈ܳܥܰܘܗ̱ܝ̱ ܘܰܡܨܰܠܶܐ ܟܳܗܢܳܐ ܨܠܽܘܬܳܐ ܗܳܕܶܐ ܕܥܰܠ ܟܠܺܝ̈ܠܶܐ ܕܡܶܬܬܣܺܝܡܺܝܢ ܥܰܠ ܪܺܝܫܳܐ ܕܚܰܬܢܳܐ ܘܰܕܟܰܠܬܳܐ.

ܪܝܳܐ ܕܨܰܒܶܬ ܫܡܰܝ̈ܳܐ ܒܢܰܗܺܝܪ̈ܶܐ ܒܫܶܡܫܳܐ ܘܣܰܗܪܳܐ ܘܟܰܘܟ̈ܒܶܐ. ܐܰܠܳܗܳܐ ܕܟܰܠܶܠ ܐܰܪܥܳܐ ܒܥ̈ܰܠ̱ܠܳܬܳܐ ܘܰܒܦܰܩܚ̈ܶܐ ܘܗܰܒܳܒ̈ܶܐ ܕܟܽܠ ܓܢܶܣ. ܝܶܫܽܘܥ ܡܫܺܝܚܳܐ ܕܟܰܠܶܠ ܡܰܠ̈ܟܶܐ ܘܟܳܗ̈ܢܶܐ ܘܰܢܒܺܝ̈ܶܐ. ܚܰܢܳܢܳܐ ܕܝܰܗ̱ܒ ܢܶܨܚܳܢܰܘ̈ܗ̱ܝ̱ ܠܣܳܓܽܘܕ̈ܰܘܗ̱ܝ̱ ܚܠܳܦ ܬܰܟܬܽܘܫܰܝ̈ܗܽܘܢ ܕܒܰܐܓܽܘ̈ܢܶܐ. ܡܳܪܝܳܐ ܕܨܰܒܬܶܗ ܠܕܰܘܺܝܕ ܡܰܠܟܳܐ ܒܰܟܠܺܝܠܳܐ ܕܙܳܟܽܘܬܳܐ. ܐܰܠܳܗܳܐ ܕܰܐܚܕܪܶܗ ܠܝܰܡܳܐ ܐܰܝܟ ܟܠܺܝܠܳܐ ܠܟܽܠܳܗ̇ ܐܰܪܥܳܐ. ܛܳܒܳܐ ܕܒܰܪܶܟ ܟܠܺܝܠܳܐ ܕܫܰܢ̱ܬܐ ܒܛܰܝܒܽܘܬܶܗ. ܐܰܓܶܢ ܝܰܡܺܝܢܳܟ ܡܰܠܝܰܬ ܪ̈ܰܚܡܶܐ ܘܰܚܢܳܢܳܐ ܥܰܠ ܪ̈ܺܝܫܶܐ ܕܰܟܠܺܝ̈ܠܶܐ ܗܳܠܶܝܢ ܕܰܥܠܰܝܗܽܘܢ ܡܶܬܬܣܺܝܡܺܝܢ܆ ܘܗܰܒ ܠܗܽܘܢ ܕܳܐܦ ܗܶܢܽܘܢ ܢܟܰܠܠܽܘܢ ܠܰܒܢܰܝ̈ܗܽܘܢ ܒܟܺܐܢܽܘܬܳܐ ܘܰܒܙܰܕܺܝܩܽܘܬܳܐ ܘܰܒܚܰܕܽܘܬܳܐ܆ ܘܫܰܝܢܳܟ ܘܰܫܠܳܡܳܟ ܢܕܰܝܰܪ ܒܰܝܢܳܬܗܽܘܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ ܠܥܳܠܰܡ ܥܳܠܡܺܝܢ܀

ܟܳܗܢܳܐ ܥܳܒܶܕ ܬܠܳܬܳܐ ܨܠܺܝ̈ܒܶܐ ܥܰܠ ܟܠܺܝ̈ܠܶܐ ܘܳܐܡܰܪ:

ܡܒܰܪܟܺܝܢ ܐܶܢܽܘܢ ܘܰܡܫܰܡܠܶܝܢ ܟܠܺܝ̈ܠܶܐ ܗܳܠܶܝܢ ܘܪ̈ܺܝܫܶܐ ܕܰܥܠܰܝܗܽܘܢ ܡܶܬܬܣܺܝܡܺܝܢ:

ܡܫܰܡ̈ܫܳܢܶܐ: ܒܰܪܶܟܡܳܪܝ

ܟܳܗܢܳܐ: ܒܰܫܡܳܐ ܕܰܐܒܳܐ ♱ ܐܰܡܺܝܢ ܘܕܰܒܪܳܐ ♱ ܐܰܡܺܝܢ ܘܰܕܪܽܘܚܳܐ ܚܰܝܳܐ ܘܩܰܕܺܝܫܳܐ ♱ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ. ܐܰܡܺܝܢ܀

ܟܳܗܢܳܐ ܡܙܰܝܰܚ ܠܰܟܠܺܝܠܳܐ ܬܠܳܬ ܙܰܒܢܺܝ̈ܢ ܒܛܽܘܦܣܳܐ ܕܰܨܠܺܝܒܳܐ ܠܥܶܠ ܡܶܢ ܪܺܝܫܶܗ ܕܚܰܬܢܳܐ ܘܳܐܡܰܪ ܒܩܳܠܳܐ ܪܳܡܳܐ ܘܰܒܩܺܝܢܬܳܐ:

ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܚܰܬܢܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܶܗ܀

ܘܥܳܢܶܝܢ ܡܫܰܡ̈ܫܳܢܶܐ ܒܳܬܪܶܗ ܣܽܘܓܺܝܬܳܐ ܗܳܕܶܐ:

ܚܰܕܳܐ ܡܳܪܰܢ ܒܪ̈ܰܚܡܰܝܟ܆ ܠܚܰܬܢ̈ܶܐ ܒܰܟܠܺܝ̈ܠܰܝܗܽܘܢ. ܚܰܕܳܐ ܡܳܪܰܢ ܒܪ̈ܰܚܡܰܝܟ܆ ܠܟܰܠ̱ܠ̈ܳܬܳܐ ܒܰܓܢܽܘܢܰܝ̈ܗܶܝܢ܀

ܟܳܗܢܳܐ: ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܚܰܬܢܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܶܗ܀

ܡܫܰܡ̈ܫܳܢܶܐ: ܐܳܘ ܟܡܳܐ ܫܰܦܺܝܪ ܟܠܺܝܠܳܐ܆ ܕܓܳܕܶܠ ܡܰܠܟܳܐ ܡܫܺܝܚܳܐ. ܘܒܺܐܝܕ̈ܰܝ ܟܳܗܢܳܐ ܙܰܗܝܳܐ ܒܪܺܝܫܳܐ ܕܚܰܬܢܳܐ ܣܳܐܶܡ܀

ܟܳܗܢܳܐ: ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܚܰܬܢܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܶܗ܀

ܡܫܰܡ̈ܫܳܢܶܐ: ܕܳܡܶܐ ܚܰܬܢܳܐ ܠܫܶܡܫܳܐ܆ ܘܕܳܡܝܳܐ ܟܰܠܬܳܐ ܠܣܰܗܪܳܐ. ܕܳܡܶܐ ܟܽܠܶܗ ܚܠܽܘܠܳܐ܆ ܠܗܰܘ ܨܰܦܪܳܐ ܕܡܰܦܨܰܚ ܠܰܐܪܥܳܐ܀

ܟܶܢ ܣܳܐܶܡ ܟܳܗܢܳܐ ܠܰܟܠܺܝܠܳܐ ܒܪܺܝܫܶܗ ܕܚܰܬܢܳܐ ܘܳܐܡܰܪ:

ܢܟܰܠܠܳܟ ܡܳܪܝܳܐ ܒܰܟܠܺܝܠܳܐ ܕܙܰܕܺܝܩܽܘܬܳܐ ܘܰܕܫܽܘܒܚܳܐ ܘܒܰܥܒܳܕ̈ܶܐ ܛܳܒ̈ܶܐ ܠܥܳܠܡܺܝܢ܀

ܘܟܳܗܢܳܐ ܡܙܰܝܰܚ ܠܰܟܠܺܝܠܳܐ ܬܠܳܬ ܙܰܒܢܺܝ̈ܢ ܒܛܽܘܦܣܶܗ ܕܰܨܠܺܝܒܳܐ ܥܰܠ ܪܺܝܫܳܗ̇ ܕܟܰܠܬܳܐ ܘܳܐܡܰܪ:

ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܟܰܠܬܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܳܗ̇܀

ܘܥܳܢܶܝܢ ܡܫܰܡ̈ܫܳܢܶܐ ܒܳܬܪܶܗ ܣܽܘܓܺܝܬܳܐ ܗܳܕܶܐ:

ܕܳܡܶܐ ܟܠܺܝܠܳܐ ܕܚܰܬܢܳܐ܆ ܠܰܟܠܺܝܠܳܐ ܕܒܰܪ ܐܺܝܫܰܝ. ܘܕܳܡܶܐ ܟܠܺܝܠܳܐ ܕܟܰܠܬܳܐ܆ ܠܰܟܠܺܝ̈ܠܶܐ ܕܢܰܟ̈ܦܳܬܳܐ܀

ܟܳܗܢܳܐ: ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܟܰܠܬܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܳܗ̇܀

ܡܫܰܡ̈ܫܳܢܶܐ: ܐܶܢܳܐ ܟܰܕ ܚܳܕܝܳܐ ܐ̱ܢܳܐ܆ ܘܶܐܢܳܐ ܟܰܕ ܪܳܘܙܳܐ ܐ̱ܢܳܐ. ܘܥܶܙܩܬܶܗ ܠܒܺܝܫܳܐ ܐ̱ܢܳܐ܆ ܘܒܰܓܢܽܘܢܶܗ ܗܳܐ ܕܳܝܨܳܐ ܐ̱ܢܳܐ܀

ܟܳܗܢܳܐ: ܟܠܺܝܠܳܐ ܒܺܐܝܕܶܗ ܕܡܳܪܰܢ܆ ܡܶܢ ܫܡܰܝܳܐ ܙܳܐܰܚ ܘܢܳܚܶܬ. ܠܟܰܠܬܳܐ ܝܳܐܶܐ ܟܠܺܝܠܳܐ܆ ܕܟܳܗܢܳܐ ܣܳܐܶܡ ܠܶܗ ܒܪܺܝܫܳܗ̇܀

ܡܫܰܡ̈ܫܳܢܶܐ: ܬܶܚܕܶܐ ܘܬܶܪܘܰܙܝ ܟܰܠܬܰܢ܆ ܘܰܢܕܽܘܨ ܚܰܬܢܰܢ ܝܰܘܡܳܢܳܐ. ܕܶܐܫܬܰܡܠܺܝ ܣܽܘܟܳܝܗܽܘܢ܆ ܒܪܶܡܙܶܗ ܕܰܡܫܰܡܠܶܐ ܟܽܠ܀

ܘܟܶܢ ܣܳܐܶܡ ܟܳܗܢܳܐ ܟܠܺܝܠܳܐ ܒܪܺܝܫܳܗ̇ ܕܟܰܠܬܳܐ ܘܗܳܟܰܢܳܐ ܐܳܡܰܪ:

ܢܟܰܠܠܶܟܝ ܡܳܪܝܳܐ ܒܰܟܠܺܝܠܳܐ ܕܢܰܟܦܽܘܬܳܐ ܘܰܒܟܺܐܢܽܘܬܳܐ ܘܰܒܙܰܕܺܝܩܽܘܬܳܐ ܠܥܳܠܡܺܝܢ܀

ܨܠܽܘܬܳܐ ܕܥܰܠ ܫܰܘܫܒܺܝܢܳܐ

ܡܳܪܰܢ ܝܶܫܽܘ̇ܥ ܡܫܺܝܚܳܐ ܕܒܰܪܶܟ ܠܫܰܘܫܒܺܝܢܶܗ ܘܺܐܝܙܓܰܕܶܗ ܝܽܘܚܰܢܳܢ ܒܓܰܘ ܟܰܪܣܳܐ ܕܶܐܡܶܗ. ܢܒܰܪܟܳܟ ܐܳܘ ܫܰܘܫܒܺܝܢܳܐ܆ ܘܢܶܥܒܕܳܟ ܐܰܝܟ ܟܠܺܝܠܳܐ ܢܰܗܺܝܪܳܐ ܘܦܰܐܝܳܐ܆ ܟܰܕ ܢܛܺܝܪ ܐܰܢ̱ܬ ܒܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ܀

ܘܶܐܢ ܒܬܽܘܠܳܐ ܐܺܝܬܰܘܗ̱ܝ̱ ܫܰܘܫܒܺܝܢܳܐ ܢܰܘܣܶܦ ܟܳܗܢܳܐ ܟܰܕ ܐܳܡܰܪ:

ܘܬܶܬܡܰܢܰܥ ܠܝܰܘܡܳܐ ܫܰܦܺܝܪܳܐ ܕܰܚܠܽܘܠܳܟ ܟܰܕ ܚܳܕܶܐ ܐܰܢ̱ܬ ܘܡܰܣܩܰܬ ܠܶܗ ܫܽܘܒܚܳܐ ܠܥܳܠܡܺܝܢ܀

ܨܠܽܘܬܳܐ ܕܥܰܠ ܫܰܘܫܒܺܝܢܬܳܐ

ܐܰܠܳܗܳܐ ܕܒܰܪܶܟ ܠܚܰܢܰܐ ܒܰܪ̱ܬ ܦܢܽܘܐܶܝܠ ܘܰܠܡܰܪܝܰܡ ܘܰܠܡܳܪܬܳܐ܆ ܗܽܘ ܢܒܰܪܟܶܟܝ ܐܳܘ ܫܰܘܫܒܺܝܢܬܳܐ. ܘܬܶܫܬܘܶܝܢ ܠܰܓܢܽܘܢܳܐ ܕܥܰܡ ܚܰܡܶܫ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ܆ ܘܬܶܬܢܰܛܪܺܝܢ ܒܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ܀

ܘܶܐܢ ܒܬܽܘܠܬܳܐ ܗ̱ܝ ܫܰܘܫܒܺܝܢܬܳܐ ܢܰܘܣܶܦ ܟܰܕ ܐܳܡܰܪ:

ܘܬܶܬܡܰܢܥܺܝܢ ܠܝܰܘܡܳܐ ܫܰܦܺܝܪܳܐ ܕܡܶܫܬܽܘܬܶܟܝ ܘܰܬܫܰܒܚܺܝܘܗ̱ܝ̱ ܠܥܳܠܡܺܝܢ܀

ܨܠܽܘܬܳܐ ܕܫܽܘܡܠܳܝܳܐ ܥܰܠ ܚܰܬܢܳܐ ܘܟܰܠܬܳܐ

ܐܰܠܳܗܳܐ ܥܰܬܺܝܪ ܒܡܰܘܗ̈ܒܳܬܳܐ ܗܰܘ ܕܒܰܪܶܟ ܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ ܘܚܰܕܺܝ ܐܶܢܽܘܢ ܘܰܐܘܪܶܒ ܐܶܢܽܘܢ. ܗܰܘ ܕܟܰܠܶܠ ܐܰܪܥܳܐ ܘܛܽܘܪ̈ܶܐ ܘܪ̈ܳܡܳܬܳܐ܆ ܛܳܒܳܐ ܕܝܳܗܶܒ ܡܶܛܪܳܐ ܘܛܰܠܳܐ ܘܰܡܪܰܒܶܐ ܙܰܪ̈ܥܶܐ ܘܦܺܐܪ̈ܶܐ ܘܢܶܨ̈ܒܳܬܳܐ܆ ܗܽܘ ܢܚܰܕܶܝܟܽܘܢ ܒܚܰܬܢܽܘܬܟܽܘܢ ܘܰܢܨܰܒܶܬ ܘܰܢܗܰܕܰܪܟܽܘܢ ܒܟܽܠ ܕܽܘܒܳܪ̈ܶܐ ܡܩܰܠ̈ܣܶܐ ܕܰܡܝܰܬܪܽܘܬܳܐ ܟܰܕ ܡܫܰܪܰܪ ܢܰܦ̈ܫܳܬܟܽܘܢ ܒܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ. ܘܰܡܒܰܪܶܟ ܠܒܰܝܬܳܐ ܕܥܳܐܠܺܝܬܽܘܢ ܠܶܗ ܟܰܕ ܝܳܗܶܒ ܠܟܽܘܢ ܒܢܰܝ̈ܳܐ ܘܰܒ̈ܢܳܬܳܐ ܕܒܽܘܪ̈ܟܳܬܳܐ. ܘܰܢܚܰܕܶܝܟܽܘܢ ܒܦܺܐܪ̈ܶܐ ܕܡܶܬܝܰܠܕܺܝܢ ܡܶܢܟܽܘܢ܆ ܘܡܶܢܗܽܘܢ ܢܶܗܘܽܘܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܘܪ̈ܺܝܫܳܢܶܐ. ܘܰܢܒܰܪܶܟ ܠܟܽܠ ܕܺܐܝܬ ܠܟܽܘܢ܆ ܘܢܰܫܦܰܥ ܠܟܽܘܢ ܥܽܘܬܪ̈ܶܐ ܠܳܐ ܡܶܣܬܰܝ̈ܟܳܢܶܐ ܒܫܰܦܺܝܪܽܘܬ ܡܰܘܗ̈ܒܳܬܳܐ ܘܰܡܦܰܬܟܽܘܬ ܛܳܒ̈ܳܬܳܐ. ܘܠܰܙܡܺܝ̈ܢܶܐ ܘܠܰܡܙܰܡ̈ܢܳܢܶܐ ܘܥܰܠ ܟܽܠܶܗ ܟܶܢܫܰܢ ܕܒܰܡܫܺܝܚܳܐ ܪ̈ܰܚܡܰܘܗ̱ܝ ܕܰܐܠܳܗܳܐ ܢܶܗܘܽܘܢ ܠܥܳܠܡܺܝܢ ܐܰܡܺܝܢ܀

ܒܳܥܽܘܬܳܐ ܕܡܳܪܝ ܝܰܥܩܽܘ̇ܒ H

ܦܫܽܘܛ ܝܰܡܺܝܢܳܟ ܒܰܪ ܐܰܠܳܗܳܐ ܘܒܰܪܶܟ ܐܶܢܽܘܢ܆ ܠܚܰܬܢܳܐ ܘܟܰܠܬܳܐ ܐܳܦ ܠܰܟܠܺܝ̈ܠܶܐ ܕܰܒܪ̈ܺܝܫܰܝܗܽܘܢ܀

ܒܰܪܶܟ ܡܳܪܝܳܐ ܠܚܰܬܢܳܐ ܘܟܰܠܬܳܐ ܘܠܰܚܕܽܘܓܰܝ̈ܗܽܘܢ܆ ܐܰܝܟ ܕܶܐܬܒܰܪܰܟܘ ܐܰܒܪܰܡ ܘܺܐܝܣܚܳܩ ܥܰܡ ܕܶܒܚܰܝ̈ܗܽܘܢ܀

ܒܰܪܶܟ ܡܳܪܝܳܐ ܠܚܰܬܢܳܐ ܘܟܰܠܬܳܐ ܘܰܙܡܺܝ̈ܢܰܝܗܽܘܢ܆ ܐܰܝܟ ܕܶܐܬܒܰܪܰܟܘ ܡܰܝ̈ܳܐ ܒܩܳܛܢܶܐ ܒܫܽܘܚܠܳܦܰܝ̈ܗܽܘܢ܀

ܘܢܶܬܒܰܪܟܽܘܢ ܕܶܝܢ ܒܥܳܠܡܳܐ ܗܳܢܳܐ ܫܢܰܝ̈ ܚܰܝܰܝ̈ܗܽܘܢ܆ ܕܰܢܣܰܓ̊ܽܘܢ ܠܳܟ ܫܽܘܒܚܳܐ ܦܰܐܝܳܐ ܒܟܶܢܳܪ̈ܰܝܗܽܘܢ܀

ܬܽܘܪܓܳܡܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܕܰܡܒܰܪܶܟ ܠܟܶܢܫܳܐ ܗܳܢܳܐ ܡܶܢ ܣܳܟܶܗ.
ܚܰܒܺܝ̈ܒܰܝ: ܡܽܘܫܶܐ ܗܰܘ ܪܰܒܳܐ ܘܰܐܠܳܗܳܝܳܐ ܟܬܰܒ ܠܰܢ ܒܰܢܒܺܝܽܘܬܶܗ. ܕܟܰܕ ܒܪܳܐ ܐܰܠܳܗܳܐ ܫܡܰܝ̈ܳܐ ܘܰܐܪܥܳܐ܆ ܒܚܰܪܬܳܐ ܕܶܝܢ ܒܪܳܝܗ̱ܝ̱ ܠܳܐܕܳܡ ܘܰܥܒܰܕ ܠܶܗ ܡܥܰܕܪܳܢܳܐ ܐܰܟܘܳܬܶܗ܆ ܟܰܕ ܢܣܰܒ ܐܶܠܥܳܐ ܡܶܢ ܐܶܠܥܰܘ̈ܗ̱ܝ̱ ܘܥܰܒܕܳܗ̇ ܐܰܢ̱ܬܬܳܐ. ܘܶܐܡܰܪ ܐܳܕܳܡ: ܗܳܕܶܐ܆ ܓܰܪܡܳܐ ܡܶܢ ܓܰܪ̈ܡܰܝ ܘܒܶܣܪܳܐ ܡܶܢ ܒܶܣܪܝ. ܘܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ ܘܢܶܩܰܦ ܠܰܐܢ̱ܬܬܶܗ ܘܢܶܗܘܽܘܢ ܬܪ̈ܰܝܗܽܘܢ ܚܰܕ ܒܣܰܪ. ܘܰܫܠܺܝܚܳܐ ܛܽܘܒܳܢܳܐ ܦܰܘܠܽܘܣ ܐܶܡܰܪ: ܕܓܰܒܪܳܐ ܠܳܐ ܫܰܠܺܝܛ ܥܰܠ ܦܰܓܪܶܗ ܐܶܠܳܐ ܐܶܢ ܐܰܢ̱ܬܬܶܗ. ܘܰܐܢ̱ܬܬܳܐ ܠܳܐ ܫܰܠܺܝܛܳܐ ܥܰܠ ܦܰܓܪܳܗ̇ ܐܶܠܳܐ ܐܶܢ ܒܰܥܠܳܗ̇. ܘܬܽܘܒ ܐܶܡܰܪ: ܕܓܰܒܪ̈ܶܐ ܐܰܚܶܒܘ ܢܶܫܰܝ̈ܟܽܘܢ. ܘܰܐܢ̱ܬܶܝܢ ܢܶܫ̈ܶܐ ܐܶܫܬܰܥܒܰܕ̈ܶܝܢ ܠܓܰܒܪ̈ܰܝܟܶܝܢ ܐܰܝܟܰܢܳܐ ܕܣܰܪܳܐ ܡܶܫܬܰܥܒܕܳܐ ܗ̱ܘܳܬ ܠܰܐܒܪܳܗܳܡ ܘܩܳܪܝܐ ܗ̱ܘܳܬ ܠܶܗ ܡܳܪܝ. ܘܰܐܢ̱ܬ ܒܪܳܐ ܕܺܝܠܰܢ (ܦܠܳܢ) ܕܗܳܕܶܐ ܒܰܪܬܰܢ (ܦܠܳܢܺܝܬ) ܝܰܘܡܳܢܳܐ ܫܶܒܩܰܬ ܐܰܒܳܗ̈ܶܐ ܘܰܐܚ̈ܶܐ ܘܰܐܓܥܠܰܬ ܢܰܦܫܳܗ̇ ܠܳܟ ܐܰܝܟ ܒܰܪ̱ܬ ܙܰܘܓܳܐ. ܐܶܙܕܰܗܪ ܡܶܟܺܝܠ ܒܳܗ̇ ܘܡܰܠܳܐ ܙܶܕ̈ܩܶܐ ܕܡܶܬܬܚܺܝܒܺܝܢ ܠܳܗ̇: ܒܡܶܐܟܠܳܐ ܘܡܰܫܬܝܳܐ ܘܰܠܒܽܘܫܳܐ ܘܥܽܘܡܪܳܐ ܟܰܕ ܙܗܺܝܪܳܐܺܝܬ ܢܳܛܰܪ ܐܰܢ̱ܬ ܠܳܗ̇܆ ܘܰܒܟܽܠ ܡܶܕܶܡ ܡܶܬܒܛܶܠ ܠܳܟ ܥܠܶܝܗ̇ ܘܳܠܝܳܐܺܝܬ. ܘܫܰܦܺܝܪ ܐܶܬܕܰܒܪ ܥܰܡܳܗ̇ ܒܒܰܣܺܝܡܽܘܬ ܦܶܓܥܳܐ ܘܫܰܦܺܝܪܽܘܬ ܡܶܬܗܰܦܟܳܢܽܘܬܳܐ܆ ܘܰܠܡܰܛܳܐܒܽܘ ܠܳܗ̇ ܬܶܗܘܶܐ ܪܳܗܶܛ.
ܐܳܦ ܐܰܢ̱ܬܝ̱ ܐܳܘ ܒܰܪܬܰܢ (ܦܠܳܢܺܝܬ) ܐܶܫܬܰܥܒܰܕܝ ܠܒܰܪ ܙܰܘܓܶܟܝ ܘܰܐܚܽܘܕܺܝܘܗ̱ܝ̱ ܒܺܐܝܩܳܪܳܐ ܘܫܰܡܶܫܺܝܘܗ̱ܝ ܒܒܰܣܺܝܡܽܘܬ ܠܶܒܳܐ ܘܦܶܓܥܳܐ ܘܰܒܗܰܝܡܳܢܽܘܬܳܐ. ܟܰܕ ܕܽܘܡܝܳܐ ܫܳܩܠܳܐ ܐܰܢ̱ܬܝ ܠܝܰܘܢܳܐ ܒܬܰܡܺܝܡܽܘܬܳܐ ܘܰܠܫܽܘܦܢܺܝܢܳܐ ܒܢܰܟܦܽܘܬܳܐ. ܘܠܰܬܪ̈ܰܝܟܽܘܢ ܡܦܰܩܕܺܝܢܰܢ ܘܰܡܦܰܪܓܠܺܝܢܰܢ ܐܰܝܟܰܢܳܐ ܕܰܒܕܶܚܠܰܬ ܐܰܠܳܗܳܐ ܬܗܰܠܟܽܘܢ. ܘܰܠܗܳܠܶܝܢ ܪ̈ܚܺܝܡܳܬܳܐ ܘܰܡܚܰܕܝܳܢܝ̈ܳܬܳܐ ܐܰܟܚܰܕ ܘܠܰܡܥܺܝ̈ܩܳܢܝܳܬܳܐ ܫܰܘܝܳܐܺܝܬ ܘܒܰܐܘܝܽܘܬܳܐ ܬܩܰܒܠܽܘܢ ܘܰܠܓܶܕ̈ܫܶܐ ܕܟܺܐܒ̈ܶܐ ܘܟܽܘܪ̈ܗܳܢܶܐ ܘܫܰܪܟܳܐ ܕܰܡܥܺܝ̈ܣܳܬܳܐ ܕܥܳܪ̈ܨܳܢ ܥܠܰܝܟܽܘܢ ܕܠܳܐ ܪܶܛܢܳܐ ܬܣܰܝܒܪܽܘܢ. ܘܶܐܙܕܰܗܪܘ ܬܽܘܒ ܕܠܳܐ ܢܶܫܬܰܡܰܫ ܒܰܝܢܳܬܟܽܘܢ ܢܶܟܠܳܐ ܡܶܕܶܡ ܚܰܕ ܠܚܰܕ.
ܟܰܕ ܢܳܛܪܺܝܬܽܘܢ ܢܰܦ̈ܫܳܬܟܽܘܢ ܡܶܢ ܟܽܠܗܽܘܢ ܚܛܳܗ̈ܶܐ ܘܠܳܐ ܢܳܡܽܘܣܳܝܘ̈ܳܬܳܐ ܐܰܝܟܰܢܳܐ ܕܰܚܢܰܢ ܕܺܐܝܬܰܝܢ ܡܶܨܥܳܝ̈ܶܐ ܕܗܳܢܳܐ ܣܽܘܥܪܳܢܳܐ܆ ܠܳܐ ܢܶܗܘܶܐ ܬܚܶܝܬ ܥܶܕܠܳܝܳܐ ܒܝܽܘܡ ܕܺܝܢܳܐ ܡܶܛܽܠܳܬܟܽܘܢ.
ܟܰܕ ܠܰܢ ܡܶܫܬܰܡܥܺܝܬܽܘܢ ܘܗܳܠܶܝܢ ܥܳܒܕܺܝܬܽܘܢ. ܐܰܠܳܗܳܐ ܢܶܦܪܽܘܣ ܪ̈ܰܚܡܰܘܗ̱ܝ̱ ܥܠܰܝܟܽܘܢ ܘܰܒܫܰܦܺܝܪܽܘܬ ܡܰܘܗ̈ܒܳܬܶܗ ܢܰܥܬܰܪܟܽܘܢ܆ ܘܛܰܝܒܽܘܬܶܗ ܢܫܰܡܠܶܐ ܠܘܳܬܟܽܘܢ ܟܰܕ ܡܫܰܪܬܰܚ ܠܩܶܢܝܳܢܟܽܘܢ ܘܡܳܬܰܚ ܠܚܰܝܰܝ̈ܟܽܘܢ. ܘܓܰܕܳܢܽܘܬܳܐ ܘܰܡܫܰܝܢܽܘܬܳܐ ܡܰܩܶܦ ܠܟܽܘܢ ܘܚܽܘܠܡܳܢܳܐ ܘܚܰܕܽܘܬܳܐ ܡܰܠܘܶܬ ܠܟܽܘܢ. ܘܡܶܢ ܒܺܝ̈ܫܳܬܳܐ ܘܢܶܣܝܽܘ̈ܢܶܐ ܡܦܰܨܶܐ ܠܟܽܘܢ ܘܰܡܫܰܘܙܶܒ. ܘܰܠܥܰܣ̈ܩܳܬܳܐ ܩܕܳܡܰܝܟܽܘܢ ܢܫܰܦܶܐ ܦܫܺܝܩܳܐܺܝܬ ܘܰܕܠܺܝܠܳܐܺܝܬ. ܘܢܶܬܶܠ ܠܟܽܘܢ ܒܢܰܝ̈ܳܐ ܕܒܽܘܪ̈ܟܳܬܳܐ ܕܰܐܝܟ ܢܶܨ̈ܒܳܬܳܐ ܕܙܰܝܬܳܐ ܠܦܳܬܽܘܪܳܐ ܕܺܝܠܟܽܘܢ ܢܶܗܘܽܘܢ ܟܪܺܝܟܺܝܢ. ܘܬܰܣܩܽܘܢ ܫܽܘܒܚܳܐ ܠܰܐܠܳܗܳܐ ܝܳܗܽܘܒܳܐ ܕܫܰܦܺܝܪ̈ܳܬܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܟܶܢ ܡܰܫܠܶܡ ܠܗܽܘܢ ܠܰܚܕܳܕ̈ܶܐ܆ ܘܟܰܕ ܡܰܘܚܶܕ ܐܺܝܕܳܐ ܕܟܰܠܬܳܐ ܒܺܐܝܕܳܐ ܕܚܰܬܢܳܐ ܘܩܳܪܶܐ ܥܠܰܝܗܽܘܢ ܡܰܪܬܝܳܢܽܘܬܳܐ ܗܳܕܶܐ.

ܒܢܰܝ̈ܳܐ ܕܺܝܠܰܢ ܚܰܒܺܝ̈ܒܶܐ܆ ܥܝܳܕܳܐ ܐܺܝܬ ܠܰܢ ܕܰܡܩܰܒܰܠ ܠܰܢ ܡܶܢ ܐܰܒܳܗ̈ܰܝܢ ܕܢܰܪܬܶܐ ܘܰܢܚܰܦܶܛ ܠܟܽܘܢ. ܕܰܥܘ ܕܶܝܢ ܕܰܐ̱ܢܬܽܘܢ ܩܕܳܡ ܐܰܠܳܗܳܐ ܗܰܘ ܒܳܚܰܪ ܟܽܘܠܝ̈ܳܬܳܐ ܘܠܶܒܰܘ̈ܳܬܳܐ܆ ܘܰܩܕܳܡ ܦܳܬܽܘܪܳܐ ܩܰܕܺܝܫܳܐ ܘܰܨܠܺܝܒܳܐ ܘܶܐܘܰܢܓܶܠܝܽܘܢ ܣܓܺܝܕܳܐ ܩܳܝܡܺܝܬܽܘܢ ܘܰܩܕܳܡ ܟܶܢܫܳܐ ܗܳܢܳܐ. ܘܡܶܢ ܗܳܪܟܳܐ ܡܰܫܠܡܺܝܢܰܢ ܠܟܽܘܢ ܠܰܚܕܳܕ̈ܶܐ. ܗܽܘ ܐܰܠܳܗܳܐ ܢܶܗܘܶܐ ܥܰܪܳܒܳܐ ܒܶܝܬ ܠܺܝ ܘܰܠܟܽܘܢ ܘܶܐܢܳܐ ܡܚܰܪܰܪ ܐ̱ܢܳܐ ܡܶܢ ܥܶܕܠܳܝܟܽܘܢ. ܚܙܺܝ ܒܪܳܐ ܕܺܝܠܰܢ ܚܰܒܺܝܒܳܐ: ܗܳܕܳܐ ܗ̱ܝ ܒܰܪ̱ܬ ܙܰܘܓܳܟ ܕܣܳܡܢܰܢ ܐܺܝܕܳܗ̇ ܒܺܐܝܕܳܟ ܘܠܰܐܠܳܗܳܐ ܘܠܳܟ ܐܰܓܥܶܠܢܳܗ̇. ܙܗܺܝܪܳܐܺܝܬ ܐܰܚܽܘܕ܆ ܘܰܚܙܺܝ ܡܽܘܢ ܦܶܬܓܳܡܳܐ ܡܦܰܢܶܐ ܐܰܢ̱ܬ ܠܰܐܠܳܗܳܐ ܡܶܛܽܠܳܬܳܗ̇ ܒܗܰܘ ܝܰܘܡܳܐ ܕܕܺܝܢܳܐ ܟܺܐܢܳܐ܀

ܟܶܢ ܡܨܰܠܶܐ ܥܠܰܝܗܽܘܢ:

ܡܳܪܝܳܐ ܐܰܠܳܗܳܐ ܛܰܪ ܥܰܒܕܰܝ̈ܟ ܗܳܠܶܝܢ܆ ܘܰܬܚܶܝܬ ܟܶܢ̈ܦܶܐ ܕܰܡܪܰܚܡܳܢܽܘܬܳܟ ܣܰܬܰܪ ܐܶܢܽܘܢ. ܘܙܰܒ̈ܢܶܐ ܛܳܒ̈ܶܐ ܘܝܰܘ̈ܡܳܬܳܐ ܡܚܰܕܝ̈ܳܢܶܐ ܗܰܒ ܠܗܽܘܢ. ܘܝܰܡܺܝܢܳܟ ܬܕܰܒܰܪܝ ܐܶܢܽܘܢ. ܐܰܝܟܰܢܳܐ ܕܫܽܘܒܚܳܟ ܢܙܰܡܪܽܘܢ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܐܰܡܺܝܢ܀

ܨܠܽܘܬܳܐ ܠܰܫܪܳܝܳܐ ܕܰܟܠܺܝ̈ܠܶܐ

ܡܳܪܰܢ ܝܶܫܽܘ̇ܥ ܡܫܺܝܚܳܐ ܗܰܘ ܕܒܰܟܠܺܝܠܳܐ ܕܟܽܘ̈ܒܶܐ ܐܶܬܟܰܠܰܠ ܘܰܠܟܽܠܶܗ ܐܽܘܚܕܳܢܳܐ ܕܣܳܛܳܢܳܐ ܫܪܳܐ ܘܒܰܛܶܠ. ܒܰܪܶܟ ܠܥܰܒܕܰܝ̈ܟ ܗܳܠܶܝܢ ܐܰܝܟ ܕܒܰܪܶܟܬ ܠܰܐܒܽܘܢ ܐܳܕܳܡ ܘܠܶܐܡܰܢ ܚܰܘܳܐ ܘܰܠܫܺܝܬ ܘܢܽܘܚ ܘܠܰܐܒܪܳܗܳܡ ܘܣܰܪܳܐ ܘܠܺܐܝܣܚܳܩ ܘܪܰܦܩܳܐ ܘܰܠܝܰܥܩܽܘܒ ܘܪܳܚܶܝܠ܆ ܘܰܠܝܰܘܣܶܦ ܘܰܐܣܝܰܬ ܘܰܠܕܰܘܺܝܕ ܗܰܘ ܕܰܗܘܳܐ ܡܰܠܟܳܐ ܘܰܢܒܺܝܳܐ ܘܰܡܙܰܡܪܳܢܳܐ ܒܥܺܕܬܳܟ ܩܰܕܺܝܫܬܳܐ. ܘܰܥܒܶܕ ܐܶܢܽܘܢ ܙܰܘܓܳܐ ܒܪܺܝܟܳܐ ܕܚܳܣܶܡ ܒܰܥܒܳܕ̈ܶܐ ܕܙܰܕܺܝܩܽܘܬܳܐ. ܘܥܰܡ ܫܪܳܝܳܐ ܕܰܟܠܺܝ̈ܠܶܐ ܗܳܠܶܝܢ ܥܳܒܽܘܪ̈ܶܐ ܗܰܒ ܠܗܽܘܢ ܕܢܶܗܘܽܘܢ ܡܶܢ ܒܢ̈ܰܝ ܦܳܬܽܘܪܳܟ ܫܡܰܝܳܢܳܐ ܐܰܝܠܶܝܢ ܕܡܶܫܬܘܶܝܢ ܠܰܟܠܺܝܠܳܐ ܗܰܘ ܕܠܳܐ ܥܳܒܰܪ ܘܠܳܐ ܡܶܫܬܪܶܐ. ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܒܩ̈ܳܠܶܐ ܕܫܽܘܒܚܳܐ ܘܬܰܘܕܺܝܬܳܐ ܢܙܰܡܰܪ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܐܰܒܽܘܢ ܕܒܰܫܡܰܝܐ

ܐܰܒܽܘܢ ܕܒܰܫܡܰܝܳܐ ܢܶܬ̣ܩܰܕܰܫ ܫܡܳܟ ܬܺܐܬ̣ܶܐ ܡܰܠܟܽܘܬ̣ܳܟ ܢܶܗܘܶܐ ܨܶܒܝܳܢܳܟ ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝܢ ܘܰܚܛܳܗܰܝܢ ܐܰܝܟܰܢܳܐ ܕܐܳܦ ܚܢܰܢ ܫܒܰܩܰܢ ܠܚܰܝ̈ܳܒܰܝܢ. ܠܐ ܬܰܥܠܰܢ ܠܢܶܣܝܽܘܢܳܐ ܐܶܠܐ ܦܰܨܳܢ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬ̣ܳܐ ܘܚܰܝܠܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܫܰܡܫܳܢܐ: ܢܩܽܘܡ ܫܰܦܝܪ ܟܽܠܰܢ ܒܰܨܠܽܘܬܳܐ ܘܟܳܗܢܐ ܡܝܰܩܪܳܐ ܢܶܥܢܶܐ ܘܢܺܐܡܰܪ:

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰ‌ܠܳܗܳܐ ܫܰܪܺܝܪܳܐ܀

ܥܰܡܳܐ: ܐܰܒܳܐ ܐܰܚܺܝܕ ܟܽܠ܆ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ ܘܰܕܟܽܠܗܶܝܢ ܐܰܝܠܶܝܢ ܕܡܶܬܚ̈ܰܙܝܳܢ ܘܰܕܠܳܐ ܡܶܬܚ̈ܰܙܝܳܢ܆ ܘܰܒܚܰܕ ܡܳܪܝܳܐ ܝܶܫܽܘ̇ܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ ܗܰܘ ܕܡܶܢ ܐܰܒܳܐ ܐܶܬܺܝܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ܆ ܢܽܘܗܪܳܐ ܕܡܶܢ ܢܽܘܗܪܳܐ܆ ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ܆ ܝܺܠܺܝܕܳܐ ܘܠܳܐ ܥܒܺܝܕܳܐ܆ ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ܆ ܕܒܺܐܝܕܶܗ ܗܘܳܐ ܟܽܠ.
ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ܆ ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ ܘܶܐܨܛܠܶܒ ܚܠܳܦܰܝܢ ܒܝܰܘ̈ܡܰܝ ܦܳܢܛܺܝܽܘܣ ܦܺܝܠܰܛܽܘܣ ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ܆ ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ܆ ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬܰܘܗ̱ܝ̱ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ. ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝܚ̈ܶܐ܆ ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚܛܳܗ̈ܶܐ܆ ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟܡܳܪܝ.

ܬܶܫܡܶܫܬܳܐ ܕܝܳܠܕܰܬ ܐܰܠܗܳܐ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ ܗ̄ܘܗ̄ ܘܡܰܠܟܬܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟܝ ܘܒܶܝܬ ܐܰܒܽܘܟܝ ܗ̄ܘܗ̄ ܕܢܶܬܪܰܓܪܰܓ ܡܰܠܟܐ ܠܫܽܘܦܪܶܟܝ܀

ܫܘܒܚܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ. ܩܰܪܶܒܝ ܒܳܥܽܘܬܳܐ ܚܠܳܦܰܝܢ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ. ܠܺܝܚܺܝܕܳܐ ܕܰܕܢܰܚ ܡܶܢܶܟܝ. ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܰܘܡܶܢܩܰܠܳܘܣ ܩܽܘܪܝܶܠܰܝܣܘܢ

ܕܽܘܟܪܳܢܳܗ̇ ܕܡܰܪܝܰܡ. ܢܶܗܘܶܐ ܠܒܽܘܪ̈ܟܳܬܰܢ. ܘܰܨܠܽܘܬܳܗ̇ ܬܶܗܘܶܐ ܫܽܘܪܳܐ ܠܢܰܦ̈ܫܳܬܰܢ܀

ܪܺܝܚܳܐ ܒܰܣܺܝܡܳܐ. ܗܳܐ ܦܳܐܰܚ ܒܳܐܐܰܪ. ܠܰܒܬܽܘܠܬܳܐ ܡܰܪܝܰܡ. ܝܳܠܕܰܬ ܐܰܠܳܗܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ

ܡܳܪܰܢ ܐܶܬܪܰܚܰܡ ܥܠܰܝܢ܆ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ. ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇܆ ܒܰܪܶܟ ܠܚܰܬܢܳܐ ܘܰܠܟܰܠܬܳܐ܀

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ܆ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ ܠܺܝܚܺܝܕܶܟܝ܆ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ܆ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ. ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇܆ ܒܰܪܶܟ ܠܚܰܬܢܳܐ ܘܰܠܟܰܠܬܳܐ܀

ܐܰܦܺܝܣܘ ܥܰܡܰܢ ܩܰܕܺܝ̈ܫܶܐ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܆ ܕܢܰܥܒܰܪ ܘܰܢܒܰܛܶܠ ܡܶܢܰܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܡܳܪܰܢ ܐܶܬܪܰܚܰܡ܆ ܥܠܰܝܢ ܒܰܨܠܽܘܬ ܐܶܡܳܟ ܘܩܰܕܺܝܫܰܝ̈ܟ܆ ܒܰܨܠܽܘܬܗܽܘܢ ܘܰܒܒܳܥܽܘܬܗܘܢ܆ ܒܰܪܶܟ ܠܚܰܬܢܳܐ ܘܰܠܟܰܠܬܳܐ܀

ܘܝܳܗܒܺܝܢ ܩܰܠܺܝܠ ܡܶܢ ܚܰܡܪܳܐ ܠܚܰܬܢܳܐ ܘܰܠܟܰܠܬܳܐ ܘܰܠܫܰܘܫܒܺܝ̈ܢܶܐ܀

ܫܠܶܡ ܛܶܟܣܳܐ ܕܒܽܘܪܳܟ ܟܠܺܝ̈ܠܶܐ ܕܚܰܬܢ̈ܶܐ ܘܟܰܠ̈ܠܳܬܳܐ