ܒܽܘܪܳܟܳܐ ܕܰܐܪ̈ܡܠܶܐ ܘܕܰܐܪ̈ܡܠܳܬܳܐ

ܡܰܦܩܒܪܽܘܚܳܐ ܕܰܥܒܺܝܕ ܠܩܰܫܺܝܫܳܐ ܐܶܫܰܥܝܳܐ ܣܒܺܝܪܺܝܢܳܝܐ ܕܟܺܝܪ ܒܶܝܬ ܟܺܐܢ̈ܶܐ ܕܰܥܢܰܕ ܫܢܰܬ ܐܬܟܗ̄ ܠܡܳܪܰܢ ܘܰܩܦܺܝܣܳܐܺܝܬ ܗܳܪܟܳܐ ܐܶܬܬܣܺܝܡ ܡܶܛܽܠ ܗ̇ܳܝ ܕܠܳܐ ܙܳܕܶܩ ܠܡܰܢ ܕܶܐܙܕܰܘܓ ܘܥܰܠ ܒܰܫ̈ܢܰܝܳܐ ܕܶܐܢ ܢܶܬܢܰܩܰܦ ܠܙܽܘܘܳܓܳܐ ܬܪܰܝܳܢܳܐ ܕܬܽܘܒ ܢܶܬܩܛܰܪ ܠܶܗ ܟܠܺܝܠܳܐ ܘܢܶܬܬܣܺܝܡ ܠܶܗ ܥܶܙܩܬܳܐ ܐܰܝܟ ܒܬܽܘܠܳܐ ܠܳܐ ܘܳܠܝܳܐܺܝܬ: ܟܰܕ ܟܠܺܝ̈ܠܶܐ ܠܰܐܝܠܶܝܢ ܕܰܢܛܰܪܘ ܒܬܽܘܠܽܘܬܗܽܘܢ ܡܶܬܝܰܗܒܺܝܢ ܘܗܳܟܘܳܬ ܐܳܦ ܥܶܙ̈ܩܳܬܳܐ. ܘܡܶܛܽܠ ܕܰܚܙܺܝܬ ܒܕܳܪܰܢ ܒܠܺܝܠܳܐ ܩܰܫܺܝ̈ܫܶܐ ܡܚܺܝ̈ܠܶܐ ܘܠܳܐ ܡܕܰܪ̈ܫܰܝ ܒܛܶܟܣ̈ܶܐ ܥܺܕܬܳܢܳܝ̈ܶܐ ܣܳܦܩܳܐܺܝܬ: ܟܰܕ ܡܶܢ ܣܳܝܽܘ̈ܡܶܐ ܩܰܕܡܳܝ̈ܶܐ ܒܚܺܝܪ̈ܶܐ ܠܐ ܐܶܬܬܣܺܝܡ ܐܶܠܳܐ ܚܰܕ ܛܶܟܣܳܐ ܠܒܽܘܪܳܟܳܐ: ܓܶܕܫܰܬ ܕܗܶܢܽܘܢ ܡܶܚܒܰܟ ܚܳܒܟܺܝܢ ܠܒܽܘܪܳܟ ܒܬܽܘ̈ܠܶܐ ܘܰܠܗܰܘ ܕܰܐܪ̈ܡܠܶܐ: ܫܰܩܠܰܢܝ ܛܢܳܢܳܐ ܕܶܐܦܪܽܘܫ ܐܶܢܽܘܢ ܡܶܢ ܚܕ̈ܳܕܶܐ ܠܰܘ ܡܫܳܟܳܐܺܝܬ ܘܰܐܝܟ ܕܳܐܬܝܳܐ ܐܶܠܳܐ ܡܛܰܟܣܳܐܺܝܬ ܥܰܠ ܢܽܘܣ̈ܟܶܐ ܚܰܬܺܝ̈ܬܶܐ ܐܰܝܟܰܢܳܐ ܕܢܶܗܘܶܐ ܦܫܺܝܩ ܠܩܳܪ̈ܽܘܝܶܐ܀

ܙܽܘܗܳܪܳܐ
ܕܰܥ ܕܛܶܟܣܳܐ ܗܳܢܳܐ ܡܶܫܬܡܠܶܐ ܟܰܕ ܬܪ̈ܰܝܗܽܘܢ ܚܰܬܢܳܐ ܘܟܰܠܬܳܐ ܐܰܪ̈ܡܠܶܐ ܢܶܗܘܽܘܢ. ܘܗܳܠܶܝܢ ܕܠܳܐ ܥܶܙ̈ܩܳܬܳܐ ܐܳܦܠܳܐ ܟܠܺܝ̈ܠܶܐ ܢܶܬܒܰܪܟܽܘܢ܆ ܐܶܢ ܕܶܝܢ ܚܰܕ ܡܶܢܗܽܘܢ ܒܰܠܚܽܘܕ ܐܰܪܡܠܳܐ ܐܺܝܬܰܘܗ̱ܝ̱ ܡܶܫܬܰܡܠܶܐ ܥܰܠ ܬܪ̈ܰܝܗܽܘܢ ܛܶܟܣܳܐ ܩܰܕܡܳܝܳܐ ܕܰܒܬܽܘ̈ܠܶܐ ܣܛܰܪ ܡܶܢ ܗܳܝ ܕܠܳܐ ܡܶܬܬܣܺܝܡ ܟܠܺܝ̈ܠܶܐ ܒܪܺܝܫܳܐ ܕܰܐܪܡܠܳܐ ܐܰܘ ܕܰܐܪܡܰܠܬܳܐ܀

ܬܶܫܡܶܫܬܳܐ ܩܰܕܡܳܝܬܳܐ
ܨܠܽܘܬܳܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܰܠܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬܐ ܕܫܽܘܪܳܝܳܐ

ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܗܐ ܕܥܰܡ ܟܺܐܢ̈ܶܐ ܘܙܰܕܺܝ̈ܩܶܐ ܢܶܫܦܰܪ ܠܳܟ. ܘܰܐܝܟ ܕܒܰܪܶܟܬ ܠܰܡܢܺܝܚ̈ܳܢܶܐ ܕܺܝܠܳܟ. ܒܰܪܶܟ ܐܶܢܽܘܢ ܠܥܰܒ̈ܕܰܝܟ ܗܳܠܶܝܢ. ܘܗܰܒ ܠܗܽܘܢ ܕܢܶܚܕܽܘܢ ܥܰܡ ܚ̈ܕܳܕܶܐ ܐܰܝܟ ܨܶܒܝܳܢܳܟ. ܘܚܰܕܳܐ ܐܶܢܽܘܢ ܒܦܺܐܪ̈ܶܐ ܕܫܳܘܚܺܝܢ ܡܶܢܗܽܘܢ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܺܐ ܗܳܫܳܐ ܘܰܠܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܠܳܗܳܐ ܗܰܘ ܕܒܰܪܶܟ. ܠܳܐܕܳܡ ܘܰܠܚܰܘܳܐ ܐܰܢ̱ܬܬܶܗ܆ ܐܰܢ̱ܬ ܡܳܪܝ ܒܰܪܶܟ. ܠܣܳܓܽܘ̈ܕܰܝܟ ܕܶܐܬܓܰܘܰܣܘ ܒܳܟ܆ ܐܰܠܗܳܐ ܐܶܬܪܰܚܰܡܥܠܰܝܢ܀

ܐܰܠܳܗܳܐ ܗܰܘ ܕܒܰܪܶܟ. ܠܙܰܕܺܝ̈ܩܶܐ ܒܕܳܪ̈ܺܝܢ ܕܳܪ̈ܺܝܢ܆ ܐܰܢ̱ܬ ܡܳܪܝ ܒܰܪܶܟ. ܠܣܳܓܽܘ̈ܕܰܝܟ ܕܶܐܬܓܰܘܰܣܘ ܒܳܟ. ܐܠܗܐ ܐܶܬܪܰܚܰܡܥܠܰܝܢ܀

ܫܘ̄ܒ: ܐܰܠܳܗܳܐ ܗܰܘ ܕܒܰܪܶܟ. ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܐܰܢ̱ܬ ܡܳܪܝ ܒܰܪܶܟ. ܠܥܰܒ̈ܕܰܝܟ ܒܣܽܘܓܳܐܐ ܕܛܰܝܒܽܘܬܳܟ. ܐܰܠܗܳܐ ܐܶܬܪܰܚܰܡܥܠܰܝܢ܀

ܨܠܽܘܬܳܐ

ܟܳܗܢܳܐ: ܫܰܝܢܳܟ ܡܳܪܝܳܐ ܗܰܘ ܕܒܶܗ ܐܶܫܬܰܝܰܢܘ ܫܡܰܝ̈ܳܢܶܐ ܘܰܐܪ̈ܥܳܢܝܶܐ ܗܽܘ ܢܫܰܝܶܢ ܠܰܒܢܰܝ̈ܢ ܗܳܠܶܝܢ ܕܰܠܘܳܬ ܚܕܳܕ̈ܶܐ ܐܶܬܩܰܪܰܒܘ. ܐܰܝܟܰܢܳܐ ܕܠܰܚܕܳܕ̈ܶܐ ܢܰܚܒܽܘܢ. ܘܚܰܕ ܠܚܰܕ ܒܰܦܨܺܝܚܽܘܬܳܐ ܢܩܰܒܠܽܘܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܢܰܣܩܽܘܢ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܗܳܫܳܐ ܘܰܠܥܳܠܡܺܝܢ܀

ܩܽܘܩܠܺܝܳܘܢ

ܐܰܒܰܥ ܠܶܒܝ̱ ܦܶܬܓ̈ܳܡܶܐ ܛܳܒ̈ܶܐ ܗ̄ ܘܺܐܡܰܪ ܥܒ̈ܳܕܰܝ ܠܡܰܠܟܳܐ܀

ܐܶܬܢܣܶܟܘ̱ ܪ̈ܰܚܡܶܐ ܥܰܠ ܣܶܦܘ̈ܳܬܳܟ ܗ̄ ܡܶܛܽܠ ܗܳܢܳܐ ܒܰܪܟܳܟ ܐܰܠܳܗܳܐ ܠܥܳܠܰܡ܀

ܥܶܩܒܳܐ

ܕܽܘܨܝ̱ ܘܰܚܕܳܝ ܥܺܕܰܬ ܩܽܘܕܫܳܐ. ܒܚܰܬܢܳܐ ܕܪܰܘܡܳܐ ܕܗܽܘ ܡܰܟܪܶܟܝ. ܘܝܰܗ̱ܒ ܠܶܟܝ ܪܰܗܒܽܘܢܳܐ ܕܚܰܝ̈ܶܐ ܦܰܓܪܶܗ ܘܰܕܡܶܗ ܩܰܕܺܝܫܳܐ. ܘܶܐܫܬܰܘܕܺܝ ܠܶܟܝ ܒܰܡܪ̈ܰܘܡܶܐ ܓܢܽܘܢܳܐ ܘܓܰܢܰܬ ܒܽܘ̈ܣܳܡܶܐ. ܘܥܰܠܗܳܝ ܟܽܠܰܢ ܡܫܰܒܚܺܝܢܰܢ܀

ܡܫܰܡܫܳܢܳܐ: ܣܛܰܘܡܶܢܩܰܐܠܽܘ̇ܣ ܩܽܘܪܝܶܐܠܰܝܣܽܘܢ

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܰܐܠܳܗ ܐܰܠܳܗ̈ܺܝܢ ܘܡܳܪܶܐ ܡܳܪ̈ܰܘܳܢ ܕܰܠܥܶܠ ܡܶܢ ܟܽܠ ܐܰܠܗܽܘܬܶܗ ܡܥܰܠܝܳܐ. ܘܰܠܗܰܠ ܡܶܢ ܟܽܠ ܡܳܪܽܘܬܶܗ ܫܒܺܝܚܳܐ. ܡܠܶܟ ܡܰܠ̈ܟܶܐ ܥܶܠܳܝܳܐ ܕܰܫ̈ܡܰܝܳܐ ܟܽܘܪܣܝܶܗ. ܘܰܐܪܥܳܐ ܟܽܘܒܫܳܐ ܗ̱ܝ ܕܰܬܚܶܝܬ ܪ̈ܶܓܠܰܘܗ̱ܝ̱. ܕܠܶܗ ܝܳܐܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܒܽܘܪܳܟ ܥܰܒܕ̈ܰܘܗ̱ܝ̱ ܘܰܒܟܽܠܗܽܘܢ ܥܶܕ̈ܳܢܺܝܢ ܠܥܳܠܡܺܝܢ܀

ܣܶܕܪܳܐ

ܐܰܠܳܗܳܐ ܗܰܘ ܪܰܒܳܐ ܗܰܘ ܕܺܐܝܬܰܝܟ ܣܳܝܽܘܡܳܐ ܕܫܰܝܢܳܐ ܘܰܕܚܽܘܒܳܐ. ܘܰܕܟܽܠܳܗ̇ ܡܝܰܬܪܽܘܬܳܐ ܘܦܰܐܝܽܘܬ ܩܰܕܺܝܫܽܘܬܳܐ. ܘܝܳܗܽܘܒܳܐ ܕܟܽܠܗܶܝܢ ܡܰܘܗ̈ܒܳܬܳܐ. ܘܫܽܘ̈ܟܳܢܶܐ ܡܰܠ̈ܝܰܝ ܚܰܝ̈ܶܐ. ܫܰܟܶܢ ܠܰܢ ܒܽܘܪ̈ܟܳܬܳܐ ܕܺܝܠܳܟ ܠܐ ܡܶܬܛܰܠܩ̈ܳܢܳܝܳܬܳܐ. ܘܶܐܬܕܰܟܪ ܠܪ̈ܰܚܡܰܝܟ ܘܰܩܝܳܡܳܟ ܘܫܽܘܘܕܳܝܳܟ ܕܥܰܡ ܐܰܒܪܳܗܳܡ ܪܳܚܡܳܟ ܘܠܰܫܪܳܪܳܟ ܕܰܠܒܰܝܬܶܗ ܕܝܰܥܩܽܘܒ ܥܰܒܕܳܟ. ܘܰܐܢܗܰܪ ܦܰܪܨܽܘܦܳܐ ܕܪ̈ܰܚܡܰܝܟ ܥܰܠ ܥܰܒܕ̈ܰܝܟ ܗܳܠܶܝܢ ܕܰܨܒܰܘ ܕܢܶܗܘܽܘܢ ܠܰܚ̈ܕܳܕܶܐ. ܡܠܺܝ ܐܶܢܽܘܢ ܒܽܘܪ̈ܟܳܬܳܐ ܘܒܰܣܺܝܡܽܘܬܳܐ. ܘܰܥܒܶܕ ܠܢܰܩܺܝܦܽܘܬܗܽܘܢ ܗܳܕܶܐ ܚܕܳܝܽܘܬܳܐ ܠܐ ܡܶܣܬܰܕܩܳܢܺܝܬܳܐ. ܘܰܡܬܽܘܚ ܠܚܰܝ̈ܶܐ ܕܺܝܠܗܽܘܢ ܒܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ: ܐܰܝܟܰܢܳܐ ܕܢܶܚܕܽܘܢ ܒܒܽܘܣܳܡܳܐ ܕܝܰܡܺܝܢܳܟ. ܘܗܰܒ ܠܗܽܘܢ ܚܽܘܒܳܐ ܘܰܐܘܝܽܘܬܳܐ ܘܫܰܠܡܽܘܬܳܐ ܕܢܰܦܫܳܐ ܕܰܠܘܳܬ ܚܕ̈ܳܕܶܐ. ܘܙܰܒ̈ܢܶܐ ܡܫܰܝ̈ܢܶܐ ܘܟܰܗ̈ܺܝܢܶܐ ܗܳܠܶܝܢ ܕܪܰܚܺܝܩܺܝܢ ܡܶܢ ܟܽܠܗܶܝܢ ܡܥܺܝܩܳܢܝ̈ܳܬܳܐ ܘܡܶܢ ܟܽܠܗܽܘܢ ܗܳܠܶܝܢ ܕܰܠܒܰܪ ܡܶܢ ܨܶܒܝܳܢܳܟ. ܘܠܳܐ ܣܦܺܝܩܳܐܺܝܬ ܠܗܳܠܶܝܢ ܡܶܢ ܬܰܪܥܳܐ ܕܒܶܝܬ ܓܰܙܳܐ ܕܪ̈ܰܚܡܰܝܟ ܬܶܫܪܶܐ. ܡܶܢܳܟ ܓܶܝܪ ܘܒܳܟ ܐܺܝܬܰܘܗ̱ܝ̱ ܚܰܝܠܳܐ ܕܰܠܟܽܠ ܛܥܺܝܢ. ܘܡܶܢܳܟ ܠܫܽܘܘܙܳܒܳܐ ܕܺܝܠܰܢ ܡܣܰܟܶܝܢܰܢ. ܕܟܽܠ ܛܳܒ̈ܳܬܳܐ ܡܶܢ ܠܘܳܬܳܟ ܡܶܬܝܰܗ̈ܒܳܢ. ܘܠܳܟ ܬܶܫܒܽܘܚܬܳܐ ܡܰܣܩܺܝܢܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ܆ ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ̱

ܒܰܪܶܟ ܡܳܪܝܳܐ ܐܰܠܳܗܳܐ. ܠܥܰܒܕܳܟ ܘܠܰܐܡܬܳܟ ܗܳܠܶܝܢ. ܘܚܰܕܳܐ ܐܶܢܽܘܢ ܒܰܚ̈ܕܳܕܶܐ ܢܽܘܓܪܳܐ ܕܰܫ̈ܢܰܝܳܐ. ܘܰܐܫܘܳܐ ܐܶܢܽܘܢ ܕܢܶܬܢܰܩܦܽܘܢ. ܐܰܝܟ ܨܶܒܝܳܢܳܐ ܕܡܳܪܽܘܬܳܟ. ܘܒܰܪܶܟ ܐܶܢܽܘܢ ܘܠܰܒܢܰܝ̈ܗܽܘܢ ܪܳܚܶܡ ܒܢܰܝ̈ܢܳܫܳܐ܀

ܫܘ̄ܒ: ܐܰܠܳܗܳܐ ܕܰܐܬܩܶܢ ܐܽܘܪܚܶܗ. ܕܗܰܘ ܪܰܒܒܰܝܬܳܐ ܕܰܐܒܪܳܗܳܡ. ܟܰܕ ܐܶܙܰܠ ܕܢܶܡܟܽܘܪ ܐܰܢ̱ܬܬܳܐ ܠܺܐܝܣܳܚܳܩ ܒܰܪ ܡܳܪܶܗ. ܒܰܪܶܟ ܒܪ̈ܰܚܡܶܐ ܕܛܰܝܒܽܘܬܳܟ. ܠܰܡܟܺܝܪܽܘܬܳܐ ܕܣܳܓܽܘ̈ܕܰܝܟ. ܘܢܰܛܰܪ ܐܶܢܽܘܢ ܒܰܨܠܺܝܒܳܟ ܡܶܢ ܟܽܠ ܢܶܟ̈ܝܳܢܶܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ.

ܥܶܛܪܳܐ

ܟܳܗܢܳܐ: ܐܰܪܟܶܢ ܡܳܪܝܳܐ ܐܰܠܳܗܳܐ ܪܰܒܽܘܬܳܟ ܒܥܶܕܳܢܳܐ ܗܳܢܳܐ. ܠܰܡܩܰܒܳܠܽܘ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ. ܐܰܝܟܰܢܳܐ ܕܢܶܫܬܘܶܐ ܠܰܦܨܺܝܚܽܘܬܳܐ ܘܰܪܘܳܙܳܐ ܕܡܶܢܳܟ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ

ܩܳܥܝܳܐ ܥܺܕܬܳܐ ܘܪܳܡ ܩܳܠܳܗ̇: ܕܠܳܐ ܕܳܚܠܳܐ ܐ̱ܢܳܐ ܡܶܢ ܒܺܝܫܳܐ: ܕܫܽܘܪ̈ܶܐ ܪ̈ܳܡܶܐ ܟܪܺܝܟܺܝܢ ܠܺܝ: ܘܡܰܠܟܳܐ ܡܫܺܝܚܳܐ ܗܳܐ ܫܪܶܐ ܒܺܝ܀

ܫܽܘܒܚܳܐ ܠܰܐܒܳܐ ܕܰܨܒܳܐ ܒܶܟܝ: ܘܠܰܒܪܳܐ ܡܫܺܝܚܳܐ ܕܰܫܪܳܐ ܒܶܟܝ: ܘܰܠܪܽܘܚ ܩܽܘܕܫܳܐ ܕܢܳܛܰܪ ܠܶܟܝ: ܡܶܢ ܒܺܝܫܳܐ ܘܚܰܝܠܰܘ̈ܳܬܶܗ܀

ܨܠܽܘܬܳܐ ܕܚܽܘܬܳܡܳܐ

ܗܘܺܝ ܡܳܪܝܳܐ ܥܰܡܰܢ ܘܒܰܝܢܳܬܰܢ ܒܛܰܝܒܽܘܬܳܟ. ܘܚܰܝܶܠ ܘܫܰܪܰܪ ܠܰܢ ܒܬܽܘܩܦܳܐ ܕܝܰܡܺܝܢܳܟ. ܘܰܩܒܽܘܥ ܘܣܰܬܶܬ ܒܰܢ ܕܶܚܠܬܳܟ. ܘܰܓܡܽܘܪ ܘܫܰܡܠܳܐ ܒܰܢ ܨܶܒܝܳܢܳܟ ܘܢܰܛܰܪ ܠܰܢ ܡܶܢ ܟܽܠ ܢܶܟ̈ܝܳܢܺܝܢ ܕܢܰܘܕܶܐ ܠܳܟ ܘܰܢܫܰܒܚܳܟ ܗܳܫܳܐ ܘܰܠܥܳܠܡܺܝܢ܀

ܩܰܕܝܫܰܬ ܐܰܠܳܗܐ

ܩܰܕܝܫܰܬ ܐܠܗܐ. ܩܰܕܝܫܰܬ ܚܰܝܠܬܳܢܐ. ܩܰܕܝܫܰܬ ܠܐ ܡܳܝܘܬܐ. ܕܶܐܨܛܠܶܒܬ ܚܠܳܦܰܝܢ. ܐܶܬܪܰܚܰܡܥܠܰܝܢ܀ (ܬܠܬ ܙܒܢܝܢ)

ܡܳܪܰܢ ܐܶܬܪܰܚܰܡܥܠܰܝܢ. ܡܳܪܰܢ ܚܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨ̈ܠܰܘܳܬܰܢ. ܐܶܬܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰ̈ܛܳܝܶܐ ܥܰܒ̈ܕܰܝܟ܀

ܐܰܒܽܘܢ ܕܒܰܫܡܰܝܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀