ܬܶܫܡܶܫܬܳܐ ܕܰܫܠܺܝ̈ܚܶܐ ܘܩܰܕܺܝ̈ܫܶܐ

ܚ

ܩܽܘܩܠܺܝܳܘܢ

ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ ܗ̄ ܘܰܒܣܰܘ̈ܦܶܝܗ̇ ܕܬܺܒܶܝܠ ܡܶܠܰܝ̈ܗܽܘܢ܀

ܘܥܰܠ ܫܶܡܫܳܐ ܢܩܰܫ ܡܰܫܟܢܶܗ ܒܗܽܘܢ ܗ̄ ܘܗܽܘ ܐܰܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ܀

ܐ̱ܚܪܺܢܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗ̱ܽܘ ܡܳܪܝܳܐ ܗ̄ ܥܰܫܺܝܢ ܗ̱ܽܘ ܘܠܰܝܬ ܒܶܗ ܥܰܘܠܳܐ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܢܒܺܝ̈ܶܐ ܕܰܒܪܽܘܚܳܐ ܡܰܠܠܽܘܟ܇ ܫܠܺܝ̈ܚܶܐ ܕܣܰܒܰܪܘ ܓܶܠܝܳܢܳܟ. ܘܣܳܗ̈ܕܶܐ ܕܡܺܝܬܘ ܡܶܛܽܠ ܚܽܘܒܳܟ܇ ܢܦܺܝܣܽܘܢܳܟ ܪܰܚܶܡܥܠܰܝܢ܀

ܐ̱ܚܪܺܢܳܐ

ܕܽܘܟܪܳܢܟܽܘܢ ܟܽܠ ܩܰܕܺܝ̈ܫܶܐ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪܘ ܕܽܘܟܪܳܢܟܽܘܢ܇ ܢܶܬܥܰܕܪܽܘܢ ܒܰܨ̈ܠܰܘܳܬܟܽܘܢ܀

ܐ̱ܚܪܺܢܳܐ

ܘܰܒܓܰܘ ܓܽܘܪ̈ܢܶܐ ܓܰܪ̈ܡܰܝܟܽܘܢ܇ ܘܰܩܠܺܝ̈ܕܶܐ ܕܪܰܘܡܳܐ ܥܰܡܟܽܘܢ. ܩܰܕܺܝ̈ܫܶܐ ܦܬܰܚܘ ܓܰܙܰܝ̈ܟܽܘܢ܇ ܘܗܰܒܘ ܥܽܘܕܪ̈ܳܢܶܐ ܠܰܣܢܺܝ̈ܩܶܐ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܐ̱ܚܪܺܢܳܐ ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ

ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ܇ ܠܰܐܠܳܗܳܐ ܡܶܛܽܠܳܬܰܢ܆ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ ܒܰܡܪܰܚܡܳܢܽܘܬ݂ܶܗ. ܘܰܢܦܰܨܶܐ ܠܰܢ ܡܶܢ ܕܺܝܢܳܐ܇ ܕܗܳܘܶܐ ܠܚܰܪܬܳܐ ܕܝܰܘ̈ܡܳܬ݂ܳܐ܇ ܘܢܶܚܙܶܝܟܽܘܢ ܡܳܐ ܕܫܳܩܠܺܝܬܽܘܢ ܟܠܺܝ̈ܠܶܐ ܕܙܳܟ݂ܽܘܬܳܐ܀

ܫܽܘܒܚܳܐ: ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܇ ܕܰܒܝܰܡܳܐ ܘܝܰܒܫܳܐ ܫܰܠܺܝܛ܇ ܘܰܓ݂ܒܳܐ ܠܶܗ ܐ̱ܢܳܫ̈ܳܐ ܦܫܺܝܛܶܐ ܕܢܶܗܘܽܘܢ ܠܶܗ ܟܳܪ̈ܽܘܙܰܘܗ̱ܝ. ܡܶܢ ܝܰܡܳܐ ܓܒܳܐ ܠܶܗ ܦܶܛܪܳܘܣ܇ ܘܡܶܢ ܒܶܝܬ݂ ܐܽܘܪ̈ܚܳܬ݂ܳܐ ܦܰܘܠܳܘܣ܇ ܘܰܥܒܰܕ ܐܶܢܽܘܢ ܟܳܪ̈ܽܘܙܶܐ ܕܥܺܕܬܳܐ ܩܰܕܺܝܫܬܳܐ܀

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ܇ ܨܰܠܰܘ ܕܢܶܗܘܶܐ ܫܰܝܢܳܐ ܒܰܒܪܺܝܬܳܐ. ܩܪ̈ܳܒܶܐ ܢܶܬܒܰܛܠܽܘܢ܇ ܘܚܶܪ̈ܝܳܢܶܐ ܢܶܫܠܽܘܢ ܡܶܢܰܢ܇ ܘܥܺܕܬܳܐ ܘܝܰܠ̈ܕܶܝܗ̇ ܒܰܐܘܝܽܘܬܳܐ ܢܶܗܘܽܘܢ܀

ܫܽܘܒܚܳܐ: ܒܪܰܘܡܳܐ ܟܠܺܝ̈ܠܰܝܟܽܘܢ܇ ܘܰܒܓܰܘ ܬܺܒܶܝܠ ܟܶܢܫܰܝ̈ܟܽܘܢ܇ ܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ ܩܰܕܺܝ̈ܫܶܐ. ܒܪܰܘܡܳܐ ܘܰܒܥܽܘܡܩܳܐ܇ ܒܪܺܝܟ ܕܰܐܘܪܶܒ ܕܽܘܟܪ̈ܳܢܰܝܟܽܘܢ܇ ܙܳܪ̈ܥܰܝ ܫܰܝܢܳܐ ܒܥܺܕܬܶܗ ܕܰܡܫܺܝܚܳܐ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܛܳܣܘ ܓܽܘ̈ܕܶܐ ܕܥܺܝܪ̈ܶܐ ܘܰܢܚܶܬܘ ܡܶܢ ܣܶܕܪ̈ܰܝܗܽܘܢ ܕܰܚܙܰܘ ܠܣܳܗ̈ܕܶܐ ܩܰܕܺܝ̈ܫܶܐ ܟܰܕ ܡܶܬܩܰܛܠܺܝܢ. ܛܽܘܒܳܐ ܪܰܒܳܐ ܝܰܗܒܘ ܗ̱ܘܰܘ ܠܳܗ̇ ܠܥܺܕܰܬ ܩܽܘܕܫܳܐ ܥܰܠ ܕܶܒܚܳܐ ܕܰܣܠܶܩ ܡܶܢܳܗ̇ ܠܰܡܠܶܟ ܡܰܠ̈ܟܶܐ܀

ܫܽܘܒܚܳܐ: ܐܳܘ ܣܳܗ̈ܕܶܐ ܪ̈ܚܽܘܡܰܘܗܝ ܕܰܒܪܳܐ ܡܰܢ ܐܰܪܘܺܝܟܽܘܢ ܕܰܒܣܰܝܦܳܐ ܐܶܬܟܰܠܰܠܬܽܘܢ ܘܠܳܐ ܚܰܫܬܽܘܢ ܒܶܗ. ܕܡܶܗ ܕܝܶܫܽܘܥ ܚܙܰܝܢ ܒܰܐܙܩܺܝܦܳܐ ܘܗܽܘ ܐܰܪܘܺܝ ܠܰܢ ܘܠܳܐ ܐܰܪܓܶܫܢܰܢ ܒܽܐܘܠ̈ܨܳܢܰܝܢ ܡܶܛܽܠ ܚܽܘܒܶܗ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܐ ܪܚܺܝܡܺܝܢ

ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ ܘܰܦܐܶܐ ܘܰܪܓܺܝܓ: ܝܰܘܡܳܐ ܕܥܺܐܕܰܝ̈ܟܽܘܢ. ܕܠܰܨܠܺܝܒܳܐ ܓܺܝܫܪܳܐ ܥܒܰܕܬܽܘܢ. ܘܠܰܐܬܪܳܐ ܕܚܰܝ̈ܶܐ ܡܰܢܰܥܬܽܘܢ. ܘܚܶܕܝܰܬ ܒܟܽܘܢ ܪܽܘܚܳܐ ܕܩܽܘܕܫܳܐ ܘܓܶܕܠܰܬ ܣܳܡܰܬ܇ ܟܠܺܝ̈ܠܶܐ ܠܪ̈ܺܝܫܰܝܟܽܘܢ܀

ܫܽܘܒܚܳܐ: ܩܳܝܡܺܝܢ ܣܳܗܕ̈ܶܐ ܒܒܶܝܬ ܕܺܝ̣ܢܳܐ ܡܝܰܒܒܺܝܢ ܘܳܐܡܪܺܝܢ: ܕܰܢܡܽܘܬ ܥܰܠ ܣܰܒܪܳܐ. ܘܠܳܐ ܢܶܕܚܰܠ ܡܼܶܢ ܕܰܝܳܢܰܘ̈ܗ̱ܝ: ܕܥܳܠܡܳܐ ܗܳܢܳܐ ܥܳܒܽܘܪܳܐ. ܕܺܐܝܬ ܗܽܘ ܠܰܢ ܡܰܠܟܳܐ ܡܫܺܝܚܳܐ ܕܗܽܘ ܡܰܘܪܶܬ ܠܰܢ: ܚܰܝ̈ܶܐ ܕܰܠܥܳܠܰܡ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܪܶܗ ܕܪܰܡܫܳܐ

ܡ̣ܶܢ ܦܽܘܡ ܟܽܠܰܢ. ܫܠܳܡܳܐ ܠܓܰܪ̈ܡܰܝܟܽܘܢ܇ ܘܡ̣ܶܢ ܓܰܪ̈ܡܰܝܟܽܘܢ: ܥܽܘܕܪ̈ܳܢܶܐ ܠܟܽܠܰܢ. ܢܒܺܝ̈ܶܐ ܫܠܺܝ̈ܚܶܐ: ܘܣܳܗ̈ܕܶܐ ܩܰܕܺܝ̈ܫܶܐ. ܨܠܽܘܬܟܽܘܢ ܬܶܗܘܶܐ: ܣܶܬܳܪܳܐ ܠܟܽܠܰܢ܀

ܫܽܘܒܚܳܐ: ܠܳܐ ܡܶܬܬܙܺܝܥܳܐ܇ ܥܺܕܬܳܐ ܡܗܰܝܡܰܢܬܳܐ܇ ܡܶܢ ܡܰܚ̈ܫܽܘܠܶܐ ܘܓܰܠ̈ܠܶܐ ܕܛܳܪܶܝܢ ܒܳܗ̇. ܕܣܺܝܡ ܒܫܶܬܶܐܣܶܝ̈ܗ̇܇ ܟܺܐܦ̈ܶܐ ܓܰܒ̈ܝܳܬܳܐ܇ ܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ ܩܰܕܺܝ̈ܫܶܐ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢ̈ܒܺܝܶܐ ܫܠܺܝ̈ܚܶܐ ܘܣܳܗ̈ܕܶܐ܇ ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟ݂ܪܳܢܗܽܘܢ ܦܳܪܽܘܩܰܢ܇ ܘܠܰܢ ܥܰܕܰܪ ܒܰܨ̈ܠܰܘܳܬܗܽܘܢ܀