ܛܟܣܐ ܕܡܫܚܐ ܕܟܪ̈ܝܗܐ
ܬܶܫܡܶܫܬܳܐ ܕܰܬܠܳܬ
ܘܢܺܐܡܪܽܘܢ ܩܰܕܺܝܫܰܬ ܐܰܠܳܗܳܐ ܬܠܳܬ ܙܰܒܢܺܝ̈ܢ܆ ܘܰܐܒܽܘܢ ܕܒܰܫܡܰܝܳܐ ܘܫܰܪܟܳܐ. ܟܳܗܢܳܐ ܥܳܒܶܕ ♱ ♱ ♱ ܬܠܳܬܳܐ ܨܠܺܝ̈ܒܶܐ ܥܰܠ ܩܰܢܕܺܝܠܳܐ ܒܰܫܡܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܡܰܢܗܰܪ ܦܬܺܝܠܬܳܐ ܡܰܥܶܪܒܳܝܬܳܐ ܘܰܡܫܰܒܰܚ ܘܳܐܡܰܪ:
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.
ܡܫܡܫܢ̈ܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠܡ̈ܶܐ ܠܥܳܠܰܡ ܥܳܠܡܺܝܢ܆ ܐܰܡܺܝܢ܀
ܟܗܢܐ: ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܘܓܰܢ̱ܒܳܪܳܐ ܕܥܳܠ̈ܡܶܐ ܘܩܰܕܺܝܫ ܒܟܽܠ ܒܰܪܶܟ ܘܩܰܕܶܫ ܠܶܡܫܚܳܐ ܗܳܢܳܐ ܘܠܰܐܝܠܶܝܢ ܕܡܶܬܡܰܫܚܺܝܢ ܡܶܢܶܗ܆ ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀ ܐܰܡܺܝܢ܀
ܩܠܐ ܒܟܢܪܐ ܬܠܝܬܝܐ: ܒܩ̄ ܩܘܩܠܝܘܢ
ܠܳܟ ܝܳܐܝܳܐ ܬܶܫܒܽܘܚܬܳܐ ܐܰܠܳܗܳܐ ܒܨܶܗܝܽܘܢ ܗ̄ ܘܠܳܟ ܡܶܬܦܪܰܥ ܢܶܕܪܳܐ ܫܡܰܥ ܨܠܽܘܬܝ̱܀
ܥܢܺܝܢ ܐܰܠܳܗܳܐ ܦܳܪܽܘܩܰܢ ܗ̄ ܣܰܒܪܳܐ ܕܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ܀
ܒܫܽܘܒܚܳܐ ܐܶܬܕܟܰܪܬܳܗ̇ ܠܰܐܪܥܳܐ ܗ̄ ܐܰܫܠܺܝܬܳܗ̇ ܘܰܒܣܽܘܓܐܳܐ ܐܰܥܬܰܪܬܳܗ̇܀
ܒܰܪ̈ܣܺܝܣܶܐ ܬܶܬܪܰܒܶܐ ܡܰܘܥܺܝܬܳܗ̇ ܘܬܶܬܒܰܪܰܟ ܗ̄ ܒܰܪܶܟ ܟܠܺܝܠܳܐ ܕܫܰܢ̱ܬܳܐ ܒܛܰܝܒܽܘܬܳܟ܀
ܥܩܒܐ: ܒܩ̄ ܠܩܺܒܽܘܬܳܐ ܕܕܺܝܰܬܺܝܩܺܝ
ܠܳܐ ܡܳܪܝ ܬܶܟܠܶܐ ܡܰܘܗܰܒܬܳܟ ܡܶܢ ܚܰܛܳܝ̈ܶܐ ܕܩܳܪܶܝܢ ܠܳܟ. ܘܠܳܐ ܬܶܐܚܽܘܕ ܬܰܪܥܳܐ ܕܪ̈ܰܚܡܶܐ ܩܕܳܡ ܬܰܝܳܒ̈ܶܐ ܕܢܳܩܫܺܝܢ ܒܶܗ. ܐܶܠܳܐ ܚܰܢܳܢܳܐ ܡܳܪܰܢ. ܦܰܢܳܐ ܠܗܽܘܢ ܟܽܠ ܫܶܐܠ̈ܳܬܗܽܘܢ܆ ܘܟܰܕ ܕܳܠܩܺܝܢ ܠܰܡܦܺܐܕܰܝ̈ܗܽܘܢ܆ ܥܰܡ ܒܬܽܘ̈ܠܳܬܳܐ ܚܰܟܺܝ̈ܡܳܬܳܐ܆ ܢܶܥܠܽܘܢ ܥܰܡܳܟ ܠܰܓܢܽܘܢܳܐ܆ ܘܢܰܣܩܽܘܢ ܫܽܘܒܚܳܐ ܠܛܰܝܒܽܘܬܳܟ. ܚܰܢܳܢܳܐ ܪܳܚܶܡ ܐ̱ܢܳܫܳܐ܀
ܡܫܡܫܢܐ: ܣܛܰܘܡܶܢܩܰܐܠܳܘܣ ܩܽܘܪܝܶܐܠܰܝܣܳܘܢ܀
ܦܪܽܘܡܝܽܘܢ
ܠܗܰܘ ܡܳܪܳܐ ܛܳܒܳܐ ܕܚܳܕܶܐ ܒܚܰܛܳܝ̈ܶܐ ܕܢܳܩܫܺܝܢ ܒܬܰܪܥܶܗ. ܘܪܳܘܶܙ ܒܬܰܝܳܒ̈ܶܐ ܕܰܡܣܰܟܶܝܢ ܠܣܰܒܪܶܗ. ܘܰܡܩܰܒܶܠ ܠܛܳܥܰܝ̈ܳܐ ܕܡܶܬܦܢܶܝܢ ܠܘܳܬܶܗ. ܘܰܡܚܰܒܶܒ ܠܰܡܒܰܕܪ̈ܶܐ ܕܡܶܬܟܰܢܫܺܝܢ ܠܘܰܥܕܶܗ. ܛܳܒܳܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܒܗܳܢܳܐ ܥܶܕܳܢܳܐ܀
ܣܶܕܪܳܐ
ܡܳܪܰܢ ܝܶܫܽܘܥ ܡܫܺܝܚܳܐ ܒܬܰܪܥܳܐ ܕܪ̈ܰܚܡܰܝܟ ܢܳܩܫܺܝܢܰܢ. ܘܡܶܢ ܒܶܝܬ ܓܰܙܳܟ ܕܰܡܠܶܐ ܟܽܠ ܛܽܘ̈ܒܺܝܢ ܫܽܘܒܩܳܢܳܐ ܕܰܚܛܳܗ̈ܶܐ ܘܰܕܚܰܘ̈ܒܶܐ ܫܳܐܠܺܝܢܰܢ. ܬܳܐ ܡܳܪܝ ܠܺܐܝܳܠܳܐ ܕܥܰܒܕܳܟ ܒܥܶܕܳܢܳܐ ܗܳܢܳܐ. ܘܰܫܡܰܥ ܨܠܰܘ̈ܳܬܰܢ ܐܰܝܟ ܨܶܒܝܳܢܳܟ ܛܳܒܳܐ ܕܝܰܗܒܬ ܫܽܘܠܛܳܢܳܐ ܠܰܫܠܺܝ̈ܚܰܝܟ ܩܰܕܺܝ̈ܫܶܐ܆ ܘܶܐܡܰܪܬ ܠܗܽܘܢ ܕܶܐܢ ܬܶܐܚܕܽܘܢ ܚܛܳܗ̈ܶܐ ܕܰܒܢܰܝ̈ܢܳܫܳܐ ܐܰܚܺܝܕܺܝܢ܆ ܘܶܐܢ ܬܶܫܒܩܽܘܢ ܫܒܺܝܩܺܝܢ܆ ܘܶܐܢ ܬܶܐܣܪܽܘܢ ܐܰܣܺܝܪܺܝܢ ܒܰܫܡܰܝܳܐ ܘܒܰܐܪܥܳܐ. ܘܶܐܢ ܬܶܫܪܽܘܢ ܫܪܶܝܢ ܒܰܫܡܰܝܳܐ ܘܒܰܐܪܥܳܐ. ܐܰܢ̱ܬ ܗܳܟܺܝܠ ܐܰܠܳܗܳܐ ܙܰܟܳܝܳܐ ܘܰܬܪܺܝܨܳܐ ܒܰܠܚܽܘܕܰܝܟ ܚܰܣܳܐ ܘܰܠܚܺܝ ܘܰܫܒܽܘܩ ܒܽܘܨܳܪ̈ܶܐ ܕܥܰܒܕܳܟ ܕܩܳܐܶܡ ܩܕܳܡܰܝܟ ܒܥܶܕܳܢܳܐ ܗܳܢܳܐ. ܐܰܝܟܰܢܳܐ ܕܩܰܒܶܠܬ ܠܚܰܛܳܝܬܳܐ ܡܰܪܝܰܡ ܗܳܝ ܕܡܶܫܚܰܬ ܪ̈ܶܓܠܰܝܟ ܘܫܰܘܝܰܬ ܐܶܢܶܝܢ ܒܣܰܥܪܳܗ̇܆ ܘܶܐܡܰܪܬ ܠܳܗ̇ ܫܒܺܝܩܺܝܢ ܠܶܟܝ̱ ܚܛܳܗܰܝ̈ܟܝ̱ ܡܶܛܽܠ ܕܰܐܚܶܒܬܝ ܣܰܓܺܝ. ܗܳܟܰܢܳܐ ܡܶܬܟܰܫܦܺܝܢܰܢ ܘܒܳܥܶܝܢܰܢ ܡܶܢܳܟ ܕܬܶܫܒܽܘܩ ܚܛܳܗܰܝ̈ܢ ܘܰܚܛܳܗ̈ܶܐ ܕܥܰܒܕܳܟ ܗܳܢܳܐ ܕܰܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ ܘܒܺܝܕܰܥܬܳܐ ܘܰܕܠܳܐ ܒܺܝܕܰܥܬܳܐ ܘܰܒܡܰܘ̈ܡܳܬܳܐ ܘܰܒܕܰܓܳܠܽܘܬܳܐ ܘܰܒܚܶܪܝܳܢܳܐ ܘܰܒܥܶܨܝܳܢܳܐ ܘܰܒܥܶܠܬܳܐ ܐܰܝܕܳܐ ܕܗܺܝ ܕܒܳܗ̇ ܡܨܶܐ ܣܳܛܳܢܳܐ ܕܢܰܚܛܶܐ ܠܓܶܢܣܳܐ ܕܰܒܢܰܝ̈ܢܳܫܳܐ. ܐܰܢ̱ܬ ܡܳܪܝ ܕܰܦܫܰܛܬ ܐܺܝܕܳܝ̈ܟ ܒܰܙܩܺܝܦܳܐ ܠܚܽܘܣܳܝܳܐ ܘܦܽܘܪܩܳܢܳܐ ܕܰܒܢܰܝ̈ܢܳܫܳܐ. ܚܰܣܳܐ ܚܰܘ̈ܒܰܝܢ ܘܰܫܒܽܘܩ ܒܽܘܨܳܪ̈ܰܝܢ܆ ܘܰܐܫܘܳܐ ܠܰܢ ܕܰܢܩܽܘܡ ܡܶܢ ܝܰܡܺܝܢܳܟ. ܘܥܰܡ ܓܒܰܝ̈ܳܐ ܥܳܒ̈ܕܰܝ ܨܶܒܝܳܢܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀
ܩܠܐ: ܒܩ̄ ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܡܶܫܚܳܐ ܪܺܝܫܳܝܳܐ ܫܶܩܠܰܬ ܚܰܛܳܝܬܳܐ ܡܶܢ ܨܶܝܕ ܚܰܕܝܽܘܟ. ܘܰܠܒܰܝܬܶܗ ܕܫܶܡܥܽܘܢ ܐܶܙܰܠ̱ܬ ܕܬܶܣܒ ܫܽܘܒܩܳܢܳܐ ܕܚܰܘ̈ܒܶܝܗ̇. ܟܳܐܐ ܒܳܗ̇ ܫܶܡܥܽܘܢ ܘܶܐܡܰܪ ܠܳܗ̇܆ ܕܙܶܠܝ̱ ܡܶܢ ܬܰܪܥܳܐ ܕܛܰܥܝܳܐ ܡܶܢ ܐܽܘܪܚܳܐ. ܕܝܳܕܥܳܐ ܠܶܟܝ̱ ܟܽܠܳܗ̇ ܒܪܺܝܬܳܐ܆ ܕܰܐܢ̱ܬܬܳܐ ܐܺܝܬܰܝܟܝ̱ ܙܳܢܺܝܬܳܐ. ܫܽܘܒ݉ܚܳܐ ܠܗܰܘ ܕܶܐܡܰܪ ܙܶܠܝ̱ ܐܰܢ̱ܬܬܳܐ ܫܒܺܝܩܺܝܢ ܚܰܘܒܰܝ̈ܟܝ̱܆ ܘܗܽܘ ܫܳܒܶܩ ܚܛܳܗ̈ܶܐ ܕܟܽܠܰܢ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀
ܒܡ̈ܰܬܠܶܐ ܡ̣ܰܠܶܠ ܦܳܪܽܘܩܰܢ. ܘܰܒܦ̈ܶܠܳܐܬܳܐ ܘܽܐܘܚܕ̈ܳܬܳܐ. ܘܶܐܡ̣ܰܪ ܕܕܳܡܝܳܐ ܡܰܠܟܽܘܬܳܐ ܕܰܫܡܰܝܳܐ ܠܰܒܬܽܘ̈ܠܳܬܳܐ. ܗܳܠܶܝܢ ܕܰܢ̣ܣܰܒܝ̱̈ ܠܰܡܦܺܐܕ̈ܶܐ ܘܰܢ̣ܦܰܩܝ̱̈ ܠܽܐܘܪܥܶܗ ܕܚܰܬܢܳܐ ܘܰܕܟܰܠܬܳܐ܆ ܢ̣ܳܡ̈ܝ̱ ܟܠܽܗܶܝܢ ܘܰܕܡ̣ܶܟ̈ܝ̱ ܐܰܟܚܕܳܐ. ܘܰܗܘܳܬ ܩܥܳܬܳܐ ܣܰܓܺܝܐܬܳܐ܆ ܕܗܳܐ ܚܰܬ݉ܢܳܐ ܐܳܬܶܐ܆ ܚܰܟܺܝ̈ܡܳܬܳܐ ܥ̣ܰܠ̈ܝ̱ ܥܰܡܶܗ. ܘܣܰܟ̈ܠܳܬܳܐ ܦ̣ܳܫ̈ܝ̱ ܥܰܠ ܬܰܪܥܳܐ ܒܒܶܟܝܳܐ ܪܰܒܳܐ ܘܬܶܢܚ̈ܳܬܳܐ ܕܠܳܐ ܡܶܬܡܰܠ̈ܠܳܢ܀
ܫܘܒ: ܝܺܚܺܝܕܳܐ ܡܶܠܬܶܗ ܕܰܐܒܳܐ܆ ܪܰܟ̣ܶܒ ܡܰܬ̈ܠܶܐ ܠܥܽܘܕܪܳܢܰܢ. ܘܶܐܡ̣ܰܪ ܕܺܐܝܬ ܗ̱ܘܳܐ ܥܰܬܺܝܪܳܐ. ܕܡܶܬܓܰܐܶܐ ܗ̱ܘܳܐ ܒܦܽܘܢ̈ܳܩܶܐ. ܚܰܕ ܡܶܣܟܺܢܳܐ ܠܳܥܳܙܰܪ܆ ܡܶܬܝܰܐܰܒ ܗ̱ܘܳܐ ܕܢܶܣܒܰܥ ܡܶܐܟܽܘܠܬܳܐ. ܟܰܕ ܡ̣ܺܝܬ ܐܰܘܒܠܽܘܗ̱ܝ ܡܰܠܰܐܟ̈ܶܐ. ܠܥܽܘܒܶܗ ܕܰܐܒܽܘܢ ܐܰܒܪܳܗܳܡ. ܐܳܦ ܗܰܘ ܥܰܬܺܝ݉ܪܴܐ܆ ܡ̣ܺܝܬ ܘܶܐܙܰܠ ܠܶܗ ܠܬܰܫܢܺܝܩܳܐ. ܘܺܝ̣ܪܶܬ ܘܳܝܳܐ ܕܰܠܥܳܠܰܡ ܒܓܰܘ ܓܺܗܰܢܳܐ܆ ܥܰܠ ܕܠܳܐ ܚܰܢ ܗ̱ܘܳܐ ܠܒܰܪ ܒܶܣܪܶܗ܀
ܡܢܥܠܡ: ܐܶܬܕܰܡܝܰܬ ܡܰܠܟܽܘܬ ܪܰܘܡܳܐ. ܠܓܰܒܪܳܐ ܕܰܥ̣ܒܰܕ ܡܶܫܬܽܘܬܳܐ. ܘܰܩ̣ܪܳܐ ܠܥܰܡܳܐ ܕܢܺܐܬܶܐ ܠܳܗ̇ ܘܠܳܐ ܨܒܳܐ ܕܢܺܐܬܶܐ ܘܢܶܬܒܰܣܰܡ. ܫ̣ܰܕܰܪ ܠܥܰܒ̈ܕܰܘܗ̱ܝ ܕܰܢܙܰܡܢܽܘܢ ܠܟܽܠܗܽܘܢ ܥܰܡ̈ܡܶܐ ܕܢܶܬܚܰܕܽܘܢ ܥܰܡܶܗ܆ ܘܡܶܢ ܟܽܠ ܦܶܢ̈ܝܳܢ ܐܶܬܘܰܥܰܕܘ̱. ܘܶܐܬܡܠܺܝ ܗ̱ܘܳܐ ܒܰܝܬܳܐ ܣܡܺܝ̈ܟܶܐ܆ ܘܰܢ̣݉ܦܰܩ ܚ̣ܙܳܐ ܐܶܢܽܘܢ܆ ܘܶܐܫ̣ܰܟܚ ܒܗܽܘܢ ܓܰܒܪܳܐ ܕܰܠܒܺܝܫ. ܡܳܐܢ̈ܶܐ ܨ̈ܳܐܶܐ ܕܠܳܐ ܚܳܫܚܺܝܢ ܠܒܶܝܬ ܡܶܫܬܽܘܬܳܐ ܘܰܦ̣ܩܰܕ ܫܕܰܐܘܽܘܗܝ ܒܚܶܫܽܘܟܳܐ܀
ܡܳܪܝܳܐ ܡܪܰܚܡܳܢܳܐ ܪܰܚܶܡ ܥܠܰܝܢ ܘܥܰܕܰܪܰܝܢ
ܦܺܝܪܡܳܐ
ܡܳܪܝܳܐ ܐܰܠܳܗܳܐ ܡܳܪܳܐ ܕܟܽܠܳܗ̇ ܐܳܣܝܽܘܬܳܐ. ܘܝܳܗܽܘܒܳܐ ܕܟܽܠܳܗ̇ ܛܳܒܽܘܬܳܐ ܘܩܰܕܺܝܫܽܘܬܳܐ ܘܰܡܫܰܟܢܳܢܳܐ ܕܟܽܠܳܗ̇ ܚܠܺܝܡܽܘܬܳܐ܆ ܗܰܘ ܕܰܒܟܽܠ ܙܒܰܢ ܒܛܺܝܠ ܠܶܗ ܥܰܠ ܚܰܝ̈ܶܐ ܕܰܒܢܰܝ̈ܢܳܫܳܐ܆ ܘܠܳܐ ܟܳܠܶܐ ܡܶܢܰܢ ܥܽܘܕܪ̈ܳܢܰܘܗܝ ܐܰܠܳܗܳܝ̈ܶܐ. ܐܰܢ̱ܬ ܡܳܪܝܳܐ ܐܰܠܳܗܳܐ ܐܰܓܶܢ ܥܠܰܘܗܝ ܝܰܡܺܝܢܳܟ ܗܳܝ ܕܡܰܠܝܳܐ ܪ̈ܰܚܡܶܐ ܘܰܚܢܳܢܳܐ ܐܳܣܝܽܘܬܳܐ ܘܰܢܦܺܐܫܳܐ ܘܠܽܘܒܳܒܳܐ ܘܥܽܘܕܪܳܢܳܐ ܥܰܠ ܗܳܢܳܐ ܥܰܒܕܳܟ (ܦܳܠܢ) ܕܫܳܐܶܠ ܡܶܢܳܟ ܚܽܘܠܡܳܢܳܐ ܘܳܐܣܝܽܘܬܳܐ ܕܢܰܦܫܳܐ ܘܰܕܦܰܓܪܳܐ. ܘܒܰܛܶܠ ܡܶܢܶܗ ܡܳܪܝܳܐ ܡܰܪ̈ܥܶܐ ܘܟܽܘܪ̈ܗܳܢܶܐ ܘܟܺܐܒ̈ܶܐ. ܘܰܐܥܰܒܪ ܡܶܢܶܗ ܣܰܩܽܘ̈ܒܠܶܐ ܘܢܶܟܝܳܢ̈ܶܐ. ܘܰܐܡܺܝܬ ܡܶܢܶܗ ܚܰܫ̈ܶܐ ܘܢܶܣܝܽܘܢ̈ܶܐ. ܘܰܐܠܒܶܫܳܝܗܝ ܚܰܝܠܳܐ ܘܚܽܘܠܡܳܢܳܐ ܘܦܽܘܪܩܳܢܳܐ ܘܫܽܘܘܙܳܒܳܐ. ܘܰܣܡܽܘܟܳܝܗܝ ܕܰܢܩܽܘܡ ܘܢܶܫܬܰܪܰܪ. ܘܗܰܒ ܠܶܗ ܥܽܘܕܪܳܢܳܐ ܒܝܰܡܺܝܢܳܐ ܕܺܝܠܳܟ ܚܰܝܠܬܳܢܺܝܬܳܐ. ܘܰܫܒܽܘܩ ܠܶܗ ܚܰܘ̈ܒܰܘܗܝ ܘܰܚܛܳܗܰܘ̈ܗܝ. ܘܰܥܒܶܕ ܥܰܡܶܗ ܐܳܬܳܐ ܛܳܒܬܳܐ ܐܰܝܟ ܣܽܘܓܐܳܐ ܕܛܰܝܒܽܘܬܳܟ ܘܰܕܪ̈ܰܚܡܰܝܟ ܣܰܓܺܝ̈ܐܶܐ ܐܰܝܟܰܢܳܐ ܕܢܶܣܓܽܘܕ ܘܰܢܫܰܒܚܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܀
ܬܽܘܒ ܙܽܘܡܳܪܳܐ
ܦܰܘܠܳܘܣ ܫܠܺܝ̣ܚܳܐ ܘܛܽܘܒܳܢܳܐ ܫܶܡܥܶܬ ܕܳܐܡܰܪ. ܕܶܐܢ ܐ̱ܢܳܫ ܢܺܐܬܶܐ ܢܣܰܒܰܪܟܽܘܢ. ܠܒܰܪ ܡ̣ܶܢ ܡܳܐ ܕܣܰܒܰܪܢܳܟܽܘܢ. ܘܶܐܢ ܡܰܠܰܐܟܰܐ ܗ̱ܘ ܡ̣ܶܢ ܪܰܘܡܳܐ. ܢܶܗ̣ܘܶܐ ܡܰܚܪܰܡ ܡ̣ܶܢ ܥܺܕܬܳܐ. ܕܗܳܐ ܢܳܒܥܺܝ̣ܢ ܠܰܡ ܝܽܘ̣ܠ̈ܦܳܢܶܐ ܡܫܰܚ̈ܶܠܦܶܐ ܡ̣ܶܢ ܟܽܠ ܓܰܒܺܝ̈ܢ. ܛܽܘܒ ܠܰܐܝܢܳܐ ܕܰܒܝܽܘܠܦܳܢܶܗ ܕܰܐܠܳܗܳܐ ܫܰܪܺܝ ܘܫܰܠܶܡ܀
ܩܶܪܝܳܢܳܐ:
ܐܶܓܰܪܬܳܐ ܕܦܰܘܠܽܘܣ ܫܠܺܝ̣ܚܳܐ ܕܰܠܘܳܬ ܩܽܘܪ̈ܺܝܢܬܳܝܶܐ ܩܰܕܡܳܝܬܳܐ
ܘ: ܐ ـ ܗ I Corinthians 6:1-5
ܡܰܡܪܰܚ ܐ̱ܢܳܫ ܡܶܢܟܽܘܢ ܟܰܕ ܐܺܝܬ ܠܶܗ ܕܺܝܢܳܐ ܥܰܡ ܐܰܚܽܘܗ̱ܝ܆ ܕܰܢܕܽܘܢ ܩܕܳܡ ܥܰܘ̈ܳܠܶܐ܆ ܘܠܳܐ ܩܕܳܡ ܩܰܕܺܝ̈ܫܶܐ. ܐܰܘ ܠܳܐ ܝܳܕܥܺܝܢ ܐܢ̱ܬܽܘܢ ܕܩܰܕܺܝ̈ܫܶܐ ܠܥܳܠܡܳܐ ܢܕܽܘܢܽܘܢ. ܘܶܐܢ ܥܳܠܡܳܐ ܒܟܽܘܢ ܡܶܬܕܺܝܢ܆ ܠܳܐ ܫܳܘܶܝܢ ܐܢ̱ܬܽܘܢ ܠܰܡܕܳܢ ܕܺܝ̈ܢܶܐ ܕܰܩܕ̈ܩܶܐ. ܠܳܐ ܝܳܕܥܺܝܢ ܐܢ̱ܬܽܘܢ ܕܰܠܡܰܠܰܐܟ̈ܶܐ ܕܳܝܢܺܝܢܰܢ. ܚܰܕ ܟܡܳܐ ܐܰܝܠܶܝܢ ܕܰܕܥܳܠܡܳܐ ܐܶܢܶܝܢ ܗܳܢܳܐ. ܐܶܠܳܐ ܐܶܢ ܐܺܝܬ ܠܟܽܘܢ ܕܺܝܢܳܐ ܥܰܠ ܕܥܳܠܡܳܐ. ܠܰܐܝܠܶܝܢ ܕܰܒܣܶܝܢ ܒܥܺܕܬܳܐ܆ ܐܰܘܬܶܒܘ ܠܟܽܘܢ ܒܕܺܝܢܳܐ. ܠܟܽܘܳܐܪܳܐ ܗܽܘ ܕܶܝܢ ܐܳܡܰܪ ܐ̱ܢܳܐ ܠܟܽܘܢ. ܗܳܟܰܢܳܐ ܠܰܝܬ ܒܟܽܘܢ ܐܳܦܠܳܐ ܚܰܕ ܚܰܟܺܝܡܳܐ܆ ܕܢܶܫܟܰܚ ܢܰܫܘܶܐ ܒܶܝܬ ܐܰܚܳܐ ܠܰܐܚܽܘܗ̱ܝ܀
ܗܽܘ̣ܠܳܠܳܐ ܕܰܩܕܳܡ ܐܶܘܰܢܓܶܠܝܽܘܢ
ܐܶܬܦܰܢ ܡܳܪܝܳܐ ܘܦܰܨܳܗ̇ ܠܢܰܦܫܳܝ̱܆ ܘܰܦܪܽܘܩܰܝܢܝ̱ ܡܶܛܽܠ ܛܰܝܒܽܘܬܳܟ ܗ̄܀
ܐܶܘܰܢܓܶܠܝܽܘܢ ܕܡܰܬܰܝ
(ܛ: ܠܘ ـ ܠܚ܇ ܝ: ܐ ـ ܕ Matthew 9: 36-38, 10: 1-4)
ܟܰܕ ܚܙܳܐ ܕܶܝܢ ܝܶܫܽܘܥ ܠܟܶܢ̈ܫܶܐ܆ ܐܶܬܪܰܚܰܡ ܥܠܰܝܗܽܘܢ. ܕܰܠܐܶܝܢ ܗ̱ܘܰܘ ܘܰܫܪܶܝܢ܆ ܐܰܝܟ ܥܶܪ̈ܒܶܐ ܕܠܰܝܬ ܠܗܽܘܢ ܪܳܥܝܳܐ. ܘܶܐܡܰܪ ܠܬܰܠܡܺܝ̈ܕܰܘܗ̱ܝ܆ ܚܨܳܕܳܐ ܣܰܓܺܝ. ܘܦܳܥ̈ܠܶܐ ܙܥܽܘܪܺܝܢ. ܒܥܰܘ ܗܳܟܺܝܠ ܡܶܢ ܡܳܪܶܐ ܚܨܳܕܳܐ܆ ܕܢܰܦܶܩ ܦܳܥ̈ܠܶܐ ܠܰܚܨܳܕܶܗ ܀ ܘܰܩܪܳܐ ܠܰܬܪܶܥܣܰܪ ܬܰܠܡܺܝ̈ܕܰܘܗ̱ܝ܆ ܘܝܰܗܒ ܠܗܽܘܢ ܫܽܘܠܛܳܢܳܐ ܥܰܠ ܪ̈ܽܘܚܶܐ ܛܰܢ̈ܦܳܬܳܐ ܕܢܰܦܩܽܘܢ܆ ܘܰܠܡܰܐܣܳܝܽܘ ܟܽܠ ܟܺܐܒ ܘܟܽܘܪܗܳܢ. ܕܺܝܠܗܽܘܢ ܕܶܝܢ ܕܰܬܪܶܥܣܰܪ ܫܠܺܝ̈ܚܶܐ܆ ܫܡ̈ܳܗܶܐ ܐܺܝܬܰܝܗܽܘܢ ܗܳܠܶܝܢ. ܩܰܕܡܳܝܗܽܘܢ. ܫܶܡܥܽܘܢ ܕܡܶܬܩܪܶܐ ܟܺܐܦܳܐ. ܘܰܐܢܕܪܶܐܘܳܣ ܐܰܚܽܘܗ̱ܝ. ܘܝܰܥܩܽܘܒ ܒܰܪ ܙܰܒܕܰܝ. ܘܝܽܘܚܰܢܳܢ ܐܰܚܽܘܗ̱ܝ. ܘܦܺܝܠܺܝܦܳܘܣ. ܘܒܰܪ ܬܽܘܠܡܰܝ. ܘܬܳܐܘܡܰܐ. ܘܡܰܬܰܝ ܡܳܟܣܳܐ. ܘܝܰܥܩܽܘܒ ܒܰܪ ܚܰܠܦܰܝ. ܘܠܰܒܺܝ ܕܶܐܬܟܰܢܺܝ ܬܰܕܰܝ. ܘܫܶܡܥܽܘܢ ܩܢܳܢܳܝܳܐ. ܘܺܝܗܽܘܕܳܐ ܣܟܰܪܝܽܘܛܳܐ ܗܰܘ ܕܰܐܫܠܡܶܗ ܀
ܡܫܡ: ܢܩܽܘܡ ܫܰܦܺܝܪ ܟܽܠܰܢ ܒܰܚܦܺܝܛܽܘܬܳܐ: ܘܰܒܩ̈ܳܠܶܐ ܕܰܡܪܰܥܶܝܢ ܠܰܐܠܳܗܳܐ ܢܶܥܢܶܐ ܘܢܺܐܡܰܪ܆
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܡ: ܚܠܳܦ ܥܰܒܕܶܗ ܕܰܐܠܳܗܳܐ (ܦܠܳܢ) ܘܩܽܘܒܳܠ ܛܰܝܒܽܘܬܶܗ. ܬܽܘܒ ܕܶܝܢ ܘܰܐܝܟܰܢܳܐ ܕܰܒܝܰܕ ܡܶܫܚܳܐ ܗܳܢܳܐ ܢܶܬܩܰܕܰܫ ܘܢܶܬܕܰܟܶܐ ܘܢܶܬܚܰܣܶܐ ܡܶܢ ܟܽܠܳܗ̇ ܛܰܡܐܽܘܬܳܐ ܕܒܶܣܪܳܐ ܘܰܕܪܽܘܚܳܐ ܘܡܶܢ ܟܽܠܗܶܝܢ ܫܟܺܝܪ̈ܳܬܳܐ ܕܰܚܛܺܝܬܳܐ. ܠܡܳܪܝܳܐ ܢܶܬܟܰܫܰܦ.
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܡ: ܫܽܘܒܚܳܐ ܠܳܟ ܐܰܠܳܗܳܐ ܕܨܳܒܶܐ ܒܡܶܬܦܰܢܝܳܢܽܘܬܳܐ ܕܚܰܛܳܝ̈ܶܐ ܕܰܠܘܳܬܳܟ. ܫܒܽܘܩ ܠܶܗ ܠܥܰܒܕܳܟ (ܦܠܳܢ) ܟܽܠܗܽܘܢ ܒܽܘܨܳܪ̈ܰܘܗܝ. ܘܗܰܒ ܠܶܗ ܕܢܶܣܰܒ ܫܽܘܒܩܳܢܳܐ ܕܰܚܛܳܗ̈ܶܐ ܘܚܰܝ̈ܶܐ ܕܰܠܥܳܠܰܡ. ܠܳܟ ܡܶܬܟܰܫܦܺܝܢܰܢ.
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܡ: ܝܳܗܽܘܒܳܐ ܕܥܽܘܕܪ̈ܳܢܶܐ ܘܰܡܬܰܪܣܝܳܢܳܐ ܕܟܽܠ ܐܰܠܳܗܳܐ܆ ܒܰܪܶܟ ܟܠܺܝܠܳܐ ܕܫܰܢ̱ܬܳܐ ܒܛܰܝܒܽܘܬܳܟ ܗܳܝ ܕܰܡܡܰܠܝܳܐ ܘܰܡܣܰܒܥܳܐ ܠܟܽܠ. ܘܰܐܪܡܳܐ ܫܰܝܢܳܐ ܘܰܫܠܳܡܳܐ ܐܰܡܺܝܢܳܐ ܒܥܺܕ̈ܳܬܳܐ ܕܺܝܠܳܟ ܩܰܕܺܝ̈ܫܳܬܳܐ. ܠܳܟ ܡܶܬܟܰܫܦܺܝܢܰܢ ܘܡܶܢܳܟ ܒܳܥܶܝܢܰܢ.
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܡ: ܡܳܪܝܳܐ ܐܰܠܳܗܳܐ ܕܺܝܠܰܢ ܗܰܘ ܕܝܳܕܰܥ ܐܰܢ̱ܬ ܣܽܘܢܩܳܢܳܐ ܕܰܓܒܺܝܠܬܳܟ: ܫܰܟܶܢ ܠܰܢ ܡܽܘܙܳܓ̈ܶܐ ܡܰܘܬܪ̈ܳܢܶܐ ܕܳܐܐܰܪ ܘܰܡܫܰܪܬܚܽܘܬܳܐ ܕܦܺܐܪ̈ܶܐ. ܥܰܝ̈ܢܶܐ ܓܶܝܪ ܕܟܽܠ ܒܣܰܪ ܠܘܳܬܳܟ ܚܳܝܪ̈ܳܢ. ܘܰܐܢ̱ܬ ܝܳܗܶܒ ܐܰܢ̱ܬ ܬܽܘܪܣܳܝܗܽܘܢ ܒܫܰܦܺܝܪܽܘܬ ܙܰܒܢܳܐ. ܠܳܟ ܡܶܬܟܰܫܦܺܝܢܰܢ.
ܥܰܡܳܐ: ܩܽܘܪܝܶܐܠܰܝܣܳܘܢ܀
ܡܫܡ: ܐܰܠܳܗܳܐ ܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ ܘܪ̈ܰܚܡܶܐ: ܒܰܪܶܟ ♱ ܠܟܳܗ̈ܢܰܝܟ ܘܠܰܡܫܰܡ̈ܫܳܢܰܝܟ ܘܰܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܩܰܕܺܝܫܬܳܐ. ܘܰܐܫܪܳܐ ܛܰܝܒܽܘܬܳܟ ܘܒܽܘܪܟܬܳܟ ܫܡܰܝܳܢܺܝܬܳܐ ܒܥܽܘܡܪܳܐ ܗܳܢܳܐ ܘܰܒܟܽܠܗܽܘܢ ܥܽܘܡܪ̈ܶܐ ܕܰܡܗܰܝ̈ܡܢܶܐ. ܘܢܰܛܰܪ ܘܫܰܘܙܶܒ ܠܥܳܡܽܘܪ̈ܰܘܗܝ ܡܶܢ ܟܽܠ ܢܶܟ̈ܝܳܢܺܝܢ ܕܢܰܦܫܳܐ ܘܰܕܦܰܓܪܳܐ ܘܰܕܪܽܘܚܳܐ. ܠܳܟ ܡܶܬܟܰܫܦܺܝܢܰܢ ܘܡܶܢܳܟ ܒܳܥܶܝܢܰܢ.
ܥܰܡܳܐ: ܩܽܘܪܝܶܐܠܰܝܣܳܘܢ܀
ܗܳܪܟܳܐ ܚܳܬܶܡ ܟܳܗܢܳܐ ܠܬܰܝܳܒܳܐ ܒܡܶܫܚܳܐ ܬܠܳܬܳܐ ܨܠܺܝ̈ܒܶܐ ܥܰܠ ܒܶܝܬ ܥܰܝܢܰܘ̈ܗܝ ܘܳܐܡܰܪ:
ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ ܟܽܠܗܽܘܢ ܚܽܘܫܳܒ̈ܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀
ܬܽܘܒ ܬܠܳܬܳܐ ܨܠܺܝ̈ܒܶܐ ܥܰܠ ܚܰܕܝܶܗ ܟܰܕ ܐܳܡܰܪ:
ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ ܟܽܠܗܽܘܢ ܚܽܘܫܳܒ̈ܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀
ܬܽܘܒ ܬܠܳܬܳܐ ܨܠܺܝ̈ܒܶܐ ܥܰܠ ܒܽܘܪ̈ܟܶܐ ܕܪ̈ܶܓܠܰܘܗܝ ܟܺܝܬ ܬܪܺܝܢ ܨܠܺܝ̈ܒܶܐ ܥܰܠ ܝܰܡܺܝܢܳܝܬܳܐ ܘܚܰܕ ܨܠܺܝܒܳܐ ܥܰܠ ܣܶܡܳܠܳܝܬܳܐ ܟܰܕ ܐܳܡܰܪ:
ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ ܟܽܠܗܽܘܢ ܚܽܘܫܳܒ̈ܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀
ܨܠܽܘܬܳܐ ܕܚܽܘܬܳܡܳܐ
ܡܳܪܝܳܐ ܐܰܠܳܗܳܐ ܩܰܕܺܝܫܳܐ ܘܦܳܪܽܘܩܳܐ ܘܰܐܚܺܝܕ ܟܽܠ܆ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ܆ ܗܰܘ ܕܪܳܕܶܐ ܘܰܠܡܰܘܬܳܐ ܠܳܐ ܡܰܫܠܶܡ: ܗܰܘ ܕܰܡܩܺܝܡ ܠܫܰܦ̈ܠܶܐ ܘܣܳܚܶܦ ܟܽܘܪ̈ܣܰܘܳܬܳܐ ܕܪ̈ܳܡܶܐ ܘܡܰܫܩ̈ܠܶܐ: ܡܶܬܟܰܫܦܺܝܢܰܢ ܠܳܟ. ܒܝܰܕ ܪ̈ܰܚܡܰܝܟ ܣܰܓܺܝ̈ܐܶܐ ܕܰܫܦܺܝܥܺܝܢ ܥܠܰܝܢ. ܚܽܘܣ ܥܰܠ ܥܰܒܕܰܝ̈ܟ ܡܚܺܝ̈ܠܶܐ ܘܕܳܘ̈ܰܝܳܐ ܚܬܺܝ̈ܡܰܝ ܒܰܫܡܳܟ ܩܰܕܺܝܫܳܐ ܘܰܫܩܺܝ̈ܠܰܝ ܦܰܓܪܳܟ ܩܰܕܺܝܫܳܐ ܘܰܕܡܳܟ ܡܚܰܣܝܳܢܳܐ. ܚܽܘܢ ܠܰܢ ܘܳܐܦ ܠܥܰܒܕܰܟ (ܦܠܳܢ) ܡܳܪܝܳܐ ܕܗܳܫܳܐ ܡܶܬܓܰܘܰܣ ܒܰܫܡܳܟ ܩܰܕܺܝܫܳܐ. ܐܰܫܪܳܐ ܥܠܰܘܗܝ ܒܽܘܪ̈ܟܳܬܳܟ. ܘܰܐܫܦܰܥ ܥܠܰܘܗܝ ܪ̈ܰܚܡܰܝܟ ܘܰܚܢܳܢܳܟ. ܘܰܐܚܠܶܡܳܝܗܝ ܡܶܢ ܟܽܠܗܽܘܢ ܟܺܐܒ̈ܶܐ ܘܟܽܘܪ̈ܗܳܢܶܐ ܕܢܰܦܫܳܐ ܘܰܕܦܰܓܪܳܐ. ܘܫܰܘܙܶܒܳܝܗܝ ܡܶܢ ܛܠܽܘܡܝܳܐ ܘܰܥܫܽܘܡܝܳܐ ܕܫܺܐܕ̈ܶܐ ܘܰܕܪ̈ܘܚܶܐ ܒܺܝ̈ܫܳܬܳܐ: ܒܝܰܕ ܚܰܝܠܳܐ ܕܪܽܘܚܳܟ ܩܰܕܺܝܫܳܐ: ܘܰܒܝܰܕ ܐܳܬܳܐ ܕܰܨܠܺܝܒܳܟ ܙܰܟܳܝܳܐ ܘܦܳܪܽܘܩܳܝܳܐ: ܘܒܰܨܠܽܘܬ ܡܰܪܝܰܡ ܐܶܡܳܟ ܩܰܕܺܝܫܬܳܐ܆ ܘܒܰܨܠܽܘܬ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܩܰܕܺܝ̈ܫܶܐ. ܐܰܡܺܝܢ܀
ܫܠܡ ܛܟܣܐ ܬܫܡܫܬܐ ܕܬܠܬ