ܛܶܟܣܳܐ ܩܦܺܝܣܳܐ ܕܰܡܫܳܚܳܐ ܕܰܟܪ̈ܺܝܗܶܐ

ܟܳܗܢܳܐ ܕܰܡܫܰܡܠܶܐ ܠܶܗ ܠܐ̱ܪܳܙܳܐ ܗܳܢܳܐ ܡܶܬܦܢܶܐ ܠܰܐܦܰܝ̈ ܟܪܺܝܗܳܐ ܘܰܡܫܰܒܰܚ:

ܨܠܽܘܬܳܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ.

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܆ ܐܰܡܺܝܢ܀

ܟܳܗܢܳܐ: ܣܥܽܘܪ ܡܳܪܝܳܐ ܠܰܐܠܺܝ̈ܨܶܐ ܒܰܚܢܳܢܳܟ܆ ܘܰܐܣܳܐ ܠܰܟܪ̈ܺܝܗܶܐ ܒܛܰܝܒܽܘܬܳܟ. ܘܒܰܝܰܐ ܠܰܥܝܺܝ̈ܩܰܝ ܪܽܘܚܳܐ ܒܰܡܪܰܚܡܳܢܽܘܬܳܟ. ܘܫܰܕܰܪ ܚܽܘܠܡܳܢܳܐ ܕܢܰܦܫܳܐ ܘܰܕܦܰܓܪܳܐ ܠܟܽܠܗܶܝܢ ܢܰܦܫ̈ܳܬܳܐ ܨܰܗ̈ܝܳܬܳܐ ܘܰܡܛܰܪ̈ܦܳܬܳܐ ܕܫ̈ܳܐܠܳܢ ܡܶܢܳܟ ܪ̈ܰܚܡܶܐ ܘܰܚܢܳܢܳܐ ܕܢܰܘܕܽܘܢ ܠܳܟ ܥܰܠ ܛܳܒ̈ܳܬܳܟ܆ ܐܰܒܳܐ ♱ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܽܘܩܠܺܝܽܘܢ ܒܪܶܟܢܳܐ ܫܬܺܝܬܳܝܳܐ

ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ̱ ܗ̄ ܐܳܦܠܳܐ ܒܚܶܡܬܳܟ ܬܶܪܕܶܝܢܝ̱܀

ܪܰܚܶܡܥܠܰܝ ܡܳܪܝܳܐ ܡܶܛܽܠ ܕܰܟܪܺܝܗ ܐ̱ܢܳܐ ܗ̄ ܐܰܣܳܢܝ̱ ܡܳܪܝܳܐ ܡܶܛܽܠ ܕܙܳܥܘ̱ ܓܰܪ̈ܡܰܝ܀

ܢܰܦܫܝ̱ ܐܶܬܬܙܺܝܥܰܬ ܛܳܒ ܗ̄ ܘܰܐܢ̱ܬ ܡܳܪܝܳܐ ܥܕܰܡܳܐ ܠܶܐܡܰܬܝ̱܀

ܐܶܬܦܰܢ ܡܳܪܝܳܐ ܘܦܰܨܳܗ̇ ܠܢܰܦܫܝ̱ ܗ̄ ܘܰܦܪܽܘܩܰܝܢܝ̱ ܡܶܛܽܠ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܒܰܪܶܟܡܳܪܝ̱܀

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܥܶܩܒܳܐ: ܒܩ̄ ܓܥܺܝܬ ܒܽܐܘܠ̈ܨܳܢܰܝ

ܓܥܺܝܬ ܒܽܐܘܠ̈ܨܳܢܰܝ ܘܰܒ̈ܥܳܩܳܬܝ̱ ܠܘܳܬܳܟ ܡܠܶܐ ܪ̈ܰܚܡܶܐ ܘܰܚܢܳܢܳܐ. ܪܳܚܶܡ ܐ̱ܢܳܫ̈ܳܐ ܐܰܠܳܗܳܐ ܕܰܠܳܢܝ̱ ܘܰܐܣܶܩܰܝܢܝ̱ ܡܶܢ ܥܽܘܡܩܳܐ ܕܰܚ̈ܛܳܗܰܝ ܣܰܓܺܝ̈ܶܐܐ܆ ܘܪܰܚܶܡܥܠܰܝ܀

ܡܫܰܡ̈ܫܳܢܶܐ: ܣ‍ܛܰܘܡܶܢܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ܆ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܆ ܐܰܡܺܝܢܳܐܺܝܬ ܒܰܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܠܗܰܘ ܣܳܥܽܘܪܳܐ ܕܢܰܦ̈ܫܳܬܳܐ ܡܚܺܝ̈ܠܳܬܳܐ ܘܒܳܚܽܘܪܳܐ ܕܟܰܣ̈ܝܳܬܳܐ. ܠܗܰܘ ܡܦܰܢܝܳܢܳܐ ܕܫܶܐܠܳــ̈ܬܳܐ ܛܳܒ̈ܳܬܳܐ܆ ܠܗܰܘ ܡܒܰܝܳܐܢܳܐ ܕܰܐܒܺܝ̈ܠܶܐ ܘܰܡܠܰܒܒܳܢܳܐ ܕܰܡ̈ܥܳܩܶܐ. ܠܗܰܘ ܡܣܰܡܟܳܢܳܐ ܕܰܡܚܺܝ̈ܠܶܐ ܘܝܳܗܶܒ ܠܰܟܪ̈ܺܝܗܶܐ ܚܽܘܠܡܳܢܳܐ. ܠܗܰܘ ܡܬܰܠܡܕܳܢܳܐ ܘܰܡܩܰܒܠܳܢܳܐ ܕܬܰܝܳܒ̈ܶܐ ܘܰܡܢܰܚܡܳܢܳܐ ܕܥܰܢܺܝ̈ܕܶܐ. ܠܗܰܘ ܕܡܶܢܶܗ ܫܳܐܠܺܝܢܰܢ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ܆ ܠܰܢ ܘܠܰܐܝܠܶܝܢ ܕܫܶܐܠܘ̱ ܘܫܳܐܠܺܝܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܒܗܰܝܡܳܢܽܘܬܳܐ ܕܰܫܪܳܪܳܐ܆ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܰܬܝܳܒܽܘܬܳܐ ܕܥܰܒܕܶܗ (ܕܰܐܡܬܶܗ) ܕܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܗܰܘ ܐܳܣܝܳܐ ܛܳܒܳܐ ܘܫܰܪܺܝܪܳܐ܆ ܗܰܘ ܕܟܽܠܗܽܘܢ ܟܺܐܒ̈ܶܐ ܟܣܰܝ̈ܳܐ ܘܰܓ̈ܠܰܝܳܐ ܕܢܰܦܫܳܐ ܘܰܕܦܰܓܪܳܐ ܦܫܺܝܩܺܝܢ ܠܶܗ܆ ܘܟܽܠܗܶܝܢ ܥܰܛ̈ܠܳܬܳܐ ܘܟܰܣ̈ܝܳܬܳܐ ܘܓܰܠ̈ܝܳܬܳܐ ܕܠܺܝ̈ܠܳܢ ܠܶܗ. ܐܳܦ ܗܳܫܳܐ ܡܶܬܟܰܫܦܺܝܢܰܢ ܠܰܡܪܰܚܡܳܢܽܘܬܳܟ ܚܠܳܦ ܥܰܒܕܳܟ ܗܳܢܳܐ (ܦܠܳܢ) ܕܺܐܝܬܰܘܗ̱ܝ (ܐܰܡܬܳܟ ܗܳܕܶܐ ܦܠܳܢܺܝܬ ܕܺܐܝܬܶܝܗ̇) ܒܰܡܚܺܝܠܽܘܬܳܐ ܘܰܪܡܶܐ (ܘܪܰܡܝܳܐ) ܒܟܽܘܪܗܳܢܳܐ ܘܡܶܬܓܰܘܰܣ (ܘܡܶܬܓܰܘܣܳܐ) ܒܪ̈ܰܚܡܰܝܟ ܘܰܡܣܰܟܶܐ (ܘܰܡܣܰܟܝܳܐ) ܠܥܽܘܕܪܳܢܳܐ ܕܡܰܘܗ̈ܒܳܬܳܟ ܘܫܳܐܶܠ (ܘܫܳܐܠܳܐ) ܡܶܢܳܟ ܚܽܘܣܳܝܳܐ ܕܚܰܘܒܰܘ̈ܗ̱ܝ (ܕܚܰܘ̈ܒܶܝܗ̇) ܘܫܽܘܒܩܳܢܳܐ ܕܰܚܛܳܗܰܘ̈ܗ̱ܝ (ܕܰܚܛܳܗܶܝ̈ܗ̇) ܘܚܽܘܠܡܳܢܳܐ ܕܟܺܐܒܰܘ̈ܗ̱ܝ (ܕܟܺܐܒܶܝ̈ܗ̇) ܘܳܐܣܝܽܘܬܳܐ ܕܗܰܕܳܡܰܘ̈ܗ̱ܝ (ܕܗܰܕܳܡܶܝ̈ܗ̇) ܒܺܐܝ̈ܕܰܝ ܡܚܺܝܠܽܘܬܳܐ ܘܚܰܛܳܝܽܘܬܳܐ ܕܺܝܠܝ̱. ܐܶܠܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܡܪܰܚܡܳܢܳܐ: ܐܰܢ̱ܬܽ ܗ̱ܘ ܡܚܰܝܠܳܢܳܐ ܕܰܡܚܺܝ̈ܠܶܐ܆ ܐܰܢ̱ܬܽ ܗ̱ܘ ܡܚܰܣܝܳܢܳܐ ܕܚܰܛܳܝ̈ܶܐ܆ ܐܺܝܳܠܳܐ ܕܬܰܝ̈ܳܒܶܐ܆ ܚܰܝܠܳܐ ܕܰܡܛܰܪ̈ܦܶܐ ܘܒܶܝܬ ܓܰܘܣܳܐ ܕܟܽܠܗܽܘܢ ܡܗܰܝ̈ܡܢܶܐ. ܚܰܣܳܐ ܚܰܘܒܰܘ̈ܗ̱ܝ (ܚܰܘ̈ܒܶܝܗ̇) ܘܰܫܒܽܘܩ ܚܛܳܗܰܘ̈ܗ̱ܝ (ܚܛܳܗܶܝ̈ܗ̇) ܕܥܰܒܕܳܟ ܗܳܢܳܐ (ܦܠܳܢ) (ܕܰܐܡܬܳܟ ܗܳܕܶܐ ܦܠܳܢܺܝܬ) ܟܺܐܝ ܒܟܺܐܒܰܘ̈ܗ̱ܝ (ܒܟܺܐܒܶܝ̈ܗ̇) ܘܒܰܛܶܠ ܟܽܘܪ̈ܗܳܢܰܘܗ̱ܝ (ܟܽܘܪ̈ܗܳܢܶܝܗ̇). ܕܰܥܶܟ ܐܶܫܳܬܶܗ (ܐܶܫܳܬܳܗ̇) ܘܰܪܕܽܘܦ ܐܽܘܠ̈ܨܳܢܰܘܗ̱ܝ (ܐܽܘܠ̈ܨܳܢܶܝܗ̇). ܣܡܽܘܟ ܡܚܺܝܠܽܘܬܶܗ (ܡܚܺܝܠܽܘܬܳܗ̇). ܘܚܰܝܶܠ ܢܰܣܺܝܣܽܘܬܶܗ (ܢܰܣܺܝܣܽܘܬܳܗ̇). ܐܰܦܨܰܚ ܟܡܺܝܪܽܘܬܶܗ (ܟܡܺܝܪܽܘܬܳܗ̇). ܘܚܰܕܳܐ ܠܰܢ ܒܚܽܘܠܡܳܢܶܗ (ܒܚܽܘܠܡܳܢܳܗ̇). ܐܰܝܟܰܢܳܐ ܕܰܢܩܽܘܡ ܘܢܰܘܕܶܐ (ܕܰܬܩܽܘܡ ܘܬܰܘܕܶܐ) ܠܳܟ ܥܰܠ ܐܰܦܰܝ̈ ܟܽܠܗܶܝܢ ܛܰܝ̈ܒܘܳܬܳܟ ܘܥܽܘܕܪ̈ܳܢܰܝܟ ܕܰܠܘܳܬܶܗ (ܕܰܠܘܳܬܳܗ̇). ܡܶܛܽܠ ܕܰܐܢ̱ܬܽ ܗ̱ܘ ܛܳܒܳܐ ܘܒܰܣܺܝܡܳܐ ܘܚܰܢܳܢܳܐ ܘܰܡܪܰܚܡܳܢܳܐ ܘܳܐܣܝܳܐ ܫܰܪܺܝܪܳܐ ܕܢܰܦܫܳܐ ܘܰܕܦܰܓܪܳܐ. ܘܠܳܟ ܦܶܐܐ ܟܽܠ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܐܰܠܳܗܳܐ ܐܰܒܳܐ܆ ܘܠܺܝܚܺܝܕܳܝܳܐ ܒܪܳܐ ܕܺܝܠܳܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܐܰܡܺܝܢ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܠܐ: ܒܩ̄ ܠܰܬܚܽܘܡܳܐ ܕܗܰܝܡܳܢܽܘܬܳܐ
ܠܳܐ ܡܳܪܝ ܐܶܡܽܘܬ ܒܰܚ̈ܛܳܗܰܝ (ܒܪܶܟܢܳܐ ܫܬܺܝܬܳܝܳܐ)

ܠܝܰܡܐ ܕܪ̈ܰܚܡܰܝܟ ܚܳܐܰܪ ܐ̱ܢܳܐ. ܝܺܚܺܝܕܳܝܳܐ ܐܰ‌ܠܳܗܳܐ ܕܰܣܓܺܝܘ ܚܰܘ̈ܒܰܝ. ܘܰܥܫܶܢܘ ܒܽܘܨܳܪ̈ܰܝ. ܪܽܘܣ ܥܠܰܝ ܒܙܽܘܦܳܟ ܕܰܟܝܳܐ. ܘܚܰܠܶܠܰܝܢܝ̱ ܒܕܶܡ̈ܥܶܐ ܕܥܰܝ̈ܢܰܝ. ܒܳܥܶܐ ܐ̱ܢܳܐ ܡܳܪܝ ܒܚܽܘܒܶܗ ܕܝܳܠܽܘܕܳܟ. ܠܳܐ ܢܰܗܠܽܘܢ ܒܺܝ ܣܳܩܽܘܪ̈ܰܝ. ܐܶܠܳܐ ܢܶܚܕܽܘܢ ܡܰܠܐܟ̈ܶܐ ܒܚܰܕ ܚܰܛܳܝܳܐ. ܕܬܳܐܶܒ ܡܶܢ ܥܰܘܠܶܗ. ܘܢܺܐܡܪܽܘܢ ܕܰܒܪܺܝܟܽ ܗ̱ܘ ܡܳܪܝܳܐ: ܕܰܦܬܺܝܚ ܬܰܪܥܶܗ ܠܬܰܝܳܒ̈ܶܐ ܗ̄ ܒܠܺܠܝܳܐ ܘܒܺܐܝܡܳܡܳܐ܀

ܐܰܢ̱ܬ ܡܳܪܰܢ ܚܽܘܪ ܒܰܡܚܺܝܠܽܘܬܝ. ܕܰܚܛܺܝܬ ܣܰܓܺܝ ܘܰܐܪܓܶܙܬܳܟ. ܘܠܳܐ ܝܳܕܰܥ ܐ̱ܢܳܐ ܒܡܰܢܽܘ ܐܶܬܓܰܘܰܣ. ܩܶܪܒܶܬ ܨܶܝܕ ܐܳܣܰܘ̈ܳܬܳܐ. ܘܰܐܘܦܺܝܘ ܒܺܝ ܣܰܡ̱ܡܳܢܰܝ̈ܗܽܘܢ. ܘܫܽܘܚܢܳܐ ܡܰܪܺܝܪ. ܘܠܰܝܬ ܠܶܗ ܥܳܨܽܘܒܳܐ. ܫܶܡܥܶܬ ܒܳܟ ܐܳܣܝܳܐ ܛܳܒܳܐ. ܕܺܐܝܬ ܠܳܟ ܣܰܓܺܝ ܣܰܡ̱̈ܡܳܢܶܐ ܘܰܕܩܳܪܶܒ ܠܳܟ ܢܳܣܶܒ ܥܽܘܕܪ̈ܳܢܶܐ. ܒܚܽܘܒܶܗ ܕܰܐܒܳܐ ܝܳܠܽܘܕܳܟ. ܘܒܰܨܠܽܘܬܳܐ ܕܗܳܝ ܕܝܳܠܶܕܬܳܟ ܗ̄ ܚܰܣܳܐ ܠܺܝ ܚܰܘ̈ܒܰܝ܀

ܫܽܘܒܚܳܐ: ܪܓܺܝܓ ܗ̱ܘܳܐ ܩܳܠܳܗ̇ ܕܚܰܛܳܝܬܳܐ܆ ܟܰܕ ܐܳܡܪܳܐ ܠܶܗ ܠܒܰܣܳܡܳܐ܆ ܕܗܰܒ ܠܺܝ ܡܶܫܚܳܐ ܘܣܰܒ ܕܰܗܒܳܐ ܛܺܝܡܰܘ̈ܗ̱ܝ. ܡܶܫܚܳܐ ܪܺܝܫܳܝܳܐ ܗܰܒ ܠܺܝ܆ ܕܶܐܚܠܽܘܛ ܒܶܗ ܕܶܡ̈ܥܶܐ ܕܥܰܝ̈ܢܰܝ܆ ܘܺܐܙܰܠ ܐܶܡܫܽܘܚ ܠܒܽܘܟܪܶܗ ܕܥܶܠܳܝܳܐ. ܘܰܬܟܺܝܠܳܢ ܥܰܠ ܐܰܠܳܗܳܐ܆ ܕܗܳܢ ܡܶܫܚܳܐ ܕܫܳܩܠܳܢ ܡܶܢܳܟ܆ ܒܶܗ ܡܶܫܬܰܒܩܺܝܢ ܚܰܘ̈ܒܰܝ ܘܰܚ̈ܛܳܗܰܝ. ܘܟܰܕ ܫܶܩܠܰܬ ܡܶܫܚܳܐ ܘܶܐܙܰܠ̱ܬ܆ ܚܙܳܐ ܡܳܪܰܢ ܗܰܝܡܳܢܽܘܬܳܗ̇ ܗ̄ ܘܰܫܒܰܩ ܠܳܗ̇ ܚܰܘܒܶܝ̈ܗ̇܀

ܡܶܢ ܥܳܠܰܡ: ܠܳܐ ܡܳܪܝ̱ ܐܶܡܽܘܬ ܒܰܚ̈ܛܳܗܰܝ܆ ܡܶܢ ܗܳܪܟܳܐ ܡܩܰܪܶܒ ܐ̱ܢܳܐ ܠܳܟ܆ ܕܶܡ̈ܥܶܐ ܕܥܰܝ̈ܢܰܝ ܫܽܘܚܕܳܐ ܕܪܳܚܶܡ ܐܰܢ̱ܬ. ܘܠܳܐ ܬܰܘܪ̈ܶܐ ܡܩܰܪܶܒ ܐ̱ܢܳܐ ܠܳܟ܆ ܘܠܳܐ ܐܶܡܪ̈ܶܐ ܘܳܐܦܠܳܐ ܓ̈ܕܰܝܳܐ܆ ܘܠܳܐ ܫܽܘܦܢܺܝ̈ܢܶܐ ܘܳܐܦܠܳܐ ܒܢܰܝ̈ ܝܰܘ̈ܢܶܐ. ܬܰܪܬܶܝܢ ܛܽܘܦܺܝ̈ܢ ܡܶܢ ܥܰܝ̈ܢܰܝ܆ ܐܰܝܟ ܚܰܛܳܝܬܳܐ ܕܒܶܝܬ ܫܶܡܥܽܘܢ܆ ܩܰܒܶܠ ܐܶܢܶܝܢ ܘܶܐܬܪܰܚܡܥܠܰܝ. ܒܚܽܘܒܶܗ ܕܰܐܒܳܐ ܝܳܠܽܘܕܳܟ܆ ܘܒܰܨܠܽܘܬܳܗ̇ ܕܗܳܝ ܕܺܝܠܶܕܬܳܟ ܗ̄ ܚܰܣܳܐ ܠܺܝ ܚܰܘ̈ܒܰܝ܀

ܡܳܪܝܳܐ ܡܪܰܚܡܳܢܳܐ ܪܰܚܶܡ ܥܠܰܝܢ ܘܥܰܕܰܪܰܝܢ

ܦܺܝܪܡܳܐ

ܡܳܪܝܳܐ ܐܰܠܳܗܳܐ ܡܳܪܳܐ ܕܟܽܠܳܗ̇ ܐܳܣܝܽܘܬܳܐ ܘܝܳܗܽܘܒܳܐ ܕܟܽܠܳܗ̇ ܛܰܝܒܽܘܬܳܐ܆ ܘܩܰܕܺܝܫܽܘܬܳܐ ܘܰܡܫܰܟܢܳܢܳܐ ܕܟܽܠܳܗ̇ ܚܠܺܝܡܽܘܬܳܐ܆ ܡܰܢ ܕܰܒܟܽܠܙܒܰܢ ܒܛܺܝܠ ܠܶܗ ܥܰܠ ܚܰܝ̈ܶܐ ܕܰܒܢܰܝ̈ܢܳܫܳܐ܆ ܘܠܳܐ ܟܳܠܶܐ ܡܶܢܰܢ ܥܽܘܕܪ̈ܳܢܰܘܗ̱ܝ ܐܰܠܳܗܳܝ̈ܶܐ. ܐܰܢ̱ܬ ܡܳܪܝܳܐ ܐܰܠܳܗܳܐ ܐܰܓܶܢ ܥܠܰܘܗ̱ܝ (ܥܠܶܝܗ̇) ܝܰܡܺܝܢܳܟ ܗܳܝ ܕܡܰܠܝܳܐ ܪ̈ܰܚܡܶܐ ܘܰܚܢܳܢܳܐ܆ ܘܳܐܣܝܽܘܬܳܐ ܘܰܢܦܺܐܫܳܐ ܘܠܽܘܒܳܒܳܐ ܘܥܽܘܕܪܳܢܳܐ ܥܰܠ ܗܳܢܳܐ ܥܰܒܕܳܟ (ܦܠܳܢ) (ܐܰܡܬܳܟ ܗܳܕܶܐ ܦܠܳܢܺܝܬ) ܕܫܳܐܶܠ (ܕܫܳܐܠܳܐ) ܡܶܢܳܟ ܚܽܘܠܡܳܢܳܐ ܘܳܐܣܝܽܘܬܳܐ ܕܢܰܦܫܳܐ ܘܰܕܦܰܓܪܳܐ. ܘܒܰܛܶܠ ܡܶܢܶܗ (ܡܶܢܳܗ̇) ܡܳܪܝܳܐ ܡܰܪ̈ܥܶܐ ܘܟܽܘܪ̈ܗܳܢܶܐ ܘܟܺܐܒ̈ܶܐ. ܘܰܐܥܒܰܪ ܡܶܢܶܗ (ܡܶܢܳܗ̇) ܚܰܫ̈ܶܐ ܘܢܶܣܝܽܘ̈ܢܶܐ ܘܰܐܠܒܶܫܳܝܗ̱ܝ (ܘܰܐܠܒܶܫܶܝܗ̇) ܚܰܝܠܳܐ ܘܚܽܘܠܡܳܢܳܐ ܘܦܽܘܪܩܳܢܳܐ ܘܫܽܘܘܙܳܒܳܐ ܘܰܣܡܽܘܟܳܝܗ̱ܝ (ܘܰܣܡܽܘܟܶܝܗ̇) ܕܰܢܩܽܘܡ (ܕܰܬܩܽܘܡ) ܘܢܶܫܬܰܪܰܪ (ܘܬܶܫܬܰܪܰܪ) ܘܗܰܒ ܠܶܗ (ܠܳܗ̇) ܥܽܘܕܪܳܢܳܐ ܒܝܰܡܺܝܢܳܐ ܕܺܝܠܳܟ ܚܰܝܠܬܳܢܺܝܬܳܐ ܘܰܫܒܽܘܩ ܠܶܗ (ܠܳܗ̇) ܚܰܘܒܰܘ̈ܗ̱ܝ (ܚܰܘܒܶܝ̈ܗ̇) ܘܰܚܛܳܗܰܘ̈ܗ̱ܝ (ܘܰܚܛܳܗܶܝ̈ܗ̇). ܘܰܥܒܶܕ ܥܰܡܶܗ (ܥܰܡܳܗ̇) ܐܳܬܳܐ ܛܳܒܬܳܐ ܐܰܝܟ ܣܽܘܓܳܐܐ ܕܛܰܝܒܽܘܬܳܟ ܘܰܕܪ̈ܰܚܡܰܝܟ ܣܰܓܺܝ̈ܶܐܐ ܐܰܝܟܰܢܳܐ ܕܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܙܽܘܡܳܪܳܐ ܕܰܩܕܳܡ ܐܶܓܰܪܬܳܐ ܕܝܰܥܩܽܘܒ ܫܠܺܝܚܳܐ

ܫܠܺܝ̈ܚܶܐ ܓܒܰܝ̈ܳܐ܆ ܕܶܐܫܬܰܕܰܪܘ̱ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ܆ ܘܰܢܦܰܩܘ̱ ܐܰܟܪܶܙܘ̱܆ ܣܒܰܪܬܶܗ ܕܰܒܪܳܐ ܒܶܝܬ ܥܰܡ̱̈ܡܶܐ ܘܥܶܒܪ̈ܶܝܗ̇ ܕܰܐܪܥܳܐ܆ ܣܰܒܰܪܘ̱ ܗ̱ܘܰܘ ܡܰܠܟܽܘܬܳܐ ܕܰܫܡܰܝܳܐ ܟܰܕ ܐܳܡܪܺܝܢ: ܛܽܘܒܳܐ ܠܰܡܗܰܝ̈ܡܢܶܐ܀

ܩܶܪܝܳܢܳܐ:

ܐܶܓܰܪܬܳܐ ܕܝܰܥܩܽܘܒ ܫܠܺܝܚܳܐ
ܗ: ܝܓ ـ ܝܚ James 5:13-18

ܚܰܒܺܝ̈ܒܰܝ: ܘܶܐܢ ܐ̱ܢܳܫ ܡܶܢܟܽܘܢ ܢܶܗܘܶܐ ܒܽܐܘܠܨܳܢܳܐ܆ ܢܶܗܘܶܐ ܡܨܰܠܶܐ. ܘܶܐܢ ܚܳܕܶܐ܆ ܢܶܗܘܶܐ ܡܙܰܡܰܪ. ܘܶܐܢ ܟܪܺܝܗ܆ ܢܶܩܪܶܐ ܠܩܰܫܺܝ̈ܫܶܐ ܕܥܺܕܬܳܐ ܘܰܢܨܰܠܽܘܢ ܥܠܰܘܗ̱ܝ܇ ܘܢܶܡܫܚܽܘܢܶܗ ܡܶܫܚܳܐ ܒܰܫܡܶܗ ܕܡܳܪܰܢ. ܘܰܨܠܽܘܬܳܐ ܕܗܰܝܡܳܢܽܘܬܳܐ ܡܰܚܠܡܳܐ ܠܶܗ ܠܗܰܘ ܕܰܟܪܺܝܗ. ܘܰܡܩܺܝܡ ܠܶܗ ܡܳܪܰܢ. ܘܶܐܢ ܚܛܳܗ̈ܶܐ ܥܒܺܝܕܺܝܢ ܠܶܗ܆ ܡܶܫܬܰܒܩܺܝܢ ܠܶܗ. ܗܘܰܝܬܽܘܢ ܕܶܝܢ ܡܰܘܕܶܝܢ ܣܰܟ̈ܠܘܳܬܟܽܘܢ ܚܰܕ ܠܚܰܕ. ܘܰܗܘܰܝܬܽܘܢ ܡܨܰܠܶܝܢ ܚܰܕ ܥܰܠ ܚܰܕ܆ ܕܬܶܬܰܐܣܽܘܢ. ܪܰܒ ܗ̱ܘ ܓܶܝܪ ܚܰܝܠܳܗ̇ ܕܰܨܠܽܘܬܳܐ ܐܰܝܕܳܐ ܕܙܰܕܺܝܩܳܐ ܡܨܰܠܶܐ ܠܳܗ̇. ܐܳܦ ܐܺܠܺܝܳܐ ܒܰܪܢܳܫܳܐ ܗ̱ܘܳܐ ܚܳܫܽܘܫܳܐ ܐܰܟܘܳܬܰܢ. ܘܨܰܠܺܝ ܕܠܳܐ ܢܶܚܽܘܬ ܡܶܛܪܳܐ ܥܰܠ ܐܰܪܥܳܐ܆ ܘܠܳܐ ܢܚܶܬ ܬܠܳܬ ܫܢܺܝ̈ܢ ܘܶܫܬܳܐ ܝܰܪ̈ܚܺܝܢ. ܘܬܽܘܒ ܨܰܠܺܝ܆ ܘܰܫܡܰܝ̈ܳܐ ܝܰܗ̱ܒܘ̱ ܡܶܛܪܳܐ. ܘܰܐܪܥܳܐ ܝܶܗܒܰܬ ܦܺܐܪ̈ܶܝܗ̇. ܒܰܪܶܟܡܳܪܝ̱܀

ܬܽܘܒ ܙܽܘܡܳܪܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ ܕܳܐܡܰܪ: ܕܶܐܢ ܐ̱ܢܳܫ ܢܺܐܬܶܐ ܢܣܰܒܰܪܟܽܘܢ܆ ܠܒܰܪ ܡܶܢ ܡܳܐ ܕܣܰܒܰܪܢܳܟܽܘܢ܆ ܘܶܐܢ ܡܰܠܰܐܟܰܐ ܗ̱ܘ ܡܶܢ ܪܰܘܡܳܐ܆ ܢܶܗܘܶܐ ܡܰܚܪܰܡ ܡܶܢ ܥܺܕܬܳܐ܆ ܕܗܳܐ ܢܳܒܥܺܝܢ ܠܰܡ ܝܽܘܠ̈ܦܳܢܶܐ ܡܫܰܚܠ̈ܦܶܐ ܡܶܢ ܟܽܠ ܓܰܒܺܝ̈ܢ܆ ܛܽܘܒ ܠܰܐܝܢܳܐ ܕܰܒܝܽܘܠܦܳܢܶܗ ܕܰܐܠܳܗܳܐ ܫܰܪܺܝ ܘܫܰܠܶܡ܀

ܩܶܪܝܳܢܳܐ:

ܐܶܓܰܪܬܳܐ ܕܦܰܘܠܽܘܣ ܫܠܺܝ̣ܚܳܐ ܕܰܠܘܳܬ ܪ̈ܽܗ̱ܘܡܳܝܶܐ
ܝܓ: ܝܐ ـ ܝܕ Romans 13:11-14

ܘܳܐܦ ܗܳܕܶܐ ܕܰܥܘ̱܆ ܕܙܰܒܢܰܐ ܗ̱ܘ ܘܫܳܥܬܳܐ ܗ̱ܝ܂ ܡܶܟܺܝܠ ܕܢܶܬܬܥܺܝܪ ܡܶܢ ܫܶܢܬܰܢ. ܗܳܫܰܐ ܗ̱ܘ ܓܶܝܪ ܐܶܬܩܰܪܰܒܘ̱ ܠܰܢ ܚܰܝܰܝ̈ܢ ܝܰܬܺܝܪ ܡܶܢ ܕܟܰܕ ܗܰܝܡܶܢܢ. ܠܺܠܝܳܐ ܡܶܟܺܝܠ ܥܒܰܪ܂ ܘܺܐܝܡܳܡܳܐ ܩܪܶܒ. ܢܢܺܝܚ ܡܶܢܰܢ ܗܳܟܺܝܠ ܥܒܳܕ̈ܶܐ ܕܚܶܫܽܘܟܳܐ܆ ܘܢܶܠܒܰܫ ܙܰܝܢܶܗ ܕܢܽܘܗܪܳܐ. ܘܰܐܝܟ ܕܒܺܐܝܡܳܡܳܐ ܒܶܐܣܟܺܡܳܐ ܢܗܰܠܶܟ. ܠܳܐ ܒܰܙܡܳܪܳܐ܁ ܘܠܳܐ ܒܪܰܘܳܝܽܘܬܳܐ. ܘܠܳܐ ܒܡܰܕܡܟܳܐ ܛܰܢܦܳܐ. ܘܠܳܐ ܒܰܚܣܳܡܳܐ ܘܰܒܚܶܪܝܳܢܳܐ. ܐܶܠܳܐ ܠܽܘܒܫܽܘܗ̱ܝ ܠܡܳܪܰܢ ܝܶܫܽܘܥ ܡܫܺܝܚܳܐ܆ ܘܠܳܐ ܬܺܐܨܦܽܘܢ ܕܒܶܣܪܟܽܘܢ ܠܰܪ̈ܓܺܝܓܳܬܳܐ܀

ܦܶܬܓܳܡܳܐ ܕܰܩܕܳܡ ܐܶܘܰܢܓܶܠܝܽܘܢ

ܪܰܚܶܡܥܠܰܝ ܐܰܠܳܗܳܐ ܡܶܛܽܠ ܕܒܳܟܽ ܗ̱ܘ ܡܣܰܒܪܳܐ ܢܰܦܫܝ̱. ܘܰܒܛܶܠܳܠܳܐ ܕܟܶܢܦܰܝ̈ܟ ܐܶܣܬܰܬܰܪ ܥܕܰܡܳܐ ܕܢܶܥܒܰܪ ܕܠܽܘܚܝܳܐ ܗ̄܀

ܐܶܘܰܢܓܶܠܝܽܘܢ ܕܡܰܬܰܝ
(ܝ: ܗ ـ ܝܗ Matthew 10: 5-15)

ܠܗܳܠܶܝܢ ܬܪ̈ܶܥܣܰܪ ܫܰܕܰܪ ܝܶܫܽܘܥ܆ ܘܦܰܩܶܕ ܐܶܢܽܘܢ܂ ܘܶܐܡܰܪ. ܒܽܐܘܪܚܳܐ ܕܚܰܢ̈ܦܶܐ ܠܳܐ ܬܺܐܙܽܠ̱ܘܢ. ܘܠܰܡܕܺܝܢ̱ܬܳܐ ܕܫܳܡܪ̈ܳܝܶܐ ܠܳܐ ܬܶܥܠܽܘܢ. ܙܶܠܘ̱ ܠܟܽܘܢ ܕܶܝܢ ܝܰܬܺܝܪܳܐܺܝܬ܆ ܠܘܳܬ ܥܶܪ̈ܒܶܐ ܕܶܐܒܰܕܘ̱ ܡܶܢ ܒܶܝܬ ܝܺܣܪܳܐܶܝܠ. ܘܟܰܕ ܐܳܙܺܠ̱ܝܢ ܐܢ̱ܬܽܘܢ ܐܰܟܪܶܙܘ̱܂ ܘܶܐܡܰܪܘ̱. ܕܩܶܪܒܰܬ ܡܰܠܟܽܘܬܳܐ ܕܰܫܡܰܝܳܐ. ܟܪ̈ܺܝܗܶܐ ܐܰܣܰܘ ܘܓܰܪ̈ܒܶܐ ܕܰܟܰܘ܂ ܘܕܰܝ̈ܘܶܐ ܐܰܦܶܩܘ̱. ܡܰܓܳܢ ܢܣܰܒܬܽܘܢ܂ ܡܰܓܳܢ ܗܰܒܘ̱܀ ܠܳܐ ܬܶܩܢܽܘܢ ܕܰܗܒܳܐ ܘܠܳܐ ܣܺܐܡܳܐ ܘܠܳܐ ܢܚܳܫܳܐ ܒܟܺܝ̈ܣܰܝܟܽܘܢ. ܘܠܳܐ ܬܰܪܡܳܠܳܐ ܠܽܐܘܪܚܳܐ܆ ܘܠܳܐ ܬܰܪ̈ܬܶܝܢ ܟܽܘܬܺܝ̈ܢܝܳܢ܆ ܘܠܳܐ ܡ̈ܣܳܐܢܶܐ ܘܠܳܐ ܫܰܒܛܳܐ. ܫܳܘܶܐ ܗ̱ܘ ܓܶܝܪ ܦܳܥܠܳܐ ܣܰܝܒܳܪܬܶܗ. ܠܰܐܝܕܳܐ ܕܶܝܢ ܡܕܺܝܢ̱ܬܳܐ ܐܰܘ ܩܪܺܝܬܳܐ ܕܥܳܐܠܺܝܢ ܐܢ̱ܬܽܘܢ ܠܳܗ̇܆ ܫܰܐܠܘ̱ ܡܰܢܽܘ ܫܳܘܶܐ ܒܳܗ̇܇ ܘܬܰܡܳܢ ܗܘܰܘ܂ ܥܕܰܡܳܐ ܕܢܳܦܩܺܝܢ ܐܢ̱ܬܽܘܢ. ܘܡܳܐ ܕܥܳܐܠܺܝܢ ܐܢ̱ܬܽܘܢ ܠܒܰܝܬܳܐ܆ ܫܰܐܠܘ̱ ܫܠܳܡܶܗ ܕܒܰܝܬܳܐ. ܘܶܐܢ ܗܽܘ ܕܫܳܘܶܐ ܒܰܝܬܳܐ܆ ܫܠܳܡܟܽܘܢ ܢܺܐܬܶܐ ܥܠܰܘܗ̱ܝ. ܐܶܢ ܕܶܝܢ ܠܳܐ ܫܳܘܶܐ܆ ܫܠܳܡܟܽܘܢ ܥܠܰܝܟܽܘܢ ܢܶܦܢܶܐ. ܡܰܢ ܕܠܳܐ ܕܶܝܢ ܡܩܰܒܶܠ ܠܟܽܘܢ܂ ܘܠܳܐ ܫܳܡܰܥ ܡܶܠܰܝ̈ܟܽܘܢ܆ ܟܰܕ ܢܳܦܩܺܝܢ ܐܢ̱ܬܽܘܢ ܡܶܢ ܒܰܝܬܳܐ܁ ܐܰܘ ܡܶܢ ܩܪܺܝܬܳܐ ܗܳܝ܆ ܦܶܨܘ̱ ܚܶܠܳܐ ܡܶܢ ܪ̈ܶܓܠܰܝܟܽܘܢ. ܘܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ ܕܠܰܐܪܥܳܐ ܕܰܣܕܽܘܡ ܘܰܕܥܰܡܽܘܪܳܐ܆ ܢܶܗܘܶܐ ܢܺܝܚ ܒܝܰܘܡܳܐ ܕܕܺܝܢܳܐ ܐܰܘ ܠܰܡܕܺܝܢ̱ܬܳܐ ܗܳܝ܀

ܩܠܐ: ܒܩ̄ ܒܳܥܽܘܬܳܐ ܕܡܳܪܝ ܝܰܥܩܽܘܒ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ. ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܡܳܪܝܳܐ ܡܳܪܰܢ ܡܳܪܳܐ ܕܥܺܝܪ̈ܶܐ ܘܰܕܡܰܠܰܐܟ̈ܶܐ: ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܢܰܦܫܳܐ ܟܪܺܝܗܬܳܐ ܡܦܺܝܣܳܐ ܠܳܟ ܡܳܪܝ̱ ܕܬܺܐܬܶܐ ܨܶܐܕܶܝܗ̇: ܥܽܘܠ ܘܰܣܥܽܘܪܶܝܗ̇ ܕܰܬܩܽܘܡ ܟܽܠܝܽܘܡ ܥܰܠ ܬܶܫܡܶܫܬܳܟ. ܚܡܳܬܶܗ ܕܫܶܡܥܽܘܢ ܟܰܕ ܐܰܣܺܝܬܳܗ̇ ܡܶܢ ܟܽܘܪܗܳܢܳܗ̇: ܬܫܰܡܫܳܟ ܩܳܡܰܬ ܥܰܠ ܕܶܐܣܬܰܡܟܰܬ ܥܰܠ ܚܽܘܠܡܳܢܳܐ܀

ܒܺܐܝܕܳܗ̇ ܠܒܰܟܬܳܗ̇ ܠܗܳܝ ܘܰܚܣܰܟܬܳܗ̇ ܡܶܢ ܟܽܘܪܗܳܢܳܐ: ܠܒܽܘܟ ܚܽܘ̈ܫܳܒܶܐ ܕܢܰܦܫܳܐ ܒܚܽܘܒܳܟ ܡܶܢ ܣܽܘܓ̈ܦܳܢܶܐ. ܠܢܰܦܫܳܐ ܡܚܺܝܠܬܳܐ ܣܥܽܘܪ ܐܰܝܟ ܕܰܠܗܳܝ ܕܶܐܬܚܶܠܡܰܬ ܒܳܟ: ܕܥܰܠ ܬܶܫܡܶܫܬܳܐ ܕܡܶܠܬܳܟ ܗܺܝ ܬܩܽܘܡ ܢܰܗܺܝܪܳܐܺܝܬ܀

ܚܛܳܗ̈ܶܐ ܢܰܘܠܽܘܗ̇ ܐܰܝܟ ܟܽܘܪܗܳܢܳܐ ܠܓܰܒܪܳܐ ܡܰܪܥܳܐ: ܐܳܣܝܳܐ ܕܡܰܓܳܢ ܐܰܝܬܳܐ ܥܨܳܒܳܟ ܘܬܶܬܢܰܨܰܚ ܒܶܗ. ܚܰܘ̈ܒܶܐ ܕܫܰܚܩܽܘܗ̇ ܒܰܕܡܽܘܬ ܐܰܢ̱ܬܬܳܐ ܗܳܝ ܙܳܢܺܝܬܳܐ: ܐܰܢ̱ܬ ܚܰܟܺܝܡܳܐ ܛܽܘܫ ܠܳܗ̇ ܣܰܡܳܟ ܕܬܶܬܰܐܣܶܐ ܒܶܗ܀

ܡܫܰܒܚܳܐ ܠܳܟ ܡܳܪܝ̱ ܢܰܦܫܳܐ ܟܪܺܝܗܬܳܐ ܕܶܐܬܚܰܠܡܰܬ ܒܳܟ: ܘܰܛܥܳܬ ܟܺܐܒܶܝ̈ܗ̇ ܘܰܩܢܳܬ ܡܶܢܳܟ ܚܰܝܠܳܐ ܪܰܒܳܐ. ܠܳܟ ܬܶܫܒܽܘܚܬܳܐ ܐܳܣܝܳܐ ܛܳܒܳܐ ܕܣܰܓܺܝ ܡܪܰܚܡܳܢ: ܘܠܰܐܒܽܘܟ ܕܫܰܠܚܳܟ ܘܰܠܪܽܘܚ ܩܽܘܕܫܳܐ ܘܰܥܠܰܝܢ ܪ̈ܰܚܡܶܐ܀

ܥܢܺܝܢ ܐܰܠܳܗܳܐ ܥܢܺܝܢ ܐܰܠܳܗܳܐ ܘܪܰܚܶܡܥܠܰܝܢ: ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀

ܟܳܗܢܳܐ ܣܳܐܶܡ ܝܰܡܺܝܢܶܗ ܥܰܠ ܪܺܝܫ ܟܪܺܝܗܳܐ (ܟܪܺܝܗܬܳܐ) ܘܳܐܡܰܪ:

ܒܰܫܡܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܣܳܐܶܡ ܐ̱ܢܳܐ ܐܺܝܕܳܐ ܕܺܝܠܝ̱ ܡܚܺܝܠܬܳܐ ܥܰܠ ܥܰܒܕܳܟ ܗܳܢܳܐ (ܦܠܳܢ) (ܐܰܡܬܳܟ ܗܳܕܶܐ ܦܠܳܢܺܝܬ)܇ ܐܰܝܟܰܢܳܐ ܕܰܒܝܰܕ ܚܽܘܒܳܟ ܬܰܓܶܢ ܥܠܰܘܗ̱ܝ (ܥܠܶܝܗ̇) ܝܰܡܺܝܢܳܟ ܚܰܝܠܬܳܢܺܝܬܳܐ ܘܡܰܠܝܰܬ ܥܽܘܕܪ̈ܳܢܶܐ. ܘܬܶܣܥܪܺܝܘܗ̱ܝ (ܘܬܶܣܥܪܺܝܗ̇) ܐܰܝܟ ܣܰܓܺܝܽܐܘܬ ܪ̈ܰܚܡܶܐ ܘܪܶܚܡܰܬ ܐ̱ܢܳܫܽܘܬܳܐ ܕܺܝܠܳܟ. ܘܰܐܫܦܰܥ ܥܠܰܘܗ̱ܝ (ܥܠܶܝܗ̇) ܚܢܳܢܳܟ ܘܰܪܣܽܘܡ ܛܰܝܒܽܘܬܳܟ ܥܰܠ ܡܚܺܝܠܽܘܬܶܗ (ܡܚܺܝܠܽܘܬܳܗ̇). ܘܫܰܟܶܢ ܠܶܗ (ܠܳܗ̇) ܥܽܘܕܪܳܢܳܐ ܕܡܶܢܳܟ܆ ܚܙܽܘܩܳܝܗ̱ܝ (ܚܙܽܘܩܶܝܗ̇) ܒܣܰܒܪܳܐ ܘܰܫܪܳܪܳܐ ܠܳܐ ܡܶܙܕܰܟܝܳܢܳܐ ܕܺܝܠܳܟ. ܒܰܛܶܠ ܡܶܢܶܗ (ܡܶܢܳܗ̇) ܟܽܠܗܽܘܢ ܟܺܐܒ̈ܶܐ܆ ܟܽܘܪ̈ܗܳܢܶܐ܆ ܡܰܚ̈ܘܳܬܳܐ ܡܫܺܝ̈ܡܳܢܝܳܬܳܐ ܘܢܶܣܝܽܘ̈ܢܶܐ ܕܥܳܒܪܺܝܢ ܠܚܰܝܠܳܐ. ܗܰܒ ܠܶܗ (ܠܳܗ̇) ܚܰܝܠܳܐ ܫܰܪܺܝܪܳܐ ܕܡܶܢ ܠܘܳܬܳܟ܆ ܚܰܕܳܐ ܘܰܐܦܨܰܚ ܟܡܺܝܪܽܘܬܶܗ (ܟܡܺܝܪܽܘܬܳܗ̇) ܒܦܽܘܪܩܳܢܳܟ. ܐܰܝܟܰܢܳܐ ܕܰܢܩܽܘܡ (ܕܰܬܩܽܘܡ) ܩܕܳܡܰܝܟ ܙܰܕܺܝܩܳܐܺܝܬ܆ ܘܢܰܘܕܶܐ (ܘܬܰܘܕܶܐ) ܕܠܳܐ ܫܰܠܘܳܐ ܠܛܰܝܒܽܘܬܳܟ ܘܢܶܣܓܽܘܕ (ܘܬܶܣܓܽܘܕ) ܘܰܢܫܰܒܰܚ (ܘܰܬܫܰܒܰܚ) ܠܰܐܠܳܗܽܘܬܳܟ ܡܳܪܰܢ ܘܰܐܳܠܗܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܫܳܚ ܒܶܝܬ ܥܰܝ̈ܢܶܐ:

ܟܳܗܢܳܐ ܚܳܬܶܡ ܠܬܰܝܳܒܳܐ (ܠܬܰܝܳܒܬܳܐ) ܒܡܶܫܚܳܐ܆ ܬܠܳܬܳܐ ܨܠܺܝ̈ܒܶܐ ܥܰܠ ܒܶܝܬ ܥܰܝ̈ܢܶܐ ܟܰܕ ܐܳܡܰܪ:

ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: (ܬܶܬܕܰܟܶܝܢ ܘܬܶܬܩܰܕܫܺܝܢ ܘܢܶܫܬܰܒܩܽܘܢ ܠܶܟܝ̱ ܚܰܘܒܰܝ̈ܟܝ̱ ܘܰܚܛܳܗܰܝ̈ܟܝ̱ ܕܰܣܥܺܝܪܺܝܢ ܠܶܟܝ̱) ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ (ܡܶܢܶܟܝ̱) ܟܽܠܗܽܘܢ ܚܽܘ̈ܫܳܒܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܚܰܕܝܳܐ:

ܚܳܬܶܡ ܬܠܳܬܳܐ ܨܠܺܝ̈ܒܶܐ ܥܰܠ ܚܰܕܝܳܐ ܟܰܕ ܐܳܡܰܪ:

ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: (ܬܶܬܕܰܟܶܝܢ ܘܬܶܬܩܰܕܫܺܝܢ ܘܢܶܫܬܰܒܩܽܘܢ ܠܶܟܝ̱ ܚܰܘܒܰܝ̈ܟܝ̱ ܘܰܚܛܳܗܰܝ̈ܟܝ̱ ܕܰܣܥܺܝܪܺܝܢ ܠܶܟܝ̱) ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ (ܡܶܢܶܟܝ̱) ܟܽܠܗܽܘܢ ܚܽܘ̈ܫܳܒܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܒܽܘܪ̈ܟܶܐ:

ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܒܽܘܪܟܳܐ ܝܰܡܺܝܢܳܝܬܳܐ ܘܚܰܕ ܥܰܠ ܣܶܡܳܠܳܝܬܳܐ ܘܳܐܡܰܪ:

ܬܶܬܕܰܟܶܐ ܘܬܶܬܩܰܕܰܫ ܘܢܶܫܬܰܒܩܽܘܢ ܠܳܟ ܚܰܘ̈ܒܰܝܟ ܘܰܚܛܳܗܰܝ̈ܟ ܕܰܣܥܺܝܪܺܝܢ ܠܳܟ: (ܬܶܬܕܰܟܶܝܢ ܘܬܶܬܩܰܕܫܺܝܢ ܘܢܶܫܬܰܒܩܽܘܢ ܠܶܟܝ̱ ܚܰܘܒܰܝ̈ܟܝ̱ ܘܰܚܛܳܗܰܝ̈ܟܝ̱ ܕܰܣܥܺܝܪܺܝܢ ܠܶܟܝ̱) ܐܶܢ ܒܨܶܒܝܳܢܳܐ ܘܶܐܢ ܕܠܳܐ ܒܨܶܒܝܳܢܳܐ. ܐܶܢ ܒܺܝܕܰܥܬܳܐ ܘܶܐܢ ܕܠܳܐ ܒܺܝܕܰܥܬܳܐ. ܘܢܶܬܛܰܠܩܽܘܢ ܡܶܢܳܟ (ܡܶܢܶܟܝ̱) ܟܽܠܗܽܘܢ ܚܽܘ̈ܫܳܒܶܐ ܒܺܝ̈ܫܶܐ ܘܡܰܥܒܕܶܢ̈ܘܳܬܳܐ ܣܳܛܳܢܳܝ̈ܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܪ̈ܶܓܫܶܐ:

ܡܫܳܚ ܥܰܝ̈ܢܶܐ:

ܟܳܗܢܳܐ ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܥܰܝܢܳܐ ܕܝܰܡܺܝܢܳܐ܆ ܘܚܰܕ ܥܰܠ ܥܰܝܢܳܐ ܕܣܶܡܳܠܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܥܰܝ̈ܢܶܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܢܚܺܝܪܳܐ:

ܚܳܬܶܡ ܬܠܳܬܳܐ ܨܠܺܝ̈ܒܶܐ ܥܰܠ ܢܚܺܝܪܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܰܢܚܺܝܪܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܦܽܘܡܳܐ:

ܚܳܬܶܡ ܚܰܕ ܨܠܺܝܒܳܐ ܥܰܠ ܣܶܦܬܳܐ ܥܶܠܳܝܬܳܐ ܘܚܰܕ ܥܰܠ ܬܰܚܬܳܝܬܳܐ ܘܚܰܕ ܥܰܠ ܠܶܫܳܢܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܦܽܘܡܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܐܶܕ̈ܢܶܐ:

ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܐܶܕܢܳܐ ܕܝܰܡܺܝܢܳܐ ܘܚܰܕ ܥܰܠ ܕܣܶܡܳܠܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܶܐܕ̈ܢܶܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܐܺܝ̈ܕܰܝܳܐ:

ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܐܺܝܕܳܐ ܕܝܰܡܺܝܢܳܐ܆ ܘܚܰܕ ܥܰܠ ܕܣܶܡܳܠܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܺܐܝ̈ܕܰܝܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܟܶܢ ܡܶܬܡܰܫܚܺܝܢ ܪ̈ܶܓܠܶܐ:

ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܪܶܓܠܳܐ ܝܰܡܺܝܢܳܝܬܳܐ ܘܚܰܕ ܥܰܠ ܣܶܡܳܠܳܝܬܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܪ̈ܶܓܠܶܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܡܫܳܚ ܟܽܘܠ̈ܝܳܬܳܐ:

ܚܳܬܶܡ ܬܪܶܝܢ ܨܠܺܝ̈ܒܶܐ ܥܰܠ ܟܽܘܠܺܝܬܳܐ ܕܝܰܡܺܝܢܳܐ܆ ܘܚܰܕ ܨܠܺܝܒܳܐ ܥܰܠ ܕܣܶܡܳܠܳܐ ܘܳܐܡܰܪ:

ܒܡܶܫܚܳܐ ܗܳܢܳܐ ܩܰܕܺܝܫܳܐ ܘܒܰܚܢܳܢܶܗ ܒܰܣܺܝܡܳܐ ܢܶܫܒܽܘܩ ܠܳܟ (ܠܶܟܝ̱) ܐܰܠܳܗܳܐ܆ ܟܽܠ ܡܳܐ ܕܰܐܣܟܶܠܬ (ܕܰܐܣܟܶܠܬܝ̱) ܒܣܰܟܠܽܘܬܳܐ ܕܟܽܘܠ̈ܝܳܬܳܐ. ܒܰܫܡܳܐ ܕܰܐܒܳܐ ♱ ܐܰܡܺܝܢ. ܘܕܰܒܪܳܐ ♱ ܐܰܡܺܝܢ. ܘܰܕܪܽܘܚܳܐ ♱ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀

ܩܳܢܽܘܢܳܐ ܕܗܰܝܡܳܢܽܘܬܳܐ

ܪܺܝܫ ܡܫܰܡ̈ܫܳܢܶܐ: ܢܩܽܘܡ ܫܰܦܺܝܪ ܟܽܠܰܢ ܒܰܨܠܽܘܬܳܐ܆ ܘܟܳܗܢܳܐ ܗܳܢܳܐ ܡܝܰܩܪܳܐ ܢܶܥܢܶܐ ܘܢܺܐܡܰܪ܀

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ܀

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܝܺܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬܺܝ̣ܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰ‌ܠܳܗܳܐ ܫܰܪܺܝܪܳܐ ܕܡܶܢ ܐܰ‌ܠܳܗܳܐ ܫܰܪܺܝܪܳܐ. ܝܺܠܺܝ̣ܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ. ܢܚܶܬ ܡܶܢ ܫܡܰܝܳܐ ܘܶܐܬܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܳܘܣ ܦܺܝܠܰܛܳܘܣ. ܚܰܫ ܘܡܺܝܬ ܘܶܐܬܩܒܰܪ ܘܩܳܡ ܠܰܬܠܳܬܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܺܝܬܶܒ ܡܶܢ ܝܰܡܺܝܢܳܐ ܕܰܐܒܽܘܗܝ. ܘܬܽܘܒ ܐܳܬܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̣̈ܬܶܐ. ܗܰܘ ܕܰܠܡܰܠܟܽܘܬܶܗ ܫܽܘܠܳܡܳܐ ܠܳܐ ܐܺܝ̣ܬ. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝ̣ܬܰܘܗ̱ܝ ܡܳܪܝܳܐ ܡܰܚܝܳܢܳܐ ܕܟܽܠ. ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓܶܕ ܘܡܶܫܬܰܒܰܚ.
ܗܰܘ ܕܡܰܠܶܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝܬܳܐ. ܘܡܰܘܕܶܝܢܰܢ ܕܰܚܕܳܐ ܗ̱ܝ ܡܰܥܡܽܘܕܺܝܬܳܐ ܠܫܽܘܒܩܳܢܳܐ ܕܰܚ̈ܛܳܗܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬܶܐ ܘܰܠܚܰܝ̈ܶܐ ܚܰܕ̈ܬܶܐ ܕܰܒܥܳܠܡܳܐ ܕܰܥܬܺܝ̣ܕ. ܐܰܡܺܝܢ ܒܰܪܶܟܡܪܳܝ܀ ܣ‍ܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܒܽܘܪܟܬܳܐ ܘܰܫܪܳܝܳܐ ܕܰܡܗܰܝ̈ܡܢܶܐ

ܟܳܗܢܳܐ: ܒܪܺܝܟܺܝܬܽܘܢ ♱ ܟܽܠܟܽܘܢ ܠܡܳܪܝܳܐ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܐܰܠܳܗܳܐ ܢܒܰܪܶܟ ܘܰܢܚܰܣܶܐ ܠܟܽܠ ܡܰܢ ܕܶܐܬܛܰܝܰܒ ܥܰܡܰܢ ܒܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ ܘܰܢܚܰܣܶܐ ܠܥܰܢܺܝ̈ܕܰܘܗ̱ܝ ܡܗܰܝ̈ܡܢܶܐ. ܫܡܺܝ̈ܥܳܬܳܐ ܘܰܡܩܰܒ̈ܠܳܬܳܐ ܥܒܶܕ ܐܶܢܶܝܢ ܡܳܪܝܳܐ ܐܰܠܳܗܳܐ ܠܰܨܠܰܘ̈ܳܬܳܐ ܕܺܝܠܰܢ ܡܚܺܝ̈ܠܳܬܳܐ ܘܬܰܚܽܘ̈ܒܳܬܳܐ ܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ ܘܰܡܪܰܝܰܡܬܳܐ܆ ܐܰܒܳܐ ♱ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܫܠܶܡ ܛܶܟܣܳܐ ܩܦܺܝܣܳܐ ܕܰܡܫܳܚܳܐ ܕܰܟܪ̈ܺܝܗܶܐ