ܘܰܕܩܰܕܺܝ̈ܫܶܐ ܒܰܣܺܝܠܺܝܳܘܣ ܘܰܓܪܺܝܓܳܘܪܺܝܳܘܣ ܒܝܽܘܡ 1 ܕܟܳܢܽܘܢ ܐ̱ܚܪܳܝ

ܩܝܢܬܐ ܚ

ܦܬܓܡܐ:

ܬܰܦ̈ܶܐ ܕܢܰܗܪ̈ܰܘܳܬܳܐ ܢܚܰܕܽܘܢ ܒܰܡܕܺܝܢ̱ܬܶܗ ܕܰܐܠܳܗܰܢ ܗ̄܀

ܬܒܪܬ‌ܐ:

ܨܠܽܘܬܟܽܘܢ ܥܰܡܰܢ ܐܰܒܳܗ̈ܳܬܳܐ ܡܰܠ̈ܦܰܝ ܩܽܘܫܬܳܐ: ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܢ܀

ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀

ܩܕܡ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ - H

ܬܰܘ ܢܥܰܕܥܶܕ ܕܽܘܟܪ̈ܳܢܰܝܗܽܘܢ ܕܰܐܒܳܗ̈ܳܬܳܐ ܩܰܕܺܝ̈ܫܶܐ. ܕܰܠܗܰܝܡܳܢܽܘܬܳܐ ܫܰܪܰܪܘ ܬܚܽܘܡܳܐ ܕܳܐܪܬܳܘܕܽܘܟܣܺܝܰܐ. ܐܺܝܓܢܰܐܛܺܝܳܘܣ ܢܽܘܪܳܢܳܐ. ܘܬܶܐܳܘܠܳܘܓܳܘܣ ܝܰܡܳܐ ܕܚܶܟ̈ܡܳܬܳܐ. ܘܩܽܘܪܺܝܠܳܘܣ ܢܶܒܥܳܐ ܚܰܠܝܳܐ. ܘܺܐܝܘܰܐܢܺܝܣ ܦܽܘܡܳܐ ܕܕܰܗܒܳܐ. ܘܰܕܒܰܣܶܝܠܺܝܳܘܣ ܥܰܡ ܪܰܒܳܐ ܓܪܺܝܓܳܘܪܺܝܳܘܣ. ܕܺܝܳܘܣܩܳܘܪܳܘܣ ܘܰܩܠܺܝܡܺܝܣ. ܘܦܺܝܠܳܘܟܣܺܝܢܳܘܣ ܥܰܡ ܢܰܨܺܝܚܳܐ ܣܶܐܘܺܝܪܶܐ. ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܐܰܘܪܶܒ ܡܳܪܝ ܕܽܘܟܪܳܢ ܦܳܠ̈ܚܰܝܟ ܐܰܬܠܺܝ̈ܛܶܐ ܕܩܽܘܫܬܳܐ. ܕܰܚܠܳܦ ܫܪܳܪܳܟ ܐܶܬܟܰܬܰܫܘ: ܘܙܰܝܶܦܘ ܠܶܐܪ̈ܶܣܺܝܣ. ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ. ܡܢܰܨ̈ܚܰܝ ܩܰܪܢܳܐ ܕܳܐܪܬܳܘܕܽܘܟܣܺܝܰܐ. ܢܶܬܩܰܒܰܠ ܦܝܳܣܰܢ ܡܳܪܝܳܐ ܒܝܽܘܡ ܥܺܐܕܳܐ ܕܰܓܒܰܝ̈ܟ. ܕܠܰܡܢܳܬܗܽܘܢ ܛܳܒܬܳܐ ܢܶܫܬܘܶܐ: ܒܰܐܬܪܳܐ ܕܚܰܝ̈ܶܐ ܡܠܶܐ ܗ̄ܘܗ̄܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܙܰܘܓܳܐ ܕܰܐܚ̈ܶܐ - H

ܙܰܘܓܳܐ ܕܰܐܚ̈ܶܐ: ܥܛܺܝ̈ܦܰܝ ܕܰܪܓܳܐ ܕܰܫܠܺܝܚܽܘܬܳܐ. ܒܰܣܶܝܠܺܝܳܘܣ ܘܪܰܒܳܐ ܕܟܳܗ̈ܢܶܐ ܓܪܺܝܓܳܘܪܺܝܳܘܣ. ܬܰܠܡܶܕܘ ܘܰܐܥܡܶܕܘ ܟܽܠ ܥܰܡ̱ܡܺܝ̈ܢ ܕܰܒܟܽܠ ܐܰܬܪ̈ܰܘܳܢ. ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܐ̱ܪܳܙܳܐ ܬܠܺܝܬܳܝܳܐ ܗ̄ ܚܕܳܐ ܐܰܠܳܗܽܘܬܳܐ܀

ܠܘܛܢܝܐ ܒܩ̄: ܢܶܩܝܳܐ ܗܘܺܝܬ - H

ܒܰܪܶܟ ܡܳܪܳܐ ܕܰܗ̈ܘܰܝܳܐ: ܡܰܥܶܠ ܝܰܘܡܳܐ ܕܪܺܝܫ ܫܰܢ̱ܬܳܐ. ܘܫܰܟܶܢ ܠܰܢ ܚܰܝ̈ܶܐ ܦܰܐܝ̈ܳܐ: ܒܕܶܢܚܳܐ ܕܟܽܠ ܨܰܦܪܶܗ ܚܰܕܬܳܐ܀

ܐܰܣܓܳܐ ܠܰܢ ܒܳܗ̇ ܛܳܒ̈ܳܬܳܐ: ܘܰܙܠܽܘܚ ܠܰܐܪܥܳܐ ܒܰܪ̈ܣܺܝܣܶܐ. ܘܗܰܒܶܒ ܠܚܰܩ̈ܠܶܐ ܘܢܶܨ̈ܒܳܬܳܐ: ܒܙܰܪ̈ܥܶܐ ܘܶܐܒ̈ܒܳܢܶܐ ܣܒܺܝ̈ܣܶܐ܀

ܚܰܝܠܳܟ ܡܳܪܝ ܡܶܢܰܢ ܢܶܕܚܽܘܩ: ܟܽܠ ܙܢܰܝ̈ ܓܽܘ̈ܢܚܶܐ ܘܽܐܘܠ̈ܨܳܢܶܐ. ܘܰܨܠܺܝܒܳܟ ܠܟܶܢܫܰܢ ܢܶܦܪܽܘܩ: ܡܶܢ ܟܽܠ ܟܺܐܒ̈ܶܐ ܘܟܽܘܪ̈ܗܳܢܶܐ܀

ܘܚܰܕܶܬ ܒܰܢ ܙܰܘ̈ܥܶܐ ܕܟܰܝ̈ܳܐ: ܕܚܳܫܚܺܝܢ ܠܺܐܝܩܳܪ ܪܰܒܽܘܬܳܟ. ܘܰܐܥܡܰܪ ܒܰܢ ܪܽܘܚܳܟ ܚܰܝܳܐ: ܕܢܰܘܕܶܐ ܠܪܰܒܽܘܬ ܛܰܝܒܽܘܬܳܟ܀

ܚܘܬܡܐ ܒܩ̄: ܡܫܺܝܚܳܐ ܐܶܬܺܝܠܶܕ - H

ܡܫܺܝܚܳܐ ܐܶܬܓܙܰܪ: ܝܰܘܡܳܢ ܒܨܶܒܝܳܢܶܗ. ܐܰܝܟ ܢܳܡܽܘܣܳܐ: ܕܦܰܩܶܕ ܡܽܘܫܶܐ ܠܥܶܒܪ̈ܳܝܶܐ. ܘܶܐܫܬܰܠܰܡܘ ܐ̱ܪ̈ܳܙܶܐ: ܘܰܓܡܰܪ̈ܘ ܦ̈ܶܠܳܐܬܳܐ. ܕܩܰܕܶܡܘ ܒܰܕܶܩܘ ܚܰܙܳܝ̈ܶܐ ܥܰܠ ܡܶܐܬܺܝܬܶܗ܀