ܩܝܢܬܐ ܒ

ܦܬܓܡܐ:

ܒܗܶܕܪ̈ܰܝ ܩܽܘܕܫܳܐ ܡܶܢ ܡܰܪܒܥܳܐ: ܡܶܢ ܩܕܺܝܡ ܠܳܟ ܛܰܠܝܳܐ ܝܺܠܶܕܬܳܟ ܗ̄܀

ܐ̱ܚܪܺܢܳܐ: ܘܢܰܘܥܶܐ ܡܶܢ ܡܕܺܝܢ̱ܬܶܗ ܐܰܝܟ ܥܶܣܒܳܐ ܕܰܐܪܥܳܐ ܗ̄܀

ܬܒܪܬ‌ܐ:

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠܕܶܝ̈ܗ̇ ܒܡܰܘܠܳܕܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝ̈ܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܡܰܘܠܳܕܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܗܳܢܰܘ ܝܰܠܕܳܐ: ܒܪܶܗ ܕܰܐܒܳܐ ܒܪܳܗ̇ ܕܰܒܬܽܘܠܬܳܐ. ܗܳܢܰܘ ܩܢܽܘܡܳܐ ܕܪܽܘܚ ܩܽܘܕܫܳܐ܆ ܝܰܡܺܝܢܶܗ ܕܰܐܒܳܐ ܓܢܺܝܙܳܐ. ܗܽܘܝܽܘ ܦܶܚܡܳܐ ܕܫܳܠܽܘܚܶܗ܆ ܘܗܽܘܝܽܘ ܪܺܝܫܳܐ ܩܰܕܡܳܝܳܐ: ܫܰܠܺܝܛܳܐ ܘܡܰܠܟܳܐ ܕܫܰܝܢܳܐ: ܘܰܡܥܺܝܢܳܐ ܕܰܡܠܶܐ ܚܰܝ̈ܶܐ. ܛܰܠܝܳܐ ܘܥܽܘܠܳܐ ܘܩܰܫܺܝܫܳܐ܆ ܕܰܩܕܳܡ ܥܳܠ̈ܡܶܐ ܘܒܶܪ̈ܝܳܬܳܐ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ

ܒܟܽܠ ܡܢܰــ̈ـܘܳܢ ܘܰܒܟܽܠ ܕܶܡ̈ܘܳܢ ܡܰܠܶܠ ܐܰܒܳܐ܆ ܥܰܡ ܐܰܒܳܗܰܝ̈ܢ ܩܰܕ̈ܡܳܝܶܐ ܒܰܢ̈ܒܺܝܶܐ ܕܡܶܢ ܩܕܺܝܡ. ܘܰܒܗܳܠܶܝܢ ܬܽܘܒ: ܝܰܘ̈ܡܳܬܳܐ ܐ̱ܚܪ̈ܳܝܶܐ. ܡܰܠܶܠ ܥܰܡܰܢ: ܒܰܒܪܶܗ ܚܰܒܺܝܒܳܐ. ܕܠܶܗ ܣܳܡ ܝܳܪܬܳܐ ܕܟܽܠ ܡܶܕܶܡ܆ ܘܒܶܗ ܥܒܰܕ ܥܳܠ̈ܡܶܐ. ܘܗܽܘܝܽܘ ܕܝܰܘܡܳܢ ܐܶܬܺܝܠܶܕ ܒܰܡܥܰܪܬܳܐ ܒܒܶܝܬ ܠܚܶܡ ܗ̄ܘܗ̄܀

ܠܘܛܢܝܐ ܒܩ̄: ܐܳܘ ܚܰܟܺܝܡܳܐ

ܬܶܗܪܳܐ ܠܡܺܐܡܰܪ ܥܰܠ ܝܽܘܡ ܝܰܠܕܶܗ ܕܒܰܪ ܐܰܠܳܗܳܐ: ܕܣܰܓܺܝ ܡܰܬܗܰܪ ܠܰܕܚܳܐܰܪ ܒܶܗ ܦܳܪܽܘܫܳܐܺܝܬ܀

ܗܰܘ ܕܰܟܣܶܐ ܗ̱ܘܳܐ ܒܥܽܘܒܳܐ ܕܰܐܒܽܘܗ̱ܝ ܗܳܐ ܡܶܢ ܥܳܠܰܡ: ܨܒܳܐ ܘܶܐܬܬܰܚܬܺܝ ܘܰܗܘܳܐ ܥܽܘܠܳܐ ܒܟܰܪܣܳܗ̇ ܕܡܰܪܝܰܡ܀

ܫܶܡܫܳܐ ܒܽܐܘܪܝܳܐ ܘܰܒܥܰܙܪ̈ܽܘܪܶܐ ܟܪܺܝܟܳܐ ܢܽܘܪܳܐ: ܒܬܽܘܠܬܳܐ ܕܝܳܠܕܳܐ ܘܶܐܡܳܐ ܕܩܳܝܡܳܐ ܕܠܳܐ ܙܽܘܘܳܓܳܐ܀

ܚܙܳܬܳܐ ܚܕܰܬܳܐ ܫܰܠܗܶܒܺܝܬܳܐ ܕܝܳܢܩܳܐ ܚܰܠܒܳܐ: ܘܥܽܘܠܳܐ ܣܳܒܳܐ ܕܰܛܥܺܝܢܳܐ ܠܶܗ ܒܬܽܘܠܬܳܐ ܡܰܪܝܰܡ܀

ܚܘܬܡܐ ܒܩ̄: ܝܰܘܡܳܟ ܠܳܟ ܕܳܡܶܐ

ܝܰܘܡܳܟ ܠܳܟ ܕܳܡܶܐ: ܪܳܚܶܡ ܐܢܳܫ̈ܳܐ. ܕܡܶܬܝܰܒܰܠ ܘܳܐܬܶܐ: ܥܰܠ ܟܽܠ ܝܰܘܡܺܝ̈ܢ. ܝܰܘܡܰܐ ܗ̱ܘ ܕܰܡܫܰܠܶܡ: ܥܰܡ ܩܰܫܺܝ̈ܫܶܐ. ܘܗܳܦܶܟ ܕܰܢܫܰܪܶܐ ܥܰܡ ܝܰܠܽܘ̈ܕܶܐ܀

ܚܘܬܡܐ ܐܚܪܢܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܡܫܺܝܚܳܐ ܐܰܠܳܗܳܐ: ܒܰܨ̈ܠܰܘܳܬܳܗ̇ ܕܝܳܠܶܕܬܳܟ: ܐܰܥܒܰܪ ܡܶܢ ܐܰܪܥܳܐ ܘܝܳܬܒܶܝ̈ܗ̇: ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ. ܕܢܰܘܕܶܐ ܘܢܶܣܓܽܘܕ ܠܳܟ: ܒܟܽܠ ܥܶܕܳܢ ܐܰܡܺܝܢ ܘܰܐܡܺܝܢ܀