ܩܝܢܬܐ ܒ

ܦܬܓܡܐ:

ܢܩܽܘܡ ܐܰܠܳܗܳܐ ܢܶܬܒܕܪܽܘܢ ܟܽܠܗܽܘܢ ܒܥܶܠܕܒܳܒܰܘ̈ܗܝ: ܘܢܶܥܪܩܽܘܢ ܣܳܢܰܐܘ̈ܗܝ ܡܶܢ ܩܕܳܡܰܘܗܝ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗܿ ܠܥܺܕ݈ܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗܿ ܫܰܝܢܳܐ ܘܢܰܛܰܪ ܝܰܠ̈ܕܝܶܗܿ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝ̈ܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܫܰܪܰܪ ܡܳܪܰܢ: ܠܥܺܕܬܳܟ ܦܪܺܝܩܰܬ ܒܰܨܠܺܝܒܳܟ: ܥܰܠ ܫܽܘܥܳܐ ܕܗܰܝܡܳܢܽܘܬ̣ܳܐ: ܘܦܽܘܩ̈ܕܳܢܰܝܟ ܡܰܥܒ̈ܕܰܝ ܚܰܝ̈ܶܐ: ܘܪܰܡܪܶܡ ܟܳܗ̈ܢܶܝܗ̇ ܒܰܐܘܝܽܘܬ̣ܳܐ: ܒܫܰܝܢܳܐ ܘܰܫܠܳܡܳܐ ܕܡܶܢܳܟ̣: ܘܢܶܪܥܰܡ ܒܳܗ̇ ܩܳܠܳܐ ܕܰܒܢܶܝ̈ܗ̇: ܒܰܕܡܽܘܬ̣ ܓܽܘ̈ܕܶܐ ܕܰܣܪ̈ܳܦܶܐ: ܘܬܰܣܶܩ ܩܳܠܰܝ̈ ܬܶܫܒܽܘܚܬܳܐ: ܠܳܟ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

ܐ̱ܚܪܢܐ ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܒܝܽܘܡ ܒܚܰܕ ܒܫܰܒܳܐ: ܩܳܡܰܬ ܡܰܪܝܰܡ ܘܚܰܒܪ̈ܳܬܳܗ̇: ܘܰܫܩܰܠ̈ܝ ܗܶܪ̈ܽܘܡܶܐ ܓܒܰܝ̈ܳܐ: ܘܰܠܩܰܒܪܶܗ ܕܰܒܪܳܐ ܐܶܙܰܠ̈ܝ: ܕܰܢܒܰܣ̈ܡܳܢ ܦܰܓܪܶܗ ܕܰܟܝܳܐ: ܐܰܝܟ ܕܰܐܟܬܶܒ ܠܰܢ ܝܽܘܚܰܢܳܢ: ܘܰܚ̈ܙܰܝ ܬܰܡܳܢ ܬܶܕܡܽܘܪܬܳܐ: ܡܰܠܰܐܟܳܐ ܕܩܳܥܶܐ ܘܳܐܡܰܪ: ܕܩܳܡ ܠܶܗ ܡܳܪܰܢ ܡܶܢ ܩܰܒܪܳܐ: ܘܰܐܒܗܶܬ ܐܶܢܽܘܢ ܠܨܳܠܽܘ̈ܒܶܐ܀

ܠܘܛܢܝܐ ܒܩ̄: ܙ:ܙ ܢܶܩܝܳܐ ܗܘܺܝܬ

ܣܪ̈ܳܦܶܐ ܕܢܽܘܪܳܐ ܘܰܕܪܽܘܚܳܐ: ܚܙܳܐ ܐܶܫܰܥܝܳܐ ܒܶܝܬ̣ ܩܽܘܕܫܳܐ: ܕܶܫܬܳܐ ܓܶܦܺܝ̈ܢ ܠܚܰܕ ܡܶܢܗܽܘܢ: ܘܰܡܫܰܡܫܺܝܢ ܠܰܐܠܳܗܽܘܬܳܟ܀

ܒܰܬܪܶܝܢ ܡܚܰܦܶܝܢ ܐܰܦܰܝ̈ܗܽܘܢ: ܕܠܳܐ ܢܚܽܘܪܽܘܢ ܒܰܐܠܳܗܽܘܬ̣ܳܟ: ܘܒܰܬܪܶܝܢ ܡܟܰܣܶܝܢ ܖ̈ܶܓ̣ܠܰܝܗܽܘܢ: ܕܠܳܐ ܢܺܐܩܕܽܘܢ ܡܶܢ ܓ̣ܰܘܙܰܠܬܳܟ܀

ܘܒܰܬܪܶܝܢ ܦܳܪܚܺܝܢ ܟܰܕ ܩܳܥܶܝܢ: ܩܰܕܺܝܫ ܩܰܕܺܝܫ ܩܰܕܺܝܫܰܬ: ܩܰܕܺܝܫܰܬ ܒܪܳܐ ܕܰܐܠܳܗܳܐ: ܒܪܺܝܟ ܐܺܝܩܳܪܳܟ ܡܶܢ ܐܰܬܪܳܟ܀

ܚܘܬܡܐ ܒܩ̄: ܗܰܒܠܰܢ ܡܳܪܰܢ

ܗܰܒܠܰܢ ܡܳܪܰܢ ܒܝܽܘܡ ܢܽܘܚܳܡܳܟ: ܢܥܰܦܶܩ ܘܰܢܢܰܫܶܩ ܦܰܓ̣ܪܳܟ ܚܰܝܳܐ: ܘܰܒܡܰܠܟܽܘܬ̣ܳܐ ܢܶܚܕܶܐ ܘܢܶܪܘܰܙ: ܒܩܰܘܡܳܐ ܕܡܶܢ ܓܰܒܳܟ ܝܰܡܺܝܢܳܝܳܐ܀

ܐ̱ܚܪܢܐ ܚܘܬܡܐ ܒܩ̄: ܛܽܘܒܰܝܟܝ ܐܳܦܪܰܬ

ܒܗܳܢܳܐ ܝܰܘܡܳܐ ܒܓܰܢܬܶܗ ܕܝܰܘܣܶܦ: ܚܙܳܬܶܗ ܡܰܪܝܰܡ ܠܺܝܚܺܝܕܳܝܳܗ̇: ܩܶܪܒܰܬ ܨܶܐܕܰܘܗ̱ܝ ܘܰܡܫܰܐܠܳܐ ܠܶܗ: ܒܚܰܫܳܐ ܪܰܒܳܐ ܘܰܒܟܰܪܝܽܘܬܳܐ: ܕܳܐܘ ܓܰܢܳܢܳܐ ܗܰܒܠܺܝ ܠܰܪܚܽܘܡܝ: ܗܰܘ ܦܺܐܪܳܐ ܕܰܒܓܰܢܬܳܟ ܣܺܝܡ ܗܘܳܐ: ܐܶܡܰܪ ܙܶܠܝ ܡܰܪܝܰܡ: ܣܰܒܰܪܝ ܠܰܫܠܺܝ̈ܚܶܐ: ܕܩܳܡܶܬ ܡܶܢ ܩܰܒܪܳܐ܀