ܩܝܢܬܐ ܓ

ܦܬܓܡܐ:

ܐܶܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ : ܘܰܐܝܟ ܓܰܒܪܳܐ ܕܢܰܦܼܨܶܗ ܚܰܡܪܶܗ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝܴ̈ܢܶܐ ܘܠܐܰܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܬܠܺܝܬ̣ܳܝܳܐ ܗܘܳܐ ܒܶܝܬ̣ ܡܺܝ̈ܬ̣ܶܐ: ܝܰܘ̈ܡܶܐ ܬܠܳܬ̣ܳܐ ܒܨܶܒܝܳܢܶܗ: ܘܠܳܐ ܚܙܳܐ ܚܒܳܠܳܐ ܒܓ̣ܰܘ ܩܰܒܪܳܐ: ܕܰܒܬܶܫܒܽܘܚܬܳܐ ܐܶܬ̣ܢܰܚܰܡ: ܘܰܐܪܡܺܝ ܬܶܡܗܳܐ ܒܢܳܛܽܘܖ̈ܶܐ: ܘܰܢܦܰܩܘ ܐܰܟܪܶܙܘ ܩܝܳܡܬܶܗ ܠܨܳܠܽܘ̈ܒܶܐ: ܕܗܰܘ ܕܰܙܩܰܦܬܽܘܢ ܘܰܩܒܰܪܬܽܘܢ: ܐܶܬ̣ܥܰܠܺܝ ܠܶܗ ܠܰܫܡܰܝܳܐ: ܫܽܘܒܚܳܐ ܠܗܰܘ ܬܽܘܩܦܳܐ: ܕܪܰܘܡܳܐ ܘܥܽܘܡܩܳܐ ܡܠܶܝܢ ܡܶܢܶܗ: ܘܕܽܘܟܬ̣ܳܐ ܙܥܽܘܪܬܳܐ ܐܶܚܰܕܬ̣ܶܗ: ܥܰܠ ܕܶܐܬ̣ܓܰܫܰܡ: ܟܰܕ̣ ܕܠܳܐ ܣܳܟܰܐܗ̱ܘ ܒܺܐܝܬ̣ܽܘܬ̣ܶܗ܀

ܠܘܛܢܝܐ ܒܩ̄: ܚ:ܚ ܠܟܽܘܢ ܛܽܘܒܰܝܟܽܘܢ

ܫܽܘܒܚܳܐ ܠܳܟ ܪܺܝܫܳܐ ܕܬܰܘܕܺܝܬ̣ܰܢ: ܫܽܘܒܚܳܐ ܠܳܟ ܝܳܗܶܒ ܬܰܪܣܺܝܬ̣ܰܢ: ܛܰܝܒܽܘܬ̣ܳܟ ܬܶܗܘܶܐ ܒܰܠܘܺܝܬ̣ܰܢ: ܘܬܰܥܒܰܪ ܡܶܢܰܢ ܟܽܠ ܒܺܝ̈ܫܳܬܳܐ܀

ܓ̣ܢܺܝܙܳܐ ܕܪܳܡ ܡܶܢ ܟܽܠ ܒܽܘܝܳܢܳܐ: ܕܰܫܦܺܝܥ ܒܖ̈ܰܚܡܶܐ ܘܰܒܚܰܘܣܳܢܳܐ: ܩܰܒܶܠ ܡܶܢܰܢ ܗܳܢ ܩܽܘܪܒܳܢܳܐ: ܕܡܶܬܩܰܪܰܒ ܚܠܳܦ ܚܰܘ̈ܒܳܬ̣ܳܐ܀

ܕܳܠܬ ܡܶܢ ܫܽܘܒܚܳܟ ܗܰܘ ܫܡܰܝܳܢܳܐ: ܘܩܰܒܶܠܬ ܥܠܰܝܟ ܡܰܘܬܳܐ ܕܨܶܒܝܳܢܳܐ: ܕܬܰܓܗܶܝܢ ܡܶܢ ܡܰܘܬܳܐ ܬܶܢܝܳܢܳܐ: ܘܬܰܣܩܰܢ ܡܳܪܝ̱ ܠܰܐܬ̣ܪܳܐ ܕܛܳܒ̈ܳܬ̣ܳܐ܀

ܫܽܘܒܚܳܐ ܠܳܟ ܐܳܘ ܦܳܪܩܰܢ ܚܰܝܳܐ: ܕܦܰܓ̣ܪܳܟ ܝܰܗ̱ܒܬ ܐܽܘܟ̣ܠܳܐ ܠܰܕܟ̣ܰܝ̈ܳܐ: ܕܒܶܗ ܢܺܐܪܬ̣ܽܘܢ ܛܽܘ̈ܒܶܐ ܕܰܫܡܰܝܳܐ: ܕܪܳܡܺܝܢ ܡܶܢ ܟܽܠܗܶܝܢ ܥܳܩ̈ܳܬ̣ܳܐ܀

ܚܘܬܡܐ ܒܩ̄: ܐܰܒܳܐ ܟܬܰܒ ܗܘܳܐ

ܒܗܳܢܳܐ ܝܰܘܡܳܐ ܥܶܠܳܝ̈ܶܐ: ܒܰܕܝܳܨܳܐ ܠܒܶܝܬ̣ ܡܺܝ̈ܬ̣ܶܐ ܢܳܚܬܺܝܢ: ܕܗܰܘ ܠܳܐ ܡܳܝܽܘܬ̣ܳܐ: ܨܒܳܐ ܕܢܶܗܘܶܐ ܡܺܝܬ̣ܳܐ: ܘܰܒܢܽܘܚܳܡܶܗ ܥܶܠܳܝ̈ܶܐ: ܛܳܣܘ̱ ܘܰܢܚܶܬܘ̱ ܘܝܰܩܰܪܘ̱ ܠܰܩܝܳܡܬܶܗ܀