ܩܝܢܬܐ ܓ

ܦܬܓܡܐ:

ܐܶܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ : ܘܰܐܝܟ ܓܰܒܪܳܐ ܕܢܰܦܼܨܶܗ ܚܰܡܪܶܗ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗܿ ܠܥܺܕ݈ܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗܿ ܫܰܝܢܳܐ ܘܢܰܛܰܪ ܝܰܠ̈ܕܝܶܗܿ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝ̈ܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܬܠܺܝܬ̣ܳܝܳܐ ܗܘܳܐ ܒܶܝܬ̣ ܡܺܝ̈ܬ̣ܶܐ: ܝܰܘ̈ܡܶܐ ܬܠܳܬ̣ܳܐ ܒܨܶܒܝܳܢܶܗ: ܘܠܳܐ ܚܙܳܐ ܚܒܳܠܳܐ ܒܓ̣ܰܘ ܩܰܒܪܳܐ: ܕܰܒܬܶܫܒܽܘܚܬܳܐ ܐܶܬ̣ܢܰܚܰܡ: ܘܰܐܪܡܺܝ ܬܶܡܗܳܐ ܒܢܳܛܽܘܖ̈ܶܐ: ܘܰܢܦܰܩܘ ܐܰܟܪܶܙܘ ܩܝܳܡܬܶܗ ܠܨܳܠܽܘ̈ܒܶܐ: ܕܗܰܘ ܕܰܙܩܰܦܬܽܘܢ ܘܰܩܒܰܪܬܽܘܢ: ܐܶܬ̣ܥܰܠܺܝ ܠܶܗ ܠܰܫܡܰܝܳܐ: ܫܽܘܒܚܳܐ ܠܗܰܘ ܬܽܘܩܦܳܐ: ܕܪܰܘܡܳܐ ܘܥܽܘܡܩܳܐ ܡܠܶܝܢ ܡܶܢܶܗ: ܘܕܽܘܟܬ̣ܳܐ ܙܥܽܘܪܬܳܐ ܐܶܚܰܕܬ̣ܶܗ: ܥܰܠ ܕܶܐܬ̣ܓܰܫܰܡ: ܟܰܕ̣ ܕܠܳܐ ܣܳܟܰܐܗ̱ܘ ܒܺܐܝܬ̣ܽܘܬ̣ܶܗ܀

ܠܘܛܢܝܐ ܒܩ̄: ܚ:ܚ ܠܟܽܘܢ ܛܽܘܒܰܝܟܽܘܢ

ܫܽܘܒܚܳܐ ܠܳܟ ܪܺܝܫܳܐ ܕܬܰܘܕܺܝܬ̣ܰܢ: ܫܽܘܒܚܳܐ ܠܳܟ ܝܳܗܶܒ ܬܰܪܣܺܝܬ̣ܰܢ: ܛܰܝܒܽܘܬ̣ܳܟ ܬܶܗܘܶܐ ܒܰܠܘܺܝܬ̣ܰܢ: ܘܬܰܥܒܰܪ ܡܶܢܰܢ ܟܽܠ ܒܺܝ̈ܫܳܬܳܐ܀

ܓ̣ܢܺܝܙܳܐ ܕܪܳܡ ܡܶܢ ܟܽܠ ܒܽܘܝܳܢܳܐ: ܕܰܫܦܺܝܥ ܒܖ̈ܰܚܡܶܐ ܘܰܒܚܰܘܣܳܢܳܐ: ܩܰܒܶܠ ܡܶܢܰܢ ܗܳܢ ܩܽܘܪܒܳܢܳܐ: ܕܡܶܬܩܰܪܰܒ ܗ̱ܽܘ ܚܠܳܦ ܚܰܘ̈ܒܳܬ̣ܳܐ܀

ܕܳܠܬ ܡܶܢ ܫܽܘܒܚܳܟ ܗܰܘ ܫܡܰܝܳܢܳܐ: ܘܩܰܒܶܠܬ ܥܠܰܝܟ ܡܰܘܬܳܐ ܕܨܶܒܝܳܢܳܐ: ܕܬܰܓܗܶܝܢ ܡܶܢ ܡܰܘܬܳܐ ܬܶܢܝܳܢܳܐ: ܘܬܰܣܩܰܢ ܡܳܪܝ̱ ܠܰܐܬ̣ܪܳܐ ܕܛܳܒ̈ܳܬ̣ܳܐ܀

ܫܽܘܒܚܳܐ ܠܳܟ ܐܳܘ ܦܳܪܩܰܢ ܚܰܝܳܐ: ܕܦܰܓ̣ܪܳܟ ܝܰܗ̱ܒܬ ܐܽܘܟ̣ܠܳܐ ܠܰܕ̈ܟ̣ܰܝܳܐ: ܕܒܶܗ ܢܺܐܪܬ̣ܽܘܢ ܛܽܘ̈ܒܶܐ ܕܰܫܡܰܝܳܐ: ܕܪܳܡܺܝܢ ܡܶܢ ܟܽܠܗܶܝܢ ܥܳܩ̈ܳܬ̣ܳܐ܀

ܚܘܬܡܐ ܒܩ̄: ܐܰܒܳܐ ܟܬܰܒ ܗܘܳܐ

ܒܗܳܢܳܐ ܝܰܘܡܳܐ ܥܶܠܳܝ̈ܶܐ: ܒܰܕܝܳܨܳܐ ܠܒܶܝܬ̣ ܡܺܝ̈ܬ̣ܶܐ ܢܳܚܬܺܝܢ: ܕܗܰܘ ܠܳܐ ܡܳܝܽܘܬ̣ܳܐ: ܨܒܳܐ ܕܢܶܗܘܶܐ ܡܺܝܬ̣ܳܐ: ܘܰܒܢܽܘܚܳܡܶܗ ܥܶܠܳܝ̈ܶܐ: ܛܳܣܘ̱ ܘܰܢܚܶܬܘ̱ ܘܝܰܩܰܪܘ̱ ܠܰܩܝܳܡܬܶܗ܀

ܐ̱ܚܪܢܐ ܚܘܬܡܐ ܒܩ̄: ܝܰܘܢܳܐ ܛܠܺܝܬܳܐ

ܒܗܳܢ ܝܰܘܡܳܐ ܒܓܰܢܬܳܐ ܚܙܳܬܶܗ: ܡܰܪܝܰܡ ܒܬܽܘܠܬܳܐ ܠܺܝܚܺܝܕܳܗ̇: ܘܕܰܡܝܰܬܶܗ ܗ̱ܘܳܐ ܠܓܰܢܳܢܳܐ: ܘܡܰܠܶܠ ܥܰܡܳܗ̇ ܒܚܰܕܽܘܬܳܐ: ܐܰܢ̱ܬܬܳܐ ܠܡܽܘܢ ܒܳܟܝܰܬܝ: ܘܰܠܡܰܢܽܘ ܒܳܥܝܰܬܝ ܒܰܐܬܪܳܐ ܕܥܰܢܺܝ̈ܕܶܐ: ܘܶܐܡܪܰܬ ܠܶܗ ܕܰܐܝܟܳܐ: ܣܳܡܽܘܗܝ ܠܫܰܦܺܝܪܳܐ: ܚܰܘܳܢܝ ܐܶܢ ܝܳܕܥܰܬ: ܕܶܐܫܩܠܺܝܘܗ̱ܝ ܘܶܐܚܕܶܐ ܒܶܗ: ܘܶܐܡܰܪ ܠܳܗ̇ ܕܩܳܡܶܬ: ܒܫܽܘܒܚܳܐ ܡܶܢ ܩܰܒܪܳܐ܀